دا مالو؟

08:17 AM July, 16 2020

سودانيز اون لاين
Hafiz Bashir-
مكتبتى
رابط مختصر

محمد إبراهيم مدير عام وزارة التربية والتعليم ولاية الخرطوم

زي ما قال يكون صحوهو من النوم :)

Quote: زي ما قال يكون صحوهو من النوم :)

😂😂😂
هو لكن الزول دا كلامودا كلام زول صاحي؟

زول صاحي ومذيع سجمان جاوبوه مرتين لكن قاعد يتلولو
لو انا كنت سبيت ليه مكعب

النصيحة المذيع فعلاً عايز يتلولو . .
وين المطارات الفتحت دي ؟
السعودية مثلاً لم تفتح مطاراتها ولن تسمح بقيام امتحانات وتجمعات . . المسالة مرتبطة بالدول الاخرى وليس مطار الخرطوم . .
مقدم البرنامج بيسال (انت اتواصلت مع وزارة الخارجية ) هسي ده شنو ده . .!!!!
المذيع وكأنه في تسابق معرفي مع الضيف ولسان حاله (انا اعلم منك بواجباتك )

مذيع غياظ وعايز يعمل فيها فيصل القاسم
كلام مدير الامتحانات واضح كررها ليه أكتر من مرة إنهم متواصلين مع وزارة الخارجية وإنه ما من صلاحياتهم مخاطبة دول خارجية ورغم كدة المذيع مصر على إنه محاصر مدير الامتحانات ولازم يلقى منه تاريخ واضح وهو عارف إنه ما الزول المناسب للسؤال دة

طبعاً دة لا ينفي إنه سلوك مدير الامتحانات منافي لكل قواعد الذوق المسؤولية ولا ممكن شخص في منصب زي دة يتكلم بي جنس اللغة دي
الاتنين مفروض يتشالوا

سلام يا محمد الشيخ

Quote: زول صاحي ومذيع سجمان جاوبوه مرتين لكن قاعد يتلولو لو انا كنت سبيت ليه مكعب

😁😁😁
أصلو ما عندنا مانع تسب للمذيع مرتين
ذاتو المذيع بشبه الطاهر حسن التوم وبيحاول يقلدو
لكن المسألة ما عندها أي علاقة بالمذيع
المسألة متعلقة بقصور في فهم المسؤول لوسائل الإعلام ودورها في مخاطبة الجماهير
المسؤول لا يجب أن يستهدف المذيع بخطابه وإجاباته على الأسئلة ولكنه يستفيد من الفرصة التي أتيحت له وفي وسيلة إعلامية في توصيل المعلومة المناسبة للجماهير ولا يجب أن يتعامل كأنه يتفضل بالإجابات على أسئلة المذيع.
لو كنت مسؤلاً وسألني المذيع نفس السؤال عشرة مرات فسأكون سعيد بكثرة الفرص التي يتيحها لي لتقديم إجابات كافية.
المسؤول من المفترض أن يكون أكثر حرصاً من المذيع في إستثمار المساحة الإعلامية المتاحة لمخاطبة الطلاب واولياء أمورهم فيما يتعلق بمسألة الإمتحانات.
ولكن بسبب قصر نظر المسؤول إتخذها كمعركة بينه وبين المذيع.
وبالمناسبة سؤال المذيع ليس مكرر المذيع في سؤاله الثاني يسأل عن تفاصيل وما تم فيها من تقدم
مدير وزارة التربية والتعليم بولاية الخرطوم لم يقدم إجابات كافية عن المشكلة والحلول المتاحة لها.
وكان من الممكن يستثمر الفرصة في تقديم إجابات وافية.
مثلاً هو قال أن هنالك إشتراطات صحية للتجمعات، وهذا صحيح ولكنه لم يوضح كيفية تأثيير هذه الإشتراطات الصحية على سيير الإمتحانات فيدول الخليج مثلاً.

امتحانات بالخارج معناها وزاره التربيه تنسق مع وزاره الخارجيه لتوفير مكان الامتحان -حيب الاشتراطات الصحيه - وترحيل الامتحانات والامتحانات مش حيكون معاها على الاقل لجنه ودا كلو غير قفلت المطار فى مشكله التمويل لكل دا وفى ظروف زى الحاصله دى .
الكيزان شكلهم خلاص بعد اقاله اكرم بقو يلطشو مامركزين هجوم موحد واى مسئول فى الحكومه الانتقاليه دايرين يظهرو بمظهر المقصر

سلام عمر سعيد علي

Quote: وين المطارات الفتحت دي ؟ السعودية مثلاً لم تفتح مطاراتها ولن تسمح بقيام امتحانات وتجمعات

مطار الخرطوم مفتوح للسفريات من وإلى القاهرة، دبي، استانبول، وأديس أبابا.
وهنالك رحلات متفرقة من وإلى بعض مدن السعودية وفي الإسبوع الماضي سمحت السعودية بعودة بعض المقيمين تحت إشتراطات معينة.
أما قيام الإمتحانات في السعودية فمسموح بها بإشتراطات معينة يمكن تلبيتها
مثلاً ال British Council إستأنف إجراء إمتحان الIELTS الورقي منذ بداية شهر يوليو في مراكزه المعتادة داخل السعودية

إجابات المدير كانت إجابات عامة ودفاعية فقط.

