البارح قبضوا وزير المالية الاسبق بعد مطاردة طويلة و عنيفة

08:23 AM October, 03 2019 سودانيز اون لاين
Osman Musa-
مكتبتى
رابط مختصر

(adsbygoogle = window.adsbygoogle || []).push({});

حاجة كدا تذكرك بي مطاردات الشرطة الامريكية لي تجار المخدرات في نفق بالتيمور . الوزير الحرامي مرق متخفي . مرق بي عربية زوجتو التوسان 2019 . بعد دقيقة واحدة من طلعتو من حي المجادين جنوب الخرطوم . انطلقت خلفو زنابير عربيات الشرطة السرية . كانت مطاردة عنيفة وقفت صوف الزلط صوفة صوفة . لاحدي ما تجندل التوسان ورجفت رفارفو علي بعد امتار من محطة البلابل . الحمد لله نزل المهزوم مكسوف و تاكي راسو ومادي يدينو لي وضع الكلابيش .

والوزير الاسبق اسمو علي محمود

البلد ضيقة يا ود موسى
و الناس ديل مكشوفين و عندهم اعداء من داخل التنظيم
ربنا يجعل كيدهم في نحرهم

اخونا خضر سلامات
ياخ حاجة تكيف . انا بكون مبسوط جدا لي زنابير عربيات المطاردة . كيف شديد والدوشكات
كاشحة في الشوارع المالاقية صيانية من سنة دوو .
المدهش يا خضر اليومين الفاتو ديل كلهم مطاردات عنيفة . قبض زي القبض . كمش . زي الكمش .
برضو تم القبض علي وزير سابق ليه سنكيت .
اسمو عبدالباقي عطا الفضيل . برضو كان شغال غسيل ومكوة تقيلة .
وقالوا كان ممكن يحول ممتلكات اي زول بدون وجه حق لي روحو . زول سفساف سفسفة
السنين .
قاليك ده الزول الخطري جدا الكان بيحفر لي يبيع جامعة الخرطوم . وهو من قام بي
الفتنة المعروفة في جروف بري المحس . الزول ده قبضوهو والان هو متهم في يد
العدالة .

حقو يا جماعة اليومين دي في العاصمة ومع كعوبية الشوارع وطين الخريف .
والناس عارفين انو اليومين دي ايام قبض ومطاردات . حقو الناس تتفهم الحاصل
وتساعد الشرطة بي البركنة في طرف الشارع لحظة المطاردة . تفادي للحوادث
وتسهيل لي عملية القبض علي الفارات المتينة .

كيفتني والله يا عثمانو .. الله يتم كيفك

الناس دمها دم قراد بس .. قضية الأقطان براها تودي التوج
ثم يمشون بين الناس ويأكلون الطعام ويعيشوا زينا ؟
معقولة بس !!!

اخونا استاذ ابوعاقلة سلامات القرادة بت الحلال دي ؟ ديل الواحد فيهم ما خايف من حساب الله . قاليك يا ابوعاقلة بعد قبضة المطاردة الهولويودية في واحد مسطول كان واقف وماسك في التوسان الجراية ومتكيف زينا . قام في عز كيف السطلة قال للنقيب قايد المطاردة . اسمع يا ابوالشباب . الوزير ده طلع زيتنا دايرك تصادر منو املاكو كلها قديم جديد .،تصادر حتي المترين حقتو الفي الجنة البحكي عنهم زمان .

Osman Musa
سلام
شيل شيلتك مع الزملاء الاعزاء Kabar و محمد الامين احمد و غيرهم
الذين سوف ينظرون الي المسألۃ برمتها مجرد استهداف لأحد ابناء الغرب



نصيحتي لك
آخد ليك اجازۃ من البورد ليومين او ٣ ايام

و لما ترجع ابدأ ببوست جديد عن الدور الذي تلعبه قوات الدعم السريع في استقرار اوروبا و تماسك حلف الشمال الاطلسي
احتمال يخفف عليك الهجوم

الاخ الكريم دينق عبدالله سلامات
يا اخوي الايام ايام مطاردات هولويودية . الظاهر وزير المالية الجديد بعد
العودة من امريكا . رجع بي خطة 4 اتنين 4 . خطة كاسحة لي لملمة فلوس
الامة المشتتة .
دحين يا اخوي ركز معانا في البوست وابعدنا عن كلام الجهوية .
صباح الليلة برضو قالوا كانت في مطاردة عنيفة جهات كافوري .

غايتو يا د. البدوي لو ما عيونك فتحتها زي الريال
الجماعة ديل ما بتقدر علهم .
زول بي الحرفنة دي في السواقة والهروب من مطبات وشباك الشرطة قبضو صعب .
وكتيرين منهم بي نفس الحرفنة في كل شي .
وربنا معاك

Oaman Musa اخوي
انا ابعد الناس عن العنصريۃ و الجهويۃ
لكن مداخلتي تلك اسلوب من الاساليب التي احارب بها الجهويۃ
كل الشرفاء السودانيين من ام واحدۃ و اب واحد . همهم رفعۃ هذه الرقعۃ المباركۃ المسماۃ بالسودان - بالتأكيد الاخوين المذكورين ضمن هٶلاء الشرفاء لكن قصدت بهما التنبيه لبعض مواقفهما الموغلۃ في الجهويۃ غير المبررۃ

و كذا اللصوص ملۃ واحدۃ . هم ابناء ام واحدۃ و لو اختلفت الاقاليم التي انحدروا منها.



