يجب أن لا نخدع أنفسنا.

11:47 AM October, 06 2019

سودانيز اون لاين
Deng-
مكتبتى
رابط مختصر

الحكومة الإنتقالية الحالية لن تستطيع تقديم أي شخص للمحاكمة في قضية فض الأعتصام .
فهي حكومة بلا قوة تنفيذية حقيقية. القوة التنفيذية الحقيقية لدى العسكر بمجلس السيادة (المجلس الخازوق).
البرهان والكباشي وحميدتي هم المسئولين مسئولية مباشرة عن إصدار أوامر فض الأعتصام، فهل يوجد من يستطيع أن يواجهم الان أمام المحاكم قانننيا؟

الإنتظار الى نهاية الفترة الإنتقالية قد يكون حلا، ولكن هل سنصل الى ما بعد الفترة الإنتقالية بسلام مع هولاء العسكر؟

يادينق
زمان ونحن اطفال لمن الواحد يشيل من التانى
حاجة ماحقتو
طوالى بقول التانى سيد الشىء
حقك راح
ويبدو لى مع قحت القحط
حقنا راح

بدر

الوضع كان ومازال معقد جدا، ويجب أن لا نلوم قحت لوحدهم.

كدى يا دينق ورينا حلك لانك عايش فى امريكا وعارف الكثير المثير

سلامات يا صديق إبراهيم.

لا يوجد لدي أي فطرة أو حل عاجل، ولكن بالوضع الحالي وخلال الفترة الإنتقالية لا يمكن تقديم أي شخص ينتسب الى مجموعة العسكر بمجلس السيادة الى محاكمات .

ما هو واحد من الاتنين
يا نجعل عدونا الكيزان المتربصين بالسودان الجديد ويضعون المتاريس أمام الوصول إليه
يا نجعل عدونا هم العسكر ونضل الطريق
العسكر في البداية كانوا ممكن يكونوا سلاح لنتخلص به من الكيزان ودولتهم العميقة
بشكل جذري
لكن بريق كرسي الحكم الذي جلس عليه العسكر أعمى أبصار وبصيرة قادة الثورة
فاقتتلوا على غنيمة الحكم مع العسكر في باحة القيادة العامة شهورا
وخلوا ظهرهم للعدو المتربص بهم جميعا !

سلام يا دينق،
يا أخي، سعيد جداً بلغتك في هذا البوست

أبوبكر عباس.

بس الموضوع نفسه غير سعيد.

صاح الموضوع ما سعيد
ونحن فعلاً في ورطة كبيرة

السودان في مرحلة أخف الضررين ..
لكن يبدوا لي حكمة الشباب التي أوصلت السودان هذه المرحلة .. سوف تتخطي أي عقبة حينما تصلها المرحلة ..


ما تتسرعوا .. سياسة النفس الطويل أفضل من التسرع ..

بريمة

حتى الان نجح الجميع في الامتحان بما فيهم الكيزان
والخسارة من نصيب اسر الشهداء.

سلام يا حبيبنا جورج ولا فض فوك، وفعلا دا الحاصل، ولذا لا نؤيد حكومة حمدوك ١٠٠%
وفي نفس الوقت لا نستطيع أن نلومهم، لأن هذا الحل هو للأسف الشديد أفضل الأسوأ.

كسرة: شايفك أسقطت لقب أبو لمبة من المستنير، هل هو إعتراف ضمني منك بإستنارته؟ 😁😁

ولا ازالة اسم السودان من قائمة الارهاب

Quote: الإنتظار الى نهاية الفترة الإنتقالية قد يكون حلا، ولكن هل سنصل الى ما بعد الفترة الإنتقالية بسلام مع هولاء العسكر؟

سلامات
نهايه الفتره الانتقاليه بعيده ومايدور الان من حركه للنظام القديم وصمت عسكر السيادى المريب والازمات فى السودان تدل على محاولات تعويق مسار الحكومه الانتقاليه ويصبح الحديث عن وصولها 2020 حلم.
الحكومه ضعيفه وطالما لم تحدث شرعيه ثوريه فى بدايات الثوره فالخيارات مفتوحه على الاسوء

