بدءا التحية لصديقنا ول ابا احمد التجاني.. التحية لأصدقائينا عيال ابا: عمر عبد اللـه ، ابراهيم عياد.. ول ابا بريمة دايرينك سباري.. ناس المزيكا..نسمع منهم شوية شوية.. واكبر تحية لأهلنا في السعاتات (السعاتة بخاري ، السعاتة الزرقا ، السعاتة برتلة ، السعاتة الطاحونة ، السعاتة ام القرى التي لم نسمع بها من قبل في اباءنا الأولين..!!)..
وندعو ناس مجلس السيادة لزيارتنا في السعاتة..فزيارة مجلس مهم مثل المجلس السيادي ليس بالضرورة ان تكون ملمة دواس ولا شغل حجازين..فهناك الجمال والجمال راحة النفس النقية..فشنو تعالونا وحبابكم عشرة بلا كشرة..!
باقي النقة بالمشاهرة والفينات..!
سلام.. كبر
Post: #2 Title: Re: السعاتة: يا احمد التجاني ماهل..!! Author: Kabar Date: 09-10-2019, 04:20 AM Parent: #1
والتحية موصولة لكافة اهلنا في السعاتة طقنو ، ام عويشة ، ام صريف ، الخرطوم جديد ، قليصة ، القوز اب شعر..
كبر
Post: #3 Title: Re: السعاتة: يا احمد التجاني ماهل..!! Author: Kabar Date: 09-10-2019, 04:24 AM Parent: #2
للدنيا والزمان..الماشاف..يشوف:دق العيش
كبر
Post: #4 Title: Re: السعاتة: يا احمد التجاني ماهل..!! Author: Kabar Date: 09-10-2019, 04:29 AM Parent: #3
يا ترى..هل..!!!!
المهم..
خال فاطنة..! اشارة لأهل الذاكرة وكده..!
ودمتم..
كبر
Post: #5 Title: Re: السعاتة: يا احمد التجاني ماهل..!! Author: عبدالله عثمان Date: 09-10-2019, 06:12 AM Parent: #4
والله فرحهم يعدي بالفرح مشكووووور كبر أقبي كلام موسى دي
Post: #6 Title: Re: السعاتة: يا احمد التجاني ماهل..!! Author: محمد الأمين موسى Date: 09-10-2019, 07:20 AM Parent: #5
يا زول إنت بتجيب المواضيع من وين؟ إنت اشتغلت سواق لوري ولا شنو؟! تبا لي ولأمثالي عندما يعتورنا الحنين إلى غرب كردفان!
Post: #7 Title: Re: السعاتة: يا احمد التجاني ماهل..!! Author: عبدالله الشقليني Date: 09-10-2019, 09:30 AM Parent: #6
الدكتور أحمد التجاني ماهل ..
* سلام لكبر وضيوفه
Post: #8 Title: Re: السعاتة: يا احمد التجاني ماهل..!! Author: أحمد التجاني ماهل Date: 09-10-2019, 04:19 PM Parent: #7
الصديق الجميل الأخ محمد النور كبرتحية وتقدير على هذا البوست الرائع حقاً، والذي يحكي عن التنوع في كردفان الكبرى في الثقافة والتداخل القبلي فمثلا في الفيديو الأول الذي يتناول تراث أهلنا قبيلة الحربية وهي قبيلة راحلة أصحاب مواشي أبالة في الأساس يتبعون لنظار دار حامد ولهم مناطق سكنية في دار حمر في حلال الصعيد مناطق السعاتات وقليصة وأبوزبد ولهم تراث جميل من دوبيت وطمبور وجراري وتوية وكدنداية وجالسة وعجيلة وغناء الردع وهو قريب من الطمبور ولكنه سريع أتي اسم الردع من رديع العبير أي تخبط البعير بأرجله الأمامي ويقال هذا البعير يردع أي يردع ردع بأرجله الأمامية في حركة تناوبية. فأهلنا الحربية تداخلوا مع أهلنا حمر والجوامعة في تلك المناطق وكذلك تداخلوا مع أهلنا البديرية في مناطق أبو حراز والكركر ومناطق جنوب أم صميمة ونتيجة لهذا التداخل اكتسبوا من تراث غيرهم وأكسبوا تراثهم لغيرهم.ونواصل
Post: #9 Title: Re: السعاتة: يا احمد التجاني ماهل..!! Author: Osman Musa Date: 09-10-2019, 06:01 PM Parent: #8
الاستاذ والباحث القدير كبر والاخ د. احمد ت ماهل والكرام المشاركين السلامات جملة . بتذكر يا كبر مره استاذ وردي قال كان معزوم سماع غناء في منطقة في كردفان . قال في ديك العيزومة استمع لي انواع من الغناء تحير . قال بعد رجع الخرطوم طوالي مشي جمع الفنانين والعازفين عيال كردفان كلهم و وقع فيهم شكل . قال ليهم انتو ما نقلتوا للعاصمة ولا الربع من داك التراث الهايل والعظيم . .. عان جاي يا كبر . ياخ بفتش عن اغنية قالوا شاعرتها بنت عاشقة و الصبي المعشوق ما جايب خبر . قالوا في حفل بي سبب الاغنية دي ماتوا 16 شاب بي السكاكين . بتذكر مقطع من الاغنية بقول : يا صابون القصة ... زولي الراقد حسا وشبعهم بالمغسة .. وشبعهم بالمغسة .. تا تتتا تتا .
