Post: #1
Title: 30 يونيو .. لا زالت الثورة مستمرة .. هاشم صديق
Author: يحي قباني
Date: 06-23-2020, 01:59 PM
01:59 PM June, 23 2020 سودانيز اون لاين
يحي قباني-فى الدنيا العجيبة
مكتبتى
رابط مختصر
30 يونيو
( لازالت الثورة مستمرة)
اتوكلت عليك يا الله
شعر : هاشم صديق
اتوكلت عليك
يا الله
شديت لحصانى
درعت السيف
وفى المخلاية
حشرت الزاد
وقُت بسم الله .
ركبت مرقت
غبار الحافر
غتا الحلة .
........
اتوكلت عليك
يا الله
مرقت اكوس
ولاد حسب الله
الجونا (مناظر )
أول مرة
وبعدو اتعرض
الفيلم الاصلى
( الِقْدر البغلى )
اتمدّ مخافر
بطلو مغامر
منع القُحة
........
........
كسّر وكَفَّر
وعجن الملة
باع ساقيتنا
شال عافيتنا
رفد أولادنا
ورقّا الشُلة .
ديل ناس
أضرب
أنهب
أختف
لفق
شرَط
فتّق
ربى دقينتك
بس شان تسرق
اقبض
حاصر
بشتن
.......
.......
حقق
أغرف
أسرف
كضّب
أختف
وإن كان راجل
أغضب وأهتف
تجيك الكشة
تقول ( ست عرقى )
وتطلع كافر
بره الملة
مهدور دمك
ومازول قِبلة .
........
اتوكلت عليك
يا الله
مرقت اكوس
ولاد خادم الله
السفو الخزنة
وكتلو الناقة
بالجبخانة
وحلبو بقرنا
صفايح جِبنة .
........
طفحوا لبّنا
وسووا جمودنا
براميل سمنه .
دسوا عروسنا
في ليلة الدخلة
وسجنو عريسنا
في يوم الحنة
.........
ديل ناس دنيا
سياحة وراحة
وبرضو كمان
محجوزة الجنة
........
جابو قُرادهم
عاس في وريدنا
ومص لحمنا .
صنَوا اضنينا
صراخ (حرينا ).
سرقوا الجوكر
في الكوتشينة
وجدعو البايظ
كلو بلدنا .
شتلو اضينة
في كل جنينة
سووا سواتهم
عاسوا عواسهم
واتمحنّا
راسنا اتكهرب
عامل زنَة
واتبشتنا
واتعشكبنا
واتمسكنا
اكلو عشانا
- تقول غنماية -
وشربوا عسلنا
وطردوا نحلنا .
رقوا حمارهم
والى معالى
عملوا مسيره
شنّه ورنّه
..........
اتوكلت عليك
يا الله
مرقت اكاتل
ناس سعد الله
ولاد رخم الله
قت بسم الله
........
نبينا معانا
ما تغشانا
قلت الليلة
ابارز راجل
زى (ترسانة )
لقيت الفارس
زول (دُلقانه)
قلت اشوف
كان القى حريف
ومخيف وتحدي
لقيت ( حنكوش )
لايجيب
لا يودى .
قلت اواجه
وش لى وش
لقيتو كتالهم
كيد بالغش
........
قلت اجادل
بالقرآن
وكمان بالسُنة
لقيت الرد
ضرب الأنكل
وفلق الجُلة
........
طلع ( فرمان )
من حاج ( طرزان )
سوانى ملاحد
نافر
كافر
هَدَر الدم
وقال حرّم
عملنى كنافة
عصرنى جوافة
اكلنى
جغم .
ديل ناس الله
الجونا كرامة
حصدنا الذلة .
ديل الخبرا
الجونا يعافرو
صلاح المكنة
ابت ما تَدور
بالمنفلة .
ديل الجونا
يعافوا مرضنا
زادوا العلة .
ديل ناس ( اعصر )
تقضى الحاجة .
.........
صلاحهم كضبة
وليلهم عرضة
دقونهم هاجَّة .
.........
عوير السيرة
الكان تامبيرة
اترقى وزير
واتجنح طيره
وحاجة هنايه
- زمان غنماية -
سووها أميره .
ديل ناس الله
خير المله
الخربو الرصة
وجاطو الحله .
الراقص اميرهم
أب تمبلة .
ديل ناس كامري
وعشرين فيللا .
وسُمان وأُمان
الواحد شاحنة
وقاطرة تريللا
.......
اتوكلت عليك
يا الله
شديت لى قلمى
وشلت دواتى
مرقت اكوس
الطغمة
الشلة .
مرقت أبارز
مرة عصابة
ومرة المافيا
ومرة خلاقة .
مرة القومي
ومره الشعبي
مره اللُعبى .
مرة جرايد
مره قصايد
مرة عوايد
ما بتتخلا .
ناس كضابه
ناس مكريه
تسد الخانة
وناس رجافة
بتكتل روحها
وبى نشابها
وناس ما بتعرف
غير قانونها
ختم الغابة .
ناس مأمورة
وناس مكسورة
وناس ما بتعرف
غير تنذلا.
.......
