ليه النخبة المهيمنة تخاف من السلام...ليه دايرين الحرب يستمر... very sad

النخبة المركزية الفاشلة التي سيطرت على المشهد السياسي السوداني منذ الاستقلال....
ليه!
ليه

ليه عاوزين الحرب يستمر في اطراف و يموت الناس في الاطراف
ليه ما دايرين اهل الهامش يكونوا شركاء
اصيلين في الوطن...
ليه عند النخبة حل مشكلة الخبز في الخرطوم متقدم على وقف اراقة الدماء
ياخي السلام كويس
وياخي السودان في مفترق الطرق خلو الانانية وتعالوا نقعد و نبني وطن يتسع للجميع
و ياخي احنا كلنا سودانيين مافي اي فرق بيننا....
حتى اشكالنا الفروقات الانتو شايفينها دي فروقات متوهمة و لا يراها الآخرين....
هم يعرفون الزول السوداني و بث!
النخبة التي سيطرت على السودان منذ الاستقلال كانت فاشلة...
و الدليل واقع اليوم...
السودان في حاجة الى انتقال في مستوى منظومة التفكير السياسي الكلي (Total political system failure )بشكل جوهري
السودان محتاج للخروج من وحل الاصطراع الايديولوجي.... و من وحل الثقافة السياسية المستلبة..
ومن حكم الاحزاب المستوردة...
السودان محتاج الى تفكير سياسي جديد.....الى عقد جديد...الى نوع جديد من ساسة...لو كلهم من شمالية ما مشكلة..لو كلهم من ..توتي ما مشكلة.... لو كلهم من ام روابة ما مشكلة.... لو كلهم من كادوقلي ما مشكلة....
المهم العقل السياسي الواعي لتنوع هذا الوطن وتعقيدات مشكلاته....
عقل سياسي يفكر خارج الصندوق السياسي الفاشل منذ الخمسين سنة الضاعت من عمر هذا الوطن
محتاجين الى تحرير الوظيفة العامة ....من الوزير الى الغفير من ثقافة الغنيمة...
الى افق الخدمة...
We need public servants
Not
Public Owners

ان يبقى اداء الموظف ...... معيار....
و قبول المواطن المطحون لهذا الاداء ...هي القياس...
ما ممكن وزير ما قادر توفر خبز لشعبك و انت موجود في الوظيفة
و ما ممكن وزير ما قادر توفر دواء لشعبك وانت قاعد في الوظيفة...
ثقافة الغنيمة يجعل هذا الخادم يفهم بشكل مقلوب...
يفهم بان الشعب في خدمته وليس العكس...
وحتى نقلب الصورة ....امامنا طريق طويل...

فكونا من غوغاء الايديولوجيا .....

...كوز
...شيوعي
...ناصري
...بعثي....
ما علاقة كل هذا بالوطن....
هل يعقل ان يحكم دولة مثل السودان بعراقة ضاربة في جذور التاريخ ان يحكمه رئيس ناصري مثلا لنبقى ولاية مصرية
او رئيس اخونجي ليبقى السودان ولاية مصرية او تركية ....
او رئيس بعثي ليبقى السودان ولاية عراقية او سورية
تأمل لفكرة القيادة القطرية....
تفكير سياسي متجاوز لحدود الوطن.... عقلية سياسية استلابية كاملة الدسم...
لقد آن الاوان كسودانيين ان لا نخاف من بعضنا
ان لا نصنع اوهام و نضخمها ...
نحن شعب واحد

خلونا نوقف الحروب
و نبني بلادنا على توافق جماعي..
ليس مهما من يحكم...
و لكن الزول الداير يحكم السودان لازم
عقلوا يكون اوسع من حدود الخرطوم...و يتحرر من عقلية النخبة الدوغمائية المغلقة ........الوطن للجميع....
اذا في طوبة واحدة اتبنت في الخرطوم من مال الدولة لازم الطوبة دي تتبني في اي شبر من أرض السودان
ولو في خدمة يتمتع بها المواطن في الخرطوم من مال الدولة لازم الخدمة دي يتمتع بها اي مواطن في ارض السودان
المشكلة المركزية في السودان اليوم ان النخبة المنظرة تعتقد متوهما و عايش الدور منذ الاستقلال بان السودان يعني
شركة خاصة تخدم اجندة النخبة الفاشلة....
و الدليل صراخ النخبة على اتفاق سلام الذي اوقف الحرب قائلا ان حل صفوف الخبز في الخرطوم اهم من ايقاف الحرب.
نعم حل صفوا الخبز مهم ولكن كيف تريد ان تحل مشكلة صفوف الخبز مع استمرار الحرب
نخبة انانية و غبية و فاقدة للوطنية و سيورد السودان المهالك.