لا حول..

المذيع غير مهذب و غبى فى نفس الوقت.. دا غير العجرفة و إدعاء المعرفة الكبرياء فى الفارغة.. ياخ هل من الإحترام بل من اللياقة والدبلوماسية أن تقول
لضيفك انت ما مركز لأننا صحيناك من النوم؟!! أعوذ بالله من تربية الإنقاذ. منتظر منه شنو غير يقفل الخط فى وجهه..

السيد المدير كلامه كان واضح من البداية و محدد و إجاباته غاية المهنية.. إجابات زول عارف شغله بالضبط. وفعلا المذيع لم يكن مركزا معه لأنه كان له غرض الإستعراض.

التحية لهذا المدير

طبعاً دة كلو حوامة حول أصل المشكلة
سيستم التعليم نفسه مفروض يتراجع
أصلاً مافي داعي لامتحانات مركزية للانتقال من الأساس للثانوي مفروض تتعمل من داخل المدرسة نفسها تتم إجازتها اليكترونيا من قبل إدارة الامتحانات قبل تقديمها
بل حتى الشهادة السودانية مافي ليها داعي ولا في سبب يخليها مركزية مفروض تكون امتحان عادي من قبل المدرسة ويتم دعمها بامتحان قياس يقدم 3 مرات سنوياً مع حرية الجامعات والكليات لوضع اختبارات القدرات الخاصة بها بعد ذلك
جميع الاختبارات النهائية مفروض تكون اليكترونية وتكتفي بالأسئلة الموضوعية وتترك الأسئلة المقالية للمدارس أثناء وذلك من أجل الحماية والدقة والسرعة يعني نتيجتك تظهر ليك في يومين
في السعودية تم تطبيق النظام الالكتروني في كامل المملكة بعد 8 ساعات فقط من بدء الحظر ونحن بعد 5 شهور لسة راجين الطيران يفتح وبنتفاكر كيف يمشي الورق!
الأنظمة الالكترونية التعليمية لا تكلف جنيه واحد أغلبها مفتوح المصدر وممكن ينزل في سيرفر الوزارة الحالي وأسعار التابلت المستخدم للاختبار تقل كثيراً عن تكلفة طباعة الورق
السفارات والقنصليات بتشيل رسوم امتحان كتيرة ما شوية تستطيع ببساطة شراء معمل كامل والمراقبة تكون بالكاميرات من جوة الخرطوم بدل بعثات طالعة ونازلة كل سنة

عايز يصل لحتة انا عصرت ليكم المسئول الفلاني.
حافظ وضيوفك تحياتي.

سلام يا أبو حميد

Quote: طبعاً دة لا ينفي إنه سلوك مدير الامتحانات منافي لكل قواعد الذوق المسؤولية ولا ممكن شخص في منصب زي دة يتكلم بي جنس اللغة دي الاتنين مفروض يتشالوا

كلام معقول
قناة النيل الأزرق قناة خاصة لها سياساتها في التوظيف وتوجيه وتدريب كوادرها
ومن حقنا إنتقادها وإنتقاد مذيعيها.
مدير وزارة التربية والتعليم مسؤول حكومي ويشغل وظيفة عامة لذا من الصعب وضع أخطائهم في كفتي ميزان لمعايرة أخطأ المسؤول الحكومي بأخطاء المذيع.

Quote: ياخ هل من الإحترام بل من اللياقة والدبلوماسية أن تقول لضيفك انت ما مركز لأننا صحيناك من النوم؟

المذيع قال للمسئول معليش صحيناك من النوم بعد ما المسئول قال ليهو إنت عايز تتلولو ساي و قفل الخط.
ما يهمنا أكثر هو تصرف مدير وزارة التربية
التعليق على غباء المذيع وعدم مهنيته دا تبرير ما في محلو للتصرف الغير مهني والمسئ جداً من مسئول حكومي

Quote: طبعاً دة كلو حوامة حول أصل المشكلة سيستم التعليم نفسه مفروض يتراجع أصلاً مافي داعي لامتحانات مركزية للانتقال من الأساس للثانوي مفروض تتعمل من داخل المدرسة نفسها تتم إجازتها اليكترونيا من قبل إدارة الامتحانات قبل تقديمها بل حتى الشهادة السودانية مافي ليها داعي ولا في سبب يخليها مركزية مفروض تكون امتحان عادي من قبل المدرسة ويتم دعمها بامتحان قياس يقدم 3 مرات سنوياً مع حرية الجامعات والكليات لوضع اختبارات القدرات الخاصة بها بعد ذلك جميع الاختبارات النهائية مفروض تكون اليكترونية وتكتفي بالأسئلة الموضوعية وتترك الأسئلة المقالية للمدارس أثناء وذلك من أجل الحماية والدقة والسرعة يعني نتيجتك تظهر ليك في يومين في السعودية تم تطبيق النظام الالكتروني في كامل المملكة بعد 8 ساعات فقط من بدء الحظر ونحن بعد 5 شهور لسة راجين الطيران يفتح وبنتفاكر كيف يمشي الورق! الأنظمة الالكترونية التعليمية لا تكلف جنيه واحد أغلبها مفتوح المصدر وممكن ينزل في سيرفر الوزارة الحالي وأسعار التابلت المستخدم للاختبار تقل كثيراً عن تكلفة طباعة الورق السفارات والقنصليات بتشيل رسوم امتحان كتيرة ما شوية تستطيع ببساطة شراء معمل كامل والمراقبة تكون بالكاميرات من جوة الخرطوم بدل بعثات طالعة ونازلة كل سنة

