Post: #3 Title: Re: اسال العنبة الرامية فوق بيتنا Author: Osman Musa Date: 11-14-2019, 08:12 PM Parent: #2
قباني يا عزيز والله نجدتك جات في الزمن القاتل . يا سلام عليك .. .. عليك الله ارخي اضانك واسمعو في الدقيقة التالتة لمان يقول ( ما تحني يا الدنيا وتقبلي الاعذار ) اموت ؟ اطق ؟ دي اغنيات في قمة الحنية . دي اغنيات في قمة الاصالة والفصاحة . اغنيات زي ماقال احمد سعيد زي المرهم للجراحات .
يا ود موسى اللحن براهو كَبَريت بطلق أخيلة حنين في الجينات ذاتها ويفرطق شتلة الذكرى اللفي القلب والمحبة قدر ، بس الله يغفر ليك من ضياع ريدنا ما تقول قبة الأيام دي الضرس متاورو ، بت الكلب يا الشعيرية
اسال العنبة الرامية فوق بيتنا .. من اجمل أغنيات التاج مكي ذو الصوت الرائع.. والعازفون أساتذة في العزف ولا شك .... اغنية اوسكار الف نجمة... برافو...
Post: #9 Title: Re: اسال العنبة الرامية فوق بيتنا Author: Osman Musa Date: 11-15-2019, 01:06 AM Parent: #5
امتثال سلامات يا امتثال يا بت عطبرة ياخ الله يبارك جيبوها لينا بي صوت الفنان الشاب عبدالكريم ابوطالب . عشان الناس دي كلها تطلع نص الكبري وتقع في نص الاتبراوي . سجن سجن .
Post: #6 Title: Re: اسال العنبة الرامية فوق بيتنا Author: Osman Musa Date: 11-14-2019, 10:16 PM Parent: #4
الاخ الفنان منتصر سلامات انا والله من اشد المعجبين بي طريقة الفنان العملاق التاج مكي في الغناء . انا اديتو قصيدة وانا طالب في الثانوية بحكي ليك عن قصة الاغنية .
استغفر الله. الزول دا شكلو اتغير كتير لكن الصوت لسه إياه. الأغنية تاريخ يا عثمان وذكريات. الله عليكم يا أولاد كسلا أم دَقاق. ياخي بالمرة كدة خلي أخونا النصري يسأل إسحاق الحلنقي دا كيف محافظ على شبابو لسه!!!! ما شاء الله عليه وعيني باردة. الحكاية دي ما عندها علاقة بلحم ولا قش. ربنا يمتع إسحاق والتاج بالصحة والعافية.
Post: #8 Title: Re: اسال العنبة الرامية فوق بيتنا Author: Abdullah Idrees Date: 11-15-2019, 00:09 AM Parent: #7
ياخ الزول غناي جنس غنا ، صوت مليان تطريب عالي ، اختيارات موفقة ، انا ما عارف ساب البلد بدري جدا واغترب ليه؟ السفر طبعا اثر علي مسيرتو او ممكن نقول فرملا تماما زعلان جدا منو هو واحمد شاويش جدا ، الاتنين وقفوا من التجديد والنشاط المتواصل مبكرا جدا كان ممكن يضيقوا ابداعات جميلة جدا رغم كده بنجتر اغانيهم القديمة دي بمتعة كاننا بنسمعا اول مرة ، من فترة لاخرى
Post: #13 Title: Re: اسال العنبة الرامية فوق بيتنا Author: Osman Musa Date: 11-15-2019, 09:28 AM Parent: #8
اخونا عبدالله ادريس سلامات الفنان المتمكن التاج مكي طلع من البلد بدري . طلع في عز ايام مجدو . ما عارف سبب طلوعو من البلد شنو،. لكن اعرف انو كان مهتم بي تطوير الالحان و الموسيقي السودانية اكتر من العدادات .