اتوكلت عليك
يا الله
بكرة بنمرق
كلنا بره
من كلِ مدينة
من كلِ حواري
من كُلْ حِلة .
بكره بنمرق
كُلْ خلق الله .
ما نخلى منافق
طار بالزانه
ما نخلى معولق
داسنا اذانا .
ما نخلى الباعو
النيل وهوانا
ما نخلى العقروا
لناقة صالح
وحشّوا وريدها
وبالجبخانة.
ما نخلى السووا
الدين تلجين
والعرقى مدوّر
عن عشمانه .
........
اتوكلت عليك
يا الله
يكره بنمرق
كلنا بره
من كّلِ مدينة
من كل حواري
من كْلِ حِلة .
نقوقى نصفق
للحرية
غُبننا كاسر
ميه الميه
ندوس الكاتل
والف سريه
نقلع حقنا
بالزنديه
ناخد تارنا
وتبرد نارنا
ونبنى بلدنا.
|
Post: #2
Title: Re: 30 يونيو .. لا زالت الثورة مستمرة .. هاشم صدي�
Author: adil amin
Date: 06-24-2020, 03:32 AM
Parent: #1
اها وبعدين
بعد سنة كاملة من متلازمة قحت وجنرلات الابادة
الجديد شنو
اهم حاحة عندي يا قبة بتطلعو بي ياتو علم
المظلوم الازهري ولي علم قاضي القردة التي تلهو في السوق بابكر عوض الله
انا عندي العلم وعي مش دلقان ساكت
وبداية ثورة جقود ثورة الوعي والبصيرة
https://top4top.io/
|
Post: #3
Title: Re: 30 يونيو .. لا زالت الثورة مستمرة .. هاشم صدي�
Author: Shinteer
Date: 06-24-2020, 11:30 PM
Parent: #2
ما في أي ثورة يا قباني. دي ما ثورة بأي مقياس. أتمنى نتجاوز مرحلة الشعر عشان نوصل مرحلة الثورة. الشعر الثوري دا زيو وزي أي مخدّر ... ما عندو معنى على الأرض. والدولة لا يبنيها الشعراء. هذا ما توصلت إليه واقتنعت به 100%.
الشعر لا ينشر غير وعي زايف. في حاجة غلط في السودان ... أو في حاجة معفنة في السودان.
القصيدة جميلة برضو لكن ياخوي دا ما الشيء البيحمّل ال.....
قربت أقول ألعن أبو السودان.
|
Post: #4
Title: Re: 30 يونيو .. لا زالت الثورة مستمرة .. هاشم صدي�
Author: adil amin
Date: 06-25-2020, 03:39 AM
Parent: #3
Quote: ما في أي ثورة يا قباني. دي ما ثورة بأي مقياس. أتمنى نتجاوز مرحلة الشعر عشان نوصل مرحلة الثورة. الشعر الثوري دا زيو وزي أي مخدّر ... ما عندو معنى على الأرض. والدولة لا يبنيها الشعراء. هذا ما توصلت إليه واقتنعت به 100%.
الشعر لا ينشر غير وعي زايف. في حاجة غلط في السودان ... أو في حاجة معفنة في السودان.
القصيدة جميلة برضو لكن ياخوي دا ما الشيء البيحمّل ال.....
قربت أقول ألعن أبو السودان. |
اديهو بي الحتة الفيها الحديدة يا شنتير
الولد ده فقع مرارتي وطعني مجنون
مسيرة 30 يونيو ذى انقلاب 1958 و1969 و1989 و2019 برعاية المخابرات المصرية
https://top4top.io/
كنت امشي فوق اشواك الليالي
صابرا مهما نأى ود النهار
مؤمنا بالانتصار...
اوقفتني ثورة واقفة فوق الطوار
حلفت بالشعب ان تنقلني بالطائرة
ثم من بعد سنين اقبلت معتذرة
لعنة الله على النسيان
ما عندي مطار!!!
حلفت بالشعب ان ترسل لي سيارة
لكنها ما ارسلت بعد سنين الانتظار
غير هذا الاعتذار
اصبحت سياراتي حامية منذ الحصار
سوف اعطيك قطارا يا اخي
لكنها لم تعطي الا الغبار
والصفير المستثار
الف بشرى
تم اعدام القطار
وجدت الكلب انتهازيا ثنائي المسار
راقصا بين يمين ويسار
انتظر لا تحمل الهم...ساعطيك حمار!!!
ولفرط الاضطرار
قلت لا بأس
فجاءتني به منكسرا
تحت ملايين النياشين واطنان الوقار
*******
تقرير:
لم ازل امشي ببطء
فوق اشواك الليالي
وعلى ظهري حمار!!!
..........................
الشاعر احمد مطر
|
Post: #5
Title: Re: 30 يونيو .. لا زالت الثورة مستمرة .. هاشم صدي�
Author: adil amin
Date: 06-25-2020, 03:42 AM
Parent: #4
طلعني مجنون
خلوني اجن وازيد في الجن وانتو السبب في جنوني
فعلا الثورة حامل فكري وبرنامج يا شنتير يحررنا من اصر مصر دي وعملاتها الرخيصين في السودان ملكيين وعسكريين
https://top4top.io/
|
|