بوست مشتت الرؤية والفكرة

05:55 AM November, 09 2020

سودانيز اون لاين
عبيد الطيب-
مكتبتى
رابط مختصر

أم قِرْف.....
في زول شافها
بتبول وبتسوّي بولها دمّاع
وأهل البادية عارفين دي بولها....
لكن يقولوا لك: (فلان دي حنونا دمّاعو كيف دمّاع أم قِرْف!!)
أم قرف حيوان زاحف،وخامل وله محار مثل القرف وتجده منطوي وبدون حركة
تحت الاشجار ذات الشعلوب اوتحت "الهشوم".
دفاعها عن نفسها( دموعها) المختلقة من البول!!!
بعض اهل كردفان يقولون دموع ام قرف
والناس الذين يأكولنها يقولون:( بول ام قرف).
طائر اسمه( ابوالرّهيو))
ناصع البياض كله ابيض ومافي طير انظف وآنق منه وأليف جدا لدرجة تضع يدك عليه
لكن سرّاق ولا يسرق الامن طائر( الكلجة) السنبر لانها اليفة ومسكينة
يسرق "قش" عشها وقوت صغارها
اهل البادية اذا ارادوا ان يصفوا احدا شديد بياض الملابس يقولون:
( نضيف كيف ابوالرِّهيوْ)
"الورل" برغل الماعز والبقر وفي نفس الوقت مع جبنه تنتفخ اوداجه
اهل البادية يتركون رغالته( الدنائة)
ويتندرون من احدهم:( فلان دي ورل قيعة)
بوست مشتت الرؤية و اقرب الي السودان السياسى
هيييي اسمك منو؟
اسمي ثورة
كضابة..... اسمك الغولة
براااي بتونس مع نفسي
كان في زول قال: شاف (الغول))
يجي يكلمني ويوصفو لي
خارج الغلتية:
(جهينة حاربونا
شدّوا زملهم جونا
ضبحنا ليهن زرززرزر ماكفّاهن....كفّاهن جودة الله
جوةالله ابوفسيّة
حمارك يارخيّة
رخيّة بت أهنّا
أم شعرا متنّا
ككّرف ل الثورة...رفيقتك اتي!!؟
مافي زول فاهم اني بقول في شنو؟
مافي مشكلة..هسع الغنا الملأ الوسايط دي
في زول فاهم وقاطع شكّو دي غنا؟
والحُكُم الفي السودان دي في زول عارف كبانيتو وين!!!؟
غايتو من زمن المغارات بشقيها
مغارات الفقرة
ومغارات النهيط
المكان واحد "السودان" والزمان واحد بس الشهر بغيب وبهل
لكن قمر السودان ماطلع تب ...
غايتو نتيجة ايقنت منها تماما الغول اني شفتو
الغول ها السودان دي
لا الليلة اهلو لاشافوه يقينا ولاركبوا دوّروا ليهو
وياجامع ويارقيب
هسع انت لقاك زول ماقال جدو صحابي
الممتع سودانا الجميل دي بنريدو ساكت
(غي التمساح ل اللدرع)
لكن والله ماعرفنالو عدل
غلبنا تب
غايتو ناس المقاولات عندهم
( مقاول الباطن)
كان لقينا شركة ضخمة نتعاقد معاها ٣٠ سنة ( مقاول باطن))
بعد داك نشوف الحاصل
الماء جاري فوق وعلي ظهره وفي باطنه
سعية ونعم اليف وغير اليف
رمال وطين وارض حمراء
دهب وبترول وحديد و.....الخ
لحوم بيضاء وحمراء
واهله جعانين
السبب ودابنادم دي
ودأبنادم المشغلب الأخفاف!!!
تجي بالليل تقرأ لواحد يتكلم عن الكرم والايثار ....الخ
مع الصباح تلقاه ظلم ابن عمه اوجاره في بئر ذهب
والسبب ودابنادم
تجي ضيف تبيت عند ودالمقدم ويكرمك يذبح لك
باكر تلقاه غنمه وارده تتر زاملتك علي الطش يقول لك:
( اقرع زاملتك فوقو صرُة ملح))
ودابنادم
ومافي زول صادق مع نفسه

