Post: #1
Title: من وحي الثورة :اسماء المحلات تلبس ثوب الثورة
Author: محمد عبد الله الحسين
Date: 08-19-2019, 08:42 AM
08:42 AM August, 19 2019 سودانيز اون لاين
محمد عبد الله الحسين-
مكتبتى
رابط مختصر
من وحي الثورة :اسماء المحلات تلبس ثوب الثورة:
إبداعات الشباب
و هكذا يولد الإبداع من رحم الثورة
تأبى اللغة العصية الا ان تطاوع رغبات الشباب..الشباب المسكون بزخم الثورة و حب الحياة و التطلع للمستقبل.
و من رحم المعاناة و القسوة و الألم... تتولد اللغة الجديدة...اللغة الساخنة، المبتلة بدم الشهداء، و المعطرة بوهج الثورة و الثوار.
|
Post: #2
Title: Re: من وحي الثورة :اسماء المحلات تلبس ثوب الثو
Author: محمد عبد الله الحسين
Date: 08-19-2019, 08:49 AM
Parent: #1
من وحي احداث الشهور الفائتة التي تراوحت بين القتل بدمٍ بارد و بين الاغتيال غدرا، و القتل (سمبلا) كما سماه شارعنا صلاح أحمد ابراهيم
موالفا بذلك بين لهجة أهل جنوب السودان و العربية)...
,... و بين الوقائع التي تراوحت كذلك بين معارك الكر و الفر و الغبار المعتكِر و الهتافات الحارة و الغاز البذيء:
( كما وصفه شاعرنا محمد المكي ابراهيم الغاز المسيّل للدموع خلال ثورة اكتوبر)
و ما بين أنفاس الثوارالحرّي و هي تعلو في الصدور و بين الهتافات التي تخترق الحناجر و.. أسوار العسكر و الجنجويد و أسلاكهم...
................. في هذه الأثناء أرواح الشهداء الطاهرة تصعد للسماء.و تعطِر الفضاء ،متوزعة كالهيولي فوق مواكب الثوار ..
اليوم اجد في تويتر ما أفرحني ...
تغريدة من أحدهم، و هي تسرد ما تفتّقت عنه إبداعات الثوار و هم يستريحون بعد المعركة، ليتجاذبوا اطراف اللغةو الثرثرة المبدعة و القفشات
ليستحلبوا منها ما استعصي عليهم خلال سنوات الجدب الفكري و السياسي و الابداعي و تكلست فيها مكامن الإبداع لتقف عند:
(الحس كوعك) و (اتحداكم) و (الما عاجبو يطلع الشارع..)
|
Post: #3
Title: Re: من وحي الثورة :اسماء المحلات تلبس ثوب الثو
Author: محمد عبد الله الحسين
Date: 08-19-2019, 09:06 AM
Parent: #2
فأقرأوا معي أحبتي ذوب الكوميديا و القفشات و التندّر في توليفة محببة و نادرة مع التراجيديا و الإبداع و الخيال اللغوي في أبسط معانيه...
و هكذا... فمن رحم التراجيديا تتولد الكوميديا :
فإلي اسماء المحال المقترحة و ربما تم تنفيذها:
|
Post: #4
Title: Re: من وحي الثورة :اسماء المحلات تلبس ثوب الثو
Author: محمد عبد الله الحسين
Date: 08-19-2019, 09:32 AM
Parent: #3
*سوبر ماركت مدنياااو
*ملحمة القيادة
*صابِّنَّها للأثاث و الديكور
*سقطت للتبريد و التكييف
*دسيس للعقارات
* شركة اعلي النفق للبناء و التشييد
*مغسلة الدولة العميقة
* المتاريس للطرق و الجسور
*مركز كنداكة للتجميل
*ضغوتات للاستيراد و التصدير
*مجزرة القيادة
*مكتب الدعم السريع للكهرباء
* الكنداكات للعصائر
* الشفاتة للسندوتشات
* ابن عوف للوجبات السريعة( دي ذكية للغاية)
, و هلم جرا
|
Post: #5
Title: Re: من وحي الثورة :اسماء المحلات تلبس ثوب الثو
Author: Asim Ali
Date: 08-19-2019, 10:49 AM
Parent: #4
سلام عليكم
الثوره الترمومتر حقها انها تظهر فى حياتنا اليوميه فى اسماء الحلات والازياء والمرافق العامه وماركات العربات وحتى تسميه المواليد باسماء تكون مرتبطه بالثوره
|
Post: #6
Title: Re: من وحي الثورة :اسماء المحلات تلبس ثوب الثو
Author: Gafar Bashir
Date: 08-19-2019, 10:54 AM
Parent: #5
مغسلة الدولة العميقة
دي برضو ذكية
|
Post: #7
Title: Re: من وحي الثورة :اسماء المحلات تلبس ثوب الثو
Author: محمد عبد الله الحسين
Date: 08-20-2019, 04:54 AM
Parent: #6
الأخ جعفر و الأخ عاصم شكرا على المرور
حقيقة وجدت في تلك الأسماء بعض من روح و وهج الثورة التي عايشها الناس شهورا عدة.. كما تفضل الأخ عاصم :
Quote:
الثوره الترمومتر حقها انها تظهر فى حياتنا اليوميه فى اسماء المحلات والازياء والمرافق العامه وماركات العربات وحتى تسميه المواليد باسماء تكون مرتبطه بالثوره |
*محلات الحس كوعك للمديدة الأصلية
* الدعم السريع للبنشر و التفوير( التفوير دي فيها تلميح واضح)
|
Post: #8
Title: Re: من وحي الثورة :اسماء المحلات تلبس ثوب الثو
Author: حامد بدري
Date: 08-20-2019, 07:27 AM
Parent: #7
البابور لمواتير الكهرباء والماء
حدس ماحدس للفول والفلافل
كولمبيا للشربوت
كل سنةواتو طيبين
|
Post: #9
Title: Re: من وحي الثورة :اسماء المحلات تلبس ثوب الثو
Author: Asim Ali
Date: 08-20-2019, 09:16 AM
Parent: #8
ودى كوميديا ظهرت فى الوسائط وتسميات من وحى العيد
كتائب الظل كادت تحرمني من الكمونيااااااو
* الحمد لله بعد غيبة طويلة واغتراب امتد لمدة عشر سنوات تتاح لي الفرصة أن أحضر عيد الأضحى بالسودان وسط الأهل والأصدقاء .