يا سلام عليك يا أبو حميد
جبت الزيت.
إمتحانات الأساس إمتحانات ولائية تقوم بها كل ولاية بصورة منفردة.
أصلاً في كل العالم يعتبر التعليم العام KG1 إلى G12 او ما يعادله مرحلة واحدة لا تتطلب إمتحانات تحصيلية أثنائها.
وممكن أن تكون هنالك إمتحانات تقييمية في كل مدرسة لمتابعة أداء الطلاب وتقويم دائهم.
وأيضاً اللقاء كشف عجز وزارة التربية عن السعي في إبتداع أي حلول سواء اللكترونية او غيرها في التعامل مع الظرف الراهن الذي فرضه الحظر.

الهدف من لقاء مدير التربية كان هو إستطلاع الحلول الممكنة بكاملها والعقبات التي تقف أمامها
والهدف الثاني هو مخاطبة اولياء الأمور والطلاب بما سيترتب على تأخيير إمتحاناتهم.
المدير حصر نفسه غي أسئلة المذيع ولم يستجب لجوهر المشكلة
ليس بالضرورة أن يكون المطلوب من مدير التربية تحديد تأريخ معين للإمتحان ولكن تحديد إطار زمني مرتبط بكامل التقويم الدراسي يراعي مصلحة الطلاب في دول الإغتراب.

Quote: عايز يصل لحتة انا عصرت ليكم المسئول الفلاني. حافظ وضيوفك تحياتي.

تحياتي يا عارف
صدق أبداً
لا يوجد مجال للمذيع في عصر مدير التربية
كان من الممكن لمدير التربية إستغلال الفرصة وتوصيل رسالة للطلاب واولياء الأمور في دول الإغتراب.
مشكلة مدير التربية إنو حوَّل الحوار لشكلة بينه وبين المذيع

صحيح مقدم البرنامج زول ثقيل وبيكرر الكلام ..
رغم إنه المسؤول جاوبه ووضح ليهو النقطة الهو عايز يستفسر منها
وحسب صلاحياته جاوب إجابة كافية ومقنعه ..
كونو مقدم البرنامج يعيد السؤال دي بياخة منو ..
لكن كان على المسؤول ان يتجاوز الحاجة دي
ويجاوب ليهو نفس الاجابة السابقة وانتهينا ..
مدير التعليم زول انفعالي ودي صفة سالبة جدا
لانه بيجيك العاهة الزي مقدم البرنامج ده ..
وأكيد حيجيك العوير واللئيم والغبي والذكي والمشاكل مرتو
والمشاكلنه اولاده الممتحنين أشكال وأصناف من البشر
كل ديل لازم وواجب عليك تحتويهم
وتتعامل مع كل زول على حسب فهمه وعقله وتوصل ليهو المعلومة ..
انت في النهاية موظف عام ومسؤول عن المواطن

الاتنين عاهات ساي ...

Quote: مدير وزارة التربية والتعليم مسؤول حكومي ويشغل وظيفة عامة لذا من الصعب وضع أخطائهم في كفتي ميزان لمعايرة أخطأ المسؤول الحكومي بأخطاء المذيع.

ممكن يا حافظ تورينا أخطاء المدير فى الفيديو..

المدير كان من البداية يرد بكل هدوء و تهذيب و مهنية.. قال ليه نحن كوزارة تعليم عملنا داخل حدود السودان و اى اتصالاات خارجية محكومة بالبروتوكلات الدولية و مسؤولة منها وزارة الخارجية.. عندك اعتراض على
الكلام دا؟ يقول ليه شنو أكتر من كدا.. هو قال اتصلوا و متابعين مع وزارة الخارجية و لا يستطيعون تخطيها.. طيب شنو تانى.. بعد دا يقول ليه لكن انتم مسؤلون عن التعليم و شنو ما عارف، من الذى قال أنه غير
مسؤول عن التعليم.. و لكن هناك تنظيم وبروتوكلات المذيع لا يفقهها لأنه تم تعيينه بالواسطة.. و فعلا كلامه بعد داك كان لولوة. و المدير لم يقفل السماعة إلا بعد أن قال له خايفين صحيناك من النوم.. اخر قلة أدب.. ياخ إن
لم تكن أفضل فعلى الأقل خاطب الزول بنفس الطريقة التى يخاطبك بها. أرجوك يا حافظ شاهد الفيديو مرة أخرى بذهن مفتوح.

Quote: يقفل السماعة إلا بعد أن قال له خايفين صحيناك من النوم..

كلامك دا ما صاح
المدير قفل قبال كلام المذيع ...

المدير شغلو متوجس ومتحسس من وسائل الاعلام عموماً
وبي جاوب وخاتي في بالو انه بتاعين الصحافة ديل جنهم لولوة وتحوير الكلام وإخراجه من مدلوله باللواكة الكتيرة
عشان كدة قفل المذيع الملولو دا..

