هل مليشيا الجنجويد مخترقه؟؟

10:52 PM May, 15 2019 سودانيز اون لاين
Mutasim Idris-Sacramento
مكتبتى
رابط مختصر
هل يوجود كتائب ظل وضباط امن مزروعين في الجنجويد؟ كل اصابع الاتهام تشير الي تورط العصابه في قتل واصابة الثوارحول محيط القيادة. شهود عيان ومصابين وفيديوهات لايف كانت بتاكدتورطهم في المجزرة. السؤال هل تلقي هولاء الجنود الاوامر من الضباط المواليين للانقاذ في المليشيا في محاوله لخلق مواجهة بين حميدتي والجيش! ام هل يوجد (دعم سريع) تاني يعمل في توازي مع مليشيا حميدتي؟ حميدتي ينفي وعمايل جنوده تاكد التورط .متذكرين لما المليشيا دي خشت الخرطوم في اخر شهور الرقاص سئ الذكر وكانوا بحلقوا للناس في الشوارع في مشاهد مهينة رغم انكار حميدتي ليها وبعدين سكوته!! واضح انه الدوله العميقه بدات في الثورة المضاده وكانت جاهزه جدا تفكك الجنجويد وتوريط حميدتي لانه ممكن يكون هو من اكبر المخاطر عليهم ومانسوا ليه عدم الانصياع لفض الاعتصام بالقوه في الايام الاولي للاعتصام.

ياريت يا معتصم يكون ده الحقيقة
لكن لا اشك مطلقا في انو نحن جهتين فقط
الثوار والجنجويد مع المجلس العسكري

واطلاق النار مقصود منه تاجيل المفاوضات
وفض الاعتصام

لا شي اخر حتي يثبت اني علي خطأ هذه هي قناعاتي

وهذا ما نسميه ان الكيزان يفوقون سوء الظن

Quote: وهذا ما نسميه ان الكيزان يفوقون سوء الظن

البشير بعلمه او عدمه زرعوا ناسهم او الحواليهو كانوا عارفين انه
حميدتي الخطر الاوحد ليهم واستعدوا للسيناريو دي في حاله انه حميدتي افتري.
سئ الذكر طبعا ما كان معروف لائ المعسكرات ح يميل الاماراتي او القطري في اخر ايامه
فكان لازم يزرع ايادي داخل الجنجويد وتفكيكهم وتفيتهم في حاله ميل البشير
لمحور قطر وبدايه الانسحاب من اليمن.

سلام يا جعفر

معتصم ادريس

مليشية الجنجويد هي قوة قبلية وتعمل من غير قوانين واضحة وهي غير مدربة وغير منضبطة بمعنى أخر أنها غير مؤهلة عسكريا. ومن السهولة جدا أن يكون من بينها أفراد منفلتين ويطلقون النار على المواطنين لأسباب تافهة.
للأسف الشديد أن الذي يحدث الان ليس سوى البداية مع هذه القوة، و في الفترة القادمة يجب أن يتحرك الجيش من أجل تفكيك هذه القوات، قبل فوات الاوان.

سلام يا دينق ومنون بزيارتك وتعليقك.
المليشيا دي تاريخها الاسود معروف وليه اتكونت اساساااا.
المشكله هسي بقت جواااااها في عضمها ونحن بندفع التمن ده.
يعني لو لاحظت حميدتي بقول كلام لمليشته ولينا (خطاب الفطور)
وعمايل المليشيا دي في الشوارع من شهود عيان وفيديوهات مختلف.
الليله البرهان وبقوة عين بقول انها جزء اصيييييل من الجيش!!
اذن العمايل دي عمايل زراع من الجيش.

بقي واضح فقدان حميدتي وسيطرته علي مليشيا جنجويده.

ضباط جهاز الامن والمخابرات المزروعين في المليشيا بياخدوا تعليماتهم من (قوش) او محور قطر.

سلام معتصم ادريس والضيوف الكرام

انا الذي اراه ان قوات الدعم السريع مخترقة من قبل كتائب الظل وعناصر امن قوش وغيره من فلول ومليشيات النظام السابق

والذين اطلقوا الرصاص على الثوار ليسوا من قوات حميدتي ولكن من ميليشيات النظام السابق الذين اخترقوا قوات الدعم السريع ..