د. بشار سلام
الرافضين السلام من مكونات ق ح ت
و بالعديل و الدوغري خايفين من خسران مكاسب
و امتيازات و تأثير حازوا عليها بالفهلوة السياسية.

و هم خاشين بصرفتين ،اعوانهم في الجهاز الحكومي
وفي نفس الوقت شغالين نشطاء و معارضين لارضاء
الاصوات الغاضبة من اداء الجهاز التنفيذي و الذي هو عاجز
و مشلول بسببهم هم ،و بسبب ازدواجية مواقفهم.

رفضهم للسلام بسبب دخول اللاعبين الجدد و امكانية تغيير المعادلة
"و أتمنى أن يكون موقف العائدون في صف الانتقالية و الديمقراطية
و أن يستعدلوا خط سير المدنية.

سلام دكتور بشار و ناصر
القصة يا ناصر للأسف ما بعض مكونات قحت و خوف على المناصب كما تبدو للأسف الأزمة أكبر من كدا
ازمة عقلية لا ترى في الوطن وطنا واحدا و شعبا واحدا, حتى ولو انكرت على العلن لكن في العقل الباطن ترى الاقاليم وسكانها مجرد اقاليم وسكان اقاليم!
مجرد الحديث عن حقوق و مساواة في السلطة و الثروة ترى فيه هذه العقلية تعدي على مكاسبها التاريخية و ظلم لها
العقلية الفسرت أخذ دارفور لأربعين في المائة من واردها و 750 مليون من صندوق الايرادات القومية من كل الموازنة السودانية باعتباره مأخوذ من موارد الشمال و ظلم له
العقلية التي لم ولن تعرف رئيس للبلاد أو قائد عام للجيش من خارج جهات معينة!
بس الكويس انه لم تعد هذه العقلية و اصحابها هم اصحاب القرار و الكلمة النهائية في أمر السودان
فلينبحوا ما طاب لهم النباح في الاسافير, قد تجاوزهم الزمن و الواقع

قراة خاطئة
ابو كدوك قائد الجيش هل كل من الشمال
الازهري هل كان من الشمال ، عبود هل كان
من الشمال ، الثورات قامت ضد
من ظلم ،لم يحتضن احداً البشير بل كان كثير
من الشماليين ضده ، الظلم والظالم لا يميزون.

اكثر شخص مكروه وسط الشمال هو علي عثمان

لو قيل تخصص نسبة 50% من الميزانية لبناء
مدارس وجامعات في الغرب هل تعتقد ان احدااً
سيعترض ؟ اعطاء الاموال هكذا لا يصح.
الاموال تكرس لمشاريع ، والتمييز يكون بالحق

هل في السودان نص ان الجامعات تكون نسبة
50% لابناء جهة ما ل نعدله ؟! ما هكذا تبني الامم
وان هي الا ظلم جديد وتبديل مظلمة باخري

اسهل شئ رمي الاخر بالتهم ، نحلم
بوطن يستحق ان يعيش به السوداني
نحلم بنهضة ، ما لم نجده نحن ان تجده
الاجيال الاتية ، وقف التنابذ والصاق الصفات
السالبه المتخيلة بالاخر.

ليس كل من وقف بالضد من طرح يعني انه
ضد تقدم البلد ولكن يري عيوباً ، سدها وتقويمها
يجعلها تعم الجميع ، في يوم ما كانت الفاشر
الثانوية من اقوي المدارس وكانت الوضعين مركز
مهم ، انسان المنطقة يحب ان يهتم به من نخبه ، النخب
في الشمال خانت ، و جميع النخب . الهامش
في كل البلد

يا دكتور اخلاص اذا ما عندك غضاضة في تولي رئيس جمهورية او رئيس وزراء أو قائد عام للجيش من غير الجهات التولت المناصب دي منذ السودنة يبقى انت لست معنية بحديثي ولا داعي تتحسسي منه

Quote: الأزمة أكبر من كدا ازمة عقلية لا ترى في الوطن وطنا واحدا و شعبا واحدا, حتى ولو انكرت على العلن لكن في العقل الباطن ترى الاقاليم وسكانها مجرد اقاليم وسكان اقاليم! مجرد الحديث عن حقوق و مساواة في السلطة و الثروة ترى فيه هذه العقلية تعدي على مكاسبها التاريخية و ظلم لها العقلية الفسرت أخذ دارفور لأربعين في المائة من واردها و 750 مليون من صندوق الايرادات القومية من كل الموازنة السودانية باعتباره مأخوذ من موارد الشمال و ظلم له العقلية التي لم ولن تعرف رئيس للبلاد أو قائد عام للجيش من خارج جهات معينة! بس الكويس انه لم تعد هذه العقلية و اصحابها هم اصحاب القرار و الكلمة النهائية في أمر السودان فلينبحوا ما طاب لهم النباح في الاسافير, قد تجاوزهم الزمن و الواقع

دُق!
دوِّن والله يهون!