يا نذير،
أبلمبة بقى زي الكاوبوي الحصانو مات في الخلا،
جاء شايل السرج في ضهرو من مسافة بعيدة،
لمان جاء داخل المدينة لقى روحو مرهق جداً جداً وما عندو حق حصان جديد؛
باع السرج واشتغل في بار يغسل العدّة

عشرات المشاركات بالمنبر تستحق رد ساخر،
بعد أكتبو، أرجع المسدس وأعود لغسيل العدّة

قد أتفرغ تماماً لغسيل العدّة

والله يا استاذ دينق كوركنا هنا كتير في إنو العسكر دييل ما ناويين على خير
لأنهم عارفين نفسهم مفروض يكونوا في الزنازين وفي توافق تام بينهم وبين الكيزان
لأنهم من نفس الطينة ، بالله واحد زي عبد الحي يوسف كان حيجاهر ويتفاصح لو
ما كان لاقي حماية؟ الناس دييل حيكونوا عكنونة للشعب السوداني ولن ينعدل الحال في وجودهم

Quote: ما هو واحد من الاتنين يا نجعل عدونا الكيزان المتربصين بالسودان الجديد ويضعون المتاريس أمام الوصول إليه يا نجعل عدونا هم العسكر ونضل الطريق العسكر في البداية كانوا ممكن يكونوا سلاح لنتخلص به من الكيزان ودولتهم العميقة بشكل جذري لكن بريق كرسي الحكم الذي جلس عليه العسكر أعمى أبصار وبصيرة قادة الثورة فاقتتلوا على غنيمة الحكم مع العسكر في باحة القيادة العامة شهورا وخلوا ظهرهم للعدو المتربص بهم جميعا !

منتصر عبد الباسط.

العسكر في مجلس السيادة والكيزان لديهم نفس الاجندة ونفس المصير و نفس المستقبل.
أسئل نفسك كيف حصل هولاء العسكر على تلك المناصب وتلك الرتب؟
ولماذا تصرفوا بتلك التكتيكات المضادة للثورة، وكيف فضوا الإعتصام بتلك الطريقة العنيفة والوحشية؟
الإجابة واضحة جدا، لأنهم كيزان أو موالين للكيزان.

Quote: صاح الموضوع ما سعيد ونحن فعلاً في ورطة كبيرة

أبوبكر عباس.

التعامل مع هذه الورطة أو المعضلة يحتاج الى حكمة وتخطيط وإستعداد كبير.

اذا ارادت الحكومة المدنية تنفيذ اهداف الثورة لازم تصطدم بالعسكر
ده شيء حتمي وبالطبع خطير جدا .
يبقى كيف يستطيع المدنيين تجنب اصطدام عنيف بحميدتي وبرهان؟
هل زخم الثورة وسطوة الجماهير وشعبية حمدوك عوامل كافية للضغط على
العسكر وارغامهم على الانسحاب من الحياة المدنية والسيطرة على ميولهم
وطموحانهم ؟ هل تمتلك حكومة حمدوك الشجاعة الكافية للاصطدام مع العسكر
من الاساس؟ هل تبادر حكومة حمدوك بالبدء في تصفية نفوذ الجيش خاصة الدعم
السريع ام يترك ذلك للحكومة القادمة بعد الفترة الانتقالية لان الحكومة المنتخبة
يفترض انها ستحكم بموجب تفويض دستوري كامل لا وجود للعسكر فيه.
هذه اسئلة صعبة ومعقدة جدا ..
شخصيا اخشى تحول الدعم السريع الى تجربة مماثلة لتجربة حزب الله في لبنان
اذا ترك هكذا ينمو ويبرطع في البلد علي كيفو في ظل وجود علاقة هلامية شكلية له مع
الجيش وفي ظل تنامي امبراطوريته الاقتصادية ونشاطاته المدنية الغريبة والمشبوهة
التي يتغول من خلالها على سلطات وزارات مدنية اخرى !
لذا اتمنى ان تكون الحكومة قوية بما يكفي لوضع قضية الدعم السريع على طاولة
مجلس الوزراء والاستفادة من زخم الحالة الثورية للجم حميدتي وقصقصة اجنحته
لانه مهدد حقيقي لامن ومستقبل السودان.
اول شي الزول ده لازم يبعد من الحياة المدنية تماما هو والميليشيا بتاعتو دي
تانيا لابد من خضو الدعم السريع لقانون وقيادة القوات المسلحة بما يعني هيكلته
لا يعقل ان يقوم حميدتي بترقية افراد مليشياته بنفسه هكذا بلا قانون ولا اسس
ثالثا لابد من فحص جميع الامور المالية المتعلقة بالدعم السريع ومصادر تمويله
وممتلكاته واستثماراته ، عايزين نعرف الميليشيا بي اموالا واستثماراتا دي تابعة للجيش ولا بتاعة
حميدتي ؟
رابعا تصفية كل استثمارات الجيش والدعم السريع سواء ببيعها للقطاع الخاص او المختلط
او الحاقها بشركات القطاع العام زيها وزي اي شركة حكومية على ان تديرها كفاءات مدنية
واضح جدا من 11 ابريل انو العساكر "بكاكو مع الثوار وببيضو مع الكيزان" عشان كده
الامور دي لو ما اتحلحلت من بدري فلن تنتهي الفترة الانتقالية على خير ابدا ..

