سودان ما بعد الكورونا

الشعب وحده، وتحت رعاية حكوماته هو من جعل السودان في آخر قائمة الدول الأكثر تقدما وتنمية ورفاهية وتطورا.. والحظ وحده تحت رعاية القدير، هو من جعل هذا البلد في آخر قائمة الدول الأكثر إصابة بفايروس الكورونا..
هذه الذيلية الأخيرة أصبحت حلما تنظر اليه الدول المتقدمة صناعيا وتكنولوجيا وحضاريا، ولو أن الفرصة سنحت اليوم لأي رئيس أوربي ليكون مواطنا عاديا في السودان حتى تمر هذه الأزمة لسعد بذلك، ولذا علينا استثمار هذا الظرف لايقاظ هذا المارد الطيب.
الوضع الاقتصادي لن يكون كارثيا اذا أحسن وزير المالية والاقتصاد قراءة الموقف، الانتاج الزراعي والحيواني سيكون ملجأ العالم بعد الكورونا، وهذا ما يجعل السودان قبلة الانتاج والاستيراد اذا انكفأ على نفسه ونبش العزيمة من أرضه ومائه، أسعار النفط في أضعف حالاتها، وهذه فرصة تاريخية لمضاعفة الجهود وتحسين مؤشرات الانتاج المحلي، ومع تقارب الأسعار المحلية والعالمية يمكن رفع الدعم بالكامل عن الوقود والخبز وزيادة المرتبات لأعلى حد ممكن، المعونات الخارجية ومؤتمرات المانحين ستصبح حلما بعيد المنال، وعلى الحكومة التوجه نحو شعبها وارضها ومواردها المحلية لتكون بداية الانطلاق والهبة، المساومة في العلاقات الدولية والمياه والحدود ستكون في صالح الدول المعافاة، وعلى الحكومة إجادة اللعب على هذا الوتر تحت هذه الظروف، العقوبات الأمريكية والدولية لن نجد فرصة لازاحتها أكثر مناسبة من هذي ؛ وستكون المهمة أسهل لسفاراتنا بالخارج لاداء هذه المهمة من غير سفريات المسؤولين ووفودهم المتكررة، الشركات الصناعية الكبرى ستبحث عن بيئة بكر معافاة وعمالة رخيصة، ولن تجد افضل من السودان، التعليم والبحث العلمي لا يتطلب أكثر من بيئة طاهرة معافاة وعقول صافية وعزيمة راسخة ورعاية ولي الأمر، الوضع السياسي لا يحتاج لأكثر من ديمقراطية شفافة نزيهة، وعدالة في توزيع الفرص واستغلال الطاقات بعيدا عن التحزب الأعمى والتكتل الخبيث..
كل هذه المؤشرات تقول ان سودان مابعد الكورونا سيكون غير اذا احسن الشعب وحكومته استغلال الفرص.

● ود التاي بالله تسمح لي أقول ليك قوم لف كدي و لا كدي.
عارف ليه؟ أولن حاجة لأنك بتستفزني عديل كدا بتلاتة أضاد
مشاعر مختلجة : الدهشة ، الواقعية الفائقة و عنصر التشويق .
يعني بالعربي الفسيخ كدا زي" الليل و القمرة ضدين و اجتمعو"

● فدحين قت لي ما بعد الكرونة و كدي ، آء؟ طيب ياخي
قول ربك يجيبو قوي ، عشان يكون في سودان أصلن للزمن داك.

● و مع ذلك فلا تتناطح ثورتان( من أنثى الثور ) عشان ما تفهمني
غلت و تجوط اللختساسات. فلا يمنع حالنا المايل دا إنو فعلن لو إننا
أحسنا استغلال مواردنا الطبيعية ، ممكن نعمل طفرة جينية مرتن
واحدة إلى مصاف القِوى العظمى . و ليس بعيداً عن الأذهان لامن
في مؤتمر دولي لبحث تحديات الحباة على متن دربةالتبتنة اختارونا
رابعاً لثلاث جهاتٍ هي ( أستراليا + البرازيل + كندا) من يملكون مفاتيح
الحل في البل لأزمة ندرة الطاقة المتجددة ؛ دا لما لدينا من (بوتينشيال)
لوفرة الوقود الحيوي المستخلص من تفافة مدغ (العنكوليب) و مولاص
قصب السكر ؛ و برضو من خماير فضلات تانية ماليها داعي ، فنجليها
رافةً بذوي أرانب الأنوف الرهيفة.
● ثم ياخي ماشين بعيد لشنو، م ياهو عند مسلن عرقينا
(كرستال البلح) و سورج المريسة الواحدة ؛ طلعت دي كولها
من أقوى المعقمات و المضادات الحيوية الواقية من أبو أهل
كرونة ظاطو . أقول لبك حاجة:(أرقد آ عيش أنا جرابك)!!