Post: #10 Title: Re: السعاتة: يا احمد التجاني ماهل..!! Author: Dia Date: 09-10-2019, 09:46 PM Parent: #9
الشكر لك اخى الكريم والشكر للدكتور احمد التجانى ماهل والشكر للاخ الدبلوماسى المناضل فخرالدين كرار الذى عمل دوما فى منتدى الاثنين بالنادى السودان على ابراز كل جميل فى السودان . و هنالك ندوه شهيرة جمعت الكثيرين عن الغناء فى كردفان ابراهيم موسى ابا كمثال
Post: #11 Title: Re: السعاتة: يا احمد التجاني ماهل..!! Author: أحمد التجاني ماهل Date: 09-12-2019, 04:26 AM Parent: #10
الجميل ود أبا كبر وجميع من تداخل في البوستتحية وتقدير، وبعتذر عن التأخير في الرد ومواصلة التعليق على البوست بسبب فقدان كلمة السر حتى مكنني الأخ المهندس بكري اليوم من اعادتها. وعليه سأوصل التعليق في رفد البوست ببعض المعلومات عن المنطقة والتنوع بها فقط أود معرفية كيفية رفع الفيديوهات لقد نسيتها بسبب طولة المدة من المشاركات.أحمد
Post: #12 Title: Re: السعاتة: يا احمد التجاني ماهل..!! Author: Dia Date: 09-12-2019, 05:51 AM Parent: #11
ندوة الغناء فى كردفان احمد التيجانى ماهل وفخرتلدين كرار ابراهيم موسى ابا نموذجا الفيديو موجود على اليوتيوب
Post: #13 Title: Re: السعاتة: يا احمد التجاني ماهل..!! Author: أحمد التجاني ماهل Date: 09-13-2019, 04:09 PM Parent: #12
الفيديو الثاني يتناول الفيديو الثاني غناء الطمبور والطمبور في غرب السودان كردفان ودار فور نوعان طمبور غرباوي أي بدون مشكار والآخر هو الطمبور البحاري وهذا مع المشكار وهنالك نوع ثالث يسمى الغرباوي المشكول وهو مثل الذي في الفيديو الثاني تصاحبه الدلوكة أو الطبلة وأحيانا معه صوت مثل الكرة أي الكرير الغنائي. نموذج للطمبور الغرباوي: القصاري أبو قران حبك شواني بالنيران تعال لي تعال لي العندليب السكة بي جريبان تعال لي تعال في ختم الأغنية تكسر بـــ تعال لي وتعال لي .. تعال لي وتعال لي... نموذج للطمبور البحاري: نارك زايدة آلامنا جننتينا يا آمنة ونارك زايدة آلامنا جننتينا يا آمنة وأنا يا الما بخون الجار جننتينا يا آمنة وأنا ما بكشف الأسرار جننتينا يا آمة بعيين ليك أي مجال جننتينا يا آمنة بمرق بيك في الصومال جننتينا يا آمنة محل الحرب إلا النار جننتينا يا آمنة محل السكنة جوة الغيار جننتينا يا آمنة إلى نهاية الأغنية طويلة جدا. أما الغرباوي المشكلة كما في الفيديو الثاني في البوست ونواصل
Post: #14 Title: Re: السعاتة: يا احمد التجاني ماهل..!! Author: Kabar Date: 09-15-2019, 04:05 AM Parent: #13
الأصدقاء جميعا..
