بقرات سودانية مقدسة يجب ذبحها

09:06 AM May, 05 2020

سودانيز اون لاين
mohmmed said ahmed-
مكتبتى
رابط مختصر

الناس لا يقتربون منها ويخشون نقدها

فلهمة طلبة جامعة الخرطوم
وقرضمة اولاد ام درمان
وهيمنة شعراء الحقيبة

وعشان ما نلقى الكلام على عواهنه
كلامنا سوف يكون بالأدلةالعقلية والوثائق الرسمية والاوراق الثبوتيةوالاستدلالات المنطقية
اولا
فلهمة اولاد جامعة الخرطوم الواحد فيهم بيقول الجامعة او فى اللكشر او حفل التخرج بيكون قاصد جامعة الخرطوم وهو بيقول الجامعة حاف كدة
طالب جامعة الخرطوم لازم يدخل فى كلمو...ان فورشنيتلى.. انى هاو...اى داوت..فلهمة ولا ما فلهمة

اولاد ام درمان
بيقولو بيعرفو الكفتة فيها كم رزة قرضمة ولا ما قرضمة
اولاد ام درمان..لمن يتكلمو عن سوق الشجرة كأنهم بيتكلمو عن الشانزليزية...ولمن يقولو دار الرياضة وكأنهم بيتكلمو عن ويمبلى...ولمن يقولو الترام وكأنهم بيتكلمو عن مترو موسكو

شعراء الحقيبة بيقولو مافى ود مقنعة بيكتب زينا
شاعر الحقيبة برسل القصيدة فى جواب من القضارف الفنان بيكون قاعد فى امدرمان قهوة ود الفكى يفتح الجواب يلقى القصيدة ملحنة...والشاعر ما بيعرف نوتة موسيقية بس قدرة الله
شعراء الحقيبة كتبو أغنيات قبل ما يقارب قرن من الزمان واليوم تفتح الفضائيات كلها أغنيات حقيبة هيمنة ولا ما هيمنة


اقول قولى هذا وانتظر الردم على شاكلة
ابوعمة بتاع سودانيز أونلاين
عربى جبل اولياء المقطع
الحلفاوى المطرطش

يارطانى
مالك عملت رايح من نرجسية اولاد مدنى

جايهم الروس ديل يا برنس

دا كان زمان يا محمد, اسّي ظهرت بقرات جديدة أحدثها :
جنوب الحزام الناس التمام

هههه والله يا ود البشرى يجوز
قبل شهور كنت فى السودان راكب رقشة فنانة بتفنى بأعلى
صوت قلت لبتاع الرقشة دى منو
قال لى كيف ياخ دى مروة الدولية دى ماسكة من هنا للحزام

أستاذي الجليل محمد سيد أحمد

عسي أن تكون بخير ومن عتقاء هذا الشهر الكريم
أمين
وقرضمة اولاد ام درمان

هذه لن تذبح لانها ليست حالة مرضية أنما الواقع جعلهم هكذا وهم ألطف خلق الله أنسان أن خبرتهم كثير منهم علي علم وتزينهم الاخلاق وقلائل لا ملة لهم بين البشر وأهل السودان
لذلك أرفع هذه السكين أحق بها رقاب كثير بيننا أخي
وتظل أمدر أم للامدرمايين وعازة السودان#

محمد سيد أحمد سلام.


أنا ما عارف لكن أولاد أمدرمان زمان لما كانو بجونا في أندية الخرطوم وخصوصا النادي الامريكي كانوا مضطهدين.

ههههههه

دي معارك في غير معترك ...


مايستوجب الذبح اولا هو بقرة المؤتمر الوثني التي ماتزال عصية علي الحلب والذبح ..

دى معارك جانبية
زى ما قالت حنان بلوبلو
يا محمد ابراهيم

بالله يا دينق
الله ما ورانى الزمن داك
كان ضحكنا عليهم

يا زهير اولاد ام درمان من اعز اصدقائي
د عايد عبد الحفيظ الباشمهندس خالد محى الدين والشاعر الكتيابى والمخرج عبادى والأديب عثمان حامد والكاتب الشقلينى والصديق الراحل حيدر عبد الرؤوف والصديق الكاتب عثمان تراث ..والمثقف الكبير محمد عبد الله محمد فرح
ونجم الدين عبدالله فرح وياسر السر واسماعيل يسين
بس مكاواة ساى

حتى الآن الهجمات المرتدة جاية من الشاطئ الغربى
امدر

مرة بهظر مع واحد من امدرمان
قلتا ليهو انتو ناس امدرمان لو قولتو..سوق الشجرة وبيت ازهرى والدومات
والزول ما عرفهم
مش ما بتعتبرو سودانى ما بتعتبرو زول ذاتو

