داير بالقروش شنو يا حلنقي ؟

02:40 AM January, 15 2020

سودانيز اون لاين
abdalla elshaikh-MEMPHISE-TN-USA
مكتبتى
رابط مختصر

علمت مصادر بأن الأستاذ علي حسن عبد الرحمن المحامي قد قام بالمطالبة بمبلغ خمسة آلاف دولار في أغنية شال النوار للشاعر اسحق الحلنقي التي تغنى بها الفنان محمد الأمين في احتفال هيئة الترفيه بالسعودية وأكد على تمسكهم بذلك مقابل عائد الحفل وكذلك حقهم الأدبي والمادي في أغنية بتتعلم من الأيام وأغنية غربة وشوق التي تغنى بها الفنان محمد الأمين لقرابة الأربعين عاماً.وأكد الأستاذ علي حسن بحسب صحيفة الدار على تسليم الفنان محمد الأمين الإنذار القانوني لتسوية الخلاف او الفصل بواسطة المحكمة" انتهى الخبر

ألخبر دا أورده صديقنا الصحفي الما خمج ~عثمان عابدين في محطاته الصغيره

يا حلنقي الأغنيات دي ملكنا نحن جموع الشعب السوداني فدعوها تتراقص بيننا

السلام عليكم
هو يدفع لود الأمين
اسع يجي واحد يعولقها لي لما يعوقو

سلامات يا جميل ..

موضوع الملكية الفكرية شايك جدا ...
هل في اتفاق من اليوم الاداهم الحلنقي لود الامين انه كل ما يغنيها الشاعر عنده حصة؟

هل قبضالحلنقي ثمن مقابل القصيدة و قتها و انتهينا ؟

في اعتقادي لم يحدث أي من الحالتين كحال شعراء السودان ...

و إذا ما في شئ متفق عليه

اللهم الا ابو الامين بس يكرم الحلنقي ذوقيا

و الله اعلم ...

Quote: قام بالمطالبة بمبلغ خمسة آلاف دولار في أغنية شال النوار للشاعر اسحق الحلنقي التي تغنى بها الفنان محمد الأمين في احتفال هيئة الترفيه بالسعودية

الظاهر العقد بتاع الحفل كان مجزي . .
غايتو لو كل اغنية اداها ود الامين في حفل الترفيه شاعره طلب كده . .
ابو اللمين بطلع مديون . .

اشمعنى يا ود الشيخ بالدولار؟

اما جنيه : عملة الشاعر الحلنقي
او
ريال: العملة حقت هيئة الترفيه

يا شباب طالما الموضوع بقى فى الفن وكده , فأنا نيابة عن الفنان محمد الأمين , أهدى للأستاذ الحلنقى اغنية الفنان زكى عبدالكريم البقول فيها : ( يعجبنى فيك لو قلتى أنا مادايرة مال) ...
( تلقاها عند الغافلة يا زيكو ) .

ليس عيبا ان يطالب شاعر بحقه المادي طالما المغني قبض قروش ،

لكن كما قال قباني الموضوع له جوانب قانونية .

يعني ما عارف ليه هذه الأشياء تصل بين شاعر وفنان لهذا المستوى أي التهديد باللجوء للقضاء
للشاعر حق ولكن برضو المسألة معقدة لأنه دا فهم جديد بتاع الحقوق الأدبية
ولولا الأداء الرائع للفنان لما إنتشرت هذه الكلمات الجميلة
ف ختوا الكورة واطة
الناس لما هاشم صديق رسل خطابات لأبوعركي ومحمد الأمين وغيره
زعلت من هاشم صديق وقالت هم أصحاب وكانوا بالليل مع بعض
فليه يطالبه رسمياً وأهو الحلنقي بيطالب رسمياً وليس ودياً
المسألة بقت حقوق مش أخوانيات

كنت في تواصل مع المرحوم ناجي القدسي وهو طريح الفراش في اسكندرية... كان بيشكي من عدم استلام حقوقة من الفنان حمد الريح.. وكان لسان حاله يقول طالما ما وقف معاي بحق العيش والملح اطالب قانونيا بحقي... السؤال هل الاستاذ المهذب الحلنقي في وضع يتطلب الوقوف الي جانبة..

