نهاية البداية أو.. (حكومة إشراف + انتخابات مبكرة تحت رعاية اممية)

08:24 AM October, 16 2020

سودانيز اون لاين
عمر التاج-KHT
مكتبتى
رابط مختصر

غير كده حايحكم حميدتي ومليشياته ماتبقى من سودان تحت رعاية الإمارات الى يوم الدين..
وحايظل حمدوك طروره في يد البرهان الي يوم يسقطون
وحا تتوسع دائرة الجوع والمسغبة لتعم كل فئات الشعب،
وتعم مرحلة تصفية المرارات ويعود القتل في الشوارع كما صفوف البنزين والخبز
وتنتهي مرحلة الصراع الحاد بتقسيم السودان لمناطق وجزر قبلية معزولة..

مخطط هدم السودان ينطلق من نجاح إلى نجاح..
انفصال الجنوب وسقوط حلايب وشلاتين والفشقة في عهد الانقاذ
ثم الاعتراف باستقلال كاودا ومايسمي بالمناطق المحررة
وحالة الصراع السياسي العميق والاستقطاب العسكري الحاد
وانتشار بؤر الصراع في الغرب والشرق والشمال تقول ان المخطط كاد ان ينجح..
الغرب لايهمه من ينفذ المخطط، وما يهمه فقط هو التنفيذ الكامل لمخطط تجزئة (بلد المليون ميل) لدويلات
ولو كانت هناك مكافأة للدولة (شعب وساسة) على خدمات تنفيذ المخطط، لرفع الحظر كاملا من السودان عقب فصل جنوبه
ولكنها الاعيب الغرب التي لن تنتهي حتى ينتهي الحلم..

الرابح الرئيسي والكاسب الاعظم من حالة التردي التي يعيشها الوطن هو ربيب الكيزان الجنرال حميدتي..
والذي انتقل ايام الإنقاذ من مجرد قائد مليشيات متمردة الي قائد عسكري عظيم
ثم انطلق بعد الثورة من مجرد جنرال ضمن جنرالات الجيش
الي قائد اكبر قوة عسكرية في البلاد يأمر ضباط الجيش ويحاسبهم
ويحل قوات الأمن ويضربهم داخل مقارهم
ويسيطر على قوات الشرطة ويدفع حتي مرتباتهم وحوافزهم
ويرأس رئيس الوزراء ووزرائه دكاترة الاقتصاد في آليتهم الاقتصادية
ويتاجر بالذهب والرجال ويتصدق ببعض عائداتها لخزينة الدولة
ويذل الساسة ويهين الوزراء عيانا بيانا في شاشات التلفاز..
ويكبر ويكبر حتى يبتلع وطنا بحجم السودان، يتصدق بوظائفه لمن تالف نفسه..
وكل ذلك ونحن بعيدون تماما من الدولة المدنية.
بعيدون بفراسخ من الديمقراطية التي تنبني عليها الأوطان المتحضرة..
بعيدون تماما عن عجلات الانتاج والتنمية التي ترفع قدر الوطن..
بعيدون تمام من حلم الوطن بالحرية والعدالة والمساواة في ظل دولة يسيطر عليها فريق خلا بالكاد يفك الخط..

يا ود التاج المولد بتاع صور وداد و اخلاق مقنع الكاشفات وكيف البشير سلم على فاطمة ما يفوتك فيه حصة مزايدة سمحة و عرضة أخلاق كاربة

صدقني ياود البشرى ماعندي كبير غرض بوداد أو البشير أو على عثمان
وما عندي اعتراض على فلان سجنوه أو صادروا املاكه أو صوروه..
عادي اي متهم ممكن يصوره بنفس الكيفية دون أن يثير اهتمام احد
وفي النهاية الحق الفردي بيعود لأصحابه ولو بعد حين..
أولوياتي في المرحلة دي :
* معيشة المواطن والحالة الاقتصادية، وهي الآن اسوأ من اي مرحلة مر بها السودان
* الاستقرار السياسي، والوضع الان أسوأ من اي وضع سياسي عرفناه ويكاد السودان ام يصبح تابعا لأمريكا والعرب.
* مدنية الدولة، وهي في أسوأ حالاتها الان إذ يسيطر على البلاد مليشيات حميدتي وبقايا الجيش السوداني وفي الطريق حركات دارفور المتمردة..
* الديمقراطية ومازلنا نبتعد عنها يوما بعد يوم واصبحت في حكم المستحيل
* السلام، مازال حلما نتفق عليه أكثر ما كان ينفقه الكيزان علي الحرب ومن غير قائدة تذكر..
..
كل ماعدا ذلك امر هين ومقدَر عليه..
وكل ماذكر أعلاه يمكن تحقيقه فقط إذا تم إسناد إدارة البلاد لحكومة إشراف تتفرغ تماما لتهيئة البلاد للانتخابات عاجلة تحت ة رعاية دولية، وبعد الانتخابات تدير البلاد حكومة منتخبة مفوضة للسلام والحرب والصداقات والمقاطعات.. الخ
ويقعد حميدتي والبرهان وحمدوك في علبهم الي الأبد..

حميدتي اليوم+ برهان مابعد الثورة جنرالات فوق القانون..
وشعارات حرية سلام وعدالة في وجودها تصبح مجرد اماني بعيدة المنال..
اليوم لا حمدوك ولاقوة الثورة ولا لجان المقاومة ولا قحت تستطيع محاسبة حميدتي على جرائم عديدة :
جرائم دارفور.. منو البقول بغم..
جرائم ثورة ٢٠١٣، منو البقول البغلة في الابريق
جرائم تعدي الجنجويد على شباب العاصمة طوال فترة حكم البشير وبعد سقوطه. منو البقدر يفتحها
جرائم فض اعتصام القيادة.. منو البقدر يحاسب عليها؟
جرائم المشاركة في حروب المرتزقة في اليمن وليبيا، منو البقدر يقول لا؟
جرائم غسيل الأموال وتهريب الذهب والسيطرة على جبل عامر، منو البقدر يفتح خشمه؟
جرائم امتلاك عشرات المزارع وعشرات قطع الاراضي في الخرطوم وبحري وبقية الأقاليم، أين لجنة ازالة التمكين؟
لكل هذا وذاك لا يسعنا الا ان نقول.. الانتخابات بس.. والبديل الديمقراطية العاجلة..

هم ما بسمعو با التاج لحدي يشوفو
ديل عقاب مايو مخهم وقف في 1964 مع ساطع الناصري وسنهوري البعثي وصديق يوسف الشيوعي
وزمن مصر ام الدنيا وما عرفو اننا عملنا فحص دي ان ايه للدنيا طلعت مصر مش امها
الدولة المركزية ما بتتفع والمحاصصة ما بتنفع
https://top4top.io/https://top4top.io/
قلنا للشباب ارفعو علم الاستقلال الاصلي رفعو علم الاستحمار المصري والمخابرات المصرية مايو 1969
قلنا ليهم امشو لي قوة القااون المحكمة الدستورية تقود ليكم التحول الديمقراطي الدستوري زي ثورات الالوان بعد سقوط جدار برلين
مشو القيادة قانون القوة والجنجويد وحدس ما حدس
حياك الله يا عمر التاج اي زول تاني يكون شايل علم مايو ده لحدي هسة
غسلت وشي منه بي مرقة ده بكون زول مغييب ومبنج لي يوم الدين
نشوف مرقة 21 اكتوبر 2020 دي بتكون كيف