إتذكرت سالم الكيجاوي،وحكاويه عن القرود،وأنا أشاهد حكام وحكومات
أهل السياسة،وأفعالهم بالوطن السمح بلحيل السوّوه(قلبة بطيخ)
من آخر نميري
حكومة الديمقراطية البعدو
وأفعال الكيزان قديما وجديدا ودي الأسوأ
وناس الحرية والتغيير والعسكر
وتجار الحروب والسياسيون الجُدد
قالوا:(القرود بعد تتملك القلبة قلبة البطّيخ (قلبة قاف معطشة)
إذا أتفقوا بياكلوها
وإن اختلفوا بشلعوها)
أكلوها لكن ماتشلعوها يا بخات الخال
ومن حكاوية الجميلة والمبدعة،أن عمه هجمت علي بلاده قرود
بتفتش عيل للبطيخة"أم دم"، أها أولا لم يعطِ الأمر إهتماما
لأنه عندما جدع التيراب قال:(للغاشي والماشي والخاطر)
يفقع ويشرب وياكل
لكن مايشيل في مخلايتو
أها القرود عصرت علي البلاد شوية
قام جاب كجامتو وقجّاه للقرود
(كجّامة الحداحيد الملانة سنون
قبضة فينا يامولاي تكون في العون)
الليل جا والقرود دخلت البلاد وشبعت وفرّت
والقرود بعد شبعت بوّمت وعيونها بتشوف طشاش طشاش
ومع الدغش شالت الكجامة في واحد أبوكنقِر
كسرت كراعو ...لكن بحاسة الغبن يعرف العاقبة
شال ضَلعتو وقلع معاهن، ومع شقّة السرحان عم سالم
عقر الكجامة ..ولقى عيل مداستها
مسك دربو والدم تحتو هتاف شنة...
والقرود شافت الزول لافح فرارو يخب ساكت
قلعن روكا..والقرد ب وراهن يكلعت ويعتب، والجري غلبو
رجعن منهن قرود منّاع وإتربعنوا وقلعن وعم سال عاد يعجبك
قلع قَلْعَتُو العجيبة وزازاهن وضايقن والقرد المكسور محّق جريهن
أها بعد بقن في الحلوة جدعنّو وقلعن،
عم سالم صاح هيي ود أم جعاب الليلة تار بطيخي
المهم فرار أبولَي واحد وجاب خبره،قطع ضيلو دايرو ل سوطو ضبّةورجع
أها بعد يومين القرود إتنادت وهجمت علي البلاد،شُغل الإنتقام والضُر
حتي البرُّول الصغيرة قطعتها، وإتناولت العروق شلعتها وقطّعتها
زولنا جي شاف بلادو وإتهوّل في ضُر القرود
مشى ل جارتو وقال لها:(المريسة دي كووولها سويها دقّة خريط)
باكر جهزت وشال جردلو ودخل البلاد، وأي قعفة بطيخة كبيرة
نضفها ودفهنا من وسط،وملاها دقّة
ناس أبّان صليب الدغش هجموا البلاد ولقوا الدقّة وعاد الواحد
نامن يقش الحُتحت من شنبو ومعاها إنبصاطة
سكروا سكرة طيني، وقفوا شوشلّي ورقدوا قبلهن
عم سالم جي مع شقّة الكضّاب،شاف القرود متندلين ونوم العافية
أها حلف قال:( يمسك القرد من إيدو ويرفعها
والقرد يفتح عينو يعاين ليهو وبردلب يغمض ويرقد في مكانو
ابادها إبادة وأنتقم منها
ورد في الحكي الفوق دي "شقّة الكضّاب" والكبابيش يطلقون علي طلوع الفجر الكاذب"شقّة الكضّاب"،
ياخ الكبابيش ديل لهم عبقرية في لغتهم المتداولة بينهم تحتاج لكتابة مغايرة يقول الشاعر العجيب الساعور:
( بنوتنا البِسوَّن دِلْكَة المَهَبَاب
جبادات فريقهن حيكَة الدّيناب
خَرْج الرِّيف لَبَاسِن بِقْدِلَنْبُو تِياب
عَرَّاكات جَبينْهِن شَقَّة الكَضَّاب
رشَّاشَات قرونْهِن ريحة البَانْتَاب
مَسْتُورَات قِنَاع ماهِنْ من الخِيَّاب
مع أم بَشَّار كَتَبْهِن مَشَّقِلُّو كراب)

