Post: #6 Title: Re: بري تشعل اللساتك والإطارات رفضاً لتوزير م Author: Asim Ali Date: 09-05-2019, 04:52 PM Parent: #2
سلام عليكم
Quote: ويعني أيضاً من ضمن ما يعني أن رئيس الوزراء الانتقالي حمدوك قد ابتدر عهده بالنكوص عن تعهداته للشعب السوداني بإعتماد الكفاءات
احاديث تروج حول رغبه حمدوك بعناصر كيزانيه يعتبرها كفاءات ورغبه منه فى لقاء غندور. مهادنه للكيزان ؟ ام احد بدايات الهبوط الناعم ؟ اليوم حسب ماورد فى بوست زهير عن الوزارات كشف الكباشى عن استبعاد المرشح معتصم محمود جلب للثروه الحيوانيه لما كشف عن انتمائه للنظام البائد. من قم بترشيح (جلب) ق ح ت ام كان ضمن الخمسه الذين رشحهم حمدوك ؟؟؟؟
Post: #4 Title: Re: بري تشعل اللساتك والإطارات رفضاً لتوزير م Author: عمر سعيد علي Date: 09-05-2019, 04:37 PM Parent: #1
رغم اعجابنا وتقديرنا لدور مدبي عباس مدني في الثورة لكن النصيحة ماهي الخبرات التي يتمتع بها ليصبح وزير للصناعة (بغض النظر عن انتماؤه القوى الحرية والتغيير). . وهمسة لثوار بري اذا الوقفات الاحتجاجية بتأدي للنتيجة المرجوة بيقى ايه لزومو حرق اللساتك . . مع تحياتي الاخ الهادي . .
ما لقيت تعبير غير اضحك من حاجات كتيرة المهم اعجبني
Post: #10 Title: Re: بري تشعل اللساتك والإطارات رفضاً لتوزير م Author: أبوبكر عباس Date: 09-05-2019, 05:27 PM Parent: #8
غايتو يا الهادي بتكجن مدني دا ساكت!! اللساتك دي إلا تكون حرقتها اتا وإسماعيل
Post: #11 Title: Re: بري تشعل اللساتك والإطارات رفضاً لتوزير م Author: Abdullah Idrees Date: 09-05-2019, 05:33 PM Parent: #8
Quote: احاديث تروج حول رغبه حمدوك بعناصر كيزانيه يعتبرها كفاءات ورغبه منه فى لقاء غندور.
لا اثق في اي شخص متزوج من 4 نساء لادارة شأن عام حتى لو كان ما كوز (خاصة لو واحدة منهن تزوجها عندما كانت تعمل معه كسكرتيرة ) ، ولا اعتقد ان حمدوك ايضا سيقبل دي اشاعة ما عندها اي معنى ، اضافة لأن غندور ذاتو لم يثبت اي كفاءة بالمرة في اي منصب تقلده وتكفى سيرته السيئة في تدمير نقابات السودان .. الكوز والكفاءة بينهما ما صنع الحداد ، كلام بقولو بالمطلق كده
ولماذا الاصرار على مدني عباس مدني ؟ .. من الذي يحاول فرضه ؟ .. ولماذا هو ذات نفسه يتوق ليكون وزيرا؟ .. أمر غريب جدا .. طالما دار لغط حوله المفروض يشوفوا غيره .. وكما انسحب غيره بلا جلبة أو ضوضاء .. المفروض هو يبادر بالانسحاب .. الشغله تكليف وليست تشريف .. بعدين قالوا مامفروض يشاركوا الآن الحصل شنو ؟ .. غيروا رأيهم ليه يفسحوا الفرصة للاجدر والأكفأ .. الأمر وراءه ما وراءه .. ناس بري عندهم حساسية عالية ضد الفساد والمفسدين .. ماذا وراء الأكمة !! ...
سلام يا الهادى وضيوفه الكرام ق ح ت مصرين على مدنى عباس مدنى لانه كان احد اعضاء التفاوض ولانه اكتسب خبرة فى التفاوض وخبر احوال العسكر ولذات غرض التفاوض فى مسائل مهمة فى مقبل الايام يريدونه فى المجلس .
وللاسف العسكر رفضوا ترشيجه بحجة انه غيركفؤ لادارة الصناعة .
التعديل لاضافة الاقتباس ادناه :
Quote: وقالت مصادر مطلعة إن الاعتراضات على مدني عباس مدني، نابعة من كونه ليس مؤهلاً لشغل منصب وزير الصناعة.
Post: #14 Title: Re: بري تشعل اللساتك والإطارات رفضاً لتوزير م Author: علي عبدالوهاب عثمان Date: 09-05-2019, 06:13 PM Parent: #12
الحبيب الهادي .. تحياتي .. حمدوك في أول تصريح له عن الاقتصاد أشار إلى أن الصناعة هي الأهم وعدم تصدير المواد بدون تصنيع وكرر هذه العبارات عدة مرات أن الحل في وزارة الصناعة لا أعرف تخصص الحبيب مدني عباس .. ولكن هذه الوزارة هي حجر الزاوية إذا لم يكن لديه خبرة في مجال الصناعة عليه التنحي .. وسوف يكسب رضا الثوار ويكون أيقونة ..
