محمد حسن التعايشي رئيسا للوزراء

04:17 PM April, 25 2019

سودانيز اون لاين
عبدالعظيم عثمان-
مكتبتى
رابط مختصر

هذا ترشيحي من الآن لرئاسة وزراء الفترة الإنتقالية
سأذكر الأسباب

تحياتى عبدالعظيم
قبل ذكر الاسباب عرّفنا به

مناضل وثائر
شاب أربعيني
من دارفور
مثقف وعلي درجة من الوعي بقضايا شعبه
رئيس سابق لإتحاد طلاب جامعة الخرطوم
زول دغري وعديل
يمتلك كاريزما القائد ومحنك سياسيا
اتوقع سيكون خيار توافقي لجميع قوي الثورة

أفضل رأي سمعته قال به الصحفي فيصل محمد صالح
في برنامج بقناة النيل الأزرق انتهى بثه قبل أقل من ساعة.
بأن يشرك كل أو معظم قيادات حركات دارفور والحركة الشعبية
جبال النوبة والنيل الأزرق في هذه الحكومة وهذه المرحلة لكي لا تكون هناك
حوجة لمفاوضات خارج البلاد أو بوساطات خارجية.

اعلنت الجبهة الوطنية للتغيير عدم مشاركتها في الحكومة الانتقالية ، وحذرت تجمع المهنيين من محاولة إقصاء الأحزاب ، لجهة أن التجمع شارك في نظام الإنقاذ .

وكشفت عن ترشيحها زعيم حركة العدل والمساواة جبريل إبراهيم وآخرين لرئاسة مجلس الوزراء .

وأعلن رئيس الجبهة عازي صلاح الدين ، عدم مشاركته في الحكومة الانتقالية على المستوى التنفيذي .

من جهته أعلن القيادي بالجبهة حسن رزق عن ترشيح جبريل إبراهيم ومحمد حسين أبو صالح وإبراهيم الأمين والصديق الشريف الهندي ، لشغل منصب رئيس الوزراء في الحكومة الانتقالية .

================
حبيبنا عبدالعظيم .. تحياتي ..
بدون مجاملة الرئيس القادم لازم من دارفور أو جبال النوبة أو النيل الازرق أو الشرق
لكن أحبذ أن يكون من دارفور .. أياً كان .. التعايشي أو جبريل إبراهيم .. يا جماعة كفاية
لا بد من فرصة لأهلنا في دارفور ..

لكن رغبتي أنا شخصياً ( تابيتا بطرس ) لنقدم عينة للعالم ( مسيحية تحكم السودان )
ويمكن لنا بهذه الطريقة أن نقطع سنوات ضوئية نحو الحداثة واقناع الآخرين ..
ما في واحد يجي يقول لي دي كوزة مسيحية .. دي قناعتي أنا .. وهي الحل لتغيير صورة هذا الوطن المشوه بالارهاب

تحياتي الحبيب عبدالعظيم ..

Quote: يشرك كل أو معظم قيادات حركات دارفور والحركة الشعبية جبال النوبة والنيل الأزرق في هذه الحكومة

كلام غلط و للاستهلاك و كأننا بنفتح
Can or worms
لارضاء رغبات الافراد و ليس حلا جذريا.

في المقابل, يمكن معادلة التعيينات بتساوي لكل اقاليم السودان من المجمتع المدني. اذا الناس بتبحث عن كفاءات من هذه المناطق فهناك الاف الذين يحملون شهادات دكتوراه و بروفيسورات و قيادات في العمل المدني من غير المتحزبين.

اذكر مثلا بروفيسور محمد احمد علي الشيخ (اول الشهادة السودانية في يوم من الايام, عمل مديرا لمستشفي سوبا و مديرا لجامعتي جوبا و الخرطوم).
القصد فقط كمثال و انو الناس تبحث الكفاءات من المجمتع المدني.