واختراق قوات الدعم السريع سهل جداً ولا يحتاج الى عبقرية ولا عمل استخباراتي كبير .. فقط عليك ان تاتي بتاتشر او عدة تاتشرات واسلحة كلاشنكوف وتمشي لاقرب ترزي يخيط ليك ملابس الدعم السريع ومعاه زي رتبتين او ثلاثة رائد ومقدم وعقيد .. وبس .. ويلا تحوم في شوارع الخرطوم والله زول بسالك مافي .. الكل يقول ديل قوات الدعم السريع .. وهذا ما حصل بالضبط عندما تم ضرب المتظاهرين بالرصاص وظن الثوار ان قوات الدعم السريع هم الذين اطلقوا الرصاص بينما هم في الحقيقة قوات مندسة لبست ملابس الدعم السريع ..

Quote: والذين اطلقوا الرصاص على الثوار ليسوا من قوات حميدتي ولكن من ميليشيات النظام السابق الذين اخترقوا قوات الدعم السريع ..

علي عبدالله سلام..
دا مربط الفرس وبداية نهاية الجنجويد.
حميدتي زكاءه فطري ينفع في نواحي الخلاء تهريب او عمليات قذرة في حق اهلنا في دارفور وجبال النوبه بحكم معرفته بمنطقة شغله او نسيجها الاجتماعي.
لما الرقاص سئ الزكر جابوا هو ومليشاته الخرطوم كان الصراع علي اشده بين تيارات الدوله العميقة. جابوا للحماية الشخصية فقط ليه وللاقربين ما لحماية
النظام لانه عارف جهل حميدتي بيها وكمان ضعف المليشيا في مواجهة اي زراع امني مسلح آخر حتي لو كان جهاز الامن والمخابرات. وكانت اول رساله لفريق
الخلاء مع وصول مليشته الخرطوم في اخر شهور النظام هي رسم الصوره القبيحه لمليشته من قبل الجهاز في مخيلة الشعب لما قاموا بالعمليات الهمجيه (الحلاقه)
ودخول الاسواق ونهبها وترويع المواطنين في الخرطوم وعطبره وشندي ومدني واجزاء تانيه من البلد.
الخطوة الاستباقيه دي كانت من (الطامح) قوش وقراءته الصحيحة للمشهد وما ستؤل اليه الاحداث. حتي لما الرقاص طلب من حميدتي وقوش ضرب المعتصمين
كانت الرساله موحده وهي الرفض لايمانهم بنهاية نظام البشير وبدايه الاعداد لما بعد الانقاذ.
ولانه المحاور بقت في صراع لمن توؤل اليه الغلبه والانفراد بالسلطه بدات معاه شغل كل فريق في اتجاه محوره.
حميدتي حاول ينأي ويبعد مليشيته من صدام الشوارع والظهور بمظهر الحامي للثورة وجهاز الامن من الناحية التانيه شغال في تبويظ المخطط.

سلام عليكم

هل سينقسم الدعم السريع إلى قسمين : جنجويد و امنجية ؟

و هل ستكون هناك مواجهة علنية بين القسمين. ؟

يعني جنجويد مع الثورة. و أمنجية يقودون الثورة المضادة ؟

حتى هذا الإنقسام - لو حدث - هو في حقيقته نتيجة لصراع المحاور الخليجية .

Quote: هل سينقسم الدعم السريع إلى قسمين : جنجويد و امنجية ؟ و هل ستكون هناك مواجهة علنية بين القسمين. ؟

عليكم السلام نعمات عماد ومرحبتين بيك.
الجنجويد مليشيا فتوات ما اكتر وما اقل اضافه الي تفريخ مرتزقه لحرب اليمن كمهمة اضيفت مؤخرا لفريق اول الخلاء.
استفاد منها البشير في عمليات الابادة في مرحلة من عمر الانقاذ وجابهم في نهايتها بغرض حمايته في ايامه الاخيرة.
جهاز الامن كان محتاج بشده للمليشيا دي يتحرك من خلالها في انجاز عملياته ونسبها لجهة غير معروفه. يعني يدخلوا ويطلعوا متي ما ارادوا ( تغير يونيفورم).
ما ح تكون في مواجهة بينهم لانو حميدتي لا يمتلك من ابجديات المواجهة من استخبارات وتحديد اهداف (كانت موفرة ليه)
وبالتالي ضهره مكشوف ومواقعه معروفه ويبقي انتحار جماعي ليه والمليشيا لو دخل في اااي صراع مباشر معاهم.
يا نعمات حميدتي ما بعني الكتير في صراع المحاور غير امداده بالمرتزقه في حرب اليمن واهميته ليست بالقيمه الكبيرة لو دعت الضرورة
بين حمايته والاستفاده منو او بيعه قصاد المطامع التانيه الاكبر لمحور الامارات في السودان.