Post: #10 Title: Re: اسال العنبة الرامية فوق بيتنا Author: Osman Musa Date: 11-15-2019, 02:37 AM Parent: #7
قريبنا الاخ شانتير سلامات التاج ايام تعليمو في معهد الموسيقي كان شعلة من النشاط والجديد . وكان من المبتكرين للتفانين الجديدة من الالحان . الفنان الصومالي اليمني احمد ربشة كان فردتو وكان فترة ساكن معاو . واحمد ربشة كان كتير الاشادة بي التاج وبي طريقة التاج في الغناء. ارجو من الاخوان وضع اغنية التاج يا فرايحي اللون يا ابوعيون احباب بي صوت احمد ربشة .
Post: #11 Title: Re: اسال العنبة الرامية فوق بيتنا Author: محمد النيل Date: 11-15-2019, 03:01 AM Parent: #10
عاين يا عثمان موسى الغنية دى فى سنة ساتة آي ساتة بالتاء زمان كنا بننطقها كدا تتذكر؟؟ المهم فى سنة ساتة انا قبضت بى اغنية العنبة دى الجو بعدما نزلت من المسرح بتاع نادى العمال بتاع السكة حديد فى كوستى كان نشاط مدرسى قامت واحدة اكبر من امى الله يرحمها كانت قاعدة قدام نادتنى ياولدى تعال انا كنت سغنبتوتى الناس مفتكرنى فى سنة اولى قامت وسط النسوان قعدتنى فى حجرها وقالت لى يا ولدى بسحروك ومسكتنى وباستنى فى جضومى شدييييد هههههه تخيل كان بيعزف لى منو فرقة رابطة فنانى كوستى كلها حوالى اربعة كمنجات بقيادة ابراهيم الجاك رئيس الرابطة الله يرحمه واكورديون وجيتار وبيز بجانب الايقاعات طبعاً الجاب لى زخم العازفين دا استاذ فايز عبد الرحمن بتاع العربى حقنا كان بيدرسنا في سنة ساتة كان سكرتير رابطة الفنانين وكان عازف الكمنجة الاساسي حالياً هو فى واشنطون دي سي مع ناس ميرغنى الزين ومجدى العاقب الناس الحلوين عندى مع استاذ فايز صورة هو وواحدة من البلابل لما زرتهم فى ٢٠١٢ فى تأبين وردى شاركت بمرقية من الحانى وكلمات د. المعز عمر بخيت قابلت استاذ فايز بعد كل هذه السنين اسأل العنبة غنيتها مع تومتها اغنية حبيت عشانك كسلا يا سلاااااااام يا عثمان اعدت لينا ذكريات جميلة يا جميل انت
Post: #12 Title: Re: اسال العنبة الرامية فوق بيتنا Author: محمد النيل Date: 11-15-2019, 04:05 AM Parent: #11
إتصل عشان أغنيها ليك لايف بالعود على الهواء مباشرةً
Post: #14 Title: Re: اسال العنبة الرامية فوق بيتنا Author: محمد عبد الله الحسين Date: 11-15-2019, 11:10 AM Parent: #12
يا عثمان ياخ برضه أغنية حبيت عشانك كسلا.. دي أغنية فيها كمية من الشجن و اللوعة شيء ما يمكن تخيله.. و مسكت الجو سنين عددا ...و أظن هي الخلت التاج مكي يشتهر..
صاح يا عنبة إنت؟ ههههههههههههههه
Post: #15 Title: Re: اسال العنبة الرامية فوق بيتنا Author: عبدالعظيم عثمان Date: 11-15-2019, 11:34 AM Parent: #14
سلامات عثمان بالله خت فايت مروح وين ما لسة الزمن بدري ختها جمب العنبة
وبرضو اسمع شجن لإبراهيم حسين نحلف قلبك القاسي بي كل حنان محبتنا دا الغنا الطاعم البِسكِرْ
Post: #18 Title: Re: اسال العنبة الرامية فوق بيتنا Author: Osman Musa Date: 11-15-2019, 06:40 PM Parent: #15
اخونا عبدالعظيم سلامات انا معاك ياريت واحد من الاخوان يقوم هسع يدرع ليك طلبك . طبعا اخوك ما عندو معرفة بي جلب الحاجات للبوستات . ابراهيم حسين برضو فلتة كسلاوية .
