نقصد الخمسة سنين الأولى من 1989 الى1994 نبدأ بولاية نيويورك و مدينة تورنتو.
فى 1991 كانت هناك عمارة الجبهة فى بروكلين ، الاسم لان معظم السودانيين فى العمارة كيزان. ايضا العمارة الكويتية فى بروكلين لأن شكلها قريب من العمارة الكويتيه فى للخرطوم. و بيت الحاجة فى بروكلين لان صاحبة البيت امراة سوداء مسنه
فى تورنتو ، كان القسم لان معظم الساكنين كانوا ضباط شرطة مفصولين. فى سانت كاثرينز اونتاريو كانت عمارة المجانين الشاهقة ؛ السبب لان احد السودانيين تعرض لمحاولة طعن بالسكين من احد المختلين عقليا فى العمارة.
فى جيرسى ستى كان بيت الهايواى highway لان البيت مطل على شارع سريع... وغيرها من البيوت و العمارات التى تمثل جزءًا مهم من وجدان قدامى المهاجرين.. نتوقع صور لهذه البنايات
هناك عمارة تحية زروق و عمارة بشير عباس وهى نفس العمارة التى كنت اسكن بها. بعد ان رحل بشير عباس كانت هناك احتفال للجالية فى الصالة فى الطابق الارضى للعمارة.. اخونا عاصم كان جديد فى البلد و بدا عمل فى KFC ، عندما سأل عن وصف لمكان الإحتفال قالوا له عمارة النصرى. رد باعجاب (ماشاء الله ، النصرى ده متواضع خلاص ، عنده عمارة و شغال معانا ديليفرى فى KFC)
النصري قالو واحده من علامات الشيخوخة الواحد يبدا يبحت في الماضي و الذكريات. بتبدا في العقل الباطن ذكريات الشباب. لمن تظهر للعلن بتكون مرحلة متاخرة. ما تخاف العلاج موجود عند معاوية المدير الذي تجاوز هذه المرحلة ... ضحكتني عمارة النصري ما كتيرة عليك ان شاء الله تعمل اكتر من واحدة قول أميين شوف واسمع أداء الكابلي للذكريات هدية ليك و لضيوف البوست
تعرف يا حامد اولى علامات الشيخوخة عندى شنو جيوبى مليان كرور ، شي ورق ووصولات و شى سماعات جوال و شء قطرة اضان و قطرة عيون و حبوب حلق اليوم كله حايم فى البيت اطفى فى اللمبات .
اكيد طبعا الواحد فينا وصلت مرحلة من العمر بقى اى شئ فى جميل فى الماضى. الحاضر بقى جرى و طيران و شلهدة
نسيت الفندق فى داون تاون بروكلين.. أنا الحين فى فجة تانية ولما ارجع نيوجيرسى أنزل صورة الـ highway طبعا كنت من سكان عمارة highway برضو عمارة سفن الفن 7-11 والشيخ أبو ورقة كان مسميها سمن ولبن
Post: #10 Title: Re: بيوت وعمارات مشهورة سكنها اوائل المهاجري Author: النصرى أمين Date: 10-09-2020, 00:29 AM Parent: #9
بيت الهايواى كان بيت ارضى يا ابريش وليس عمارة لكن بيت كبير جدا، اعتقد فى فترة معينة كان يسكن فيه قرابة العشرين عزابى...
اذكر مرة مشيت زيارة بصحبة محمد نور رحمة و كنت جاى جديد لنج من السودان. اكتر حاجة ادهشتنى كانت اللمبات الصغيرة الملونه فى سقف غرفة الجلوس.