كتر خيركم..
ونأسف على التأخير في المطايبة..
كبر
Post: #15 Title: Re: السعاتة: يا احمد التجاني ماهل..!! Author: Kabar Date: 09-15-2019, 04:06 AM Parent: #14
عبد الله عثمان..حبابك يا صديقي كتر خيرك على المرور هنا.. ياخي بالله شفتا جنس البهاء ده..! الناس هناك لمن تسخى للفرح بتفرح بالله واحد..! والجميل حرية التعبير مكفولة للجميع..! غايتو ناس مجلس السيادة مفروض يغتنموا الفرصة دي ويبتهجوا البهجة الماشافوها من قبل..!!
كتر خيرك يا صاحب..
Post: #16 Title: Re: السعاتة: يا احمد التجاني ماهل..!! Author: Kabar Date: 09-15-2019, 04:09 AM Parent: #15
ول ابا محمد الأمين موسى..حبابك يا صديقي العتب على النظر والذاكرة..زهايمر اسكت ساكت خليهو يا حبيب..مفروض حسك يطلع..المعذرة.. متذكر التشاشا بتاعين ام دورور؟..وتيب..!! الحنين، يا محمد ، الحنين..والمناطق دي زمن الدنيا بخيرها سرحنا فيها..ايام المخارف (رحلة الشتاء والصيف)..ياخي حتى القش والشدر والأضاي..والجُرّابة..والفيوض والرهود..وملامح الناس..حاجات ساكنة في الوجدان يا صديقي..وصعب تتمسح تب..! ياخي لو ما الحاجات دي الواحد كان من زمان فطس من غلب الإمبرالية وفعائلها..!
كتر خيرك ..وخليك قريب.. كبر
Post: #17 Title: Re: السعاتة: يا احمد التجاني ماهل..!! Author: Kabar Date: 09-15-2019, 04:10 AM Parent: #16
عبد الله الشقليني..حبابك يا صديقي كتر خيرك على المرور هنا..والتحية للأستاذة سلوى وصديقنا احمد التجاني.. اجمل حاجة في اخونا احمد التجاني ، روح البداوة التي تتجلى في طريقة حديثه..وبالرغم من تعامل احمد مع اللغات العديدة..والإنتقال من لغة الى اخرى..ولكن حينما يلقي محاضراته او يتحدث في لقاء ما..احيانا تنزلق لهجة البداوة بصورة محببة في حديثه وعباراته..يعني طوالي بيذكرك اهلنا في القيزان والتلال..! كتر خيرك.. كبر
Post: #18 Title: Re: السعاتة: يا احمد التجاني ماهل..!! Author: Kabar Date: 09-15-2019, 04:13 AM Parent: #17
عثمان موسى..حبابك يا صديقي كتر خيرك على المرور..وليتنا دوما نكون محل الثقة.. التحية لروح استاذنا القامة محمد وردي..ولو كنت قريب كان جبت ليهو سيطان عنج يلم فيهم جلد لمن السيطان تتقطع..! كردفان يا صديقي فيها اشياء..كأنها اسرار..اهلها يضنون بها كثيرا..وبيمرقوها بالمسارقة شوية شوية..الشكر لتكنولوجيا التواصل التي منحت الشباب فرصة لعكس الحاجات.. حكاوي الغناء واسبابو..كتيرة..وزمان حكاية الموت سمبلا بسبب كلمة في اغنية..او الطفشان من الدار بسبب اغنية..كلو موجود..والأغنية التي ذكرتها سأبحث عنها اكثر ..وهي تقريبا من اغنيات الأبالة.. لغاية ما نلم في الأغنية التي سألت عنها ، اهديك هذا العمل لفنانة اسمها أمال الأبيض (سنين ابحث عن جديدها)..والنص مرفق عشان تسهل المتابعة..الأغنية جراري..