عموماً تجدني فمتعاطف قليلاً مع المذيع .. شكلو عاوز يثبت وجوده بقبقة وزير او مدير ..

Quote: ممكن يا حافظ تورينا أخطاء المدير فى الفيديو..

خطأ المدير الأساسي في مفهومه للإعلام
فالمدير يتعامل في اللقاء مع المذيع وكأنه يريد إيصال معلومة للمذيع فقط وليس للجمهور ولذلك جاء إنفعاله كرد فعل لظنه عدم فهم المذيع وكأن المذيع هو المستهدف بالمعلومة.
هنالك الاف الطلاب واولياء أمورهم ينتظرون توضيحات السيد المدير حول إمتحانات مرحلة الأساس بدول الإغتراب.
فهم المسؤولين لللقاءات التلفيزيونية بأنها صراع بين المسؤول والمذيع هو فهم خاطئ ولا ينتج تواصل بين المسؤول والجمهور.
وسائل الإعلام العامة وسيلة ممتازة للإعلان والتواصل مع الجمهور، المسؤول العام يجب أن يسعى لتوظيفها للمصلحة التي يخدمها لا أن يتعامل معها كخصم وعبء ثقيل عليه.
المسؤول يمتلك معلومة يود إيصالها للجمهور ودور المذيع هو مساعدة المسؤول في ترتيب سريان المعلومات خلال اللقاء.
المسؤول هو صاحب المصلحة الأكبر في سرد المعلومات خلال اللقاء.
الخطأ الثاني في أنه قال للمذيع "إنت داير تلولو ساي" وهو تعبير يتخطى العام لشخصنة الحوار
الخطأ الثالث وبرغم أن الحوار لم يكن سلساً وصحيح أن المذيع أعاد السؤال عن التواصل بين التربية والخارجية ولكن واضح أن الهدف من السؤال الذي أخطأ المذيع في صياغته هو أن يتحدث المدير عن نتائج هذا التواصل وماذا تم فيه.
والمذيع برر سؤاله بأن دور التربية لا ينتهي بإرسال بمخاطبة الخارجية فقط بل بمتابعتها ومتابعة ما تم من إجراءات.
المدير لم ينتبه لمقصد المذيع وإتهمه باللولوة

لا يوجد مجال للمذيع في عصر مدير التربية
كان من الممكن لمدير التربية إستغلال الفرصة وتوصيل رسالة للطلاب واولياء الأمور في دول الإغتراب.
مشكلة مدير التربية إنو حوَّل الحوار لشكلة بينه وبين المذيع
============================
الحبيب حافظ .. كلامك معقول جداً
أكثر ما يصبو إليه المذيع في أي تلفزيون حتى القنوات العالمية هو هروب المسئول
دائما ما يكون المذيع استفزازي .. حتى في اسئلة مندوب سي إن إن لترامب .. لا يلوم
أحد المذيع لأن أي تلفزيون يبحث عن الاثارة وتكون جاذبة للمشاهدين ..
كان المفروض على هذا المسئول التربوي .. أن يقول للمذيع ليس السؤال هكذا
ويعدل في صيغة السؤال ويجاوب .. وقد حدث قبل ايام في قناة الجزيرة .. الضيف اعاد صياغة السؤال
بطريقة مقبولة ومتخصصه وجواب عليها .. المذيعة اصبحت في حرج ..
ولكن بهذه الطريقة مسئول وزارة التعليم أعطى المذيع احساس بالانتصار

أفضل شيء للمذيع هو هروب الضيف .. حدث كثير في القنوات العالمية المشهورة

أن لو محل المسئول .. كنت أقول ( لا ما هكذا تصاغ الاسئلة .. المفروض السؤال يكون هكذا للفائدة )
وكان يمكن قبل الرد .. يأتي بضحكة بسيطة ليس استهزاء للمذيع ولكن لامتصاص حماس الاخر

أنا متأكد من أن المذيع اليوم شاعر بنشوة الانتصار .. على نظرية ( شفت الزول هرب كيف ؟ )

تحياتي الحبيب حافظ .. مودتي

Quote: أفضل شيء للمذيع هو هروب الضيف ..

الأخ على

وانت زول حقانى.. بس عليك الله ورينى فى الفيديو دا المدير تهرب وين؟ فى دقيقة فى الفيديو؟

وانت زول حقانى.. بس عليك الله ورينى فى الفيديو دا المدير تهرب وين؟ فى دقيقة فى الفيديو؟

=====================
حبيبنا أبريش .. مودتي
معليش يمكن خانني التعبير .. انسحاب الضيف أو الاعتذار عن مواصلة الحلقة
أو الاغلاق الخط .. هذا ما اقصده ..
مشكلتي مع سماعة الاذن .. لو لا كنت في المكتب كنت سمعت بصوت مرتفع

تحياتي الحبيب ابريش .. ( انسحاب ، اعتذار ، اغلاق الخط )
ليس دافعاً عن المذيع ولكن حسب مقاييس المذيع يشعر الانتصار

مودتي الحبيب ابريش ..
معليش يمكن تعبيري كان أغلظ شوية ..

