Post: #1
Title: اطالب بعمر البشير رئيسا
Author: عبدالحفيظ ابوسن
Date: 09-25-2020, 08:31 AM
Parent: #0
08:31 AM September, 25 2020 سودانيز اون لاين
عبدالحفيظ ابوسن-no where
مكتبتى
رابط مختصر
يطلعو من السجن ويعتذرو ليهو
ويذهب للقصر رئيسا
ومعاهو كامل طاقمه الحكومي اللمبي وقوش وكل الوزراء
|
Post: #2
Title: Re: اطالب بعمر البشير رئيسا
Author: عبدالحفيظ ابوسن
Date: 09-25-2020, 08:37 AM
Parent: #1
قالوا المرة يوميا عاملة خدرة
يوم راجلها قال ليها
بدل التعب دة ودينا النبرو ولا الجروف وخلينا ناكل قبلنا من التعب دة
|
Post: #3
Title: Re: اطالب بعمر البشير رئيسا
Author: Hassan Farah
Date: 09-25-2020, 08:44 AM
Parent: #1
حرم ضربت الجرسة وفكت منك يا ابوسن
|
Post: #4
Title: Re: اطالب بعمر البشير رئيسا
Author: MOHAMMED ELSHEIKH
Date: 09-25-2020, 09:01 AM
Parent: #3
يلا يا ابو سن
سريع رشح لينا زول كدى " حبيسا"
|
Post: #5
Title: Re: اطالب بعمر البشير رئيسا
Author: عبدالحفيظ ابوسن
Date: 09-25-2020, 09:05 AM
Parent: #4
خرخرنا عديل يا حسن
ورقنا كعب
ندكها ونوزعها من جديد
اها لامن يجي البشير حاكم نقوم نتوحد تاني ضد مستلمهين اخطاء ثورة ديسمبر
لاحظ لكلمة مستلهمين دي
ونتوحد ونمرق مظاهرات تاني
وبرضو لاحظ لو رجع البشير حيوضب لينا حميدتي وبرهان وكباشي ويسلمنا نضيف 😆😆😆
|
Post: #6
Title: Re: اطالب بعمر البشير رئيسا
Author: عبدالحفيظ ابوسن
Date: 09-25-2020, 09:16 AM
Parent: #5
امكن تكون معكوسة هسة يا محمد 😆😆
ولا اتغيرت
اذهب منفيا وسأذهب للقصر رئيسا 😆😆
|
Post: #7
Title: Re: اطالب بعمر البشير رئيسا
Author: عبدالحفيظ ابوسن
Date: 09-25-2020, 09:25 AM
Parent: #6
{سيشتد هذا الحصار ليقنعنا باختيار عبودية لا تضر، ولكن بحرية كاملة}
محمود درويش
|
Post: #8
Title: Re: اطالب بعمر البشير رئيسا
Author: عبدالحفيظ ابوسن
Date: 09-25-2020, 11:30 AM
Parent: #7
مع انو عندنا مقلدين لناس الانقاذ
زي وراق متشبه بي نافع
ولا وزيرة المالية متشبه بقوش القال طلعت بندقية
ولا ولا
دايرنهم كلهم يجو وندور فيهم شي نكت وشي كراكتير وشي مقاطع ونسقطهم
ونعمل سي جديد
وبي خبرة كمان
اها
وزيرة المالية داير اشيلها من شبه نافع اختها مع اللمبي فهو اكثر شبها بها
|
Post: #9
Title: Re: اطالب بعمر البشير رئيسا
Author: عمر نملة
Date: 09-25-2020, 11:37 AM
Parent: #7
سلام و محبة
خرخرنا عديل يا حسن ورقنا كعب ندكها ونوزعها من جديد
وزعت الورق زميلي قال مربوطة التاني قال باص انا قلت مليون..يعني عايز اسيكك و نكون سالب زول القبول يتوحوح زي وحوحتك الحلها رجوع البشيرمهم في النهاية قال..لا بلعب لا بلعبكم..و دكاها ههه ورقو كان مفرمل على ولد و احد ...شوف لينا حل غير البشير...لكن ليك الحق تدكها
|
Post: #10
Title: Re: اطالب بعمر البشير رئيسا
Author: اخلاص عبدالرحمن المشرف
Date: 09-25-2020, 12:23 PM
