Post: #1
Title: الرئيس المخلوع يعانى من سخانة الزنزانة .
Author: قلقو
Date: 11-18-2019, 08:43 AM
07:43 AM November, 18 2019 سودانيز اون لاين
قلقو-الخرطوم,السودان
مكتبتى
رابط مختصر
(adsbygoogle = window.adsbygoogle || []).push({});كتبت الأستاذة سلمى عبدالعزيز فى صحيفة (الجريدة) الصادرة صباح اليوم الأثنين :وصف محمد الحسن الأمين عضو هيئة الدفاع عن الرئيس المخلوع (الزنزانة) التى يوجد فيها المخلوع بغير اللائقة وزاد (ذلك المكان لايليق بشخص عادى ناهيك عن رئيس سابق).شبه محامى المخلوع غرفة البشير (بالسلات) الذى يستخدم فى الشرق لطهو اللحوم, وشدد على إنها ساخنة جدا نظرا إلى أن سجن كوبر مبنى من الحجارة التى تحتفظ بدرجات الحرارة لفترات طويلة .وعزى تدهور نظره لسخونة الغرفة ما قاده لمقابلة طبيبه الخاص .وأشار إلى أن مياه الصرف الصحى تطفو على مقربة من غرفة البشير غير المهيأة ,ولفت إلى أنه تم تركيب مكيف (موية) لكنه يضطر لقفله لأنه يجلب روائح الصرف الصحى الكريهة (التى لم يستطع البشير تحملها)إضافة لوجود (الباعوض) مناشدا بترحيله لمنزل تتوفر فيه سبل الراحة حفاظا على صحته .على صعيد متصل توقع المحامى برآءة المخلوع من التهم الموجهة إليه فى الجلسة النهائية والمزمع إقامتها فى 14 ديسمبر , معللا قوله بعدم وجود تهمة من الأساس . وزاد (البشير يمتلك حصانة وحماية دستورية وفى حال صدر حكم بعكس ما نتوقع سنلجأ للمحكمة الدستورية ) .
|
Post: #2
Title: Re: الرئيس المخلوع يعانى من سخانة الزنزانة .
Author: Mohd Ibrahim
Date: 11-18-2019, 08:49 AM
Parent: #1
مفروض يقطعو منو الموية والكهربة وكل يوم يطلعو الصباح يركبوهو مواصلات عامة من الكلاكلات للحاج يوسف ومن سوبا لي كرري عشان يشرب من نفس الكاس المضوقو للناس تلاتين سنة ..
|
Post: #3
Title: Re: الرئيس المخلوع يعانى من سخانة الزنزانة .
Author: قلقو
Date: 11-18-2019, 10:05 AM
Parent: #2
شكرا محمد إبرهيم على المداخلة ,المعروف عن الكيزان أنهم قد فاتوا الحربوية بى غادى . فهم بإلف وجه ووجه . ففى اعلامهم البائس ووقفاتهم المصنوعة يتظاهرون بأنهم يرفضون تسليم المخلوع للمحكمة الجنائية الدولية ,بينما هم يخططون لهذا الأمر . فهم يعلمون تمام العلم بأن السير فى المحاكمات ضده فى السودان سوف تكشف الكثير جدا من التفاصيل للشعب والتى إبتدأ بعض منه يتكشف عند محاكمته الجارية الآن والتى تكشف من خلالها عن كيف كانت تدار هذه الدولة كما تدار المزارع الخاصة ,والتى سوف تدين ليس فقط الكثير منهم, إنما سوف تفضح كامل النظام المتأسلم ,الشيئ الذى قد لايتوفر للشعب أو ولرجل الشارع العادى العلم به . أنا من المؤيدين تماما لمحاكمة المخلوع هنا فى السودان ثم يسلم بعد ذلك للجنائية الدولية لإتمام باقى المهمة .أو كما يقول بعض القانونيين عن امكانية قيام محكمة (هجين) تعقد هنا فى الخرطوم وتضم قضاة سودانيين وقضاة من الجنائية الدولية .
|
Post: #4
Title: Re: الرئيس المخلوع يعانى من سخانة الزنزانة .
Author: mohmmed said ahmed
Date: 11-18-2019, 10:47 AM
Parent: #3
الحمو
|
Post: #5
Title: Re: الرئيس المخلوع يعانى من سخانة الزنزانة .
