Post: #2 Title: Re: الدعم السريع 2 Author: علاء سيداحمد Date: 01-12-2020, 07:49 PM Parent: #1
الحاصل شنو يا عمر ؟
Post: #3 Title: Re: الدعم السريع 2 Author: منتصر عبد الباسط Date: 01-12-2020, 08:00 PM Parent: #2
أياً كان الشخص الذي يمارس تجاهه هذا السلوك البربري ولو كان الشيطان الرجيم شخصياً أو كان كوز أو أي حاجة لا يجوز ممارسة هذا السلوك تجاههه ومثل هذا السلوك لو مورس تجاه من يظن أنهم كيزان يكون الكيزان قدمت لهم خدمة عظيمة . الذين يمارسون هذا السلوك من الشباب المراهقين يجب ايقافهم وزجرهم ومحاسبتهم وسيكون هذا أكبر خازوق سيركبه الكيزان في الثورة لو لم يتم ايقافة بقوة وشدة وحزم.
Post: #4 Title: Re: الدعم السريع 2 Author: عمر التاج Date: 01-12-2020, 08:07 PM Parent: #3
والله الحاصل انا زاتي ماعارفو ياعلاء بس منظر الشباب ديل وهم بيضربوا في الراجل الكبير ده ويقولوا ليهو قول مدنياا؛ ذكرني تماما مشهد ناس الدعم السريع قبل الثورة لما كان يمسكوا واحد من الشباب ويجلدوه بطريقة بربرية أو منظرهم وهم بجلدوا في شباب القيادة ويقولوا ليهم قولوا عسكريااا الشباب ديل لما كانوا مستضعفين كانوا بينادوا سلمية سلمية ولما أتمكنوا شكلهم نسوا ان السلمية هي المكنتهم.. الشباب بالذات بيحتاجوا لجرعات وعي كبيرة تعرفهم بحدودهم وما يفيد ومايضر الثورة.
Post: #5 Title: Re: الدعم السريع 2 Author: Mutasim Idris Date: 01-12-2020, 08:23 PM Parent: #4
الناس الانكوت بالتنكيل وهضم حقوقها 30 سنة او يزيد وقامت بثورة افتكرت انها نهت بيها حقبة ضلام وجبروت لكن اتفاجات لسة دا ما حصل ما مفروض تتلام. عاين للشارع بالاتجاهين ياعمر التاج. لجان الاحياء شااااايفة شغلها ان شاءالله الحكومة كمان تشوف. الشارع لسة في ثورته.. صدقوا.
دا من بوست مجاور.
Post: #6 Title: Re: الدعم السريع 2 Author: Asim Ali Date: 01-12-2020, 09:37 PM Parent: #5
سلام عليكم العنف والعنف المضاد يجى وقت نبقى فى البدا منو -بعد الثوره- بقصه العنف ونبقى فى غلاط زى البيضه قبل الجداده ولا الجداده قبل البيضه. وتوجد مساحات خصبه وقابله للانفجار والدخول فى الدايره دى وهى الجامعات ومن قبل شفنا مناظر فى الازهرى وبحرى. الكيزان سلوك زى دا بيقع ليهم فى جرح عشان يبرروا ارهابهم وعنفهم كدفاع عن النفس. فعلا الشباب محتاج جرعات توجيه وتوعيه وتثقيف اضافه الى توجيه طاقانو. مثلا الليله شايف صور لطلاب ج/الرباط متظاهرين قدام التعليم العالى مترسين الشارع و حارقين لستك. اعثتقد احتجاج شريحه طلاب الجامعات مفروض يكون فى كل الاحوال باسلوب مختلف. . ضبط النفس مهم جدا للشباب
Post: #7 Title: Re: الدعم السريع 2 Author: منتصر عبد الباسط Date: 01-12-2020, 09:48 PM Parent: #6
المبرراتية ما بريحوا وهم أضر صوت وتجد دائما اصرارهم في تبرير الخطأ التصحيح لابد منه والمراجعة لابد منها وإلا فلا ننتظر خيراً
Post: #8 Title: Re: الدعم السريع 2 Author: Mutasim Idris Date: 01-12-2020, 10:18 PM Parent: #7
Quote: ضبط النفس مهم جدا للشباب
ضبط النفس كيفن يا عاصم والدفاع الشعبي مشارك في مسيرة ضد حمدوك ههههههه.