اذا عينت جبريل ابراهيم او اي من قادة الحركات المسلحة بالطبع لابد و تعيين الصادق المهدي او بنته او الميرغي و ابنه و كذلك الخطيب و غيرهم.

ارى البعض يميل لترشيح اشخاص بصرف النظر عن كفاءتهم. المرحلة الانتقالية يجب ان يكون معيارها واحد فقط.. الكفاءة فى المجال المعين فيه ثم الخبرة حتى لو خبرة دولية.. بأن يكون وزير المالية عمل فى البنك الدولى او صندوق النقد.. او مؤسسات مشابهة.. كفاءات فقط حتى لو كانت كل الحكومة من قرية كاب الجداد.. لا تحيد عن هذا المبدأ.

ممكن اشراك افضل كفاءات الحركات المسلحة في البرلمان الانتقالي ، زي شريف حرير مثلا من العدل والمساواة ، الواثق كمير الخ الخ .. حيكونوا مفيدين جدا لا نريد مقاتلين
اما مجلس الوزراء ، تكنوقراط فقط من غير كيزان حتى ناس جبريل ابراهيم وبقية الكيزان المنشقين ما عايزينهم
الكيزان ديل ما عايزين نسمع سيرتهم تاني كلو كلو

Quote: محمد حسين أبو صالح

افضل من يقود رئاسة الوزراء فى العهد الجديد رجل ذو كفاءة عالية ومقدرات فى الادارة

أين محمد حسن التعايشي من قوي إعلان الحرية والتغيير
إذا ما عنده حزب، منظمات مجتمع مدني
الزول دا مكسب كبير لقوي التغيير
وشغال يقوم بي دور كبير
مع العلم لم يجمعني بالتعايشي حزب واحد
ولا منطقة
لا توجد اي عصبية في ترشيحي له
شاب يستحق أن يقود الجهاز التنفيذي
والسودان في حاجة الي وجوه جديدة علي رئاسة
الوزراء

Quote: حبيبنا عبدالعظيم .. تحياتي .. بدون مجاملة الرئيس القادم لازم من دارفور أو جبال النوبة أو النيل الازرق أو الشرق لكن أحبذ أن يكون من دارفور .

عايزين ناس بالكفاءات والخبرات وليس بالولايات ، هو نحن قاعدين نقسم لحمة وإلا شنو؟

برضه يا ترهاقا ناس دارفور عندهم الكفاءات
ولا شنو

حسب متابعتي للتعايشي منذ زمن
زول ملم بتعقيدات الوضع السوداني
و فاهم بالتقاطعات السياسة الدولية تجاه السودان
مخططاتي و مرتب جدا في طرح افكاره.
اثنى اقتراح ابو الريش الكفاءة بغض النظر عن الجهة
أو الاقليم الذي يمثلونه.
أهم وزارة ستكون المالية و الاقتصاد لطبيعة برنامج
الفترة الانتقالية (البرنامج الاسعافي) أهم حاجة يكون
شخص له علاقة وعمل بالمؤسسات المالية الدولية
نظرا لأن هناك قضايا تتطلب الخبرة مثل اعفاء الديون
و جلب القروض الميسرة.
من الاسماء د. التجاني الطيب بابكر (خبير)
حمدوك مثلا.

قضيتان ملحتان
قضية السلام
قضية العدالة
ديل قضيتان ما ينفع تجيب زول ما بعرف حاجة عن الحرب
وتطلب منه معالجة موضوع الحرب والسلام والمصالحات

نقطة تانية السودان محتاج لي قيادات شابة
عاوزين رئيس وزراء أربعيني
اي خبرات تانية يمكن الإستعانة بها كمستشارين

محمد حسن تعايشي عقلية جبارة ... وله لايفات على صفحته توضح تماما شخصيته القيادية الكارزمية .... ابصم بالعشرة ...