Author: خضر الطيب
Date: 11-18-2019, 11:03 AM
Parent: #4
سلام قلقو
هو العواليق دا لسه بتشهى و معاهو المعتوه محمد الحسن لسه ما قبضوهو ؟
و بعدين عاملين ليهو طبيب خاص لشنو الاطباء الفي مستشفى السجن ديل ما دارسين طب؟
شيلو الزبالة دا يختو ليهو نقالة ولا عنقريب في عيادة السجن و بس لحدي ما يجي يومو ربنا ياخدو
|
Post: #6
Title: Re: الرئيس المخلوع يعانى من سخانة الزنزانة .
Author: قلقو
Date: 11-18-2019, 11:14 AM
Parent: #5
شفت يا خضر عشان كلامك ده الكيزان عايزينوا يمشى لاهاى حيث الراحات والطراوة . لكن طبعا هم عايزنها تجى من الحكومة الديموقراطية أو من ضغوطات من الثوار و اهالى دارفور عشان هم ما يشيلوا وش القباحة .
|
Post: #7
Title: Re: الرئيس المخلوع يعانى من سخانة الزنزانة .
Author: قلقو
Date: 11-18-2019, 11:16 AM
Parent: #6
QUOTE : الحمو
يا محمد سيد احمد فهمنا يا أبوالشباب .
|
Post: #8
Title: Re: الرئيس المخلوع يعانى من سخانة الزنزانة .
Author: خضر الطيب
Date: 11-18-2019, 11:20 AM
Parent: #6
لاهاي بلاي؟ هههههههه
عشان يمشي يقرف عمر دفع الله
يقعد هنا و يتحاكم هنا و دا رايئ الشخصي
و الرأي في الآخر لأسر الضحايا
يودوهو السجن الجنب حمد النيل
اول ما يفطس يدفنوهو في مقابر حمد النيل
و يغسلو ايدينهم بالتراب سته مرات و السابعة بالموية
من نجاسة و عفن المأفون القاتل
|
Post: #9
Title: Re: الرئيس المخلوع يعانى من سخانة الزنزانة .
Author: Abdullah Idrees
Date: 11-18-2019, 11:25 AM
Parent: #8
على قول حبوباتنا "أحي آآ ود بطني" 
غايتو اتلومتو مع البعوض يا ناس السجون
|
Post: #10
Title: Re: الرئيس المخلوع يعانى من سخانة الزنزانة .
Author: قلقو
Date: 11-18-2019, 11:42 AM
Parent: #9
الأخ عبدالله إدريس
ناس كوبر إتلوموا بالحيل .
الريس قفل مكيف الموية عشان ما تجيب ليه روائح الصرف الصحى الكريهة , والمسكين لايدرى أن هذه الروائح النتنة تخرج من امعائه هو .
|
Post: #12
Title: Re: الرئيس المخلوع يعانى من سخانة الزنزانة .
Author: MOHAMMED ELSHEIKH
Date: 11-18-2019, 11:56 AM
Parent: #10
لو 89 اعتقل الزعماء ناس الامام الصادق ومولانا الميرغني
وبقية زعماء الأحزاب في بيوت محترمة بدل حشرهم في زنازين الشرقيات والمديرية والعنبر الداخلي
كان الناس وضعوه في مكان محترم
|
Post: #11
Title: Re: الرئيس المخلوع يعانى من سخانة الزنزانة .
Author: قلقو
Date: 11-18-2019, 11:55 AM
Parent: #8
وشوف كمان يا خضر صفاقة المحامى الذى يناشد بترحيل المخلوع لمنزل تتوفر فيه سبل الراحة حفاظا على صحته ..
والمطلوب يرحلو المخلوع وين يا حضرة الأفوكاتو فندق الشيراتون مثلا ؟
يا شيخنا عندما كان رئيسك ممسكا بزمام الحكم لم يكن يخصص بأكثر من 2% من ميزانية الدولة للصحة .
مثال لذلك :
ميزانية 2015 خصصت (2.7)مليار جنيه لجهاز الامن .وخصصت للقطاع السيادى (2.52)مليار جنيه .هذا بينما خصصت للصحة (4. 779) مليون جنيه .
وبينما خصصت للقصر الجمهورى 711 مليون جنيه ، خصصت لدعم جميع المستشفيات الحكومية 349 مليون جنيه ولدعم الادوية المنقذة للحياة 245 مليون جنيه ولدعم العمليات بالمستشفيات فقط 24 مليون جنيه . بمايعنى ان مصروفات القصر تعادل أكثر من ضعف المخصص لدعم جميع المستشفيات ! وأكثر من ثلاث مرات المخصص لدعم الادوية المنقذة للحياة !
