الكول..

02:56 AM November, 06 2019

سودانيز اون لاين
AMNA MUKHTAR-سري للغاية
مكتبتى
رابط مختصر

الكول..وفوائده

الكول نبات له العديد من الاسماء في مناطق السودان المختلفة ويستخدم بصورة رئيسية كباودر في ملاح العصيدة في غرب السودان. ويدخل في صناعة الاوراق والاعلاف والصناعات الغذائية والصيدلانية ويستخدم عند بعض القبائل بديلا للقهوة كما تستخدم بذورة لعلاج الايرقان و يستعمل كشاي لعلاج الصداع والم المعدة والامراض الغير معروفة. وعالميا يستخدمه الصينيون كعلاج لاحمرار العيون والصداع ويعتبر مادة بديلة للحوم. وهو غني بالعناصر الغذايئة رغما عن رائحتة التي يكرها البعض .
اﻻسم اﻻنجليزي : Sickle pod
الأسم اللاتيني: Cassia obtusifolia
العائلة: البقولية (Leguminocea)
الكول نبات حولي ينتمي للعائلة البقولية تم تصنيفه كشجيرة ونبات عشبي وعشبة ضارة. في غرب السودان يسمى الكول وفي شرقه يسمى سوريب أو سوريب عفن (Sorib) وهو يتواجد بكثرة في امريكيا وافريقيا وآسيا.
واوراقه مركبة تتكون من ثلاثة أزواج من الوريقات ذات شكل بيضاوي.أزهاره صفراء إلى برتقالية اللون وقد يصل طول سيقانه إلى 2 متر.زوج الوريقات اصغر من زوج الوريقات العلوية وأوراقه حساسة للضوء.

كيفية تجهيز الكول:
أولاً يتم تجهيز إناء التخمير (زير) كالآتي:
يتم مسح إناء التخمير من الداخل بنوع من الطين من نفس نوع الطين الذي تم به تصنيع إناء التخمير.ثم يتم مسحه من الداخل بطبقة من مادة لزجة عادة نبات الباميا واحياناً يستخدم نبات بري يسمى أباديب (Abadeib) حتى لا يختلط نبات الكول مع التراب.ثم يتم دفن إناء التخمير في منطقة باردة حتى عنق الإناء.
ثانياً: يتم تنظيف أوراق الكول من السيقان والبذور والأزهار والمواد الغريبة ويتم دق الأوراق مع مراعاة عدم فقد العصيرثم يتم وضع العجينة في إناء التخميروتغطى بأوراق الذرة الرفيعة ثم يتم وضع حجارة تم غسلها جيداً أعلى أوراق الذرة لتقوم بضغط العجينة للأسفل. ثم يغطى فم الإناء بصينية معدنية أو طبق معدني ثم يتم اغلاق فم الإناء والغطاء المعدني بالطين لمنع دخول الحشرات إلى إناء التخمير. كل ثلاثة أيام يتم خلط المكونات داخل الإناء جيداً باليد وتغطى بأوراق ذرة رفيعة جديدة وبعد 14 يوم يتكون الكول (مادة سوداء ذات رائحة قوية) ويتم تشكيل العجينة في شكل كور صغيرة وتوضع في الشمس لمدة تتراوح بين 3-4 أيام حتى يجف ولونه تقريباُ اسود

يحتوى الكول علي نسبة عالية من البروتينات النباتية الخالية من الكلوسترول والبكتيريا النافعة ويطبخ منفرداُ او يعتبر كإحد أهم التوابل في الغرب، فيضاف كمسحوق إلي اطعمة أخرى كملاح البامية، اللوبا، الروب، الكشنه، البربور، التقلية، المرس، الشرموط، الكمبو، دودري، مصران، فرندو، عيير، مندتجشي. وغيرها، يمكنك إضافة المسحوق لأى ملاح بلدى حسب المزاج، والكول ذو رائحة نفاذه قوية لا يطيقها أغلب الناس الذين لا يعلمون فوائده ولذلك يطلقون عليه " كول ميسر تأكلو باليمين وتشمو بالليسر " اي تأكله بيدك اليمنى فتشم رائحته في يدك اليسرى.