اذا انت و انا و Kabar و ياسر الشريف في مركبۃ واحدۃ مع البدوي لمطارۃ اللصوص
--------


يا ولد شغل النجدۃ

يا دينق عبدالله يا ود اخوي انت و kabar و محمد الامين و ياسر كلكم طلعتوا بتاعين وعود ساكت . انا كلمت kabar من اول يوم قلتلو يد د. البدوي وحدها ما بتصفق .
دحين اي واحد فيكم اليخم عكاكيزو ويجي . الشغلة يا زول فيها
مطاردة وافلام واكشنات عجيبة .
شنطة السامسونايت يا دينق فتحت في الهواء والدينيرو طار ما طار وطاش ما طاش . .. عمك كبر كلمتو وعمل لينا فيها ما بسمع في جليد السكا وحراويل ترعة المناقل .

النيلين
((القت السلطات القبض على “علي محمود” وزير المالية الأسبق في الحكم البائد ودونت في مواجهته بلاغاً بالرقم “123” بنيابة الفساد تحت المادة “177/2” والخاص بالنقل النهري وامتلاكه مبلغ “38” مليون دولار و”10″ مليارات و”300″ مليون جنيه.

وكشفت “زيرو فساد” ان محمود متهم ببيع مواعين النقل النهري, وأكد المراجع العام بحسب صحيفة اليوم التالي ان المبلغ لم يورد بخزينة الدولة منذ العام 2007 عندما كان وزيراً للمالية في ذاك الوقت.)))

تخيل يا Osman
38 مليون دولار خمشۃ واحدۃ
هسۃ لو راجعوا تلفونو اكون حاول يتصل علي جينيفر لوبيز عشان يقول ليها انفكي من اليكس رودريغز



--------------
عارفك كاسر ضلعۃ في الزولۃ ديك
خلينا في مطارۃ اللوص

اخونا دينق عليك الله خلي اخونا كبر يشرح لينا
المادة 177/2 :
وهل الوزير ده بيتحاكم بي ( فوليني ) ولا ( ميزدامينا ) طبعا لو اتحاكم بي فوليني
والفوليني خشم بيوت لكن ممكن يكون فيها اعدام .
ولو المحامي حقو شاطر و عفريت وطلعلو الحكم بي ميزدامينا ممكن يتحاكم علي خفيف
والشعب المسكين يكون اكل نيم .
لكن عند ربنا مافي شي بيضيع .
كدي يا استاذ كبر قولك شنو ؟

يا Osman

نحنا عاوزين فلوسنا ترجع من تركيا و ماليزيا و الامارات و موروشيوس
مجموع الاموال المنهوبۃ يصل 80 مليار علي اقل التقدير

حرّم (علي قول بلولۃ صحبي )لو رجعوا القروش نعمل ليهم شهادات تقديريۃ و رواتب شهريۃ مدي الحياۃ
مع تطليق الزوجۃ الرابعۃ من كل واحد



-------------------

واحد مغبون لي تربيع الكيزان من الحسنوات الصغيرات

يا دينق السر شنو في انو المقبوضين الاتنين كانت عرباتهم توسان
و لون العربيتين كان لون رمادي مغناطيسي ؟
الناس ديل ما شداد في حرفنة الهروب وبس .
الناس ديل خطرين في دواهي كتيرة يا زول .

سلام Osman
المفروض تدفع شيء علي تبني البوست


اما عن سيارات توسان:-
بالرجوع الي كتاب الخاٸب لشيخنا بلۃ الغاٸب:
اصل الاسم كان توهان
لكن مع مجيء حكومۃ الثورۃ تدخل الجن و غير السين ب الهاء تكريما للبرهان
رٸيس مجلس السيادۃ و الذي حقن الدماء بإنحيازه للثورۃ.

هذه السيارات تتوقف تلقاٸيا بعد اعادۃ كل الاموال المنهبۃ الي الخارج.



---------------
الصفحۃ ١١١ من كتاب الخاٸب
وهي تحمل نفس رقم الصواريخ التي ضربت مصنع الشفاء

السطر الاخير من عندي

والله يا اخ دينق انا خايف السطور دي كلها تكون من من عندك .
زي ما قال سيدنا عادل امام .
غايتو لو ما محطة البلابل كانت زحمة في ديك اللحظات كان الزول ده سواكن زاتو
ما توقفو . تفحيط زي التفحيط .
قالوا هم بقولوا للتوسان بت الريح 2 .

يحكي لي صديق عن اللمة و الدوشة الحصلت والتصوير ومنع التصور لحظة القبضة
ولحظة سرحان المقبوض في الافاق البعيدة . دشليونات دشليونات من حبات العرق النزلت من
الكادحين
راحت ساكت . النقل النهري الكان محسوب للسياح من معجزات الدنيا السبعة . الحاجات دي كلها راحت
هبوب في هبوب .
لحظة القبضة جات حبوبة عجوز ماشه . وقفت وقالت لكن التوسان ما عندك .
في الليلة ديك الواحد لا يعرف يضحك لا يعرف يبكي لا يقدر
يتحمل اساهو . حلوة اساهو دي .