نفسي اعرف الشيوعي البكتب بي اسم دينق ده شايت وين ؟؟؟
اول حاجة البعطل القانون والعدالة في السودان" المحكمة الدستورية " ايضا يعطل الفدرالية واعادة الاقاليم هم نفس الناس = النخبة السودانية وادمان الفشل في ق ح ت نفسها ؟
ما تدرع الفساد والاجرام في حميدتي والبرهان وجريمة القيادة بس
وهسة يا دينق افتح عينك قدر الريال ,,,امن تكتب adil amin شايت وين يا فاقد البوصلة..نحن خطنا واضح ما فاضح لو في قرد شمبانزي كان فهمو من 2010
انا مع الحركة الشعبية شمال الاصل+ الحزب الاتحادي الديمقراطي الاصل = السودان الجديد قوى نظيفة ومحترمة لحدي هسة
اقرا المقال ده كويس وفكنا من الكلام المغتغت اعادة تدوير الدولة المركزية القاعدة تحت جذم المصريين والخليج ما بتنفع معانا
اول حاجة نجدع العلم القبيح بتاع مايو 1969 ده ننسي ناس ساطع السنهوي ديل بلا عبدالناصر بلا صدام حسين

Quote: د. ابراهيم الامين استقال من نداء السودان وحذر من مؤامرة و قبله استقالت سارة نقدالله و المؤامرة يقودها الصادق المهدي الذي كون جسم جديد اسماه الخلاص الوطني و بدأ ينادي بحل الحرية و التغيير و الغاء ميثاقها و الانخراط في ميثاق الخلاص الوطني و هذه هي مؤامرة نداء السودان .. اسمعوني كويس ..نحنا كشعب لاااازم نقيف ضد اي مخطط يقوده الصادق المهدي و علي تجمع المهنيين ان يكون راس الرمح في التصدي لهذه المؤامرة .. د. ابراهيم الامين قدامكم اسالوه من هذه الواقعة الحدثت في ٢٠١٤ جاهو عبدالرحمن ود الصادق المهدي شايل ليهو مبلغ كبير من الدولاترات قال ليو دي هدية من البشير د.ابراهيم بالطبع رفض و المصيبة الاكبر قال انه عندما اخطر الصادق المهدي بالامر اتضح له انه عارف ...فيما يلي كلام مهم ارجو انكم تقروهو مهما كان طويل ٥ دقايق ما كتيرة علي الوعي ب ما هو نداء السودان #عااااجل و #خطييييير محاولة الصادق المهدي (الغاء ميثاق الحرية و التغيير و استبداله بميثاق الخلاص ) الصادق المهدي قال اتنازل عن قيادة نداء السودان عشان يدي الشباب فرصة للقيادة لكنه لسة مكنكش في قيادة حزب اللمة و لما يفكها حيفكها لي بتو . الحاصل انو فكا نداء السودان لان نداء السودان بعد دا مبرمج لخيانة الوطن و ما بيحتاج لقيادته براو مبرمج و ماشي في طريق محدد : الجبهة الثورية لاعبة دورها و اشترطت تاخير تكوين المجلس السيادي و تعيين الولاة الجدد لحدي ما ترضي و باقي مكونات نداء الكيزان حزب اللمة و المؤتمر السوداني و البعث الكرتوني بتاع وداعة عضو المجلس الوطني الكيزاني الامنجي ديل لعبوا دورهم في تعديل الوثيقة الدسنتورية بعد توقيعها دون علم الشعب .. الصادق و الدقير و سلك و وداعة و ساطع الحاج ديل كلهم عندهم مصالح مرتبطة بالهبوط الناعم المرتبط بتكبيل العدالة و دا البيربطهم بالعسكر و ديل كلهم مرتبطين بالكيزان و العدالة بتضرهم ..زيهم زي عساكر المجلس العمالي الارهابي الخايفين من العدالة .. ساطع الحاج اكبر خازوق و امنجي و اقذر من الكيزان لانه قواد كيزان و عمل ثغرات قذرة جدا في الوثيقة لكن بمساعدة بقية عملاء الهبوط الناعم ...