فوائد الكول لﻻنسان:

1- عمل توازن للميكروبات الطبيعية فى القناة الهضمية والجهاز التنفسى
2- تحسين مقاومة التوطن للميكروبات فى القناة الهضمية والجهاز التنفسى والبولى
3- خفض مستوى الكوليسترول والحد من ارتفاع الكوليسترول عن طريق تفكيك الدهون في الأحشاء مما يمنع الجسم من إعادة امتصاصه
4- تثبيط الطفرات فى مكونات القناة الهضمية وإحتمال تكون أورام فى الأمعاء
5- تحسين كفاءة عمل جهاز المناعة والوقاية من الالتهابات. فتناول الأطعمة الغنية بالمحفزات الحيوية يعزز جهاز المناعة حيث يزيد إنتاج خلايا البلازما والخلايا الدفاعية في الجسم. وتناولها يقلل الإصابة بالاسهال وبالتهابات الجهاز التنفسي والإصابة بنخر الأسنان كما يقلل من نوبات الحساسية لدى الأطفال. وليس لها تداخل فى النظام المناعى للجسم.
6- تحسين إمتصاص المعادن خاصة الكالسيوم والتغلب على أمراض هشاشة العظام.
7-.الحد من ارتفاع الضغط فقد أظهرت الدراسات أن الببتيدات التي تنتج عن عمليات التخمر تساهم في تخفيض ضغط الدم المرتفع
8- تحسين هضم البروتين
9- زيادة الفيتامينات والأملاح المعدنية بفعل نشاط التمثيل الغذائى لها
10- منع أو تقليل إصابة الجهاز الهضمى بالأمراض ومنع حدوث إضطرابات هضمية والإمساك وأمراض الكبد , وإلتهاب الجلد
11- ضبط وتقليل معدل الإرتفاع فى ضغط الدم
12- إنتاج مواد مثبطة لنشاط ميكروبات الفساد
Anti- microbial Substances
13- كفاءة فى علاج الإسهال
Diarrhea
14- تنقية الجسم من السموم، الوقاية وتحفيز عمل غدة البنكرياس وينشط جينات التنقية في الكبد. وحمايته من المواد الكيميائية الموجودة في الأطعمة والمشروبات المختلفة.
15- مفيد لمرضى التوحد باعتباره مصدر طبيعي للبكتيريا النافعة. فمن المعروف وجود نقص كبير في البكتيريا النافعة في الجهاز الهضمي لدى مرضى التوحد
16- يستخدمه العطارون في مناطق دارفور وجنوب كردفان لعلاج الكثير من الامراض
17-مفيد في حالات التهاب الكبد الوبائي وللمصابين باليرقان
18- يستعمل كمقوي


منقول :
من صفحة الإدارة العامة لنقل التقانة والإرشاد
ولاية الخرطوم

Quote: (مادة سوداء ذات رائحة قوية)

سلام امنة
لون العجين بعد الـ 3 اسابيع بكون اخضر جدا.
درجة الخضرية بؤكد جودة التخمير.
اللون الاسود بيكون بعد التجفيف.
برضو بالمناسبة يفضل عدم فتحو نهائى الا في نهاية التخمير و هي 3 اسابيع. اذا تم فتحه ممكن يدخل بكتريا و بالتالي بعرضو للتلف.

لينا زى حمسة سنين كده نستخدم (عرق) فى كل الطبايخ اسمه غورنجال او العرق الاحمر.

لو طبخت فطيسة وضعت قطعتين من العرق ؛ الاكل يصبح شهى جدا و ريحته ذكية.

العرق من غرب السودان

Quote: لينا زى حمسة سنين كده نستخدم (عرق) فى كل الطبايخ اسمه غورنجال او العرق الاحمر. لو طبخت فطيسة وضعت قطعتين من العرق ؛ الاكل يصبح شهى جدا و ريحته ذكية. العرق من غرب السودان

هل الغورنجال هو الخولنجان (بذرة الخل)؟

شن عرفنى يا محجوب؛ غايتو اى حلة طبيخ بلقى تلاته او اربع عروق لونها اسود ؛ ما عارف لونها قبل الطبيخ...بكره بصورها ليك

Quote: شن عرفنى يا محجوب؛ غايتو اى حلة طبيخ بلقى تلاته او اربع عروق لونها اسود ؛ ما عارف لونها قبل الطبيخ...بكره بصورها ليك

عرفتو تب.
انا من قبيل قاعد احرك ذاكرتي لانو الاسم ما غريب علي.
فعلا بستخدمو في الابرى.
المهم دخلت عمل قوقل و جاب لي خولنجان من شجرة الخل البستخدمو عروقو و ثمارو.