من غنا سنة بتشبه السنة دي في بسرها
والخير جي دافق من نفس البلد العصرتنا علي التطبيع
وغنينا علي( ريقن) الساعدنا
لكن ترامب الله يضروا شال صريرتنا الداخرنها ل الرشاش
(ريقن اني سميتو كارب زندو
واتحيرت في العيش والدقيق العندو
العتّالة ديلا يدلّوا ديلا يسندو
والقسّام يقسّم والدهن هيلندو
ريقن اللسد المربع كامن
قالج ام قجّة في العقبة ام صقورا حامن
دفر العيش كتير خلّى العقل مطّامن
وعيبو الفيهو عيل ب الرسول مو مآمن)
السنة دي سنة فسلة بلحيل، والبلد حيلها عليكم يا (الفي المهجر)
ربنا يوسع عليكم في رزقه، واصلكم جمال شيل وشيالين تقيلة
ابقوا عشرة علي الفي النجوع والقرى والريف ومريض المدن
سنة صرمة تب
واحد من ظرفاء اهل الريف ايام( جفيّف عمر ) عام (1991)
قال:
كنت بحلق دقني بلامنضرة من الصحة العاجباني
هسع مع المنضرة الا انفخ الكضوم
في سنة من السنين الصرم احد المعلمين تم نقلة لمدرسة( قمبر)
وكان وقتئذ ضربها الجفاف ورحلوا اهل البادية منها...اها رفص ان ينفذ النقل
وكانت حجته:
( قمبر دي حلف الكلب نامن يدور ينبح الا ينتكل علي شجرة حتان يقول: هو)
عارف عندما استدعي ذاكرتي من فننا الشعبي واشعار الشعراء والغنا والكثير من التراث
في مدح الانسان السوداني اردد وبصوت عالي
ياخ كذب كضب ساكت نفخ
وينو؟ الحاكمننا منذ ١٩٥٤
اياهم سودانيين من عضمنا ولحمنا ماجابوا شي غير الخراب والسراب والحروب والفتن.....
غايتو برا فرح ودتكوك مامرقت ب زول تب..

أها البدو بعد أن عمهم الخريف ورجعوا إلي مدامرهم قال شاعرهم:
عيشك مو من قرفة
ولبنك مو من خلفة
جنسك ما بنعرفا
نعلك ماك ود غلفة
الله يجازي محن، المسنوح ترامب المَدْعِي رماه الديك الأبيض
*مَدْعِي دي بلغة البادية،لم أجد لها مقابل أو مرادف ولاترجمة
أخونا حنفي حاج الطيب،عندما حرن ترامب في الإنتخابات وأتعايف
قال:(ترامب دي عَمِيكة).

عودا جميلا العبيد
صحبي المتمم كيفي
قال مظفر
قتلتنا الردة
قتلتنا ان الواحد فينا
يحمل في الداخل ضده
يا العبيد اخوي بقينا عكاز طرور اب ضربة سلامة

تحياتي وسلام مطبوق يا ودصُرة منبرنا
ياخ الإنتقالية علي قول أهل البادية
بقت لينا كيف "زرد" الكلاب أولو حُلُّو وآخره مجابدة!!