والله كما لجان الاحياء ديل (داعمين سريعا) حمدوك الكيزان كان ركبوا فيها تاني. لحمهم مر وكانوا وما زالوا بفتشوا علي الموت وطالعين ليه. مليونية حل المؤتمر الوطني. تم مليونية التحقيق للشهداء. تم مليونية 30 يونيو والتوقيع علي الوثيقة. تم مليونية حل جهاز الامن. في الطريق.
Quote: فعلا الشباب محتاج جرعات توجيه وتوعيه وتثقيف اضافه الى توجيه طاقانو.
قبل التوعية يا عاصم محتاج تطعمهم من جوع وتامنهم من خوف وديل ما حصلوا. ابجديات الثورة. التشريعي وينو؟ ومتين؟ ولة السؤال ممنوع!
ودا للما ممبرررراتيه. الزول دا منو الفي الفيديو دا. منيس بتاع شؤون الرئاسة مش؟
الدعم سريع جدا بالمناسبة وحمدوك عائش علي الدربات دي.
Post: #9 Title: Re: الدعم السريع 2 Author: عمر التاج Date: 01-13-2020, 08:10 AM Parent: #8
Quote: ضبط النفس كيفن يا عاصم والدفاع الشعبي مشارك في مسيرة ضد حمدوك
وفيها شنو لو شاركو يا ادريس المؤتمر الوطني وكل توابعه أصبحوا خارج السلطة وشي طبيعي ام يعملوا مسيرات وينظموا ندوات معارضة للحكومة؛ وده من حقهم ودي الديمقراطية اليفترض نتمرن عليها.. اسلوب الضرب الواضح في الفيديو الفوق هو الما طبيعي وهو نفس اسلوب الكيزان والجنجويد القامت ضدهم الثورة.. الثورة يفترض تظل سلمية مهما استعصمت بالسلطة والسلاح وإذا استخدم الكيزان اسلوب العنف فالاجدي محاربتهم بالقانون لأن القضاء الشغال الان عموما هو قضاء الثورة.. اي جنوح للعنف سيـؤدي الفوضى؛ واي فوضى في الوقت دا ما في صالح الثورة.
Post: #10 Title: Re: الدعم السريع 2 Author: mohmmed said ahmed Date: 01-13-2020, 08:41 AM
عندما شاهدت هذا الفديو لاول مرة انزعجت جدل هذا سلوك همجى غير مقبول وضار جدا
لكن يا عمر التاج انت زول ما ساهل وخطير جدا
Post: #12 Title: Re: الدعم السريع 2 Author: عمر التاج Date: 01-13-2020, 09:09 AM Parent: #10
مرحبا محمد سيد أحمد؛
Quote: عندما شاهدت هذا الفديو لاول مرة انزعجت جدا
المشاهدة الأولى دي هي البتحدد انك زول مبدئي ولا موجه (من التوجيه) وطالما انزعجت من سلوك جماعة تشعر بالانتماء إليهم فأنت في السليم
Quote: انت زول ما ساهل وخطير جدا
ما خطير ولا حاجة بس بحاول انظر للامور بتجرد؛ وبهمني جدا أن الحكومة تمشي بالشعب لقدام؛ وما تقع في نفس اخطاء الحكومات السابقة اما الأشخاص والأحزاب والتنظيمات فهي الي زوال.
Post: #11 Title: Re: الدعم السريع 2 Author: Mutasim Idris Date: 01-13-2020, 09:08 AM
يا سيدي مافي زول حجر علي الكيزان ما ينططو او يزحفوا. لكن لما المسيرة يشارك فيها دفاع شعبي و أمن ويهتف بسقوط رئيس وزراءه دي القضية هنا. لا ما كدا وبس اتقبضوا باسلحتهم. انت شبهت (الرجال) ديل بالجنجويد لكن فات عليك انهم بفرقوا من الدعم بعدم تسليحهم (سلميين) وسلموا الوسخ للبوليس ودي الدعم ما بعملها يا قتل يا دفن في النيل. غايتو ياما شفت الفيديوهات يا بتتغابي. بنبيض النية. بعدين قصة الانفلات والعنف ح يتقابل بعنف دا طلس سااي وونسة مجالس. الموت لا وقف ولا الكيزان كفوا اذاهم. فاااا قولوا ليهم ما يشيلوا اسلحتهم ويزحفوا لانه ح يقابلوا جنس دا. بعدين ما اظن الشارع ورجالة لجان الاحياء مسئولين بالحد من محاولات الاجهزة الامنية الكيزانية لانفلات الامن , لكن علي الاقل بساعدوا في فضحهم وكشفهم. ( سمعت بالحصل في القضارف وقريت بيان المهنيين ولة جاي شايت ساي).