دا الغرنجال يا النصري..
انا غايتو ح استعمله في تظبيط الشربوت. فعلا حاجة
جميلة نكهة وطعم.

يا محجوب طيب كيف بيتحول الى مكعبات جافة و رمادية اللون
عندى منو كمية و بستعملو بعد حل حجر صغير منو بالماء و اضافتو لملحات الويكة
كان تقلية كان ويكة بيضاء
-----
فيكم زول جرّب الويكة البيضاء بى سوربة الكوارع
سلام امنة و ضيوفك الكرام

الغرنجال شغل كوارع يا شيخ النصرى
و آبريه برضو بس الاحمر

يل جلالدونا
النصيبة دى تشتغل مع اى طبيخ ؛ والله انا مستغرب انها غير منتشرة بين عامة السودانيين.

ليها مفعول اقرب للسحر منه للحقيقة .

تشيل اى زفارة

Quote: يا محجوب طيب كيف بيتحول الى مكعبات جافة و رمادية اللون عندى منو كمية و بستعملو بعد حل حجر صغير منو بالماء و اضافتو لملحات الويكة كان تقلية كان ويكة بيضاء

سلام جلال
اها بعد ما يتخمر لـ 3 اسابيع, ببقي عجين سميك, بعداك بالاصابع بدلدموها زى الزلابيا و برصوها في برش نضيف (جديد من السوق) و بشروها في الشمس.
اللون الرمادى بديك تقريب لعمر الكول. الجديد دائما بكون لونو اسود فيهو اخضرار. كل ما يطول, اللون بتحول الي اسود و الرمادى ده في الغالب غبار الزمن الترحال :)

يا النصري شكلك قاصد الجنزبيلا

أخيتي آمنة مختار
لك التحايا
إندهشت غاية الإندهاش .... وماكنت عارف إنو الكول
والدوشة بتاعة الكول دي كلها .. أياهو السوريب!!!!!

يسعد اوقاتكم
قرنجالكم ده قلت لواحد
معاي نجربه مع الملوحه (التركيه)
قالي التركين حلاتو في زفارته داير تخرب لينا مالك

التحية لى امونة نحنا بناكل الكول فى الاسبوع مرتيم

18- يستعمل كمقوي

يعني شنو مقوي؟؟

Quote: منقول : من صفحة الإدارة العامة لنقل التقانة والإرشاد ولاية الخرطوم

الاخ دينق عبدالله
فعلا شئ محير انو الادارة العامة للارشاد يكتب كلام مبهم بالطريقة ديك.
غايتو لو الكلام ده مكتوب من قبل مجي الحكومة الانتقالية, تأكد انو كاتبو كوز مستهبل اشتغل في الوزارة عن طريق الواسطات.


___________
بالمناسبة الموضوع ككل فيهو اخطاء كثيرة جدا.

Quote: 18- يستعمل كمقوي يعني شنو مقوي؟؟

دينق عبد الله ..
أسالني دبل !

عموما الأسئلة التعسفية دي خليها..

تحية للجميع .. وألف شكر بت أبا أمنة مختار،
خلونا أولاً نضع صورة لنبات الكول .. لأن في بعض الأخطاء عايز أصححها .. هنا النبات ..

sicklepod


Senna obtusifolia (Linnaeus) Irwin and Barneby


Cassia obtusifolia Linnaeus

يعنى توجد فصيلتين أثنين من الكول يعرفهم سكان غرب السودان ..

هنا البذور .. مقارنة بال Penny أصغر عملة أمريكية .. بمثابة التعريفة بتاعت زمان .. الدولار فيه مية "بيني"



بريمة

سلام بريمة
الصورة النانية دى العندنا ليها.
في تشابه كبير بين السنمكة (السني سني) و الكول في الاوراق و حجم شكل النبات. الفرق انو السنمكة لونو مغبش و الكول اخضر شديد.