شئ فهمنا و شئ خمنا وشئ بالمرة

اهلاً بك يا ود الطيب

تحياتي يادكتورة إخلاص وسلام ومعزة صادقة
عندنا بدوي جميل وصايم رمضان والدنيا صيف قهبونة وعطش بلحيل
أها بعد مافطر ردد (والله كان ماها جغيمات الوضو) العطش قطعنا

والله يا ود الطيب ده ما بوست مشتت الفكرة والرؤية ولكنه بوست جامع للرؤية والفكرة وبوست كامل الدسم وشحمان بس ما تقيف لانك كان وقفت في نص الطريق حتعمله سكيم(skim)...
.وشكرا...
والله يديك الصحة والعافية ويبعدك من الكرونا....وقريب حتسمع انو الكرونا اصبح في خبر كان...المره دي الخبر صحي وما كضب زي المرات الفاتت ،،فشركة الادوية الامريكية، وبالتعاون مع شركة المانية،وجدت المصل الواقي من الفيروس القاتل، لكنها حتاكد الخبر بعد يوم ٢٠ يناير عشان ما يجي ناطي طرمبة ويقول انه هو الاكتشف المصل......

الوطن يا العبيد تتناهشه الكلاب
الا نشوف لينا مريسة دقة جليط ونكاورهم كلهم في قطية قش ونطلق فيهم النار

السودان ياودالصُرّة داير زول يِدِل وقلبوا علي البلد،مثل الدليل السراج ودطه:
(الخلق العضام ل الحَيْ طوال وقصارا
يدِلك يا أم دقون يديكي حظ وجباره)

تحياتي وسلامي ومعزتي الصادقة الأخت إمتثال
الكرونا بقت لينا زي الحكومة الإنتقالية
هي ذاتها فكينا خبرها...لكن تبعاتها بشتنتنا بلحيلهسع لبس الكمامة "دبَّر" إضنينا والكمامة سوتنا جُهُر !!!
دي الحكومة الإنتقالية بقينا جُهُروالزول (اللجهر) غيبة الشمس تاني مابشوف
ونحن من حكومة الإنتقالية جُهر، ولكن خايفين كمان نعمى تب

شديد إعتذاري يا إمتثال علي كتابتي لإسمك خطأ

سلام عبيد و عودا حميد

Quote: *مَدْعِي دي بلغة البادية،لم أجد لها مقابل أو مرادف ولاترجمة

عندنا فى الشمال بتعنى الزول الصابتو اللعىة
كان من ابوهو كان من فقيرا واصل
و بتدى معنى ملعون
اها باركين هنا

