Post: #1
Title: حين تسافر شيماء:
Author: محمد عبد الله الحسين
Date: 10-09-2019, 05:47 AM
Parent: #0
05:47 AM October, 08 2019 سودانيز اون لاين
محمد عبد الله الحسين-
مكتبتى
رابط مختصر
حين تسافر شيماء:
البداية، كانت تجربة زواج فاشلة. ثم....
الشابة (شيماء علي) بلغة عامية مصرية ظريفة و بسيطة و دون تطويل أو التفاف تجذبك لقراءة كامل الموضوع.
تسوقكم هي بسلاسة و هدوء للاستمتاع بهذا السرد الظريف و اللغة العامية البسيطة التي تحكي عن روح وثابة و عزيمة صلدة....
....باختصار قصة و تجربة تستحق ليس القراءة فقط بل التطبيق.
|
Post: #2
Title: Re: حين تسافر شيماء:
Author: محمد عبد الله الحسين
Date: 10-09-2019, 05:56 AM
البداية: صدمة
أبريل 2012 (كان فاضل اربع شهور ويبقى عندي 29 سنة) حاسة إني على مشارف الثلاثين .. كنت كل يوم والثاني أنزل مع ماما أقابل عريس والموضوع يقلب مع أمي بخناقة علشان انا رافضاه لأسباب أنا مصممة عليها زي انه عاوزني أسيب الشغل وانا رافضة أو انه عاوزني أسافر أعيش معاه في دولة عربية وانا رافضة .. امي كانت شايفة انها أسباب غير مقنعة وخصوصا مع سني ده مينفعش أني اتشرط وكأني مثلا عندي خمسين سنة مش 29.. كانت دائما تقولي أنت فاضلك سنة وحيبقى عندك ثلاثين وساعتها حتبقي كبرتي وكأن البنت بعد الثلاثين المفروض يضربوها بالرصاص مثلا لو متجوزتش!
لحد لما جه خبر حلو من الشغل وهو أني تم أختياري أنا واثنين زميلات لي للسفر لحضور مؤتمر تبع شغلنا في فنلندا في أغسطس ..يعني شهر عيد ميلادي وحروح فنلندا.. بس أول لما عرفت انها فنلندا مكنتش اصلا اعرف هي فين او فيها ايه يتزار او يتشاف.. بس مجرد فكرة اني روحت طلعت الباسبور وركبت الطيارة لأول مرة في حياتي ولأول مرة في حياتي رجلي تلمس أرض دولة أجنبية .. كل دي كانت احاسيس وقتها متتوصفش .. بس الفكرة اني روحت قعدت في فندق وكان معايا زميلاتي في الغرفة والوقت كان ما بين المؤتمر الصبح أو الشوبنج في المحلات بالليل فمعتبرتش ان المرة دي تعتبر سفر بالمعني الحقيقي للسفر ولكنها كانت خطوة ساعدتني جدا في كسر حاجز الخوف من المجهول اللي اسمه السفر بره مصر..
رجعت من السفر وكلي سعادة ولكن برضه أمي كانت بتبين لي عدم أهتمام بالسفر أو الشغل أو اي حاجة بعملها في حياتي طالما انا داخلة على الثلاثين ولسه متخطبتش وأختي اللي اصغر مني بسنتين متجوزة وعندها طفل..
رجعت بصدمة حضارية وأضف عليها صدمة معنوية وإحساس بالإحباط خلوني أقرر أني عاوزة اسيب البلد دي خالص ..
طيب أعمل ايه قولت اجرب أقدم في منح دراسية.. انا بكالوريوس علوم وممكن ألاقي حاجات في تخصصي.. وبالفعل لقيت منحة للدراسة في هولندا لمدة سنة وكان أخر ميعاد للتقديم لها اول فبراير 2013 .. ومن شروط المنحة اني يكون معايا شهادة الايلتس IELTS .. روحت حجزت لامتحان الايلتس أول يناير وأخذ اجازة اسبوعين من الشغل في ديسمبر علشان اقعد أذاكر ..
في الاسبوعين دول اتعرفت من خلال الانترنت على شاب فهمني انه بيحب التصوير الفوتوغرافي والفن وده يمكن اللي فتح كلام ما بينا وقالي أنه مهندس ديكور عنده مكتب ديكور..
حسيته من كلامه يشبهني في حاجات كتير قوي قالي انه معجب بيا وبعد كلام كام يوم مبقتش مركزة في مذاكرة الايلتس وخصوصا لما لقيته بيقولي أنه نفسه يجي يتقدم لي ويقابل بابا بس حيستنى لما أخلص الامتحان.