الحاصل دلوكت انهم بقيادة الصادق دايرين يلغوا ميثاق الحرية و يعملوا ميثاق هبوط ناعم تحت قيادة الديناصور اسمه ميثاق الخلاص الوطني .. العملية دي قوي الثورة لازم تقيف بصلابة ضدها .. اكرر الانتباه و اليقظة و المراقبة و المواجهة و المساءلة و عدم السماح بهذه التعديلات المغرضة التآمرية ...ساطع الحاج و مساعدته السنهوري يجب ان يقدموا لتحقيق و كذلك الناس العدلوا الوثيقة . طبعا العسكر محتاجين لهبوط ناعم يكبل العدالة لانهم ارتكبوا مجزرة القيادة العاوز يعرف المزيد عن مصلحة المدنيين المذكورين في تنفيذ هبوط ناعم فليقراء ما يلي شر تعارض المصالح العميق الذي يفصل آل المهدي عن الشعب السوداني و يجعلهم اقرب الي اعدائه الكيزان . في 27 مارس 2019 دعا الصادق ابناء عمومته مبارك الفاضل المهدي و الصادق الهادي المهدي و احمد نهار و غيرهم من آل المهدي و قادة التفرعات المنشقة عن حزب الامة و التي شاركت في فساد و جرائم الإنقاذ ضد الشعب السوداني الي اجتماع عاجل بدار حزب الامة مساء ذلك اليوم الذي صادف اربعاء ..الاجتماع دا تم تحت بصر و سمع جهاز امن قوش الذي منع قبل ايام منه اجتماع لقوي اعلان الحرية و التغيير في نفس المقر . ضم الاجتماع عدد من آل المهدي بينهم بالاضافة للصادق الصديق المهدي _ مبارك المهدي وزير الاستثمار الاخير و الصادق الهادي المهدي نائب البشير و وزيره ...الناس ديل بعد اجتمع بيهم الصادق طلعوا بيان قالوا فيه نحن اجتمعنا عشان نوحد حزب الامة و هذا كذب كما سوف تثبت الحقائق و البراهين ، الناس الاجتمعوا اليوم داك كلهم بيواجهوا تهم فساد و تهم مشاركة في نظام مافيوي في اثناء ما كان بيرتكب جرائم فظيعة ضد المواطنين و دي حاجات بتؤدي في حال نجاح الثورة لسجنهم لفترات طويلة و الصادق المهدي تجمعه معهم مصلحة ان ابناؤه بالذات عبدالرحمن و بشري بيواحهوا نفس المصير و كما اسلفت و تنبيهي هذا للشعب كله و لقوي الإعلان علي وجه الخصوص ..يخواننا مافي بشر في الدنيا في تاريخ العالم قدم ابنه للذبح غير سيدنا إبراهيم عليه السلام و هو نبي و دي حاجة ما حتتكرر تاني بالذات من شخص مثل الصادق المهدي ..الزول دا صرح يوم الخميس البعد الاجتماع دا بان هدف الاجتماع هو دعم الثورة ..يوم الجمعة امتلات الاسافير فخراً بان الصادق المهدي طلع في مظاهرة ضد النظام. .يوم السبت الصادق طلع بيان نفي فيه تهمة انه طلع في تظاهرة ضد النظام .. اوريكم القرابة و صلات النسب الوثيقة لاسرة الصادق المهدي و آل المهدي عامة مع الكيزان...طبعاً عارفين انو الصادق المهدي هو خال اولاد الترابي الذي زوجته هي وصال المهدي .. ابن الترابي عصام مصيره حال نجاح الثورة ليس أفضل من مصير ابني الصادق لان عصام هذا متورط في قضايا فساد تضمن سجنه لفترات طويلة هذا غير الأضرار المادية و الاجتماعية..ما تنسوا انو اي واحد من الناس ديل يتسجن بيتضروا بسبب ذلك افراد كتيرين زوجات ابناء بنات امهات خالات عمات الخ..فكروا في الصورة الكبيرة ...علي عثمان محمد طه الذي يواجه بلا شك تهم عقوبتها الاعدام متزوج بت خال الصادق المهدي اخو امه لزم و ابنه مصعب علي عثمان متزوج “إسراء” كريمة آل “عبد الله جاد الله” وهو ابن خال الصادق الصادق المهدي الذي امه هي رحمة جادالله عبدالله...