Parent: #9
صدقت نبوة الشفيع وراق
|
Post: #11
Title: Re: اطالب بعمر البشير رئيسا
Author: عبدالحفيظ ابوسن
Date: 09-25-2020, 12:54 PM
Parent: #10
مرحب نملة عليك الله دة مش واقع سريالي حقيقة
ووضع شائه ؟
انا قنعت من محاولة فهم السياسة اخير نقع الواقعية السحرية 😆😆
ونبؤة الشفيع وراق شنو يا اخلاص ؟
|
Post: #12
Title: Re: اطالب بعمر البشير رئيسا
Author: اخلاص عبدالرحمن المشرف
Date: 09-25-2020, 01:34 PM
Parent: #11
باين البوست مشي الخور
عنوانه كان عائد عائد يا البشير
تداخلت معاه قال لي ح تقولوها
وطلب اتصل بالاهل عشان يوروني
الحاصل
|
Post: #13
Title: Re: اطالب بعمر البشير رئيسا
Author: أحمد محمد عمر
Date: 09-25-2020, 01:38 PM
Parent: #12
هي سمة لازمة للشعب السوداني مع كل الديمقراطيات
قبليها هتف يا عبود ضيعناك وضعنا معاك
وهتف عائد عائد يا نميري
طبعاً أبوسن متناول الموضوع بصورة ساخرة
لكن لو استمر التدهور الاقتصادي والعصرة الشديدة في معيشة الناس دي مع الولاة البنهروا الشفع سنة كدة لي قدام حتتسمع من الشعب كلو
|
Post: #14
Title: Re: اطالب بعمر البشير رئيسا
Author: عبدالحفيظ ابوسن
Date: 09-25-2020, 03:15 PM
Parent: #13
تخيلي يا اخلاص ولا حيجي يوم زي دي
لا الآن ولا المستقبل البعيد
مش البشير ولا الكيزان
اجماع شبه مطلق من الناس ضد الكيزان والبشير . ولي اليوم كلمة كوز ولا مؤتمر وطني اساءة بالغة ووسم بالخيانة الوطنية
ضيقنا مش عشان نرجع البشير ولا الكيزان
اصلا هي ما ثنائية بين الديمقراطية والعساكر ولا الكيزان
بل هي خيار داخل الديمقراطية نفسها
الثورة ليست خطا مستقيما بل متعرجا
|
Post: #15
Title: Re: اطالب بعمر البشير رئيسا
Author: عبدالحفيظ ابوسن
Date: 09-25-2020, 03:23 PM
Parent: #14
ممكن اختلف معاك حبة يا احمد
ليس سمة ملازمة للشعب
ولكنها ملازمة للسياسين ومن يتولون الحكم
السياسة عندهم تآمر ودسائس ومناصب للمصلحة الشخصية المربوطة بالحزب كقيادات
مافي وطني متجرد عينو علي الوطن وممكن يضحي
شوف وراق الكان بكتب هنا ومواقفو وفي اول ملف داير يتحول لي إله جبار
ولا فيصل محمد صالح مافي زول بقدح في وطنيتو ومعاناته زمن الانقاذ وشوف اداؤه هسة
الاشكالية في المنصب والقيم الاخلاقية والوطنية
نحن طلعنا كم مرة من اجل واقع افضل ويجو الساسة يخلونا نتراخى لامن يسقطو بالانقلابات
حاليا الوضع مختلف
لن نحكم بأنقلابات ولا عسكري
حركة الوعي حصل فيها تطور
اي تعبانين وقلنا الروب لكن دايرين مدنية من خلال آلية ديمقراطية
|
Post: #16
Title: Re: اطالب بعمر البشير رئيسا
Author: كمال عباس
Date: 09-25-2020, 04:13 PM
Parent: #15
سلام أخ عبد الحفيظ
بالنسبة لمقولة ضيعناك وضعنا وراك ياعبود !بضعة أفراد إلتفوا حول عربة عبود في سوق الخضار ببحري وهتفوا بهذا !أما نميري فقد تحول لمسخ وأضحوكة في بعد نهاية سلطته ولم تخرج إي مظاهرةجادة وهادرة تطالب بعودة نميري !
