زي ماقال دسيس حمدوك قدر يحنك عبدالعزيز الحلو

09:30 AM September, 05 2019

سودانيز اون لاين
Mohamed Adam-
مكتبتى
رابط مختصر

لو كده حمدوك ده يكون فال خير .

حقو الثوار تحتفل وتبتهج بهذا الخبر السار.

عبد العزيز الحلو / حضرموت
الحلو: مستعدون للتعامل مع حكومة حمدوك
أعلن رئيس الحركة الشعبية شمال ، عبد العزيز الحلو في تصريحات خاصة لقناة “العربية” ، استعدادهم للتعامل مع حكومة حمدوك الانتقالية، بعدما أضحت حكومة أمر واقع ووجدت قبولا واعترافا من الشارع السوداني على حد تعبيره .
وتوقع الحلو عقب لقائه الرئيس الجنوب السوداني سلفاكير ميارديت ،فتح السلطات السودانية قنوات اتصال وتفاوض يهدف لتحقيق سلام شاملا ودائم في البلاد .
ووصف الحلو خطوة تشكيل مجلس السيادة وتعين رئيس الوزراء بالأمر الإيجابي الذي سيدفع بتشكيلحكومة مدنية تقود الفترة الانتقالية

تحياتي محمد ادم

افتكر موقفه قبل التصريح دا ذاتو كان متفهم

طبيعة الثورة ومساراتها

اخرين كذلك امثال عبدالواحد والحزب الشيوعي في الطريق

المستغرب له لماذا لم يستوعبوا اهمية الواقعية السياسية في المرحلة

والتي بدونها كنا سنجهض الثورة اساسا

Quote: اخرين كذلك امثال عبدالواحد والحزب الشيوعي في الطريق

وينك يا عبداللطيف ، عبدالواحد خلاص علق "إسناج" اللولوة و الكجار
اخر تصريح ليهو قال الوثيقة الدستورية لازم تخضع لاستفتاء عام بمراقبة دولية رديت عليهو في تويتر
"تخيل لمن نجي للدستور الدائم حيطلب شنو ؟
استفتاء عام للسودانيين الاحياء والاموات من زمن بعنخي لحد اسي وباشراف لجنة دولية من فارس والروم والمرابطين
والحشاشين والمعاطين والزعاطين و"حسن اولئك رفيقا" ..
معقول ماعارف الاستفتاء العام ده بياخد تجهيز وزمن وموارد بشرية ولوجستية قدر شنو واموال قدر شنو وكلو
عشان وثيقة مؤقتة ؟

معقول ماعارف الاستفتاء العام ده بياخد تجهيز وزمن وموارد بشرية ولوجستية قدر شنو واموال قدر شنو وكلو
عشان وثيقة مؤقتة ؟
ـــــــــــ
تحياتي عبدالله ادريس

عبدالواحد اشتهر بالرفض لكل الحلول وكان دائما يجد موقفه

سليما ، لكن كان ذلك في وضع مختلف عن الوضع الحالي ..

الاتفاقية والوثيقة جاءت نتيجة لواقعية سياسية وليس بالامكان

افضل مما كان وهي الواقعية المقصودة ، يكفي الدماء التي

سالت والتي كانت ستسيل ! والمشي في سكة جديدة مع الرهان القوي

علي وعي الشباب والجماهير والنخب المنحازة للشارع في كل الميادين

العملية والمعرفية واعدادهم في تزايد مستمر داخليا وتضامن متزايد من

المجتمع الدولي ...

إذا لم يستمع عبدالواحد لهدير الامواج البشرية والتغيير الجاري بوتيرة

يومية ، بفعل الحراك اليومي الهادف ، سيجد فسه منبوذا ووحيدا يحارب

عدوا لم يعد موجودا ، حينها سيفقد اي شكل من اشكال التعاطف ...

حتي قوي الحرية والتغيير ، إذا لم تواكب بصورة يومية ، ستجد

الشارع قد تجاوزها الي غير رجعة وظهرت مواعين جديدة مختلفة

من حيث المضمون ...

تصريح عبدالواحد بان حميدتي ليس مجرما (إذا صح) وان الصادق

من النخب القديمة وشنو كدا ماعارف ، اعتبره تصريح مرتبك ، ومحاولة

لتعديل المسار (يعني باللفة كدا) واخذته العزة بالاعتراف والوضوح

لانه مشروع دكتاتور ....

الأخ عبداللطىف مرحبتين حبابك
شايفك ظهرت بعد غيبة في عدد من البوستات وبرضو شايف اخونا العزيز زعيم الاستنارة ظهر, عقبال نشوف باقي الإخوه.. والف حمدلله علي السلامة..
اخونا الغالي عبدالله ادريس مرحب بيك.

سإعود للتعليق علي مداخلتيكما.