ول أبا عبيد
طولت الغيبة ,,
والله أنت الأبداع يمشي زهواً كما الطاؤوس خيلاءً

ما قادر أقول شنو .. بقرأ بس

بريمة

تحياتي وسلامي مطبوق ومردف أخي بريمة من عتاميرك في أمريكا إلي عواتيل الغرّة
قلبنا علي وطنا علي وطنه...
والوطن أمانة ماهو وطن جميل وسمح وعلي قول الشاعرة بت دوما:
(مو غِبيّا بدِسُّو
ؤلو رِدَيّا بَلسُّو)
هل السودان في عهد "الهمج" !!!؟آخر سلطنة سنار
الحال تُخبرنا بذلك(سياسي/إجتماعي/إبداعي/ ثقافي/إعلامي/أمني )
(شيوخ قبائل /شيوخ مسيد/السلطة الدينية/الشارع.....الخ)
نحتاج من يخبر رئيس الوزراء أن (الحرية والتغيير)
بتغطس حجر البلد....
مافيها خير
الله يعلم مُطرقها يابسة وناشفة....
وماها خضرا تب.....
قُولْها الفرق مالم....
وعلي قول شيخنا الفرجوني:
(أمسِك في الرفيق الشّال معاكا الهم
والمافيهو خير قولّو:الفرق مالم)
الحكام الجُدد ديل سوّاحين فريق وعرب حُوح ساكت!!
نفس عُمد شُغل إنقاذ...علي قول السلطان ودبحر الدين...
ياحمدوك غيّر رباعتك ديل،ناس دبيرين تب
وغيّر(فكرتك/خطّتك)دي إيّاها زاملتك الراكب عليها ،
مابتوصلك جادول الخير والنماء للسودان
(جادول الزِّرد مابركبولو حماره
عيل الخبُّو بشبه قنّة أم شُمّاره)
البرهان دي زول "قوفاط" ساكت.
وحمدوك إتباشرنابو...لكن بقالنا(مك بير)
ومن عجائب الحكومة دي قرأت قبل أيام والكاتب دكتور الخضر،القالوا:
"طبيق دكتور حمدوك" كتب:
(ناس إزالة التمكين طلبوا نسخة
من قاعدة بيانات سرية تتعلق بمدفوعات مالية
تخص وحدات الدولة السودانية والتي تتعامل
عبر قاعدة بيانات وزارة المالية....
ثم طلبوا نسخة أُخرى...وقالوا:"ضاعت")
ومن عجائبهم أيضا سمعت قبل أيّام
نائب رئيس مجلس السيادة قال:
(الحكومة إشترت الدولار من السوق،
من أجل إتفاقها مع أمريكا
في رفع إسم السودان من الإرهاب)
الله لا تصيبنا.......
ورفع إسم السودان من الإرهاب في عِش الطير،
علي قول:(الخطّاط/الرمّالي)
وبيّنتوا تعليم ومدارس!!؟
ومن عجائب الغرائب
ورد بمنبر سودانيز أونلاين
في 20 فبراير أعلنت الشرطة عن إنهاء خدمة 1060 ضابط شرطة
تم فصلهم تعسيفيا،وقام الضباط الذين تم فصلهم
بتقديم دعوي لمحمة الطعون الإدارية
ولكن الخلاصة عندما خاطبت المحكمة وزارة الداخلية لمدها بنسخة في قرار الكشوفات
،تبين أن وزير الداخلية لم يوصِ بإقالة هؤلاء الضباط،ولا يوجد كشف لعام 2020
في إرشيف الشرطة، وكذا المجلس السادي عندما خاطبيتة المحكمة لاعلم له.
وشايف الأيام دي بعض المسؤولين،ومع الضائقة المعيشية
بكبِّروا في كوم أحزابهم من هسع.
قناعة تامةمن الأخطاء الفادحة لرئيس الوزراء
إختيار الولاة من الأحزاب وكمان عبر (لجان الحرية والتغيير)
أقولها وأعرف الكثير من تركيبة الولايات وقلتها قبل عام:
(أدركوا الولايات كلها، وأقيلوا الولاة جميعا وبلا إستثناء
وعينوا حكام عسكريين معاشيين ،مشهود لهم بالكفاءة والدربة
ولا أحزاب لهم،ولم يعملوا مع الإنقاذ
حتي لا ينفلت الأمن)
حذاري حذاري من آخر حكم الخليفة عبدالله
إدّرع رقبتو ساكت،بلا عدل ولاخطة ولافكرة....
وفي النهاية كمّل ناسو وبقى في حلوتو.
*لاحظوا الخليفة شعاراته قال:(مهدية عديل وهو خليفة سيدنا أبوبكر).
وبعد جانا الإستعمار،ومن محن السياسين،أن جعلوا المواطن يقول:
(حليل زمن الإستعمار،أريتنا بالإنجليز)
الشباب إستشهدوا وقدموا أرواحهم رخيصة من أجل الوطن،
وإلي تاريخه بعضهم مفقود، ولم يقتص لهم، والحي منهم مستقبله مظلم
(التعليم معطّل).
تجي الحرية والتغيير وتسرق الثورة،ومعاهم المجلس العسكري
يجووعوا خلق الله ويضيقوها عليهم،عشان يقولوا:
(حليل الكيزان) !!
(الحرية والتغيير والكيزان) كِلي في شاة
الناس ديل أم فكّوا ساكت..........
معزتي لكم

