ضد اختيار والي امرأة او رجل

ضد اختيار والي امرأة او رجل


07-22-2020, 09:29 PM


  » http://sudaneseonline.com/cgi-bin/sdb/2bb.cgi?seq=msg&board=510&msg=1595449754&rn=0


Post: #1
Title: ضد اختيار والي امرأة او رجل
Author: عبدالحفيظ ابوسن
Date: 07-22-2020, 09:29 PM

09:29 PM July, 22 2020

سودانيز اون لاين
عبدالحفيظ ابوسن-no where
مكتبتى
رابط مختصر



انا ما مع اختيار والي ولا مسؤول امرأة ولا رجل
ولكن
مع اختيار والي او مسؤول كفء ووطني ونزيه غض النظر عن كونه امراة او رجل
الاختيار النوعي كشرط تمييز جندري

Post: #2
Title: Re: ضد اختيار والي امرأة او رجل
Author: Dr. Ahmed Amin
Date: 07-22-2020, 09:57 PM
Parent: #1

كلامكـ سليم يا عبدالحغيظ ..

المنصب لمن يستطيغعأن يخدم الناس بحب وتواضع ..
مش مخصصات وهيلمانه ...

انتهى زمن المسئول الذي يقيم الولائم وينصب الصيوانات عشان اختاروه وزير او والي ..

يجب ان ينظر اي مسئول الى انه مكلف .. ويتشرف بان يكون خادم لهذا الشعب العظيم ..

Post: #3
Title: Re: ضد اختيار والي امرأة او رجل
Author: اخلاص عبدالرحمن المشرف
Date: 07-22-2020, 10:01 PM
Parent: #2

وايش مشكلة لو كانت امراة !!!!
رئيسة جامعة داير موهلات اكثر من كده !!!!


كويز😹

Post: #4
Title: Re: ضد اختيار والي امرأة او رجل
Author: عبدالحفيظ ابوسن
Date: 07-22-2020, 10:05 PM
Parent: #3

مرحب احمد الامين
مرحب اخلاص
مافهمت يا اخلاص ردك دة وشنو خلافك مع كلامي

Post: #5
Title: Re: ضد اختيار والي امرأة او رجل
Author: اخلاص عبدالرحمن المشرف
Date: 07-22-2020, 10:09 PM
Parent: #4

يا بسن من استقلال السودان منصب اداري زي ده
ما في امرأة وحصلت عليه ، يا تقول مبروك يا كمان
تورينا ما في فرق كيف.
اكيد في فرق

Post: #6
Title: Re: ضد اختيار والي امرأة او رجل
Author: عبدالحفيظ ابوسن
Date: 07-22-2020, 10:15 PM
Parent: #5

الفرق لمن ماتكون عبارة عن نسبة ترضية
ماتكون منة بل حق اصيل
وممكن يكونو كلهم نساء اذا استوفو معيار الكفاءة والنزاهة والوطنية دون تمييز للجنس
لامن ننظر لكل المتقدمين لشغل اي وظيفة غض النظر عن الجنس
والمعيار يكون متساوي
لامن مايكون محاصصات
لامن نحن نقبل بالمسؤول عشان كفاءته واستيفاؤه للشروط ولا ننظر لجنسه

Post: #7
Title: Re: ضد اختيار والي امرأة او رجل
Author: اخلاص عبدالرحمن المشرف
Date: 07-22-2020, 10:19 PM
Parent: #6

برضو قول مبروك ما كل العقول كده
شوف الامير توفيق عداها حقارة بهم


Post: #8
Title: Re: ضد اختيار والي امرأة او رجل
Author: عبدالحفيظ ابوسن
Date: 07-22-2020, 10:26 PM
Parent: #7