Quote: إمتحانات الأساس إمتحانات ولائية تقوم بها كل ولاية بصورة منفردة

ومع ذلك مصرين يتبعو ناس الخارج لولاية الخرطوم
كان من الممكن اعتبار ناس الخارج ولاية براها يتعاملوا زي ناس الشهادة العربية في الثانوي ويعملوا ليهم الامتحان الكتروني وخلاص
بتكلم معاك وقدامي امتحان التاريخ المسمى (نحن والعالم المعاصر)
السؤال الأول: صواب وخطأ
الثاني: أكمل ما يلي بوضع الكلمة المناسبة
الثالث: ضع دائرة حول حرف الإجابة الصحيحة
الرابع: ترتيب القائمة أ مع ب
الخامس: اكتب اسماء المدن الموضحة في الخريطة
السادس أ: ميز الكلمة الشاذة
السادس ب: مقال

يعني جميع الأسئلة موضوعية ويمكن اختبارها اليكترونيا عدا نصف السؤال السادس

Quote: معليش يمكن خانني التعبير .. انسحاب الضيف أو الاعتذار عن مواصلة الحلقة أو الاغلاق الخط .. هذا ما اقصده .

أهلا حبيبنا على

طيب ارجع للفيديو، هو خت السماعة لما المذيع قال ليه أنت ما مركز خايف صحيناك من النوم.. تتوقع منه شنو لو قفل السماعة فى هذه اللحظة؟ راجع الفيدو تانى.
من أين أتى هذا المذيع؟
هل فى مذيع فى كل الدنيا يقول لمحاوره أنت ما مركز لأنه خايف نكون صحيناك من النوم؟ اين الاحترام؟ أين المهنية الصحفية؟ و الأسوأ من ذلك ان المدير كان مركز بل
المذيع الذى لم يكن مركزا.. دى برضو النقطة التى لا يريد بعض المتداخلين هنا نقاشها..

Quote: هل فى مذيع فى كل الدنيا يقول لمحاوره أنت ما مركز لأنه خايف نكون صحيناك من النوم؟

يا أبو الريش عليك الله أرجع للفيديو وشوف منو الخرج من الموضوعية للتراشق الشخصي في الأول.
ومنو القال للتاني إنت ما مركز معاي في الأول
وبعدين ياخي اللقاء إنتهى بقول المدير للمذيع "إنت داير تلولو ساي" وبعد أن إنتهى اللقاء بهذه الجملة المذيع قال "معليش ما نكون صحيناك من النوم"
هل كنت تظن أن المدير سيستمر في الحوار بعد أن قال للمذيع "إنت داير تلولو ساي"؟

Quote: لا يلوم أحد المذيع لأن أي تلفزيون يبحث عن الاثارة وتكون جاذبة للمشاهدين .. كان المفروض على هذا المسئول التربوي .. أن يقول للمذيع ليس السؤال هكذا ويعدل في صيغة السؤال ويجاوب

بالضبط كدا يا أستاذنا علي
فخطأ المذيع لا يبرر لخطأ المسؤول
فالمذيع يعمل في قناة خاصة لها سياساتها وتوجهاتها
وهي المسؤولة عن تدريب وتأهيل كوادرها.
كما قلت أنت يحدث كثير جداً أن يعدل الضيف من سؤال المذيع بما يخدم غرض الضيف.

طيب خلوني أكتب كلام تقني عسى ولعل يقع في يد واحد من المسؤولين
الاختبار الالكتروني عندو أنظمة كتيرة مفتوحة أسهلها موودل
الأفضل يتم تنصيبه على سيرفرين واحد لقاعدة البيانات بذاكرة رئيسية (رامات) 128 قيقا والثاني للتطبيق بأكبر عدد ممكن من المعالجات
هذه المواصفات كافية لاختبار 100 ألف طالب بدون أي مشاكل
بعد تنصيبه تتم إضافة أسماء الطلاب بحسب ما ورد من السفارات وتترسل ليهم الباسويردات
تتعطل جميع البرامج الملحقة بالنظام ويترك فقط الاختبار ودة بخلي النظام أسرع وأخف 10 مرات
نظام الاختبار فيه كلمة مرور ومتصفح آمن يعني بعد يدخل الطالب لا يستطيع الوصول إلى أي برنامج آخر على الحاسب الكلام دة موجود سلفاً في النظام ما بحتاج إعدادات إضافية

نجي للتكلفة المادية
ناخد كمثال أكبر دولة فيها جالية سودانية وهي السعودية سعر التابلت هواوي 350 ريال
من السهولة بمكان إلزام الممتحنين بي إنه يجيبو تابلت معاهم خاصة وإنهم مغتربين ما بصعب عليهم الطلب دة
وممكن برضو السفارة توفر الأجهزة بعدد الممتحنين وتحتفظ بيها للامتحان عليها كل سنة علماً بإنه الطالب بدفع رسوم امتحان حوالي 150 ريال
إذا فرضنا إنه السعودية فيها 1500 ممتحن موزعين في 3 مراكز الرياض وجدة والدمام فدة بيعني إنه الحكومة حترسل 7 أساتذة لكل مركز قول 20 موظف تكلفة الذهاب والإياب 40 ألف وشحن الامتحانات للمدن الثلاثة قول 10 ألف
الإقامة والإعاشة لكل واحد فيهم 500 ريال في اليوم .. الامتحانات 9 أيام + 3 أيام أخرى للترتيبات يعني 6 ألاف للنفر ببقوا 120 ألف ليهم كلهم اجمع دة بس بتلقاها 170 ألف ريال
تكاليف الطباعة والتغليف والتشميع للامتحان الواحد قول 3 ريال في 8 امتحانات 24 في 1500 طالب دي 36 ألف
ضيف ليها الـ 150 ريال الدفعوها الطلاب
لو جمعت المبالغ دي بتلقى نصيب الطالب فيها حوالي 290 ريال ودة بشتري نفس التاب الفوق داك براحة من وكيل الشركة الأم لما تكون عاوز 1500 قطعة
علماً بإنه التابات دي حترجعها كراتينها بعد الامتحانات والسنة الجاية ما حتشتريها يعني أقل حاجة بتمتحن ليك 8 دفع بدون صيانة

