Post: #1
Title: هاكن البشارة دي . هجرة لي كندا عن طريق الكفالة
Author: Osman Musa
Date: 07-15-2019, 10:38 AM
10:38 AM July, 15 2019 سودانيز اون لاين
Osman Musa-
مكتبتى
رابط مختصر
طريقة ما صعبة للهجرة لي كنداء .
يضمنوك خمسة كنديين واحد منهم يكون كفيلك لي سنة واحدة .
بعد السنة امورك بتكون سلكت .
والتفاصل في الدرب . كنداء من البلدان الممتازة للدراسة والمعيشة .
|
Post: #2
Title: Re: هاكن البشارة دي . هجرة لي كندا عن طريق الكف
Author: يوسف الطيب احمد إدريس
Date: 07-15-2019, 10:47 AM
Parent: #1
سلام أخ عثمان
يلا التفاصيل بسرعة لي أكتر من سنتين وأنا بحاول في موضوع الهجرة لكندا
مع العلم أنا مقيم بالسعودية ومعايا أولادي
|
Post: #3
Title: Re: هاكن البشارة دي . هجرة لي كندا عن طريق الكف
Author: Osman Musa
Date: 07-15-2019, 10:58 AM
Parent: #2
حاضر. بجيك يا اخي. يوسف .
بعد التحية وبعد الدعوات ليك والاسرة الكريمة بالتوفيق .
|
Post: #4
Title: Re: هاكن البشارة دي . هجرة لي كندا عن طريق الكف
Author: محمد علي البصير
Date: 07-15-2019, 01:05 PM
Parent: #3
Quote: طريقة ما صعبة للهجرة لي كنداء .
يضمنوك خمسة كنديين واحد منهم يكون كفيلك لي سنة واحدة .
بعد السنة امورك بتكون سلكت .
والتفاصل في الدرب . كنداء من البلدان الممتازة للدراسة والمعيشة . |
خشمك فيه اللبن يا أخونا عثمان مع تحياتي
ربنا يقوي النصيب
أخوك ود اللبصير Waiting list من سنوات
يقرأء مع ما ورد هنا https://sudaneseonline.com/board/499/msg/1520334581.html
|
Post: #5
Title: Re: هاكن البشارة دي . هجرة لي كندا عن طريق الكف
Author: النصرى أمين
Date: 07-15-2019, 02:09 PM
Parent: #4
تقريبا كل الحبش و الارتريين جو بالطريقة دى
لكن ما سمعت بسودانى واحد قدر يعملها
|
Post: #33
Title: Re: هاكن البشارة دي . هجرة لي كندا عن طريق الكف
Author: Osman Musa
Date: 07-21-2019, 05:51 PM
Parent: #5
الاخ النصري سلامات
كلامك صحيح . جيرانا ديل مستفيدين من كل الطرق .
|
Post: #6
Title: Re: هاكن البشارة دي . هجرة لي كندا عن طريق الكف
Author: Shaker Hamid
Date: 07-15-2019, 02:10 PM
Parent: #4
ونلقى خمسة كنديين وين
|
Post: #7
Title: Re: هاكن البشارة دي . هجرة لي كندا عن طريق الكف
Author: النصرى أمين
Date: 07-15-2019, 02:15 PM
Parent: #6
مترجم بقوقل من صفحة وزارة الهجرة الكندية
مجموعة الخمسة (G5) هي خمسة أو أكثر من المواطنين الكنديين أو المقيمين الدائمين الذين رتبوا لرعاية لاجئ يعيش في الخارج للمجيء إلى كندا.