يا اخلاص انا ماعندي اي اعتراض في تولي المرأة اي منصب . وعمليا المرأة طرقت كل المجالات واثبتت تفوقا
مش المجالات التقليدية والكانت سائدة بل كل المجالات حرفيا
ما تتطلب مجهود عقلي او بدني .
لذا لا ار سببا واحدا يجعل منها نسبة محاصصة كأن نقول لابد من وجود امرأة في نسبة العاملين
عندما تتحول لنسبة محاصصة تصير عبارة عن ترضية
ان تأخذ حقها كاملا في منافسة شريفة ومتساوية الفرص
وان نعترض علي عدم اختيارها لأنها امرأة
ولا نقول هذه وظيفة للرجال فقط

Post: #9
Title: Re: ضد اختيار والي امرأة او رجل
Author: اخلاص عبدالرحمن المشرف
Date: 07-23-2020, 00:12 AM
Parent: #8

حقنا واخذنا ومستحقينو

Post: #10
Title: Re: ضد اختيار والي امرأة او رجل
Author: Abureesh
Date: 07-23-2020, 00:37 AM
Parent: #9

سلام يا شيخ العرب..
تفتكر من استقلال السودان و حتى الان، لم تكن إمرأة واحدة مؤهلة لتكون حاكم ولاية أو معتمد؟ بإفتراض الإجابة طيب معنى كدا عكس
كلامك، طول هذه المدة كانت تمارس عليهن تفرقة على اساس الجنس. واللا مو كدى؟
الان المرأة أثبتت جدارتها أكتر.. وكانت أغلبية المعتصمين، بل كانت تقود المظاهرات و تجمع البمبان و تعيده للبوليس.. يعنى الحكومة دى أساسا كان المفروض تشكلها
النساء و يوظفن كم رجل معاهم.. بس عشان حقوق الإنسان وكدا..
الحين سؤال، لو عندك إعتراض على كفاءة أى واحدة من البنتين ديل سأكون فى صفك.. صدقنى..

Post: #11
Title: Re: ضد اختيار والي امرأة او رجل
Author: عبدالحفيظ ابوسن
Date: 07-23-2020, 07:34 AM
Parent: #10

مرحب ابوالريش
هل اشتممت اعتراض علي ترشيحهم مني !!!؟؟
فهمي مختلف تماما عن مارددت عليه

Post: #13
Title: Re: ضد اختيار والي امرأة او رجل
Author: نعمات عماد
Date: 07-23-2020, 08:03 AM
Parent: #11

Quote: وممكن يكونو كلهم نساء اذا استوفو معيار الكفاءة والنزاهة والوطنية دون تمييز للجنس

سلام ابسن
لو كان من قاموا بإختيار مرشحين في كل ولاية مقتنعين بالمعيار المذكور فوق
لجاءت النتيجة لصالح النساء لأن عدد النساء المؤهلات لا يقل عن عدد الرجال.
التعداد السكاني القادم سيوضح نسبة أعداد و فئات عمرية و تعليم و توظيف
كل من النساء و الرجال.
في مؤسسات القطاع العام و الخاص، ليه أغلب الموظفين نساء و المدير غالباً
رجل؟ هل دا ما ورثناه من الكيزان؟

Post: #12
Title: Re: ضد اختيار والي امرأة او رجل
Author: Hassan Farah
Date: 07-23-2020, 07:47 AM
Parent: #1

ضد اختيار والي امرأة او رجل
-----------------------------------------
عنوان البوست غير مناسب يا ابسن

Post: #14
Title: Re: ضد اختيار والي امرأة او رجل
Author: MOHAMMED ELSHEIKH
Date: 07-23-2020, 08:10 AM
Parent: #12

Quote: ضد اختيار والي امرأة او رجل
-----------------------------------------
عنوان البوست غير مناسب يا ابسن


"ضد اختيار والي امرأة او رجل بمحاصصة حزبية او جندرية"

افتكر دا المقصود





Post: #15
Title: Re: ضد اختيار والي امرأة او رجل
Author: عبدالحفيظ ابوسن
Date: 07-23-2020, 08:10 AM
Parent: #12

شكرا نعمات
شكرا جدا
مقصود يا حسن داير اعرف البقرا كويس ولا يكتفي بالعنوان
القراءة المتعجلة والحكم المتعسف التجريمي

