Post: #4 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-14-2020, 11:07 AM Parent: #3
انتي حضرتي صديق منزول و ماوماو ؟ و ايام ود الزبير كان بطلع في الكفر ..
حاضره زمن الكفر الجواني معانا ؟ و التدكيك بالمسله؟
كنتي بتمرقي ابو الحداد من حفرتو بالخيط؟
طاقه يا اميره ؟ و المتر الخشب ؟
Post: #5 Title: Re: اميره حسين بالانجليزي .. كم ( لبستي ) ؟ Author: جمال ود القوز Date: 08-14-2020, 11:07 AM Parent: #3
صحي قديمة يا قبة لكن لا زالت حاضرة ومستخدمه لانه مافي ليها بديل ...
Post: #6 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-14-2020, 11:10 AM Parent: #5
ود القوز ما تسغرها لينا🙂
انا ما صدقت لقيت زول قديم زينا...
بعدين مستعمله وين و الناس بتشتري البابمرز بالحبه!
تقول لي طاقه ...
Post: #7 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-14-2020, 11:13 AM Parent: #6
بعدين يا قوز الناس بدت تستعمل كلمة توب بدل طاقه..
يا زول اميره دي من زمن الفريني اب قرشين ..
Post: #8 Title: Re: اميره حسين بالانجليزي .. كم ( لبستي ) ؟ Author: جمال ود القوز Date: 08-14-2020, 11:22 AM Parent: #5
Quote: الناس بتشتري البابمرز بالحبه!
صحي والله والصلصة بالمعلقة يادوبك تكشن ليك نص مكعب الماجي أو مس كول اللحمة مع البصل عيشة أصبحت ضنك والناس اندعكت بالغلاء دعك .. حاجة تجيب المرض
ـــــــــــــــــــــــــــــــــــــــــــــــ
زمان كان قدر ظروفك للكريمات هسه بقت لكل شيء خلي بالك كان كبرتها بتزعل منك ... الحريم ما بدورن الكبر التحية للأخت أميرة مداخلاتها قليلة لكن تاخد منها حكمة مع إني بتبني حكمة الوالد الرجال بعد سن 25 سنة كلهم قدر بعض ..
Post: #9 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-14-2020, 11:52 AM Parent: #8
Quote: أو مس كول اللحمة مع البصل
شفت كيف ...
الحياه اصبحت (شمومه) .. تقولي طاقه متداوله ...
اللهم الا طاقة علي السقيد .. افتح انا البيبان و( الطاقه) ...
Post: #10 Title: Re: اميره حسين بالانجليزي .. كم ( لبستي ) ؟ Author: Ahmed Yassin Date: 08-14-2020, 12:38 PM Parent: #9
برضو انا قريت ليها تعليق جميل جدا عن (السايكوبيس) وانواع الجلاليب قالت (كرشليق مقفول) و (كرشليق مفتوح) مع اني ما عارف معنى الحاجات دي لكن انبهرت بمعلومات الاخت اميرة حسين
Quote: برضو انا قريت ليها تعليق جميل جدا عن (السايكوبيس) وانواع الجلاليب قالت (كرشليق مقفول) و (كرشليق مفتوح) مع اني ما عارف معنى الحاجات دي لكن انبهرت بمعلومات الاخت اميرة حسين
اها يا فنان انا كرشليق دي سمعتها اخر مره في السبعينات من عمك (شبيرقلّه) في دكانو في برندة السوق العربي جنب البنك الصناعي ...
عجبتنى حاجة أميره دى بالحيل ......وشنو الشطارة الكاتلاك دى لو كنت قريت اى بوست لى كان عرفت انا من وين يا هنا، غايتو فى زول بألف من راسو ويقول اميره قالت......الشكية لى الله
Post: #15 Title: Re: اميره حسين بالانجليزي .. كم ( لبستي ) ؟ Author: محمد أبوالعزائم أبوالريش Date: 08-14-2020, 10:07 PM Parent: #13
Quote: و هنااااك جنب جامع ام درمان .. كل ما يلزم العرسان في دكااااان عبد الله شلقامي ...
جميع ما يلبس الشبان وكمان ما يطلبو العرسان قصدوه ولقوهو في الدكان في السوق جنب جامع امدرمان
:)
عجوز ياخ .... ما فاضل ليك غير تقول (أحذية توموشيك)
Quote: أظنك مهاجر ما عايش فى السودان عشان كده ما سمعت كلمة طاقة
البوست ده كله ونسه يا ست اميره ... ما تاخدي في بالك ...
صحيح لي 31 سنة ما شفت السودان بي عيني ...
لكن متابع في كل الاسافير و لي زمن حقيقة ما سمعت كلمة طاقه ...
عموما يا ستي ما يهمك كانه ما قصدت اتونس ...
و بمش لي العجايز القدري ناس ابو الريش و مونتا ... :)
Post: #19 Title: Re: اميره حسين بالانجليزي .. كم ( لبستي ) ؟ Author: Amira Hussien Date: 08-15-2020, 03:40 AM Parent: #18
ده ما زعل .....عجبنى البوست شديد وكان مفروض اول شى اشكرك عليه بالعربى والانجليزى ... لانو حيكون باعث لى قصص وحكاوي كتيرة وانا بديت بى تجار الاقمشة فى سوق امدرمان
Post: #20 Title: Re: اميره حسين بالانجليزي .. كم ( لبستي ) ؟ Author: ترهاقا Date: 08-15-2020, 04:06 AM Parent: #19
يا ناس الدمورية ـحصل لبستو وزن عشرة ؟ ده قماش كان غريب تشتريه جديد ومع مواصفات الخياط حكاية ظبط ، بعد أول غسلة إنت تطلع انصار سنة، تكون قريبة من الركبة كدة
Post: #21 Title: Re: اميره حسين بالانجليزي .. كم ( لبستي ) ؟ Author: Hamid Elsawi Date: 08-15-2020, 05:25 AM Parent: #20
دخول للسلام علي الناس الجميلة و المعتقة آخر مرة حلقت شعرك عند عطا في سوق الشجرة متين أنا غايتو منذكر دكان العدني في سوق الشجرة. يا حليل دكاكين الطاهر يا قباني
معليش مختفي مع دوشة و زحمة العمل تحياتي
Post: #22 Title: Re: اميره حسين بالانجليزي .. كم ( لبستي ) ؟ Author: عزالدين عباس الفحل Date: 08-15-2020, 06:32 AM Parent: #21
يحي قباني
ي عمو قباني ، ترجم لينا مسطلحاتك دي ، نحن خارج الشبكة ، طاقة اندروس الكفر الجواني المتر الخشب طاقة البوبلين سلوى بوتيك اسندكو دكااااان عبد الله شلقامي ابو الحداد الفريني اب قرشين بس عرفت البابمرز لكن م بيبيعوهو بالحبة انت جبت الكلام دا من وين ؟؟؟؟؟ ي عمو قباني .
عزالدين عباس الفحل ابوظبي
Post: #23 Title: Re: اميره حسين بالانجليزي .. كم ( لبستي ) ؟ Author: NEWSUDANI Date: 08-15-2020, 07:53 AM Parent: #22
والله يا أبو الياء ده أظرف بوست بمناسبة عبدالله شلقامي هو كان أصلا شغال في دكان عباس رشوان ،، بعد داك تزوج أبنته وفتح جنبه ،،، والسوق العربي ومخازن الجلال وأولاد قاسم وآولاد ملاح وووو
وعبده الحلاق وعوض حريقة النقاش وباليل شيال مع كمال ترباس وعثمان العجلاتي وعمنا برعي المصري (زهجنا ماتقدر تدخن حوالين دكانه ) طوالي يقوول لناس البيت
لم تسقط بعد
Post: #24 Title: Re: اميره حسين بالانجليزي .. كم ( لبستي ) ؟ Author: عبداللطيف حسن علي Date: 08-15-2020, 07:57 AM Parent: #22
مع اني في حالة زهد من المشاركة
لكن البوست مغري ونحن صغار كان جارنا يسالنا اسئلة دقيقة عن اماكن في امدرمان وإذا لم تجاوب بدقة يقول ليك انت ما من امدرمان او ما ود ام درمان وبالتالي تسقط في نظره حتي كنت مولود في امدرمان مثلا بتعرف زقاق المنفلة بتعرف سينما برمبل بتعرف شارع العمايا الخ لايسالك عن الاماكن الظاهرة كدكان العدني وعباس رشوان والمهداوي..
Post: #25 Title: Re: اميره حسين بالانجليزي .. كم ( لبستي ) ؟ Author: نادر الفضلى Date: 08-15-2020, 09:46 AM Parent: #24
مش كان فى فى المحطة الوسطى أمدرمان محل قماش .. (رسمى أخوان)
وماشى على الجامع الكبير على يمنيك دكان (الطوخى) مرتبط فى ذاكرتنا كأطفال بالعيد. فيهو كل العاب الأطفال
بس يا الصاوى (العدنى) بتاع سوق الشجرة دا إلا يكون تقليد .. لأنه دكان العدنى الشهير فى سوق أمدرمان ومتخصص فى كل ملتزمات النساء
دكاكين الظاهر والظافر للجملة لحاجات البقالة ... زمن الناس بتشترى (حاجات الشهر) منه ..
برعى المصرى عنده ألذ شعير .. بارد يخت ليك فى الوش أيسكريم .. تشرب حاجة آخر إمتاع
وقريب منه فى مكى محل الباسطة الشهير باسطة بالسمنة البلدى .. حولا نسيت إسمه
وفى صينية ود أرو كان احسن محل فول لصاحبة السليمى من القرمانية
فى المحطة الوسطى جوار بنك الخرطوم كان فى محلين مرطبات متجاوريين، افتكر إسميهما الدانوب والأندلس. مرطبات الدانوب ه كان صفها طويل لشراء الباسطة بالكيلو .. ولكترة الضغط كان صاحبها بيقول للزبائن .. جارى دا عنده نفس الباسطة بنجيبا من من محل واحد .. لكن بدون فايدة .. الدانوب الدانوب
كان فى الزقاق الجانبى لشارع سينما الوطنية أمدرمان فى واحد عندو دكيكين صغير بالمساء بيكون راصى عدته صاج طعمية حارة بظبط أشهى سندوتشات طعمية حارة طازة بالشطة الخدرا .. السندوتش كان عيشة مدورة (عيشة طارة) . زمن العيشة عيشة .. بعد فترة إكتشفنا بنجى نخش السينما الدور التانى عشان سندوتشات الطعمية ما الفيلم .. وعادى كل واحد بيكون طابق ليهو طارتين طعمية .. أذكر الرجل إسمه (شامى) .. ربنا يديهو الصحة والعافية لو حى، ولو توفى يرحمة ويسكنه فسيح جناته.
كنا صغار على الجلوس فى قهوة يوسف الفكى وهى ترابيزها بتكون منتشرة خارج القهوة لكن إكتشفنا إنه ممكن ندخل القهوة وعلى الواقف نطلب كباية شوب مضلعة مليانة زبادى مخلوط بآيسكريم .. أحلى خلطة .. وكنت مستغرب من فكرة الخلطة نفسها .. لحدى ما جيت أمريكا ولقيت ليك أيسكريم ياقورت (أيسكريم زبادى)!
من أشهر طوابين العيش كانت طابونة كوستا فى المحطة الوسطى بأمدرمان يعمل أصناف مختلفة من العيش .. عيش بلدى، عيش قالب (مدور مثل البلدى ولكن بيخبز فى قالب)، عيش توستة (أفرنجى) وكان بيقدم لزبائنة بالشهر خدمات ديليفرى يومية للمنازل.