Post: #17 Title: Re: اسال العنبة الرامية فوق بيتنا Author: Osman Musa Date: 11-15-2019, 03:53 PM Parent: #14
اخونا محمد عبدالله الحسين سلامات تاج منتصف السبعينات وقريب نهاية التمانينات . في داك الزمان التاج واخوهو في الابداع احمد ربشة كانوا هم المحلقين في القمم الشاهقة بي ديك الاغنيات الحنينة . في نهاية التمانينات هاجر ربشة الي لندن وتبعو التاج الي الخليج . لكن يا فرايحي اللون والعنبة وحبيت عشانك كسلاء رفضن الهجرة وقعدن في قلوب العشاق حافيات حالقات ومعتقات بي نفس الطعم الرهيب .
Post: #16 Title: Re: اسال العنبة الرامية فوق بيتنا Author: Osman Musa Date: 11-15-2019, 12:35 PM Parent: #11
اخونا ود النيل الذي في بوسطن بوسطن عاصمة اهلنا الايرش ومرتع الجمال .. ياخ سلامات العنبة اغنية زي الوسادة تتكي عليها من حر شدايد الزمن .. العنبة يا ود النيل تحليق جميل مع ذكريات من تحب . العنبة اغنية قادرة تلفليك الزمن عشرين سنة وتوقفك في محطة جميلة .. اسال العنبة الرامية فوق بيتنا .
Post: #19 Title: Re: اسال العنبة الرامية فوق بيتنا Author: عبدالعظيم عثمان Date: 11-15-2019, 07:11 PM Parent: #16
امسك يا عثمان شجون لإبراهيم حسين بصوت أسرار بابكر https://youtu.be/Wnzwnc4zDYIhttps://youtu.be/Wnzwnc4zDYI
بالموبايل القصة صعبة واحد من الحرفا يفك الرابط الفوق دا إذا ما فتح
Post: #20 Title: Re: اسال العنبة الرامية فوق بيتنا Author: Osman Musa Date: 11-15-2019, 09:32 PM Parent: #19
يا شيخ عبدالعظيم عمك ابراهيم حسين زاتو من الكسلاويين الصعبيين شديد وهو برضو نديد الجماعة ديل
يا عثمان ياخي فنانين كسلا ديل كلهم حنينين ... لكن عبد العظيم حركة بيحرّك كل مساماتي ونخاخيش الذاكرة لما استمع لأغنية أرض الحبايب يا رمز المحنة. بتعجبني مسحة الفوضوية الفيها وبقوم بتحلل معاها لعواملي الأولية ... وهاك يا جاهلية متأخرة.
Post: #22 Title: Re: اسال العنبة الرامية فوق بيتنا Author: Osman Musa Date: 11-16-2019, 07:57 AM Parent: #21
قريبنا شانتير سلامات . عبدالعظيم حركة عليه الرحمة كان عالم براهو . عبدالعظيم كان الخرطوم بي الليل . في منتصف السبعينات تسمع صوتو يجيك من كل الاتجاهات . من جهات بحر شمبات . و من الديوم الشرقية والمقرن والعباسية ومن الهبي لاند . ولحظة يقوليك ارض الحبايب يموتوا ناس ويقوموا ناس وتنتفض العشش وحي الوابورات . كانت الدنيا زينة في ديك الايامات يا شانتير وكان صحن الزلابية بي قرشين والشاي بي لبن كافوري بي قرش . وكافوري كانت طاهرة .
Post: #23 Title: Re: اسال العنبة الرامية فوق بيتنا Author: Osman Musa Date: 11-16-2019, 07:24 PM Parent: #22
ظالمة يا دنيا وقاسية يا دنيا ظالمة يا دنيا وقاسية يا دنيا .. ليه ؟