Post: #2
Title: Re: ال بالعصر مرورو
Author: عبدالحفيظ ابوسن
Date: 09-10-2019, 08:32 PM
Parent: #1
بشيل ليك مراية
وبعاين ليك برايا
دي الغنايا قالت كدة
استوقفني البيت كما استوقفنا امرؤ القيس قديما وقال لينا تعالو ابكو معاي
كيف يعني مراية ؟
ياربي بتحب نفسها ولا كيف؟
داير اتصور التعبير بشكل سريالي غلبني
لكن قمت سمعت واحد بهاجم في قيادات المؤتمر الوطني وبشكر في البشير
ف وقع لي البيت تماما
|
Post: #3
Title: Re: ال بالعصر مرورو
Author: عبدالحفيظ ابوسن
Date: 09-10-2019, 08:39 PM
Parent: #2
العصر دة كان وقت ساحر واسطوري
لافي مكيفات ولا كهربا زاتو مرات
المروحة ام سموم كانت ترف
ترش الحوش ولو عندك راكوبة بي رصيف حق نال تديهو رشة كدة
ولا زارع ليك ريحان قدام الحوش
مبالغة
فالعصر الواطة بتبرد
ويهرب الناس من قيظ الصيف للشوارع والضللة وشدر النيم
وهو انسب وقت للزيارة من حر القايلة
بالذات للجنس اللطيف
ف شنو
العصر دة عندي السودان زمان
زمان الحياة اقل تعقيدا والاحلام اقل عنفا
العصر عندي سهولة العيش وبساطة الاحلام
|
Post: #4
Title: Re: ال بالعصر مرورو
Author: تماضر الطاهر
Date: 09-10-2019, 09:59 PM
Parent: #3
سلام يا صديقي..وسعادة بعودتك
أتمناك والأسرة بخير
،
الوردة بمبية
جابوها لي هدية
هههههه...يلا..اللي بعدو
|
Post: #5
Title: Re: ال بالعصر مرورو
Author: muntasir
Date: 09-10-2019, 10:14 PM
يا سلام يا شيخ العرب ذكرتنا الذي مضى وهو وكت ما بتعرف قيمته إلا لو حبيت بت الحلة ففي ذات يوم رقيق النسيم كثير الغيوم قصير العمر(كثير الضجر) وهو وقت حيث لا أمنيات تخيب ولا كائنات تمر بت الكلب يا القضارف وليس الغضاريف العصاري ياخ
|
Post: #6
Title: Re: ال بالعصر مرورو
Author: عبدالحفيظ ابوسن
Date: 09-11-2019, 05:32 AM
Parent: #5
حبابك تماضر
سعيد بيك هنا يا صاحبة
غايتو بالغو في البمبي دي . تصدقي لغاية هسة ما بقدر افرزو من اخوانو
انا زول قوس قزح بس .
لكن العالم كلو بقول وردي ليه نحن ماخدين البمبي
ولا لبني شرحبيل
بت الكلب ساي ياالقضارف
يا منص بقا العصر يمر فينا ويخش في المغرب ولا نجيب ليهو خبر
ناس ساعات ساي بقينا
العصر والعصير فيهن شجن وحنية
تستحما وتلبس وتتعطر وتمرق الشارع
وهي زاتا تستحما وتلبس وتتعطر وتمرق الشارع
الامر لايعدو اكثر من نظرات خجلى والهة
ياخ زمان العصر زاتو كان بارد وبجي بي دعاش ونسمة
|
Post: #7
Title: Re: ال بالعصر مرورو
Author: عمر أبوعاقلة
Date: 09-11-2019, 06:26 AM
Parent: #6
وختمة العصرية شاي مغرب
ودعوة الشاي هي دعوة مغلفة لابقاء الزائر أطول فترة ممكنة
يجيبو الفحم، يولعوا النار، ولعت ما ولعت، ختوا الكفتيرة الموية غلت ما غلت
الشاي فار ما فار .. موية نقّاع لضمان صفاء المحتوى
والونسة تجر لحدي ما يجيك الشاي
ويا اخوانا الشااااااااااي الشاي بجاي
محضور من جيران وأحباب وأهل كل نيّتهم ونسة عصرية وشاي مغرب وأشجان
مالك معانا يا حفيظ ياخ
|
Post: #8
Title: Re: ال بالعصر مرورو
Author: Ahmed Yassin
Date: 09-11-2019, 06:30 AM
Parent: #6
شيخنا
والدعاش والغيم رذاذها في العِصِّير بالفرح بلل كتوفنا
|
Post: #9
Title: Re: ال بالعصر مرورو
Author: Salah Zubeir
Date: 09-11-2019, 07:14 AM
Parent: #8
ركزتو علي العصر وناسين الزول المرا فيهو ...
نسخن ليك الموضوع يا حفيظ ونسأل ...
الزول البلعصر مرورو دا ... ولد ولا بت ....
اصلو شعراء زمان ديل فيهم ضرس العجلاتيه ....
|
Post: #13
Title: Re: ال بالعصر مرورو
Author: Osman Awoda
Date: 09-11-2019, 03:22 PM
Parent: #2
مع انك زول مندس والحسنة ما بتنفع فيك انت وابو سطر والتاني بتاع محاضر ليوا داك،،إلا أنه وعملا لي الله بقول ليك انه في قديم الزمان كسرة المراية كانت من أنجح وسائل التواصل مع البلوم خاستن وقت العصير.ما عليك الا ترفع المراية قصاد عين الشمس وتحركها في معقل البلوم الذي يفهم الرسالة ويقول كدي يتبلم بي طرحته ويقول لي ناس البيت ماشي اذاكر مع صاحبتي. انت فاهم كلامي يا شماشي يا عاطل؟
|
Post: #10
Title: Re: ال بالعصر مرورو
Author: محمد حيدر المشرف
Date: 09-11-2019, 07:49 AM
Parent: #1
مشتهي ونسه "ساي" معاك
بيناتنا الشاي
وحقة تمباك
وبعض المفاكرات هنا وهناك .. حمدوك واشياء اخرى في البال
عصرا بمواقيت ذلك الشجن القديم
|
Post: #11
Title: Re: ال بالعصر مرورو
Author: Kamal Alalla
Date: 09-11-2019, 08:01 AM
Parent: #1
بعد اذن شيخ العرب نفتح العين ونكسر الصاد
حكى لي احد المزارعين انو كان عندهم مفتش زراعي مسئول من الاشراف على حواشاتم
فقال لي ما كان بمر علينا عشان يتابع نمو المحصول الا بعد نعصر ليهو
قلنا من عصراَ بدري نكشح ليك الحكاية دي...
لاحظ من وعصرا منونة بالفتح ليه ما عارف
وشكرا
|
Post: #12
Title: Re: ال بالعصر مرورو
Author: MOHAMMED ELSHEIKH
Date: 09-11-2019, 11:07 AM
Parent: #11
| Quote: بعد اذن شيخ العرب نفتح العين ونكسر الصاد |
معاك يا كملي
بس بختلف معاك انو حقي : " عصر" الجماهير
|
|