برضو طابونة البخيت فى شارع عبد اللة خليل .. عندهم خلطة خاصة بيخبز العيش الطوستة بالحجم الكبير والخلطة فيها لبن كما كان شائعا .. العيشة شهية الطعم تتاكل بدون غموس،
طبعا فى كمان فى ذكريات للأمدروخرتوميين .. يحيى قبانى وشخصى منهم .. ويحيى فى سرده ذكر خرتوميات بجيكم راجع عنها .. بس المشكلة ناس الضهارى بيقروها ويحفظوها ويعملوا ليك فيها خرتوأمدرمانيين ... هههه
Post: #26 Title: Re: اميره حسين بالانجليزي .. كم ( لبستي ) ؟ Author: علاء سيداحمد Date: 08-15-2020, 10:26 AM Parent: #25
سلام يحي واميرة حسين وضيوف البوست
بصراحة البوست الرجّع عبداللطيف للمنبر بوست غير طبيعى لانو الزول دا مختفى ليهو فترة طويلة . سلامة العودة يا عبداللطيف .
Post: #27 Title: Re: اميره حسين بالانجليزي .. كم ( لبستي ) ؟ Author: عبداللطيف حسن علي Date: 08-15-2020, 12:15 PM Parent: #26
تشكر علاء الدين نفس الحالة الانتابت شخصيات المجتمع المسلم بعد الفتنة الكبري وانقسام الناس حولها تحدث حاليا بعد ثورة ديسمبر التي انتظرناها طويلا.. فلم اجد بد من الزهد في الوضع الحاصل برمته.. زهد سياسي وليس فكري.. لكن الحالة النفسية متردية لدرجة.. قبل فترة وقع في يدي منشور جميل عن الهوية السودانية باسم علاء سيد احمد هل يخصك ذلك المنشور خالص تحياتي مرة اخري وصاحب البوست وضيوفه
يا نادر بتاع الباسطة الطيب سيد مكي ولازال للحين فاتح على ما اعتقد
Post: #31 Title: Re: اميره حسين بالانجليزي .. كم ( لبستي ) ؟ Author: عبداللطيف حسن علي Date: 08-15-2020, 01:01 PM Parent: #30
ماتنسي ي اميرة كاروا الحصان الببيع الجاز وعندو فنطاس صغير علي كارو الحصان مكتوب علي الفنطاس اجيب ول شل لا اذكر والركشة الزمان البتوزع الغاز العيش في سوق امدرمان كان طاولات محمولة علي عجلات خاصة لوضع الطاولة في الامام.. ابوي كان عندو فرن في السوق دا
ايو الرقشة الكانت بتوصل الغاز بعد اتصالك بالتلفون وطلبك للانبوبة تجيك فى محلك
Post: #33 Title: Re: اميره حسين بالانجليزي .. كم ( لبستي ) ؟ Author: علي عبدالوهاب عثمان Date: 08-15-2020, 02:11 PM Parent: #32
حبيبنا قباني والاستاذة اميرة بوست رائع جدا وجميل .. يا سلام .. طبعا بالنسبة لي نحن ناس ضواحي الدنيا اقاصي الشمال النوبي معرفتنا بالعاصمة وخاصة امدرمان ( زيرو ) لكن أجمل ما أحب سماعه حكاوي امدرمان عند زياراتنا النادرة للعاصمة .. كنا نزور دائرة الادارسة في الموردة لأن الادريسي منشأه في جزيرتنا في الشمال والمناسبة الثانية لأنني كنت معلم ثانوية عامة .. تلقيت كورس تدريب في معهد التدريب في أمدرمان يمكن الحارة الثانية الثورة أذكر كنا بالقرب من مقابر احمد شرفي .. وكان في مسجد محمود محمد طه على ما أذكر
موقف المواصلات كان مكان اسمه ( محلات العدني )
تحياتي واصلوا هذا البوست الجميل شكرا قباني شكراً اميرة
شكرا وانت محتفى معانا بامدرمان ....... ما عرفت معهد تدريب المعلمين ده وين ولا قصدك معهد المعلمين العالى البقى كلية التربية ، الموقف الجنب العدنى صاح موقف الثورات ،كانت فيهو البصات اللون بمبى ومكتوب فيها خط رقم ٨
Post: #48 Title: Re: اميره حسين بالانجليزي .. كم ( لبستي ) ؟ Author: علي عبدالوهاب عثمان Date: 08-15-2020, 08:50 PM Parent: #46
الاستاذة اميرة .. بوست رائع جداً .. اسم المعهد كان معهد تدريب المعلمات كان يفصل بيننا وبين معهد العالي مقابر احمد شرفي تقريبا عام 1976م .. الذاكرة تعبانة 45 سنة وأكثر تقريباً ما متأكد كان في طريق اسمه ( الثورة بالنص ) ..
يا ريت ذاكرة علي شمو أطال الله عمره
بوست جميل .. أنا لسع في حبس الكورونا ( عندي وسواس )
Quote: ده ما زعل .....عجبنى البوست شديد وكان مفروض اول شى اشكرك عليه بالعربى والانجليزى ... لانو حيكون باعث لى قصص وحكاوي كتيرة وانا بديت بى تجار الاقمشة فى سوق امدرمان
ههههه دي الحاله ده ما زعل ... ؟
قريب عم علي عبد الوهاب صلى بالجماعه قاموا شكروه انو صلاته كانت مكربه قال ليهم و هو مغتبط ؤ دي (الهاله ) بلا وضو ...
يا زوله اسعد الله ايامك .. و ايوه كده خلينا ننسى الهم شويه و نستمتع بالبوست ...
Quote: يا ناس الدمورية ـحصل لبستو وزن عشرة ؟ ده قماش كان غريب تشتريه جديد ومع مواصفات الخياط حكاية ظبط ، بعد أول غسلة إنت تطلع انصار سنة، تكون قريبة من الركبة كدة
عشان كده يا ساطور عمك محمد حسنين ( ابو سريع ) لما ناس الحله طلبوا منه يفصل ليهم (كفن) لي زول اتوفى اخد المقاس و قال ليهم تعالوا بعد اسبوع اعملوا بروفه ...
الدموريه كان لازم تتغسل بالاول لانها بتكش ...
بتذكر تماما طاقة الدموريه تجي من السوق بغسلوها و يشروها حتين تمشي الترزي ...
كان عندي جلابيه و خرتايه دموريه في الكتاب طقم خطير ههههه
ميزتها دافيه في الشتاء .. و لو عنك جلابيه دموريه و مشيت الكوره النشالين ما بشرطوا الجيب بالهين لانها تقيله ...
Quote: دخول للسلام علي الناس الجميلة و المعتقة آخر مرة حلقت شعرك عند عطا في سوق الشجرة متين أنا غايتو منذكر دكان العدني في سوق الشجرة. يا حليل دكاكين الطاهر يا قباني
معليش مختفي مع دوشة و زحمة العمل تحياتي
يا حليلك ...
عطا الحلاق و العجب الجزار ... ايام يرسلوك تجيب اللحمه .. كان جبتها حمرا يدقوك .. لانك ما جبت الدهن ... اللحم لازم يشبه الودعه ...
و عمتنا بت بتي ( علاجنا من الفكك مجاني كان ) و اولاد بتي ... و محطة محجوب خال العيال و اولاد عشريه ... ياخ ده كان شارع عجيب ...
و المرعب اسماعيل الطهار ... شنطة الحديد ( علبة الحقن ) تشمها في ود ارو وهو لسه في حلتكم في ود نوباي ..
و دكان فول القرمانية اب شطه ... بقى كشك توتو كوره بعد داك ... و شريط الترماج كان ظاهر ملان تراب في صينية ود ارو ...
طبعا الترماج هنا الا اميره و عبد اللطيف الشافوهو ...
Quote: والله يا أبو الياء ده أظرف بوست بمناسبة عبدالله شلقامي هو كان أصلا شغال في دكان عباس رشوان ،، بعد داك تزوج أبنته وفتح جنبه ،،، والسوق العربي ومخازن الجلال وأولاد قاسم وآولاد ملاح وووو
وعبده الحلاق وعوض حريقة النقاش وباليل شيال مع كمال ترباس وعثمان العجلاتي وعمنا برعي المصري (زهجنا ماتقدر تدخن حوالين دكانه ) طوالي يقوول لناس البيت
و ينك يا صاحب ...
دايرين تخشوا حوالين دكان عمك برعي ؟ ههه لا حولاااا .. كان كده انحنا سغار ما حضرنا شي ... انحنا نخش يكحلوك طوالي تمشي صف السينما ...
عبد الله شلقامي جا من كوستي و فعلا كان مع عباس رشوان ...
قبة ده وهو شافع النوع البيرسلو سورج بجيب الحُقة سافي نصها كان في بتاع طعمية قدام جورج مشرقي ومطعم السطح حمام زي الحمام
Post: #41 Title: Re: اميره حسين بالانجليزي .. كم ( لبستي ) ؟ Author: Ahmed Yassin Date: 08-15-2020, 04:36 PM Parent: #40
الخواجة بابا كوستا صاحب الفرن كان ساكن جنب مدرسة الراهبات وبيته بفتح شرقا جوار الكنيسة الكاثوليكية وجنبها بيت عمك مصطفى الحاج سعيد وكان عندهم ولد فنان اسمه (طارق) بغني غربي وبعزف جيتار .. وشفته في القاهرة في فرقة (افريكانز) الشهيرة
Post: #42 Title: Re: اميره حسين بالانجليزي .. كم ( لبستي ) ؟ Author: عبداللطيف حسن علي Date: 08-15-2020, 05:19 PM Parent: #38
ياقبة احتمال يكون ركبتو وانا شافع سايقنو زي الغنماية غايتو كنت بتلفت جوه الحاجة العندها دركسونين دي شنو
يعنى ما شديد .....وهو شى لابد منه والتعامل معه بسعة افق و واقعية شى مفيد ولك تحية أرق وأحلى
Post: #47 Title: Re: اميره حسين بالانجليزي .. كم ( لبستي ) ؟ Author: ناذر محمد الخليفة Date: 08-15-2020, 08:38 PM Parent: #1
سلام يحي وضيوف البوست .. رغم الحزن الخاص في دواخلي ورغما عن ابتعادي عن الكتابة لفترة طويلة شدني هذا البوست وعشت في السودان القديم الذي غاية ما أتمناه أن يعود لنا رغم التطور الذي لازم جميع المجتمعات الا سوداننا الحبيب والذي يكون الوحيد في الكون الذي ماضيه افضل من حاضره تطورا و مواكبة للعالم الان ان لم نكن سباقين للعالم في فترات الستينات والسبعينات ..
حببت التعليق على مداخلة الفنان تهراقا :
Quote: تشتريه جديد ومع مواصفات الخياط حكاية ظبط ، بعد أول غسلة إنت تطلع انصار سنة، تكون قريبة من الركبة كدة
أذكر وفي منتصف العام 1995 كانت لنا فرقة غنائية مسرحية حديثة التكوين ..تم تكليفي بشراء قمصان للفرقة تم الاتفاق على لونها مسبقا .. فذهبت للسوق الشعبي الخرطوم بعد أخذ قياسات الاعضاء وأشتريت لهم القمصان .. وكان من شروط المظهر ان يتم شك القميص الزهري تحت البنطال الاسود .. وبعد عرضين لاحظت ان القمصان بدأت تبرز أعلى البنطال !! وفي العرض الموسيقي المسرحي الثالث عجز الاعضاء عن حشو الاقمصة تحت البناطلين !! أما العروض التالية أرتفعت الأقمصة عاليا مفارقة للبناطلين !! وعندما تم مناقشة الموضوع أجابني احد أعضاء الفرقة بنبرة ساخرة .. والله لو ما اشترينا قمصان جديدة العرض الجاي دا حا تشوف القمصان دي لابسنها ستيانات !!