Post: #16
Title: Re: ضد اختيار والي امرأة او رجل
Author: عبدالحفيظ ابوسن
Date: 07-23-2020, 08:17 AM
Parent: #15

شكرا جزيلا محمد الشيخ
شكرا جدا
وانا اكتب في ظني اكتب لاذكياء يجيدون القراءة

Post: #17
Title: Re: ضد اختيار والي امرأة او رجل
Author: اخلاص عبدالرحمن المشرف
Date: 07-23-2020, 08:25 AM
Parent: #16

يا بسن ما بس العنوان
نحن في بلدٍ انجلدت في النساء
مفروض تقول تمييز ايجابي في بعض الولايات
مثل الخرطوم.

Post: #18
Title: Re: ضد اختيار والي امرأة او رجل
Author: Khalid Abbas
Date: 07-23-2020, 09:35 AM
Parent: #1

مبروك لكل نساء هذا الوطن العظيم قائدات الثورة حق وحقيقة من يشكك في ذلك عليه الرجوع لكل الفيديوهات في أول ايام الثورة وضد اشرس نظام دموي في تاريخ السودان
لقد جاءت نسبتهم دون المستوى ولكنها البداية بإذن الله .

Post: #19
Title: Re: ضد اختيار والي امرأة او رجل
Author: طلحة عبدالله
Date: 07-23-2020, 09:42 AM
Parent: #18

Quote:
وانا اكتب في ظني اكتب لاذكياء يجيدون القراءة

Post: #21
Title: Re: ضد اختيار والي امرأة او رجل
Author: أحمد محمد عمر
Date: 07-23-2020, 09:47 AM
Parent: #19

الكفاءة لا جندر لها

Post: #20
Title: Re: ضد اختيار والي امرأة او رجل
Author: عمر سعيد علي
Date: 07-23-2020, 09:45 AM
Parent: #18

المعنى : ابو سن ضد المحاصصات الجندرية . .
رجل امراه المهم يرضي الشارع ويحقق المطلوب . .

Post: #22
Title: Re: ضد اختيار والي امرأة او رجل
Author: طلحة عبدالله
Date: 07-23-2020, 09:48 AM
Parent: #20

سلام يا عمر
لو أنا قريت العنوان دا ومشيت ما فتحت البوست
طوالي بفهم انو أبوسن ضد اختيار الوالي من الأساس
ما عندها معنى غير كدا .

Post: #23
Title: Re: ضد اختيار والي امرأة او رجل
Author: عبدالحفيظ ابوسن
Date: 07-23-2020, 10:08 AM
Parent: #22

تحياتي للجميع
كتب صنع الله ابراهيم اجمل رواياتة
تلك الرائحة
العنوان كان مربك ولا يتضح معني العنوان الا بعد اكمال الرواية
العنوان ليس بالضرورة ان يكون جملة كاملة .
ضد اختيار والي امراة او رجل من خلال محاصصات جندرية
عنوان مرهق وقد يعولقه المنبر فلا يأتي مكتملا
جربت كتابة عناوين طويلة فكانت كارثة سابقا
المنطق يقول العنوان لا يعني انني ضد الاختيار مطلقا ولو كان ذلك لكتبت ضد منصب الولاة بالسودان
ولا اظن يوجد جنس آخر ليكون بديلا لامرأة او رجل

Post: #24
Title: Re: ضد اختيار والي امرأة او رجل
Author: عمر سعيد علي
Date: 07-23-2020, 10:09 AM
Parent: #22

طلحه يا صفوه ياخي انت من البفهموها طايرة . .