أخيراً إذا مر على البوست دة أي شخص من المهتمين بأتمتة التعليم حتى لو في كلية خاصة وما عندهم سيرفر فاعلم يا رعاك الله أن جامعتي هارفاراد و MIT فتحوا نظامهم الشهير EDX لكل المؤسسات التعليمية بالمجان ما عليك إلا تدخل تسجل وبتستمتع بكامل الخدمات بسعة غير محدودة ، وكذلك فعلت coursera المشاركة فيها جامعات استانفورد وييل وغيرها. علماً بأن هذه الخدمات متاحة للمؤسسات التعليمية السودانية يعني برة الحظر

Quote: كلامك دا ما صاح المدير قفل قبال كلام المذيع ...

لا يا حيدر.. ارجع للفيديو.. المدير قفل الخط بعد سمع عبارة خايفين صحيناك من النوم.

باقى كلامك اتفق معك فيه.
استهزأ بالمدير وبعد المقابلة نصب ليه محكمة يستعدى الناس ضده..

يا ابو حميد
دا امتحان مفروض نتيجته بتأهل لدخول المدارس الثانوية بالتالي في منافسة ما من العدل ان لا يخضع كل الطلاب المتنافسين لنفس الشروط
الامتحان الاونلاين تنتفي فيه المراقبة و ممكن الطالب يفتح الكتاب و الكراس وقوقل اثناء الامتحان
السنة دي طبعا اولادنا قروا و امتحنوا اونلاين, النكتة الحايمة قال التربية تكرم الامهات المتفوقات :)

لا لا الإنت بتتكلم عنه دة أنا خابرو كويس :)
لكن البتكلم عنه اسمه proctored exam بتتم المراقبة بكاميرات قاعة الامتحانات وكاميرا التاب نفسه
حالياً أغلب الامتحانات العالمية اتحولت للنظام دة .. أنا شخصياً امتحنت فيه 3 مرات مرتين كانت المراقبة بشرية .. المراقب بطلب منك تتجول باللابتوب في الغرفة عشان يتأكد إنه ما معاك شئ وبتأكد إنه موبايلك ما معاك وبظل يراقبك انت والباقين بالكام .. ومرة كانت آلية بقولوا ليك النظام بلتقط ليك صور عشوائية أثناء الامتحان وعندهم نظام ذكاء اصطناعي لقياس حالات الغش يعني لو بقيت مافيش معناها غشيت وهكذا
ومع ذلك في مثالي دة غير الرقابة الالكترونية في الخرطوم بتكون في رقابة تانية من موظفي السفارات والقنصليات

Quote: قوقل اثناء الامتحان

دة المتصفح الآمن الاتكلمت عنه فوق
الامتحان بفتح بمتصفح خاص أول ما تضغط ابدأ بتتوقف كل خدمات الجهاز وما بتقدر تعمل أي حاجة غير تحل الامتحان وما لم تضغط تسليم ما بتظهر ليك أي أزرار

Quote: قناة النيل الأزرق قناة خاصة

من وين جبت الكلام ده
اوحوا ليك بيهو ولّ بتحلم زى سيدنا يوسف

هلا بالمدعو جلالدونا

Quote: من وين جبت الكلام ده اوحوا ليك بيهو ولّ بتحلم زى سيدنا يوسف

الأنبياء لا يحلمون وهنالك فرق بين الرؤية والأحلام
وإني أرى في المنام أنك لافي ساي يا جلالدونا (و أرى دي بالله إقرأها بإمالة لأننا نقرأ برواية الدوري ولا نقرأ برواية حفص)
وما ناقش حنانك لا في رؤيا الأنبياء ولا في قانون الشركات.
أسأل حبوبتك لمياء قول ليها إنت شركة سونان لمن إشترت أسهم كامل صالح في قناة النيل الأزرق إشترتها في سوق الخرطوم للأوراق المالية ول بعقد بيع وشراء؟
وبعد توريك تعال لي اوريك الفرق بين الشركة الخاصة والعامة والشركة المحدودة وغير المحدودة.
وتبقى مصيبة لو إنت قايل قناة النيل الأزرق قناة حكومية بسبب إنو التلفيزيون القومي بيمتلك 20% من أسهم قناة النيل الأزرق.

