Post: #2 Title: Re: الثورة: ماذا تريد المعارضة من الشعب السود Author: Kabar Date: 03-26-2019, 08:16 AM Parent: #1
كل الحب والمحبة لأخونا وحبيبنا..دكتور عبد الله حمدوك..اينما كان وكيفما كان..
تحياتي معاك يا عبد الله لحبيبنا دكتور ادم الحريكة..انتو يا عيال قاعدين تسوا شنو في الخشة ديك؟..
تحياتي لصديقنا واستاذنا ابو بكر سماعين باخت..تحية لصديقنا واخونا الجميل..عم ابراهيم عبد الرحمن باخت..ويا ريت يا عبد الله اقدر اتونس معاك زي ما عم ابراهيم بيقول ليك بكل اريحية: يا دوك..ويغالطك ايام سووك وزير مالية يا عبد الله ..وقمت زغت بي عدلك..وانت بتذكر وشوش اهلك الملعونة في سماوات امسودان اياها: ناس حوالي الساعة خمسة..!!..وفي تلك الساعة خمسة، تلك يا دكتور عبد الله..ناس تتدافر في مظاهرة..وناس تتدافر في باب بنك يا قريبي..!!اقول ليك شنو ولا شنو يا عبد الله حمدوك..!
اها يا ادم الحريكة ، اخوك درعاي عدييل(تفصيلة ما بتهم عبد الله حمدوك، وصاحبك لو عرفها ح يعمل لينا سافوتا ليوم القيامة ذاتو..!!)..وحاجات تانية كمان (مالك داير تحرج عم عبد الله حمدوك يا الحريكة..؟..)
كبر
Post: #3 Title: Re: الثورة: ماذا تريد المعارضة من الشعب السود Author: Kabar Date: 03-26-2019, 08:22 AM Parent: #2
ثم الموضوع شنو بالضبط؟
الى الأحباب والحبيبات كافة ، صديقات واصدقاء غار المحنة (كسر على الحاء أو فتحة ، كلو ماشي): حبيبنا ول ابا بريمة محمد ادم ، حبيبنا هاشم الحسن ، حبيبنا الهادي هباني وحبيبنا الوليد مادبو ذاتو.. واخرين واخريات كثر..!!
النص الفارغ من الكباية، يا حبيبنا دكتور الوليد مادبو..!
الأيام سجية ياعمك..لأ ما بنقدر نغير..!!
Post: #4 Title: Re: الثورة: ماذا تريد المعارضة من الشعب السود Author: Kabar Date: 03-26-2019, 08:25 AM Parent: #3
بدءا..! اذا اردت ثورة ناجحة: دوما انظر للجانب المليان من كباية الموية..ولا تنظر للجانب الفاضي..فياترى كيف سيكون اختيار كل جانب؟.. المهم.. التحية لأرواح الشهداء (حسب فهمي الخاص، عشان ما ينطوا فينا ناس سدنة الأديان الإبراهيمية كافة التي صكت معنى الشهادة وخطت معيار زي الدهب او الدولار او اليورو..!!) من شباب الثورة السودانية ، وامنيات بعاجل الشفاء للجرحي ، وامنيات ورجاءات بضرورة اطلاق سراح كافة المعتقلات والمعتقلين ممن قالوا لأ في وجه من قالوا نعم..!.. فالكلمة الحق لن تقتلها رصاصة او حبس (ذات دهليز او زنزانة) من قال بها ..! زمان ، حسب ما اذكر ايام بدايات حكم الجبهة الإسلامية في امسودان ، قام واحد حريف ، وذكي اجتماعيا/ سيولوجيا، قال: الناس ديل شبكونا ليك الله قال والرسول قال..دخلونا الجوامع (المساجد) وهم بي عدلهم دخلوا السوق..!! اليوم ، وحراك الشباب السوداني دخل شهره الرابع ، ناس كتيرة قالت انها اتعلمت كيت وكيت من الحراك..البيقول ليك ردوا لينا معنى الكرامة..البيقول ليك خلقوا الوحدة المفقودة..البيقول ليك رجعوا لينا فكرة النسيج الإجتماعي الواحد ، البيقول ليك ادونا الأمل انو الناس ممكن تقيف بصلابة في مواجهة نظام الجبهة الإسلامية..البيقول ليك فتحوا لينا فرصة عشان ننتقم منهم..الخ..! البيقول ليك ، وهو طالع سلم طيارة: تسقط بس..!!..والخندق المضاد بيقول ليك تسقط بس شعار معلق في الهوا..!!..بالله..؟؟!!!..ياحلاة لقلق ذاتو..!!!!!!!!..