أما البشير فهو سبب الدمار الماثل وسبب إنفصال الجنوب وحروب دارفور وتمزقالنسيج الإجتماعي والفتن القبلية ...والفساد والإستبداد ...خلل العهد الثوري يكمن في الوثائق الحاكمة =الإتفاق السياسي والوثيقة الدستورية والتوافق مع العسكر بعد المجزرة -
ويلي ذلك تقاصر الحكم الإنتقالي ونواقصه وسلبياته وعدم إنجاز أهداف الثورة - يقرأ مع هذا محاولةأحد المحاور الإقليمية لإستمرار السودان كتابع وفار تجارب ومحارب بالوكالةومطبع بالإنابة وإجتذاب هذا المحور للمكون العسكري وبعض القوي المدنيةوتربص المحور الإقليمي الآخر بالثورة وإحتضانه للفلول هذا مع السماح للثورةالمضادة بمالها وإعلامهافي إثارة الفتن وتدمير الإقتصاد وإشعال المؤامرات
* وعدم قيام المجتمع الدولي والمؤسسات الإقتصادية العالمية بدورها في الدعم المالي -للسودان مع علمها أن الوضع الموروث عن الإنقاذ كان جنازة بحر
!*و وإقترن مع هذا الوضع الهش - تفشي الكرونا والحظر والأمطار والفيضانات والكوارث الطبيعية
...* كنت رافضا للتحالف مع العسكر ومتحفظا علي الوثائق الحاكمة وناقدا لقصور الحكومة منذ البداية-وسأظل علي موقفي الناقد هذا متطلعا لقيام إنتخابات حرة ونزيهة وحكومة منتخبة تتحمل مسؤليتها كاملة - وقبل ذلك قيام مجلس تشريعي يشرع ويراقب ويحاسب
...- الوضع الحالي ملغوم السيرفيه يتطلب الحذر وعدم الوقوع في الفخاخ وخدمة أجندة إعداء الثورة وترتيب الأولويات والوعي بمتطلبات المرحلة
|
Post: #17
Title: Re: اطالب بعمر البشير رئيسا
Author: محمود الدقم
Date: 09-25-2020, 05:16 PM
Parent: #16
ود ابوسن سلام يغشاك المشكلة يا عبدالحفيظ ليست في البشير ولا في حمدوك وفي في المهدي، بالرغم من ان البشير يستحق لعنة الله وهو وجميع الكيزان فوق الارض وتحت الارض ويوم العرض، المشكلة في الشعب، الشعب بقي قطاع كبيييير منو فااااااسد بشكل
يفوق حد التصور، بتاع الدكان فاسد لانه يستغل الظروف كي يرفع اسعار السلع، انبوبة الغاز قبل يومين طلبناها قال بخمسية جنيه وترحيل بمليون جنيه بالقديم لانها سوف يتم جلبها من الحاج يوسف للخرطوم شارع الستين، والخ؟
المطلوب البحث في طريقة يتم بها تنظيف هذا الشعب من هذا الجشع الجنوني، الناس بقت تاكل بعضها البعض.