يجوز لرعاة مجموعة الخمس فقط رعاية مقدمي الطلبات الذين يتم الاعتراف بهم كلاجئين من قبل وكالة الأمم المتحدة للاجئين (UNHCR) أو دولة أجنبية. يجب أن يكون المتقدم الرئيسي لديه حق اللجوء. إن الحصول على مركز اللاجئ يعني أن الجهة المرخص لها قد وجدت أن الفرد يفي بتعريف اللاجئ. يمكن أن تكون هذه الهيئة المرخص لها إما مفوضية الأمم المتحدة السامية لشؤون اللاجئين أو حكومة البلد (أي الدولة الأجنبية) حيث يعيش اللاجئ الآن.
يجب عليك تضمين المستند الذي يثبت وضع اللاجئ المعترف به في طلب الكفالة المقدم من اللاجئ.
|
Post: #8
Title: Re: هاكن البشارة دي . هجرة لي كندا عن طريق الكف
Author: تماضر الطاهر
Date: 07-15-2019, 02:42 PM
Parent: #7
اللهم خمسة كنديين يضمنوني يااا رب
|
Post: #9
Title: Re: هاكن البشارة دي . هجرة لي كندا عن طريق الكف
Author: النصرى أمين
Date: 07-15-2019, 03:00 PM
Parent: #8
الطريقة دى ما بتنفع مع المغتربين فى الخليج لأن الشرط
الأساسى هو ان مقدم الطلب لازم يكون مسجل فى مفوضية الأمم المتحدة لشؤون اللاجئين
و غالبا الخيار هو مصر .
الانتظار هناك قد يصل لخمسة سنوات و هناك حسب علمى عشرات الآلاف من طلبات السودانيين فى مصر فى ظروف صعبة جدا ومعاناة فى العيش وسط المصريين لسنوات طويلة دون إمكانية الخروج لاى سبب.
احسن خيار في الوقت الحاضر هو الوصول لامريكا.
|
Post: #10
Title: Re: هاكن البشارة دي . هجرة لي كندا عن طريق الكف
Author: دفع الله ود الأصيل
Date: 07-15-2019, 03:19 PM
Parent: #9
«و في أنفسكم أفلا تبصرون» ياخي«مالكم گيف تحكمون» طبعن ، عندكم كنديين و كندايات {موش كنداكات} الأيامات دي قالو : حايمات و حايمين بجاي ؛ و شغالين تش : شيء حكامات
شيء بتاعين أورنيش يصنفرو الأصلو ما بتصنفر حتى لو دبغوه بملء الأرض قرضاً و ملحاً. ياخ الله لا جاب باقيهم.
|
Post: #11
Title: Re: هاكن البشارة دي . هجرة لي كندا عن طريق الكف
Author: علي عبدالوهاب عثمان
Date: 07-15-2019, 03:38 PM
Parent: #10
لطريقة دى ما بتنفع مع المغتربين فى الخليج لأن الشرطالأساسى هو ان
مقدم الطلب لازم يكون مسجل فى مفوضية الأمم المتحدة لشؤون اللاجئين و غالبا الخيار هو مصر
=================
الحبيب النصري والتحية لعثمان
يا فرحة ما تمت .. خمس سنوات في مصر .. أحسن لينا دنقلا ضواحي الدنيا ..
مشكلتنا العلاج والدواء المنتهي الصلاحية ..
نسيت العمر .. على الله .. بعد خمس سنوات خارج السياق العام (هههه)
طيب الحاجة نقول ليها شنو ( إن شاء الله في رطانة هناك)
وقراصة وتركينج ( ملوحة ) ..
حبيبنا أمين تاني كفيل .. في كندا كمان كفيل حاجة غريبة ..
صدقوني أنا إسم ( كفيل ) يعمل لي عقدة على طول ( ههه)
أجمل حاجة في عمرنا توفر العلاج .. عشان كده العالم أول مهم
تحياتي .. شكراً للتوضيح ..