ابن عبد الرحيم محمد حسين ابنه متزوج احدي كريمات ال المهدي وكذلك الاسلاموي “عبد الجليل حسن عبد الجليل” مدير جامعة الإمام الهادي، متزوج الدكتورة “بخيتة الإمام الهادي المهدي شقيقة نائب البشير المدعو د.الصادق الهادي المهدي ، إسماعيل إبراهيم ابن “إبراهيم أحمد عمر” رئيس البرلمان سابقا متزوج من ابنة “فاطمة عبد الرحمن المهدي” ..ما ننسي مبارك الفاضل المهدي حيخش السجن ب تهم عقوباتها فترات طويلة... زوجة مبارك المهدي سمية هباني .. هي شقيقة زوجة غازي صلاح العتباني سامية هباني و غازي حيخش السجن لفترات طويلة ابراهيم هباني.. وهو اخ «سمية وسامية».. القيادي البارز بحزب المؤتمر الشعبي حيخش السجن. ** السيدة فاطمة الأمين عبدالله جادالله بنت خال الصادق المهدي شقيق امه رحمة عبدالله جادالله ... فاطمة بنت خال الصادق دي هي زوجة علي عثمان محمد طه، والدتها مدينة عبدالقادر هباني.. وأبوها «الامين عبدالله جادالله هو أخو الحاجة رحمة عبدالله جاد الله، والدة السيد الصادق المهدي و فاطمة هذه نفسها متهمة بتهم فساد و استيلاء علي اراضي و استغلال نفوذ زوجها لتمليك عدد من آل المهدي قطع اراضي..الناس ديل كلهم يخواننا عندهم اولاد و بنات و احفاد ففكروا في الصورة الكبيرة لكي تفهموا المنظر و اتمني كان يكون عندي الفيديو بتاع عرس مصعب و د علي عثمان دا علي اسراء دي عشان تشوفوا كل آل المهدي و ناس الترابي و ال البشير و كل الكيزان اركان النظام و اسرهم و اولادهم و بناتهم مع بعض و تفهموا حاجة و تتخيلوا الوضع حيكون كيف بالنسبة للعالم دي في حال نجاح الثورة و قيام عدالة حقيقية و ليس صورية عبر ما يسعي اليه المهدي و مريم من مؤامرات اديتكم نتشة و ما خفي اعظم حاواصل بكرة باذن الله و الفيديو التحت دا فيهو تصريح لمبارك المهدي بعد فض الاعتصام طوالي حينما اعتقدوا ان الشعب انكسر خلاس بيقول فيه اننا حنتفق مع المجلس العسكري علي تكوين حكومة تضم حزبي و نداء السودان بقيادة الصادق المهدي والذي يضم الجبهة الثورية التي شارك معظم قادتها في النظام و التي تضم الكوز جبريل ابراهيم قائد الجناح العسكري للشعبي و قال مبارك الموهوم حينها ان علي بقية مكونات ق.ح.ت ان يذهبوا للمعارضة 😄 اديكم معلومة مهمة عن نداء السودان و دا ما تخوين ولا طعن في نزاهة لكنها معلومة اري ان املكها لكم فقط باعتبارها حقيقة نداء السودان دا في ناس كتار رفضوا الانضمام ليو لانوا بتاع هبوط ناعم منهم المرحوم المناضل علي محمود حسنين القال اي تنظيم يقوده الصادق المهدي تابع للنظام و خدعة منه .. المهم المعلومة الاخيرة ان الاخ المحترم عمر الدقير هو اخ وزيري الانقاذ جلال الدقير و محمد الدقير الضالعين في عمليات فساد انتهب فيها من الشعب السودان مئات ملائيين الدولارات بمشاركة عدد من الكيزان و علي الاخ عمر ان لا يسعي لهبوط ناعم لانقاذ اخوانه و اسرته ايضا علي الاخ المناضل خالد سلك ان يكون اول المطالبين بمحاكمة خاله شقيق امه جمال عبدالله الوالي الناهب من الشعب السوداني مليارات الدولارات و المشارك السيدة الغولة في كثير من فسادها . يمضي الاشخاص و يبقي الوطن و الشعب . ///