Quote: برضه يا ترهاقا ناس دارفور عندهم الكفاءات ولا شنو

ما مهم من دارفور من البطانة ، من الشرق ، المهم الكفاءة والخبرة

أثني ، محمد أهل لذلك

يعني كان رئيس لإتحاد طلاب جامعة الخرطوم دي كفاءة!!!

اندهاشاتي

يا محمد هارون
شفت محمد حسن دا يوزن الجبهة الإسلامية كلها
من الترابي حتي أصغر كويز حايم في المنبر دا
وجدير بأن يقود السودان
قم لف بلا إندهاشاتي بلا ريالاتي

يا أخ عبد العظيم صباح الخير بتوقيت لندن

المنطق بتاعك دا ما ينفعش .. ممكن تنزل لينا السيرة الذاتية بتاعتو كاملة لو سمحت بدون اي عصبية وتشنج ..انت مرشح زول انحنا ما سمعنا بيهو قبل كدة عشان يكون رئيس وزراء في مرحلة حرجة جدا ..

بعدين تهمة الكوزنة دي ما بتخوفنا بيها يا شيوعي يا متطرف .. انت زاااتك البروفايل بتاعك مدغمس..

العارف عزه مستريح ..

اندهاشاتي

مداخلة كتبتها قبيل الإطاحة بعمر البشير .. كسودانيين كيف نقدر نؤسس لدولة المواطنة:

Quote: فكرة إستيراد حكومة تحكم السودان فكرة أنا قلتها قبل سنة بشريط صوتي وزع علي الواتساب بإسمي الحركي، آدم الكيندي.. الفكرة: السودان دولة فاشلة بمعني الكلمة في كل النواحي لكن نسبة لضيق الزمن والمساحة دعني اجمل فشل هذه الدولة في الثلاث سلطات : التنفيذية،القضائية، التشريعية وضيف لهن السلطة الإعلامية كلهن سلطات فاشلات بإمتياز. جربنا حكومات كثيرة من 1956 وإلي تأريخ هذا اليوم وفشلنا فشل فظيع في ان نأتي بدولة المؤسسات، دولة القانون... الأمر دا ليهو علاقة بطبيعتنا كسودانين من غابر الأزمان نحن شعب طيب عادي بنتغشا بالدين، نتغشا بالحزب، نتغشا بالآيدلوجية وعندنا رابط القبلية والجهوية البربط بينا قوي جدا ودا بيجعلنا ننحاز للقبيلة في اقرب امتحان يمر علينا او السلطة توظف هذه القبيلة لضرب مجموعة اثنية اخري وكله دا علي حساب الدولة. الآن معظم السودانين عندهم صلة الرحم، القبيلة، الجهوية هما أهم لهم من الدولة(البشير قال الغرابية لو لقت ليها جعلي ركبها دا مش شرف ليها).. الجعلي اقرب للجعلي من غيره، الرزيقي عنده الرزيقي اقرب له من غيره،.. حتي لو هذا الشخص رئيس او خفير... الرابط القبلي عنده اهم من الدولة، او منظمات مجتمعها المدني وعلي كدا قيس! بالنسبة للدين: نحن السودانين عندنا الدين اهم من الدولة (مش الأكواز براهم) السواد الأعظم فبنا بيقدم الدين (الآخرة) علي الدولة(الدنيا) حتي لوماقاعد يمارس طقوس الدين بصورة متواصلة. شوف عندنا كم جامع كم خلوة مقابلها شوف كم عندنا من مدارس ونوادي إجتماعبة ودور ترفيهية لاتذكر مقارنة بالمساجد والخلاوي وفي نفس الوكت بل كثرة هذه المؤسسات الدينية الا ان الفساد مازال مستشري بينا! هسع دا قريبي ولا قريبك ممكن يجمع كل ماعنده من اموال ويذهب يحج بيها ويرجع لأولادة ولدولته وهو مفلس من القروش ومن الدين! إذا قريبي وقريبك ونحن جمعنا هذه الإموال بتاعت الحج وقمنا عملنا بيها مشاريع إستثمارية او وضعناها ببنوك دولة ذات مؤسسات تحترم القانون، مؤكد بنجد ثواب اضعاف اضعاف ما نجدة من الحج لدولة آل سعود التي تذهب اموالنا لصالح دولتهم وبدورها تمشي صرة في خيط لدول اولاد العم سام(ناس ترامب وامثاله). اما بالنسبة لكيف نحكم الدولة ومين يحكمها: هذه مشكلة تواجهني وتواجهك كأفراد وتواجه حزبي، حزبك، قبيلتي قبيلتك كتنظيمات! مثلا: بكرة لو جاء حميدتي عشان يترأسنا بعضنا ما حيتقبله، بحجة انو غرابي، جنجويد، مادرس كلية القادة والأركان ولو جاء صلاح قوش بعض منا ما حيقبلوا بحجة انو جلابي، امنجي وكوز، ولو جاء د.عمر القراي حيقولوا عنه جمهوري ممكن يطبق فينا الرسالة الثانية فماعايزنو ولو جاء عبدالواحد محمد نور حيقولوا عنه غرابي وعميل لإسرائيل وعنده خلايايا داخلية حركة الشارع، ولو جئت انت يا اخ منان تجد من يقول إنت كوشي او عضو في الحزب الفلاني... الخ. لو عملنا زيد رئيس وعبيد نائبا له نجد كل مسئول يقرب عليه ناسو.. لوعملنا زيد والي برضو ح يقرب عليه اهلو ومعاو ، الا، من رحم ربي. السودان بيختلف اختلاف كثيرا عن باقي الدول التحولت للنظم الديمقراطية في زمن وجيز وكان تحولها تم بصورة سلسة ومن ثم وصلت لدولة القانون.  