لكن البوست مغري ونحن صغار كان جارنا يسالنا اسئلة دقيقة عن اماكن في امدرمان وإذا لم تجاوب بدقة يقول ليك انت ما من امدرمان او ما ود ام درمان وبالتالي تسقط في نظره حتي كنت مولود في امدرمان مثلا بتعرف زقاق المنفلة بتعرف سينما برمبل بتعرف شارع العمايا الخ لايسالك عن الاماكن الظاهرة كدكان العدني وعباس رشوان والمهداوي
بركة الشفناك طيب يا عبد اللطيف ... جخانين ام در و المسميات كتيره الما بعرفوها الناس ..
الحاجة امي رحمة الله عليها كانت حربية جدا و مجامله و دائما تتصدر للحاره و ما كان عندها بوبار الجنس اللطيف هههه بس كانت لما تعيد الذكريات و سط اخواتها كانت تقول ليهم ... انا غني لي (الحاج) في عرسي ... الحاج الحاف دي الحاج سرور .. و كان ساكن قريب جدا من حيشانا ...
اشطر ميكانيكي في السودان ازهري في ابروف قريب من المشرع .. ياخ ازهري صلح لي عربيتي الكريسيدا موديل ٨٢ من قطعه يومية بتركيب قطعة توليفه من عربية تاونس القطعة اشتريتها بي يدي من لاعب المريخ الكان عنده محل اسبيرات تاونس ( نسيت اسمه ) قدورة امكن
وزة لاعب المريخ كان في قراش المرسيدس بعد داك فتح محل براو
Post: #50 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-16-2020, 02:00 AM Parent: #49
Quote: طاقة اندروس الكفر الجواني المتر الخشب طاقة البوبلين سلوى بوتيك اسندكو دكااااان عبد الله شلقامي ابو الحداد الفريني اب قرشين
عزالدين .. ياخ انتو جيل ايمن الاول و احفاد المك نمر مالكم و مال النوستالجيا دي ..
الرباطابي سألو جعلي في الخرطوم اجزخانة المك نمر بي وين؟ الجعلي قال ليو في شارع المك نمر طبعا .. في زول ما بعرف شارع المك نمر!! الرباطابي رد قال للجعلي : اي عرفتو .. دحين ما ياهو الشارع الجرابو جدك ؟ 🙂
Post: #51 Title: Re: اميره حسين بالانجليزي .. كم ( لبستي ) ؟ Author: امتثال عبدالله Date: 08-16-2020, 02:10 AM Parent: #49
بوست اوسكار يعني معقولة في زمنكم في بنات بسموهن اميرة ..اسم اميرة اسم حديث من جيل اواخر الثمانينات والتسعينات.. ههههههه...ومن البداية عرفت ان البوست قصده خفة الدم والتغيير من بوستات السياسة والهم والغم. ..وقد نجحتم في ذلك وخاصة ان قطوعات الكهرباء وصفوف البنزين والرغيف خلت حتى الاطفال عمر ٥ سنين يتكلموا في السياسة والاقتصاد والمعاناة والمستقبل المجهول ،ووجدنا طفل ، اي والله طفل قال انتو الملايين الصادرتوها دي ما تشتروا بيها بنزين عشان الصفوف الطويلة في الطرمبات دي تختفي.... وسمعنا ان امدرمان فيها سوق يوجد به الحاجات السودانية الخالصة والاثريات الممكن تنفع هدايا للامريكيات،،بتعرفوا السوق ده وين في امدرمان !!
Post: #52 Title: Re: اميره حسين بالانجليزي .. كم ( لبستي ) ؟ Author: نادر الفضلى Date: 08-16-2020, 02:14 AM Parent: #49
Quote: Quote: يمكن أكون شفت الترماج لكن ما مشيت بى مشوار بتذكر كان مصدر رعب بالنسبة لى ........القبابين الحمر جيرانا والخدر ما بعيدين مننا
سلام يا اميرة
تفاصيل القبانية دى ما بيعرفا إلا زول عايش فى وسطهم، وبيستخدموها هم أنفسهم
بس ما بقولوا الخدر بيقولوا (الزروق) .. القبابين الحمر والقبابين الزروق .. وهم أبناء عمومة وصلة رحمة وقرابة قريبة وحميمة
غايتو قربت أحدد موقعك فى الخريطة .. ههههه
Post: #53 Title: Re: اميره حسين بالانجليزي .. كم ( لبستي ) ؟ Author: نادر الفضلى Date: 08-16-2020, 03:20 AM Parent: #52
Quote: يانادر الديلفرى حق العيش من فرن كوستا كان بصندوق أبيض جاريهو حصان والسايق اسمو شريف فول ودارو لى هسه طعمو يجينى والعيش الحار والسلطات
تصديقى با أميرة كنت عاوز أوصف عربة الديليفرى بتاعة عم شريف بس قلتا حا أخش فى تفاصيل .. وما شاء الله عليك كنت مفتمر براى متذكر إسمه شريف! والعربية حاجة شبيهة بعربات أفلام الكاوبويات السفرية البتجرها حصين .. بس على مقاس أصغر فالصندوق أصغر ليس لركاب ولكن للبضاعة. وبابه من الخلف، وعمكم شريف على الواقف بيفتحه وبداخلة طاولات العيش على أدارج بيتناول من كل صنف حسب الطلب، والغريبة كان حافظ طلبات كل زبون كيف ما عارف، ومع مرونة الزبائن عند الباب بيشتروا زيادة على الراتب اليومى الخير كان راقد. ومقدمة العربة فى مقعد يجلس عليه شريف وفى المقدمة الحصان الأصيل. وعمك شريف لابس لبس خمسة أفرنجى .. ريدا فضفاض تحت الركبة وفوق قميص ما قادر أذكر تفصيلته ولكن وكأنها شى قريب مثل جكت خفيف فضفاض صيفى بكم قصير من القطن، وبيلبس بورنيطة كاوبوى بتقيه من وهج الشمس، وف يده سوط العنج الطويل لقيادة الحصان.
أما فول ود أرو .. كان إسمه (بوفيه ود أرو) موقعوا ممتاز عند تقاطع شارعى أبوروف والهجرة فى الركن الشمالى العربى ومقاصد جنوبا قطعة شارع أبوروف جامع ود أرو . وبيشتغل فول وطعمية بالليل والترابيز والكراسى الحديد فى الهواء الطلق طعمية وسلطة حمراء والسر فى سلطتى الأسود والروب. السليمى القرمانى لامن توقف وجا بعده من واصل (الكار) .. ما كان فوله بنفس الروعة!
وأستطيع أن أقول أن فى تاريخ أمدرمان لم يأتى صاحب مطعم فول يقارب فول السليمى يقابله فى الخرطوم فول أبو العباس والعشرة الكرام (قبل قرار مهدى مصطفى الهادى)!
Post: #56 Title: Re: اميره حسين بالانجليزي .. كم ( لبستي ) ؟ Author: Amira Hussien Date: 08-16-2020, 11:54 AM Parent: #52
Quote: مش كان فى فى المحطة الوسطى أمدرمان محل قماش .. (رسمى أخوان)
وماشى على الجامع الكبير على يمنيك دكان (الطوخى) مرتبط فى ذاكرتنا كأطفال بالعيد. فيهو كل العاب الأطفال
بس يا الصاوى (العدنى) بتاع سوق الشجرة دا إلا يكون تقليد .. لأنه دكان العدنى الشهير فى سوق أمدرمان ومتخصص فى كل ملتزمات النساء
دكاكين الظاهر والظافر للجملة لحاجات البقالة ... زمن الناس بتشترى (حاجات الشهر) منه ..
برعى المصرى عنده ألذ شعير .. بارد يخت ليك فى الوش أيسكريم .. تشرب حاجة آخر إمتاع
وقريب منه فى مكى محل الباسطة الشهير باسطة بالسمنة البلدى .. حولا نسيت إسمه
وفى صينية ود أرو كان احسن محل فول لصاحبة السليمى من القرمانية
فى المحطة الوسطى جوار بنك الخرطوم كان فى محلين مرطبات متجاوريين، افتكر إسميهما الدانوب والأندلس. مرطبات الدانوب ه كان صفها طويل لشراء الباسطة بالكيلو .. ولكترة الضغط كان صاحبها بيقول للزبائن .. جارى دا عنده نفس الباسطة بنجيبا من من محل واحد .. لكن بدون فايدة .. الدانوب الدانوب
كان فى الزقاق الجانبى لشارع سينما الوطنية أمدرمان فى واحد عندو دكيكين صغير بالمساء بيكون راصى عدته صاج طعمية حارة بظبط أشهى سندوتشات طعمية حارة طازة بالشطة الخدرا .. السندوتش كان عيشة مدورة (عيشة طارة) . زمن العيشة عيشة .. بعد فترة إكتشفنا بنجى نخش السينما الدور التانى عشان سندوتشات الطعمية ما الفيلم .. وعادى كل واحد بيكون طابق ليهو طارتين طعمية .. أذكر الرجل إسمه (شامى) .. ربنا يديهو الصحة والعافية لو حى، ولو توفى يرحمة ويسكنه فسيح جناته.
كنا صغار على الجلوس فى قهوة يوسف الفكى وهى ترابيزها بتكون منتشرة خارج القهوة لكن إكتشفنا إنه ممكن ندخل القهوة وعلى الواقف نطلب كباية شوب مضلعة مليانة زبادى مخلوط بآيسكريم .. أحلى خلطة .. وكنت مستغرب من فكرة الخلطة نفسها .. لحدى ما جيت أمريكا ولقيت ليك أيسكريم ياقورت (أيسكريم زبادى)!
من أشهر طوابين العيش كانت طابونة كوستا فى المحطة الوسطى بأمدرمان يعمل أصناف مختلفة من العيش .. عيش بلدى، عيش قالب (مدور مثل البلدى ولكن بيخبز فى قالب)، عيش توستة (أفرنجى) وكان بيقدم لزبائنة بالشهر خدمات ديليفرى يومية للمنازل.
برضو طابونة البخيت فى شارع عبد اللة خليل .. عندهم خلطة خاصة بيخبز العيش الطوستة بالحجم الكبير والخلطة فيها لبن كما كان شائعا .. العيشة شهية الطعم تتاكل بدون غموس،
طبعا فى كمان فى ذكريات للأمدروخرتوميين .. يحيى قبانى وشخصى منهم .. ويحيى فى سرده ذكر خرتوميات بجيكم راجع عنها .. بس المشكلة ناس الضهارى بيقروها ويحفظوها ويعملوا ليك فيها خرتوأمدرمانيين ... هههه
زي ما قال ليك عمنا منتصر .. الباسطة باسطة عمك الطيب سيد مكي .. صاحب اعظم دكان في ساحة المولد و اسمح حلاوة مولد ... طبعا ذكرياتنا كما ذكرت يابن عمي ... امدوخرطوميه ... اها كباية الشعير بالليمون في نادي العمال في الخرطوم لا بديل لها ...
اما الفول بعد كشك السليمي انا كنت من رواد ابو العباس في الخرطوم و بعدها عمك احمد سعد في ود نوباوي ... قدام بيته و العناقريب الجميله ...
من الاشياء التي لا انساها احداث ود نوباوي 71 لانه كل عربات الجيش كانت بتمر بي قدام بيتنا في ود ارو و الاحداث على مرمى حجر ... الكوامر كانت تمشي ملانه شباب و ترجع جثث ...
برضو في نفس الوقت اشتريت اول جريده بالحجم العريض ... كانت جريدة الايام و كنا شفع نغني ( البرش بي قرش ) ... الجرايد كانت حجمها زي علبة البينسون اب عشره و النميري بقاها عريضة زي ابو عشرين ... و احرق البينسون حسابو علي ...
