القائد العام للقوات المسلحة.. منووو؟؟

00:29 AM August, 03 2019

سودانيز اون لاين
Mutasim Idris-Sacramento
مكتبتى
رابط مختصر

موضوع الاجهزة الامنية في الوثيقة كان ولم يزل هو الهاجس الكبير
بالنسبة لي رغم قبولي الاتفاق واقتناعي بانه ممكن نصل للغايات
وإن طال السفر..
بس الموضوع دا مااااا أتحل بل في تعقيد كمان.
الوثيقة الدستورية وضعت القوات المسلحة والدعم السريع تحت
القائد العام للقوات المسلحة بدون ما تسميهوا بالاسم او بالرتبة
غير تبعيتها فقط للمجلس السيادي!!

في بوست تاني حاول الاخ علاء سيد أحمد الاجابة..

Quote: Quote: ورئيس مجلس السيادة هو القائد العام للقوات المسلحة يعنى في الفترة الأولى القائد العام للقوات المسلحة ح يكون عسكرى من المجلس السيادى وفى الفترة الثانية مدنى من مجلس السيادة .

ودا كان ردي ليهو:

Quote: يا علاء الكلام دا مافي الوثيقة. لو كانت تابعية القوات المسلحة (لرئيس المجلس السيادي) ح تكون مفهومة وياريت كمان لو في تفصيل انه الفترة التانية من الانتقالية ح تتبع للمدني في السيادي.. خلوها عاااائمة كدا تبعية في كل الانتقالية للسيادي!!

إجتهاد مننا نعرف منو هو القائد الاعلي للقوات دي؟؟

أمس حضرت المؤتمر الصحفي لقوي الاعلان والمتحدثين فيه
مدني عباس ودكتورة سنهوري لم يجاوبوا حتي علي السؤال
دا وبامانه الدكتورة زاغت منه لحظتها واستغربت جدااا للموقف,
الليلة لقيت دا من الصحفي عمار عوض:
توضيح وجرس إنذار
كنت في المؤتمر الصحفي سالت الخبيرة القانونية ابتسام سنهوري التي قدمت المؤتمر الصحفي وقلت لها : تتحدثون عم تبعية قوات الدعم السريع للقائد العام للقوات المسلحة ولكن حسب هيكل القوات المسلحة ليس هناك منصب باسم القائد العام للقوات المسلحة فمن اين اتيتم بهذا المنصب لتسندوا اليه مهمة تبعية الدعم السريع والجيش ومن الذي سبعين صاحب هذا المنصب الخطير؟
الخبيرة ابتسام ( طلعت بي حمد ودخلت بي خوجلي) دون ان تجيب على هذا السؤال قمت بالحديث إليها بشكل منفرد بعد المؤتمر الصحفي وقلت لها انك للأسف لم تحاوبي على سؤالي قالت لي ان ممثلي الجيش في اللجنة القانونية ابلغوها بأنهم سيجرون تعديل في هيكل القوات المسلحة واستحداث منصب القائد العام وانها لم تجاوب على السؤال لانها لم ترى هذا التعديل القانوني في هيكل القوات المسلحة !!
من الغريب جدا ان يتم وضع نص في الاعلان الدستوري بهذا الحجم لمنصب غير موجود اصلا ! لكن اذا تحاوزنا عن ذلك كله ماهي الآلية التي سيتم بها اختيار صاحب هذا المنصب الخطير هل هو مجلس السيادة ام وزير الدفاع بالتشاور مع رئيس مجلس الوزراء ؟ هذه نقطة مهمة جدا لا اعرف كيف سيتم معالجتها .. تاريخيا كان منصب القائد العام موجود ولكن بعد تسلم البشير الحكم تم الغاء هذا المنصب وأصبح رئيس هيئة الأركان هو اعلى رتبه في الجيش الان اذا تم استحداث هذا المنصب وإعادته للوجود سيكون اعلى رتبة من رئيس هيئة الأركان ويشرف على عمل القوات المسلحة وقوات الدعم السريع فهل سيكون تابعا واقل من وزير الدفاع ورئيس مجلس الوزراء ام سيكون تابعا لرئيس مجلس السيادة هذه النقطة تحتاج لنقاش جاد ومسؤول وان لا تترك للاماني والوعود فهذا منصب خطير جدا يجب ان تنتبه له قوى الثورة وقوى الحرية والتغيير.

من صفحة الصحفي عمار عوض شريف.