تمام ول أبا محجوب .. أنا وأنت متفقين .. لكن لاحظ الأشجار خلف الصورة الثانية .. لا تشبه أشجارنا خالص .. الصنوبريات لا توجد في السودان .. وأشك في وجودها في جنوب السودان ..
ولو لاحظت هناك أسمين .. Casia obtusifolia وهو النوع الذي نعرفه في غرب السودان .. أما النوع الثاني Sena obtusifolia هي موجودة لكننا لا نستعملها في تحضير الكول ..

وهذه أول مغالطة وقع فيها الكاتب .. خلط ما بين السنمكة والكول .. والخوجات الذين صنفوا النباتين .. تشابه عليهم البقر .. منذ وقت التنصيف ..

وجاييكم مرة أخري.

بريمة

الخطأ الفادح الذي وقع فيه الكاتب .. في الأتي

Quote: اﻻسم اﻻنجليزي : Sickle pod الأسم اللاتيني: Cassia obtusifolia العائلة: البقولية (Leguminocea)

وهذه العائلة هي التي يقع فيها نبات السنمكة (السني سني) وليس الكول ..
هنا نقل مباشر من ال JSTOR مجلة علمية معتبرة .. نقلت نفس التناقض ..

Quote: Name Identification Cassia obtusifolia L. [family FABACEAE: CAESALPINIOIDEAE ] (stored under name); Senna obtusifolia (L.) Irwin and Barneby [family FABACEAE: CAESALPINIOIDEAE ] Cassia tora L. [family FABACEAE: CAESALPINIOIDEAE ] Related name Senna obtusifolia Cassia tora Cassia oxyphylla Senna mollissima Cassia obovata Cassia grandis Senna mucronifera Cassia mucronifera Senna obustifolia Cassia obtusifolia Flora Entry for SENNA obtusifolia (L.) Irwin and Barne [family LEGUMINOSAE-CAESALPINIOIDEAE] Herbarium Royal Botanic Gardens, Kew (K) Collection Flora Somalia Resource Type Reference Sources Entry From Flora Somalia, Vol 1, (1993) Author: by M. Thulin (Acacia by M. Thulin, A. S. Hassan and B. T. Styles) [updated by M. Thulin 2008] Names SENNA obtusifolia (L.) Irwin and Barne [family LEGUMINOSAE-CAESALPINIOIDEAE], by (1982); Cassia obtusifolia L. [family -CAESALPINIOIDEAE], (1753). Fig. 188 B, C. [type as above] Cassia tora [family LEGUMINOSAE-CAESALPINIOIDEAE], sensu auctt., non L. Information Erect herb or shrub 0.6–2.5 m high. Leaves 5–13 cm long, with a cylindrical gland between each of 1–2 pairs of leaflets; stipules linear; leaflets 3 pairs, obovate, (1–)1.5–6 x (0.5–)1–4 cm, subglabrous to pubescent. Flowers 1–2 on generally very short axillary peduncles; pedicels (0.5–)1.5–3.5(–4.5 in fruit) cm long. Sepals rounded at apex. Petals yellow, obovate, 1–2 cm long. Stamens: 3 lower ones longest with the anthers narrowed into a neck towards their tips, 4 somewhat smaller and 3 very small. Pods linear, straight, or curved, slightly angular in section, (6–)13–23 x 0.4–0.6(–0.7) cm, dehiscent, glabrescent. Seeds many, longitudinally arranged, brown, subrhombic or ovoid, 4.5–6.5 x 2–4 mm, with a very narrow areole on each face. Range S3 pantropical. Altitude range less than 100 m. Distribution SOMALIA Warfa and Warsame 1078; Scassellati s.n.

التناقض هو كيف يقع نفس النبات في عائلتين مختلفتين، عائلة FABACEAE .. وهى العائلة التي يتبع لها الفول المصري ..
والعائلة الثانية .. عائلة .. LEGUMINOSAE .. وهذه هي العائلة البقولية .. والتي تتتع لها السنمكة ...

الكاتب جمع صفات العائلتين .. في وصفة لفوائد الكول ..