Quote: هسه كلكم عرفتو .....خلونى مع اندادى نسترجع الماضى الجميل .......ما دايره ماسنجر ما دايره رسايل فى الخاص وشغل شباب
طبعا أميرة بتقصد ما دايرة شغل الشباب الصغير المراهق .. فهى مع أقرانها من الشباب الواعى
بس ما لاحظتم البوست كله رجالى والإستثناء (أميرة) .. الباقيات يتاوقن ولسان حالهن بيقول شكيتكم لى الله أميرة ويحيى .. كبير الله ... ههههه والخوف من يحيى الشغال حملات تفتيش أجيال من البيبان والطاقة! حيكتفى بطاقة أميرة .. تقول طاقة شباك النبى (ص) ..
يا أميرة .. إمتثال كانت بتاوق وحضرت لأنها واثقة من أنها مصنفة أجيال حديثة وكمان ما أمدرمانية وكانت بتتاوق لأنها بتحب حكى ناس زمان وبتقارن باحوال عاصرتها أو معاصراهاالآن
Post: #67 Title: Re: اميره حسين بالانجليزي .. كم ( لبستي ) ؟ Author: Al Sunda Date: 08-17-2020, 05:21 AM Parent: #66
فوبيا الوقوف علي الأطلال and إجترار الزمن الجَميل ظاهره سودانيه خالصه ، قَال أغاني و أغاني قال . تعليق في بوست مشابهه على الواتس
Post: #68 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-17-2020, 06:36 AM Parent: #67
Quote: حبيبنا قباني والاستاذة اميرة بوست رائع جدا وجميل .. يا سلام .. طبعا بالنسبة لي نحن ناس ضواحي الدنيا اقاصي الشمال النوبي معرفتنا بالعاصمة وخاصة امدرمان ( زيرو ) لكن أجمل ما أحب سماعه حكاوي امدرمان عند زياراتنا النادرة للعاصمة .. كنا نزور دائرة الادارسة في الموردة لأن الادريسي منشأه في جزيرتنا في الشمال والمناسبة الثانية لأنني كنت معلم ثانوية عامة .. تلقيت كورس تدريب في معهد التدريب في أمدرمان يمكن الحارة الثانية الثورة أذكر كنا بالقرب من مقابر احمد شرفي .. وكان في مسجد محمود محمد طه على ما أذكر
موقف المواصلات كان مكان اسمه ( محلات العدني )
تحياتي واصلوا هذا البوست الجميل شكرا قباني شكراً اميرة
ام درمان يا عم علي قال فيها الشاعر القى فيك هَنَاي القى فيك الضُر برضك انت معاي حلوه يا ام در ... غنى ليها سرور غنى ليها خليل قالوا فيها كلام اغلى من الدر ...
Post: #69 Title: Re: اميره حسين بالانجليزي .. كم ( لبستي ) ؟ Author: Kabar Date: 08-17-2020, 07:58 AM Parent: #68
لأ..ما بنقدر نغير في الأيام سجية ، محسوبات علينا : المرة والهنية..!
كل المحبة يا يحى وترهاقا..! ادونا اليقين يا شباب: الموضوع محبة ولا فيهو اجندة خاصة؟ عشان لو القصة فيها اجندة خاصة ، خلونا نسحب عدتنا ونعرد في دروب ام طرقا عراض..! والمعراد يا ترهاقا ، في مقامات الجمال ، افضل انواع البهاء..والإ ح نقوم نرجع نخليك تطلع معانا راعي ، خصوصا لو كان رعي بقر..عشان نطير ليك الفي راسك..!! سلامات يا اميرة حسين بالإنجليزي..نحن يا قريبتي ناس خوافين شديد..يعني مش بعيد بعد شوية نسحب كلامنا زي السلامو عليكو..!
من ازمنة الجمال يا اميرة حسين بالإنجليزي..يتخيل لي مرة اشتريت تذكرة لحفلة عبد الله محمد من صيدلية عباس رشوان ، وحتى اللحظة يا اميرة قاعد استغرب لمن الناس تقول علي جنوبي متمرد زي يحي قباني بانو مجرد حلبي..؟ يبقى حلبي ، مافي مشكلة (مع انو وحاة الله يا اميرة ، يحى قباني ازرق من ابوي بدوي السافنا ذاتو..!!) ، لكن يبقى سوداني هنا الدم للركب..! يحى قباني ، يا اميرة ، زي عبد الكريم الأمين (كيكي) ، الإتنين خريجين هندسة جامعة الخرتوم ، يحى مرة من كريش (قريش) ، ناس بحر الغزال ، مرة من الجور (برضك ناس بحر الغزال) ، مرة من اهلي الدينكا الطوال ، ومرة صاحب صلاح بروان ، ومرة من ناس الحقيبة..ومرة ومرة ومرة..سوداني عادي ومستهبل كمان يا اميرة..! وهكذا يا ترهاقا ، اميرة حسين بالإنجليزي ، زاغت من باقي الفتة ، وقضتها حوامة في دكاكين الأقمشة في امدرمان.. زاغت من ، أيام شرحبيل احمد كان بيغني في دعاية ( البيرة ام جمل ، والشراب اسكوب ، كب يا علي بكبابي الشوب..!!)..زاغت من (غردون ميوزك هول)..زاغت من اناقة (جاز الديوم) ،وسامة جاز (أبيي) ، حنين جاز (الأضواء) ، جمال عشة متيانق (دي مافي زول بيعرفها يا يحى وترهاقا غير استاذنا احمد الأمين عليه السلام..!!..واستاذنا حمد اسماعين..عليه السلام..!!) وحاة الله يا احمد ياسين وجمال القوز والصغنونة اميرة حسين بالإنجليزي..انا صغنوني شديد يا جماعة.. يعني اصغر من يحى وترهاقا..!! كل المحبة يا شباب ، كتبت خواطر كتيرة عن هذا الخيط ، والأغرب ضاعت ، وهذا ما تبقى منها..!! حصل يا اميرة سمعتي ترهاقا ذات حنين كمنجة شارد..! يا حليل ايام (الخــمّــال) يا ول ابا احمد ياسين..! ادونا اليقين يا شباب: الموضوع محبة ولا فيهو اجندة خاصة؟ عشان لو القصة فيها اجندة خاصة ، خلونا نسحب عدتنا ونعرد في دروب ام طرقا عراض..! يتخيل لي الجمال في السودان سمح ، وواضح شديد..والماداير يشوفو ، ويختار يركب ضهر بندقية ، برضك مافي مشكلة ، بس يتذكر انو البندقية لا تعرف الجمال ولن تخلق الجمال..!! شرحو: عندي سن مخلخلة ، شوية كده وتقع مني ( واه ا صحي) وزايغ اقلعها ، لو لقيت لي نفرين اتأكدو من هيئة الفنان عبد اه ز محمد في الفيديو الفوق ، ح اقعل سني باطمئنان..!! ما بنقدر نغير ، اميرة ، في الأيام سجية..!!
كبر
Post: #70 Title: Re: اميره حسين بالانجليزي .. كم ( لبستي ) ؟ Author: Kabar Date: 08-17-2020, 08:14 AM Parent: #69
هذا ، مع مراعاة فروق الإملاء..
الرقيب الألكتروني في سودانيز اونلاين زي اخونا وزير العدل نصر الدين عبد الباري ، قاعد يمارس التشريع بمبدأ عين نايمة والتانية صاحية..!
فشنو..
(واللـــــه صحي) ، و (عبد اللـــــه محمد)..عكس ما هي ظاهرة..!!
كبر
Post: #72 Title: Re: اميره حسين بالانجليزي .. كم ( لبستي ) ؟ Author: Amira Hussien Date: 08-17-2020, 09:12 AM Parent: #69
ما بنقدر نغير ، اميرة ، في الأيام سجية..!!
حقا ما بنقدر .....بالجد كتابتك قدر الوصلنا جميلة .....ما زغت لكن البوست اثار الشجون ومحاولة اتماسك عشان اكتب بثبات
Post: #71 Title: Re: اميره حسين بالانجليزي .. كم ( لبستي ) ؟ Author: محمد مجيدو Date: 08-17-2020, 08:19 AM Parent: #1
Quote: اميره حسين ! كم (لبستي) على وجه البسيطة 🙂
يمين بالله كلمة (طاقة) قماش اخر مره سمعتها قبل ٥٠ سنه
طاقة البوبلين بي كم هسي ؟ هههه
انت شكلك قبال اسندكو و سلوى بوتيك ...
يا هندسة .... كم لبستي دي ... بتقص بيها اميرة لبست كم طاقة بوبلين ؟؟؟؟ مجرد ملاحظة .... هههههههه
Quote: زي ما قال ليك عمنا منتصر .. الباسطة باسطة عمك الطيب سيد مكي .. صاحب اعظم دكان في ساحة المولد و اسمح حلاوة مولد ...
شكرا منتصر بالإنجليزى ويحيى .. نعم الطيب سيد مكى صاحب أفضل حلوانى باسطة وكنافة بالسمنة البلدية خشيت أن أذكر إسمه لأنى دايما أخلط بينه وبين (الطيب خوجلى) أشهر عجلاتى عصامى أصبح أكبر مورد للعجلات .. وقد كنت قرأت مقالاً للأستاذ المرحوم هلال السادات وهو من جيل قديم ينافس فى ذكرياته الأمدرمانية الأستاذ شوقى بدرى .. تحدث عن عجلاتية مشاهير بأمدرمان القديمة وتأتى أهميتهم فى زمانهم العجلة كانت أحد الوسائل الرئيسية للتنقل بأمدرمان. مثلما العجلة كانت وسائل ترفيهية للأولاد فى سن مبكر .. إيجار من العجلاتية بالساعة ومنها صدرت الطرفة يحكى أن زوجة إنتظرت ليلا عودت زوجها المتأخر بعد أن قضى وقتا ممتعا مع أصدقائه وجائها آخر الليل مبسوطا يترنح .. فسألتة بمساخة الساعة كم؟ .. فرد عليها ساخراً .. بتسألى ماليك .. مأجر منك عجلة؟ ههههه
أما يا يحيى عن الدكاكين الشهيرة بساحة المولد فهى عديدة .. ولكننا لن نبدل دكان شخصية أمدرمانية إرتبطت بذكرياتنا منذ الطفولة وهو العم إبراهيم عبد اللطيف متعه الله بالصحة والعافية أذكر فى زيارة لى بالسودان وعقب إنتهاء المولد .. تظل بعض الدكاكين مفتوحة بساحة مولد أمدرمان بعد أن تم إرجاعه لموقعه الأصلى ساحة ميدان الخليفة عبدالله التعايشى. توقفت بالعربة حينما شاهدت يافطة إبراهيم عبد اللطيف وأولاده وذهبت رغم أننى لم أجده أو اولاده فقد كان إحياء لذكريات جميلة أن أشترى منه حلاوة المولد. والعم إبراهيم عبد اللطيف صاحب دكان بقالة شهير مرت عليه أجيال واجيال كان بشارع الهجرة بين أزهرى وود أرو.
يقودنى هذا لسياسة العم إبراهيم عبد اللطيف فى البيع بالمولد النبوى .. وهو له مصنع صغير يصنع فيه الحلاوة السمسمية والحمصية والفولية إضافة للمستورد وعرائس المولود بأحجام مختلفة والأحصنة .. كما يقف هو فى المحل ويستعين ببياعين أصحاب نظرة فاحصة، بحيث يجيدون التعامل وفراسة معرفة القدرات الشرائية للزبائن .. الهم الأول ألا يرد فقيرا ويبيع له بسعر مخفض والشغلانة بالبركة وتكون رابحة فى النهاية ..
كما أن ميدان الخليفة عبد الله التعايشى كان له سور أثرى عالى داير ما يدور منشأ من الحجر ربما عينته مثل مبنى سجن أمدرمان (الحجارة الصخرية) تتخلله بوابات دخول بالإتجاهات الأربعة للأسف فى عهد مايو تم التغول على هذا الأثر الناريخى وتهديمه وبناء سور حديث قصير.