|
Post: #18
Title: Re: اطالب بعمر البشير رئيسا
Author: محمد البشرى الخضر
Date: 09-25-2020, 06:02 PM
Parent: #17
عارفها سخرية منك يا ود ابسن لكن النصيحة لله وقعها قاسي
تخيّل تقراها والدة الشهيد محجوب مثلا التي اسشتهد ولدها في سبيل اسقاط البشير
|
Post: #20
Title: Re: اطالب بعمر البشير رئيسا
Author: أحمد محمد عمر
Date: 09-25-2020, 07:58 PM
Parent: #19
عائد عائد يا نميري دي سمعتها بي أضاني في السوق
أيام الشاي بالتمر عشان مافي سكر
يا ابو سن حكومة حمدوك الآن أسهمها في الشارع صفر
شغالة تبعد من الشارع يوم بعد يوم
وفي نفس الوقت حميدتي شغال يتقرب للشارع وضابط تصريحاته وبستميل في السياسيين
كل يوم في السودان ألعن من القبله ومافي أي أمل في بكرة
مافي أي ملامح واضحة لسياسات اصلاحية في أي وزارة أو ولاية .. تحس بيهم شغالين رزق اليوم باليوم
الواحد تقول ليه مافي عيش مافي غاز يقول لك سياسة المحاور والتطبيع
شوف مأساة الاحتفال بإعلان الحلو حمدوك .. صف ونص كراسي والباقي فاضي
المفروض لو ناس امجد فريد شايفين شغلهم يكون دة مؤشر خطير جداً بالنسبة ليهم
وعلى النقيض حميدتي شعبيته ماشة في زيادة .. نعم الثوار ما ناسين ليه فض الاعتصام لكن البسطاء داخل الأحياء البعيدة بقوا شايفينو الأمل
ما بقول ليك إنه ممكن يتلب لكن بوريك لياتو درجة الناس بقت تفتش للبديل
الناس ما بتقول بعودة البشير صراحة ولا في زول عاوزه يجي لكن المقارنات مدورة طوالي
كمية من الناس بقت تقارن بين سعر طلب الفول أيام ثاروا عشان الغلاء وسعره هسة .. تقريباً أي حاجة اتضاعف سعرها 10 مرات
|
Post: #21
Title: Re: اطالب بعمر البشير رئيسا
Author: نادر الفضلى
Date: 09-26-2020, 01:06 AM
Parent: #20
المصرى قالوا ليهو السودانيين بقو ينكتو .. قال ليهم جاعو .. هسة دا يسموهو شنو .. يإسوا .. سلموا مافى رجا؟!!
الشق المدنى فى الحكومة أرموهو البحر .. وأبدو سى جديد! .. التجربة بتكون نوع حمودك ووزرائه ما يجى زيهم تانى
وما تنسوا الشى الإسمو قحت يتفرتق وناسو يفرتقو .. بعد داك فى أمل بسام!
|
Post: #22
Title: Re: اطالب بعمر البشير رئيسا
Author: امتثال عبدالله
Date: 09-26-2020, 04:22 AM
Parent: #21
اوسكار ود ابو سن ...
محمد البشرى
والدة الشهيد محجوب لمن تشوف الحال المايل لوزراء حمدوك تتحسر وتقول ولدي استشهد عشان حال الوطن يكون
اجمل وافضل ....
بصراحة الحال لا يسر عدو ولا صديق....