Quote: هل مليشيا الجنجويد مخترقه؟؟

نعم ملشيا حرس الحدود جماعة موسى هلال الذى صحى وعرف لعبة المركز ودفع الثمن وهم بلبسو نفس الزي ومن نفس القبيلة
وقد بصفو حساباتهم في الخرطوم قريبا
وهذه واحدة من اجرام المركز شق القبائل السودانية كما فعلو مع فالوينو ماتيب ورياك مشار وابادة النوير من اجل النفط 1990
معركة الجنجويد القادمة في الخرطوم ومسالة زمن وقطر والامارات ومصر ايضا هم وقود الفوضى الخلاقة في السودان وما تفرحو بي اعلام العرب الرخيص
عشان كده قلنا الثورة كانت تراهن علي التحول الدستوري والمحكمة الدستورية كما فعلت دول افريقيا وليس الجيش لانه لا يوجد جيش من الاساس عبر 30 سنة من كابوس الانقاذ المدمر
الثورة الدستورة مشروحة كويس في البورد ومن 2015 اذا كانت الناس اصلا بتفتش في الديمقراطية ومش تصفية الحسابات في بلد بقت برميل بارود

Quote: معركة الجنجويد القادمة في الخرطوم ومسالة زمن وقطر والامارات ومصر ايضا هم وقود الفوضى الخلاقة في السودان وما تفرحو بي اعلام العرب الرخيص

مرحب بالاخ عادل امين.. شاكر علي المرور.
تصفية الحسابات مدورة بقدم ما يعرف بالسودان سواء كانت في المركز او الهامش.
والحاصل في الخرطوم (المركز) برضو تصفية حسابات كان موجود و مستمر بس من غير بندقيه.
اما ما ح يحصل في المركز من تصفية حسابات (بالبندقيه) اساسا بدأ وشلال الدم بيدفعوا فيه دايما البسطاء.
اي نفس حرة يا عادل بتتوق للحريه والعداله والسلام سواء تم ليها ذلك بالثورة الدستوريه او باي شكل ديمقراطي آخر يتشارك فيه الكل قرارهم.

Quote: اي نفس حرة يا عادل بتتوق للحريه والعداله والسلام سواء تم ليها ذلك بالثورة الدستوريه او باي شكل ديمقراطي آخر يتشارك فيه الكل قرارهم.

وهذا ما افعله في البورد صوتا وكتابتا وتصاميم توضحية
الثورة دستورية ثقافية وساهلة

https://up.top4top.net/

1-نرفع علم الاستقلال الحقيقي في ساحة الاعتصام في كل بيوت الخرطوم والسودان وهذا يعني ادانة كل الانقلابات التي قوضت الدولة المدنية في السودان وجلبت الجنرالات الي القصر الجمهوري باجندة خارجية انقلاب 1958 و1969 و1989
2- اعتماد الدستور الديمقراطي الفدرالي الموجود ده 2005وتفعيل المحكمة الدستورية (الفصل الخامس) وانزال الدستور في اجهزة الاعلام ليقيمه الشعب وليس الاوصياء المعتلين ديل
3- الغاء الرقم الوطني والجواز الالكتروني تدربجبا (سودانيين المهاجر والعودة لقانون الجنسية 1957-1989 واعتماد الجنسية الخضرا وشهادات الميلاد والجوازات الصادرة قبل 1989 في اي عملية انتخابية قادمة
4- الغاء ولايات واستعادة الاقاليم ودي بتنهي 90% من المعاناة الاقتصادية وتحررنا من 3000 دستوري حاصل فارغ خمسة اقاليم كفاية باسس جديدة شرحتها كثير
5-الالتزام بالانفاقيات الموقعة من 2005 لي 2019 نصا وروحا وارض سلاح قوى الهامش
6-الحريات الاربعة مع دولة جنوب السودان

مش قالو الحصة وطن وهم جنرالات عازين بيان بي العمل خلاص ينفذو الستة حاجات دي اول حاجة بعد داك الحوار ملحوق مع قوى الحرية والتغيير او غيرهم
اهم حاجة يرجع الاطار الصحيح للدولة السودانية اولا ما قبل 1989 باسس جديدة