هاك دى يا دينق
عندنا جلسة كل يوم ثلاثاء فى النادى السودانى بالعين
كلو ما اولاد امدرمان يتقرضمو علينا
ننادى د عصام المجمر ونقول ليهو احكى لينا قصة جدك مع ناس ام درمان
عصام يضحك حتى تستبان سنه الذهبية ويقول
كان عندى جدى شغال فى مخبز بتاع واحد اغريقى فى الخرطوم...وفى يوم قال للاغريقى انا عاوز امشى افتح فرن فى امدرمان
الخواجة ضحك قال ليهو بتخسر ناس امدرمان ديل ناس كسرة ساى ما بعرفو الرغيف
المهم الجد أصر ومشى فتح...وخسر حتى كاد أن يفلس انقذه فقط بناء معسكر الجيش الانجليزى فأصبح يورد اهم الرغيف

المشكلة مش في ناس ام درمان "احلي ناس "
المشكلة في الناس العاملين فيها ناس ام درمان
ذى حسين خوجلي مثلا
https://top4top.io/

التركي ولا المتورك

ما ياهو المتورك خطر يا عادل


الظريف حسيت خوجلى مش ام درمان الشرفا ذاتا ما بلدو
هو مولود فى قرية جوارها

مع كامل الإقرار والاحترام
جامعة الخرطوم جامعة عريقة وخرجت افضل الكوادر
اولاد ام درظراف وام در بلد الغناء والكورة والسياسة
وشعراء الحقيبة كتبو اعذب الأغنيات


بس المعنى كتير المحلبة

Quote: الظريف حسيت خوجلى مش ام درمان الشرفا ذاتا ما بلدو هو مولود فى قرية جوارها

يا ابو السيد
حسين خوجلي ده ظاهرة والله تستحق البحث وزيو كثير
اوع يكون
من الحشرو عباس
ولي جعبات بابكر

Quote: والله حكاية فعلا واحد واخونا اسمه بابكر من قرية جعبات...قرا جامعة الخرطوم واتخرج من اقتصاد وعلوم سياسية وبقى كوز كبير ومتفقعص ورجع القرية وجمع الناس قال ليهم اسم القرية ده محرج جدا لي اما تغيرو ا اسم القرية دى ولي ارحل منكم قالو ليه ابينا ما نغيير جدلنا ول قريتنا ما عاجبك امشي مشى منهم وخطط قرية جمبها وبنا فيلا ووصل ليها الموية والكهربا والاسفلت وبعد سنتين مشا الامارات بي عقد وقعد عشرة سنة ورجع لقي الناس كلها رحلت وسكنت في المخطط بتاعو وسموهو (جعبات بابكر)...

اردم يا ابو السيد
ما تخلي زول معااااطين
جامعة الخرطوم اشاعة
ام درمان اشاعة
واغاني الحقيبة تضليل
قالو ما بدور مدرسة المبشر وودو اولادهم الكمبوني وخلو الغبش في معسكرات تجويد سورة النمل
يا اخ عاصمة ما احترمت الجنوبيين ولي السيد عبدالرحمن والاستاذ محمود فايدتا شنو
اردم بس

Quote: جامعة الخرطوم اشاعة

الماب تلحقو جدعو ..

بريمة

يا بريمة
ماهو نحنا هسا شغالين بنفلق

أما أغاني الحقيبة دي فأحسن نخليها مستورة.

قالوا معظم الشعر بتاع أغاني الحقيبة كتب غزلا في الاولاد وليس البنات.


الليلة أنت يا محمد سيد أحمد عاوز تعمل لينا مشاكل.

دينق أفتكر أنت خرطومي مستلب من أمدرمان

لانه دي معلومات الأمدرمانيين القداااام

وبنات بحري كيف
تحياتي ابوالسيد وضيوفك

Quote: بالله يا دينق الله ما ورانى الزمن داك كان ضحكنا عليهم

ونفرض الله وراك الزمن داك، يعني كنت حتكون من الناس البتمشي النادي الأمريكي؟
أن فورشنيتلى بي عمتك دي ما أظن.
😜

ما بمشى النادى الأمريكى خ
لكن يا حافظ مش من حقى اضحك
انا هسا شفتا الشانزليزية

ما بمشى النادى الأمريكى لكن يا حافظ
مش من حقى اضحك
انا هذا شفتا الشانزليزية

بحرى طراوة يا ابوسن


قبل كم يوم كنتا بقرا فى بوست ماراثونى عن بحرى
قصص وطرائف وشخصيات حاجة روعة

دينق بيحب معلومات من الهادى الضلالى

يا الهادى

هههه
مشاكل كبيرة يا دينق
العنوان ذاتو فيهو ذبح

الحبيب محمد .. تحياتي
الجميل ان البوست اخواني
طبعا نحن ناس ضواحي الدنيا .. ثقافتنا زيرو بالنسبة للعاصمة
أرجو أن تستمر هذه المداخلات الاخوانية بدون أي تجاوزات
لنعرف شيئاً عن ناس العاصمة
( ده يمكن زمان اليوم طبعا ظهرت الاحياء الاستقراطية واختلط الامر يعني واحد أمدرمان يكون في كافوري)

يا سلام واصلوا بهدوء وبنفس الروح المرحة ..

مودتي الحبيب محمد ..