ومما يحكى عن سور ميدان الخليفة أنه فى زمن حكم عبود فى المولود كانت حادثة عرفت بضربة الأنصار .. فيقال أن أحد الأشخاص كان ممسكا بكباية شاى حارة ففى لحظة الفزع والجرى قفز من فوق السور وهبط وهو ممسكا بكباية الشاى الحارة بشايها كماهى ! قد تكون مبالغة ولكنها من القصص المتداولة.
مع الطيب خوجلى العجلاتى الأمدرمانى الذى أصبح من أكبر مستوردى العجلات
Quote: دردشة مع أحد رموز أم درمان: الطيب خوجلي ابتهاج العريفي سفيان البشرىنشر في آخر لحظة يوم 10 - 09 - 2011 تعتبر الدراجة أو «العجلة» وسيلة للحركة يمكن استخدامها في شتى المجالات المختلفة.. وعلى الرغم من اندثارها إلا أنها ما زالت في بعض المدن تحتفظ بمكانتها حتى اليوم. الطيب خوجلي يعتبر من أشهر تجار الدراجات بمدينة أم درمان حيث بدأ حياته العملية بهذه التجارة في الستينات من القرن الماضي ويقول الطيب إنه بدأ ركوب العجلة في الخمسينات والى اليوم يستخدم العجلة في العديد من المشاوير داخل مدينة أم درمان التي نشأ وترعرع فيها بحي الركابية. «آخر لحظة» زارته في معرضه بسوق أم درمان باعتبار أنه أحد رموز المدينة ولاحظت أن زبائنه لا يتوقفون لحظة عن المعرض وهو يتحدث مع هذا وذاك بأسلوب يحاول من خلاله إرضاء الكل. وفي دردشة سريعة تحدث الطيب عن بداياته في هذا المجال وأشهر المدن في السودان التي يكثر فيها استخدام العجلات وأسعارها والطرائف التي مرت به خلال مسيرته في هذا العمل فمعاً نطالع: يقول الطيب خوجلي بدأت العمل بهذه المهنة منذ أكثر من واحد وخمسين عاماً وحتى الآن ما زلت أمارس هذه المهنة وأضاف أنه في التسعينات اتجه للعمل في مجال الأدوات الكهربائية نسبة لانحسار العمل بالعجلات بعد ظهور الركشات والتاكسي خاصة في المدينة لكن العمل بها ما زال في بعض الولايات وأشار الى أن أشهر البلاد التي كانت تأتي منها العجلات هي الصين وفيها كل المقاسات وأشهر أسمائها «الرالي» الإنجليزية وكذلك نجد أن أشهر المدن التي تستخدم العجلات هي بورتسودان وعطبرة وساهمت في العديد من المجالات مثل توزيع الصحف والثلج والبريد والبرق ونقل العيش وكذلك في المكاتب الحكومية ونقل الطلاب إلى مدارسهم وما زالت تساهم في المناشط الرياضية والمنافسات. ويضيف الطيب أن العجلة ليس لها علاقة بالوظائف فالجميع كانوا يستخدمونها. وعن أسعارها قال إنها بدأت بستة عشر قرشاً لكن الآن وصلت الى ثلاثمائة جنيه وأن استخدامها لا يختلف من مدينة لأخرى بل الغرض واحد في كل المدن لكن نجد من يزينها ويضع عليها راديو وبها أنوار أمامية وخلفية وتنطبق عليها جميع اللوائح المرورية حفاظاً للسلامة العامة. وقال الطيب لم يكن هناك عجلات صنعت خصيصاً للنساء لكن نجد في الصين عجلة واحدة خاصة بهن وأضاف أن الإنجليز يعتبرون قيادة العجلة رياضة. وعن أشهر العجلاتية في الخرطوم هو حسن صالح خضر وفي مدينة بحري لا يوجد. وعن معالم أم درمان التاريخية قال أشهرها القبة والكبري والطابية وبيت الخليفة وغيرها من المعالم. وذكر أن أم درمان بالأمس كانت عادية ومحددة لكن اليوم بها العديد من التعديلات في البنيان وتوسعة الشوارع وغيرها من التحديثات. ويضيف الطيب أن مدينة أم درمان بها ترابط اجتماعي عكس باقي المدن الأخرى. ومن الطرائف ذكر أنه كان في رحلة الى مدينة اليابان وينتعل مركوب نمر وأثناء سيره في الشوارع رأى اليابانيون ينظرون إليه باستغراب شديد وفي وجوههم بعض الاستنكار وبعد ملاحظات شديدة عرفت أنهم يستغربون لأنني انتعل جلد النمر إلى أن خلعته وأعطيته لهم وعرفت أنهم يقدسون الحيوان. في الختام أقدم الشكر لصحيفة «آخر لحظة».
Quote: سلام يحي وضيوف البوست .. رغم الحزن الخاص في دواخلي ورغما عن ابتعادي عن الكتابة لفترة طويلة شدني هذا البوست وعشت في السودان القديم الذي غاية ما أتمناه أن يعود لنا رغم التطور الذي لازم جميع المجتمعات الا سوداننا الحبيب والذي يكون الوحيد في الكون الذي ماضيه افضل من حاضره تطورا و مواكبة للعالم الان ان لم نكن سباقين للعالم في فترات الستينات والسبعينات .
ماضيه افضل من حاضره دي الحيرت الفقها يا ناذر ...
لذلك هي ما نوستالجيا حقت رفاهيه ..
هي الحزن القديم كما قال المدهش عمر الدوش عليه رحمة الله ...
Quote: بوست اوسكار يعني معقولة في زمنكم في بنات بسموهن اميرة ..اسم اميرة اسم حديث من جيل اواخر الثمانينات والتسعينات.. ههههههه...ومن البداية عرفت ان البوست قصده خفة الدم والتغيير من بوستات السياسة والهم والغم. ..وقد نجحتم في ذلك وخاصة ان قطوعات الكهرباء وصفوف البنزين والرغيف خلت حتى الاطفال عمر ٥ سنين يتكلموا في السياسة والاقتصاد والمعاناة والمستقبل المجهول ،ووجدنا طفل ، اي والله طفل قال انتو الملايين الصادرتوها دي ما تشتروا بيها بنزين عشان الصفوف الطويلة في الطرمبات دي تختفي.... وسمعنا ان امدرمان فيها سوق يوجد به الحاجات السودانية الخالصة والاثريات الممكن تنفع هدايا للامريكيات،،بتعرفوا السوق ده وين في امدرمان !!
جيتك بامتثال صاحبي المتمم كيفي ... ابراهيم ثبات عقلي و درقتي و سيفي ..
أميره يا امتثال اسم لكل الاجيال ...
دونك اميره حسين و صديقتي الحلفاويه اميره داؤود عبد اللطيف ... و هي قدامي بدفعتين في المعمار كان ما عجبك ههه
Quote: أجى يا الخلى الطابق مستور الكبر عيب ولا حرام أجى يا أخوانى الكبير ده ما كان شباب ؟ والشباب ديل ماشين يقيفوا محلهم كدى ؟
اطلاقا بالعكس وقار و هيبه
لكن ناس مجيدو البسبّغو ديل نعمل ليهم شنو 🙂
Post: #85 Title: Re: اميره حسين بالانجليزي .. كم ( لبستي ) ؟ Author: Ahmed Yassin Date: 08-18-2020, 10:58 PM Parent: #84
Quote: عشة متيانق (دي مافي زول بيعرفها
كبر دا انا عارفه اصلا ما بجي فاضي لازم يجيب ليهو حاجة تكيفك وتكيف حنانك زاتو عشة متيانق يا سيدنا كبر انا بخوتها في نفس الميزان اللحني والابداعي مع (ام بلينا السنوسي) و (زينب خليفة) و(خديجة محمد) ومنى الخير ومهلة العبادية وعشة موسى الفلاتية وفاطمة الحاج
شفتى الدكاكين البجامع ود أرو الفاتحة شمالاً على شارع أبوروف ، مقابلة بوفيه ود أرو:
فى الركن كان دكان اليمانى فاتح على شارعين أبوروف والهجرة، (وعنده تلفون)
بعده كان فى دكاكين على شارع أبوروف وإنتى متهة نحو مكى كان دكان عبد الكريم الترزى (ترزى رجالى بلدى ـ جلاليب وخلافه)
وكان دكان الحارث .. ولو ما خانتنى الذاكرة الدكان يافكته بإسمين (إسماعيل والحارث) وأظنهم أخوان. كان ببيع لمبات كهرباء ووصلات كهرباء ومسامير وحاجات زى دى والغريبة كان ببيع (المحلبية) بالقطاعى يعبى للزبون فى فتيل حسب قروشو .. طبعا زمان كانت كثير من الأشياء رخيصة الثمن، ولكن المحلبية غالية وبضربو بيها المثل فى الغلاء .. أذكر عندما توظفنا كان سواق عربية الترحيل الحكومية بيشتكى لينا بيقول ناس الرقابة مزنقين علينا وبصرفوا لينا البنزين بالقطارة تقول محلبية. هسة العدس بقى محلبية فى سعره!
وكان فى دكان تأجير زينة الأعراس والمكروفونات والكراسى .. ما عارف مدى علاقتة بدكان الحارث.
أها يا أميرة أتذكرتى دكان الحارث
Post: #87 Title: Re: اميره حسين بالانجليزي .. كم ( لبستي ) ؟ Author: Amira Hussien Date: 08-20-2020, 06:54 AM Parent: #86
دكان الحارث ما اتذكرتو لكن دكان زينة المناسبات اتذكرتو واتذكرت مكى باى نايت
Post: #88 Title: Re: اميره حسين بالانجليزي .. كم ( لبستي ) ؟ Author: محمد حيدر المشرف Date: 08-20-2020, 07:07 AM Parent: #1
Quote: مثلا بتعرف زقاق المنفلة
اهو زقاق المنفله ده (عم) قباني ذاتو ما بكون عارفو وين!!
Post: #89 Title: Re: اميره حسين بالانجليزي .. كم ( لبستي ) ؟ Author: محمد مجيدو Date: 08-20-2020, 08:40 AM Parent: #1
Quote: دفعتك فرقا معاش و نسو اسماء اولاد دفعتهم ...
يا هندسة .... قلت لي دفعتي فرقا ؟؟؟ يااخ لواءات ... لواءات ... طبعا أنا ود الخرطوم ( ولدونا في الرهبات وحبينا في البلاط ) والبنريدو نقطعو الظلط .. والما بندورو نفتش ليهو الغلط ... المهم .... بتذكر امدرمان دي كنا بنجي ليها كل خميس ونعمل قعدات جميلة في حي المسالمة مع اصدقاؤنا القبط ( لي في المسالمة غزال ) الناس دي موجودة ولا انقرضت ؟؟؟؟ اما الخرطوم محل ما الرئيس بنوم والطيارة بتقوم وتغني بها الراحل الفنان سيد خليفة ( يا الخرطوم يا العندى جمالك ..جنة رضوان ... طوول عمرى ما شفت مثالك فى اى مكان ) والناس المخضرمين مثلنا نتذكر شوارع الخرطوم النضيفة .. كانت تغسل بالموية والصابون ... وشارع الجمهورية لما كان اتجاهين وفندق صحارى والاكسليسيور ( السطح مطعم وكازينو وتحت السفارة الامريكية ) وعمارة الشيخ مصطفى الامين ومحلات المسرة ودلكة (سميرة بت الحاوي ) ومطعم آتنيي وكبكبانه والسوق الافرنجي وسلوى بوتيك وسينما كولزيوم والنيل الازرق ( سينما وكافتريا ) ... وعييييك .. القائمة تطووول ...... والمؤسف كل الدول والشعوب تتقدم للاحسن .. ونحن رجعنا سنين عددا ... والخرطوم الان بقت اوسخ عاصمة عربية .... نحن الشعب الوحيد البتمنى ماضيه يرجع زي زماان ..... .ااايه .. مادي ليه زمن ....