|
Post: #23
Title: Re: اطالب بعمر البشير رئيسا
Author: عبدالحفيظ ابوسن
Date: 09-26-2020, 05:04 AM
Parent: #22
صدقت يا الدقم
واحدة من امراض الانقاذ الاصابت بيها الوطن . اي زول كايس يستفيد وبأي شكل دون وازع ضميري او اخلاقي
عربات شفط الحمامات في كوستي الشفط كان ألفين ج
مع الامطار مافي مكب لانو العربات تقيلة وفي صعوبة في تحركها للخلا
عملو الدور ب تمنية الف ويجوك بالليل
عارف بعملو شنو؟
بعضهم بتحرك ويفتح البلف ويتحرك والاوساخ كابة في الشارع
ولا اقرب خور او مكان مهجور
بعملو دة ممكن يسبب كارثة بيئية ويتوالد الذباب والباعوض وغيرة
كدة الفكرة
الرقابة انعدمت تماما
لاوازع ديني ولا اخلاقي ولا وطني
|
Post: #24
Title: Re: اطالب بعمر البشير رئيسا
Author: عبدالحفيظ ابوسن
Date: 09-26-2020, 05:11 AM
Parent: #23
سخرية فعلا يا ودو
وشكرا امتثال كنت داير ارد نفس ردك
ياودو اتمني انو الفهم دة يكون عند اهل الحكم
يخجلو من صور الشهداء
ويخجلو من اسرهم
يخجلو لانو لولاهم لما كانوا في هذا المنصب
|
Post: #25
Title: Re: اطالب بعمر البشير رئيسا
Author: عبدالحفيظ ابوسن
Date: 09-26-2020, 05:19 AM
Parent: #24
مش كدة يا نادر
نعمل سي جديد والعترة بتصلح المشي
ما فهمت يا اخلاص فكرة ايراد رابط البوست
|
Post: #26
Title: Re: اطالب بعمر البشير رئيسا
Author: عبدالحفيظ ابوسن
Date: 09-26-2020, 05:21 AM
Parent: #25
دة الحاصل يا احمد
الناس مادايرة البشير ولا الكيزان
ووضع الامر بهذا الشكل تغبيش وعي الناس وتحايل
الثورة ما محطة بتصلها وتنزل منها . بل متواصلة لانجاز اهدافها
البحصل هسة محبط ومخيف
|
Post: #27
Title: Re: اطالب بعمر البشير رئيسا
Author: Haytham Ghaly
Date: 09-26-2020, 01:07 PM
Parent: #26
كان في امكانك اختيار عنوان غير الذي اخترت لتوصيل فكرة البرست
الكيزان دايماً لا يعنيهم المحتوى الجوهري وانما يعنيهم المحتوى الطاهري او ما نسميه بالقشور
لذلك انت وغيرك كثر يعطونهم الفرصة الكاملة لضرب الامثال عن ثورجية ندموا على اقتلاع البشير
بالامس في ممالمة تلفونية بيني وبين صديق قديم كوز من نواحية دينية متخلفةضرب لي المثل بيك
وما رضيتها صراحةً واكلت معاي جنبة زي ما بقولو
عموماً نحن في منعطف بايخ
اما نتوحد ونخرج معاً تحت مسمى المدنية
او نتفتت وكل عولاق يشوفلو صرفة
|
Post: #28
Title: Re: اطالب بعمر البشير رئيسا
Author: اخلاص عبدالرحمن المشرف
Date: 09-26-2020, 01:37 PM
Parent: #27
وبرضو البعض قرأها صراع
بين أجنحة أحد الأحزاب ، لم
يتحمل ذاك الجناح الجلوس في
المعارضة والان يسعي لدكها كي
يأخذ نصيبه من نعيم واطايب الكيكة.
|
Post: #29
Title: Re: اطالب بعمر البشير رئيسا
Author: Mohamed Suleiman
Date: 09-26-2020, 02:41 PM
Parent: #28
لا أعتقد المشكلة في الحكام ... سواء عبود أو أو النميري أو البشير ..
عبود زول سوداني عادي
النميري ود فرّاش .. أي من عامة الناس ... و ليس برجوازي إقطاعي سليل أنراك
البشير ود غفير ... أي من الطبقة الكادحة السودانية ..
أمّا الحكّام المدنيين ... الساسة منهم يبيعون ولاءهم لزعماء طوائف أنانيين جمعوا ثرواتهم بممارسة الرق و إستعباد الآخرين لأنهم .. أي زعماء هذه الطوائف و أجدادهم و أحفادهم .. لا وازع أخلاقي لهم فغاب عن ضمائرهم كل معاني الحق و الحقيقة و العدالة و الفضائل الإنسانية
كما يقول أهل الإحصاء ... العينة هي تمثل الوسط ...
و هؤلاء الحكام لم يتنزّلوا من زحل .... بل هم من نفس هذا الوسط ...
إذاً العلة في هذا الشعب ... فيكم أنتم
ستين سنة و لم تتعلموا شئاً ... فتعيدون تكرار نفس الأخطاء ...