جاوب الان
هل البرهان وحميدتي فقط هم الفاسدين ويعطلو العدالة في السودان ولي انت دايرا انتقائية بس ؟؟
نعيد الدرس
من هسة
1- تفعيل المحكمة دستورية
2- الغاء الولايات ال18 ونرجع الاقاليم 6 لانها ما منزلة من القران وتفاقم الاوضاع كل يوم
3- الاعلام الحر والمسؤل وكل الاحزاب تعمل اذاعات FM وايضا الانصار والختمية والجمهوريين والطرق الصوفية ضد ابواق السلفيين والاخوان المسلمين ديل

Quote: السودان في مرحلة أخف الضررين .. لكن يبدوا لي حكمة الشباب التي أوصلت السودان هذه المرحلة .. سوف تتخطي أي عقبة حينما تصلها المرحلة .. ما تتسرعوا .. سياسة النفس الطويل أفضل من التسرع .. بريمة

خدوا الحكمة من العبار بريمة بلل.

لكن يا بريمة الفترة الإنتقالية هي ثلاثة سنوات فقط. ده طبعا إذا لم ينقلب العسكر الكيزان على السلطة.

يا دينق، أي زول حضر ٣٠ يونيو الفات بالسودان يعرف جيداً انو ما في عسكري تاني بحكم
دعم سريع ولّ جيش

انتهى

Quote: حتى الان نجح الجميع في الامتحان بما فيهم الكيزان والخسارة من نصيب اسر الشهداء.

الحجاج الصادق.

يجب أن لا تخسر اسر الشهداء مرتين. مرة عندما فقدو أعز ما لديهم من أبناء والمرة الثانية غياب العدالة.
لو في قيادة حكيمة سوف تستطيع أن تحقق العدالة للجميع. ولكن بالهرجلة الحاصلة الان فلن تتحقق أي عدالة.

اليس شعار الثورة الأساسي
حرية ، سلام ، عدالة

والترتيب بالأولويات على ما اعتقد

Quote: سلام يا حبيبنا جورج ولا فض فوك، وفعلا دا الحاصل، ولذا لا نؤيد حكومة حمدوك ١٠٠% وفي نفس الوقت لا نستطيع أن نلومهم، لأن هذا الحل هو للأسف الشديد أفضل الأسوأ. كسرة: شايفك أسقطت لقب أبو لمبة من المستنير، هل هو إعتراف ضمني منك بإستنارته؟ 😁😁

سلامات يا النذير.