تركيبة السودان - في عظمه -تعتبر تركيبة خاصة بيهو ولاتشابه احد وكمان هي تركيبة معقدة. من الأسرة، المدرسة، الشارع برمجونا فيها برمجة مغلوطة! مهما نقوم بثورة ناجحة ونغير بها السلطات الرجعية الحاكمانا ومهما نتجتهد لانستطيع ان نأتي بدولة القانون لتحل محل تلك السلطات القمعية. السودان كان دويلات محكومة بالقبليات والجهويات وخلطة شوية دين مغشوش. قريب دا السلطنات والدويلات كانت تحكم بالقبيلة وكانت متناحرة في داخلها ومع من حولها(الفونج،دارفور، المسبعات تقلي،سوبا..). العقلية بتاعتنا قبل المستعمر وبعدها لم تتغير كثرا و حتظل هكذا مالم نفكر تفكير غير تقليدي، تفكير يقفز علي قمة كل هذه الاشراطات والتابوهات... غير كدا من الصعب نبلغ مبتغانا،  علي أساس نقدر نؤسس لدولة سودانية حديثة يجب أن ننأي بالدولة من بعض سلبياتنا(الدين القبيلة الجهوية..) ودا لايمكن حدوثه إلا إذا وجدنا جهة خارجية محايدة تأتي لتعلمنا كيف نخرج من هذة الأزمة وكيف تفهمنا تأسيس تلك الدولة الحديثة ودا حصل جربناه بدولة الإنتداب المتمثلة في الإستعمار البريطاني.. الإستعمار فعلا اوشك ان يبني لنا دولة المؤسسات والقانون لو لا انه كان دخل وفرض نفسه علينا من دون رضانا وكان منحاز لمصلحته الخاصة .. لكن... رغم كدا الإستعمار عمل بنية تحتية ماعجزنا نحن عن عملها حتي تأريخ يومنا هذا..  مع انو أسس البنية التحتية لخدمتو وليست لخدمة الدولة، إلا برضو يعتبر محمدة من محامدو يعني سرق الكثير وبني لينا قاعدة بمقدورنا ننطلق منها لبناء دولة حديثة. بالمقارنة؛ لما بعد السودنة، حكوماتنا "الوطنية" بتسرق وما بتبني(ماذا عملت الإنقاذ للدولة الحديثة وماذا عملت سابقاتها)! حكوماتنا "الوطنية" زي المنشار ماشي ماكل جاي ماكل ولاتفعل للدولة مقابل هذا الأكل ولو البسيط!. يبقي علي اساس نبني دولة حديثة يجب ان نبحث بمحض إرادتنا عن جهة ثانية محايدة -طبعا - بعد سقوط نظام الجبهة الإسلامية - لتقوم ببناء هذه الدولة المنشودة ! لا نطلب إنتداب بل نبحث عن طريق آمن لحكومة رشيقة نختارها من بين مدن العالم وبالمزاد العلني في سوق الله اكبر. عشان ندفع لهذه الحكومة المنتدبة من حر مالنا بدل ما يسرقوه أبنائنا الفسدة وهم ماقادرين يقدموا لينا خدمات بعد السرقة دي كلها. سرقة لسرقة احسن ندفع المبالغ البسرقوها ناس عوض الجاز والمتعافي ديا لموظفين يتم تعينهم من قبلنا نحن كشعب! سيناريو اختيار الحكومة بعد زوال نظام الأكواز: الثورة تستلم الحكومة من هؤلاء الشفوت وتكون عندها أمانة لمدة شهر واحد او شهرين في شكل مجلس انتقالي. في هذه الفترة يقوم المجلس المكلف يرسل مندوب للأمم المتحدة ومعه أربعة تيكنوقراط متخصصين في مجال الأربعة سلطات(التنفيذية، التشريعية القضائية، الأعلام) علي اساس يقدروا يعملوا معاينة حرة لتسعة وزراء عالمين ورئيس للدولة ااسودانية برضو يكون موظف عالمي. التسعة وزارات، هي في الإقتصاد، التجارة، الصناعة، الزراعة، الإجتماع،التعلبم، الإعلام بالإضافة لتعين اثنين اخرين متخصصين في كيفة الحكم عشان يدربوا لينا قادة بحق وحفيقة مش زي البشير الكضاب دا . المندوب بتاع مجلس الثورة يقوم يبلغ الأمم المتحدة عشان تقوم تصادق علي تعاقد هؤلاء التيكنوقراط مع ممثلي حكومة السودان. التعاقد ممكن يكون خمسة سنوات او ماتراه الحكومة السودانية المؤقته.. الأمم المتحدة بتعطي اعتراف دولي لهذا الانتداب البمحض الإرادة وبرضو يكون خارطة طريق لكل الدول الفاشلة زينا ممكن يكون ليها كمخرج من أزماتها. بالواصح المافاصح، مندوب الثورة يقول للأمم المتحدة نحن كدولة فشلنا في حكم بعضنا البعض وعليه عايزبن انتداب عن طواعية ورغبة ودا لا فبهو عيب ولافيهو فضيحة بميثاق الأمم المتحدة بل محمدة وتصالح مع النفس. تأجير حكومة عالمية سوف تعبر بالسودان لبر الأمان والسودان يتعلم منها الكثير في فترة بناء دولته الحديثة. نتعاقد مع افراد هذه الحكومة لفترة خمسة سنوات او عشرة او المدة البنشوفوها كافية، حتي نتمكن من تعلم اساسيات تأسيس دولة المواطنة تلك هي الخطوط العربضة لفكرة خروجنا من مأزق هذه الدولة الفاشلة. للتفاصيل سوف اسهب فيها. فيما بعد. محمد آدم(آدم الكيندي).