كانت حاجة غريبة جدا بالنسبة لى .. جيرسى كانت تنافس نيويورك فى عدد السودانيين
نعم صدقت كان بيت.. فى الكورنر.. العمدة كان عوض.. ما حضرت العشرين.. لكن كانوا 6 الى 7.. تتذكر قصة أخونا لما سمع لأول مرة عبارة( Oh my God).. دى طبعا ليست للنشر خليها فى سرك
Post: #12 Title: Re: بيوت وعمارات مشهورة سكنها اوائل المهاجري Author: Biraima M Adam Date: 10-09-2020, 04:05 AM Parent: #11
Quote: في عمارة أمدرمان في فرجينيا
في شارع كولمبيا بايك في منطقة أرلنغتون .. في فرجينيا جوار العاصمة واشنطن دي سي .. لليوم تسمي عمارة أم درمان ومنذ النصف الأول من التسعينيات في القرن المنصرم.
بريمة
Post: #13 Title: Re: بيوت وعمارات مشهورة سكنها اوائل المهاجري Author: النصرى أمين Date: 10-09-2020, 04:44 AM Parent: #12
السؤال ، لماذا الاسم أمدرمان.
كل المبانى هناك قصة وراء الاسم .. عمارة الجبهة. عمارة المجانين . العمارة الكويتيه . النقطة. بيت الحاجة. عمارة تحية زروق. عمارة بشير عباس .
نحن كمان سمينا عمارتنا عمارة "بت عطبرة"في شارع ١١٤ في منهاتن.. وطبعا اخترنا اسمها لانها اغنى واحدة فينا وبتسلفنا لمن نفلس ..زي ما اصحابك اختاروا اسمك لانك صاحب العمارة ... والحاجة المستغربة ليها كيف تكون عندك عمارة في كندا وتشتغل ديلفري مان ... لكن اظنك بتمل الروتين وما بتقدر تقعد في البيت من دون شغل ...
Post: #15 Title: Re: بيوت وعمارات مشهورة سكنها اوائل المهاجري Author: النصرى أمين Date: 10-10-2020, 01:20 AM Parent: #14
انت يا ابتسام بتخجلى من اسم هارليم 😂😂 عمارة بت عطبرة دى في هالرليم ست الاسم
بت عطبرة استحقت الاسم .. بعد تلاتين سنة (ان ربنا مد فى العمر) تتذكري ايام عمارة بت عطبرة و تنزل منك دمعة دمعتين على روعة تلك الايام و ده بالظبط الحاصل علينا ، عمارة المجانين كانت لنا بها ذكريات لن تنسى ابدا... احدى الليالى كان معانا ضيف من نيويورك؛ احد العزابى كان ضابط جيش متقاعد لكن كان يؤمن بالجن السفلى بعد العشاء ..بدأ يحكى عن سفلى مسلم يخدم و لا يراه احد سواه .. كان يحكى بجدية شديدة ونحن بين مصدقين و مكذبين . المهم .. لمن صحينا الصباح لم نجد الضيف ... عند الاتصال به اوضح انه شاهد الطربيزة تتحرك بالليل . خاف ...لم يكمل الليلة ..ساق عربيته و رجع نيويورك .
امتثال ..امتثال ..يا النصري ما ابتسام...مع انه اسم ابتسام اجمل لانه مشتق من البسمة وصديقتنا العزيزة البرجوازية اسمها بسمات.. بعدين طبعا انت عارف ان هارلم بتبدا من شارع ١١٠ لكن وبما ان جامعة كولومبيا الشهيرة والتي تنافس جامعة هارفارد واكسفورد والسوربون بتقع بعد ٤ شوارع فقط من شارع ١١٠،فاننا لا نعتبر المنطقة من ١١٠ الى ١١٦ تابعة لهارلم ولكن بنقول على سبيل الدلع midtown او قول uptown وبعدين لعلمك هارلم الان بقت منطقة سياحية بعد ان افتتح فيها الرئيس كلينتون مكتبا في شارع ١٢٥ وممكن عادي تلقاه ماشي في الشارع والنلس تتونس معاه...والناس مخصوص بتجي شارع ١٢٥ في هارلم عشان تتونس معاه واحيانا تلقى هيلاري كلينتون ماشة في نفس الشارع...