ليت الشباب يعود يوماً ..
|
Post: #13
Title: Re: هاكن البشارة دي . هجرة لي كندا عن طريق الكف
Author: امتثال عبدالله
Date: 07-15-2019, 05:48 PM
Parent: #10
يا يوسف
ما دام انت مقيم في السعودية فإن الدخول لامريكا سهل بالنسبة ليك فما عليك إلا أن تذهب القنصلية السعودية وتطلب تأشيرة سياحية وتقدم ليهم الإقامة وشهادة اجازة ...وتمنح التاشيرة بكل سهولة ..وبعد وصولك تمشي الحدود الكندية وتطلب اللجوء
و الكثيرينسافروا إلى كندا بهذه الطريقة..ولا انصحك بطلب اللجوء في أمريكا لان طرمبة سوف لن بعطيك أي إقامة... ..الكثيرين
|
Post: #12
Title: Re: هاكن البشارة دي . هجرة لي كندا عن طريق الكف
Author: Osman Musa
Date: 07-15-2019, 05:38 PM
Parent: #4
الف شكر اخي محمد علي البصير
علي نقل الرابط المهم .
|
Post: #14
Title: Re: هاكن البشارة دي . هجرة لي كندا عن طريق الكف
Author: النصرى أمين
Date: 07-15-2019, 05:55 PM
Parent: #12
اختنا امتثال جابت ليكم النجيضة.
اسمعوا كلامها
|
Post: #15
Title: Re: هاكن البشارة دي . هجرة لي كندا عن طريق الكف
Author: امتثال عبدالله
Date: 07-15-2019, 07:03 PM
Parent: #14
اها يا يوسف ....سمعت كلام النصر ي....
زوج خالتي وكل أسرته دخلوا إلى كندا بهذه الطريقة..فقد كان يعمل بالسعودية وعنده إقامة تذهب القنصلية السعودية وقدم ليهم الإقامة السعودية وشهادة الإجازة وقتل ليهم ما شي يزور نيويورك ، عاصمة العالم ، القنصل الأمريكي منحهم التأشيرة بدون سين وجيم كتير..لانه بيعتقد ان الاجانب المقيمين في السعودية ما بيفكروا في الهجرة لامريكا لأنهم مرتاحين هناك ...ووصل زوج خالتي مع أسرته وبعد أسبوع في نيويورك ذهب الحدود الكندية واستبقبلهم المدنيين بترحاب وهو الآن مقيم في مونتريال ....وحل مرة يقول لينا الله نجانا من الكفيل ...
|
Post: #16
Title: Re: هاكن البشارة دي . هجرة لي كندا عن طريق الكف
Author: امتثال عبدالله
Date: 07-15-2019, 08:03 PM
Parent: #15
وهاك البشارة دي يا يوسف ..اخبرتني الآن بسمات بنت عطبرة أن أسرة سودانية وصلت من السعودية أول أمس بتاشيرة سياحية..وهم غدا ذاهبون إلى الحدود الكندية لتقديم اللجوء....قلت ليها مش احتمال يقولوا ليهم الوضع الآن أصبح ديمقراطي..ردت وقالت ما دام حميدتي موجود ومليشياته بتقتل في الناس فإن طلب اللجوء اسهل شئ الآن..لان الناس يفرون من عصابات الجنجويد ..والصحف الامريكية مليانة باخبار جرائم الجنجويد ....
