الفرق بين ترامب الامريكي وترودو الكندي،،

11:17 PM April, 08 2020

سودانيز اون لاين
امتثال عبدالله-NYC - USA
مكتبتى
رابط مختصر

تحدث مع خالتي التي تقيم في كندا وقلت ليها ان ترامب الرئيس الطيب حيسلفنا ١٢٠٠ دولار
نرجعها ليه بعد مصيبة الكرونا تنتهي ،،
وردت وهي بتضحك :والله فعلا رئيسكم طيب وقدر ظروفكم الصعبة في زمن الكرونا ،لكن شنو
رايك انو رئيسنا ترودو ادانا ٢ الف دولار ، وتستمر هذه المنحة شهريا ولمدة ٤ شهور ، وان المنحة
دي ما سلفية ، يعني ما حنرجعها للحكومة بعد الكرونا ما تنتهي،،
طبعا انا استغربت وما صدقت وقلت ليها واحتمال بعد الاربعة شهور يمكن يمد الفترة لاربعة شهور ثانية،،
..يعني انتو حتتمنوا الكرونا ما تنتهي ولا شنو !!قالت لي كمان ما للدرجة دي ، افظع من الكرونا دي نحن
ما شفناها في حياتنا ،،،حبسة البيت قربت تجننا ،،،،
...وقلت في نفسي فرق كبير بين ترامب الامريكي وترودو الكندي،،،،هذا هو العدل وهذه هي الانسانية ،فاغلب
الناس محظورة داخل البيوت ودخلها انخفض او قل انعدم ، والكثيرين فعلا يحتاجون للمساعدة المالية العاجلة
لدفع الايجارات والفواتير ،،،،
اللهم ارفع وباء وبلاء الكرونا عن العالم ،،،

سلام امتثال خالتك بتستلم بالكندى وانت بتستلمى بالامريكى التسمية واحدى لكن الامريكى
اقيم من الكندى يعنى بالبلدى كدى انت فلوسك اكتر ولا شنو ههههخا
تحياتى

صديق الانصاري
حتى ولو قروشي اكتر ، دي سلفية ولازم نرجعها ،،،وما تنسى هي لمرة واحدة فقط
ولمن يجي وقت السداد معظم الناس ما حتقدر ،،،وفي فرق بين السلفية والمنحة التي
لا ترد،،،
ومش كده وبس ترامب بيفكر ينزل الناس الشغل ، وقال ما ممكن عشان الكرونا اقتصاد
امريكا ينهار ،،وقال لازم الناس ترجع الشغل باسرع فرصة والشركات تبدا تشتغل حتى ولو
مات الملايين ،،
ترامب يا صديق ما بيهموا الناس تموت ولا ما تموت ، همه كله اقتصاد ..اقتصاد..مال،،وبورصة
لانه عاش حياته كلها وهو بيجمع في المال ،،،

مرحب الراكزة امتثال العبد الله
دي صورة جاتني من صديق في الواتس
فرق كبير بين رئيس كندا و المعتوه التاجر ترامب

https://www.0zz0.com

ترووودو دة ياخى ملك الانسانية
يا جماعة طمنونا على ابورهف

سلام يا جماعة و طمنونا عليكم من بُعبُع ( الكورونا فوبيا).
بس جاستن ترودو دا حاجة تانية خالس ، دا بس ناقصاه كلمة
التوحيد:"لا إله إلا الله " زي بتاعت نيوزيلاندا. و سمعنا قالوا كمان
ساكن في بيت جالوص شعبي و بمش الشُغل بي عجلة . فياريت تقولو
لجماعتنا الحايمين بهناك لو واحد لم لينا فيه في زقاق بس يهديه لينا
للإسلام و " لأن يهديِ بك الله رجلاً خيرٌ لك من حُمر النِّعم".

امتثال كيفنك وطمونونا على السودانيين في أمريكا خاصة أن معدلات الوفاة بلغت اليوم وأمس (ألفين في يوم واحد)
وربنا يبعد عنكم هذا الوباء ويفرج هذا الكرب عن كل السودانيين هناك ..
أما بخصوص ترامب فلقد أثبتت لي الأحداث أنه انسان غير سوي
ولا أراه يفرق كثيرا من البشير في هوجته وتركيزه على مصالحه الشخصية
أبقى كتار وأعملوا ليهو ثورة ههههه

عمر التاج شكرا على الدعوات الصالحات..فعلا الحالة صعبة جدا جدا في نيويورك والميادين العامة قلبوها مستشفيات ...وسوريا عدد الوفيات ١٠٠٠ شخص في أمريكا..وعدد الإصابات في أمريكا قربت تخلص نصف مليون والعالم كله مليون ونصف...اما حكاية ثورة دي ..فما عندهم أبدا لان الجيش لا بتدخل في السياسة اطلاقا...ونحن ما وصلنا البلد ديما شفنا لينا جندي واحد ماشي في الشارع...هم في قواعدهم العسكرية خارج المدن والشارع كله شرطة وبس ....وعاملة رعب الناس

الابنة امتثال .. تحياتي الاميرةر
رئيسين في العالم لامثيل لهم
حبيبنا ترودو نموذج انساني لن يتكرر
وكذلك اختنا ميركال الالمانية يا سلام عليها
امس اصدرت قرار بإستضافة 500 طفل سوري من معسكر اللاجئين في اليونان
في بشر خلقهم الله رساليين نموذج للانسانية بغض النظر عن دينهم ومعتقدهم
ولا ننسى زيارة اوباما لقرية في لاوس بها ملايين القنابل من أيام حرب فيتنام
جالس معهم في الارض بكل تواضع

تحياتي الاميرة وباقي الاميرات
الله يحفظكم من الكورونا

الأبنة الحبيبة امتثال

ما تصدقو ترمب، بعد شهر يقول ليكم ارجعو

اشتغلو و رجعو لي السلفية الأديتكم ليها بفائدة

عشرة في المية.

ربنا ينجينا و ينجيكم من الكورونا.

الحاجة الغريبة يا نعومي هو وقف فائدة البنوك والقروض، أي وقف الربا ، لفترة غير محددة
لغاية ما حكاية الكرونا تنتهي، ،،ونحن طبعا بنتوقع لمن يقول رجعوا السلفية بيقول رجعوها
بفائدة ٢٥% وليس ١٠ % فقط، ،،لأنه مرابي كبير....
...والله يبعد عنكم شر الكرونا

المواصلات مجانا في نيويورك
وأصدر عمدة نيويورك قرارا بان تكون المواصلات ، بصات وقطارات مجانا...
ده قرب يحصل رئيس كندا

بس زول حيطلع من بيته يركب مواصلات ما في ...