عااالم بطاالـــــــــــــــــــــــــــة ,,,,
Post: #90 Title: Re: اميره حسين بالانجليزي .. كم ( لبستي ) ؟ Author: Deng Date: 08-20-2020, 09:40 AM Parent: #89
يعني الطاقة عملوا ليها اسم جديد؟ والله أنا ليوم الليلة بقول طاقة، وعادي وما جايب خبر. لو سموها اسم جديد أدونا خبر عشان ما ننفضح، مع أني والله ما من جيل ناس قباقيبو دا، ولا بعرف أم درمان زي ما بيتكلموا عنها عيالها هنا. الطاقة هي الطاقة عندي إلى إشعارٍ منكم يثبت تغيير اسمها. أما الساكوبيس ووزن عشرة والدبلان وتوب الزراق وما شاكله وبعدو جات دمورية قالوا أسبانية ثم جاطت، ديل كلهن بتذكرهن. لكن الطاقة طاقة، زي ما قالت أميرة؛ دحين ما تجهجهونا ساكت. هسه طاقة التترون الياباني في السوق العربي بكم جنيه؟ المهم ... ألحقونا بالاسم الجديد للطاقة.
بوست مريح وبيعيد ذكريات مع "القمايش والقماشات والأقمشة" في السودان الشغيغ.
ياخي أنا حضرت توب كان اسمو "النار في أميركا"؛ الشيء دا كان موجود يا قباني وللا ست التوب ضحكت علي؟ غايتو هي قالت دا اسمو، وأنا مؤمن وصدّيق.
Quote: دكان اليمانى الفى الركن بقعد قدامو بتاع تسالى ،تسالى اسود والله لى هسة تانى ما ضقت زيو
يا أميرة كان ببيع تسالى أبيض وأسود .. الأسود دا كان فريد وخطير تمشى السينما .. دار الرياضة .. ستاد المريخ .. قدر ما تشترى تسالى .. ما فى ألذ وأطيب من التسالى الأسود بتاع كورنر ودأرو. كان بينصب طبلته الخشبية العالية أم أربعى كرعية .. ويقيف عصرية وحتى المغربية لامن تضلم. شغل نضيف .. والدنيا بى خير قرطاس التسالى البة تعريف وقرش دا .. كان بيطلع منو مصاريف.
ذكرتينى .. عربية الدردمة .. بايع متجول بيدفع بصندوق محمل على قاعدة بعجلين .. والصندوق يخيل بيكون عنده عازل حرار من الداخل أو يحتوى على أسطوانة معدنية تحوى الدردمة (أيسكريم) بارد مثلج .ز بيباع فى قرطاس صغير بسكويتى .. البايع عنده صفارة صوتها محفوظ للأطفال يجروا الشرع ويشترو الدردمة بى قرش .. الغريبة الحاجة الوحدية ناس البيت بيقولوا للولاد ما تشتروها بترضكم .ز لكن لا يستطيعون مقاومة إلحاح الشفع فى إعطائهم قرش الدردمة.
كمان مرات عابرة فى العربى بتاع نبق .. نبق .. بجى حايم قايد جمله وببيع نبق .. الناس الكبار بنزعجوا جدا وبينصحوا أطفالهم يحاسبوا منه وللضمان بيجى طالعين يراقبوه .. لأنهم مشهورين بإختطاف الأطفال بشيل الطفل ويدخلوا فى المخلاية المدلدلة فى جنبات الجمل من السرج .. ويفك البيرك.
وما ننسى بتاعين المعا قزاز بجو لافين بى الحمير ..بيندهو المعا قزاز بتلحينة كدا فيها بحا (فى بعض الغنانين أصواتهم بذكرنى المعا قزاز .. وبسميهم فنانين المعا قزاز .. ههههه .. بيشتروا القزاز الفارغ أشكال وانواع مخلفات السمرو الليل مساهر بينا!
لحدى ما يظهر يحيى يجاوب على محمد حيدر المشرف عن زقاق المنفلة
بس أشهر زقاق .. هو زقاق العصاصير الذى خلده الأديب الأمدرمانى البارع على المك أكيد كدا قربتها شديد أين يقع زقاق العصاصير .. فأين .. وما سبب تسميته بالعصاصير؟
كنت دايره أكتب عن سوق الشهداء مما ركزتو على امدر الحبيبة .....سوق الشهداء كان فى ميدان الشهداءالفيهو هسه مواصلات الشهداء وكان عبارة عن أكشاك مرصوصة بى نظام فى الميدان ،اى شى يخطر ببالك فى هذا السوق من أقمشة لى اوانى منزلية احذية اثاثات خفيفة اى شى وكان فى آقمشة مترا عشرة قروش !وفى توب الجارات بى جنيه .....خلف الاكشاك من الناحية الغربية فى بوتيكات جميلة وراقية جدا وكل بضايعا جاية من لندن كانوا اصحابا كل شهر او اسبوعين يمشوا لندن ويجوا محملين بأجمل الازياء والعطور الاكسسوارات، واحد اسمو بوتيك ود العركى والاخر اسمو بوتيك اولاد سنار.......كان سوق مزدهر وجميل الى ان اصبح مهدى مصطفى محافظا للخرطوم فرتقوا او نقلو لى بحرى سعد قشرة وجعل الميدان موقف للمواصلات
Post: #109 Title: Re: اميره حسين بالانجليزي .. كم ( لبستي ) ؟ Author: muntasir Date: 08-22-2020, 09:09 AM Parent: #103
فعلاً يا أميرة أذكر كشك أولاد العركي وهم من أب حراز كما نسيت ان الترب كانوا ٢ واحد لود مضوي والاخر لمكي أمين كبرو وكان هناك في الناصية دكان عم أحمد وأطلق عليه أحمد ود الترُب لموقعة وكان بالقرب من بيت عوض كوج
انتوا التيمان بتاعين العطارة ديل منو؟ ابوي عليه الرحمة حكى لينا عن قهوة في البوستة كان بقعدوا يقروا فيها رواد ام درمان زمان قال مرة جا معاهم جدن لينا من الغرب، جدنا اثناء ما بتلفت وبفتش في وجوه رواد القهوة فجاة شاف الساعي بتاع القهوة وكان متركش الطاقية الحمره جدنا كورك ليهو هاوليد بي نهره ومسكو من وين انت وقاعد تعمل شنو ومالك ما قاعد مع العيال ديل ماسك ليك جريدي ولا كتاب ومالك مدجخنن جوا مع النيران وسيل اسئلة وحوار لفت انتباه الزوار وصاحب القهوة، وبعدها شرحوا لي صاحب القهوة انو دا ضيف ومافي مشكلة بس هو عرف الولد الشغال دا من الغرب من تركشة الطاقية الحمرا، وكعادتنا السودانية بادر صاحب القهوة لي عزومتهم عشا وضبح ليهم علي شرف ظهور اهل الولد الشغال عندو.
انتوا التيمان بتاعين العطارة ديل منو؟ ابوي عليه الرحمة حكى لينا عن قهوة في البوستة كان بقعدوا يقروا فيها رواد ام درمان زمان قال مرة جا معاهم جدن لينا من الغرب، جدنا اثناء ما بتلفت وبفتش في وجوه رواد القهوة فجاة شاف الساعي بتاع القهوة وكان متركش الطاقية الحمره جدنا كورك ليهو هاوليد بي نهره ومسكو من وين انت وقاعد تعمل شنو ومالك ما قاعد مع العيال ديل ماسك ليك جريدي ولا كتاب ومالك مدجخنن جوا مع النيران وسيل اسئلة وحوار لفت انتباه الزوار وصاحب القهوة، وبعدها شرحوا لي صاحب القهوة انو دا ضيف ومافي مشكلة بس هو عرف الولد الشغال دا من الغرب من تركشة الطاقية الحمرا، وكعادتنا السودانية بادر صاحب القهوة لي عزومتهم عشا وضبح ليهم علي شرف ظهور اهل الولد الشغال عندو.
Post: #119 Title: Re: اميره حسين بالانجليزي .. كم ( لبستي ) ؟ Author: Kostawi Date: 08-23-2020, 03:26 AM Parent: #103
Quote: ديل كلهن بتذكرهن. لكن الطاقة طاقة، زي ما قالت أميرة؛ دحين ما تجهجهونا ساكت.
تتبارك ان شاء الله....... كلم عمك قبانى ده اظنو بقى ينسى
Post: #102 Title: Re: اميره حسين بالانجليزي .. كم ( لبستي ) ؟ Author: محمد أبوالعزائم أبوالريش Date: 08-20-2020, 11:11 PM Parent: #100
Quote: اها كباية الشعير بالليمون في نادي العمال في الخرطوم لا بديل لها ...
يا زول أنا متحيز لي شعير نادي الخريجين الخرطوم كأحد رواده في السبعينات. مافي أحلى من شعيره إلاّ منقته في موسمها والشاي باللبن المقنن.
أما أمدرمان، فأعلن عدم معرفتي بها.
Post: #104 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-22-2020, 03:13 AM Parent: #102
غبت و جيت لقيت خبر وفاة زينب رحمها الله ... خالص التعازي للزملاء احمد و الباشمهندس حسن عبد المجيد و اختنا سمية عبد المجيد ..
و خبر حيدر بدوي الناطق الرسمي لوزارة الخارجية ...
و بشاشا متفسح في موضوع وهمي عن مومياء طلعها كوشية ...
ثم مشتاقين ...
و الله مشتهي لي جرم ... اول امس قرطعتلي شُب قونقليز بااارد ...
اها وقفنا وين ؟
Post: #105 Title: Re: اميره حسين بالانجليزي .. كم ( لبستي ) ؟ Author: نادر الفضلى Date: 08-22-2020, 04:24 AM Parent: #104
Quote: Quote: يا أميرة كان ببيع تسالى أبيض وأسود .. الأسود دا كان فريد وخطير
نحن بنجيهو مخصوص كل يوم العصر عاملنو موضوع
يا أميرة العصريات دى لحدى المغارب كانت بتكون قدام المحلات . أو ألأصح الدكاكين لمات صغيرة لشبان الأحياء يا قعادين فى كراسى .. أو فى صناديق خشب كبيرة أو واقفين .. ما بتخلو من مشاغلات بريئة للبنات المارات فى الشارع ومرات قد تكون مزعجة .. ما كنتو بتشيلو ليها هم عشان تصلو لبتاع التسالى ولا التسالى (عاملينو موضوع) على قولك .. هههه
Post: #106 Title: Re: اميره حسين بالانجليزي .. كم ( لبستي ) ؟ Author: نادر الفضلى Date: 08-22-2020, 04:29 AM Parent: #105
Quote: كنت دايره أكتب عن سوق الشهداء مما ركزتو على امدر الحبيبة .....سوق الشهداء كان فى ميدان الشهداءالفيهو هسه مواصلات الشهداء وكان عبارة عن أكشاك مرصوصة
سوق الشهداء الفيهو هسة موقف مواصلات الشهداء، دا غير ميدان الشهداء الذى يتوسطه ضريح (مقبرة وحيدة .. وببلعبو فيه الأولاد كورة العصر .. دا وين؟
Post: #107 Title: Re: اميره حسين بالانجليزي .. كم ( لبستي ) ؟ Author: Amira Hussien Date: 08-22-2020, 06:54 AM Parent: #106
ود اورو خلف كشك الفول من الناحية الشمالية
Post: #108 Title: Re: اميره حسين بالانجليزي .. كم ( لبستي ) ؟ Author: muntasir Date: 08-22-2020, 08:45 AM Parent: #107
القبر هو قبر ود مضوي والميدان كان يطلق عليه ميدان التُرب وكان النساء يضعن فيه النذور من فريني لشلن لريال وكنا نلعب به الكرة ولن تجد طفلاً ياخد منه تعريفة اليوم لو جيت بالليل وزحيت من الميدان ده بي شارع ممكن العصابات يقلعوا منك ما تحمل
Post: #110 Title: Re: اميره حسين بالانجليزي .. كم ( لبستي ) ؟ Author: نادر الفضلى Date: 08-22-2020, 09:33 AM Parent: #108
Quote: ود اورو خلف كشك الفول من الناحية الشمالية
بس ياهو .. وبيحمل الإسمين ميدان الشهداء أو الترب زى ما قال منتصر
أها يا أميرة أقرب قبانية حمر منو وين؟
Post: #111 Title: Re: اميره حسين بالانجليزي .. كم ( لبستي ) ؟ Author: Amira Hussien Date: 08-22-2020, 10:05 AM Parent: #110
الزرق قراب شفتا باب الخشب الفاتح شرق ! اما الحمر اقربهم اظن الشهداء او الملازمين
Quote: كنت مقدر أن موقعك الجعرافى يقع نواحى تقاطع ود ارو قريب من بوفية ود أرو على أسا إنك قلتى القبانية الحمر جيرانك .. لكن مداخلاتك الأخيرة دى لخبتتنى
ما تكوني قريبة حبوبتنا بت حسين ... :)
و الله يا نادر اميرة دي لازم تطلع قريبتنا ... او نسابة على الاقل ... المنطقة دي مربوطة بي بعض كتير ...
