تعديل اسم قوات الدفاع الشعبى الى اداره الاحتياط؟؟

04:50 PM June, 07 2020

سودانيز اون لاين
Asim Ali-
مكتبتى
رابط مختصر

Quote: هيئة الاركان تغير اسم الدفاع الشعبي لـ ادارة الاحتياط الخرطوم: سارة ابراهيم قررت رئاسة هيئة الأركان السودانية، في الاجتماع المنعقد بمكتب رئيس هيئة الأركان بتاريخ اليوم(الاحد) تعديل مسمى قوات الدفاع الشعبي ليكون إدارة الاحتياط. ووجه مدير ادارة التنظيم والتسليح بالخرطوم لواء ركن طارق محمد عرابي كافة الوحدات والإدارات بمخاطبتهم بذلك.

تاسيتى نيوز

سلام عاصم
في مخاطبة كباشي في جنوب كردفان قال حلينا الدفاع الشعبي ما عدا ولايتين ولايتكم دي واحدة منها, واتضح ان التانية هي القضارف بعد ان سمعنا عن اشتباكهم مع مليشيات الشفتة في الحادثة الاخيرة
لكن طبعا لا احد يصدق العساكر, الان هناك أكثر من سؤال, هل الاحتفاظ بالدفاع الشعبي هو تكوين مليشيا على نسق الدعم السريع مثلا! هل تغيير الإسم محاولة للخداع و استجابة لمتطلبات ما و استباقا للترتيبات الامنية المتوقعة! ماذا عن العقيدة القتالية لهذه القوات, وغيرها كثير من الاسئلة

سلام عليكم محمد البشرى
المبلوع شويه كان انشاء الاداره الجديده مع ايلوله اصول القوات المخلوله للاداره الجديده دى واحده التانيه القانون او اللوائح الخاصه يانشاء ومهام الاداره الجديده وتعريف المنتسب لقوات الاحتياط اللى مفروض يكون اختيارهم عبر بوابه اكمال واداء الخدمه الوطنيه
.
اقرب تجربه هى تجربه مصر خاصه (ايام الحرب) مجندين موزعين حسب تحصصاتهم وخبراتهم وتدريبهم العسكرى والرتب العسكريه الممنوحه على اساسها.وكنت مستغرب انو الناس تكمل خدمه وطنيه ومايكون فى استيعاب لبعض منسوبيها بعد اداء فتره خدمتهم الالزاميه.
.
وتساؤل مهم هو توقيت انشاء الاداره الجديده والاعلان عنها مع مايثور من رفض البعض للبعثه الامميه وتصعيد الخطاب التعبوى ضدها.
.
اسئله كثيره تحتاج ينتظر الراى العام الاجدابه عنها

اقرأ تعليق اصحفية داليا الطاهر و شاهد الفيديو يا عاصم!

Quote: تتذكروا الأسرار الكبري النزلت في قناة العربية .. قوات الإحتياط المسمي الجديد للدفاع الشعبي هي فكرة الطيب سيخه وتنزيل لرؤية الكيزان في القوات الجهادية.. يعني ما كنا محتاجين ثورة ولا دم ولا شهداء بس نغير أسماء الواجهات ونخدع نفسنا وخلاص .. هل لما تغير إسم الدفاع الشعبي المعروف قواته عقيدتها القتالية كيف ،بتكون خدمت السودان الجديد الثرنا عشانه؟ انتو بتخدعوا في منو ؟ الشق المدني الوثيقة مكبلاه لأنها ما جعلت ليه أي ولاية في الأمر .. وحاضنة سياسيه تم استهداف وحدتها بنجاح.. والناشطين شغالين حزبي وحزبك واغتيال شخصيات.. والفيس كله تخوين وبث سموم ضد قوي الحريه والحكومة الانتقالية.. والمواطن السوداني الأزمات حاصرته من كل الجهات.. والعسكر بمنتهي الهدوء شغالين شغل مدروس ومقنن وماشين نحو اهدافهم بخطي ثابتة.. ولو ما صحصحتوا مبروك علي العسكر السودان القديم.. رغم ذلك ثقتي في وعيكم كبيرة .. وإنه نحن قادرين بتماسكنا وثباتنا نغير كل المخططات لمصلحة الوطن البنحلم بيه الشكر للزميل رواد بدالدين علي قص الفيديو