مكرر

سلام ومراحب يا اخ ابوعبده

Quote: افتكر موقفه قبل التصريح دا ذاتو كان متفهم طبيعة الثورة ومساراتها اخرين كذلك امثال عبدالواحد والحزب الشيوعي في الطريق المستغرب له لماذا لم يستوعبوا اهمية الواقعية السياسية في المرحلة والتي بدونها كنا سنجهض الثورة اساسا

نعم موقفه قبل التصريح ليهو مايبرره لكن بعديهو مافي شيء بيخليهو يرفض التفاوض لماذا؟
- لان الزمن ما. من مصلحتو كزول صاحب قضية مشروعة.
فهو مجبور. يفاوض وكذا الحكومة الانتقالية برضها مجبوره تفاوضو وتفاوض كل الحركات المسلحة الاخري.
اضف لذلك الحرب كحرب ما في زول, عنده عقل بيزن بيهو الإمور يقوم يختارو لو لقي بدائل اخري متاحه ليهو كفرص تفاوض حقيقية مش زي تفاوض الإنقاذ القاعدين يدغدغوا بيهو مشاعر الناس في الفاضي!!! ..
- كذلك نجد ان هنالك أعباء مالية ثقيلة في إدارة التنظيمات المسلحة, بس كمثال لذلك: عملية إطعام الجيش في حنكو ده مشكلة خليك من باقي الإلتزامات الأخري لذات الجيش وللمواطنين بالأراضي المحررة(غذاء دواء كساء, تعليم, امن....الخ)!
-بالنسبة للحكومة برضها: مابتقدر تخطو اي خطوة إيجابية في عملية بناء الدولة المدنية وعندها مواطنين رافعين في وشها السلاح حتي لو عشرة انفار مسلحين حيجهجهوها ليك, فمابالك بآلاف من المسلحين, وزد علي ذلك الرأي الدولي برضو حيكون في الغالب ضد الحكومة!
وعليه الحكومة مابتقدر توفر ميزانيتها لأبسط واجباتها تجاه المواطن كالتعليم والعلاج والطعام وإنما تصرف معظمها في ال Security

اما بخصوص الرفيق عبدالواحد يبدو لي الزلمة عايز ضمانات لمطالبة وده من حقو.. بس كمان لازم يقبل ببعض التنازلات ليس كل ما يطلبو بيلقاو او ممكن ينفذوه ليهو بحزافيره ياها دي النظرية الليبرالية التي تقبل بفيفتي ففيفتي ساحبة معاها الأخلاق وباقي القيم الإنسانية وليست النظرية الواقعية التي لاتقبل إلا بنصيب الأسد للأقوي ضاربه بعرض الحائط كل ما هو اخلاقي وقيّمٍيّ!!.
يبقي عليهو ان يقبل ببعض التنازلات(عشان مصلحة وطنو) ويقوم يطالب بالطرق السلمية بباقيها(بضمانات طبعا).. وفي النهاية السلطة لما تكون ديمقراطية ممكن تطور نفسها بإستمرار إتجاه الحكم الرشيد وعلي كده عبدالواحد زاتو في يوم ما ممكن يكون صانع للقرار وبعديها يقدر يضع بصماته او يملي شُروطو الشايفها موافقة لمبادئو في تلك الدولة !
اما الحزب الشيويعي- أنا- قاعد اشوف تجلياته واضحة في تشكيلة حمدوك (الانتقالية)!

في نهاية المطاف: لو حمدوك قدر عمل Compromise مع الحركات المسلحة واقنعها لتجلس وتتفاوض مع حكومتو, يبقي هو ماشي في الإتجاه الصحيح وزي ماقلت, الزلمة فعلا فال خير وبركة علي السودان.

حبيبنا محمد ادم تحياتي
اتفق معك ان الحلو لغته إيجابية ومتصالحة مع واقع الثورة
ولكن الذي يعرف الحلو سيدرك ان الشيطان في التفاصيل
فالحلو الرؤية عنده ليست بعيدة عن عبدالواحد لكن
ما يميز الحلو هو الدبلوماسية التي أكسبتها له السنون
والخبرة والطويلة عكس عبدالواحد الذي يميل لتقديم الخطاب
بلغة تفتقر للخطاب الدبلوماسي فتظهر الرجل بمظهر
الرافض للحلول
ولكن تكمن المشكلة ان كلا الرجلين الحلو وعبدالواحد
يبحثون عن حلول للازمة الحرب دون تقديم تنازلات
وهذا ما يعقد المشهد وان كان الحلو يقدم رؤيته
وفق لغة دبلوماسية بينما يفتقر عبدالواحد هذه اللغة
ولكن ما يحسب لعبدالواحد انه يريد حلا وفق سودان موحدا
بينما يري الحلو انه في حالة انعدام الحلو فالحكم الذاتي سيد الموقف
عموما السودان في حالة ثورة وليس امامنا الا تقديم مزيد التنازلات
لمشروع السلام ان كنّا نريد النهوض بالبلاد والعباد