Post: #25
Title: Re: ضد اختيار والي امرأة او رجل
Author: امتثال عبدالله
Date: 07-23-2020, 10:18 AM
Parent: #22

ود ابو سن
فهمنا قصدك بعد ما شرحت التفاصيل في داخل البوست ،،ولكن من العنوان افتكرنا انك معترض
على تولي امراة منصب والي...
اما الجدارة والمؤهلات فهي مطلوبة طبعا ،،،وهنا نقول ان هناك دول ، وكمان دول كبرى ومزدهرة
رؤساؤها من النساء ،،ويمكن ارجع ليك بالقائمة ،،،
ولكن اعتراضي ، وكما شرحت في بوست استاذنا علي عبد الوهاب، على كلمة والي ،،فيجب
تغيير كلمة الوالي وكلمة الولاية لانها من مخلفات عهد اللصوص والحرامية واستبدال كلمة الوالي بكلمة
الحاكم او اي كلمة مناسبة ...

Post: #27
Title: Re: ضد اختيار والي امرأة او رجل
Author: عثمان الأمام
Date: 07-23-2020, 10:32 AM
Parent: #25

سلامات أبوسن وضيوفه

في رأيي منصب الوالي ده هو المنصب الوحيد المفروض يكون فيهو محاصصات (جندرية, حزبية, قبلية ..الخ) في حال عدم وجود إنتخابات و تصويت . لأنو منصب ما محتاج أي مؤهل ولا كفاءات !
و مفروض شروطو تكون ان يكون المرشح سوداني , لم يسبق إدانته في جريمة متعلقة بالشرف والأمانة و بيعرف يكتب ويقرأ بس .

عكس كده شايف الوزارات والإدارات والهيئات الأكاديمية وغيرا دي الحتات المفروض ما يكون فيها أي طريقة لمحاصصات الجندر والأحزاب هنا المؤهلات والخبرات هي الفيصل حتى لو كانو كلهم نساء أو رجال.

فبما إنو النساء ديل ظلموا ظلم الحسن والحسين في بلدنا دي مفروض كان يكون أكتر من نص الولاة نساء وكذلك المجلس السيادي والهيئات التشريفية ويكون في تمييز إيجابي ليهم حتى في الكفاءات.

Post: #26
Title: Re: ضد اختيار والي امرأة او رجل
Author: Hassan Farah
Date: 07-23-2020, 10:21 AM
Parent: #1

لو أنا قريت العنوان دا ومشيت ما فتحت البوست
طوالي بفهم انو أبوسن ضد اختيار الوالي من الأساس
ما عندها معنى غير كدا .
---------------------------------------------------------
نفس الشعور يا طلحة لكن ابوسن بيعتبر شعورنا دا نوع من البلادة
الشكية لى اب ايدا قوية

Post: #28
Title: Re: ضد اختيار والي امرأة او رجل
Author: طلحة عبدالله
Date: 07-23-2020, 10:32 AM
Parent: #26

Quote:

العنوان كان مربك ولا يتضح معني العنوان الا بعد اكمال الرواية
العنوان ليس بالضرورة ان يكون جملة كاملة .
ضد اختيار الوالي على أساس الجندر
ايه رأيك يا أبوسن .. نفس عدد الكلمات ومفهوم وواضح ..
تحياتي يا الحبيب

Post: #29
Title: Re: ضد اختيار والي امرأة او رجل
Author: عبدالحفيظ ابوسن
Date: 07-23-2020, 10:49 AM
Parent: #28

حولااا يا حسن ياخ
آمنتو بالله
ما كدة
اعتذر عن نزقي وقسوة تعبيري وحدته
اعتذار حقيقي
يا طلحة كان ممكن لو خطرت بذهني
شكرا امتثال واحمد وعمر ومن قد اكون اسقطته ذاكرة خربة
الموبايل لايفتح الا صفحة الرد

Post: #30
Title: Re: ضد اختيار والي امرأة او رجل
Author: طلحة عبدالله
Date: 07-23-2020, 10:54 AM
Parent: #29

تمام يا أبوسن
أنا ما رديت على الحبيب حسن عمدا لأنو
حسسيت خانك التعبير بس .

