Post: #1
Title: موسى و مصطفى
Author: أبوذر بابكر
Date: 11-10-2019, 07:21 PM
06:21 PM November, 10 2019 سودانيز اون لاين
أبوذر بابكر-
مكتبتى
رابط مختصر
نضمى منشور هنا فى نهاية العام 2015
اتذكرته وانا بسمع اغنية حسن عطية
حبيب عمرى انت لى كل شى
واللافت فيها اكتر لزمات آلة البيكلو
وتجليات الموسيقار المبدع موسى محمد ابراهيم
زى ما عمل فى اغنية الوسيم القلبى راده
|
Post: #2
Title: Re: موسى و مصطفى
Author: أبوذر بابكر
Date: 11-10-2019, 07:23 PM
Parent: #1
موسى و مصطفى
بيكلو و قانون
موسى محمد ابراهيم و مصطفى كامل
سودانى و مصرى
معظم تسجيلات الأغانى فى اذاعة ام درمان، النهر السخى السقى و روى و غذى وجدان كل السودانيين، معظم الأغنيات من منتصف الخمسينات تقريبا وكل الستينات من القرن الفات، ما بتخلو من اشراقات وابداعات الثنائى الجميل، موسى محمد ابراهيم وسحر البيكلو و مصطفى كامل و دفق القانون
كل اغنيات التاج مصطفى تقريبا و بعض اغنيات الكاشف و عبد الحميد يوسف وحسن عطية و العاقب و عبيد الطيب و سيد خليفة و الشفيع و ابو داود وبدايات مجموعة المطربين (الجداد وقتها) الاستعانت بيهم اٌذاعة فى فترة اضراب كبار الفنانين، صلاح محمد عيسى و محجوب عثمان و رمضان حسن والكانو فى بداياتهم، اتسجلت وكان فيها بيكلو موسى و قانون مصطفى
ويكفى بس الزول يسمع (فى محراب النيل) التجانى و عثمان حسين عشان يتذوق و يشوف طعم القانون وكيف قدر المصرى الغريب على ذوق السلم الخماسى و البعيد من الوجدان و الحس السودانى، كيف قدر و بطريقة مدهشة تطويع الآلة و مزجها فى تناغم جميل فى اللحن السودانى، و فى كتير زى محراب نيل التجانى و ابو عفان
وزى ما قدر موسيقيو السودان على تطويع العود و ادخاله فى عمق الذوق السودانى، قدر مصطفى كامل و بشكل عجيب انه يدخل و يطوع القانون و يدوزنه على مزاج الحس و الذوق السودانى، واغرب ما فى الأمر انه و مع ذهاب مصطفى كامل انتهى دور القانون فى الأوركسترا السودانية، والسؤال ليه مافى اى واحد من الموسيقيين اهتم بتعلم و عزف الآلة الجميلة دى ؟ وليه اختفى القانون و توارى بالرغم من كل الجمال العمله و اثرى بيه اعمال خالدة ؟
ويحكى كتير من مطربينا و موسيقيينا كيف انه مصطفى كامل ما كان فقط بكتفى فى المشاركة فى العزف وفق اللحن الموضوع، بل انه كان بساهم فى احيان كتيرة فى خلق اللحن و ادخال لزمات و اجزاء اصيلة فى اللحن
اما المبدع موسى محمد ابراهيم فيكفى انه صانع و واضع ذلك الطعم الشهى لتلك الآلة الصغيرة حجما والكبيرة مقاما و حضورا فى كل اغنيات الفترة ديك و الما تزال تأسر الروح و تبهج القلب كلما انسابت و تدفقت
وموسى ملحن موهوب و مبدع زى ما هو عازف فنان و عبقرى، ويكفينا بس ماضى ذكريات عثمان مصطفى وغيرها من الابداعات
والحمد لخالق الجمال انه اكرمنا بوريث جميل و مبدع كبير زى الموسيقار اسامة بابكر عشان يتواصل جريان نهر البيكلو و ينساب للناس جمال و عطاء ساحر
وما زلنا نحلم بقانون تانى يعيد ولو شوية من ندى ذلك الزمن العجيب
تحية واجلال وتقدير لروح المبدع مصطفى كامل، و كل الإمتنان و المحبة للمبدع الخلاق استاذنا موسى محمد ابراهيم
|
|