بريمة

وهنا الناس الأثنين الذين صنفوا النبات .. وأخطأوا فيه ..
دائماً الكول بتاعنا نحن العارفنة في غرب السودان صنفه Linnaeus وأسم الكول Cassia obtusifolia

المنصفين الأخرين أروين وبارنبي .. هم الوقع لديهم الخلط .. شايفين حشروا أسم لنّيوس حشراً بين قوسين
Senna obtusifolia (Linnaeus) Irwin and Barneby

ومن الملاحظات العامة .. الكول ليس من الحوليات .. بينما نبات السني نبات حولي ..
ومثل هذا الخلط يعتبر من الأخطاء التي يقع فيها الخواجات بصورة متكررة .. حتى شجرة الشاي المعتاد لدينا الخواجات سوي ليه شجرتين .. والصينين أصحاب شجرة الشاي الأصلي رفضوا الشجيرة الثانية والتي توجد في الهند بأنها شجرة من نفس فصيلة الشاي لكنها تختلف .. وحروب الشاي هي أكبر الحروب التي وقعت ما بين المملكة العظمي والصين .. وكادت أن تخرج تايوان من الصين نهائياً من القرن السابع عشر الميلادي .. كما قام الأنجليز بتهريب الشاي من الصين وتهريب حتى مزراعي الشاي والذين يجيدون تذوق طعمه ورائحته إلي جنوب شرق أسيا .. حيث قاموا بسرقة الشاي الصيني وتوطينه هناك ..

والملاحظة الأخرى كلمة obtusifolia التي أوهمت الكاتب .. وهذا الأسم لا علاقة له بالشجرة بل بوصف أوراق الشجرة .. folia تعني صفق الشجر .. والمقطع obtus وهو وصف للصفقة .. والكلمة المركبة كلها تعنى صفقة مدورة .. وكثير من الأشجار والنباتات توصف بهذا الأسم ..

ومن كل النضمي الكتير دا .. أنا أعتمد فقط السردية في النص حول كيفية صنع الكول .. وتجفيفة .. والأوصاف التي أوردها ول أبا محجوب .. ودائماً المثل يقول أسأل خبير ما تسأل مجرب.

نكتفي بهذا القدر ..

بريمة

Quote: الكول نبات حولي ينتمي للعائلة البقولية تم تصنيفه كشجيرة ونبات عشبي وعشبة ضارة. في غرب السودان يسمى الكول وفي شرقه يسمى سوريب أو سوريب عفن (Sorib) وهو يتواجد بكثرة في امريكيا وافريقيا وآسيا.

الجري والطيران غلبنا النعام .. كيف يكون شجيرة وفي نفس الوقت عشبة .. (قارنوا بين السنمكة وكلمة شجيرة .. تجدونها صحيحة) و (قارنوا بيت الكول وكلمة نبات عشبي تجدونها صحيحة) ..

لكن الشيئ الجميل والذي يحسم الجدل أن الكول كأحد التوابل .. لا يصنع إلا في دارفور وكردفان .. وهم يعرفون الكول من السني سني .. أبداً لا يختلط الكول في أذهان الكردفانيين والدارفوريين بنات السنمكة ..

بريمة

صباح الخير على صاحبة البوست و الضيوف الكرام

يا بريمة حسب خلفيتك الزراعية مش CASIA SPECIES

بتضم فصائل كتيرة منها سنة مكة و السنط و الطلح و القرض و أظن الكول برضه؟؟

و الا أنا داخل شمال؟

Quote: يا بريمة حسب خلفيتك الزراعية مش CASIA SPECIES بتضم فصائل كتيرة منها سنة مكة و السنط و الطلح و القرض و أظن الكول برضه؟؟ و الا أنا داخل شمال؟

أنت شوية أختلط عليك البقر ما بين الكاسيا .. والأكاسيا ..Cassia species وال Acacia species
الأولي تضم السنمكة .. وعدد يفوق المئة أنواع أخري .. أما الأكاسيا في هى تضم جميع السنطيات : السنط، القرض، الطلح، والهشاب، والكتر، والسيال .... وعيييك ..
أما الكول يقع تحت فصيلة الفافا أو الفابا Fabaceae أو Faba أو Fava .. التي تضم الفول المصري وأنواع أخري ..

كل هذه الأسماء (عوائل .. من عائلة) سواء الكاسيا، الأكاسيا أو الفابا .. كلها تقع تحت فصيلة البقوليات .. يعنى من قبيلة البقوليات (يعنى الجد تحت واحد).

بريمة

وفات علي أن السنط والقرض شيئ واحد .. أحمد ومحمد أحمد ..