رأي شخصي جداً وجود شخص من المفاوضين في المجلس مهم لحماية و حراسة الثورة . هل كباشي او حميدتي او برهان زاتو مؤهلين للسيادة؟ لماذا تحتج علي مدني و نصمت عن من صمتت آذانهم و الرصاص يحصد الثوار أمام القيادة. يكفي مدني انه كان وسط الثوار يوم المجزرة و بالرغم من ذلك لا اشك في إنه مؤهل للمنصب لثقتي في اختيارات حمدوك. بعدين العساكر ليهم حق يعترضوا علي ثائر و بأي وجه حق.إذا صح خبر إعتراضهم
الحيتان التي تعمل في الظل وعندها قابلية التأقلم مع كل الظروف
والعيش في مختلف البحار والمحيطات والمياه الآسنة
Post: #20 Title: Re: بري تشعل اللساتك والإطارات رفضاً لتوزير م Author: احمد حمودى Date: 09-05-2019, 09:27 PM Parent: #17
ليه اصلا هذه الهيلمانة والجوطة دى وحريق اللساتك ناس قتلوكم وحرقوكم وحتى الجثث ما سلمت ورموها قلب البحر وموجودين قدامكم مافى زوول قال بغم يجى مدنى عباس مدنى والله الزوول دة ماقصر فعلا كان ايقونة فى مثل مصرى بقول ما قادرين على الحمار فالحين على البردعة
Post: #21 Title: Re: بري تشعل اللساتك والإطارات رفضاً لتوزير م Author: نصر الدين عشر Date: 09-05-2019, 09:30 PM Parent: #20
استوزار مدني عباس مدني فيه خيانة لميثاق تجمع المهنيين مع الشعب تجمع المهنيين عاهد الشعب السوداني انو الحكومة الجاية حكومة كفاءات ودون محاصصات مدني دا كان من المفاوضين
Quote: ق ح ت مصرين على مدنى عباس مدنى لانه كان احد اعضاء التفاوض ولانه اكتسب خبرة فى التفاوض وخبر احوال العسكر ولذات غرض التفاوض فى مسائل مهمة فى مقبل الايام يريدونه فى المجلس . [./quote]
خبرة تفاوض شنو الإمتسبا مدنى ول أى من طواويس حقت؟ ياخ ديل ما عارفين أى حاجة فى أى حاجة ومحصلتهم فشل ستتعايش معه البلاد السنين القادمة
وحتى تبرير (التفاوض) دا ممكن يكن تبرير لو المنصب بمجلس السيادة عشان يجابه العسكر (رغم انه تبرير لإستهلاك فقط)
وغى مجلس الوزراء إذا كان مؤهلاته تجعله غير مؤهل وما ناقش فى الصناعة .. حيقعد فى النمجلس ألفة يرفعه ليهم شعار حرية سلام وعدالة؟ أم يقول ليهم فوضونى مفاوض أمام مجلس السيادة
طواويس حقت لو عاوزين يستمروا فى الشمهد حيقرفوا الشعب قرف شديد
Post: #23 Title: Re: بري تشعل اللساتك والإطارات رفضاً لتوزير م Author: Elhadi Date: 09-06-2019, 04:09 AM Parent: #22
Quote: سلام يا الهادي
في نظرك من هو الذي يصر على ترشيح مدني؟ هل حزب داخل التغيير أم حمدوك نفسه؟ ولماذا في تقديرك.
لا أرى أن مدني مؤهل لوزارة الصناعة وليته اعتذر، إذن كان يحفظ لنفسه صورة جيدة من نضاله في الثورة.
مرحباً الأخ الدكتور ياسر الشريف
لا هذا ولا ذاك يا دكتور ياسر.. لا حزب داخل التغيير... ولا حتى حمدوك نفسه..
صحيح أنه مدعوم من البعض في قحت، لكن هذا الدعم وحده لم يكن كافياً ليضغط على حمدوك ويجعله يتجاهل كل الضغط الشعبي ومعيار الكفاءة وعدم جدارة أو أحقية مدني بالحقيبة الوزارية..
Post: #24 Title: Re: بري تشعل اللساتك والإطارات رفضاً لتوزير م Author: AMNA MUKHTAR Date: 09-06-2019, 05:14 AM Parent: #1
الزول دا شكله معين من بره.. لخدمة أجندة معينة.
Post: #25 Title: Re: بري تشعل اللساتك والإطارات رفضاً لتوزير م Author: Elhadi Date: 09-06-2019, 05:35 AM Parent: #24
المهم أنا عاوز أوصل رسالة للسيد عبد الله حمدوك رئيس الوزراء الانتقالي
إنو يعني ما تصدق إنو الحيتان ديل ممكن يوفروا ليك التمانية مليار دي.. ولا حتى مليار واحد
بل الصحيح انو ديل قدر الفي ده ممكن يأكلوا ويقعدوا
والناس الجابوك للكرسي الانت قاعد فيهو ده يا حمدوك هم الغبش والغلابة
وليس كبار رجال البزنس والصناعة..