* أخيراً ومع بشائر المدنية سوف أشرب الشربوت بمزاج وآكل شية الجمر والمرارة حقتنا وحقت الجيران وأستمتع بلحظات ممتعة مع محبوبتي الكمونية ويحق لي أن أهتف كمونياااااو.
* ذهبت بالأمس إلى السوق لشراء الخروف وتذكرت الأيام الخوالى التي كنا نذهب فيها إلى زريبة البهائم التي ليس لها غير مخرج واحد ولايمكن لأي شخص بعد الشراء الهروب من صاحب الماركة ودفع الضريبة لمتعهد السوق ولكن هذه المرة وجدت أن كل البلد عبارة عن زريبة فالخراف منتشرة على طول الطريق وفي كل الميادين وخصوصا على إمتداد قضيب السكة حديد فالسوق هو أي منطقة عالية أو جافة فلو كان عندكم مسطبة ممكن تلقى بتاع خرفان واقف وصابيها جنب بيتكم ويتدلل على الزبائن.
* المهم دخلت على أكوام الخرفان المنتشرة على طول الطريق ووجدت الباعة نوعين رياضيين وسياسيين فالرياضيين بنصنفو الخرفان حسب أسماء اللعيبة فالخروف الكبير ومليان يطلق عليه ميسي وسعره لا يقل عن ١٥ ألف جنيه والأقل منه شوية دا اسمو نيمار وسعره بين ١٢ ألف إلى ١٤ ألف فداعبت صاحب الخرفان قلت ليهو عندي ١٠ ألف وداير لي خروف كبير قال لي عشرتك دي سيف تيري ما بتجيبو ليك.
* أها قلت طالما نحن ثوار أحسن نشوف ناس السياسة فلقيتم مصنفين الخرفان حسب أسماء السياسيين فالسديس الكبير ولحمو قوى دا اسمو الصادق المهدي والكاتل ضلو ولابد دا اسمو البرهان والبنطط ساي وما عارف نفسو شايت على وين دا بقولوا عليهو حميدتي والمنفوخ بموية ملح وممكن تتغشى فيهو دا اسمو الكباشي أما الجضع الصغير وسمين الجماعة مسمينو الأصم وطبعا دا مرغوب وسعرو غالي.
* بعد معاناة لقيت لي خروف سمح عجبني وحاججت سيدو لحدي ما أشتريت والجماعة كتر خيرهم رفعوهوا في العربية وأنا فرحان انو أشتريت وبي سعر مناسب وبدعو الله انو ما يطلع لي كباشي ويكون منفوخ ساي بموية ملح.
* بعد داك دخلت السوق وشلت التبن والبرسيم وكل وجبات الضيف لحدي الصباح ومشيت طوالي على البيت وأول ما وصلت وفتحت الضهرية عشان أنزل الخروف كانت المفاجأة إنو الخروف طلع نعجة ااي والله نعجة عديييل كدا. طوالي قفلت الضهرية وجرى على السوق وبعد معاناة لقيت الكوم الاشتريت منو فجيت للزول وقلت ليهو شنو ياخي تغشني وتديني نعجة قال لي أنا ما غشيتك انت عامل فيها بتعرف البهائم وتشيل وتجس في الخرفان وتفتح في خشومن أنا قلت خلاص الزول دا معلم وناقشا لكن طلعت قاعد ساي( ..........) من الأصم ما بتفرق بيناتم.
* بصراحة شعرت بالخجل وقلت ليهو ياخي انت عارف الناس جاية تشتري خرفان في داعي تدخل نعاج في النص. قام ضحك وقال لي والله ما دخلتهم أنا ديل أخواتي الصغار كتائب الظل عاوزين يخربو الإتفاق بيني وبين الزبائن قلت ليهو خلاص أعتبر الإتفاق الأول توقيع بالأحرف الأولى على الخروف يلا شيل نعجتك وأديني خروفي فطالب بفرق في السعر فبعد جدال اضطريت دفع فرق وشلت لي خروف وانصرفت.
* كل عام والجميع بخير ونسأل الله أن يصلح حال بلادنا
وسلام يا وطن
|
|