يا قريبى على
انا ذاتى زول ضهارى
العاصمة دي بشوفها طشاش طشاش

ابننقا أو على
حكى لى صديق عزيز من امدرمان قال نحنا أطفال صغار جينا من امدرمان الخرطوم رحلة
دخلنا حديقة الحيوان والمتحف القومى القروش خلصت مشينا دخلنا داخلية جامعة الخرطوم
كلمنا طباخ قلنا ليهو دايرين اكل
قال جاب لينا غطاء حله المونيوم كبيرة فيها فتة ورز ولحم وملاح
قال قلت ليهو ادينا الاكل بطريقة محترمة
رد الطباخ
محترمة ايه يا مشردين يا اولاد الكلب

الصديق العزيز الأديب عثمان حامد
من اولاد امدرمان
مرة قال لى
اها النيل ذاتو من اولاد ام درمان

غايتو نحن في كوستي حكاية تقول لي زول خرطومي دى نبذة وكما قال حسان بن ثابت لسيدنا عمر
وسلحنا فيه

ههههه والله ناس كوستى ما هينين نحنا عرب الجبل لمن الواحد يكون شاكى القميص بنقول ليهو اها يا فلان ماشى الخرطوم

Quote: ههههه والله ناس كورتى ما هينين

عوض كورتي ؟


محمد تعرف لو ما ناس ام در و استنارتهم ...

ناس بدر الدين ديل كان لي يوم الليله يقولو للبيض مِح ...

ههههه

بوست جميل ياخ ... خلي يطلعوا زيتهم ...

يا حفيظ الكتابة من الموبايل مشكلة تكتب كلمة يخت ليك واحدة تانية بمزاجو

ساعدونا فى الذبح الشرعى

سلام محمد سيد أحمد
أمدرمان خليل فرح وعلي المك - رائعة ومبدعة ومنفتحة ....
أمدرمان التي أسسها وبناها - أبناء الأقاليم والتي-أكثر رموزها وأعمدتها الثقافية -أكثر لم يولدوا -بالبقعة - أمدرمان هذه بوتقة وحاضنة ......
أمدرمان أو العاصمة التي وفد لها الناس - بالبقجة والجُراب وشنطة الحديد - وشقوا الصخر بعصامية وتفاني وكونوا ذواتهم وعلموا أولادهم وبنوا الحيشان المديدة -أمدرمان هذه
محل تقدير ----
أما أمدرمان بعض أبناء وأحفاد -بعض العصاميين الذين نزحوا للعاصمة وإستقروا بها فلم
يكونوا في عصامية الأباء وقوة عزيمتهم وجهدهم - وحبهم للعمل فقد ركنو للكسل والإستسهال وضاقت بهم الحيشان ونضب ميراث الأباء - فعلقوا شماعة فشلهم علي النازحيين الجدد رافعيين شعار الجوة والبرة وتحولت أمدرمان خليل فرح الوهيطة لإنغلاق ولجهوية متكلسة - ولقبلية جديدة ولتعالي أجوف ونستولجيا -لزمن مضي صنعه الروادمن النازحين وسهلته مجانية التعليم والصحة وقطعة الأرض السكنية شبه المجانية لكل مواطن -وجودة الخدمات العامة وهو إمر إنتهي وأنزوي .....
-
تعالي وتنطع وتعالم - وإستبدال عنصرية القبيلة بتعنصر جهوي سلبي !
أمدرمان بهذا الوجه والسمة مقيتة ومتعجرفة بعكس أمدرمان خليل فرح وعلي المك البوتقة والتلاقح والإنفتاح,, المحبوبة - والمعشوقة التي أجزم أن محمد سيد أحمد يحبها كمدني وعطبرة والأبيض!
* الحقيبة نمط فني ومرحلة ومحطة هامة - لها ماقبلها - لم يبدأ به الفن ولم ينتهي بل تطور
-مرحلة غنية وثرية لها عشاقها ومحبيها وقد إزدهرت في فترة طفولة وبواكير شباب أمدرمان
- لذا من الطبيعي أن يتم التعلق بها-
بس يامحمد سيد أحمد - القضية ليس في القيمة الفنية لأغنية الحقيبة -وإنما في دلالاتها الوجدانية للمتلقي - أنا مثلا في مجال المديح توقفت عند محطة أولاد حاج الماحي - دي حقيبة فن المديح عندي - فالمسألة فيها الذوق والإرتباط - القديم منذ الطفولة

شكرا
كمال على هذه المداخلة عالية القيمة
امدرمان الوجه المشرق العاصمة الوطنية وجكسا ومنزول وإبراهيم عوض و على المك وشرحبيل وعبد الخالق محجوب ومنصور خالد والإذاعة والمسرح القومى
بلا شك لها محبة عظيمة


فن الحقيبة بلا شك شكل وجداننا لغة وكلمات والحان
ولكنى اتوقف امام الحظوة والتدليل الذى تحظى به