Post: #17 Title: Re: بيوت وعمارات مشهورة سكنها اوائل المهاجري Author: النصرى أمين Date: 10-10-2020, 05:36 AM Parent: #16
فى عام 1991 كنت شغال يلو كاب فى نيويورك ، فى احدى الامسيات ركب معاى شاب فى العشرينات ؛ قال انه من كندا و طلب منى اسوق التاكسي فى اخطر المناطق فى هارليم ، قال ايه ؟ عايز يعيش التجربة... بعد فترة من السواقة فى شوارع هارليم انا زاتى خفت... عمارات مهجورة و بيوت محروقة و ظلام . كانت حاجة فظيعة ؛ بعدها سنوات قليلة تولى عمادة نيويورك جوليانى وكان صارم جدا مع الجريمة .
كانت منطقة 42 Street فى مانهاتن خطرة جدا جدا بالرغم من قربها من TimeSquare، كنا نمشى نشترى كروت الاتصالات المسروقة . الكرت كان بخمسة دولارات نتكلم السودان ساعات و ساعات .
فى هارليم كان فى محل مشهور discount store يشتغل فيه عدد كبير من السودانيين اعتقد اسمه Italy قدمت للعمل به لكن لم اوفق مع انى المدير وقتها كان سوداني
النصري ازيك.. شقة في شارع Euclid جمب جامعة هاوارد من اشهر شقق العاصمة واشنطون. اتفرعت الشقة دي وانجبت شقق بعدما اتوالت الهجرة عن طريق اللوتري نص التسعينات ومنها انتشرت في منطقة واشنطون الكبري, من اشهرها شقة اولاد الشجرة في ميريلاند.. سكنت براي في شقة لفترة (قطع الشارع) منهم وزارهم في الفترة ديك السباح كيجاب. يااخ عذبني في عمري هههههه. ونااااس و سواق سواااقة. كان بقعد يومه كله لانه عندي الدش مركب في الشباك بتاع الشقة ودا كان سبب المعرفة. الله يديه العافية كان ماخد راحته جدا بس كان حقنة يااااخ الزوغان منه كان صعب هههههه. ومع ذكر المشاهير كنا في وداع والدة واحد من اصاحبنا ونحن نازلين السلالم المتحركة في مطار دالاس في واحد كان طالع انتبه ليه واحد من اصاحبنا وبسرعة لفتني قال لي دا يشبه بتاع الاماني السندسية صح هههههه قلت ياااهو زاااتو ارح نسلم عليه, طلع استاذنا الفنان الموسيقار الموصلي. سلمنا عليه وعرفنا منه انه بحاول يتصل علي ارقام المرحوم دكتور بطران وزوجته الفنانة هادية طلسم. عرفنا انهم رجعوهم من مطار اديس بعد محاولة اغتيال مبارك قعد معانا انا وصاحبي دكتور سيد دردق لمدة قريب شهر لحين عودتهم من اديس وكانت ايام روعة بصحبته لينا وفيها اتعلمت منه بداياااات عزف الاورغن وكسرة مقدمة اغنية وسط الزهور متصور. سلامات استاذنا الموصلي. بالمناسبة الموصلي طباخ جدااااا استمتعنا بأكله ههههههه. بجيك راجع لبدايات تكوين فرق الجاليات..
Post: #19 Title: Re: بيوت وعمارات مشهورة سكنها اوائل المهاجري Author: النصرى أمين Date: 10-11-2020, 04:28 AM Parent: #18
أهلا معتصم طبعا اشهر ناس بسكنوا مع بعض هم المحس . الناس ديل ماكنت بعرف عنهم اى شئ لغاية جيت كندا و عشت بينهم ، عندهم تكافل اجتماعى بينهم عجيب فعل و العحب الرطانه منهم .
بالنسبة لكيحاب ، طبعا هو شخصية معروفة جدا و من قدامى السودانيين فى كندا، لم نسكن فى مدينة واحدة فى وقت واحد لكن سمعت عنه انه انسان مرح جدا يحب الحياة و عنده قصص كتيرة مشهور بيها .