Post: #29 Title: Re: بري تشعل اللساتك والإطارات رفضاً لتوزير م Author: عمر التاج Date: 09-06-2019, 09:49 AM Parent: #24
تحياتي صاحب البوست والضيوف
Quote: الزول دا شكله معين من بره.. لخدمة أجندة معينة.
كلام امونة ده شكله نابع من جوه..
Quote: وكشف عن استقطاب دول عربية ـ لم يسمها- لقيادات بالحرية والتغيير، للتعاون مع المجلس العسكري لتنفيذ الهبوط الناعم للثورة،
المشكلة انه وزارة الصناعة بالذات وزارة متخصصة لا تقبل الا مؤهلين مختصين وخبراء في مجالها، ولا تصلح ان تكون ثورية.. مدني شاب مؤهل ولكن في مجالات تانية.
Post: #26 Title: Re: بري تشعل اللساتك والإطارات رفضاً لتوزير م Author: AMNA MUKHTAR Date: 09-06-2019, 05:39 AM Parent: #1
Quote: وليس كبار رجال البنزنس والصناعة..
أهااا.. بالله ديل ناس الوساطات في البيوت.. وكدا الجابوها لينا سيمي مدنية.. وكمان كانوا ناويين يختو لينا متحرش بالنساء وبتاع خلطات فسخ وجلخ في مجلس السيادة..
Post: #27 Title: Re: بري تشعل اللساتك والإطارات رفضاً لتوزير م Author: محمد البشرى الخضر Date: 09-06-2019, 07:49 AM Parent: #26
سلام الهادي و الزملاء
Quote: مافي واحد سأل نفسو لي التجارة والصناعة؟؟
ودي ممكن تكون رغبة منو من الحيتان الكبيرة أوي أوي في السودان؟؟
بما أن الترشيح الاساسي كان لوزراة شؤون مجلس الوزراء ورفضه حمدوك و اصر على مانيس - العليه بهات انتماء للنظام السابق - اظن ان التجارة و الصناعة ليست مقصودة لذاتها انما هي التي كانت متاحة او التي ربما قبل بها حمدوك في اطار صفقة و موازنة مع الحرية و التغيير, يعني ابيت ليكم بشؤون الوزراء لكن ممكن ادي زولكم الصناعة و التجارة المرتبطتين برباط وثيق بالمالية الماسكها فردته البدوي - يعني في النهاية الكلمة الاخيرة عند حمدوك من ناحية سياسات وكدا.
Quote: استوزار مدني عباس مدني فيه خيانة لميثاق تجمع المهنيين مع الشعب
لا علاقة لمواثيق تجمع المهنيين باستوزار مدني, فهو ليس عضوا في التجمع
المهم المسألة سياسية بامتياز ومن اول يوم في المفاوضات حين حشر بند امكانية تعيين مقعدين حزبيين في حكومة الكفاءات المستقلة اتضح ان للحرية و التغيير قرار و رغبة في دخول حزبيين لأغراض ما وهذا الامر حمدوك على علم به من اول يوم لكن العصلجة حصلت في تسمية الحقائب تحرك شباب بري واضح انه منظم ومدفوع من جهة ما فلا اعتقد الشباب القبوا بالاتفاق تفسه على علاته و ساهروا للصباح فرحا يقيفوا في حتى زي دي أحدى اللافتات تقول لا لشلة المزرعة, شلة المزرعة مصطلح لا علاقة له بالحرية و التغيير بل بتجمع المهنيين, الذين لا علاقة لهم بمدني وترشيحه!!
Post: #28 Title: Re: بري تشعل اللساتك والإطارات رفضاً لتوزير م Author: Yasir Elsharif Date: 09-06-2019, 08:06 AM Parent: #27
Quote: اظن ان التجارة و الصناعة ليست مقصودة لذاتها انما هي التي كانت متاحة او التي ربما قبل بها حمدوك في اطار صفقة و موازنة مع الحرية و التغيير, يعني ابيت ليكم بشؤون الوزراء لكن ممكن ادي زولكم الصناعة و التجارة المرتبطتين برباط وثيق بالمالية الماسكها فردته البدوي - يعني في النهاية الكلمة الاخيرة عند حمدوك من ناحية سياسات وكدا.
سلامات يا ود البشرى
أفتكر كلامك معقول
استمعت قبل قليل لخطاب حمدوك في المؤتمر الصحفي
ألف مبروك للشعب السوداني.
Post: #30 Title: Re: بري تشعل اللساتك والإطارات رفضاً لتوزير م Author: Yasir Elsharif Date: 09-06-2019, 10:01 AM Parent: #28
مدني عباس مدعوم من الغواصات المسيطرين على رئيس الوزراء الانتقالي
في ت ا م @@@@@@@@@@@
غايتو حمدوك الشفتو وسمعتو يتحدث لا اظن يسيطر عليه غواصة او غير غواصة. يا الهادي