حميدتي اليوم في افطار الادارة الاهليه قال في مقبوضين اعترفوا بقتل المعتصمين. ولدينا فيديو مصور لجريمتهم.
الثوار لديهم الكثير من الفيديوهات وشهود عيان وشهادة ضحايا تثبت ان مليشيا الجنجويد هم من قاموا بالاعتداء.
بس ما يطلعوا المعترفين بالجريمه ديل زي اعترافات طلاب سنار في بدايه الثورة (تلفيق جهاز الامن وتمثيلياته),

فريق اول الخلاء في كل خطبه لمليشيته يذكرهم بالتعامل الطيب والراقي مع الثوار.
اليوم تمت محاولة لفض الاعتصام او نقول التحرش بالمعتصمين من قبل وحدة وصفوها بانها تابعة لمليشيات
فريق اول الخلاء. هل حميدتي محتاج لاي تصعيد مع الثورة او الثوار في الفترة دي ام ان هناك جهة ما
تحاول احراج حميدتي؟!

انا اعتقد ان اختراق الاخوان للدعم السريع بدا من فوق من حميدتى نفسه عندما غرسوا الى جانبه شخص ملتزم كمستشار اعلامى وسياسى مثل الصادق الرزيقى الذى استطاع ان يحول اراء حميدتى تجاه ما كان يؤمن ويعرف عن قوى ا لحرية والتغيير من صديق لعدو مرددا نفس الخطاب الاعلامى لاعضاء المؤتمر الوطنى الذى ظل الصادق الرزيقى يعبر به فى مقالاته الاخيرة ..
انا اعتقد الصادق الرزيقى هو من احدث التحول فى افكار رجل بسيط وارسل له معلومات غير صحيحة تتطابق مع رؤية المؤتمر الوطنى عبر عنها حميدتى بوضوح فى ارائه الاخيرة .
اما الجانب العسكرى فالاختراق فيه سهل وتم استكماله باحتواء حميدتى من قبل الوسواس الخناس

حضور حميدتى لوليمة يقيمها صديق ودعة وما ادارك ما صديق ودعة لو يعلم ما فعل لما لب دعوته ولكن اجزم انه لا يعلم عنه شيئا واصابع النظام السابق وبصماته حاضرة هنا والقصد خلق جفوة ما بين حميدتى ومن يتهمه ويرفع عليه دعوى امام المحاكم لهذا اقول ان حميدتى لا يعرف وانما تم رسم له ليمشى عليه ومشى وهو مغمض العينيين وسوف يدرك مدى ما اركب من خطا فى يوم من الايام

حبيبنا معتصم رمضان كريم
قطع شك مخترقة هذه المليشيا
فقد تم انتداب ضباط من قوات الامن
لهذه القوات وتم تطعيمها بابناء
القبائل الاخري وخصوصا من النيل الازرق
يبدو ان الكيزان كانوا يتحسبون لهذا اليوم
لذا يمكن ان نقول حميدتي لا يسيطر علي هذه
القوات بالمعني الحرفي
ولكن قد احكم السيطرة علي ابناء قبيلته
الخطورة ان يستغل الكبزان هذه القوات وينفذون مخططهم
عبر كتائب الكيزان والتي ربما تكون موجودة داخل الدعم السريع
وينسبون الامر لحميدتي

Quote: انا اعتقد الصادق الرزيقى هو من احدث التحول فى افكار رجل بسيط وارسل له معلومات غير صحيحة تتطابق مع رؤية المؤتمر الوطنى عبر عنها حميدتى بوضوح فى ارائه الاخيرة . اما الجانب العسكرى فالاختراق فيه سهل وتم استكماله باحتواء حميدتى من قبل الوسواس الخناس

الكيك سلام..
الشباب ديل قالوا ليه ماااااا تتكلم لانه عارفنه اهوج وخاوي فهم ووفاض. وهو بنفسه قال ما عاوزني اتكلم. بس كمان يعني يعمل شنو؟ يقعد في المكتب!!
جري لي كم حتة كده الفالح رشاهم ما يضربوا بفهم الانقاذ الاتربأ عليه وهو في الحقيقة ده كوووووول فهمه في السياسة.

Quote: حبيبنا معتصم رمضان كريم قطع شك مخترقة هذه المليشيا فقد تم انتداب ضباط من قوات الامن

حسن ادم العالم سلام..
الاختراق وااااضح في عمليات التحرش بالثوار واتهام الجنجويد بقتل الشرفاء.
حتي امس دخولهم البنك وحبسهم للموظفين وتهشيم التلفونات بتاعة الموظفات الكانو بصورو و كمان اعتقال موظفي مكاتب الكهرباء
تحس بايدي جهاز الامن فيها.
ح يورطوه في حاجه كبيرة وهو بساعد فيهم بغباءه.
اللهم اضرب الظالمين بالظالمين واخرجنا منهم سالمين.