النصرى انت من زمن هارلم الخطرة.. عارف (اولاد العرب) زحفوا فيها وصارت حاجة تانية خالص.. سكان هارلم من السود طلعوا.. يعنى من جامعة كولومبيا لغاية الكبرى إللى يوديك البرونكس. الصينيين بدأوا يشترون العمارات ويبنوها من جديد يبيعوها كوندو.. بالمناسبة Itally فى بروكلين ما فى هارلم. فى شارع فولتون قريب من بدفورد. وانا اول ما جيت اشتغلت فيه سيكيوريتى.. من الساعة 9 عندى سلم اطلع فيه.. طرزان.. واراقب الحرامية.. انزل الساعة 12 للغدا.. اطلع تانى لغاية الساعة خمسة وامشى البيت.. دا كان شغلى كله. كلن ملاكه يهود سوريين ما يشغلوا إلا سودانيين. كان واحد سودانى عنده صديقة سوداءِ. قلعها منه واحد اسور.. وكادت تحصل كارثة لولا لطف الله.. السودانى حشد كل السودانيين . والمسألة تحولت لموضوع كرامة وإنتقاص من هيبة السودان. 😷😷
Quote: Italy كان عنده كم فرع لكن اكبر واحد كان فى uptown نيويورك يعنى هارليم . انت احتمال اشتغلت فى فرع بروكلين
ممكن . وانا إتكلم عن النصف الثانى من 1989 و محل بروكلين كان أول محل لليهودين إيدموند و كلود.. وكان المحل الوحيد لسـة ما كان فى أى فرع.. فلو تتحدث عن وقت بعد 1989 طبعا محتمل.
Post: #23 Title: Re: بيوت وعمارات مشهورة سكنها اوائل المهاجري Author: النصرى أمين Date: 10-18-2020, 03:23 AM Parent: #22
انا اتحدث عن الفترة بين مارس 1991 و يوليو 1992 فى ربيع 1991 كنت ابحث عن عمل و لم يكن لدى رخصة قيادة بعد .. خيارات العمل كانت محدودة ..بقالات اليمنيين او دكاكين اليهود ..
محل ايتالى كان يشغل عدد كبير من السودانيين و كان العمل فيه مكسب حسب معايير ذلك الزمان .
اذكر ان احد المعارف طلب منى ان اذهب لمقابلة مدير محلات ايتالى فى هارليم ، اظن اسمه صلاح ابوزيد لانه تربطه علاقة به من مدنى .
مشيت لمقابلة صلاح ابوزيد احلم بوظيفة محترمة فى ايتالى المشهور.
المحل كان فى uptown New York و عند مقابلته لم يستطع تقديم شء ، طلعت من المحل محبط . ساعدنى بعض الأصدقاء فى العمل فى شركة إنشاءات construction ، عملت يوم واحد فقط وتركت العمل فيه لصعوبة العمل فى رمضان ( رمضان كان فى مارس سنه 91) بعدها حصلت على رخصة القيادة بمساعدة سودانى اخو اخوان اسمه عثمان الجلقنى بعدها حدس ما حدس و جينا الخور الكبير كندا
Post: #24 Title: Re: بيوت وعمارات مشهورة سكنها اوائل المهاجري Author: النصرى أمين Date: 10-18-2020, 04:14 AM Parent: #23
هناك لغط داير خلف الكواليس(فى الواتساب 🙃) حول حقيقة وجود محلات ايتالى فى هارليم . انا صاحب الادعاء و أحتاج لشهادة من معاصر لتلك الفترة ارجو مراسلتى على الايميل [email protected]
موضوع جميل حمتا معاهو فى نيويورك ونيوجرسى ......الاصلى ما شفت فيهم سودانى حايم فى الحقيقة الا مرة واحدة فى حفلة فى نيوجرسى واندهشت للعدد الكبيير من السودانية الملا الصالة ومعاهم كل التفاصيل حقتنا ........الفنان والرقيص وسندوتشات الفول