وهنا النص:
الليخدر التليع ، كاتلنا بالوجيع ، انا خفتا ، من الزمن دي ، ان قمنا للنجيع ، نخلي البيوت سريع ، انا خفتا ، من الزمن دي، الوادي ، ابو شبلا تسمع حنين اٍبلا ، انا خفتا ، من الزمن دي ، بنتوجه القبله ، بنموت بلا سبلا ، انا خفتا ، من الزمن دي ، يا يمه تعالي ليه ، وتيرابك ده لمي ، انا خفتا ، من الزمن دي ، ترّابو شالن وجي ، وعجاجا كـُتكري ، انا خفتا ، من الزمن دي ، بتجما ليهو سنين ، في الغربة مغتربين ، انا خفتا ، من الزمن دي ، بتجما ليهو سنين ، في ليبيا مغتربين ، انا خفتا ، من الزمن دي ، خلى القليب حزين ، انا بشكي لي مين ، انا خفتا ، من الزمن دي ، الوادي ابو شبلا ، تسمع حنين اٍبلا ، بنتوجه القبله ، بنموت بلا سبلا.. انا خفتا ، من الزمن دي
كتر خيرك ، وما تنقطع يا صديقي
كبر
Post: #19 Title: Re: السعاتة: يا احمد التجاني ماهل..!! Author: Kabar Date: 09-15-2019, 04:27 AM
ضياء..حبابك يا صديق كتر خيرك على المرور والمطايبة.. والتحية للأخ فخر الدين ، وكل اهلنا في النادي السوداني في ابوظبي.. وتابعت بعض من انشطتهم.. والتحية لصديقنا ول ابا احمد التجاني ماهل..وهو مجتهد كثيرا في البحث عن التراث الكردفاني ، وحفرياته في الجانب السيوسيولوجي لهذا التراث..وهذا تيار جديد ندعمه كثيرا..
كبر
Post: #20 Title: Re: السعاتة: يا احمد التجاني ماهل..!! Author: Kabar Date: 09-15-2019, 04:35 AM Parent: #19
ول ابا احمد التجاني..حبابك يا صديقي كتر خيرك على المسامرة هنا..ونرجو ان تستمر بالمساهمات.. بالنسبة لرفع الفيديو.. لا افهم كثيرا في التكنولوجيا..لكن جرب الطريقة دي.. تحت الفيديو في اليوتوب بتلقي خيار: Share اضغط.. بتظهر خيارات.. اضغط على Embed بيتديك وندو فيه رابط طويل.. اسفل تجد خيار (انسخ).. تضغط..عليهو وفي الرد (في سودانيز اونلاين) اعمل (لصق)..
ونواصل في المسامرة والتعليق والتعقيب.. كتر خيرك على الجهد يا احمد.. وليكن الخيط فسحة للمفاكرة..
كبر
Post: #21 Title: Re: السعاتة: يا احمد التجاني ماهل..!! Author: Kabar Date: 09-15-2019, 04:49 AM Parent: #20
حتى نعود للمفاكرة مع الجميع هنا..وخصوصا حكاوي صديقنا ول ابا احمد التجاني ماهل..
نهديكم جميعا.. اغنية (ربة/دلوكة) من خماس حجر..وخماس/خماسات مجموعة قرى مثل السعاتة/السعاتات..ومثلما ذكرنا في بداية حديثنا هي مناطق متجاورة..وتقع شمال مدينة ابوزبد..واغنية اندريا من منطقة خماس الدونكي..
طبعا نلاحظ تطور مفردة الخطاب الغنائي وطريقة توظيفها..يعني زمن اندريا كانت حلاوة القرطاس..اي مغلفة ومحفوظة..الآن الحكاية وصلت المس كول..!
يعني الموابايل بقي زي السكر والشاي..دخل حياة اهلنا بالطول والعرض..
كبر
Post: #22 Title: Re: السعاتة: يا احمد التجاني ماهل..!! Author: محمد الأمين موسى Date: 09-15-2019, 06:04 AM
Quote: بنموت بلا سبلا ،
= نموت بلا سبب
Quote: في ليبيا مغتربين ،
أفضل اغتراب عند الكردفانيين في سبعينات القرن الماضي هو اغتراب ليبيا، خاصة عندما يأتي أحدهم معيّة مرسيدس تنظر للتيمس وأبورجيلة والفارقو والسفنجة (بدفورد) والهوستن نظرة احتقار!