هاك دا في كوستي. الكيزان قالوا عندهم زحف ولجان الاحياء انتظروهم , فااااا الكيزان ما جأوا هههههههه. أصحي يا ترس.
Post: #13 Title: Re: الدعم السريع 2 Author: عمر التاج Date: 01-13-2020, 04:32 PM Parent: #11
Quote: انت شبهت (الرجال) ديل بالجنجويد لكن فات عليك انهم بفرقوا من الدعم بعدم تسليحهم (سلميين) وسلموا الوسخ للبوليس
الفيديو فيهو ضرب بالعصي يا معتصم تتخيل مجموعة كيزان يكونوا شايلين سياط ويقعوا ضرب في مواطن في الطريق غض النظر عن السبب والراجل ده عمل شنو الفطرة بتدين هذا السلوك الحصل في الفيديو فوق نفس التصرف؛ بس اتعكسوا الطرفان ونحن هنا بنستنكر الاسلوب وليس الممثلين لجان المقاومة بالمناسبة عندهم دور كبير جدا في الرصد والمتابعة والتبليغ وعندهم مهام كبرى في البناء وحماية الديمقراطية قبل أيام في لجنة عاملة برنامج اقتصادي كبير في الحي قدموا فيهو خدمة كبيرة لإسكان من خلال خفض اسعار المنتجات لسعر المصنع أو المنتج ودا بعتبروا انجاز وابتكار يفترض تتنافس عليه اللجان اما موضوع الضرب والاعتداء والاقصاء فده اسلوب مرفوض و زمنه ولي ولو كان لابد منه افضل يضربونا الكيزان على الأقل كانوا بيضربونا عشان يدخلوا الجنة
Quote: عاين للشارع بالاتجاهين ياعمر التاج.
الشارع في كل الاتجاهات فاتح يا معتصم كل جهة تتظاهر وتعبر زي ما عايزه بس تلتزم حدودها وما تعتدي على الاخرين وإذا حدث اعتداء أو تجاوز يفترض يتحسم بأسلوب راقي ومتحضر ده طبعا اذا كنا مقتنعين ان القانون اليوم أفضل بكثير من قانون الكيزان
Post: #14 Title: Re: الدعم السريع 2 Author: Asim Ali Date: 01-13-2020, 06:49 PM Parent: #13
سلام على الجميع مره تانيه يامعتصم خلينى اخت كم حاجه - الكيزان شغاين ثوره مضاده بكم مسار ومن اتجاهات مختلفه واحد منهم اسلوب الوقاحه بالخروج للشارع والتصريحات السياسيه لرئس حزبهم المحلول -الوضع ماداير اقول هش امنيا ياخى انا كتير بسمع بليل رصاص مرات مجموعات لفتره ماتعرف الحاصل شنو ؟ ويكفيك احداث راس السنه دلاله على هشاشه الوضع بتواطوء مقصود حدث لاحقا يوم مسيره الزواحف فى البدايه بالسماح لها لكن زخم الثوار وضعهم فى حرج . -كنت من الداعين بتحميل الشباب مسئوليه الشراكه -مع الجهات المختصه - فى اداره الامور على المستوى الولائى ومادون.سواء رقابه او اداره مايرتبط بالحياه اليوميه للمواطن.اللى حاليا الكيزان ماخدين مسار خلق الازمات وتصعيدها ولولا الازمات خلت عندهم عشم انو الشارع يتململ ويحصل تاكل لكتله الثور . التاهيل للشباب بضبط النفس وجرعات التثقيف والتوجيه مفروض حسب وجهه نظرى انها تكون مدخل لمشاركتهم الاجهزه التنفيذيه الدنيا كما اسلفت بالتالى يتم احباط واغلاق مسار مخطط الازمات واستغلالو سياسيا واستدعاء العنف والغنف المضاد للتعجيل بالانتخابات المبكره عبر ديناصور السياسه وحصان طرواده الكيزان الذى يمتطه للعوده (واهما- للسلطه.