كنا في زيارة امس لاحدى الاسر التي تقيم في نيويورك منذ عام ١٩٨٩9، يعني قبال نرى هذه الدنيا، وجاء بنا الحديث عن البوست وعن اوائل السودانيين الذين وصلوا الاراضي الامريكية ، اما عن محلات ايتالي للملابس،فقد قال رب الاسرة انه فعلا كان لمحلات ايتالي فروع في بروكلين ومنهاتن وان اليهودي صاحب محلات ايتالي كان يفضل تعيين السودانيين في محلاته لسبب وان السبب هو انه كان يخفي مبلغ ١٠٠ الف دولار في كيس في احدي الرفوف وكان يريد توريد المبلغ الى البنك في نفس اليوم...وكان عامل سوداني يعمل في تنظيم الملابس في الرفوف فوجد المبلغ فسلمه لصاحب المحل فساله صاحب المحل: لماذا لم تاخذ هذا المبلغ الكبير لنفسك ولماذا اعدته لي!؟فقال السوداني:لان هذا يعتبر سرقة وهذا حرام وديني يحرمني من سرقة مال الغير،، واكل مال الحرام... وهنا قرر صاحب المحل تعيين ذلك العامل السوداني مديرا للفرع...واصبح يفضل تعيين السودانيين في محلاته ويقول انه لا يثق الا في السودانيين من دون الجنسيات الاخرى،،، فهل انت سمعت بهذه القصة،حيث ان سمعة السودانيين كانت في السما وان الكثير من اليهود كانوا يفضلوا تعيين السودانيين في محلاتهم، وكذلك اليمنيين الذين كانوا يمارسون التجارة كانوا يفضلون تعيين السودانيين في محلاتهم التجارية...ويبدو انهم ايضا سمعوا بقصة العامل السوداني الامين الذي اعاد ثروة الى صاحب المحل الذي كان يعمل به واصبح مديرا بعد ان كان مجرد عامل..
Quote: اذكر ان احد المعارف طلب منى ان اذهب لمقابلة مدير محلات ايتالى فى هارليم ، اظن اسمه صلاح ابوزيد لانه تربطه علاقة به من مدنى .
يا النصرى ياخ صلاح ابوزيد كان المدير بتاعنا فى فولتون ستريت.. ومحل فولتون بدأ صغير ثم أخذوا نصف المربع.. طبعا سنة 90 رحلت لنيوجيرسى ولم أعد أعمل فى إيتالى.. كانت شهور قليلة. وأول ما فتح إيتالى كان فى بروكلين، ما فى فرع تانى.. نحن من أسسـه. وفى شهوره الأولى كان يعمل به سعد تبيدى الذى وثق فيه اليهود كما نقلت إمتثال.. حتى بعد أن غادر كانوا يكرمونه بما يطلب لأن الأخ سعد هو من قام إيتالى على أكتافه. واليهود مخلصون لأول شخص يعمل معهم ثم ينجح العمل.. أعتقد طقوس دينية. وبالمناسبة وجدوا السودانيين، موش أمناء فحسب، بل لأنهم يتحدثون العربية والإنجليزية.. فهم يهود سوريين.. ثم السودانيين سـود، وهذا كان عامل مهم جدا لأن المنطقة بروكلين كلها من الأمريكان السود تقريباً. ثم أن السودانيين لا يحتجون كثيرا.. كل هذا العوامل كان لها الأثر الكبير فى تفضيل السودانيين على غيرهم.. Edmond ما كان يرجع سودانى يطلب عمل أبداً.. حتى الجايين حديثا وما عندهم اوراق عمل.. يقول للواحد أقيف هناك بس وراقب. حتى امتلا المحل بالسودانيين. شيوعيين وبعثيين وكيزان.. كان يعمل معنا طبيب أعتقد من الأخوان وكان هو الحرس الشخصى body guard لشيخ حسن الترابى حين زار بروكلين وصلى بالناس فى مسجد التقوى القريب من المحل.