مادي الاشكالي يا كمال
اي شي في العاصمة
واي شي للعاصمة
الفنان واللاعب والاديب وغيرهم قبلتهم الاخيرة الخرطوم
حتي الاطباء والمهندسين والمحامين يتعلمو في الاقاليم والبنجح فيها بمشي الخرطوم
الرأسمالي ايضا
التوزيع غير العادل للتنمية والثروة والصحة والتعليم
امشي اي مدينة سودانية غير العاصمة بتلقاها صفوتها من كل المجالات تنزح نحو الخرطوم
مثلا كوستي لا توجد اماكن ترفيه فيها الا ستات الشاي علي شريط السكة حديد
مسرح ولا سينما مافي
علاج مافي تخصصات دقيقة ولا فحوصات دقيقة
التعليم الجامعي جامعتنا ينقصها المعامل
عشان كدة حتظل الخرطوم تتقدمنا جدا

مشكلة كبيرة يا حفيظ تدهور حال المدن السودانية
٣٠ سنة الكيزان دمرت اقتصاد المدن
مدنى ما أصبحت مدنى بعد تدهور مشروع الجزيرة
وكوستى ما بقت كوستى بعد تدمير النقل النهرى
وعطبرة بعد السكة حديد تغيرت
وحلفا الجديدة بعد تدهور المشاريع الزراعية


فكرة جون قرنق العبقرية كانت بدل ترييف المدن
نعمل تمدين الريف
والهجرة تصبح عكسية من المدينة للريف