سلام
صحيح والله . هو داير بالقروش شنو ؟
انا غايتو ما من انصار انو الشاعر ينتظر قروش من شعرو .
ممكن ينتظر عايد ديوان شعر . لكن يساكك فنان بالمحاكم دي
حاجة ثقيلة وبايخة وما من الذوق . والشاعر ابدا ما مفروض
يكون كدي . مع كتير الاحترام للاستاذ الحلنقي

اسحق الحلنقي شاعري المفضل في السودان، ،،،
لكن تعليق الحبيبة اخلاص اوسكار....هو اليدفع قروش لود الامين ،،،لأنه لولا أداء ود الأمين لقصائده ، والتي نعترف انها رائعة بحق
وحقيقة، لم يكن الناس قد سمعوا بها ، لأن الناس بقت ما بتقرا الكتب ودواوين الشعر ، واتجهوا إلى التكنلوجيا الحديثة من تلفاز وجوال وتابلت ....
ونقول للشاعر المرهف الحلنقي ان شهرتك كشاعر مجيد أفضل من ملايين الدولارات ، ولا تسير وراء المحكمة لحق مادي ....

و الله شئ مؤسف الحصل دا
المتعارف عندنا في التلفزيون انو الشاعر و الفنان و العازفين بصرفو حقوقم يوم الخميس من كل اسبوع
و ببقى التسجيل حق للتلفزيون , هنا التلفزيون بكون عندو حقوق الملكية الكاملة في انو يبث المادة المسجلة في اي وقت
اما في حالة و وضع استاذنا الحلنقي المسألة دي جديدة و محتاجة لتوضيح اكثر
استاذ الحلنقي احترامنا ليهو كبير و الباشكاتب اسعد ليالينا
فياريت الناس تتصافى و تصل لحل وسط
مش قادر استوعب انو مسائل فنية بين مبدعين تصل المحاكم
يجب مراجعة حقوق الملكية من جهة متخصصة

الاحتراف يا خوانا الاحتراف
هو البخلي اي مهنة او حرفة تتطور ، اسي لو ملاحظين حاليا لا شعراء ولا ملحنين
كلو انتهى .. لانو مافي احتراف ، بمجرد ما الجيل الكان هاوي الفن انتهى او كاد
كانما الابداع وقف .. الهواة الزمان ديل حياتهم كانت بسيطة والمعايش كانت ساهلة
وقيمهم وتقاليدهم ذاتا مختلفة. فلو الاحتراف بدا من زمان بشكل طبيعي كان في مواهب كتيرة
حتخش الفن والموسيقى لانو ممكن تأكل عيش وما كان شفنا الفجوة الشينة الاسي دي، ,
الحلنقي طالب بحقوقو مفروض ياخدا ، اشمعنى الفنان بيكسب الملايين وعدادوا رامي كل يوم؟
بالمناسبة الحلنقي ده لو سحب اغانيهو دي لماها عليهو نص الفنانين حيقعدو عطالة
و حظ القونات

أجى يا اخوانى ؟!....كيفن يعنى داير بالقروش شنو

سلام عليكم وآسف لأني عامل رايح
ألسودان صادق علي حقوق الملكية الفكريه بجنيف وإفتتح مكتب للمصنفات الأدبيه بمصلحة الثقافة السودانيه في الثمانينات ولكن من دون أية مقومات فقط كان في شنطة الموسيقار أمين أحمد وتوالي علي إدارته ألقانونيه زوجة الموسيقار الفاتح حسين ثم هاله قاسم فالتجاني حاج موسي ثم البشير سهل جمعه سهل
واجهت العمل معوقات عده من أهمها ضعف الخبرة القانونيه وعدم المؤسسيه إضافة لذلك ثقافة التعامل في الوسط الفني والقائمة علي نمط علاقات أخويه سودانيه لا تحتكم لعمل المؤسسه ~ مثلاً مايكل جاكسون فنان تقف من ورائه مؤسسه إقتصاديه قانونيه أسوة بشركات صناعة سيارات الفورد ! هذا التقليد الرأسمالي نفتقده تماماً في كل مناشطنا الإبداعيه ٠ كان من الممكن تطوير تجربة الإذاعة السودانيه ونبني عليها كما أشار أخونا خضر في صدر هذا البوست

اسع دي بكم
أسعدت يومي
https://youtu.be/VOZNMRExKsQhttps://youtu.be/VOZNMRExKsQ

هاكي يا دكتورة و صاحبنا كارلوس و زوار البوست

ياربي طالب فرفور بقروش لمن يردد ما مشكلة ؟

شكراً خضر

Quote: شكراً خضر

مرحب بيك يا دكتورة
مفروض شركة النيسان تدفع ليهم
احمد كوستي شاعر كردفاني جميل

أظن الصحيح
سواقها قام النسام

مراقة لشركة النيسان

شكرا اخلاص
وشكرا خضر
السميح القمرة ،،لحن اوسكار ،،اغنية اوسكار
وما عندها ثمن ،،لانها لا تقدر بثمن ولا بكنوز الدنيا ،،،
والتحيات النواضر للملحن وللفنانة هدى