وروحت امتحنت وفي نفس الوقت بعد الامتحان جه بالفعل قابل بابا وماما لوحده واعتذر وقتها انه مجبش أهله علشان باباه مريض وبابا ارتاح له هو وماما
وقالولي شكله أنسان كويس ومحترم ومن كتر ما انا كنت سعيدة اني اخيرا عثرت على شريك حياة يشبهني وكمان اهلي موافقين عليه لما ظهرت نتيجة امتحان الايلتس ولقيت نفسي جايبة الدرجة اللي كانت المنحة محتاجاها
مروحتش قدمت للمنحة وقولت خلاص انا مش عاوزة اسافر طالما لقيت حد أحبه ويحبني وحنتجوز..
لحد ما بدأت حاجات غريبة تحصل اللابتوب بتاعه اتسرق منه .. وبعدها اخته الحامل راحت المستشفي ..
ولما فات حوالي اسبوعين مجاش قابل بابا كلمه اعتذر له ان باباه داخل مستشفي يعمل عملية جراحية علشان عنده السرطان.
.بدات أقلق واحس ان الوضع مش طبيعي وخصوصا ان الموضوع كان فات عليه شهرين وبقينا في مارس وحجته كل شويه ان باباه لسه نايم في السرير مريض..
فبدأت أدور وراه على الانترنت وافتكرت بنت كانت عنده على الفيسبوك فدخلت سالتها انتي تعرفي فلان الفلاني؟ قالتلي اه طبعا ده خطيبي!!
وطلع عامل مع البنت دي نفس القصة .. بس مفهمها قصة ثانية خالص.. انه بيشتغل حاجة ثانية وان باباه متوفي وواخد منها فلوس كتير برضه …
عرفت انه نصاب واتصدمت واكتئبت حسيت ان كل حاجة ضاعت.. اتضحك عليا وضاعت مني المنحة ..
|
Post: #3
Title: Re: حين تسافر شيماء:
Author: محمد عبد الله الحسين
Date: 10-09-2019, 06:58 AM
Parent: #2
أبريل 2013…. وبعد ما عشت شهر مكتئبة وفي الشهر ده كنت أتفرجت على فيلم جوليا روبرتس EAT PRAY LOVE واللي فيه بعد ما بتكتشف أنها غير سعيدة في حياتها بتقرر انها تسافر لأكثر من بلد (إيطاليا والهند وبالي)
علشان تعثر على ذاتها وعلى السلام النفسي.. الفيلم ألهمني اني أعمل نفس الشئ.. فكرت أني مش حفضل حزينة ومكتئبة وبضيع عمري مستنية الشخص المناسب.. أنا حعمل كل اللي في نفسي لحد ما ألاقي نفسي وساعتها بس
حقدر اختار صح الشخص المناسب..
سألت نفسي.. هو انا ليه مستنية أسافر بمنحة من الشغل او منحة دراسية؟ ليه مسافرش كده مع نفسي بفلوسي؟
كنت قريت كتير عن شباب بيتكلموا عن السفر محدود التكاليف.. وكنت عرفت موقع كاوتش سيرفنج CouchSurfing واللي من خلاله انت بتسافر بره وحد بيستضيفك في بيته وبالتالي ده بيوفرلك مصاريف الفنادق ..
فقولت خلاص انا أحجز تذاكر طيران رخيصة وأدخل الموقع ده اتعرف على ناس من عليه وأروح أقعد عندهم واهو منها اوفر فلوس ومنها اتعرف على أصدقاء من دول مختلفة..
أهلى شويه كانوا متعاطفين معايا بعد ما عرفوا أني اتصدمت في الشاب اللي اتقدملي وكانوا شايفني مكتئبة وانا قولتلهم اني حسافر على نفقة الشغل فوافقوا بس مكنوش عارفين انها رحلة على نفقتي الخاصة.
فكرت طيب حجيب فلوس السفر منين؟ كنت من يوم ما اشتغلت وانا بحوش فلوس علشان تنفعني وقت ما اجي اتجوز بالاضافة لمبلغ كان شايله لي والدي علشان الجواز ..
روحت سحبت وقتها 12 ألف جنيه .. دفعت 8 الاف جنيه في أربع تذاكر طيران وتذكرة اتوبيس.. (طيران القاهرة فنلندا) (طيران فنلندا باريس) (أتوبيس باريس امستردام) (طيران امستردام روما) (طيران روما مصر)
كل ده ب8 الاف بس والله .. تذكرة الاتوبيس من باريس لامستردام ونزلنا ترانزيت ساعة في بلجيكا كانت بأربعين يورو يعني حوالي 400 جنيه بس..
|
Post: #4
Title: Re: حين تسافر شيماء:
Author: محمد عبد الله الحسين
Date: 10-09-2019, 07:04 AM
Parent: #3
مجموعة صور لشيماء خلال أسفارها المتعددة
|
Post: #5
Title: Re: حين تسافر شيماء:
Author: محمد عبد الله الحسين
Date: 10-09-2019, 07:07 AM
Parent: #4
قصة سفري وحدي لهيلسنكي بفنلندا – باريس – أمستردام -روما في 16يوما
قدمت الفيزا لفنلندا علشان قولت أني روحتها قبل كده فممكن يطلعوا الفيزا الشنجن بسهولة.. ولأن بصراحة السفارة بتاعتهم محترمين جدا ومسمعتش انهم بيرفضوا طلبات طالما ورقك مظبوط وكامل وفعلا بعد 14 يوم كلموني أني اخذت الفيزا..