أيواااا تليك !
انت كده يا ود الاصيل جبت الرايحة من خشم الثورة
(انثي الثور عشان مافي زول ينطقها بقرة، ايوااا تليك دي زمان كنا بنقولها كتير، بس لشنو ومعناتا شنو ماعارف، المهم... )
بالنسبة للمجال الصحي انا اتحاشيت الحديث عنه لانه لسه ما اتضحت معالمها من ناحية الكرونا، نحن شعب موبوء بالملاريا والدسنتاريا والكوليرا وأمراض ما انزل الله بها من سلطان، أمراض انقرض فيروسها في كل دول العالم المتحضر فلا تكاد تسمع بالملاريا الا وتتذكر السودان وما جاوره، ونحن حواضن للفيروسات الصغنتوتة دي بس، نحن حواضن ومتعايشين مع حاملات هذه الفيروسات والبكتريا والاميبا وحشر أولئك جميعا من ذباب وبعوض وجندب وخنفسان.. نحن المستشفياتنا الكبيرة عاملة زي شفخانة جدي امحمد لما كان بسوي جبيرة (الطاب) ويعالج الغضروف بالحبل والاسهال بالقرض والحلبة..
َرغم ذلك اقول ان المستقبل أمامنا اذا ختتنا هذه الكورونا وخلتنا في حالنا.. إذا جاتنا فالروب كال حماد، وإذا استمر الحال على هذا الطهر والنقاء السماوي علينا فالسودان سيكون مصدر الدواء والعلاج، والدواء ده انت قايلو شنو يا و الحيشان، مو حبة قرض مجروش مع شرشة صفقة نيم مع شوية مسحوق عرديب في كبسولة، وامال انت قايلو مر كده ليه؟ الخواجات يخموا في حاجاتنا المحلية دي ويموصوها في فتيل ويصدروها لينا على اساس انها دواء ملاريا ولا دسنتاريا، الميكروب يضوقها ومن مرارتها يجيهو هبوط واسمك ويروح في داهية، ونحن لو جربنا مدغناها من امها ياها نفس النتيجة..
ونواصل.

● نواصل، و لا أيواتلك يا ود التاي عاوز تجرجرني ياخويا جرجرني ،
ما عشان بقول ليك أصلن بناكل شنو عشان ما تجينا (جضمارة) كرونة
من أساسو. تلقاك في بالك حاجات بعينها جاهزة و داير تجريها على لساني.
دي تكوسا عند الغافل . بالموناسبة و في رواية لأخونا عادل القاسم ، قالو
من عجايب تهربنا من الضرايب ، عمن لينا شدت ما عصر على حبشية
خدامة عندو ، لامن خلاها تصوم الاتنين و الخميس و التلاتة البيض
گمان عشان ما تاكل تلاتة وجبات. علا ممكن بس أديك خيارات
و تاني تخمن براك. و لا أقول لك قولة؟! بديك مواصفات
و أعراض محددة لمرض الجلودية:
©إنو أهلنا الغبش الجلود هؤلاء، من شدة حرصهم على سلامة جيوبهم،
قبل صحتم، تلقاهم عايشين على الطبيعة. يعني يأكلون من خشاش الأرض
كما تأكل الأنعام ، بل هم أضل سبيلاً. فمثلاً الواحد ممكن يسلق ليه حتة فخدة
من أوراگين أو(دفرنش) نملة أو أصابع بعاوضة، يعمل منها رشوشة، مسلوقة
مع ود الواطة، (نظام مشروم و گدي) و لا معشوقة بي تورتار ويگة جروف .

∆ تنطبخ الخلطة على نار خَدرة و هادئة بربطة بصل كلاب ، و عليها قدحة
زيت خِروِع، و الگاتولة حوتحات جردقة تراب . يقومو بعداگ يتبروها ليگ
بتلاتة ( گيزان ) موية غلاد الواحد رقبتو السيف ما يدليها من ترس الحقنة؛
و التحلية صفق نيم و قرضة تحت اللسان، و الشاي طبعن مدنگل و مقنن
بشوية لبن حليب من شدر العُشَر. فبالله شنو رأيك في وصفة أبلة نظيرة
دي ؛ اقتصاديةلامن ملح دي. و أجدع شيف ولا أسامة السيد ما يظبطا.