و من أين يأتيكم حكّام حكماء ؟؟!!
|
Post: #30
Title: Re: اطالب بعمر البشير رئيسا
Author: عبدالحفيظ ابوسن
Date: 09-26-2020, 02:58 PM
Parent: #29
ياهيثم انا مابكتب لي زول بقرا العنوان بس . صاحبك دة لسة بلوم الحردلو في في عنوان ديوانيه ملعون ابوكي بلد
الكتابة سخرية سوداء مما يحدث لنا
عاين والينا بسكت فينا ويصفنا بقلة الادب ويقول لينا هس
الموقف ما شخصي تجاه الحكومة لكن تجاه سياساتها
وقول لي زولك
نحن درب الوطن مابنفكو تب
ولا انتمي لحزب رغم انو موقف ما صحيح . لازم نتنظم
لكن لا اجيد الانتماء لحزب
دى معلومة بس ما اكتر
|
Post: #31
Title: Re: اطالب بعمر البشير رئيسا
Author: عبدالحفيظ ابوسن
Date: 09-26-2020, 03:03 PM
Parent: #30
يا محمد فكرة البوست عبثية جدا
مافي شي وحدنا الا موقفنا من الانقاذ
داير نتوحد تاني ونترك الشقاق والخلاف
|
Post: #32
Title: Re: اطالب بعمر البشير رئيسا
Author: Mohamed Suleiman
Date: 09-26-2020, 04:31 PM
Parent: #31
أستاذ عبدالحفيظ أبو سن
سلام و إحترام
Quote: يا محمد فكرة البوست عبثية جدا
مافي شي وحدنا الا موقفنا من الانقاذ
داير نتوحد تاني ونترك الشقاق والخلاف |
بالطبع الكل يدرك من العنوان أن فكرة البوست عبثية ..
لكن الفكرة نفسها تطرح سؤالاً جاداً: كيف وصلنا هنا الي هذه النقطة؟
و ما ذكرته في مداخلتي ليس غير رد علي مسألة جادة جداً.
هل كان هناك عاقل يتوقع أن ينهض السودان من كبوته بعد سقوط البشير و الكل رأي كيف تسابق المثقفون و الساسة و نخب الكيانات في مبايعة قتلة و مجرمين كخلفاء للبشير ... مثل البرهان و حميدتي؟
هل يُعقل أن يتوقع أي إنسان أن يتم تنصيب حميدتي رئيساً للجنة الإقتصادية ... بينما يطأطئ خبراء و خبيرات الإقتصاد من السودانيين و السودانيات رؤوسهم لهذا العبث بالدولة السودانية؟
كيف يسكت السودانيون و السودانيات من المثقفين و هم يرون بلادهم تنهبها عصابات شركات الجيش و الأمن و الدعم السريع عيانا نهارا جهارا ... و برضو هناك من يهلل لحميدتي؟
ماذا تتوقعون من تطبيع يقوده البرهان و هو أضعف حلقة لقيادة أي تطبيع سواء مع أمريكا أو إسرائيل ... لأنه تم إبتزازه بجرائمه في دارفور و توثيقات لجرائمه يمكن تسليمها لفاتو بن سودا (ما تصدقوا حكاية القطيعة بين المحكمة الجنائية و أمريكا و إسرائيل فمعظم الأدلة في قضية دارفور سلمتها أمريكا للمحكمة الجنائية الدولية) ؟
كيفما تكونوا يولي عليكم.
|
Post: #33
Title: Re: اطالب بعمر البشير رئيسا
Author: Arif Nashed
Date: 09-26-2020, 05:08 PM
خلت راجله ممدود ومشيت تعزي في محمود
|
Post: #34
Title: Re: اطالب بعمر البشير رئيسا
Author: منتصر عبد الباسط
Date: 09-26-2020, 05:57 PM
Parent: #1
شايفك يا عبد الحفيظ مطلع حمدوك وشلتو
من القحطيين براءة!!!
ومشيل الشيلة للعسكر وغيرك
نسبها لما اسماه الهبوط الناعم!