تحياتي أبو سن.حين زرت كوستي قبل اكثر من عشرين عام كانت لا تزال شامخة كمنارة وسط البحر. النهارات مضيئة و مشمسة علي شاطئ الأبيض النيل. تشتري الدكوة و الشطوط و السلطة من تحت النيمة الكبيرة ثم تنحدر مسرعا صوب النهر فتستقبلك رواكيب السمك و الأكشاك تحيط بالمكان كخاتم ماسي بمعصم عروس لم ينقضي شهرها الاول تفوح بعبق الحياة كما البساتين ، ثم تبدأ بالبحث متأنيا عن بائع سمك تفاوضه حول مشروعك الغدائي العاجل، فالخيارات كثيرة و لا تود أن تخرج من مولد الاسماك دون أن تعز نفسك الحبيبة ببياضة او عجل او بلطي نهري صلب الأشواك مفتوح الخياشيم ممشوق القوام ، ثم يتواصل جدل الاسعار. صاحب المسمكة (1) يعلو بالسعر حتي يصل به الي حافة السوبرانو و انت تحلف غير الباص ما عندك ليهو لا باريتون لا تينور و لا حتي مليم احمر و ينتهي الجدال و قد رأيته يرفع لك سمكة من نؤومات الضحي لا زالت من وهج الشمس تتلوي بعد أن انتشلها صياد شرير عنوة من النهر ثم يواجهك بالقول الصراح: بالله عليك الله سمكة ماكنة زي دي كتير عليها تلاتة جنيه ثم تغض طرفك عن محاسنها و تملأ فمك بالكلام كطفل ينطق بحرف الباء للمرة الاولي ثم تقول له بجنيهين اشتريتها و علي مضض يوافقك الرأي فالمال تلتو و لا كتلتو و الجوع كافر و غض الطرف حار خاصة لي واحد قريعتو فاضية زي حلاتي ما ضاق خيرات البحر من سنين حتي تضخمت غدته من فرط نقص اليود ، ثم فجأة يأتيك صوت تعرفه و كأنه يناديك من السماء، لحيبتك يغني ، حسنك بديع معدوم مثالك ، حير عقولنا وصف جمالك، يا غالية يا فرح الحزين، آمنت زيك ما بكون. و انت تقلب نظرك في ذات الثوب العاري التي سلبتها حرارة يوليو قواها فما أقساها من حرارة تستبيح أجساد الفتيات و النساء ، ثم تهمهم فرحا حين تتذكر انها صارت حلالك و لتوك قد دفعت مهرها جنيهين اثنين كاملين و لا زال الجرح بجيبك نازفا لم يتجلط بعد و تدرك حينها انك سوف تدخل بها بعد ان تنتهي طقوس الدخان و التتبيل ، ثم تجدها حنايا الشوق بداخلك منتصبة تبحث عن ذاك الصوت الرخيم القادم يناديك من الفضاء فترتعد حين تعرف أنه الراحل مصطفي سيد احمد يخصك بتلك الكلمات الدافئة و حبيبتك في مشواها الأخير و انت بالفرحة معمور القلب ممدود الحنين . يأتيك صوته دافئا ينطلق من علي متن باخرة نيلية ترسو علي ضفة النهر تنتظر الاذن برحيل قد يطول و قلبها بعشق عروس النيل يذوب. و قبل أن تغادر المكان لتقتفي أثر الصوت خطوة بخطوة و ايد علي ايد ستجد حبيبتك بالزيت جبينها يندي فاغرة الفم تنادي، ها قد اعدوني اليك فلتهنأ بغداء صحي و لا عزاء لنيل يترك الشباك تعبث بشاطئيه دونما رقيب ، و من غير ما أشعر أجدني أدخل يدي الي جراب الحاوي الذي أحمل فأتحسس خيرات شجرة البركة التي انتقيت منها الكثير ، هذا فحل بصل و هذه خصلاته تتدلي كريش طاؤوس فتي مغرور ، و هذا صدر طماطماية ناهد يبعث بالرعشة الي جسدك النحيف حين تمسح علي سطحه بباطن الكف ثم تسترخي رغم أنفك علي خاصرة تبشاية قد اسمنها الخريف، اما الجرجير و الخس و الفلفل و الريحان و ملوخية الوادي و ص ع ل و ك الشوارع (2) فتلك قصص مكرورة لن تعني لك الكثير ثم تشد انتباهك حتي يشارف علي الانفصال تلك الازهار الخريفية التي تنمو علي اسطح الجدران ، ثم تذكرت حبيبتي التي علي الصحن تغفو ، ما خلاص العرس حصل تاني الشفقة لي شنو، و قبل أن انقض عليها سائل اللعاب محمر العينين اتوحوح جاري المناخير، قفز في ذهني مشهد العرض السينمائي للدور الثاني و سوف لن تهتم انت كثيرا ان كان الفيلم الذي ينتظرني هو الباطنية ام شادر السمك ام وكالة البلح ، و علي سيرة البلح انتصب أمامي حي الرديف بكامل جالوصه و تشققات أرضه و شوارعه التي قد هندسها بناء فاشل علي خطي حية تزحف و أنا أجد لها العذر لكونها لا تستطيع المشي علي اربع او حتي علي اثنتين و لكن لا عذر لمن اتخذها مسطرة T يخطط بها لنجاحه غير المأمول ثم من فوق حائط صغير أمة من الثمالي يتحلقون حول راقصة ناهد تبيع الهوي لمن يبذل لها العطاء، و اللي ما يشتري يتفرج و انا خارج الحوش انادي يا بلادي، لا نظرة عن قرب أصبت لا لمسة لا همسة و لا شراء، فمالي و البيع و الشراء و انا الذي لا ازال طالبا في كليته يتأوه ينتظره بؤس الحياة العملية و التخريج ، ثم فكرت قليلا بمصيري قبل هؤلاء الذين بحب الكأس يهيمون ثم ترنحت سائرا لا اعرف ان كنت راكضا او مسرع الخطوات ابحث عن أمل اتشبث به، ثم سألت نفسي كيف سيكون حالي عندما اتخرج من الجامعة ؟ لعلي أصير مثلهم او اسوأ حالا ربما ، فلا أمل في هذا الوطن يتراءي و لا بصيص نور في الافاق يلوح، ثم للحظة تملكتني هذه الفكرة و صارت تتضخم و تكبر و كل الذي اسمعه هو التخرج ، التخريج، الخريجون ثم وقفت عند هذه الأخيرة عندما لطمتني علي وجهي انوار دار الخريجين تناديني أن مرحبا بك ايها الزائر الغريب فأمعنت النظر من الجانب الايمن للباب فإذا شباب أنيقون و شابات و موسيقي و وتريات و اورغ و كمان وعثمان بشري يجالد الشعراء بالكلمة و الحرف و المعني و النغم، فيخرج من شيط الازقة الي بيوتات الحوش و القبيلة ثم يخبرنا عن التوسد و التوسط و التوهط و بيع الاحتمال و أقسم صادقا لو أن كوستي و دبة فقرا و الجزيرة أبا و فرانكفورت لم يقدموا للجالوص محارا سوي ابن بشري عثمان لكفانا ذلك و زادنا من الفضل و الشعر بيتين. مالي أري العيون ترمقني بشوق اللاهث المتعطش كي أروي لها عن حسناوات كوستي رجزا و شعرا و نثر و أنا الضيف الوفي لست همازا و لا لمازا و لن أخون و لا يروق الكريم اذا طاف بالدار ان يحكي الا عن جمال الشمس و ضفاف النيل و ما أغلق الناس عليه ديارهم فهو حرم امن لا تستظل به الاسافير و لكن الجمال جميعه استقر ها هنا عند التقاء الباخرة بالقطار ثم قفزت دون وضوء الي مقعدي حتي لا يفوتني موعدي اذ دقت ساعة الرحيل و برغم انو المفارق عينو قوية و لكني لن أحكي لكم عن جمال كوستي عروس النيل حتي لا افسد عليكم روعة الفيلم فما ينتظركم من الفرح لن يكفي لتعبئته فخار او جوالات و اكياس و زجاج فقوموا الي فرحكم مثني و ثلاث و رباع و ان عجزتم ففرادي و لكم علي شاطئ الأبيض النيل متسع من الفرح ينتظر و إن كان القطار لا زال يلهث راكضا علي قضيبين من حديد فكوستي وجهة من يبحث عن استجمام و حياة مشرقة و راحة بال و الا فالنهر أحق بجمال ضفافه و المشتهي الحوت اموت.
1- المسمكة ملحمة السمك
2- ص ع ل و ك الشوارع زهور برية