مولانا حافظ تحياتي
المذيع عمار شيلا
ابن فتحي شيلا المناضل ومعارض الانقاذ من أول يوم
قضى معظم وقته في ارتيريا
حتى اصيب بمرض خبيث وتدهورت صحته
ثم الى مصر .. الى ان توفى رحمه الله

الأخ حافظ والضيوف الكرام

أنا تابعت الحلقة و من البداية شعرت بأنه المذيع غير لبق وغير مهذب ولا يحترم ضيفه.. من خلال لهجة وأسلوب المذيع تشعر كأنه المذيع هدفه استفزاز الضيف

وإخراجه عن طوره، ليس بالمغالطات فقط ولكنه تعمّد أكثر من مرة أن يقاطع الضيف ولا يستمع لردوده و قبل أن يكمل حديثه يرمي له بتقصير..

في رأي الضيف أتحمل المذيع أكثر من اللازم ..حتى جملة عايز تتلولو دي عبارة عن تلخيص صادق لأسلوب المذيع..

والله أصلا ما شفت مذيع بالمستوى ده من التحرش اللفظي و الاستعداء..

Quote: لأخ حافظ والضيوف الكرامأنا تابعت الحلقة و من البداية شعرت بأنه المذيع غير لبق وغير مهذب ولا يحترم ضيفه.. من خلال لهجة وأسلوب المذيع تشعر كأنه المذيع هدفه استفزاز الضيفوإخراجه عن طوره، ليس بالمغالطات فقط ولكنه تعمّد أكثر من مرة أن يقاطع الضيف ولا يستمع لردوده و قبل أن يكمل حديثه يرمي له بتقصير..في رأي الضيف أتحمل المذيع أكثر من اللازم ..حتى جملة عايز تتلولو دي عبارة عن تلخيص صادق لأسلوب المذيع..والله أصلا ما شفت مذيع بالمستوى ده من التحرش اللفظي و الاستعداء..

شكرا محمد عبد الله.
مع الأسف كتير من الصحافيين السودانيين، الواحد إما يطبل للمسؤول أو يكلمه بصفاقة و عدم إحترام.. ما عندهم مفهوم الحيادية و المهنية و التجرد.
بعدين لما الضيف يجاوب إجابة صحيحة و معقولة فإن مقدم البرنامج يشعر و كانه إنهزم.. يعتبرها هزيمة، لذلك يلجأ لإسلوب مقدم البرنامج هذا من المقاطعة و الإستهزاء.

لحق يقال الغلطان فعليلاً مذيع تلفزيون النيل الأزرق
ومسرحيتو دي كانت مكشوفة
والمذيع هو البدأ الغلط بكلمة( أنت الما مركز معاي)
يعني المذيع هو البدأ الغلط مما يعني وجود سوء نية
واستفزازه كان مقصود ليصل لهذه التنيجة
وأسلوب المذيع فيهو تجاوز واضح
شنو صحيناك من النوم وبتاع !
وبعدين هناك إجابات تفهم ضمنيا
وبعدين المذيع ليس من حقه أن يقول كان المفروض
تفعلوا كذا وكذا بل يقول: هل فعلتم كذا وكذا
وإذا اتضح عدم فعل كذا وكذا حتين بعدين
من حق المذيع يقول لماذا لم تفعلوا
لكن المذيع كان بتكلم بأسلوب استنكاري في طول الخط
في اصدار أحكام ووشكلو الزول دا بحاكي في مذيعي قناة الجزيرة
هذا يشبه أسلوب قناة الجزير الغير مهني
وشكلو الزول دا بحاكي في أسلوب مذيعي قناة الجزيرة غير المهني.
قناة الجزيرة القطرية الإخوانية لها أغراضها لكن هل لهذا
المذيع غرض مشابه !

شكرا يا منتصر، كلامك مظبوط

ببساطة المذيع غير مؤهل لبرامج حوارية

Quote: مولانا حافظ تحياتي المذيع عمار شيلا ابن فتحي شيلا المناضل ومعارض الانقاذ من أول يوم قضى معظم وقته في ارتيريا حتى اصيب بمرض خبيث وتدهورت صحته ثم الى مصر .. الى ان توفى رحمه الله

شكراً جزيلاً با علي على التعريف بالمذيع عمار فتحي شيلا
أنا لست متابعاً جيداً لقناة النيل الأزرق ولم أكن أعرف حتى إسم المذيع.
الآن عرفت أنه مدير قناة النيل الأزرق الذي تم تعينه خلفاً لحسن فضل المولى

Quote: عقب توصية من لجنة إزالة التمكين، تم تعيين عمار شيلا مديرا عاما لقناة النيل الأزرق. ... والمدير الجديد هو نجل القيادي بالحزب الاتحادي جناح الهندي المرحوم فتحي شيلا

https://matarees.com/11945/%D8%AA%D8%B9%D9%8A%D9%8A%D9%86-%D8%B9%D9%85%D8%A7%D8%B1-%D8%B4%D9%8A%D9%84%D8%A7-%D8%AE%D9%84%D9%81%D8%A7-%D9%84%D8%AD%D8%B3%D9%86-%D9%81%D8%B6%D9%84-%D8%A7%D9%84%D9%85%D9%88%D9%84%D9%89/متاريس