Post: #31
Title: Re: ضد اختيار والي امرأة او رجل
Author: امتثال عبدالله
Date: 07-23-2020, 10:57 AM
Parent: #29

عثمان الامام
شكرا
تعليق اوسكار خمس نجوم

Post: #32
Title: Re: ضد اختيار والي امرأة او رجل
Author: اخلاص عبدالرحمن المشرف
Date: 07-23-2020, 10:59 AM
Parent: #29

ود ابسن تبارك وبس
صفوة وما صفوة ما بتخارج
ا لحين بعد ال شفناه من سكوت بعد اعتراض
الرجال حتي علي الاثنين وما كتبت بوست
صار الأمر ( ما بنصدقكم).

من انصفنا هو حمدوك وهو معترض علي قلة العدد
والدين رفعوا توصيات ومناديبهم في الترشيح النهائي
طنشو. ما رفعوها

د

Post: #33
Title: Re: ضد اختيار والي امرأة او رجل
Author: أحمد محمد عمر
Date: 07-23-2020, 11:31 AM
Parent: #32

أوووووو كنا فرشنا السكة خدار لو كلمتنا كان بالكارو
مشتاقوووون عاطف عمر
مشتاقين لشتايمك ولخدارك البايت السايقو معاك من بوست لي بوست

Post: #34
Title: Re: ضد اختيار والي امرأة او رجل
Author: Asim Ali
Date: 07-23-2020, 11:43 AM
Parent: #29

سلام عليكم
قبل البدايه والبعض من فهم لقصد المتحدث يقدم مشاركه المراه فى الثوره فى الصفوف الاماميه وينتقد لما يكون للواحد ثحتاج قراءه منزوعه وخاليه من العتافيه والشعارات.
واقول لهؤلاء االكنداكات اتظلمن لما اصبحت ايقونتهم واحده خرجت من كهف عميق ويتهرب كثيرين من سرد اى تاريخ نضالى لها او حتى مشاركه فى الثوره او حتى فى الاعتصام قبل او بعد ظهورها بكامل زينتها على ظهر سياره فى ارض الاعتصام (كانت وين وقت فض الاعتصام).
واتحدى كل من يتحدث عن المراه ويدافع على الاطلاق ان اين انتم من شهيدات وجرحى ومفقودات الثوره هل خطت اقلامكم سطرا عنهم ؟ هل تعرفون اسماء بعضهم؟
هى المحاصصه اولا هى سياسيه باسم المحاصصه الجندريه وهى محاصصه ديكوريه اكثر منها فعليه ودا حاصل حتى عند الكيزان لان اغلب قاعدتهم نساء كانو يقدمو النساء ليظهرو بمظهر عصرى نصير للمراه ومشاركتها فى الحياه العامه.لدرجه تقديمها سفيره وومسئوله فى منظمات دوليه واقليميه (ديكور دولى) فى حين القانون عندهم مازال يزوج القاصر ويجلد المراه باسم النظام العام ويغتصبها فى مناطق الحروب.
دا انا بشوف انو اول من يرفض المحاصصه دى هى المراه لان المشاركه الحقيقيه والحقوق المكتسبه المراه من تفرضها ليس بمطالبات المحاصصه وانما بمطالبات المشاره بمعيار الكفاءه ومازالت المراه مفقوده وتاركه فراغ كبير فى مناحى مختلفه من الحياه لانجدها تزاحم الرجل فيها وقد ذكرتها من قبل عده مرات.(تصوروا لو كانت المراه فى الجيش موجوده وجود حقيقى احتمال كان نلقاها ممثله فى المجلس السيادى ضمن المكون العسكرى(رغم الموقف حاجه اسمها مكون عسكرى فى حكومه الثوره)..فى زول انتبه لغياب المراه فى مجالات زى دى؟؟؟
المراه عندما تجيد تنظيم صفوفها وتاخذ حقها فى اختراق جميع مناحى الحياه (مهندسه بترول اومهندسه جيلوديه فى الحقل -جنديه مقاتله وشرطيه فى وحدات مهمه غير الجوازات والمرور) ماذا قدمت المنظمات النسويه للمراه التى تعانى من فقد الرعايه الصحيه للحوامل والامهات فى الاطراف البعيده من السودان وفى كل يوم تفقد اعداد منهن لهذا السبب..
المراه السودانيه نعم رائده خاصه برلمانيا على مستويات اقليميه (تصويت وتمثيل) ولكن اين هى الان ؟ ومابقصد وظائف المكاتب واتنا على امتداد السودان جغرافيا ونوعيا فى مجالات العمل والحياه و(على جميع المستويات من القاعده وصولا الى القمه)
ولا انتقص من دور المراه الان .
لكن عليها اعاده تشكيل وجودها سيقدمها عملها وكفائتها دوربما كانت ذات وجود يزيد على هاتنادى به منظماتها الان.
اخيرا قضيه المحاصصه بجميع اشكالها قضيه تلقى بظلال سالبه على اى تجربه وممارسه ديمقراطيه ودونكم معاناه دوله كلبنان خاقت صيغه محاصصه فى الحكم ومازالت هذه الصيغه من اكبر معوقاتها تقدم لبنان وسلاسه تداول السلطه فيه
.
اعتذر للاخ عبد الحفيظ عن الاسترسال ولكنه استرسال لابد منه ليجمع من يقراء اطراف الانتباه والوعى بالابعاد الحقيقيه لشعارات دون واقع ملموس على الارض