شيخنا جلالدونا تحياتنا وسلامنا ومعزتنا
(مَدْعِي) دي عجيبة مع ماأورده شخصكم الكريم أيضا الزول المقرّم الذي لايبالي بالعواقب
ومجرم لا الإجرام العصري، وإنما إجرام في سلوكه كلّه
و(مَدعية) للمرأة الهايلوب اللّعوب
عارف أخي جلال
في البشوفو في رؤساء الدول البشبهو المافيا ديل وشفوت...
السودان محتاج رئيس وزراء، ووزراء مهجراويين/مهاجرية وحرفاء
ولايخلون من النّهيط والهمبتة...
يوقّفوا ناس أبوحبيل ديل علي طولهم...
يتّابنوا شركات التعدين والذهب وشركات الأمن وشركات"أم غمردوس" دي والماكلنُّو الروس والصينين
وإخوانهم السودانيين كثير خلاااس وقطع شك بِحل الضايقة...

مدعى بفتح الميم عندنا تعني الزول الذي لا ترجو توبته
وزي استعمالاتنا السودانية المدهشة بتعني فعلا الزول المحنك والشجاع والذي لا يهاب شئ
والزول الداهية

ياودالصُرّة أهل الرّيف والبادية فصحاء "فصاح خلااس)
شوف (مدْعي/يّة) الشاعر الممطعون الكباشي، أطلقها علي الناقة "هبّارة":
(هبّارة الزِّرار الشّالِق المَدْعِيّي
مابتنسرحي يا المِن الحَجَر مَسْعيّي
إنْقيبِك بِنُق شلّوفتُو يوت مَشوِيّي
محكوك ساقُو شَرْط سُروَالو لي التِّكّيّي)

سلام و محبة
ا عبيد كلامك حلو بس اخوي
الملافظ سعد...يعني
بدل الكلمة قول زرد
الكلاب..

Quote: سلام و محبة ا عبيد كلامك حلو بس اخوي الملافظ سعد...يعني بدل الكلمة قول زرد الكلاب..

تحياتي وسلامي الأخ عمرنملة ومعزة صادقة
شكرا للتنبيه والسماحة وربنا يكثر من أمثالكم
ونستبدلها الآن
ودمت عامرا وشفيفا وطيبا

في زول شاف(الشكلوتة) أم جِنَّن في اللعوتة!!!؟
قالوا: أحدهم هرب من المرفعيب
وطرده حتي تسلق في شجرة باسقة
وأثناء ما "جَبد" نفسه..
حسَّ ب يد علي كتفه....
إلتف نحوها وإذا بها "الشّكلوتة"...
فصاحت:"هييي إن مرقت من دي...
أني إنجم"
"الشكلوتة" قالوا: من لحسة واحدة بلسانها
تنزع اللّحم من وجهك وتتركه عظم فقط
هربنا من المجلس الإنقالي...
فكانت الحكومة الإنتقالية بشقيها(العسكري والمدني)
هي (الشّكلوتة)
الشباب أرادوها وفجروها ثورة كرامة وثورة وعَي وثورة مَعزة للسودان
و(الحرية والتغيير) بكل أحزابها وعسكرها وتنوقراطها بقوا سبابة...
وباعوها في سوق الله أكبر
(أبوالرّهيو) مايغشكم ب نضافة جلدو وبياض ريشو..
(أبوالرّهيو) سرّاق ومابسرق إلا من الطيور المسكينة العيفة!!!
بسرق "قش" وقوت "الكلجة" السنمبر...
البدويُّ يقول:
السودان في عهد "الهمج" !!!؟آخر سلطنة سنار
الحال تُخبرنا بذلك(سياسي/إجتماعي/إبداعي/ ثقافي/إعلامي/أمني )
(شيوخ قبائل /شيوخ مسيد/السلطة الدينية/الشارع.....الخ)
ماتسمعوا الإعلام ...
عاينوا بعيون زرقاء اليمامة،سترون عجاح الروس كاتف فوق
الإنتقالية كيف (كليب بت الشَّقَرْدِي )
وعن القالوا: الإنتقالية سوّاقها دكتور حمدوك
نتمثل بهذا المربوع من الغنا
يقول شاعرنا المفخرة عمدتنا الفرجوني:
ياأرباب وساع الصي بدورلو مراكب
جنس الفوقو زي صُم الحجار مِتراكب
الكرّهني في اللَّوري الونستو كراكب
قابض راسو واحد وفيهو مية راكب