يوجد تعصب طائفي وايدلوجي
هو الذي يحول بيننا وبين تحقيق
أي نجاح
وما نصنعه من ذر للرماد في العيون
هو سبب ما نعاني ونشكو
ولكن الدواء المر أشد عليكم
من المرض!
|
Post: #35
Title: Re: اطالب بعمر البشير رئيسا
Author: منتصر عبد الباسط
Date: 09-26-2020, 06:07 PM
Parent: #1
يا سليمان ناس قحت القحط الكذبة
ممكن عادي يقبلو بحميدتي رئيس لجنة اقتصادية
لاسباب مرتبطة بأنهم قوم كاذبون وصوليون
لكن لا يقبلون بخبير اقتصادي أو صاحب رؤي اقتصادية
رائدة ليس من الشلة التي شلت أيادي الاقتصاد السوداني
وتعرضها للفشل التام
|
Post: #36
Title: Re: اطالب بعمر البشير رئيسا
Author: اخلاص عبدالرحمن المشرف
Date: 09-27-2020, 01:25 AM
Parent: #35
اصاب محمد سليمان (وكنت اوده مخطئاً)
|
Post: #37
Title: Re: اطالب بعمر البشير رئيسا
Author: عبدالحفيظ ابوسن
Date: 09-27-2020, 05:36 AM
Parent: #36
نفس الحصل في 6 ابريل يا محمد
ناس تطالب بتمديد الفترة الانتقالية وتصفية اثار مايو . ونفس المجلس العسكر بقيادة سوار الدهب المتماهي مع الكيزان والجزولي الضعيف
لو تتذكر عصلجة بعض الثوار في الجلوس مع المجلس العسكري ومافي حل افضل من كدة والنجاحات لن تأخذها قطعة واحدة
اهو جاب زي الحاصل دة
|
Post: #38
Title: Re: اطالب بعمر البشير رئيسا
Author: عبدالحفيظ ابوسن
Date: 09-27-2020, 05:51 AM
Parent: #37
فعلا مشيل العساكر النايحة يا منتصر
عارف ليه ؟
لانو العسكرية اوامر غير خاضعة للنقاش وتراتيبية تلزم الانصياع
والمدنية غير كدة والخلاف داخلها متوقع .
والحكم يحتاج للرأي والرأي الآخر والمخالف
|
Post: #39
Title: Re: اطالب بعمر البشير رئيسا
Author: اخلاص عبدالرحمن المشرف
Date: 09-27-2020, 06:02 AM
Parent: #38
تعرف يا حفيظ لا زال رأئي انه مفروض
الفترة الانتقالية كان تكون سنة ، الوضع
كان ك الاتي : الناس كرهت الكيزان كراهة
عديييل ، بانتخابات حرة نزيهة مراقبة ما بجو
٢- الفترة الانتقالية الطويلة بتكون فيها مشاكل
وزي ما شايف في النهاية بتحمل للثورة
يعني الزخم الاول ح ينتهي ، الليلة لو قامت
انتخابات ما تضمن الناس ح تدي منو
٢- الفترة الانتقالية القصيرة التعاطف الخارجي
بكون اوضح والدعم اكبر.
وبعدين يا زول خف علي حمدوك و هي حكومة
ظني بتمثلك
|
Post: #40
Title: Re: اطالب بعمر البشير رئيسا
Author: عبدالحفيظ ابوسن
Date: 09-27-2020, 06:05 AM
Parent: #38
يا عارف لانو مرة محمود دي ياها البتصرف عليهم هي وراجلها .. واختها طوالي
|
Post: #41
Title: Re: اطالب بعمر البشير رئيسا
Author: عبدالحفيظ ابوسن
Date: 09-27-2020, 06:14 AM
Parent: #40
يا اخلاص انا مع المدنية بكل عيوبها لانو التصحيح فيها ممكن
ونقدنا الحار ليها دة والمتطرف عشان تنصلح
الفترة الانتقالية البسيطة ما صاح في ظني لانو مؤسسات الدولة العميقة قاعدة
الواجب الملح تفكيك مؤسسات الدولة السابقة
ودي ممكن تتلاعب وتفسد ليك اي انتخابات ويرجوها ويخجوها ليك زي الماحصل شي
|
Post: #42
Title: Re: اطالب بعمر البشير رئيسا
Author: امتثال عبدالله
Date: 09-27-2020, 12:22 PM
Parent: #41
محمد سليمان
والله كلامك عجبني شديد خلاص....