Post: #120 Title: Re: اميره حسين بالانجليزي .. كم ( لبستي ) ؟ Author: Kostawi Date: 08-23-2020, 04:03 AM Parent: #115
إنتو هنا خشيتو حوشنا بدون إستئذان. دكان الحارث و أخوه إمام جامع الإسماعيلة في حي السيد المكي. دكان اليماني في الكونربتاع الشارع الشاقيه الترام و شارع الهجرة و الصينة الفيا عامود واحد و أربع أنوار لتنظيم حركة السيارات. أما عن شلقامي و الترزية و الحلاليق دا موضوع كبير. أما لو دايرن توثقوا عن تلك الفترة فلي ما عندي. صديقي المرحوم محمد إسماعيل الأزهري رحمه الله لي معه زكريات منذ الطفولة و كذلك تلك الغزالة . أنا ملان زكريات لمن مطفحة تحياتي
Post: #121 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-23-2020, 04:24 AM Parent: #120
الله يرحم محمد ازهري يا نصر الدين ...
كان كده انت دفعة حيدر البرشوتي ... او من رواد امسياتو ... :)
مفروض انت و زهير بعشر تجيبوا ذكريات ما ليها حدّود يا كوستا ...
و العجب كان جانا مولانا تضى ...
Post: #122 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-23-2020, 04:35 AM Parent: #121
Quote: تتبارك ان شاء الله....... كلم عمك قبانى ده اظنو بقى ينسى
ههههه
دي حقيقه ...
لكن توقعت مع ضيق المعيشة و الحياه الصعبة الضغطوا بيها الكيزان على الناس انو الشرايه بالطاقه انتهت ...
و معليش اخوك طول من البقعه ... لكن هو و الله طاقتك فتحت علينا طاقات من نوع آخر هابي منها نسيم جميل ... يشبه نسيم السحر ..
Post: #123 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-23-2020, 04:38 AM Parent: #122
Quote: اهو زقاق المنفله ده (عم) قباني ذاتو ما بكون عارفو وين!!
يا مشرف ... ناس السجاره البعرفو زقاق المنفله و سوق الحداحيد .. انت كمان ما تبالغ ..
Post: #124 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-23-2020, 04:41 AM Parent: #123
Quote: كل المحبة يا يحى وترهاقا..! ادونا اليقين يا شباب: الموضوع محبة ولا فيهو اجندة خاصة؟ عشان لو القصة فيها اجندة خاصة ، خلونا نسحب عدتنا ونعرد في دروب ام طرقا عراض..! والمعراد يا ترهاقا ، في مقامات الجمال ، افضل انواع البهاء..والإ ح نقوم نرجع نخليك تطلع معانا راعي ، خصوصا لو كان رعي بقر..عشان نطير ليك الفي راسك..!! سلامات يا اميرة حسين بالإنجليزي..نحن يا قريبتي ناس خوافين شديد..يعني مش بعيد بعد شوية نسحب كلامنا زي السلامو عليكو..!
الموضوع محبه و بس يا صديقي ...
تعال و اتمهل .. البيت بيتك يا كبر ...
Post: #125 Title: Re: اميره حسين بالانجليزي .. كم ( لبستي ) ؟ Author: Kostawi Date: 08-23-2020, 04:50 AM Parent: #122
الأخ يحي قباني لك التحيةهل لك علاقة مع المذيعين المخضرمين أحمد و عبد الكريم قباني و الصغيرين "بدون أسامي" ...رحم الله من أعطى للوطن.
Post: #126 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-23-2020, 05:02 AM Parent: #125
Quote: الأخ يحي قباني لك التحية هل لك علاقة مع المذيعين المخضرمين أحمد و عبد الكريم قباني و الصغيرين "بدون أسامي" ...رحم الله من أعطى للوطن.
رحم الله احمد قباني ...
اعمامي الاتنين يا نصر الدين ... انا يحيى ابراهيم سعيد* احمد عثمان القباني ( جدي سعيد هو محمد سعيد احمد عثمان القباني) و هم عبدالكريم و احمد محمد احمد عثمان القباني و اخوانهم عبد الوهاب رحمه الله و عظّوم و استاذ فرح ...
Post: #127 Title: Re: اميره حسين بالانجليزي .. كم ( لبستي ) ؟ Author: Elsanosi Badr Date: 08-23-2020, 05:09 AM Parent: #125
يا منتصر ميدان التُرب او الشهداء البرنسات البتقيف شرق من التُرب كان بتمشي الساتة السلالم وجمبها الثورة بالنص وجنوب التُرب جمب مظلة الورنيش بتقيف برينسات بحري؛
الزول البيبع تسالي اسود جمب ناس خال العيال واظنو كان حق قرع اسمو عبدالله ساكن في حي الفونج في ودنوباوي شمال جمب مدرسة حاجة مدينة وبرضو كان بيعمل تسالي بيبيعو لناس رابطة ودنوباوي التسالي داك ما في زي طعمو نهائي.
في زول شرب الحليب الساقط وطعمو عجيب شرق محطة التكسي التعاوني في السوق الكبير
قبة وضيوفو شكرا للتداعيات
Post: #128 Title: Re: اميره حسين بالانجليزي .. كم ( لبستي ) ؟ Author: Kostawi Date: 08-23-2020, 06:13 AM Parent: #127
يا إلاهي عبد الوهاب توفى؟ ياخ الدنيا دي ما فيها خير، فرقتنا و شتتنا...له الرحمة. عبدو كان حريف جدا في الكورة في رابطة الحي. و صديقي عبد العظيم (عظوم)...لنا ذكريات و ذكريات. طبعا أجمل حاجة، مافي جهة ح تنزع مننا الذكريات الجميلة.
و لنا لقاء و كلام أخي يحي. تحياتي
Post: #132 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-25-2020, 02:42 AM Parent: #90
Quote: قباني.
شايف البوست ده جاب كل الكوامر.
كوامر يرحمنو القلب يا دينق ...
احساس جميل لما تلقى لسه في ناس اكبر منك 😌
Post: #129 Title: Re: اميره حسين بالانجليزي .. كم ( لبستي ) ؟ Author: أبوذر بابكر Date: 08-23-2020, 11:24 AM Parent: #1
السلااااامو عليكم أجمعين
انت ملاحظ يا يحيى مافي زول قاعد يجيبني راجع غير نضميك ده
المهم غايتو بي تحت تحت كده ما عافي ليك
ذكرتني ناس عمك شبير قلة
تصدق يا قباني انا في الإجازات كنت بمش اقعد معاهم بره فى البرندة واشتغل ليهم عراوي ولما ما يكون عندهم شغل كتير بمش اقيف فى حلقة المداحين المقابلاهم في الزاوية الجنوبية الشرقية لسور ميدان الأمم المتحدة في ناصية مربع محل شبير قلة كانت توتو كورة وبعدها محلات عبده تادرس للكلف ولوازم الخياطة
مره طلعت منهم ماش غربا على البنك الصناعي وقبله طبعا البوستة القديمة لقيت لى 15 جنيه تلاتة ورقات امات خمسة اللونها بني ديك يمين بالله لو ما ساي قربت اعرس ههههه المشكلة بس كنت سغير لسه في الابتدائي
لكن مشيت طوالي من دربي على حلواني حمدتو واشتريت 3 ايسكريم من عمك سعيد اللئيم
وقربت اتهور أمش جروبي
نحن طبعا ناس خرتوم ومتربيين في السوق العربي
وبمناسبة عصير نادي العمال وشاي قهوة العيلفون قصاده طوالي
الما شرب ليمون من الجماعة الكانو في برندة قهوة الواثق تاني غايتو ما أظن يضوق ليمون زيه إلا في الجنة الكباية بي قرشين
قهوة الواثق طبعا اصلا بتاعة عمنا الواثق أبو الجيلاني الواثق وعثمان الواثق ناس نمرة تلاتة واقطاب نادي النيل الرياضي من أيام كان في شارع السيد عبد الرحمن
لكن أمدرمان برضها حقتنا وجاييك بى كلام كتير
من فول عمك أحمد سعد في ود نوباوي شمالا لغاية صير سوق الموردة جنوبا ومن نادي الزهرة في اب روف وناس عمنا الطيب عبد الكافي وولده صاحبنا قرشي وناس الخرصاني في سوق الشجرة شرقا لغاية حبيبنا امين القبطي الجميل في حي البوستة غربا
طبعا امين ملك الجودة النوعية في المنتجات العجيبة
ما تقول لى المنتجات دى شنو لو في بعرف وسمع ب امين معناتو بعرف المنتجات السمحة دى شنو
الطيب سيد مكي لسه شغال طبعا وهو ملك وسلطان الباسطة وتوابعها بدون منازع المحل الكبير في شارع مكي طبعا جنب استوديو الوادى وعمل فروع كتيرة تاني
Quote: يا إلاهي عبد الوهاب توفى؟ ياخ الدنيا دي ما فيها خير، فرقتنا و شتتنا...له الرحمة. عبدو كان حريف جدا في الكورة في رابطة الحي. و صديقي عبد العظيم (عظوم)...لنا ذكريات و ذكريات. طبعا أجمل حاجة، مافي جهة ح تنزع مننا الذكريات الجميلة.
و لنا لقاء و كلام أخي يحي. تحياتي
رحم الله عبد الوهاب .. توفى نواحينا في مدينة اتاوا في كندا من سنوات ما شويه ... الدنيا فراقه يا هجام ...
استوديو الوادى لصاحبه عبدالله وشقيقو الهادى كنا نوثق عندو اللحظات الحلوة تصوير جميل ورومانسى وهم أخوان على خلق وذوق كنا نمشى نتسرح عند كوافير ارمنى اسمو آڤو ورى جامع امدرمان الكبير ومنو على استوديو الوادى نوثق التسريحة ......عبدالله لما تعجبو اللقطة طوالى بيكبر الصورة ويهديها لى ست الصورة اى سيدا
Post: #133 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-25-2020, 02:51 AM Parent: #131
Quote: ابوي عليه الرحمة حكى لينا عن قهوة في البوستة كان بقعدوا يقروا فيها رواد ام درمان زمان قال مرة جا معاهم جدن لينا من الغرب،
سلام تبلدي
القهاوي في السوق ٣ ... جورج مشرقي ... و يوسف الفكي ( و يوسف الفكي ) كان مع مشرقي بالاول و ديل اتوزعو بيناتهم السياسين بى جهه و الفنانين بى جهة و القهوة التالتة كانت قهوة شديد .. قهوة الموظفين و العمال
Post: #134 Title: Re: اميره حسين بالانجليزي .. كم ( لبستي ) ؟ Author: muntasir Date: 08-25-2020, 03:06 AM Parent: #133
اتخيل لي أول مقهى هو قهوة ود الأغا
Post: #135 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-25-2020, 03:06 AM Parent: #133
Quote: يا منتصر ميدان التُرب او الشهداء البرنسات البتقيف شرق من التُرب كان بتمشي الساتة السلالم وجمبها الثورة بالنص وجنوب التُرب جمب مظلة الورنيش بتقيف برينسات بحري؛
الزول البيبع تسالي اسود جمب ناس خال العيال واظنو كان حق قرع اسمو عبدالله ساكن في حي الفونج في ودنوباوي شمال جمب مدرسة حاجة مدينة وبرضو كان بيعمل تسالي بيبيعو لناس رابطة ودنوباوي التسالي داك ما في زي طعمو نهائي.