في طريقه لعضوية مجلس السيادة

للأسف بعض زملاء التعايشي تآمروا عليه
الشللية والتآمر حاجة قبيحة

سلام أخ عبد العظيم
التعائشي تبع ياتو كتلة؟
وماهي القائمة الرسمية لخماسي السيادي - واللون السياسي من حيث الإنتماء والإستقلالية؟
هل أُخذ في الإعتبار الحنكة والخبرة والنزغة الصدامية لدي المرشحين ؟
فالمجلس سيضم كباشي وحميدتي وبرهان وهذا يحتاج لعناصر قوية له القدرة علي لي زراع
إي - عسكري إذا ما إستدعت الضرورة ذلك..

سلام معتصم, دا بوست منسوب للتعيشي (لم اراجعه على صفحته)

Quote: بعض أصدقاء وزملاء النضال في تجمع المهنيين الذين رأوا بانني غير مناسب في المجلس السيادي لن اخسرهم كأصدقاء ولن يكسبوني كعدو... فللوطن عدو واحد هو الحرب والتخلف وسؤ استخدام السلطه. والوطن الذي إنتويت إن أساهم مع آخرين في وضعه علي منصه تؤهله للانطلاق، لن يخسرنى كإبن دائم الطاعه في كل الازمان والأزمات. فأنا الذي قاتلت من أجله حين ما كان يعافه معظم الناس، لن اتركه او اترك الآخرين يأكلون الموائد على جثته. كل الذي يختاره تجمع المهنيين يمثلني وكل الذي تختاره قوي الحريه والتغيير يشرفني. وسأستل سيفي الذي تعرفون في وجه من يمسهم. هذا انا وللننظر للمستقبل. محمد حسن التعايشي

منقول من الواتساب .
....................................
تراجع تجمع المهنيين السودانيين مساء اليوم (الجمعة) عن الدفع بمرشحه محمد حسن التعايشي لعضوية المجلس السيادي عقب اعتماده وذلك عقب إبداء تحفظات على ترشيحه.
وقال عضو المجلس المركزي للحرية والغيير الصادق آدم في تصريح لـ (باج نيوز) إن سحب المرشح محمد حسن التعايشي لجهة أنه لا يغطي القبائل الغير عربية بدافور وذلك حسب الالتماس المقدم من بعض الأفراد، مشيراً إلى أنه تم ترشيح محمود آدم داؤود وهو مؤتمر وطني سابق وأستاذ لغة فرنسية بنيالا، وترشيح محمد أحمد عيسي وهو مؤتمر شعبي.
واعتبر الصادق أن ما تم اليوم في اللجنة الفنية المشتركة للترشيحات لسلطة الانتقال بالحرية والتغيير فساد سياسي وبداية غير موفقة للحرية والتغيير.

وأضاف: سوف نقاوم هذا الإنحراف الواضح عن مبادئ إعلان الحرية والتغيير عبر مؤسسات قوى الحرية والتغيير القيادية حتى لو أدى ذلك لتأخير إعلان أسماء ممثلي قوى الحرية والتغيير في المجلس السيادي.
نقلا عن باج نيوز

ترشيح محمود آدم داؤود وهو مؤتمر وطني سابق وأستاذ لغة فرنسية بنيالا، وترشيح محمد أحمد عيسي وهو مؤتمر شعبي
ــــــــــــــــ
هل سيعلق تجمع المهنيين ام سيصمت

أنباء عن انسحاب مرشح اخر لمجلس السيادة احتجاجا علي ابعاد التعايشي هل من تاكيد او نفي ؟

معليش انا عندي سؤال محيرني : هل في المرشحين التنقراط ديل واحد عنده برنامج جاهز واضعه يمكن ان ينشل السودان من الحته الهو فيها دي ولا بعد يتم تعينه يعمل مؤتمر لوضع برنامج ازعافي ؟؟؟
وهل نحن كسودانيين موحدين هدفنا المقدس الواحد ولا حا تمر علينا سنين ضوئية لامن نتوافق لهدف واحد كلنا نعمل على تحقيقه فلا يهم من يملك دفة القيادة كثيرا طالما جميعنا نعمل من اجل الوصول للهدف ؟؟؟
في اجابة السؤالين حا نعرف حقيقتنا بوضوح
وبعدها نقدر نحدد
في الاجابة السلبية اظن جازما ان يكون رئيس الوزراء كفاءة مهنية من دارفور تحديدا اكرر مهنية وذو كارزما قيادية وشاب ووجه جديد معروف للناس بنضاله وكفاحه وعلمه