والبيقول ليك من باريس (عاصمة النور و الجمال) محتاجين نطور ميثاق اعلان الحرية والتغييروالبيقول ليك هناك محادثة سرية تجري بشان السودان تحت اشراف منظمة بريطانيا..والبيقول ليك (من طرف الحيكومة: امر الطوارئ رقم ستة ولا شنو كده ما عارف: يمنع تخزين النقود في البيوت..!!).. المعارضة والحيكومة: كلهم لقوا روحهم في شعارات الحراك..!!..والله صحي..!! وانا برضك ، كمواطن من امسودان ، ضارب الجليد والربيع والزهور والنجم والمساء ذاتو..!!، اتعلمت من الحراك الثوري.. اتعلمت ان اتذكرت قراية بعض مواضيع القانون بروح عصرية ومواكبة..اتعلمت شنو يعني مالية عامة وشنو يعني ميزانية امسودان ، ومين بيعد تلك الميزانية..وبنك السودان وسياسات بنك السودان ، وخدمات التمويل ذاتو..وحكاية ضرورة انتشار ثقافة البنوك..وزرة الحيكومة التي تحاول(عبر التدليس) معالجة امر السيولة باستبدال العملة وقوانين الطوارئ والعين الحمرة التي لا تقتل ضبانة..ومراجعة سيرة الإقتصاد السوداني منذ الإستقلال..وهو اقتصاد عمرو ما شاف عافية..ميرود طوالي..في زمن الحيكومة الحالية او السابقة او الجاية..اوانبهار اهالي امسودان بانو بلد غني بالموارد والمصادر ولكنو لسع فقير عشان كده نثور وتاني نثور..والثورة دي بدت منذ اخر ايام الحكم البريطاني ولغاية هسع ماشة ، زي التكون فقدت البوصلة وضهبت عن طريق الوصول..!!.. اها الجماعة دخلونا الجوامع وهم دخلوا السوق ، فلماذا لا نجرب ان ندخل السوق (نفس سلاحهم ، حتى ولو نظريا..؟؟!!).. منظر الشعب السوداني اليوم: ناس تفتح صدورها لرصاص صلاح قوش ، وناس بتقع وهي خاشة في مدخل بنك؟..ليه الناس المستعدة تموت عشان تدخل البنك بعيدة عن الثورة؟...ليه سوداني او سودانية ، عندو، اهم ليهو يقع في صف تدافع امام بنك عشان يلحق ليهو صرفة شوية جنيهات ، من الوقوف في صف ثورة الشارع؟.. نحن بنغش في منو يا نخبة يا سودانية؟..
Post: #5 Title: Re: الثورة: ماذا تريد المعارضة من الشعب السود Author: معاوية المدير Date: 03-26-2019, 09:12 AM Parent: #4
Quote: منظر الشعب السوداني اليوم: ناس تفتح صدورها لرصاص صلاح قوش ، وناس بتقع وهي خاشة في مدخل بنك؟..ليه الناس المستعدة تموت عشان تدخل البنك بعيدة عن الثورة؟...ليه سوداني او سودانية ، عندو، اهم ليهو يقع في صف تدافع امام بنك عشان يلحق ليهو صرفة شوية جنيهات ، من الوقوف في صف ثورة الشارع؟.. نحن بنغش في منو يا نخبة يا سودانية؟..
كِدي يا كبر الخِلآف الشخصي البيني ؤ بينك خليهو هنووووك عشان ما بيمنعني أقيف مع الحق، فمهما إختلفت معاك يظل الحق حق وأولى أن يُتبع . حتي الجُنيهات البيركع عشان صرفها دي هي حُر ماله ولا يحق له أن يأخذ منه إلآ القليل الذي تحدده له السُلطة !، بل وأزيدك مغصة ؤ وجع قلب المظاهرة الآخيرة التي قام بها الصحفيين صوت مكبرات صوت الباعة كانت طاغية علي صوت هتاف الثوار، والحياة في السوق عادية وأصحاب المحلات يتفرجوا في المتظاهرين كأنهم مخلوقات من كوكب آخر . سأدعم هذا البوست بفيديو المظاهرة المعنية حتي يستبين الأمر من ينظرون للواقع من جانب وآحد . نتفق ونختلف من أجل الوطن ومصلحة الوطن، ونتعارك في قضايانا الشخصية دون المساس بمصلحة الوطن ...
Post: #6 Title: Re: الثورة: ماذا تريد المعارضة من الشعب السود Author: معاوية المدير Date: 03-26-2019, 09:30 AM Parent: #5
Post: #7 Title: Re: الثورة: ماذا تريد المعارضة من الشعب السود Author: Biraima M Adam Date: 03-26-2019, 11:06 AM Parent: #6