التعديل بسبب ازالة الكروسات من كلمة ص ع ل و ك

سلامات سيد mohammed said ahmed
قالها أحدهم ذات مرة و هو يمسك بخصلة شعره ، أنا جعلي عمرابي من أب روف و قاري جامعة الخرطوم. الزيي منو ؟
لكن بعد دا كلو احبابنا ناس امدرمان و كلو يهون عشان عيون خليل فرح اللامي التلاتة بقرات السودانية المقدسة كلها في شخص واحد و مزيد.
مصيبة ناس امدرمان انو في ناس من الخرطوم و حتي الآن ما قطعوا الكبري عشان يشوفو الشاطي الغربي حاكمو المهدي و للا غردون.
طبعا في الحتة دي الأمدرمانيين و المصريين بتلاقو و كل بحب ليلاه يهيم. لكن برضو نرجع و نقول ما أعز من الوطن الا الوطن و أم درمان بي ناسا و دار رياضتا و عوضية سمك و الدايات في العين و الخاطر و كفاية علينا صدي الاذاعة و قبة الامام و الطابية المقابلة النيل و انا العافية البشد الحيل و لشهداء أم در نتضرع بالدعوات.

Quote: مصيبة ناس امدرمان انو في ناس من الخرطوم و حتي الآن ما قطعوا الكبري عشان يشوفو الشاطي الغربي حاكمو المهدي و للا غردون.

يا وليد.

في ذمتك في زول من الخرطوم بكون مشتاق لي زي كلامك ده؟

دي الخرطوم. محل الرئيس بنوم والطيارة بتقوم.

Quote: مثلا كوستي لا توجد اماكن ترفيه فيها الا ستات الشاي علي شريط السكة حديد مسرح ولا سينما مافي

غايتو انا كنت برفه في كوستي زمان ... ما بعرف هسي مالكم ...

ذكّرتني يا محمد بواحد من ناس "الحِجير" مع كامل الاحترام لهم،

قال ان الرئيس الامريكي من قريتهم..

قالوا ليه كيف الكلام دي؟؟

فقال ان الرئيس الاميريكي من " Little Rock ه

هههههههههههههه

يا خواض
ترامب من الحجير
ونيتنياهو من الزومة

هههه الشوايقة يحكمون العالم

دا زمن كوستى راقية وفيها بارات

يا يحيى

تحياتي مستر دينق.
طبعا حكاية انو في ناس في الخرطوم ما شافو امدرمان دي ما كنت مصدقا لكن صادفت مؤخرا أسر ذكر بعض أفرادها أنهم لم يزوروا أمدرمان علي الاطلاق و لما سألت واحدة منهم قالت البوديني أمدرمان شنو و كل شي عندنا في الخرطوم و بالجانب الشرقي من الوطن الحبيب هناك سودانيين من بورتسودان سافروا الي العديد من الدول و لم يزور أحدهم الخرطوم و عندما تساءلت عن كيفية ذلك ذكروا لي أن لهم رحلات جوية من بورتسودان الي جدة ، و بحرية الي كل موانئ الكون و دون الحاجة للسفر الي الخرطوم. أما نحن أهل الأقاليم فلا حدود لنا في التجوال و يقف أحدنا حين تنتهي نقوده فيغلبه المسير ابتداء من الجد الاول الذي جاء حاجا من نيجيريا فطاب له المقام و عندما جاء القطار تركنا ديارنا فرادي و جماعات و تنقلنا في كافة مدن و قري السودان طالبين للقمة العيش و حياة مدنية مستقرة ننعم فيها برغد العيش و لخيبتنا ان ما طلبناه معدوم في وطننا من حفائرها و ابارها حتي أعلي قمم السلطة و الحكم فيها ثم تهنا نتخبط في مهن هامشية لا تسد الرمق و ما جمعناه بعد عناء منها ندفع الكثير منه رشاوي للمتحصلين ثم وجدتنا فجأة نكتشف سر الكون الكامن وراء البحار و يا دياسيورا جاك جن راكب سمبك ، لانش ، باخرة ، سفينة او كل ما يطفو علي سطح الماء من كائنات مسافرة و حين يغلبنا الحنين نأتي لنستريح في مثل هذا الاسفيري السوداني الجامع فيحدثنا الناس عن أوطانهم و لا وطن لنا نذكره سوي دهشة ترتسم علي حواجبنا حين يبدع الاخرون في وصف المكان الذي اليه ينتمون و فيه يهيمون عشقا كصوفي أعياه الغياب و لا زال لمولد المصطفي مترقبا ينتظر.
بصراحة بصراحة و بصورة شخصية لا زالت هناك اماكن بالخرطوم أرهبها برغم تنقلي بين مدن و عواصم عديدة بهذا العالم المجنون لكن خبايا الخرطوم دي عاملة زي لما الواحد يقابل الزول الكان بقلع منو الفطور في المدرسة و لا يهم كم هو عمرنا الآن فتلك الرهبة سوف لن يطويها شيب او حنية ظهر او رجفة ايد ، هكذا هي الخرطوم بالخاطر و يا للعجب برغم ما يكسبه أحدنا من دولارات العم سام الا أن الأصفر الممنوع المرغوب تاكسي الخرطوم ظل عصيا علي عالمنا لذلك يشتري أحدنا سيارة ، يستأجر او يركب أمجاد و لكن الأصفر الغالي متروك و قد حزنت كثيرا لما رأيته من هزال جمعي ترتسم عيونه علي ملامح تاكسي المطار فقلت لأخي ممازحا و الله الواحد حقو يسيبك و يمشي يركب تاكسي عشان يقول لي أصحابو وحاتكم جيت البيت بي قارض الجنيهات تاكسي المطار. أما أندية الخرطوم فقد كانت بالنسبة لنا كمساكن طاقم السفارات الأجنبية لا مجال للوصول اليها الا باكتساب لغة ثانية و ثالثة و شعر أشقر و عينان زرقاوين و هكذا كانت تصورها لنا الحياة و حي الله قدرنا ندخل منها نادي الضباط و لو ما ود الأمين رائد الكلمة و النغم لما تجرأت عيوننا الريفية للنظر الي بزات العساكر ناهيك عن الدخول الي دارهم لأجل اللهو بالموسيقي الصاخبة و فوضي الانغام.