كثير جدا من المشاهد المصورة اثناء مذبحة الاعتصام كانت بكاميرات المهاجمين..
حتي الابلاغ عن جثث النيل تم بعد ساعات بسيطة من الجريمة.
تنفيذ الجريمة بوحشية وتصويرها والتبليغ عنها واضح بصمة جهاز الامن فيها علي الاقل , او جهة ما شاركت في المجزرة ولها رغبة اكييييدة في توريط فريق الخلاء.
في كل الاحوال ثبت انه فريق الخلاء الجنجويدي صنعه البشير من ورق وحرقه جهاز الامن.

وحدس ما حدس.. جملة حاول مجلس البلهاء التعلق بيها لابعاد التهمة عن مجزرة القيادة.
حدس ما حدس قد تم مرات في محاولات لفض الاعتصام والتحرش بالمعتصمين قبل 29 رمضان يوم المجزرة الاسود. ماذا فعلتم؟؟
حدس ما حدس ما كان ان يتم لولا اجتماع البلهاء (لحدوسه) وكمان محاولة اصباغه بلونية قانونية.
حدس ما حدس تم بعد مخاطبة السفارات بعدم الحضور لارض الاعتصام ومشاركة المعتصمين ثورتهم بفرية (امن الاجانب) في قلب الخرطوم وامام بوابات قوات الشعب المشلعة.
حدس بعد ان تم ابعاد المراسليين الصحفيين وطردهم وقفل مكاتبهم.
مجلس البلهاء اعترف (بالحدوس) وبتحمل كاااامل المسئولية القانونية والاخلاقية والمحاسبة. التهرب من تحقيق دولي والبحث عن كباش فداء لن يجدي فتيلا.
فشل المجلس في توفير امن مواطنيه امام بوابات القوات المشلعة غير جدير بالبقاء لحظة والتحدث عن الامن واستتبابه حتي داخل القصر الجمهوري.
الحساب ولد..
صبرا جميل..

تحياتي
مليشيا الجنجويد ..مُحترِقة

مرحبا
الفأرة حميتي ده غدار وموهوم في الاول دردقو عشان يوقفو طموح الرزيقات بالسلطة وشبكوهو مع موسى هلال علما بانو موسى هلال كان عندو مليشيا حرس الحدود ومدعومة من السلطة نفس الفكرة القديمة بتاعت توازن الرعب وبي كده يضمنو السيطرة عليو لاحقا لكن الظروف خدمتو وحكاية انو رفض كتل المعتصمين بالقيادة لي بشة كانت كضبة ساي والاثبات على كضبو كلامو بتاع عدم فض الاعتصام ونحنا مابنغدر ولو دايرين نفضو حنكلم الناس والنقعة وخيل النجعة وامور لف ودورانو
الان حميتي بجمع في جنجويد من كل المكون السوداني ومعاهم اصحاب العمم الرخيسة عشان يعمل شرعية ويستلم الحكم لكن ده بعدو
تصدق لو الخرتوم دي بيوت قش ورواكيب كان اعاد الفلم بتاع دارفور واداكم المعسكرات الزول ده ماعندو عهد كضاب وغدار
ننتظر حامد وشرفاء الجيش المابتحملو جنس المهانة دي

استاذة تماضر سلام..
مليشيا الجنجويد أُحرقت يوم دخلت (المدن) لا بتفهم حياتها لا بتعرف شوارعها.
شاكر علي المرور.

Quote: وحكاية انو رفض كتل المعتصمين بالقيادة لي بشة كانت كضبة ساي والاثبات على كضبو كلامو بتاع عدم فض الاعتصام ونحنا مابنغدر ولو دايرين نفضو حنكلم الناس والنقعة وخيل النجعة وامور لف ودورانو

دي يا حامد كانت السرج الركبنا بيه. هو صدق كضبته او ناسه قالوا ليه دا سرج مشدوووود ويلا اركب.
فريق الخلا عاش وح يعيش حياته كوولها سلفقة سااااي لكن شهر العسل دا قررررب يخلص.