__
أضرب الفلول.


==============================

Quote: ابو كدوك قائد الجيش هل كل من الشمال الازهري هل كان من الشمال ، عبود هل كان من الشمال ، الثورات قامت ضد من ظلم ،لم يحتضن احداً البشير بل كان كثير من الشماليين ضده ، الظلم والظالم لا يميزون. اكثر شخص مكروه وسط الشمال هو علي عثمان

كلهم من الشمال أو محسوبين على (عقليات) الشمال أو مكوناته.

واحد قال يسلم أرض الجنوب صحراء
وواحد محسوب على طائفية الشمال
وواحد شمالي عديل تربية مصر
وواحد بتاع الدارفورية، احتضنتوهوا ولا نكرتوهوا ياهو المنكم، بل أهله طلعوا مسيرة رفضاً للجنائية
وواحد بتاع (shoot to kill) يكون روسي قال يعني؟

ولو ديل ما من الشمال يبقى (الشمال مظلوم) فعلاً والله،
والمفروض الله يجعل فيهو شوية أشرار هناك.

____
لكف العين وكدة.



===========================

Quote: وياخي السودان في مفترق الطرق خلو الانانية وتعالوا نقعد و نبني وطن يتسع للجميع و ياخي احنا كلنا سودانيين مافي اي فرق بيننا....

وهم بيهمهم الوطن قال ليك؟
عادي يفرتقوهوا لعشرين قطعة، تفتكر واجعهم!
الأرض بتوجع سيدها يا أخ بشار وديل مستعدين يبيعوا بالمجان سعياً لاعتراف ونسب.

ويا أخ بشار
هم القال ليك معترفين بأنهم (سودانيين) منو؟
ياهم معاك في المنبر دا البقول عباسي والبقول ألماني والبقول تركي، وفي هنود برضك،
مافيهم زول بيعترف ليك بأنه تكروري، أبداً.
ما هي دي الاستغما البسببها رافضين كونهم (سودانيين)، المفردة في ذاتها صادمة لوعيهم المستلب.

فحكاية تقنعهم بالقعاد سواء دي مشكلة (كبيرة) عندهم!
خليك من قبولهم بعدم وجود (فروقات)، لأنهم أصلاً عبر الأنانية الأنت أشرت إليها بيكرسوا لتعميق الفروقات
وصولاً لمرحلة الإحساس بالانتماء لخارج القارة، وللهروب من واقع وتاريخ مركوز في الدواخل، عبر تكويش السلطة والثروة.

دي الأساليب القديمة الكانت ممارسة من أيام السلف البيطير في الهوا والبيشوف العرش من البرش، والبيناقش الطير
بعض من فضائل وفنيات سبل كسب العيش سمبلة وارد بلاد تكرور، بلاد الهنا والسرور.


شوف واحد زي دا كاتب شنو:

https://sudaneseonline.com/board/505/msg/%d8%a7%d9%84%d8%ac%d9%86%d9%88%d8%a8-%d8%ab%d9%85-%d9%83%d8%a7%d9%86-%d8%a7%d9%84%d8%ba%d8%b1%d8%a8...%af--1602826412.html


_____
تعرفونهم من اسمائهم.

سلام دكتورة إخلاص عبود كيف ما من الشمال حبوبته مهيرة ست الإسم 😂 ونميري والبشير وسيد صادق ذاتو

سلام د. بشار و ضيوفه الكرام

أعجبتني مداخلة ود البشرى.

البوست دليل عافية، أكاد أرى الجروح تلتئم بعد تنظيفها.

كل زاويا الشوف هي في الحقيقة تعريف بمعاناة السودانيين في

كل شبر من السودان. الخيار الوحيد الآن أن نتوحد لبناء الوطن لأن

إختيار أي أجندة أخرى معناه ان نفقد الوطن للأبد.

