أزمة حادة في المشاعر.....

أزمة حادة في المشاعر.....


02-11-2020, 09:07 PM


  » http://sudaneseonline.com/cgi-bin/sdb/2bb.cgi?seq=msg&board=500&msg=1581451649&rn=0


Post: #1
Title: أزمة حادة في المشاعر.....
Author: سيف اليزل برعي البدوي
Date: 02-11-2020, 09:07 PM

08:07 PM February, 11 2020

سودانيز اون لاين
سيف اليزل برعي البدوي-
مكتبتى
رابط مختصر



ازمه حااااده في المشاعر
البنات السمحات ديل وحات الله عارفات روحن تلقي الواحدة لابده ليك كده في ركن زي الكمثري في رفوف الفكهاني
مشيت لي وكالة سفر كده مع واحد صاحبي ماشي القاهره
ده كمان بمرقا لي مصر بجيب زراير الزراير الوااااحدة دي قلت ليهو عليك الله انت الزراير دي هسه دايرا ليها مشوار قدر ده وهي ذاتا البشتريها منو
قال لي السودان ده كان جبت ( نمل ) بتباع غايتو الزول ده جهجه لي النظريات الاقتصادية القريتا كلها كدي خلوني من الزراير الكلام في ( الزراره ) اللقيناها في الوكالة ياخي دي جنس قيامه
قيامه وربطت لابسه ليك الطرحة دي كيف وزي ماقال الغناي لفت قلبي زي لفه طرحتها اللافحابا واييي حاجه في محلها والعجب العيون شدة ماكبار لما ماقادره ترمش وبتشرب ليها في أنناس انا ماعرفت العصير في الكبايه ولا الكرسي من شده ماحلقها ناصع بعدين هي النوع داك
الباسم خلقه وتحس بيها نعسانه كده وهي مفتحه
(ناعس الاجفان)
والكلام براااحه مش ذي فلانه ديك (ورجغك ورجغك) بس مكنة خياطه ولا الظرافه والذوق واللطافه
والله وقت قالت تشربو شنو ؟؟ داير أقول ليها نشرب السم نحن ماخلاص شربنا وانتهينا خلينا نتفرج بس في البتشربي فيهو دا
الكويسه حظنا الضارب ده اول مره يصدف
لقيناها فاضيه صحبي قال لي البت دي اول مره تكون ماعندها زباين عادة بكون واقف صف طويل عريض نصهم مامسافرين بس ياخدو ليهم قعده قداما كده اي واحد( يلتخ ) ليهو بلد من راسو وهي تديهو الأسعار ويبقي مارق ولا بكون فاهم ذاتو هي قالت شنو
اهااا قعدنا ليك انا والاخو في كرسيين قداما اهتمت بزولي دا شويه عارفاهو زول (زراير ) وزبون وانا ( مزرزر ) في النص بس أعاين
قالت ليهو التذكره عايزا بالمصريه ولا أحسن ليك السودانية انا هنا ماقدرت اصبر
قلت ليها السودانية لو زيك كده انا ذاتي بالسودانية والله يااخوانا اخدت ليها بسمه كده لمن جاني ابو الشهيق بسبوسة وعطنوها في عسل نسيت ليك المواصلات والزحمة والكتمه آمنت بالله
قال ليها ده بكري صاحبي قالت لي اهلًا بيك اتشرفنا ولو مسافر اي مكان نحن تحت الخدمة طوالي جاني صداع
قلتا ليها نسافر وين نحنا نخلي البلد دي البلد دي لسه بي خيرا
والله صحي السودان ده حلو بي ناسو
اها صحبي حسا بي منبهل كده حاول يلمني
قال ليها بالمناسبه
بكري ده رجل اعمال قلتا ليها في الحقيقه انا
(رجل رمتال) صحيح انا رجل والرجال قليل ...لكن لسه الاعمال ماجات الله يصلح اعمالنا بس والله البت دي ادتني نظرة إعجاب كده بي كلامي ده لما راسي لف
وانا لفيت عكسه قالت للضو دا صاحبك ده زول مريح ولطيف اتخيلت نفسي (بندول) انا غايتو الليله الا (اضبح) لانو بنات الحله عملو لي نفسيات موده بت جيرانا عصعوص ديك شابكاني ليك مالا رقبتك ملويه واضنينك ديل مالم يابكري وجبهتك الليله ناطا كدا مالها تعالي اسمعي (لطيف) دي اخدي ليك نقله الله لا جاب باقيكم ياخ والله فعلا الدنيا لسه بخير
المهم فردتي خلص حاجاتو قلت ليها انتي اسمك منو اااالسمحه عشان لو جينا مره تانيه قالت لي أنا (اخلاص)
اخلاص الأرباب قلتا ليها وانا بكري
بكري الحباب ماشفتو الضحكه الضحكتا النوع داك البتروح فيهو العيون وممكن تروح فيها انت ذاتك وقبيلتك كلها
اقسم بالله لو عندي قروش كان قطعت لي تذكره لأي محل بس عشان اعز البت دي ينعل ابو الفلس ذاتو الله يحفظك انتي طلعنا من الوكالة
والله ذي السافرت وجيت مرات الزول بحتاج لي جرعات ذي دي في الحياة تجدد الخلايا العاطفيه ورقاد السهله دا
غايتو الناس المالاقيه طريقة تسافر
بس يجوا لي اخلاص دي يسألوها من التذاكر والاجراءات ويرجعوا البيت بكونوا سافروا وغيروا جو
الله يغتيك يا اخلاص قلت لي الفرده (زرارتي) دي انقطعت لو جبت زراير عليك الله اديهم اخلاص دي بجي آشيلم منها صدقوا قال لي سمح
ودعنا السمحه
قلت ليها فتناك بعافيه
مع انو كيفن افوتك وانتي عشراقه الفرح الواقفه في حلق الظروف
وهاك ياابتسامه تاني من النوع الاحلي من ديك
كل المطلوب منك حق المواصلات لحدي الوكالة
تكون سافرت
(اخلاص)
وشربت اناناس

ح احتفظ باسم الاخو لدواعي امنيه
والعايز اسم الوكاله يجيني خاص...

الا انت كمال السر عبد الرحيم السحار
بكري حمزة...