معقول مدير القناة
فضيحة

تبقى مصيبة لو ما عارف يعنى شنو رؤية و شنو حلم
حبوبتى لميا قال لى ده مالو ده
قلتها طبيب و مولانا كمان
قالت لى اهااااا يعنى طهور و عرس فى اسبوع
خجلت ليك و الله
طيب يا حبيب
الاصل فى ما يرى النائم فى منامه هما حلم و رؤية
الحلم يا استاذنا بينقسم الى اتنين
رؤيا ... حلم رحمانى و ده حق انبياء و رسل و صالحين لانو الشغلة فيها وحى يوحى او الهام
و هى صادقة و متمومة
وإذ قلنا لك إن ربك أحاط بالناس وما جعلنا الرؤيا التي أريناك إلا فتنة للناس والشجرة الملعونة
في القرآن ونخوفهم فما يزيدهم إلا طغيانا كبيرا
التانى اضغاث الاحلام زى حلمك بتاع شركة خاصة ده
نجى للرؤية و دى حقتنا نحنا عموم الناس
يعنى لما تشوف فى منامك .... و اسأل الله ان يكرمك برؤيتهم ... الانبياء و الرسل
دى مقاما مقام الرؤية الحقيقية لان الشيطان لا يتمثّل بهم
و لامن تحلم بى انو النيل الازرق شركة خاصة اها دى اضغاث احلام تستوجب الغسل

https://www.cbc.ca/radio/asithappens/hello-6-times-as-it-happens-got-hung-up-on-1.4741570https://www.cbc.ca/radio/asithappens/hello-6-times-as-it-happens-got-hung-up-on-1.4741570

سلام حافظ
لو عندكم زمن اتبعو الرابط ده لـ برنامج في هيئة الاذاعة الكندية اسمو
As it happens

فيهو 6 سته تسجيلات لاشهر مقابلات صحفية تم قفل الخط من قبل الضيوف من ضمنهم عيدى امين.

شكراً جزيلاً الحبيب محجوب على الرابط
والذي يعطي أمثلة لضيق قاصري الرأي وبالأخص المسؤلين والسياسيين منهم من وسائل الإعلام والأسئلة التي تكشف مستوى أدائهم لمسؤلياتهم

Quote: مذيع غياظ وعايز يعمل فيها فيصل القاسم

شكراً جزيلاً يا أبو حميد لحديثك الوافي عن الاختبار الالكتروني
وعسى أن يراه المسؤلوون في وزارة التربية ووزارة التعليم العالي وهيئة الإتصالات حتي يتم الإستفادة من جوهر الفكرة فيه.

تفتكر يا أبو حميد المدير قطع الإتصال بسبب عدم تركيز المذيع وإعادته للسؤال أم لأن المدير ليس لديه أي تصورات لحلول أخرى ولم يفكر في إحتمالية وجود حلول أخرى.

Quote: والمذيع هو البدأ الغلط بكلمة( أنت الما مركز معاي)

كضباً كاضب يا منتصر عبد الباسط
وبالتالي باقي كلامك مبني على معلومة مغلوطة وما بُني على باطل فهو باطل

سلام يا عاصم

Quote: امتحانات بالخارج معناها وزاره التربيه تنسق مع وزاره الخارجيه لتوفير مكان الامتحان -حيب الاشتراطات الصحيه - وترحيل الامتحانات والامتحانات مش حيكون معاها على الاقل لجنه ودا كلو غير قفلت المطار فى مشكله التمويل لكل دا وفى ظروف زى الحاصله دى .

أكيد هنالك صعوبات متعددة تواجه مجمل التعليم بسبب جائحة الكورونا.
هنالك نقطتان مطلوب من المسؤلين في وزارة التربية الإجابة عليهن
ماهي الترتيبات التي قامت بها الوزارة في ما يتعلق بإمتحانات الطلاب بدول الإغتراب وإلى أين وصلت مساعيهم؟
ماهي الإجراءات التي ستتخذها الوزارة حتى لا يتضرر الطلاب من أبناء المغتربين في حال إستمر قفل المطارات وسمحت الأحوال بفتح المدارس في السودان ودول الإغتراب؟

ما عندو حلول ولا شايف من مسؤولياته إبداع حلول غير تقليدية
زي دة بكون خايف على المنصب بتاعه .. أي حركة ما مجربة ما بقدم عليها
أساتذة التعليم العام مفروض ينتبهوا لي تأهيلهم بعد زيادة المرتبات .. زمان كنت بعذرهم لأنه الواحد راتبه 1200 وايجار بيته 2000 كان درس نص حصصه كتر خيره
هل تعلم إنه أساتذة الابتدائي والأساس في الجزيرة لازم يدفعوا قروش للنقابة عشان تسك ليهم ترقياتهم! ما بتنزل براها ولا في جهة بتتابعها والموظفين ما بشتغلوا ما لم يدوهم قروش والأساتذة متسامحين مع الوضع دة يقولوا ليك هم مرتباتهم كم! مساكين ما عندهم طريقة دروس خصوصية زينا
حكومة الإنقاذ دمرت التعليم العام دمار شامل عشان كدة العقليات الموجودة دي ما تتوقع منها أي إبداع .. موظفين مكاتب يعملوا شغل ورقي ويشربوا الشاي والقهوة ويمشوا البيت

يا حافظ اللقاء انتهى بعد المدير خت السماعة.. و هو خت السماعة بعد المذيع قال ليه خايفين صحيناك من النوم. ما تعرف صوت ختة السماعة؟ ارجع للفيديو تانى وشوف المدير خت السماعة متين.