ارجو من محامى المخلوع أن يختشى على دمه ويخرس تماما .
|
Post: #13
Title: Re: الرئيس المخلوع يعانى من سخانة الزنزانة .
Author: قلقو
Date: 11-18-2019, 12:07 PM
Parent: #11
كلامك مظبوط يا ودالشيخ ,فلو كان الكيزان تعاملوا مع خصومهم السياسيين بشرف ورجولة , اما شمت فيهم أحد , ولكنها الفجور فى الخصومة . كانوا يظنون بأنهم مخلدون فى السلطة كما كانوا يعتقدون ويقولون بأنهم لن يسلموها إلا للسيد المسيح . شفت سكرة السلطة المطلقة بتعمل شنو ؟
لكنهم نسوا تماما إنه الدنيا دوارة وما دوامة .
اولئك( كالذين نسوا الله فأنساهم أنفسهم ).
|
Post: #14
Title: Re: الرئيس المخلوع يعانى من سخانة الزنزانة .
Author: بدر الدين الأمير
Date: 11-18-2019, 12:37 PM
Parent: #13
ياقلقو
خلى اب ريالة يديهو بطشت
قصدى يديهو الطشت مع كوز
زى جضيمات الهندى عزالدين
وحمام الطشت نحن فى الجزيرة
بنسميهو حمام حى اوب عشان بارد
|
Post: #15
Title: Re: الرئيس المخلوع يعانى من سخانة الزنزانة .
Author: محمد أبوالعزائم أبوالريش
Date: 11-18-2019, 01:14 PM
Parent: #14
| Quote: الرئيس المخلوع يعانى من سخانة الزنزانة |
دي حاجة كده زي سخانة البول؟
|
Post: #16
Title: Re: الرئيس المخلوع يعانى من سخانة الزنزانة .
Author: قلقو
Date: 11-18-2019, 01:23 PM
Parent: #15
يا ابو أمير ناس سجن كوبر أبعدوا كل الأوانى المعدنية بأوانى بلاستيكية من ابوريالة لغاية الأبريق بقى بلاستيك . لكن الكوز ياهو نفس الكوز المصدى القديم .
|
Post: #17
Title: Re: الرئيس المخلوع يعانى من سخانة الزنزانة .
Author: قلقو
Date: 11-18-2019, 01:27 PM
Parent: #15
QUOTE : دي حاجة كده زي سخانة البول؟
سخانة البول مقدور عليها يا أبوالريش , لكن السخانة الجد جد لسع جايا , وزى ما حبوبتى بتقول ( الخرا ورا ) .
|
Post: #18
Title: Re: الرئيس المخلوع يعانى من سخانة الزنزانة .
Author: abdalla elshaikh
Date: 11-19-2019, 03:16 AM
Parent: #17
صديقنا قلقو !
واحد معتوه قال شاف الرسول قاعد مع البشير داخل الزنزانه ! السؤال ذنب الرسول شنو يقعد في زنزانه ساخنه ؟ السؤال موجه لشيخنا عبدالحي النّي !
|
Post: #19
Title: Re: الرئيس المخلوع يعانى من سخانة الزنزانة .
Author: mohmmed said ahmed
Date: 11-19-2019, 06:17 AM
Parent: #18
كيف يا قلقو
الحمو اليفسخو
|
Post: #20
Title: Re: الرئيس المخلوع يعانى من سخانة الزنزانة .
Author: قلقو
Date: 11-19-2019, 07:41 AM
Parent: #19
QUOTE : الحمو اليفسخو
شكيت محنك يا محمد سيد احمد ... اهلنا فى الشمالية بيسموه ( حمو النيل)..
والله لا وراكم حمو النيل... شيئ كده يخليك تنكرش لمن تكره حياتك وتتمنى الأنتحار . ولا مو ياهو يا ود سيداحمد ؟
|
Post: #21
Title: Re: الرئيس المخلوع يعانى من سخانة الزنزانة .
Author: قلقو
Date: 11-19-2019, 07:45 AM
Parent: #20
QUOTE : واحد معتوه قال شاف الرسول قاعد مع البشير داخل الزنزانة....
والله يا ود الشيخ انا ما عارف نحن كنا مستحملين جنس الهبل والعبط ده لمدة تلاتين سنة كيف ؟
|
|