Post: #15 Title: Re: الدعم السريع 2 Author: عمر التاج Date: 01-13-2020, 08:05 PM Parent: #14
شكرا عاصم علي العنف لايفرق بين احد و لا يولد الا عنفا والعنف المضاد عندما يتحد مع العنف تعم الفوضى وما هذا البيان الا دليلا على ذلك
Quote: انا اماني محمد احمد الشيخ ابنة الرجل في الفيديو المنتشر في مدني في زحف الاخضر لحد لحظة الفيديو دة كنا انا واخواني الاتنين اعضاء في لجنة المقاومة في الحلة وابونا دة اصلا ما منعنا من اننا نمارس الحاجة دي انا الكنت زمن المظاهرات بجيب الكمامات واللخميرة والم البنات ونحضرا في بيتنا دة وواخواني هم البياخدو الاوامر وينفذوها هم كانو الببدو يترسو شوارع الحلة ابوي دة رغم اختلاف رايو مننا كان محترم قناعاتنا وما حصل فرض رايو علينا وبناقشنا بي كل الاحترام الفي الدنيا الما لقيناو لامن حكومة ولا من اي شاب في اي لجنة مقاومة النحن جزء منها ونحن اولادو ابونا دة وهو امام المسجد كنا بنمرق من بيتنا بالدلوكة والجردل بعد يتلموا في بيتنا كل اولاد المربع والمربعات الجمبنا نهتف ليو في حوش بيتو لا جرح ثائر ولا بت بي ولاكلمة واحدة عشان مراعي لينا نحن اولادو ونحن متاكدين هو قناعاتو شنو وانو ما كان راضي ولا مبسوط من البنعملو كنا قايلين انو نحن حنعلمو الوطنية بي البنعملو دة لكن والله العظيم والله العظيم والله العظيم نحن بعد الفيديو الشفنا فيهو ابوي بضربوهو اولاد مدني كدة نحن الدنيا دي مسخت علينا يضربوا ابونا نحن كدة انا من امبارح دموعي ما وقفت واخواني قربوا يموتوا من الغضب وحالفين يمشوا مدني ويقطعوا العملوا كدة في ابوي بي سنونم ومن الليلة نحن كفرنا بي حاجة اسما لجان مقاومة وكفرنا بي الوطن زاتو نحن وطنا ابوي دة بس ووالله والله تاني يطلع اي موكب زي ما هو داير وخلي يجي راجل ولا صعلوق يمد يدو في ابوي اقسم بالله يدو تتقطع قبل يفكر يخت يدو في ابوي المافي احسن شفاتي بفهم ربع فهموا ولا بحب البلد دي زيو والعمل كدة في ابوي اخواني جابوا خبرك ونبشرك الا تدسا في بطن امك ونشوف رجالتك دي العلى راجل عمرو قريب السبعين سنة عفوك يابا والله كل واحد مدا يدو عليك حتتقطع والدم انشاء الله يصل الركب
Post: #16 Title: Re: الدعم السريع 2 Author: عمر التاج Date: 01-13-2020, 08:07 PM Parent: #15
وهذا بيان اخر من النيل الأزرق؛ الفوضى سادتي لا حدود لها
Post: #17 Title: Re: الدعم السريع 2 Author: Mutasim Idris Date: 01-13-2020, 08:39 PM Parent: #13
يا عمر انت عندك مشكلة كبيرة خلاااص مع لجان المقاومة ديل. في البوست دا انا جبت ليك مشاركة (للدفاع الشعبي) في وقفة الزاحفين ديل وجبت ليك صورة واحد قبضوه ببطاقته ومسلح واخر ضرب رصاص وانت زغت لي منو. بدل تمسكهم هم مسكت لي رجال المقاومة والغلط اللي عملوه. ولو دا بالنسبة ليك طبيييييعي قشة ما تعتر ليك. لجان المقاومة هم الثورة ولسة الشارع في ثورته بدليل المليونيات الطلعت صححت واللي ح تطلع تصحح. ولو الشارع فعلا مقتنع مليون في المية بامكانية حمدوك (فقط) في المعالجة ما كان طلع مليونيات الدفرة دي. شكرا حمدوك = تسقط بس. وصلاة الشارع مقامة خلفه. ما ح نتغالط في سلمية الشارع ابان الثورة ومحافظته عليها ايام القمع الشديد والرصاص المدور والموت بالجملة فااا يبقي من عدم الموضوع الوصاية هسي (بالمحافظة) علي ثورته. قابلت في سفرتي الاخيرة للسودان عدد من (رجال) المقاومة في كم حي في الخرطوم وبالمناسبة مستوي الوعي والفهم العندهم مااااا موجود في وزراء حمدوك!!. ما موضوعنا. سوط العنج في السودان يا اما فخر واعتزاز او إهانة ولجان مدني عرفت تختار شنو للكيزان. --- إن شاءالله تكون فعلا غيرت رأيك في اللجان واعترفت بدورهم التاني في احيائهم غير الدور الثوري الاهم.
