ما اعظم هذا الشعب ... حكاية من الواقع بقلم:صلاح الباشا

01:49 PM October, 14 2020

سودانيز اون لاين
صلاح الباشا-السعودية
مكتبتى
رابط مختصر

كلمات ... وكلمات

ما أعظم هذا الشعب برغم الفقر
الذي ضرب الوطن عمدا لثلاثين عام
*******
حكاية ادهشتني:
دا الشي ال بميزنا عن بقية شعوب الأرض .
كنا قاعدين في البنك ومنتظرين الدور . وفي كمية من اعمامك أصحاب المعاشات والموظفين في انتظار دورهم لاستلام معاشاتهم الشهرية.
عمنا من المعاشيين بتكلم بالتلفون مع زول وبقول ليه العملية بكرة وانا هسي جيت البنك اسحب المعاش لكن برضو ما بتم قروش عملية البنت.
المعاش كله ٣ الف ونص والعمليه ب ٨ الف ياخ انت سلفني الخمسة الف الناقصة دي وباقي الشهر بتجازف بس المهم هسي العملية تتعمل للبنت..
دوري جاء و نادوني ونادوا جمبي في الشباك التاني زول كان قاعد جمب عمك البتكلم بالتلفون...
الزول وقف للصراف ومرق ليه ٨ الف قال ليهو نادي عمك داك يجي يسحب ولمن يسألك من الرصيد بتاعو زيد عليه ال ٨ الف دي وقول ليه دي فروقات قديمة نزلت في حسابك . ومشي من الشباك وخرج من البنك .
وانا مرقت مع وصول عمك للشباك .. ولا زال دمع العين منسكب.

بلدنا السمحة لسه بخيرها ... وبرضو تقولوا لي سلام جوبا ومحاصصة ؟
منقول