سلامات يا محمد
مالك بقيت تهابش فى التابوهات ههههههههه
بالمناسبة البيحكيها د.عصام المجمر ما فرن .. هى مجرد طاولة عيش كان بشيلها
عمه يمشى بيها أمدرمان لما كان شغال مع بابا كوستا

صديقى عباس
بالله المجمر عامل لينا فيهو جدو مستثمر ورجل أعمال وهو صاحب طاولة

يمكن الكلام دا رد من ناس امدر باشمهندس الصاوى وباشمهندس ازهرى بعد كلامو عن ام در

شكرا وليد
استمتعت بمداخلتك
والهجرة والانتقال من بدء الخليقة اظنو سيدنا ادم ذاتو كان هاجى


دراسة بروفيسور منتصر الطيب
بتقول انو الحياة البشرية وجدت فى السودان وشرق أفريقيا
ويقول العرب هاجروا من السودان وشرق أفريقيا
يعنى العرب الرجعو السودان بضاعتنا ردت الينا

يا دينق ناس ام درمان بيفتخرو انهم ما بيقطعو الكبرى
وناس الخرطوم برضو ما بيمشو امدرمان

تصدق انا مرة تعرفتا على بنت مصرية خريجة جامعة الإسكندرية ما شافت القاهرة

سلام يا وليد
الفرحان بى شعرو السبيبى والعمراب
حتجيهو صدمة لو سمع تحليل د منتصر الطيب للجينات
قال قبل أسبوع فى لقاء تلفزيونى بالتحليل الجينى اهلى البقولو عمراب بقول ليهم نحنا ما عرب

خليل فرح قريبنا جمع البقرات الثلاثة مصيره النحر

Quote: نرجسية اولاد مدنى

أستاذنا الامير
الجماعة بقولو Medani Boys
تشوفا عند ناس فلان وفلان في مدني تعمل ليك ارتكاريا
وهو زاتو جاي من قريب صحراء بيوضه وكتااار متوركين ساي ولا نقول متلعبسين.

Quote: دينق أفتكر أنت خرطومي مستلب من أمدرمان لانه دي معلومات الأمدرمانيين القداااام

يا نيو سوداني.

أبد. بس علاقتي مع أمدرمان أيام فترة الطفولة كانت مرتبطة بحي المسالمة الذي كان يسكن فيه الرجل العظيم أستنسلاوس عبد الله بساما. أسرتي كانت لها علاقة قديمة وقوية بهذا الرجل العظيم وزوجته العظيمة أيضا ليلي، وأهم أعتبرهم بمثابة جدي وجدتي، كنا في كل يوم جمعة نذهب ونقضي معهم عطلة يوم الجمعة. أنا كنت أستمتع جدا بالقصص السياسية و التاريخية التي كان يحكيها لنا هذا الرجل العظيم، لهم كل الرحمة والمغفرة .

من ملاحاظاتي في تلك الفترة عن أمدرمان كنت مهتم جدا كطفل بلون التراب الاحمر وبطريقة بناء البيوت. مثلا الواحد يكون ماشي في الشارع فجاء تلقى نفسك دخلت بيت ناس دون أن تدري. أنا هنا أتحدث عن حي المسالمة القديم.

Quote: مصيبة ناس امدرمان انو في ناس من الخرطوم و حتي الآن ما قطعوا الكبري عشان يشوفو الشاطي الغربي حاكمو المهدي و للا غردون.