Post: #18 Title: Re: الدعم السريع 2 Author: Mutasim Idris Date: 01-14-2020, 07:44 AM Parent: #17
دا البيان بتاعك يا عمر التاج من صفحة كووووووز. والكوز دايما فاقد مصداقية ووراءه اجندة.
الباشا دا اتمسك في المسيرة وفتشوه عشان يشوفوا شايل سلاح ولة لا. يعني ما انضرب يا عمر. بعدين انت شايلها حارة مع رجال لجان الاحياء ديل. عاوزهم بالانتخابات هههههههههه.
غايتو..
Post: #19 Title: Re: الدعم السريع 2 Author: عمر التاج Date: 01-14-2020, 08:35 AM Parent: #18
كيف ما انضرب يا ادريس إذا الفيديو ما واضح شوف الصورة الفوق بتوضح واحد مخنوق رسمي من رقبته والتحت دي بتوضح واحد تحت جلد السياط يبقى كيف ما انضرب؟
و الكارثه ان البضرب الناس مجموعة من الشباب والمضروبين رجال كبار في السن قدر ابواتهم.. نحن هنا لا تتحدث عن موقف سياسي ولا يهمنا دين وانتماء من يضرب ومن يضربون ولكننا ندين هذا السلوك الكيزاني لانه نفس سلوك الأمن الشعبي الذي رفضناه من قبل عندما كانوا يعتقلون الناس في الشوارع ويضربوهم لمجرد انهم معارضين الان انعكس الوضع واستمر السلوك المشين وتحول بعض رجال المقاومة الي أمن شعبي جديد وجنجويد ٢ لجان المقاومة في كل الثورات مطلب شعبي ورسمي ولكن يجب أن يعوا دورهم بوضوح ويكون لديهم تمثيل معروف ولا بأس أن يحملوا أوراقا رسمية معتمدة من المحلية وتكون الأوراق بغرض البناء والنشاط المجتمعي وليس للضرب والاعداء على الاخرين الدور الوحيد الممكن تخدم فيه لجان المقاومة خارج الاطر المجتمعية والثقافية والفكرية والدينية هي ان تكون عين النظام والقانون، تراقب الأحياء وتبلغ اهل السلطة فلستوب
Post: #20 Title: Re: الدعم السريع 2 Author: عمر التاج Date: 01-14-2020, 08:47 AM Parent: #19
بمناسبة التفتيش؛ وعشان ماتقول لي الكوز داك - اذا ثبت انه كوز وما اظن يثبت- رفض يفتشوه فضربوه اقول؛ ليس من حق أحد أن يفتش أحدا الا بإذن نيابي وسلطة معتمدة عشان ما يتعرضك اي واحد في الطريق ولا في تجمع ولا مسيرة ويقول طلع العندك أو جيب بطاقتك ما من حقك وانت مجرد مواطن تفتش مواطن زيك.. إذا اشتبهت فيه راقبه؛ وصوره؛ وافضحه؛ وإذا تأكدت بلغ الجهات المسؤولة.. كونوا في الأحياء غرف أمنية ترفع الحس الأمني للمواطن؛ وتراقب الشوارع والاحياء وتساهم في سرعة وصول المعلومة لكل الحي؛ والجهات الرسمية اولا.. ولاباس ان يرأس الغرفة موظف رسمي في الشرطة أو الجيش أو الأمن ممن تثقون فيه الثورة دي عندما قامت قامت سلمية؛ والشباب عندما ثاروا راجعوا نفس الكيزان البعملوا المسيرات اليوم ولكن واجهوهم بصدورهم العارية؛ ولذلك انتصروا وحتى عمليات التتريس؛ كانت طوعية وبالرغبة والتفتيش بالذوق والاكل مشاركة؛ والماء للجميع ولو عندك خت وما عندك شيل.. بمثل هذه المثل نجحت الثورة وبعكسها يمكن أن تجهض