...المهم غدا سنعرف الخبر وناتيكم به هنا
|
Post: #17
Title: Re: هاكن البشارة دي . هجرة لي كندا عن طريق الكف
Author: Osman Musa
Date: 07-16-2019, 07:40 AM
Parent: #16
طرق مختلفة للدخول انشاءالله
نلاقي فرصة للشرح. واحدة واحدة
|
Post: #18
Title: Re: هاكن البشارة دي . هجرة لي كندا عن طريق الكف
Author: إبراهيم محبوب الخيري
Date: 07-16-2019, 11:16 AM
Parent: #16
غدا" بتوقيتنا نحن جات اها البشارة الله يبشركم بالخير. نسيتونا السلام فالسلام عليكم جميعا"
|
Post: #19
Title: Re: هاكن البشارة دي . هجرة لي كندا عن طريق الكف
Author: يوسف الطيب احمد إدريس
Date: 07-16-2019, 11:51 AM
Parent: #18
سلام للكل
شكراً ليك الأخت امتثال وبسمات وبإذن الله الواحد يبدأ في ترتيب الزيارة لأمريكا
تحياتي لكن
|
Post: #20
Title: Re: هاكن البشارة دي . هجرة لي كندا عن طريق الكف
Author: امتثال عبدالله
Date: 07-16-2019, 12:20 PM
Parent: #19
يوسف
بعد صول الأسرة السودانية دي الجات من السعودية إلى كندا سنتصل بها لان بسمات عندها اتصال بالأسرة قبل حضورهم ..وسوف نسالهم التفاصيل وماذا قالوا في طلبات التأشيرة لأمريكا حتى وافق القنصل الأمريكي في السعودية منحهم التأشيرة...وماذا قال قال لهم الكنديين في الحدود..تابع معنا ....
|
Post: #21
Title: Re: هاكن البشارة دي . هجرة لي كندا عن طريق الكف
Author: يحي قباني
Date: 07-16-2019, 01:28 PM
Parent: #20
| Quote: وماذا قال قال لهم الكنديين في الحدود |
الكنديين ما عندهم غير سؤالين فقط يا امتثال و بخلوك طوالي :
1- لو طالب لجوء هاك الفورمات دي عبيها ...
2- شايل معاك قروش كم ؟
النقطة التانية ... للناس الما محتاجة تقعد على الولفير اي قروش ما مشكلة بس تكون اقل من 10 الف دولار كندي او ما يعادلها ...
بالنسبة للناس الدايره الولفير ... يشيلو بس اقل من خمسمية دولار عشان الايام الاولى ...
النصيحة الاهم : الولفير لا يسمن و لا يغني من جوع ...
العنده قرش ما يدخل نفسه في الحتة دي ...
المضطر ... الله غالب ...
اهم شي كيفية الدخول لامريكا ...
|
Post: #22
Title: Re: هاكن البشارة دي . هجرة لي كندا عن طريق الكف
Author: Yousuf Taha
Date: 07-16-2019, 02:12 PM
Parent: #21
ياعمنا قباني
انا فكرت اجي اجازة مليت الفورم بتاع ال migration الكندي ياخي دا سل روحي سل
التقديم انلاين ولسة ماخلصت قالوا عايزين تأشيرات سابقة لاي دولة سافرتها يعني اقعد اعمل scan ل10 صفحات في جوازي وتدفع انلاين ماعليك بعداك الا تمشي تعمل البصمة في اقرب فيزا سنتر في اديس واللا القاهرة
و بس الظريفة بدوك multiple entry لستة شهور
|
Post: #23
Title: Re: هاكن البشارة دي . هجرة لي كندا عن طريق الكف
Author: امتثال عبدالله
Date: 07-16-2019, 02:27 PM
Parent: #21
ود قباني
شكرا للمعلومات الإضافية...
اها يا جماعة الخير...ود قباني وهو من ناس كندا أداكم النجيضة بالنسبة لاسئلة الكنديين ...بس فضل ليكم أسئلة القنصل الأمريكي في السعودية وكيف وتحصل على التأشيرة السياحية ...ودي بنجيب ليكم بعد يومين ثلاثة ..بس الزموا الصبر ....يا ناس السعودية ..ما دام صبرتوا على عذاب الكيزان ٣٠ سنة ...ممكن تصبروا اليومين ديل ....