ودخلت موقع سكاي سكانر Skyscannerحجزت تذاكر الطيران بالفيزا واشتريت تذكرة الاتوبيس وانا هناك..
ودخلت كاوتش سيرفنج كتبت اني مصرية جاية لوحدي اوروبا وذكرت الدول اللي رايحاها وبدور على حد يستضفني عنده وجاتلي طلبات استضافة كتير جدا عكس ما كنت متخيلة .. قعدت أقرا كويس بروفايلات الناس اللي بعتولي واتاكدت انهم كويس لما لقيت عندهم أكثر من 10 تعليقات إيجابية من ناس غيري كانوا استضافوهم ..
في فنلندا لما روحت المؤتمر كنت اتعرفت على شاب مصري عايش هناك كان قالي لو جيتي تاني حيساعدني يلاقيلي مكان اقعد فيه.. وبالفعل قعدني عند سيدة روسية جميلة وكنت بنام في غرفة بنتها اللي عندها 6 سنين وروحت معاهم عملنا حفلة شواء على البحر في مدينة أيسبو ..
وفي باريس قعدت في بيت فتاة فرنسية داخل قلب باريس بيتها يبعد عن برج ايفل حوالي نصف ساعة مشي وعزمتني على حفلة عيد ميلاد صديقة لها فرنسية روحت الحفلة كلها فرنساويين كانوا مبسوطين قوي أني مصرية ومسافرة لوحدي.. واتعرف على طبيب باكستاني استضافني عنده وفرجني على البلد وساعدني كتير بانه وصلني للمحطة وانا مسافرة..
وفي امستردام ملقتش حد يستضفني ولكني لقيت هوستل للبنات في امستردام Hostelle Amsterdam قعدت فيه وقابلت شاب هولندي أخذني في جولة في هولندا وخرجت معاه ومع اصدقائه حضرنا حفلة سوى ووصلوني للهوستل..
وفي روما قعدت في بيت شباب أستضافوني عندهم في غرفة واللي بعتلي طلب الاستضافة كان شاب ايراني عايش في روما .. كنت بصحي الصبح ادخل المطبخ الاقي شباب وبنات من جنسيات مختلفة وفي منهم ايطاليين ونقعد نفطر سوى ونتعرف على بعض وقابلت كام شاب مصري اسمه كريم اخذي في جولة في روما وعرفني على بنتين مصريات عايشين في روما بقينا اصدقاء وفرجوني على روما بالليل..
وفي وسط كل ده زورت متاحف ومكتبات في كل الدول دي وكثير كنت بكون لوحدي معايا الخريطة وبمشي على رجلي وأصور..
رحلتي كانت مدتها 16 يوم في اربع دول كل دولة قعدت فيها اربع ايام بنام في بيوت ناس اول مرة اقابلهم في حياتي وبقوا أصدقاء لي..
لفيت معاهم وشوفت البلد بعيونهم وده اكتشفت انه احلى بكتير من أنك تشوفها من كتاب او من خريطة .. أهل البلد دائما بيكونوا عارفين خبايا واماكن السائح العادي ميعرفش يروحها..
اكتشفت نفسي وحسيت أني انسانة قوية و وجودي لوحدي طول الفترة دي مريت بمشاكل وحليتها ومواقف قدرت اتجاوزها واتعامل معاها كل ده خلاني راجعة وانا ثقتي بنفسي 100% ..
راجعة وعارفة انا عاوزة ايه.. عاوزة اعيش حياتي وبس ..
وأول حاجة عملتها لما رجعت من السفر روحت أخذت كورس تصوير فوتوغرافي وده خلاني أتكلم مع شاب كان زميل لي في الشغل طوال سبع سنين بس كان كلامنا قليل قوي..
هو كان بيحب التصوير ومصور فوتوغرافي ولما بدأت أخذ كورس التصوير بقيت بتكلم معاه كتير وأكتشفت ان انا وهو فينا فعلا حاجات كتير شبه بعض وحبينا بعض واتخطبنا وبعد ست شهور أتجوزنا..
اتجوزت وانا عندي 31 سنة والحمد لله عايشة معاه حياة زي ما كنت بحلم بيها بالظبط .. وحاسة اصلا ان حياتي بدأت بعد الثلاثين من يوم ما سافرت.
وفكرت اعمل الصفحة دي Shee Travels علشان تشجع البنات في مصر والدول العربية انهم ميخافوش من السفر وأنهم لازم يعيشوا حياتهم ويشوفوا العالم ميفضلوش قاعدين مكانهم مكتئبين مستنين العريس
اللي حيجي يسفرك في شهر العسل وبعد كده ممكن يخليكي تسافري تاني وممكن لأ..
|
|