بريمة

علم والله يا بريمة !
فعلا، أعطي العيش لخبازه ..

شكرا للجميع على هذا الدفق من المعلومات وإثراء البوست.

طيب يا جماعة..
ما دام الهيئة العامة للشنو كدا ما عارفة طلعوا ما ناقشين .
طيب، فوائد الكول الحقيقية شنو .. ؟

Quote: لكن لاحظ الأشجار خلف الصورة الثانية .. لا تشبه أشجارنا خالص .. الصنوبريات لا توجد في السودان .. وأشك في وجودها في جنوب السودان ..

سلام بريمة
برضو لو لاحظت الصورة بتدل علي انو دى زراعة و ليس كما هو عندنا هناك بقوم في الخلاء ساكت علي اطراف الوديان

زارني صديقي دكتور ابوبكر من ابناء الفاشر وهو واحد من الملمين جدا عن ثقافات وعادات وتقاليد دارفور
ومشيت اوريهو الفناء الخلفي كما يقول الامريكان ، وإني زارع بامية وجرير وملوخية ورجلة وهلمجر
بس كانت في نبتة عاملة لي إزعاج ، ومن اشوفها طوريتي كانت جاهزة، قام قال لي ده هو الكول.
وأنا واحد من الناس، بموت في الاكلات الشعبية ، يلا ، جاهزين للتصدير

ول أبا محجوب،

Quote: سلام بريمة برضو لو لاحظت الصورة بتدل علي انو دى زراعة و ليس كما هو عندنا هناك بقوم في الخلاء ساكت علي اطراف الوديان

والله يا محجوب .. من أول الملاحظات التي لاحظتها .. لكن كتمت السر تب .. .. غتاتة ساكت ... و أخوك أضمر في نفسه شيئ .. نحن في الغرب، قاتلنا شنو غير الصراحة .. كان تخلي بت أبا أمنة تستفيد من تلك التجربة.

بت أبا أمنة،
ألف شكر علي الإطراء .. وأخشي أنني تدخلت في مجال تركته منذ زمن بعيد .. وهذه دعوة لمراجعة تصنيف الكول .. موضوع السنمكة محسوم ..
أفيدك أن أحد أساتذة كلية الزراعة وأظنه بروف حامد ضرار! .. إن لم تخني الذكرة .. درس الكول من ناحية علمية .. تجارب معملية .. وأثبت أنه يحتوي أصح بروتين نباتي وحيواني علي الأطلاق ..
بحثت في الأنترنت وجدت الأتي: The Indigenous Fermented Food of the Sudan: A Study of African Food and Nutrition
by Hamid A. Dirar (Author)

لكن الكتاب غير متوفر رغم وجود الأسم .. أبحثوا عنه في كلية الزراعة

بريمة

مع التحية للاستاذة آمنة
وحبيبنا بريمة .. رائع دائماً
لم أعرف ما المقصود بــ ( كول)
ما في واحد نوبي مستعرب يجاوب علينا بإسم نوبي للكول
أول مرة زول تربال ما يعرف ( كول )
بريمة لو سمحت الاسم بالحروف الانجليزية للنطق الصحيح

الاستاذة آمنه تحياتي اليوم كلها حاجات جديدة علينا رغم سنين العمر ( تاماي ) وكما ( كول )

Quote: لم أعرف ما المقصود بــ ( كول) ما في واحد نوبي مستعرب يجاوب علينا بإسم نوبي للكول أول مرة زول تربال ما يعرف ( كول )

الهبيب علي عبدالوهاب
يا اخي لو عندك جارك او جيرانك دارفورىين في المدينة الانت فيها, اسألهم كلهم لو عندهم كول (فتح الكاف و الواو و سكون اللام). لو عندهم, بالله اعزم نفسك عندهم بدون اى كلام و قول ليهم عايز تجي تفطر عندهم يوم الجمعة عصيدة بملاح تقلية و كول.

أوكى, الكول شئ ده زى الشطة بتفتح الشهية. يعني مع وجبة العصيدة لازم يختو كول و شطة لما كان الزمن سمح معاهم سمن بقر. و مثل الشطة ايضا تستخدم بكمية بسيطة. بستخدم مع ملاح التقلية او الروب و ليس مع البامية المفروكة.