لا شك انك سياسي محنك...ووالله انا مستغربة كيف ناس زيك وعندهم فهم زي فهمك ما يكونوا مسؤولين
في هذه الحكومة ويتولوا شؤون ادارة الدولة وحل مشاكل الشعب...!!!
والمصيبة الان اجهل الناس يتولون المناصب العليا واقدر الناس من اصحاب الخبرات والمؤهلات يجلسون في مقاعد
المتفرجين.....
يعني حنتقدم كيف !!!؟؟؟
استاذ محمد سليمان:
تعليقك اوسكار الف الف نجمة ....شكرا كتير ...
الغالية اخلاص
تعليقك بخصوص ان الفترة الانتقالية مفروض تكون سنة واحدة تعليق اوسكار ولا شك ...لانه بعد ٤ او ٥ سنوات او قولي
بعد ٣٠ سنة ( اذا الفترة الانتقالية امتدت ٣٠ سنة) زخم الثورة والثوار حيكون انتهى وما بنعرف الانتخابات حتجيب منو عشان يحكمونا
لكن اذا الانتخابات كانت بعد ٦ شهور او سنة واحدة فقط كنا حنضمن ان الثوار الشباب وكذلك اصحاب الحكمة والراي من شيوخ السياسة
المستقلين يفوزوا في الانتخابات ونضمن عدم عودة اللصوص والحرامية مرة ثانية لينهبوا ويسرقوا اموال الشعب ...
|
Post: #43
Title: Re: اطالب بعمر البشير رئيسا
Author: Mohamed Suleiman
Date: 09-27-2020, 09:31 PM
Parent: #42
الأستاذة الفاضلة إمتثال عبدالله
لك التحية و الإحترام
Quote: محمد سليمان
والله كلامك عجبني شديد خلاص....
لا شك انك سياسي محنك...ووالله انا مستغربة كيف ناس زيك وعندهم فهم زي فهمك ما يكونوا مسؤولين
في هذه الحكومة ويتولوا شؤون ادارة الدولة وحل مشاكل الشعب...!!!
والمصيبة الان اجهل الناس يتولون المناصب العليا واقدر الناس من اصحاب الخبرات والمؤهلات يجلسون في مقاعد
المتفرجين.....
يعني حنتقدم كيف !!!؟؟؟
استاذ محمد سليمان:
تعليقك اوسكار الف الف نجمة ....شكرا كتير ... |
شكرا علي كلماتك النبيلة بحق شخصنا الضعيف ... لكن السودان يزخر بالكثير من المؤهلين و المؤهلات لقيادة هذه البلاد.
هناك حقائق بسيطة نغفلها نحن السودانيين و السودانيات:
- السودان غني بموارده الطبيعية و البشرية.
- السودان غني بتنوعه الإثني و الثقافي
كل هذه النِعم تحولت الي نِقم
سوء إدارة الخلافات و الإختلافات أدّي الي تدحرج البلاد الي هذا الدرك السحيق من الأزمات الدائرية.
و السودان لم يكن نشاذاً ... فهناك جنوب أفريقيا و رواندا تتمتع بنفس الميزات و خاضت نفس الأزمات بل أسوأ ..
الفرق أن تلك الدول إستفاقت علي حقيقة أن المخرج هو لابد من الإتفاق علي دولة متصالحة مع نفسها لتسع الجميع و تتقدم الي الإمام .... و قد كان.
هنا أيضاً .... مشكلة السودان ليست إقتصادية أو ضيق الأرض بسكانها..
لكن المشكلة الحقيقية هي عدم تصالح السودان مع نفسه .. مع مجتمعاته .. ليتحول وطن الي مرجل يغلي طارد لبنيه ليومنا هذا .
|
|