فريق الخلا في اخر تقليعاته يصرح بوجود مندسين في مليشيته!! وقال انهم قبضوا متهمين منتحلين شخصية الدعم السريع في بورتسودان يحملوا بطاقات برتب في المليشيا.
وكمان قال قبل فض الاعتصام كان هنالك فيديو لإناس في مكان ما غيروا ملابسهم المدنية بيونيفورم الدعم السريع!! وقال كمان في السوق في كاكي الدعم يباع!!!
طيب يا فريق الخلا انت في عضمك دا مش منتحل شخصية رجل امن برتبة قاطعها من راسك دا وكاكي مخيطه في (الخلا) السوق؟ انت ومليشتك دي الجرائم الارتكبتوها في
حق اهلنا في دارفور وقري الجبال ما محسوبة يعني أم فاكر اتنست؟؟ برضو في تسجيل فيديو انت اعترفت بجرائمك ودورك القذر.. وفي تسجيل تاني شرحت تاريخك الوسخ.
محاولات تلفيق تهم او خلق قصص من خيالك لن يبرئ عمايلك في دارفور والجبال والخرطوم او اي مكان في الوطن العزيز او حتي عمالتك وارتزاقك في اليمن.
الكباشي اجاب عن تساؤل من فض الاعتصام. والبرهان اقر بالجريمة. لو ماكانت مليشيتك دي موجودة لما وجد انتحال لشخصيتها ولا حتي اتباع كاكيها..
اما قصة مليشيا جنجويدك دي مخترقة , اكيد مخترقة ونحن عارفين من يوم نشأت واتكونت. وكذبة انها ولدت من رحم القوات المسلحة , فيجب تذكيرك انها مولود غير شرعي وباركها
فاجر و مغتصب للسلطة.

أتفق معكم .

لا ليست مخترقة
بل هى تكوين انقاذى كيزانى كامل الدسم
و بصمة و رؤية الكيزان واضحة فيهم
و اعطوه مسميات و واجهات
و اتدبس بيها و فيها حميدتى
مهما بلغ ذكاء حميدتى فانه لن يبلغ ذكاء الكيزان و دهائهم طولا و مكرا
.. و بالتاكيد مش معقول الكيزان يسمحوا لحميدتى الانفراد بالقيادة و التصرف
عندهم ناسم و خلاياهم عاملين نايمين و بينفذو فى مخططات الكيزان من خلال حميدتى
.. مسكين البيحسن الظن بالكيزان
...
الراكز معتصم التحايا و التقدير
و لكل الاحباب الود و الاحترام
و اللهم احفظ البلاد و العباد
و انصرنا نصرا مؤزرا

بصراحة دة أحسن بوست يعجبني منذ ان سقطت الانقاذ (إفتراضا) وحتى الان .. تحليلات منطقية وموضوعية ومفيدة .. أتفق مع الجميع أن قوات حميدتي مخترقة وبشدة كمان - حميدتي ليس له في العير ولا النفير.. مغرور بسبب الزخم الهائل الذي وضعه له الكيزان واصبح يشعر بعظمة وكبرياء بانه القوة الضاربة والرجل القوي وماشابه ذلك .. علما بانه بدوي تقليدي لا يعلم بخبايا السياسة ولا بالتكتيكات القتالية ولا الاتصالات الحديثة بين افراد قواته وهي تقاتل في الميادين - بل يجيد فقط حرق القرى المبنية من القش والرواكيب والبطش بالبسطاء والعجزة والى الان حميدتي لا يعلم عدد قواته تحديدا ولا توجد لديهم (كلمة سر عسكرية) يستطيعون من خلالها معرفة عدوهم من صليحهم - بل لاتوجد كذلك ارقام وبطاقات لمنسوبيهم لذا كل من هب ودب يستطيع ان يفصل لباس الدعم السريع وينخرط في تلك القوات بلا رقيب وبلا حسيب بل يستطيع ان يصرف راتبا شهريا باعتباره جندي من جنود الدعم السريع.

Quote: والى الان حميدتي لا يعلم عدد قواته تحديدا ولا توجد لديهم (كلمة سر عسكرية) يستطيعون من خلالها معرفة عدوهم من صليحهم - بل لاتوجد كذلك ارقام وبطاقات لمنسوبيهم لذا كل من هب ودب يستطيع ان يفصل لباس الدعم السريع وينخرط في تلك القوات بلا رقيب وبلا حسيب بل يستطيع ان يصرف راتبا شهريا باعتباره جندي من جنود الدعم السريع.

