Post: #1
Title: خطابات البؤساء في السودان
Author: أمل الكردفاني
Date: 01-01-2022, 07:15 PM
06:15 PM January, 01 2022 سودانيز اون لاين
أمل الكردفاني-القاهرة-مصر
مكتبتى
رابط مختصر
"أخوك في أزال اليمن انت وين؟"
رسلت ليك الرصيد ما وصل؟
ياخ انا ما منتظرك جنب ست الشاي؟
والله أنا خالة ام عمتي عيانة كدة بديك تلفون بالليل..
يا عمر ياخ الزول زايغ مني؟..
كلمت لي سعادة النقيب؟..
والله الزول دة مشغول مع المشاكل بتاعة البلد
حقي برا آءآ؟
والله البلد دي ما عندها وجيع
جلست أتابع خطابات الرمتالة في السوق العربي.. مجموعات بشرية من الشباب والرجال متوسطي العمر عواطلجية صابنها في السوق العربي..
السوق في حالة وفاة سريرية، والجميع يبحثون عن لقمة العيش واستنكاح بعضهم البعض. أحلامهم أكبر من إمكانياتهم، ومن يبيع مسواكا يقدره بثمن لاندكروزر، ومن يقوم لك من الكرسي ينتظر منك (حاجة).. أما النظاميون فحدث ولا حرج..فإنهاء خدمتك بالطريقة الرسمية القانونية تعني ضياع أسابيع من عمرك بلا أي انتاج، ولذلك عليك أن توفر زمنك وترقع بس.
الغالبية وهم المسحوقون لديهم اعتقاد بأنهم ناس سوق ومفتحين. وهم في الواقع بلا هدف ولا مشروع حياتي (رزق اليوم باليوم).
الشمس تصفعنا في الرؤوس، والتراب (الكتاحة) تدور في إعصار مغزلي قمعي رفيع من الأسفل لتجلد السيقان.
الشعب تحول لقبيلة من اللصوص، لكن هذه ليست المشكلة؛ فالمشكلة الأكبر هي أنه حتى اللصوص يجب أن لا يسرقوا من بعضهم البعض، وهؤلاء المفتحين من ناس السوق لا يفهمون ذلك. في مقابل الغالبية من اللصوص الصغار، هناك أقلية قليلة من اللصوص الكبار، هؤلاء الذين يتجادعون الدوبيت السياسي والكروي وهم فاشلون سياسيا وكرويا ومن هذا الفشل وحده يمكنهم الحصول على المال. البرادو الأبيض والعمائم الضخمة تخفي أرواحاً حقودة، ونفوساً ضعيفة، وذواتاً لصة وعقولاً فارغة. تجار مخدرات وقتلة وأصغر منهم يسترزقون مما يتساقط من المخدرات والقتلة.
والخطابات مستمرة، السوق العربي يضج بالعواطلجية المفتحين، تحت ظلال النيم فوق البنابر جنب ستات الشاي. والشمس تصفع ومغازل التراب تجلد، والبلد مشبعة بالقبح والدم.
اللهم أخرجنا منها سالمين حتى ولو لم نكن غانمين، فالخروج منها هو الغنم الأكبر لو كانوا يعلمون.
عناوين الاخبار بسودانيزاونلاينSudaneseOnline اليوم الموافق 01/01/2022
عناوين المواضيع المنبر العام بسودانيزاونلاين SudaneseOnline اليوم الموافق 01/01/2022
عناوين المقالات بسودانيزاونلاينSudaneseOnline اليوم الموافق 01/01/2022
|
|