سلام عليكم
حسب العرف العام مش فى السودان بس بل حتى الدول الاخرى بانظمه حكمها المختلفه فان الرئيس /الملك/الامير ...يكون هو القائد الاعلى للجيش كمنصب سيادى شرفى اما القائد العام هو قمه الجيش الفعليه وحسب الاتفاقيه وطالما وزير الدفاع من الجيش فالمتوقع يكون هو نفسو القائد العام طالما فى المجلس بعد حلو متوقع يتوزع بين السيادى وحقيبتى الدفاع والداخليه.ودا احتمال اقرب حسب الصيغه المعروفه للاتفاق خلاف مثلا لحاله حكومه الانتفاضه وزير الدفاع اعتقد كان عثمان عبدالله وكان اظن عميد او لواء (رتبه اقل من رتبه القائدالعام واعتقد سوار الدهب كان قائد عام رغم رئاستو للمجلس العسكرى )

Quote: متوقع يتوزع بين السيادى وحقيبتى الدفاع والداخليه.ودا احتمال اقرب حسب الصيغه المعروفه للاتفاق خلاف مثلا لحاله حكومه الانتفاضه وزير الدفاع اعتقد كان عثمان عبدالله وكان اظن عميد او لواء (رتبه اقل من رتبه القائدالعام واعتقد سوار الدهب كان قائد عام رغم رئاستو للمجلس العسكرى )

الراكز العزيز عاصم سلام..
ما اختلفنا.. بس التسمية والتبعية تكون معرووووفة من غير لولوة.
العساكر ديل في المرحلة دي من الثورة (جر النفس) ممكن يعملوا
اااي حاجة عبر البوابة دي.
لو زي ماقال علاء يكون هو رئيس مجلس السيادة بالتناوب اذن
مافي مشكلة.. ولو زي ما قلت انت يكون وزير الدفاع..
لكن تكون عايمة كدا والعسكر يقولوا ح نقرر فيها دي المشكلة
زااااااتها يا عاصم.
يدونا النجيضة قبل التوقيع علي بياض لموقع حساس زي دا.

القائد الاعلي للقوات المسلحة هو مجلس السيادة بكامله !

Quote: القائد الاعلي للقوات المسلحة هو مجلس السيادة بكامله !

هو ده المفروض ولكن ارى تحت الرماد وميض نار

Quote: هو ده المفروض ولكن ارى تحت الرماد وميض نار

لهب عديل يا ترهاقا.. النص دا مفروض يتحسم بصورة قاطعة.
الدعم السريع يجب تحجيمهم ووضعهم تحت السيطرة مع مليشيا الجيش.

Quote: القائد الاعلي للقوات المسلحة هو مجلس السيادة بكامله ! !

ياريت يا استاذ كمال دا يكون حقيقة زي ما افتكرت انا حسب قرايتي
لنص الوثيقة.
بس لولوة العساكر طبعا متوقعة خاصة في فشل دكتورة إبتسام من الادلاء
باجابة قاطعة في المؤتمر امس او للصحفي عمار عوض.

Quote: يدونا النجيضة قبل التوقيع علي بياض لموقع حساس زي دا.

سلامات اخ معتصم وضيوفو
ناس اللجنه الفنيه مفروض ينجضو الشغله دى ومايخلوها عايمه ى والناس ضاربه اخماس فى اسداس وقلقانه من الحته دى ويملكو النراى العام نسخه بعد استكمال الصياغه توطئه للتوقيع خلال يوم الاحد
.ابتسام سنهورى فى المؤتمر الصحفى حساباتها حسابات ازوان عدييده انو السيادى مدنى عشان فيهو 6 مدنيين مقابل 5 وانو حتى التشريع قبل تسميه المجلس التشريعى حيكون فى اجتماع مشترك (السيادى +الوزراء) وانو مافى خوف لانو برضو المدنيين هم الوزن الاكبر حسب ردودها فى المؤتمر الصحفى.

Quote: 6 مدنيين مقابل 5 وانو حتى التشريع قبل تسميه المجلس التشريعى حيكون فى اجتماع مشترك (السيادى +الوزراء) وانو مافى خوف لانو برضو المدنيين هم الوزن الاكبر حسب ردودها فى المؤتمر الصحفى.

ما حبيت اكتب إنطباعي عن المؤتمر خاصة ردود دكتورة ابتسام لكن بامانة طريقتها
وردودها استاذية جدا وزي البتخاطب في طلبة!!
زوغتها من الرد علي سؤال القائد الاعلي وتكرارها ( يا جماعة) عندنا في المجلس
اكثر مما عند العسكر ما تخافوا حقيقة محيرة. قد تكون خبيرة جدا في القانون
وفاهم كمان عدم خبرتها في المؤتمرات الصحفية , لكن هي مفروض تملك المعلومة
كما ينبغي وتترك التقديرات للناس.
عندنا كووول الشارع ولا حتي سائلين في ستة المجلس يا دكتورة!!

وين مشت الدعم السريع
حاتلقي حميدتي علي راسهم
انشاءالله لو بقوا جنود الله

Quote: انشاءالله لو بقوا جنود الله

بس ما جنود الوطن..
محتاجين ضبط للبند دا منهم ما يفكوه سااااي كدا للعسكر.
المسألة فيها تاهيل وإعادة بناء للمليشيتين ديل بعد فقدان
الشارع للثقة التامة فيهم.