ريجيم العيشة ام عشرة!! بقلم:محمد سمنّور

01:33 PM January, 11 2021

سودانيز اون لاين
محمد سمنّور-السودان
مكتبتى
رابط مختصر

معظم الافران
خاصة في اطراف العاصمة
"قلبت" تجاري
الرغيفة الواااااااااحدة عععشرة جنيه!!!
توقعت ان "يبور" الرغيف
لكن خاب ظني
الناس بشتروا والله
لكن ماااااااا زي زمان
الكان بشتري في اليوم 40 و50
بقي اشتري 20 و30

الرغيف طبعا سلعة ضرورية جدا
بل انها "أضر" الضروريات
يعني كان الزول ما اشتري اي شئ
لازم يشتري رغيف
لكن الرغيف بالطريقة دي
اكيد حا يأثر كتير علي ميزانية الاسرة

لو مثلا اسرة ابوهم بيديهم كل يوم 500 او 600 جنيه
طبعا ديل مصاريفهم اليومية 15 -18 الف شهريا
وطبعا اكيد دخل الاسرة الشهري اكتر من كده
لانو هناك مصاريف ليست يومية
يعني ناس غاااااااز وكهرباء ودواء ..الخ
طبعا باعتبار المدارس ما فتحت

قلنا ناس كانوا بيستهلكوا 50 عيشة
حا يجيبوا فقط 30
30 عيشة ب 300 جنيه!!!!!!
طيب الحاجات التانية؟؟؟؟!!!
طبعا لازم يقللوا شوية
يعني لو كانوا بجيبو ليهم ربع عجالي
مرتين في الشهر
تاني حا يجيبوا مرة واحدة
ولو كانو بيشتروا رطلين حليب
حا يشتروا رطل واحد
والاسرة حا تبدأ تباصر اي حاجة
الخضار والبصل والزيت و.. و .. الخ ..الخ
ريجيم ولا ما ريجيم؟؟؟!!!!

طبعا نحن بنتكلم زيما قلنا عن اسرة
دخلها حوالي 25 الف في الشهر
وطبعا ديل لازم يكونوا ساكنين بيت مِلِك
اما زول دخله اقل من كده
او ساكن بالايجار .. خاصة في الخرطوم
فبصراحة..
دا انا ما بقدر اتخيل حا يعيش كيف!
لانو حقيقة
انا خيالي محدود شوية!!
وحكايتو دي دايرة ليها زول
خيالو واسع!!


محمد سمنّور
[email protected]