اما من الناحية الاخرى, فممكن تشبهو بالتركين و الملوحة عندكم. يعني فيها ريحة (نتيجة للتخمير لمدة 3 اسابيع). تجمع اوراق نبات الكول (الصورة اعلاها من الاخ بريمة) فقط و لا تضاف لها اى شئ اخر. بتتهرس زى ورق الخضرة و تتكب في ماعون فخارى كبير زى زير الموية و تتقفل تماما حتي لا يدخل الهواء او البكتريا لمدة 3 اسابيع.
بتبقي عجينة خضراء. بعد بتم تقطيعها لاحجام صغير (مثل الزلابيا) و تجفيفها في حر الشمس ثم تسحن في شكل بودرة زى الشطة.

الحبيب محجوب .. تحياتي يا جميل ..
شكراً كثير على الشرح .. يعني النطق ( كاول)
يوم جمعة مساء لمة القهاوي إن شاء الله أعرف المزيد
شكراً حبيبنا الجميل محجوب ..

مع التحية للاستاذة آمنة .. بوست جميل

Quote: علم والله يا بريمة ! فعلا، أعطي العيش لخبازه

كيفن عاد يا بت مختار
انتي وقعتي ليه في قبولو

Quote: كيفن عاد يا بت مختار انتي وقعتي ليه في قبولو

يا أخ حرام عليك .. بت أبا أمنة، وول أبا علي عبد الوهاب ودكتور محمد عبد الله وول أبا قدور و ول أبا كبر .. وشخصي الضعيف .. نحن القاعدين نثقف العالم بالتراث السوداني وعكسنا شخصية الشعب السوداني ثقافياً وتراثياً ..
والأخ محجوب .. قربنا نمرقوه من السياسة .. إلي براح التراث .. من خلال التراث شوف الناس الفوق ح يوحدوا السودان .. كدي أديها قدلة لبوست دكتور محمد عبد الله الحسين .. حول "اللاوعي الفردي والقبلي" .. شوف الدش هناك ..

أنت وريني أنت مع ياتو حسبة؟ .. خليك مع الكوكلس عادل أمين .. بتاع الكوكتيلات (حقوق الملكية لأستاذ أسامة الخواض).

تصدق جيت أرد علي الأخ علي عبد الوهاب .. ولقيت محجوب ما قصر تب ..

أها فتكم بعافية ..

بريمة

Quote: أها فتكم بعافية ..

انا والله مستمتع جدا بما تكتبون بحثا في هذا التراث الثر
وممكن اجيكم برضو بحاجتنا يا بريمة المابتعرفوها من مناطق النيل الأعلى.

لكن بيني وبينك
ما وقعت لك في بوهيتين
واحدة اتو
واحدة قافلة من الاس للتسعة؟

Quote: أوكى, الكول شئ ده زى الشطة بتفتح الشهية. يعني مع وجبة العصيدة لازم يختو كول و شطة لما كان الزمن سمح معاهم سمن بقر. و مثل الشطة ايضا تستخدم بكمية بسيطة. بستخدم مع ملاح التقلية او الروب و ليس مع البامية المفروكة. اما من الناحية الاخرى, فممكن تشبهو بالتركين و الملوحة عندكم. يعني فيها ريحة (نتيجة للتخمير لمدة 3 اسابيع). تجمع اوراق نبات الكول (الصورة اعلاها من الاخ بريمة) فقط و لا تضاف لها اى شئ اخر. بتتهرس زى ورق الخضرة و تتكب في ماعون فخارى كبير زى زير الموية و تتقفل تماما حتي لا يدخل الهواء او البكتريا لمدة 3 اسابيع. بتبقي عجينة خضراء. بعد بتم تقطيعها لاحجام صغير (مثل الزلابيا) و تجفيفها في حر الشمس ثم تسحن في شكل بودرة زى الشطة.

تشكر كتيييير الحبيب محجوب على طريقة تكويل الكول ههههه
طبعا جوعتني ياخ ..بحبو حب ما عادي ..
كنا بناكلو مع حبوبتي الدارفورية الله يرحمها .

.......


شكرا لكلللل الأعزاء الذين مروا وأضافوا لهذا البوست ..
البوست بوستكم يا جماعة ..وللفائدة العامة طبعا 🌺🌹🌷