Post: #35
Title: Re: ضد اختيار والي امرأة او رجل
Author: اخلاص عبدالرحمن المشرف
Date: 07-23-2020, 01:09 PM
Parent: #34

محاصصة ما محاصصة
حقنا و نحمد ربنا




Post: #36
Title: Re: ضد اختيار والي امرأة او رجل
Author: أحمد محمد عمر
Date: 07-23-2020, 01:09 PM
Parent: #34

Quote: عين الطبع ..يا قول هاتك الأعراض..غلابة
هسه لو كنتا مولود مع صاحبك جراهام بيل"حاتم إبراهيم"،كان امثالك كلها لمبرجيني وبينتلي وبورشات!وتلفونات وتلاجات وتلفزيونات!
ههههههههههههههههههه
لمبر يجيكم بي وين حبايبي أنا!
هو ما الحمد لله الركبناك كارو حمار أم عجلين! دة كرم مننا ساي لكن علي الحلال خدارك دة مقاسه درداقة

قبل كم سنة كنت ساكن في الأزهري، حوش سيراميك ومكيفات اسبليت وعندي خزانين في السطوح
وبعد دة الموية بتقطع بالأيام والموتور يكون جاري الهواء .. مع ملاحظة إني ساكن محطة (الصهريج) والله صحي :)
في الأيام ديك بنشيل الموية من الكارو بتاعة البرميل بجونا الأولاد ديل حايمين يطقطقوا في حديد الكارو بالخرطوش نطلع نستقبلهم استقبال الفاتحين يعبوا بالجركانات ويرفعوا الموية في الخزان

فااااا شنو كارو الحمار بتشتغل حتى في العمارات .. دة الله ودي إرادته .. ناس يقعدوا تحت المكيف الاسبليت وناس بحوموا بالكوارو .. بس أهم حاجة الناس تكون راضية بي واقعها وما تتعقد

Post: #37
Title: Re.: ضد اختيار والي امرأة او رجل
Author: اخلاص عبدالرحمن المشرف
Date: 07-23-2020, 01:23 PM
Parent: #36

لو كان الرجل السوداني ممثلاً باحزابه صادقاً
لكانت كل القوائم تحتوي علي امرأة علي اقل تقدير
واصدقنا انكم لا تنظرون للجندر ولكنها محاصصة


حقنا واستحقينا


Post: #38
Title: Re: Re.: ضد اختيار والي امرأة او رجل
Author: Ahmed Yassin
Date: 07-23-2020, 01:41 PM
Parent: #37

ابوسن وشركاه
انا معاك ضد اختيار والى امرأة او رجل
لو روبوت يكون احسن

Post: #39
Title: Re: Re.: ضد اختيار والي امرأة او رجل
Author: اخلاص عبدالرحمن المشرف
Date: 07-23-2020, 02:01 PM
Parent: #38

