العاوز الغنى بعمل حساب لى فقره.....عمر كبير

06:32 AM November, 19 2019

سودانيز اون لاين
خالد صهيبة-السودان
مكتبتى
رابط مختصر

قالو ايام انقلاب هاشم العطاء لما دخلو الجماعة السجن والدنيا صيف خفيف لا مكيفات لا تلاجات واحد من رموز نظام نميري السجن سخن معاه وبدا عرقو ينقط وهو ينقنق ويتشكى من الحر وضيق الزنازين قام جارو وزميلو في الحراسة قال ليهو :( ما قلنا ليكم وسعوها وكيفوها للظروف ؟؟؟)
اها الأيام دي الكيزان ورموزهم بي اسدهم النتر الجوة السجون شايفهم كل يومين تلاتة بنقنقنو من جوة واهلهم من برة عن الوضع الانساني والحر والبعوض وعدم الحق في الحرية والعلاج والحياة الكريمة كأن المساجين ديل نحن جبناهم مستوردين من سجون كندا او أستراليا وكأنهم ما هم نفسهم الكانوا حاكمين ودي سجونهم الورثوها الناس منهم وهي الأكثر احتراما وسعة ورفاهية من تلاجات معتقلات الامن وبيوت الاشباح والسجون الأخرى .
طيب نجيب ليكم سجون كويسة من وين يا مولانا ؟؟
مش ياها السجون ال فتوها لينا وحكومتنا يا دوب في شهورها الاولي ويا دوب بتمسح في اثاركم وخرابكم ولسة ما وصلو مرحلة إصلاح السجون ؟؟ نجيب ليكم سجون ( قدر مقامكم ) من وين ؟؟ ولا نأجر ليكم فنادق نسجنكم فيها ؟؟
مش ياها نفس السجون ونفس الموظفين ال خليتوهم فيها ؟؟
نجيب ليكم طاقم سجون من ماليزيا وطاقم تمريض فلبيني وسجانات من لبنان ولا كيف ؟؟
أنتو بتنقنقو مالكم ولسة ما تميتو ليكم ٦ شهور ؟؟
والباعوضة دي يعني جابتها حكومة قحت ولا ياها الباعوضة الواحدة ال خليتوها لينا برة في البيوت وفي السجون؟؟؟
وبتتضاربو بالطشاتة مالكم ده مش هدر لاموال الدولة وبزار منكم ساي واساءة استخدام لاثاث حكومي؟؟
الطشاتة دي جابوها ليكم تغسلو بيها خبوبكم بس ما للمضاربة شوفو ليكم عكاكيز ولا ان شاء الله حجارة قوية ساي اتشاتروا بيها بس بدل تبديد اموال الدولة في غير موقعها .
وتعالو هنا انتو خلقكم ضايق مالكم ؟؟؟ إذا نحن ٣٠ سنة لا ضاربناكم لا ضاربنا بعض بي طشاتة أنتو ما قادرين تتحملو خلق واخلاق بعض ٣ شهور ؟؟
- وقلتو لي ما خلوكم تكملو علاجكم ورجعوكم السجن ومعاكم ناس وضعهم الصحي سئ ؟؟
طيب ما تركزوا يااخي مش في سجونكم أنتو زاتو عذبتو المساجين وضربتوهم كهرباء وعملتو ليهم خوازيق حتى الموت واصبتو ناس نصاح بي فشل كلوي وشلل وقضاريف واستشهدو ابطال بي مسامير دقيتوها في راسهم واغتصبتوا رجال ونساء ومنهم من صمد ومنهم من استشهد ومعتلقين منعتوا منهم العلاج داخل السجون ومنهم من تقيحت اقدامهم وهم محامين موجودين الآن وابطال صنعوا الثورة وهم شهود علي كل افعالكم القبيحة وركزو وواحد فيهم قال احححي ولا وووب مافي ؟؟
ما تركزوا طيب مع انو مافي زول عمل ليكم شئ من عمايلكم غير سجن بس وزول واحد اتعرض ليكم بي اذى ولا ضرب ولا صعق كهربائي مافي مع أن الحكومة صناعة الثورة والثوار القامو ضدكم وضربتوهم رصاص وهم برددو سلمية سلمية واسى لا قالوا يضربوكم جوة السجن لا قالو يعذبوكم وبقيتو تتضاربوا براكم بي طشاتة وصحون ؟؟ لعمري ما ضاق سجن بأهله ولكن اخلاق الكيزان تضيق ؟؟
مالكم العوة في شنو ؟؟
في زول هبشكم اسى غير البعوضة ؟؟ والبعوضة دي مش ياها باعوضتكم الخليتوها وراكم يعني الثورة دي تبقى ليكم بف باف كمان !؟
( مالي اراكم تكرهون الجنة ) ؟؟
اصبروا اصبروا وانتو قاعدين جوة هناك خلوهم يجيبو ليكم شرائط فيديو ترفيهية بس فيها مختطفات من خطابات نافع ( اللحاس ) والاسد النتر القال ( لو دقت الموسيقى كل فار بخش جحروا ) وشوفو مولانا عصام البشير برضو ال كان ببشر الشعب طوال ٣٠ سنة انو ( ورا كل محنة منحة ) واتذكروا برضو ان الشعب منتظر المنحة وانتو كنتو أهل المنحة ف انتظروا المحنة واركزوا وبطلو هرجلة انتو واسركم ومااا تخربو الموت بالرفسي الكتير والناس يا دوب فتحت ليها كم بلاغ واصلا ما تعشمو ليكم في لاهاي نحن سجون بلدنا دي ك وطنيين بنشوفها افضل من جنان باريس ولاهاي وامريكا بت الكلب زاتها وقضانا ده عااادل جدا بس صبرا آل كوز فأن موعدكم المحاكمة العادلة.
واخر قولي مثل ما قلت اول ( بطلو تبديد أموال الشعب ) ال جاب بيها الطشاتة وممكن تعضو بعض ساي وتعملو معارك ذات السنون بدل ذات الطشوت دي لو حبيتو تفشو غباينكم في بعض واحذورا عضة اللمبي .
واهلنا قالو ( ال عاوز ال غنى يعمل حساب لي فقرو )
وبس
ونحن الشعب الاووسطى