هنالك انباء تحدثت عن ترشيح بروفيسور موسى عبدالجليل لمجلس السيادة
وهو مكسب كبير لو حدث وتم .
الرجل عالم انثربولوجيا اجتماعية مرموق ومتخصص في قضايا دارفور
الارض ، السلام ، النزوح وهو من منطقة كتم بخلاف التعايشي ويمتلك
خبرة واسعة جدا عن قضايا دارفور.
اتمنى وجوده في الحكومة او مجلس السيادة.

Quote: تم ترشيح محمود آدم داؤود وهو مؤتمر وطني سابق وأستاذ لغة فرنسية بنيالا، وترشيح محمد أحمد عيسي وهو مؤتمر شعبي.

ده كلام شنو يا جماعة ؟ تاني مؤتمر شعبي ووطني؟
ما في حاجة اسمها سابق ، كل من تعامل مع النظام البائد فهو زول فاسد

Quote: محمود آدم داؤود

انا بعرف الدكتور محمود ادم داوؤد و لم يكن يوما مؤتمر وطني.كان مع المحايدين ايام الجامعة. زول اكاديمي بعد تخرجه في اداب الخرطوم و عمل محاضرا بجامعة نيالا.

تصحيح:
في الاول ذكرت مؤتمر الطلاب المستقلين لاني دائما بلخبط بين المحايدين و مؤتمر الطلاب المستقلين.

سلامات للكل
يا كمال دي الترشيحات لمجلس السيادة
التجمع الاتحادي المعارض : الأستاذ محمد الفكي سليمان
تجمع المهنيين : الأستاذ محمد حسن التعايشي(تم سحب ترشيحه وبعد الغضب الشعبي في محاولة لاعادة ترشيحه مرة أخرى
كتلة القوي المدنية : بروف فدوى عبدالرحمن علي طه
كتلة نداء السودان : الأستاذ حسن شيخ ادريس
كتلة الإجماع الوطني : الأستاذ صديق تاور

يتكرر مشهد يؤكد ان هذه الثورة محروسة بالثوار
إجماع غير مسبوق على رفض سحب ترشيح
محمد حسن التعايشي كمرشح لتجمع المهنيين
ودا بمثابة الإستفتاء
لن تستطيع القوى التي تحاول العبث بالثورة ان تقف في وجه الشارع
الآن بعد أن أصبح مطلوبا شعبيا تراجع تجمع المهنيين عن قرار سحبه
لم يخرج الأمر بصورة رسمية

الكواليس : بعض من زملاء نضال التعايشي سابقا حاولوا العاده بكافة السبل
قالوا حزب أمة (الرجل خرج من الحزب قبل تسع سنوات)
أيضا في الكواليس : بعض الناشطين من الكتل الأخرى يخشون
فقط من قدرات الرجل وكان بعضهم يعمل تحت قيادته في اتحاد
جامعة الخرطوم..
اخر الحيل في أواخر ليل امس (قالوا ان الرجل قدم إعتذار رسمي عن الترشيح)
احد اعضاء سكرتارية تجمع المهنيين اتصل علي التعايشي ليلا لينفي الإعتذار

دي مؤامرات لا تشبه الثورة في شئ

وتبعا لذلك تقدمت بروف فدوي عبدالرحمن علي طه بانسحابها
رافضة سحب ترشيح محمد حسن التعايشي

غايتو العمل العام في السودان لا يزال ملئ ب الأمراض
الثورة دي لازم تصحح وتبدأ من تحت