شفت كيف يا احمد يس

ود ابسن الردم فيهو حنين اردمو


Post: #40
Title: Re: Re.: ضد اختيار والي امرأة او رجل
Author: عبدالحفيظ ابوسن
Date: 07-23-2020, 03:04 PM
Parent: #39

مرحبا عثمان
كيف مادايرة مؤهلات ؟ الوالي هو الحاكم الفعلي للولاية والمتصرف فيها
وهذه فكرتي عاصم عبرت عنها باستفاضة
يا احمد يسن وهكذا اخطأت قراءة البوست . ان اردت سخرية بسخرية لرددت مثلها ولكني لا ألقي النكات في بيوت العزاء
غير كدة المحاصصة بتجيب الروبوت . نفس العمل ولكنه روبوت بشري !!

Post: #44
Title: Re: Re.: ضد اختيار والي امرأة او رجل
Author: عثمان الأمام
Date: 07-23-2020, 03:39 PM
Parent: #40

Quote: مرحبا عثمان
كيف مادايرة مؤهلات ؟ الوالي هو الحاكم الفعلي للولاية والمتصرف فيها


هلا أبوسن

آي والله ما عاوزة أي مؤهلات , مافي أي شهادات ولا خبرات بتؤهل الواحد عشان يكون والي ولا حاكم ولاية حتى في أمريكا زاتا قبل كده في ممثل كان حاكم ولاية
فالمنصب في حد زاتو سياسي ما عندو أي جانب فني , عشان كده الطريقة الوحيدة المثلى لحكام الولايات هي الإنتخابات وبما انو مافي انتخابات فالموضوع ببقى موازنات ليس إلا !

كدي شوف السيرة الذاتية لمرشح والي الخرطوم المنشورة في المنبر هنا ده كلها سكرتير اتحاد طلاب وسكرتير لجنة خريجين و عضو مكتب سياسي للإتحاديين الأحرار !! سيرة ذاتية
ما بتأهلو يقعد في طربيزة كوتشينة ! لكن كوالي ممكن عادي ينجح .

Post: #41
Title: Re: ضد اختيار والي امرأة او رجل
Author: sadiq elbusairy
Date: 07-23-2020, 03:09 PM
Parent: #1

التحية و التقدير و الاحترام صاحب البوست و ضيوفه الكرام


أتفق مع الاخ عبد الحفيظ ابوسن الإختيار فعلا يجب ان يتم وفق الكفاءة و ليس المحاصصة، و مبدأ الكفاءة عريض و موازناتها ليس بالأمر الهين خصوصا عندما يتعلق الأمر بإدارة حساسة كمنصب وزير او والي او اي منصب تنفيذي رفيع، و لكن معايير الكفاءة التي يقاس بها لمن يتم اختياره لمنصب والي او حتى وزير لا تتوافر عند حمدوك او غيره لأسباب العزلة الطويلة من العمل الجماهيري و التدريب عليه فيصبح قرار تحديد الكفاءة يصبح نسبيا، و أعتقد بذا يكون معيار الكفاءة الذي حسب السيرة الذاتية و هنا اعتقد ما فهمت من البوست او ما أرد قوله بان هناك الكثير من يحمل ذات السيرة الذاتية و ربما أعلى لم يتم ترشيحهم و تم ترشيح نساء فقط لخلق التوازن النوعي و هذا ربما في ظاهره حسن و لكنه يضعهن اي المرشحات أمام تحدي يحمل في طياته الكثير من تردي في الحالة الإقتصادية و الإجتماعية و الثقافية و مقاومة عناصر النظام البائد التي لا تتورع حتى عن حرق المحصول (الأخضر و اليابس)، و قتل البشر ، و أكبر تحدي عدم انسجام المنظومة الحاكمة و وجود الدعم السريع كمهدد و خطر قائم، السؤال هل سينجن في هذا الإختبار المفتوح الاحتمالات و المتعدد المخاطر أم سيكون محرقة للعنصر النسائي في إدارة مناصب قيادية كهذه؟