و الله احد زملاءنا أبناء بحري عندما دخلنا "البقرة الحمراء" واسمه زهير يا( قبة) لو تتذكروه قال هذه اول مرة تطأ قدمي فيها الخرطوم للتسجيل للجامعة!
اما امدرمان بكون لغاية الليلة ما وصلها
تحياتي أبو حميد
يلا احلبهم حلب عليك الله
برضو شوف ليك طريقة لولاد مدني
ان شاء الله جاموسة

سلام محمد قسم الله
المن صحراء بويضة جو امدر ولا مدنى

يا محمد الشيخ
ناس مدنى فى الطريق للمسلخ هههه

يا قبة و وابوالسيد
حكاية كوستي الرديف وعرقي نضيف
وربك المربوكة تنسيك امكا وابوكا
والرنك البريك عرقي و ...
وحذراك من بائين بربر وبارا
وهكذا
ولا مدني رقم 5 لو بتلعب ضمنة وجبت خمسة يقول ليك مدني
ولا سنار بلد النشالين وقصص
دى كلها في ذاكرتنا نحن الشياب ديل وذاهبة لاضمحلال
حسب فهمي
امس شباب الحلة بلعبو ليدو اكبرهم بكون 15 سنة
وسمعت واحد بقول يارب مدني ويكورك مدنييييي
عاينت ليهم لقيتو داير خمسة 😆😅
في شنو
تابهواتنا دي لسة عليها شوية

تواصل أجيال يا عبد الحفيظ

سنار عرقى موية نار

المدينة التى يولد بها وينشأ الإنسان تظل خالدة الذكرى ويتوجها اجمل مدن العالم

أذكر طرفة
كنت اكتب عن الجزيرة الساحرة النائمة فى حضن النيل تحف بها أشجار النخيل بلدى جزيرة نلوتى

حتى القمنى السكتاوى الصديق عثمان عامر حجرا وقال لى

بالله يا محمد انت من نلوتى تلك الجزيرة الصغيرة التى يتعالى عليها أهل عبرى الفقراء

Quote: المن صحراء بويضة جو امدر ولا مدنى

مرحبا يا محمد سيد احمد
تعليقي عن Madani boys أولا مدني السألك منهم فوق بدر الدين الامير..

زمان عندي مقال إسمه امدرمان مدينة بلا تاريخ اتنشر في جرايد الخرطوم إتردمت فيهو ردم غرائب الإبل.

يا محمد
جيب المقال هنا أصلو بوست للربا والتلاف

عشان كدا قلنا بقرات مقدسة
السودانيين أصلو ما بيرضو فى التلات المدلعات ديل

Quote: جيب المقال هنا أصلو بوست للربا والتلاف

محمد سيد احمد
داير تعوِّقنا مالك ياخ والدنيا صيام
يقومو يجو الجماعه يتشالبونا ساي
بتعرف يتشالبوك بلغة ناس مدني معناتا شنو؟؟ هههههه

يا محمد
جيب المقال هنا أصلو بوست للربا والتلاف

عشان كدا قلنا بقرات مقدسة
السودانيين أصلو ما بيرضو فى التلات المدلعات ديل

يا سلام يا وليد
قطعة أدبية هذا المديح العالى لحسناء المدن كوستى

لكن يا اخوى سمكتك اسالت لعابى وانا صايم

سلامات محمد سيد احمد.
بوستك جميل و ملائم للخروج من ملل هذا السجن الكبير الذي فرضته علي الناس كورونا فصار الانترنت هو عالمنا الحقيقي الذي نحيا به بعد أن كان افتراضيا و لزمن قريب.
اشكرك

Quote: امس شباب الحلة بلعبو ليدو اكبرهم بكون 15 سنة وسمعت واحد بقول يارب مدني ويكورك مدنييييي عاينت ليهم لقيتو داير خمسة 😆😅 في شنو تابهواتنا دي لسة عليها شوية

هههههه
استغفر الله .. اللهم أني صائم ...

سلام وليد مع الحبسة
ما تحرمنا من كتاباتك الجميلة

حصل يامحمد سيد أحمد
خلي بالك زول قدور قري بوستيك دا !
قال إنو الحقيبة والغنية الحديثة حقت كل السودان ما الوسط والمركز -وقعد يعدد
خليل فرح من صاي يعني لا أمدرمان واللا حاجة ! ووردي من حلفا ومين كدة من كردفان وبربر الخ وقال تاني ماتقولو غُنا
الوسط,,

ايوة يا كمال
باين بيوصلو لقدور اخبار سودانيز
لكن استهبالو قال خليل فرح من الشمال وبازرعة من الشرق
وهؤلاء لم يعترف بهم الا بعد انتجو غناء بذوق وأسلوب الوسط

نوع الاستنكاح دا عملوا ناس السفارة السودانية فى صنعاء عينو الجالية وقالو دى جالية قومية ممثل فيها الجميع ممثل للمدرسين وممثل للعاملين فى القطاع وممثل للقطاع الخاص
وكلهم أعضاء فى المؤتمر الوطنى

شعراء الحقيبة قدموا أشعار جميلة
نوع الشجر أقلام والنيل مداد
وكثير من الشعر المبدع


برضو يمكن رؤية جانب آخر سلبى وهو الوصف الحسى


حتى ان احد الظرفاء قال
شاعر الحقيبة زى الجزار اول ما يشوف امرأة يبتدى يقطع

صدر صدر صدر
نهد نهد نهد
ردف ردف ردف

سلام محمد قسم الله
خت الرحمن فى قلبك وخش

ما يشلبونا

ما تكون الشلب بتاع كلام الشباب