في زول شرب الحليب الساقط وطعمو عجيب شرق محطة التكسي التعاوني في السوق الكبير
قبة وضيوفو شكرا للتداعيات
سنوسي ياًجميل
بالضبط الجُرُم العجيب جنب ناس محجوب خال العيال
يمين فيو (تحميصة) وااااحده ما بتتغير مقياس رختر ما يجيب دقتها
انت ملاحظ يا يحيى مافي زول قاعد يجيبني راجع غير نضميك ده
المهم غايتو بي تحت تحت كده ما عافي ليك
ذكرتني ناس عمك شبير قلة
تصدق يا قباني انا في الإجازات كنت بمش اقعد معاهم بره فى البرندة واشتغل ليهم عراوي ولما ما يكون عندهم شغل كتير بمش اقيف فى حلقة المداحين المقابلاهم في الزاوية الجنوبية الشرقية لسور ميدان الأمم المتحدة في ناصية مربع محل شبير قلة كانت توتو كورة وبعدها محلات عبده تادرس للكلف ولوازم الخياطة
مره طلعت منهم ماش غربا على البنك الصناعي وقبله طبعا البوستة القديمة لقيت لى 15 جنيه تلاتة ورقات امات خمسة اللونها بني ديك يمين بالله لو ما ساي قربت اعرس ههههه المشكلة بس كنت سغير لسه في الابتدائي
لكن مشيت طوالي من دربي على حلواني حمدتو واشتريت 3 ايسكريم من عمك سعيد اللئيم
وقربت اتهور أمش جروبي
نحن طبعا ناس خرتوم ومتربيين في السوق العربي
وبمناسبة عصير نادي العمال وشاي قهوة العيلفون قصاده طوالي
الما شرب ليمون من الجماعة الكانو في برندة قهوة الواثق تاني غايتو ما أظن يضوق ليمون زيه إلا في الجنة الكباية بي قرشين
قهوة الواثق طبعا اصلا بتاعة عمنا الواثق أبو الجيلاني الواثق وعثمان الواثق ناس نمرة تلاتة واقطاب نادي النيل الرياضي من أيام كان في شارع السيد عبد الرحمن
لكن أمدرمان برضها حقتنا وجاييك بى كلام كتير
من فول عمك أحمد سعد في ود نوباوي شمالا لغاية صير سوق الموردة جنوبا ومن نادي الزهرة في اب روف وناس عمنا الطيب عبد الكافي وولده صاحبنا قرشي وناس الخرصاني في سوق الشجرة شرقا لغاية حبيبنا امين القبطي الجميل في حي البوستة غربا
طبعا امين ملك الجودة النوعية في المنتجات العجيبة
ما تقول لى المنتجات دى شنو لو في بعرف وسمع ب امين معناتو بعرف المنتجات السمحة دى شنو
الطيب سيد مكي لسه شغال طبعا وهو ملك وسلطان الباسطة وتوابعها بدون منازع المحل الكبير في شارع مكي طبعا جنب استوديو الوادى وعمل فروع كتيرة تاني
لسه برضو ما عافي ليك
وتحية للجميع بدون فرز
مرحب بصديقي الشاعر البديع ابا ذر...
ياخ عليك ربك ... ببركات شيخ الصديق ود آرو تعفي لي 🙂
و الله يا اباذر نفتش ليك فتيش ياخي ما تغيب .. ام بنايا قش دي ما تسوى ...
اما عمنا شبيرقله فدي عشرة سنين .. و حياتك ولا واحد من الترزيه الفي البرندة ديك بهبش قماشي الا مقص عمك شبيرقله ... يمين عندي خمسه متر تترون عنده لي هسي .. كان متوعك و انا سافرت و ما رجعت تاني و عفيتو ليو ههههه يا ربي عايش ؟ كنت اغشاهم انزل طاقة التترون و اطق حنك ... و اغشى سلوى اكل فول بالسمن البلدي ... و اغرق شويه امش لي دكان عمك هميمي اجيب صفيحة الجبنه و صفيحة الطحنيه النص .. و صفيحة سمن و زيت الفهد .. و حتما امر بعداك اشيل رغيف من سيحة و اغشى نادي العمال لي شُب الشعير اياه ثم العوده ... ايام كانت رخيه و كل شي متوفر ... اخدنا فتره نمر لمحل فطاير على الطاير جنب منصفون شمال الجامع الكبير .. مصريين كانوا ابداع ...
دكان صغير بتاع مستلزمات الخياطة كلها زراير وخيط العجلة الطائرة وقيطان والابزيم والسست و ابر المكنة الخ وعنده كمان كل أنواع الحلاوة محله طوالي غرب مخازن ألبان جديد للقماش في نفس صف مطعم سلوى
عمنا أبو بكر عبد الحميد هميمي للمتقلات
وتلف منه تلقى حلواني الإخلاص فى الناصية كلها
أصحابه الحلفاويين نفس أصحاب مطعم الإخلاص القريب من شركة أبو العلاء وغرب بنك باركليز
وفيه أجمل بسبوسة بالسمن البلدى
فطاير على الطاير يا حليلها والله
المعلم المصري السمين
كنا نمشي نتفرج في طريقة فرد العجين
في الأول انا بتخيله شايل ليه متر دمورية وبلولح فيه في الهوا
هههههه
والله زمن با قباني
Post: #141 Title: Re: اميره حسين بالانجليزي .. كم ( لبستي ) ؟ Author: علي عبدالوهاب عثمان Date: 08-26-2020, 08:11 AM Parent: #140
الاحباب الكرام .. والتحية للقباني والاستاذة أميرة ما شاء الله كنتم عايشين في ترف وبالله نحن في ضواحي الدنيا قراصة وكسرة وملاحات قمة الترف عندنا كان يوم تشتري بسكويت عادي أما عصائر شعير وغيره .. إلا بعد ما جينا العاصمة طول اليوم شغل بعد المدرسة ما بين الساقية وعشاء البهائم
تحياتي ناس المدن كانوا مرفهين ..
بوست في غاية الجمال وخاصة امدرمان لها طعم خاص جداً بالله يا أحباب واصلوا البوست حتى الصفحة مليون ووجود الاستاذة أميرة مهم جداً
مودتي للجميع .. أجمل بوست يا قباني الحبيب
Post: #142 Title: Re: اميره حسين بالانجليزي .. كم ( لبستي ) ؟ Author: Amira Hussien Date: 08-26-2020, 10:52 AM Parent: #141
على عبدالوهاب عثمان سلام كنا مرفهين الهينة دى ....... يا قبانى البوست ده توثيق خفيف دايرين نركز ونسلط الضو على الجوانب المختلفة لامدرمان
كان ابراهيم مهدى وأحمد بكار من تجار سوق امدرمان المشهورين باستيراد تياب التوتال الانجليزى من مانشستر مباشرة ابراهيم مهدى دكانو فى شارع كررى شرق العدنى ودكان بكار جنوب منو .......بكار رحل الى شارع الجمهورية الخرطوم
حتى العمم كانت توتال انجليزى ......السويسرى ده ما كان مرغوب جابو مطرز ناس البان جديد كانت خامتو اتقل واتخن من الانجليزى زى توب سليم الذوق وتوب الامير
Post: #147 Title: Re: اميره حسين بالانجليزي .. كم ( لبستي ) ؟ Author: Kostawi Date: 08-27-2020, 00:53 AM Parent: #146
الاستاذة أميرة قلبت ليكم التربيزة و جابت سيرة التياب أم قجيجة و دردقني في النجيلة و تحرمني منك و توب النجدة و ووو.توب أوباما
البوست دا فيه أجيال مختلفة و متفاوتة....حسنا... مافي مشكل
و نواصل إن شاء الله.
Post: #148 Title: Re: اميره حسين بالانجليزي .. كم ( لبستي ) ؟ Author: muntasir Date: 08-27-2020, 01:06 AM Parent: #147
أبوقجيجة يا خردة ما أمو
Post: #149 Title: Re: اميره حسين بالانجليزي .. كم ( لبستي ) ؟ Author: Kostawi Date: 08-27-2020, 01:20 AM Parent: #148
يا منتصر أنا عارف أبو ...لكن دا إمتحان يا صديقي خليك صاحي
Post: #150 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-27-2020, 02:42 AM Parent: #149
Quote: لاستاذة أميرة قلبت ليكم التربيزة و جابت سيرة التياب أم قجيجة و دردقني في النجيلة و تحرمني منك و توب النجدة و ووو.توب أوباما
و عيون زروق و توب النجده و توب الكادر ( او الطلاق الحاضر ) هههه
ياخ عبد الصمد الباكستاني في جنوب لندن غنا و عمل مصانع بي ورا التياب السودانية من الستينات ...
Post: #151 Title: Re: اميره حسين بالانجليزي .. كم ( لبستي ) ؟ Author: Amira Hussien Date: 08-27-2020, 04:36 AM Parent: #1
وقبلهم لبست اماتنا وحبوباتنا تياب تحمل أسماء وثقت لمناسبات هامة ......مثلا إلتقاء السيدين وأسبوع المرأة والاستقلال ،المظاهر ،اوراق الخريف ، الدلع ،خريطة السودان ........اى جهة اشتغلت فى التوب السودانى نجحت واذدهرت تجاريا ......بعد عبد الصمد جو أصحاب مخازن السودان ناس فنشلى ، توسعوا وفتحو كم محل فى لندن ، والان كتير من الباكستان والهنود وجنسيات مختلفة أخرى .....اهتموا بالتوب السودانى فى انجلترا ودول الخليج والسعودية وهنالك مصانع ايطالية قصدتهم بعض سيدات الاعمال السودانيات وصارت تنتج لهم تياب سودانية
Post: #152 Title: Re: اميره حسين بالانجليزي .. كم ( لبستي ) ؟ Author: يحي قباني Date: 08-28-2020, 04:44 AM Parent: #151
Quote: يا قبانى البوست ده توثيق خفيف دايرين نركز ونسلط الضو على الجوانب المختلفة لامدرمان
يلاك طوالي ايد في ايد يا اميره ...
و لسه في ناس ما جونا و انا عارفهم بكونوا قاريين كلامنا دي ...
انتي عارفه لقيت منو هنا اجتمعنا في غدا سوا ؟
نادر مشرقي .. ولد جورج مشرقي و دفعتنا كمان ... اها نادر ده من هو شافع اتربة في دكان ابوهو ... و لقيت ليك الراس شايل كميات من الشعر و الونسات و الذكريات ...
حاسجل ليو زياره ادون البلاوي الفي راسو دي ...
Post: #153 Title: Re: اميره حسين بالانجليزي .. كم ( لبستي ) ؟ Author: نادر الفضلى Date: 08-28-2020, 06:00 AM Parent: #152
يا يحيى ياريت مع نادر مشرقى .. تسجل الونسة صوت .. دا لو ما صوت وصورة (فيديو) حتلقى نفسك محتاج لجلسات (قعدات) .. الونسة بتطلع الذكريات