سلام يا ماهر وشاكر علي الاطراء والاثراء والطلة..
شفت المقتبس دا هو مربط كل شئ.
المجلس وفريق الخلا بتكلموا عن أنهم حافظين للأمن والمصيبة اي واحد فيهم ما بقدر يتحرك شبر من غير تأمينات وجيش حراسة. هل الخوف دا من الثوار العزل أم من الجماعة الباعوهم؟!
لا يمر يوم في السودان والا كان هنالك تجاوز او جريمة اصابع الاتهام تشير فيها للجنجويد وبأدلة صورة وصوت. رغم أنه تاريخهم لا يشفع ليهم بدرء الشبهة , لكن كمان الشكوك
تحوم حول (الجهة ما) التي لا تتوانئ في إغتنام ااااي فرصة لتوريطهم. امريكا والعالم قالوها صراحة ليهم انتو مسئولين عن امن المتظاهرين السلميين ولو حصل تجاوزات ح
نلاحقكم بحزمة عقوبات غير الاساسا موجودة في صحائفكم وتاريخكم الكريه. وما محاولاتهم مع الصحيفة الكندية ودفع المبلغ الخرااافي لتلميع صورتهم إلا دليل علي خوفهم.
حميدتي جهلول وأهوج ويفقد اي نوع من الحنكة او الفهم وحوجة سئ الذكر الرقاص والحظ فقط لعب دور كبير فيما وصل ليه وساعدوهوا جيشنا المتواطئ ومخابرات المحور في حالة
الفوضي والتخبط العائشها دي. ضباط وجنود الدولة العميقة الموجودين فعليا في مليشيته دي بالأضافة للمليشيات التانية التابعة والموالية للتنظيم (الميت الحي) ح تواصل في
مقاومتها لاي محاولة لفريق الخلا بفرض هيبته المصنعة , وللاسف المواطن والثورة وثوارها هو من يدفع التمن.

محاولة التنصل من مجزرة القيادة العامة والتبرؤ من اغتيالات النشطاء في مليونية 30يونيو بالاستدلال بقنّاصي قصر الشباب والاطفال هي غباء ويأس باتهام الجيش
ومحاولة غريق متعلق بقشة (الاتفاق) من سيف العدالة. نعم الجنجويد مليشيا مخترقة من قبل نظام الدولة العميقة وأجهزتها , وفريق الخلا يعي ويعلم وبارك عملياتهم
لما كانت دعاية مجانية ثمنها أرواح شهداء وأجساد جرحي في بداية الثورة المجيدة بإمكانيات المليشيا ومقدراتها وطبع صورة مخيفة في مخيلة الثوار
والثورة بإستصحاب جرائمهم في دارفور والجبال , وكسب رخيص استرزق من وراءه الجنجويدي لما حانت اللحظة المفصلية في عمر النظام البائد بفرية الانحياز
بالقفز من سفينة الانقاذ وركوب بص الثورة. شارك الجنجويد في فض الاعتصام يزخيرتهم واسلحتهم , بعصيهم وخراطيشهم وسياطهم. زاكرة الثوار لن تنسي
مشاهد الرعب والفظاعات وكذلك زاكرة تلفوناتهم حتي وإن غيبت الانترنت دهور ومسحت كل وسائط الاتصال الإجتماعي.
لانفرق بين مليشيتك ومليشيات النظام البائد واجهزة أمنه طالما أُنشئتم لا لغرض إلا قتل شيوخنا ونسائنا وأطفالنا في دارفور وجبال النوبة وحرق قراهم وترويع
أمنهم وايضا قتل وسحل وإغتصاب ثوارنا وحرائرنا في ثورتنا ومسيرة تحررنا أو حفظ أمن وأمان دولة السوء ورقاصها وزبانيته من أهله وفاسديه.

Quote: * مصدر أبلغنا أن حميدتي حذركم من مليشيات النظام البائد؟ - نعم هو تحدث بصراحة وأبلغنا أن بحوزتهم تقارير تكشف عن مليشيات ظل وضرب مثالا واضحا بما وقع في قصر الشباب والأطفال وقنص ( ٦) من المواطنين ومنهم ۳ من الدعم السريع وبعد إلقاء القبض عليهم اتضح أنهم عناصر موجودة في الجيش بحسب حديثه، ولم ندخل في تفاصيل، لكنه أكد أنهم عسكريون وأبلغنا أيضاً أنه حتى في الاحتفالات الناس يكونوا حذرين لأن بعض الجهات تحاول تفسد فرحة الناس والشعب السوداني، وهذا واحد من التحديات.

من بوست للأخ د.ياسر الشريف في حوار الاستاذ بابكر فيصل من وفد التفاوض مع صحيفة حريات.
لما تكون مهمة الجنجويد أي حاجة غير حفظ الامن للوطن والمواطن وممتلكاته يفضح قائد المليشيا نفسه بإدعاء حفظ البلد وامانها , ويطالب الشعب بحماية نفسه واحتفالاته.