Post: #42
Title: Re: ضد اختيار والي امرأة او رجل
Author: عبدالحفيظ ابوسن
Date: 07-23-2020, 03:29 PM
Parent: #41

تسلم البوصيري
اتمني انهن ينجحن
عارف نسبة للمحاصصة دى لو فشلن سوف يحسب فشلهن علي النساء قاطبة ولكن يخصهن فقط
ودي الاشكالية
وهي تجربة جيدة للسودان . ولتغيير المزاج العام والثقافة العامة
تقبل ان يكون الحاكم امرأة
تقبلو حكمها كقاضي وشرطة . ولانها لم تختار هنا الا للكفاءة فلم يعترض الناس .
لذا يجب ان يكون الاختيار للكفاءة
نعم انتشرت النكات والسخرية عليهن . بعضها محض فكاهة وبعضها جاد في الرفض
لذا هي تجربة وتمرين ديمقراطي جيد

Post: #43
Title: Re: ضد اختيار والي امرأة او رجل
Author: اخلاص عبدالرحمن المشرف
Date: 07-23-2020, 03:39 PM
Parent: #42

يا حفيظ قرأتك جيد
يا حفيظ نفي المحاصصة كذب بواح
وادعاء الكفاءة قياس موجود ويظل الامر
نصيب النساء.
ما داسينها ، حقنا ما بنكذب ونقول ما في محاصصة
ونسبة المرأة أقل من حقها اما محرقة للمرأة فهي محرقة
للجميع فقط تعودتم علي تقبل اخطأ الرجال.
يا حفيظ طرحك ظاهرة الرحمة وباطنه العذاب
نحن ببساطة نقول زي الجميع اخذ حقه
المرأة تأخذ حقها .

Post: #45
Title: Re: ضد اختيار والي امرأة او رجل
Author: عبدالحفيظ ابوسن
Date: 07-23-2020, 04:12 PM
Parent: #43

انا مانفيت المحاصصة ابدا
بل اثبتها يا اخلاص
عشان كدة قلت تاخد حقها وليس منة او هدية
تاخذ حقها لأنها تستحقه
لأنها مؤهلة لذلك
المرأة ليست تمومة جرتق ولا ديكور
ولا مظهر
بل عضو اصيل ومساوئ للرجل
المحاصصة مثلا بتقول يدوها مقعدين من 18 مقعد
جدا
ولو طبقنا مبدأ الكفاءة غض النظر عن الجندر قد تحصل علي ال18 مقعد او اقل ولكن ستكون اكثر من مقعدين
شفتي الفرق بين المحاصصة والمنافسة الحرة علي اسس التأهيل
ماقادر افهم باطن عذاب دة ياتو الفي كلامي ؟
قراءة وفهم الواقع لايعني الموافقة عليه بل هي قراء في طريق اصلاحه

Post: #46
Title: Re: ضد اختيار والي امرأة او رجل
Author: Abureesh
Date: 07-23-2020, 04:52 PM
Parent: #45

Quote: مرحب ابوالريش
هل اشتممت اعتراض علي ترشيحهم مني !!!؟؟


اشتممت نعم.. نصوص واضحة لا.
البوست لو اتنشر قبل التعيينات لفهمته.. ولكن بعد التعيينات فهذا يشتم منه الاعتراض المبطن و إلا فما الهدف؟ التعيين حصل حصل..

Post: #47
Title: Re: ضد اختيار والي امرأة او رجل
Author: Abureesh
Date: 07-25-2020, 07:39 AM
Parent: #46

Quote: وانا اكتب في ظني اكتب لاذكياء يجيدون القراءة


بلر قل لظرفاء يصححون لى العنوان

Post: #48
Title: Re: ضد اختيار والي امرأة او رجل
Author: عبدالحفيظ ابوسن
Date: 07-25-2020, 08:15 AM
Parent: #47

قبل التعينات كيف انشرو يا ابوالريش ؟ قد لا تكون محاصصات من اي نوع !