Quote: بصل كلاب

لا حولاااا
والله انت زول حبوب خلاص
رجعتني لي زمن الجنابية والسعدة والدفرة والسيكران..
وكمان مصطلح لبن العشر ده ذكرني ايام ابحاث الصبا..
وانا طالب في المتوسطة كنت بعمل خلطات كيميائية غريبة خلاص
استاذ الكيمياء فاتح لي المعمل، وانا اشيل وادسدس واصرصر
ولما امش البيت افتح معملي الخاص وابدا اصوت.. يوم تنفجر فيني خلطة
ويوم أغرق البيت بغاز غريب، ويوم اصنع لي مصيبة زمان جديدة.. والله زمان يا ود الاصيل
اهم حاجة كنت مقتنع بانجازاتي، وإذا صنعت حاجة اول واحد بضوقة أو اتمسح بيها..
لبن العشر ده حاجة تانية الناس لسه ما اكتشفته لعلاج أمراض الجلد والصدرية، السنمكة لأي مرض في البطن، السعادة لأمراض العضلات، النجيلة لأمراض الذكور ة والاخصاب، السيكران مخدر طبيعي، بصل الكلاب مطهر طبيعي، كنت بضع مريته على الجروح وبكره تروح، العرديب والقنقليس والحرجل والحلبة والقرض صيدلية متحركة، كل المواد دي طلعتها ليك من حوض انقاية واحد، ولو مشيت لقدام كنت حا اقول ليك اي حاجة تقوم من الواطة دي أكلها، كان ما ماتت الفيروسات انت ما بتموت بإذن الله..
وجاييك بي مهلة لمداختك الأخيرة التورت تاريخنا كله..

السلام عليكم
اثنان كلامهم (غميس) ود التاج وصاحبة

لبن العشر كان بحذروا منه إلا يصيب العيون
قد يكون به اسيد يحرق العين ومنه أتي المثل
ال ليك ليك لو لبن عشر كحل به عينيك

أيوة تعال لي بمهلة ود التاي و أنا (صاحبك) . هدا لي فاضيلك
و الدنيا أربحا و عقاب شهر . جابنا الدرب نبيع لينا خُرجين دردقو
(تبش) و بتيخ . قامو حبسونا بحظر التجوال. الكلام داك لاطشو ليك
من روحي من بوست هترشة ( غميسة) قديم كان مجمبع هنا بعنوان :
"يا عشمان في الودكة من دفرنش النملة، ترا حرمت عليك الرشوشة".

▪ صاحبي بشير ود التهامي قاللي: يا ود الأصيل ياخ منو هسع
البعرف ليك (ودكة) و لا (رشوشه). أكان لي عبدو و عبضولي ديل
عاملين فيها حناكيش. و ما خابرين شئ و كلامك دا ما فارزين ليك
منو الدقعة. لكن تقولوا لي زول زي حلاتي عندي ذاكرة (حديدة)!!

● قلتالو و الله على رايك يا صاحبي بشة إتا ياكا زولي البترفع
لي كسافتي و تمرق لي النصيحة و بتفهمني بالطريقة الصحيحة .
علا العنقالة ديل مما تلقي الواحد راسو (مقلوَظ) و لا مقودس متل
سرج العجلة وحالق القذع (كَرَيْ ) و راخي صليبو لابسلو سستم
نظام ( أديني حفنة و دردقني في النجلية) مزنق علا يملصوه منو
يسلِّكوه يا الله بمساعدة مزلقات . عامل فيها رايح و أعمى و
أطرش علا بس بكون عارف كول حاجة علا بس بتغترش.

∆ بمناسة البتيخ يا ود التاي لكن عارف، في حاجة مهمة شديد
و نسيناها، كان قلتها لصاحبي بشة زمان في الراكوبة و ضحك لامن
شرق. حاجة عن (بُجَّان البتيخ).كان ناس أبوي ببيعو الخدار في ملجة
ود مدني أيام أهلك ناس كمير العوضية ،السفالة الجو احتلو بلدنا
ديل ، ياخ ناس بابكر سالم أبو سنون و الخواضو إبراهيم طلب.

▪ ففي يوم كدي، بعد ناس أبوي لمو أيرادم و ميزوه طب صروه في
جيوبم ،مشو ضربو عشوة مدنگلة صحنين فول و جقاجق عند أبو ظريفة
واتراوحو الملجة، هجسو رقدو. بلا يجي ليك نشال ساري الليل من بتاعين
تُلُّب ديل، مو ياهو أب حوفافة، ليه موقلة بالله السيف ما يدليها ، مسمنو /
ود الحاجة يكابس في جيب عمي عبد الله. يلا أبوي وعا بيه و قام فنَّاه ليك
بمركوبو ناشف يجيب التتنوس ، صقعو ناشو في المفيهق. يلا بردلب يا واطة
جاك تكروري و بس قامو ليك عليه باقي ناس الملجة النايمين جضَّموه زين
و جدَّعوه بي بُجَّان البتيخ. و ربطوه لصباح الواطة سلموه محگمة العمد.