فنائل وهدايا ومدنياااااو في خطابه اليوم لن تشفع لما اقترفت
ايادي الجنجويد من فظائع في خريطة المجتمع السوداني..
السؤال هنا.. فريق الخلا الي اين وماهو دوره المرسوم.؟

في فترات الهدوء بين جلسات التفاوض بين قوي الاعلان و
المجلس ينشط فريق الخلا ويطرح نفسه كقائد للسودان الجديد
وحامي للوطن وشعبه. ويلاحظ ايضا الحملة الواسعة لتبرئة
القتل السريع من جرائهم في فض الاعتصام ونسب الفظائع
الي مليشيات نظام البشير وكأن مليشيا الجنجويد قد هبط
عليهم ملاك الشفقة والرحمة والرأفة بشعب السودان. جرائم
دارفور والجبال من حرق للخيام في القري والممتلكات عند
أهلنا وإغتصاب القُصّر وحرارئنا وقتل آباءنا وأخواننا وأسْرِهم
قد اعيدت مشاهده في قلب الخرطوم وامام بوابات قواتنا المشلعة
وبايادي نفس المليشيا علي مرأي ومسمع الفريق وعسكر مجلسه.
الجنجويد شاركوا في فض الاعتصام بكل فظاعاته مع مليشيا
النظام البائد.
السؤال المهم.. لماذا لم يتخلص فريق الخلا من مليشيات الانقاذ
رغم علمه بمحاولاتهم بتوريطه في جرائم بحق الشعب؟
لماذا لم يطارد فلولهم أو يجفف مواردهم أو حتي يغتال
قادتهم وهو المعروف عنه الغدر وسباحته في الدماء؟؟
الاجابة.. لا يريدالآن.. ولن يستطيع حتي و إن أراد بتحليلي
البسيط.

فريق الخلا كان قد أعلن عن مليونية شكر لمليشيته القتل السريع يوم الخميس 25/7 واتراجع عن الفكرة بسرعة بحجة ألا يساء الظن فيه!!. طبعا دا ما السبب ولا عدم مقدرته علي تجميع الالاف فقط وتسميتهم مليونيه , بقدر ماهو هل ح تخلو من عنف.لو خلت المليونية من عنف معناها هو المسئول عن كل العنف الصاحب مليونياتنا. ولو حصل فيها عنف وموت من الكتائب ح يفشل بعدها في اي دعوة لقواعده علي قلتهم , وح تكون مواجهة مبكرة جدا جدا للمحورين القطري الاخواني والاماراتي في صراعهم بالسيطرة علي القرار السوداني رغم اتفاقهم الكامل علي إبعاد فريق الخلا من المشهد السوداني.

هل ح نشاهد اي نوع من العنف في الاحتفالية ويوم التوقيع
ام تعلم فريق الخلا الدرس وح تحمي قواته المدنيين والضيوف.

والله يا معتصم قبل شوية كنت بفكر في الموضوع ده ، إنو الملاعين
دييل يحاولوا يعملوا بلبلة وربما اغتيالات لأنهم شغالين زي الكلاب المسعورة
وحقو ناس المجلس العسكري وقحت والمهنيين يعملوا احتياطاتهم ولضيوفهم

Quote: والله يا معتصم قبل شوية كنت بفكر في الموضوع ده ، إنو الملاعين دييل يحاولوا يعملوا بلبلة وربما اغتيالات لأنهم شغالين زي الكلاب المسعورة وحقو ناس المجلس العسكري وقحت والمهنيين يعملوا احتياطاتهم ولضيوفهم

ترهاقا سلام..
التوقيع ح يكون في قاعة الصداقة بس الاحتفالية في ميدان الحرية
وموقعها طبعا زي ماعارفه والشوارع المودية ليه! يعني مكان ممتاز للكلاب
المسعورة دي خاصة وانه رؤوساء الدول ما اظن يكونوا هناك.
بطني طامة ما اكضب وعندي نفس احساس مليونية يونيو بعدما حولوا
مسارها من بيوت الشهداء للقصر الما معروف لحدي هسي لشنو كان؟
ربك يهون ويمرر اليوم علي خير.

المحاولات اليائسة لتبرئة الجنجويد وفريق الخلا من جريمة
فض الاعتصام ومشاركة مليشيا القتل تدعوا للحيرة.