الدفاع الشعبي هو اسم الدلع للجيش في الدولة الموازية التي أسسها الكيزان ومحاولة تغير الاسم في ظل وجودالأفراد والهياكل وربما الأهداف يقدح في رؤية المكون العسكري المعطوبة اتجاة الثورة ويؤكد ان الثورةالسودانية تحتاج الكثير ان كنّا ننشد التغير الحقيقي

عاصم وود البشري سلام.
هل السودان في حالة حرب كي يكونوا قوات احتياط؟.
البحصل ده وعاء مليشيات الكيزان من دفاع شعبي وكتائب ظل ودبابين... الخ واستحداث مسمي لتأخذ طابع رسمي وشرعي.
سيتم تجهيزها لتكون موازية لقوات الدعم السريع وبعد فترة ستقوم بمهام قوات الدعم السريع في المدن.

سلام عليكم جميعا
غايتو كلام الطيب بيوضح اكتر القصه .وحتى لما يتفتح طوعا والناس نعم متدربه تدريب عسكرى اساسى كان تاس الشهاده السودانيه فى الدفاع الشعبى ولاحقا فى الخدمه الوطنيه ومتدريى المصالح والمؤسسات والوزارات .اما الكيزان مشوو عمليات وبعضهم اخد دورات قتاليه متقدمه خلال فتره العمليات بالتالى حتى التقديم الطوعى فى المفاضله حسب معايير الخبره العسكريه حيكون ليهم الاولويه .
موضوع داير وقفه راى عام والثوار بالذات .

Quote: تتكلم ينطوا ليك في حلقك ويتهموك (انت مستهدف القوات النظامية) .. هي وينا القوات النظامية ؟؟؟ ✍🏾 هشام ود قلبا العساكر بلعبوا بالثورة ، ما بلعبوا سياسة .. والمدنيين - عينا عليهم باردة - شغلونا بين سواطة تجمع المهنيين وإقالة أكرم وجدل فصل الدين عن الدولة .. والقرارات البتجهض أهداف الثورة بتتمرر عاااادي .. طيب .. قوات الدفاع الشعبي .. مليشيا تم حلها بقرار حبر على ورق ، قرار تخديري فلم يتم تسريح مهاوييس الدفاع الشعبي ومرتباتهم لسه ماشه .. الان وعلى عينك يا ثائر إستوعبوهم رسمياً في القوات المسلحة بأسم دلع جديد (قوات الاحتياط) !! أيوه الدبابين والمهاويس الهاجموا الإعتصام 8 و 9 أبريل موجهين بنادقهم ورصاصهم عشوائياً على المواطنين العزل .. الان هم عساكر رسميين في القوات المسلحة .. كاااامل قوام قوات الدفاع الشعبي برتبهم المختلفة من لواء حتى جندي .. الان رسمياً قوات نظامية .. جيش عديل بس بقى إسمهم (الإحتياط) .. عاملين ثورة لشنو ! قوات الإحتياط في كل الدنيا قوامها متدربي الخدمة الوطنية الإلزامية .. أي شي غير كده بتعتبر مليشيا .. والقرار بكل قوة عين ومد لسان للثورة حول المليشيا المهووسه لقوات إحتياط رسمية .. وقبلما تقول لي جاهدوا وإستشهدوا .. أسأل روحك .. جاهدوا في الفشقة ولا إستشهدوا في حلايب !! بعد القرار ده .. باقي ضم (أنس عمر) و (ناجي عبدالله) و (ود ابراهيم) لقوات الإحتياط الجديدة .. موش ديل ياهم قادة دبابين ومهاويس الدفاع الشعبي العينتوهم بقراركم ده رسمياً ! مافي زول يفكر يعمل (تاق) لمدنيي حكومة الثورة .. حرام نقلق منامهم.