السلام عليكم أخانا الكباشي الأريب
الحبيب الهذيب ال عبيد ود الطيب، أبالطِيب،
والبركة يا أخي الكريم، في الشوفة وال سَمعَة والقراية والرؤية
بل ومشاهدة التشتيتة ذاتو والاتفاق حولها ومعها وبها وما فيها من
الواعدية الخَيّــِــرَة إن شاء الله تعالى، بما يليها ..
وكلامك صاح والله، ليس بخصوص شتات ورؤية البوست بالطبع؛
ولكن في الحال السودانية ال يومين ديل، ولللّا قول: بل من "عامنأوّل "
وُ "لاعِند" الليلة دي والضحوة دييييك..!
فقد أضحى حال سوداننا العريق، في أشبه بال فوضى المُريبة Suspicious Chaos
ولعلها الفوضى العارمة، والمعروفة بكونها الفوضى غير الخلاّقة..!
وطالما أن الفوضى والشتات حاصلان، فلا أقلّ - بل لا سِعة - إلّا
من مَــلْــخِ "وِقاية" من نسيجك القطيفي الإبداعي، يملأ هذا البوست
وإنّي لمتصرّف في بعضِ المقطع آل.دوبيتي:
ال خــَــلَــق ال عُضام للحَي طُوال وقُصارى..
يـِـدِلــّــِك يا "أم عجايب"* يـَــدِّيكِ حظ وُ "دَبارَة"
و "أم عجايب" دي قد تكون " بلدنا الباكي فاقِد" من هوائل ما
يقع عليه من أبنائه، يدّعون عليه الرأمة والمظاءرة وهم من
الأخسرين أعمالا. وفيما أعتقد - ولو مُرتجلاً - فما بعد
البكاء إلّا الفرح والعربيد، كما أظُن.
كذلك ربما تكون أم عجايب، معنيٌّ بها الثورة الديسمبرية
ذات نفسها، ذلك أنها بالفعلوالوقائع، كانت وما تزال عامرة بالعجايب؛
من حظوظ و دَبارات، وتنطّع و "عوارات" و "أبلسة" و "حماقات" .. !!
لكن الجيّد أنها ثورة وعي، وما زالت مستمرّة.
عشمي أن أعود لتتميم عَزيقي أعلاه في المقطع الدوبيتي المتصرّف فيه،
ولكن قبل مغادرتي مكاني هذا، يطيب لي يا صديقي ود الطيب، أن ألفت
ذائقتك الشاعرية لهذا النص السودانوي الطريب وقد غنّته فِرقة عِقد الجلاد،
ولا أعرف شاعره/ته maybe وإنّي لــمُستفتيك فيه:
هل هو جيّد بالمقارَنة.. وما مدى سِعة الإلهام منه وفيهو؟ ومَن قائله..؟
ولا أنسى، بأني قد تصرّفتُ فيه ببعض الاستدخالات أيضا. وذلك من بعد
أن فهِمتُ أن المقصود بشبيه البدر، هو السودان .. أو ذلك ما كان ينبغي، فهاكَ
: يا شبيه البدر حسناً وضياءً ومثالا ..
ياشبيه الغصن ليناً وقواماً واعتدالا ..
أنت مثل الورد لوناً ونسيما ودلالا ..
أنت مثل الصبح نوراًوبهاءً واشتهارا
إن زارنا فـــ الكربِ زالا ..
طيفك المعطون حُبا لا يُوارَى
كم زارنا لمّا غدا .. وبالكرب سارا ..
سارَ .. زالا .. سارَ زالا ما ســرّنا وبالكربِ زالا