مافي حل غير تأييد هذه الحكومة، في النهاية أنها تمثل الثورة، ولكن |أيضا يجب إنتقادها لكي تستعدل. الطريق طويل جدا وكله عواقب.
أبوبكر عباس رجع المنبر، ولازم نعطي الرجل حسن الظن.

العسكر فعاليتهم لدى الكيزان انتهى أمدها
الأن مصير المدنيين والعسكر في السلطة مصير وحاد
وأي صدام بين الشقين يخدم الكيزان ويضر بالوطن والمواطن
الوطن وطنا جميعا ولابد أن نتحد لنبنيه وبالفرقة والتناطح سنفشل
لماذا نختار طريق الفشل لابد من رسم طريق للنجاح
شيء من التفكير الجدا لا يضر.

Quote: ولا ازالة اسم السودان من قائمة الارهاب

الاخ جعفر بشير.

ملف إزالة أسم السودان من قائمة الدول التي ترعى الإرهاب ملف شائك جدا، ويجب أن لا تستهون به الحكومة الإنتقالية.

الان يا دينق الامور ماشا فى اتجاه صحيح و شغل مؤسس بتعين النائب العام و رئيس القضاء
الناس محتاجة وقت لبناء ملف اتهام مشمول بالادلة القطعية لتحقيق مطلوبات العدالة فى كل الجرائم التى ارتكبت فى عهد الانقاذ
الشغل ده كتير و داير صبر و المحاكمات جاية جاية
اما فيما يخص العقوبات فحقوا الناس تشتغل اولا على رفع العقوبات المفروضة بواسطة الكونقرس الامريكى
و اساسها احلال السلام لنضمن وقوفه مع مطالب الحكومة للضغط على رفع عقوبات الاوامر التنفيذية للرئاسة الامريكية

Quote: ملف إزالة أسم السودان من قائمة الدول التي ترعى الإرهاب ملف شائك جدا، ويجب أن لا تستهون به الحكومة الإنتقالية.

,Dear brother Deng

 I completely agree with you that Removing Sudan's name from State Sponsors of Terrorism is not easy while the  National Islamic Front is still controlling all sensitive aspects of the government under the Transitional Military Council who became the Sovereignty Council of Sudan lately.​

Many chalenges facing democratic transition in Sudan and then for canceling of economics sanctions
Kind regards

Quote: سلامات نهايه الفتره الانتقاليه بعيده ومايدور الان من حركه للنظام القديم وصمت عسكر السيادى المريب والازمات فى السودان تدل على محاولات تعويق مسار الحكومه الانتقاليه ويصبح الحديث عن وصولها 2020 حلم. الحكومه ضعيفه وطالما لم تحدث شرعيه ثوريه فى بدايات الثوره فالخيارات مفتوحه على الاسو

عاصم علي.

ويجب أن لا نسى أن عساكر المجلس السيادي هم الذين يتحكمون في القوات المسلحة ، جهاز الامن والمخابرات ، الشرطة بالاضافة الى مليشيات الجنجويد.

بمعنى أخر هم الوحيدين الذين بيدهم السلاح ويستطيعون تغير نظام الحكم في اي لحظة.

شايف تاني رئيس الوزراء حمدوك كون لجنة تقصي برئاسة المحامي نبيل أديب.

نبيل أديب ده رجل متساهل مع العسكر

مليشيات الجنجويد صارت شوكت حوت لا بتتبلع ولا بتفوت.

فهم أكبر خطر حقيقي على الثورة اليوم.

يجب على الحكومة أن تلعب اللعبة السياسية بكل حرفنة وأن تقوم بتجفيف مصادر دخلهم من أموال.

وذلك يجب التعاون فيه مع دول مثل الولايات المتحدة والسعودية والإمارات.