|
Post: #24
Title: Re: هاكن البشارة دي . هجرة لي كندا عن طريق الكف
Author: Ahmed Yassin
Date: 07-16-2019, 04:54 PM
Parent: #23
نصيحة للناس العايزة تعمل تاشيرة لامريكا (بزنس) اسمها B2خاصة من السعودية
اهم شىء الخطاب (طلب التاشيرة) حق الكفيل او المؤسسة التي تعمل بها
لازم الخطاب باللغة الانجليزية ويكون فيهو توضيح للاتي:ـ
رقم الجواز
الوظيفة
الراتب
موفر لك الاكموديشن السكن والعلاج والبدلات
عدد سنوات الخدمة في المنشأة
بداية العقد ونهايته ويجدد العقد اوتوماتيكيا
تحديد نوع التاشيرة هل مفردة او متعددة
تحديد فترة المكوث في امريكا وموعد العودة
المنشاة تتحمل جميع المصاريف والمسئولية حتى عودتك سالما الى المملكة والى عملك
لو عندك نية تاخد اولادك .. انت في الاول سافر لوحدك وارجع بدون ما تكسر الفيزا
بعد كدة تقدم سياحة مع العائلة و امورك بتتحلا
اي زول عايز الصيغة النموذجية .. انحنا حاضرين
|
Post: #25
Title: Re: هاكن البشارة دي . هجرة لي كندا عن طريق الكف
Author: النصرى أمين
Date: 07-16-2019, 05:58 PM
Parent: #24
الناس العندها عيال صغار ؛ حجز فى ديزنى لاند او ديزنى ويرلد ، حجز فندق
حجز سيارة..شيل كل الحجوزات الاخرى الممكنة و اتوكل على الله
|
Post: #26
Title: Re: هاكن البشارة دي . هجرة لي كندا عن طريق الكف
Author: النصرى أمين
Date: 07-16-2019, 06:37 PM
Parent: #25
حاول اعمل تاشيرات اوربية قبل تحاول الأمريكية
|
Post: #27
Title: Re: هاكن البشارة دي . هجرة لي كندا عن طريق الكف
Author: امتثال عبدالله
Date: 07-16-2019, 09:23 PM
Parent: #26
النصر ي..
اسهل بلد ممكن تطلب فيه اللجوء بعد كندا ، وبعد أمريكا قبل طرمبة هي بريطانيا ..ولكن تأشيرة الدول الأوروبية، شينجن ، لا تسمح لك الدخول لبريطانيا...واذا تمكن الشخص من الدخول لبريطانيا فما ضروري يجي أمريكا أو كندا ....
لدي صديقة قدمت لجوء في بريطانيا العام الماضي..وبعد قاضي الهجرة سمع قصتها وبعد مرافعة المحامي قال ليها نحن عارفين نص كلامك دا كضب ، ( زي الفريق كضباشي ، ( دي من عندي ) ..لكن برضه مرحب بيكي في بريطانيا كبلد امن لك ...ونتمنى لك التوفيق ....
ولي عودة ..