Quote: وإنّي لمتصرّف! في المقطع آل.دوبيتي: ال خــَــلَــق ال عُضام للحَي طُوال وقُصارى.. يـِـدِلــّــِك يا "أم عجايب"* يـَــدِّيكِ حظ وُ "دَبارَة" و "أم عجايب" دي قد تكون " بلدنا الباكي فاقِد" من هوائل ما يقع عليه من أبنائه، يدّعون عليه الرأمة والمظاءرة وهم من الأخسرين أعمالا. وفيما أعتقد - ولو مُرتجلاً - فما بعد البكاء إلّا الفرح والعربيد، كما أظُن. كذلك ربما تكون أم عجايب، معنيٌّ بها الثورة الديسمبرية ذات نفسها، ذلك أنها بالفعل والوقائع، كانت وما تزال عامرة بالعجايب؛ من حظوظ و دَبارات، وتنطّع و "عوارات" و "أبلسة" و "حماقات" .. لكن الجيّد أنها ثورة وعي، وما زالت مستمرّة

تحياتي الشفيف النابه والرجل العامر استاذنا محمّد أبوجودة
نعم صدقت سودانّا السمح وثورتنا الخريف رتوعنا
الشايلة نفل مدنا وريفنا وربوعنا ونجوعنا
عارف يقيني أن الثورة كما تفضلت (ثورة وعي) ومازالت مستمرة
لكنني خوّافا بخاف من البجيب اللوم "الطولة"
والطولة بتجيب الهولة والهولة رفيقتها الهملة الهَمَلة أم قرن!!!
عارف ياصديقي الحصيف عندما أتفحّص هؤلاء الشباب كنت أمنّي نفسي اللوّامة،أن الإنتقالية وخاصة
الحرية والتغيير وتجمع المهنيين يقوموا (بعِقال أبوزيد)
لكنني أمنياتي راحة بابح ...
هؤلاء بعد أن رأيتهم جميعا يتجاهلون أشواق وأرواح الشباب/ات
وقود هذه الثورة وعصبها الحي
إنفض ميدانهم بجسده،"مادة" فروح شبابه/اته الوثّابة في قلب كل ثائر
وإنموذج وعيه ودولته في حنايا كل مواطن ومواطنة،
والآن وَعي الثورة في كل بيت وفي كل حارة وفي الحضر والريف وحتي في دوداب البوادي
ولدي إيمان تام أن هذا الوعي هو عصاية عِز الثورة
وعلي قول ودالطاهر(مقنية وعصاية عز وماتنغلبي)
لكن الآن الشباب بعاين ب الطوّالة
البدويّ العامر يقول: يوما ما سيدرك أهل السودان أنهم أضاعوا ثورة واضاعوا شبابا هم هدية السماء
عارف ياصديقي عندما آآنس ذاكرتي أخاف جدا من هذه المشاهد
المشهد السياسي ،وشوفوا الفشل منذ الإستقلال وحتي ماقبله
المشهد الإجتماعي وكل زول جدو الصحابي فلان أو النبي فلان
المشهد الأمني والقتال لأتفه الأسباب والقتل للفي الجيب وكان بابح
المشهد الإقتصادي والفساد والطمع والجشع (مسؤول/تاجر/موظف)
المشهد الديني وكل زول علي حق ويكفر الآخر والإفتاء من كل زول
المشهد الإبداعي والشعوذة والذوق الهمجي والنظم البقى شعر بقدرة قادر
والمشهد الإسفيري وشوفو الكذب والنفج الهبوب والنفخ الفاضي
عارف يا استاذنا لم أك يوما من المتشايمين،ولكن هذا الوعي أراه في الشباب فقط
والشجرة فروعها بدون عروقها مابتقيف!!!
بمعني وعي ثورتنا "هامش" وربما أكون مخظئا أو إنطباعي ..
وسبب ذلك البحصل قدامنا أولا كان من الأحزاب جميعا أو من الحروب والفتن والجهوية والقبيلية وحتي المناطقية..الخ