أهلين دكتورة اخلاص،

Quote: اثنان كلامهم (غميس) ود التاج وصاحبة لبن العشر كان بحذروا منه إلا يصيب العيون قد يكون به اسيد يحرق العين ومنه أتي المثل ال ليك ليك لو لبن عشر كحل به عينيك

الجنا ده قدر ما ألقى ليهو كتابة خشمي بنعوج وألقى نفسي أتكلم زيو ..
كلامه لو ما دققت فيهو وأعدتيه كذا مرة ما حاتفهمي مراميه وأبعاده
ومرات مرات برمي ليهو كلمات تعيدني لتاريخ ماقبل النهضة العمرية ههههه.
بالنسبة للبن العشر أنا ما زلت أقول أنه فيه أسرار
ومارف هل هذه النبتة موجودة عند الخواجات زينا ولا لا ..
لكن ملاحظتي عن طريقة انباتها وقدرة تحملها وطردها للحيوانات والحشرات إلا نوع معين من النحل
وطعم ولون لبنها وطريقة خروجه من العروق وشكل الورقة يقول أن وراءها سرا كبيرا
..
..

Quote: إنو أهلنا الغبش الجلود هؤلاء، من شدة حرصهم على سلامة جيوبهم، قبل صحتم، تلقاهم عايشين على الطبيعة. يعني يأكلون من خشاش الأرض كما تأكل الأنعام ، بل هم أضل سبيلاً

صدقا لكلامك عندي عما لي زول بهائم زراعة خلا ..
البهيمة عنده أهم من الزول ، ولو واحد ضرب واحدة من بهائمه إلا يسدى فيهو
يوم قلنا ليهو : لو بعت لك كم ناقة وكم خروف واشتريت ليك عمارة في الخرتوم وعربية كان ارتحت في دمك ده ..
قال لينا العمارة والعربية ديل بحسن ؟ (بشعرن ) قلنا ليهو لا
قال بهايمي ديل بفهموني وبفهمن وبعزوني وبعزهن أكتر من أولادي ...

Quote: يا ود الأصيل ياخ منو هسع البعرف ليك (ودكة) و لا (رشوشه).

الرشوشة معروفة ، لكن الودكة دي كان صرفة الدهن بجيها رجع قبل ما أواصل سودان الكرونا ، عشان عندي معها ارتباطات وشجون
وكويس كلامك جاب لينا وصفات جديدة من العلاج ..
الخروع، التبش، الويكة ، الحميض ، القطران ، الصمغ ...الخ
هذه المواد أتوقع أن يكون لها شأن في دولة السودان الطبية الكبرى ..

ارسلها لي صديق الان من فرنسا ارسلها له صديق مشترك من البرازيل

اسمع دي يا دكتور
وزارة الصحة ادارة الوبائيات في دولة البرازيل تقوم بتوزيع عبوات للمواطنين للوقاية من فايروس
كوفيد19، بسعر رمزي(يعادل10 دولارات امريكيه) لأحد انواع الأعشاب الأفريقية والتي قامت مختبراتهم بتجربتها واجراء كافة انواع التجارب عليها منذ زمن لمقاومة وعلاج اكثر من نوع من الفايروسات وخاصة التي تصيب الجهاز التنفسي، وقد اثبتت فعاليتها بكفاءة عالية دون آثار جانبية ،
وعندما دفعت المبلغ للطبيب وفتحت العبوة كانت المفاجأة،
والله ضحكت حتي التفت الناس الواقفين في الصف معاي،ومعاي صاحبي برازيلي ،قال لي مالك يا محمد ،جنيت وله شنو،
هل تصدقو انو لقيت العبوه ياهو القرض حقنا زاتو ،والله والله قرض،،!!!
المصدر. .محمد بهاء الدين ،اخو وليد بهاء. الدين صديقنا المشترك
والمقيم في البرازيل
.
من روائع الواتس

إذا اتجه السودان نحو الانتاج الزراعي الموجه للصناعة والصادر مستغلا الموارد الطبيعية من طاقة شمسية ومائية واراضي صالحة للزراعة فمن المؤكد انه سينهض من كبوته بأسرع مما نتصور.

أثناء جائحة الكورونا وبعدها نجد ان اسعار الذهب الأسود والاصفر في نزول
بينما الذهب الأخضر هو ما ينفع الناس
والسودان مؤهل لسد فجوة عالمية كبيرة منه