كنت زعلانه انه جون قرنق ما بقي رئيسنا

واحلف لك ما عندي غضاضة الرئيس يجئ
من اي محل بس يكون عادل وماشي صاح
فكرك حال البلد بعجب ؟
ما فاضل لينا الا البكاء

نحن بنعرف الناس بالجهات ، عمري ما بذكر غير
منطقة ، صاحبتي درست معاي لي يوم الليلة
ما سألتها من قبيلة و ان شاء الله ما اسأل .
المهم

مشروع السلام الراهن وثيقة تاريخية فى أيدى المهمشين، للكفاح من أجل بناء سودان موحد، تقوم فيه الحقوق والواجبات بالسوية بين المواطنين، مهما كانت في هذه الوثيقة من ثقوب وعٍوار فهى قابلة للإصلاح والتطوير ،لكن إلغائها مستحيل ، فهى أداة توحيد وبناء ومساواة وعدالة للمظلومين ، على قوى المجتمع المدنى ،ودعاة الحركات الحقوقية ،والناشطين من الشباب من الجنسين ،والنساء اللائي يقع عليهن تهميش مزدوج ،وأصحاب المصلحة الإلتفاف حول مشروع السلام وتأييده ودعمه وإكمال نواقصة ،والتصدى للمخذلين والملتوين والعنصريين القدامى والجدد، وكشف زيفهم
لان مشروع السلام اليوم ده اخر فرصة
لسودان موحد

Quote: كلهم من الشمال أو محسوبين على (عقليات) الشمال أو مكوناته

مافي حاجة اسمها منسوبين على عقليات..
انت من الشمال وعايش ضد مصالح الشمال (زي ما عمل ياسر عرمان وساهم في تقسيم السودان)
يبقى انت من الشمال وشغال بعقلية اهل الشمال أو مصالحك الشخصية..
انت من الغرب واشتغلت ضد مصالح اهلك يبقى انت عايش بعقلية الغرب وليس الشمال..
الشمال البنعرفه هو الشمال الجغرافي، من شندي وحتى حلفا.. أكثر من السودان التي عانت من التهميش
على الحاج والسنوسي والحلو وجبريل وخليل ومناوي وتاور (شوف فيهم كم من أبطال سلامنا المدعوم اليوم)
وكبر وموسى هلال وحميدتي واحمد هارون والتجاني السيسي وعلى الحاج.. الخ.. ديل قيادات غرباوية تولوا مناصب رفيعة في الدولة السودان خلال عام واحد..
وفي نفس الفترة حكم الترابي وجون قرنق وسلفاكير وريتك مشار وعقار وكرمنو وحسبو عبد الرحمن وموسي ضرار وايلا والفشاشوية واحمد عباس وعدد كبير من قيادات الجزيرة والنيل الابيض والأزرق وكردفان والشرق الخ.. وديل كلهم ماعندهم علاقة بالشمال..
وضمن الحزب الحاكم (المؤتمر الوطني) نعرف قيادات بعدد قري وحلال الغرب، ونعرف قيادات شبابية كانت تجتمع في دار المؤتمر الوطني وتنتظم في مؤتمرات تعليمه العام والعالمي والعالمي (معفية من الرسوم الدراسية) ، وفي نفس الوقت تحارب في صفوف الحركات المسلحة المتمردة ..
وكل هذا يقود لحقيقة واحدة..
ان الحركات المسلحة كانت تقاتل من أجل مصالح شخصية أو حزبية وليست لديها أجندة وطنية واحدة..
والدليل الابرز على ذلك هو تشرذمها واختلاف اهدافها، وعدم اجتماعها في قضية وطنية واحدة توحدها وجمعها لتفاوض كجماعة واحدة..
والدليل الثاني هو مواصلتها تمردها وتفاوضها مع الحكومة الإنتقالية
على الرغم من انهم كانوا شركاء في الثورة التي جاءت بهذه الحكومة..
إذا أردت يا د. بشار عدالة وتنمية وسلام حقيقي، فعليكم البدء بأنفسكم..
وحدوا حركاتكم، ولموا جهودكم، وادخلوا باب الوطن سجدا من أجل الوحدة والسلام تتحقق أهدافكم واحلام الوطن..
أما ان يجتمع مناوي وجبريل ليعيدوا نفس سلامهم مع البشير...
ويناور الحلو وعبد الواحد لمزيد من المكاسب والقضايا..
فلعمري هذا ليس بسلام ولا عليكم السلام..

اليوم تصل فاتو بنسوده الي الخرطوم

اساندها وابارك كل خطواتها