|
Post: #28
Title: Re: هاكن البشارة دي . هجرة لي كندا عن طريق الكف
Author: عبدالرازق الطيب يس
Date: 07-17-2019, 09:43 AM
Parent: #21
سوال لو دخلت كندا بتاشيرة زياره - سياحه او طالب ما الخطوات التي يجب ان اعملها
|
Post: #29
Title: Re: هاكن البشارة دي . هجرة لي كندا عن طريق الكف
Author: النصرى أمين
Date: 07-17-2019, 04:54 PM
Parent: #28
صعوبات
|
Post: #30
Title: Re: هاكن البشارة دي . هجرة لي كندا عن طريق الكف
Author: علي عبدالوهاب عثمان
Date: 07-17-2019, 05:05 PM
Parent: #29
مع التحية للاحباب
التأشيرة لأمريكا فيها مشكلة وصعوبة
لازم كشف حساب 6 شهور من البنك
ورصيد كمان تقريباً فوق 100 الف ريال
ما متأكد من باقي الشروط
المشكلة العالم كله يريد الهجرة إلى الغرب
|
Post: #31
Title: Re: هاكن البشارة دي . هجرة لي كندا عن طريق الكف
Author: امتثال عبدالله
Date: 07-17-2019, 05:13 PM
Parent: #29
اتصلنا بالأسرة السودانية التي وصلت من السعودية ودخلت كندا عن تفاصيل رحلتهم إلى كندا فقال رب الأسرة أنهم ركبوا البص من نيويورك ووصلوا إلى مدينة اسمها plattsburgh على الحدود الأمريكية الكندية وهي تابعة لولاية نيويورك ، والمسافة حوالي ٥ ساعات ..ومن موقف البص استقلوا تاكسي ..وان الحاجة الغريبة أن سواق التاكسي عرف أنهم ذاهبون إلى كندا من قبل أن يخبره ..وبعد ٥ دقائق فقط انزلهم وقال لهم الآن اعبروا الحدود مشيا على الأقدام ولم يكن هناك لي فاصل بين الجهة الكندية والأمريكية ولكن فقط أشجار ونباتات ...وعندما أصبحوا داخل الأراضي الكندية ، وبعد ١٠ دقائق وصل إليهم الشرطة الكندية...وقال اهم الشرطي هل تعرفون أنكم الآن داخل الأراضي الكندية وليست الأمريكية..فقالوا نعم ....
ترى ماذا فعلت بهم الشرطة الكندية ...هل عاملوهم كما يعامل الجنجويد المواطنين!!!
|
Post: #32
Title: Re: هاكن البشارة دي . هجرة لي كندا عن طريق الكف
Author: امتثال عبدالله
Date: 07-17-2019, 06:01 PM
Parent: #31
وأضاف أن الشرطة الكندية عاملتهم معاملة كريمة جدا حتى أن أحدهم بدأ يلاعب الاطفال ويضحك معهم وسأله: لماذا انام هنا ، فقال جئنا نطلب اللجوء السياسي ...فاخذوهم إلى مكتب آخر..وقالوا لهم أنه مكتب ضباط الهجرة...وهناك أخذوا منهم بصمات وأخذوا منهم التلفونات الجوال...وسالوهم عن الغرض من حضورهم ..وأخبره بذلك ...وبعد أن أخذوا منهم صور فوتوغرافية..اعادوا إليهم التلفونات وذلك بعد مرور حوالي ٣ ساعات في مكتبهم ..وإعطوه اوراق ثبوتية وخطاب لفندق في مونتريال ..وانهم الان في الفندق ..لحين إيجاد سكن لهم ...والبدء في إجراءات تقديم اللجوء السياسي ....
|
Post: #34
Title: Re: هاكن البشارة دي . هجرة لي كندا عن طريق الكف
Author: علي عبدالوهاب عثمان
Date: 07-21-2019, 06:18 PM
Parent: #32
فاخذوهم إلى مكتب آخر..وقالوا لهم أنه مكتب ضباط الهجرة...وهناك أخذوا منهم بصمات وأخذوا منهم التلفونات الجوال...
وسالوهم عن الغرض من حضورهم ..وأخبره بذلك ...وبعد أن أخذوا منهم صور فوتوغرافية..اعادوا إليهم التلفونات
وذلك بعد مرور حوالي ٣ ساعات في مكتبهم ..وإعطوه اوراق ثبوتية وخطاب لفندق في مونتريال ..
وانهم الان في الفندق ..لحين إيجاد سكن لهم ...والبدء في إجراءات تقديم اللجوء السياسي ....
=========================
شكراً الابنة امتثال على المداخلة ..
بغض النظر عن أي شيء .. ديل أعظم بشر .. يا سلام عليهم
قمة الانسانية .. سلوك فوق التصور ..
الحمد لله .. مازال هناك عمق انساني في هذا العالم
حتى رئيسهم شاب محبوب من أول نظرة يعطيك إنطباع
بأنه ذو قيم انسانية ..
التحية لكندا ..
|
|