دق العيش

دق العيش


03-23-2019, 07:58 AM


  » http://sudaneseonline.com/cgi-bin/sdb/2bb.cgi?seq=msg&board=500&msg=1553324331&rn=0


Post: #1
Title: دق العيش
Author: اخلاص عبدالرحمن المشرف
Date: 03-23-2019, 07:58 AM

07:58 AM March, 23 2019

سودانيز اون لاين
اخلاص عبدالرحمن المشرف-
مكتبتى
رابط مختصر



دق العيش
احضرت الفندك الكبير وبدأت في دق الويكة
ترفع يدها لأعلي ثم تهوي بها بكل قوة تتطاير
قطع ناعمة تكح بعدها ثم ترجع الي عملها ، حبات العرق
تتجمع علي جبهتها وهي تواصل تمسح العرق بطرف الثوب
قطع فلاش كما في افلام الكرتون تتحول البامية الجافة
الي شخوص تتناجي مع بعضها ويدور الحوار بينها
الزولة دي بتضرب كده ليها ال تقول عندها معانا
غبينة ، اختي بقت بدرة ًوانا ذاتي مردغتني وكسرتني
يا ربي دي ح تفتر تخلينا متين
ترد البودرة انتقمت منها طرت ليها في نخرتها والمرة الجاية
ح أطير ليها في عينيها الكعبة الفقرية , عودة لدق الويكة
تتوقف وتحضر جك ماء تتناول منه ( بقة ) وتواصل
تسمع صوت جارتها تغني الخدير انا ماني حي
تقول في سرها غسيل العدة سااااهل ، وتواصل وهي
تتذكر ذاك العسكري غليظ القلب وهو يهوي بعصاه علي رأس الشاب
وتقول انا ماني حي
انا ماني حي وتهوي بيد الفندك بكل قوة انا ماني حي






Post: #2
Title: Re: دق العيش
Author: اخلاص عبدالرحمن المشرف
Date: 03-23-2019, 07:54 PM
Parent: #1

السبحة
يحملها في يده وتداعب أصابعه حباتها
تنزل متتابعة في توالي عجيب ، حين كانت الخرطوم ( مبروكة )
مع كل حبة تتنزل رحمة اما الان فقد صار الامر مخيفآ ، هز رأسه
يطرد كابوس يرأه هو ويشعر به كدبيب الحية الرقطاء ، وينظر للعسكري
يمزق الاجساد ومع كل سوط تتنزل لعنة
ثمانية اطفال تقتلهم قنبلة ، يا الله ، كلما نزلت حبة نزلت لعنة
وكلما مزق السوط اللحم الطري مزق الرحمن من الملك قطعة ، حتي
وصل الحريق القصر القديم
ويتسأل متي تتنزل الرحمة
هل ستنزع البركة قطعة قطعة ام كموت الفجأة


وصوت من بعيد يشدو يا وطن عز الشدائد يا وطن عز الشدائد
يا وطن عند الشدايد

Post: #3
Title: Re: دق العيش
Author: اخلاص عبدالرحمن المشرف
Date: 03-23-2019, 08:49 PM
Parent: #2

سيريلانكا
جار مهذب له طفل ظريف وزوجة ودودة يوم دق الباب
فتحت لقيت طفلهم شايل صينية اكل ( فروم موم ) اها شلتها
منو وثانكيو ، دخلت واحترت يا ربي حلال ما حلال ربك رب الخير
عرفت انه بصلي في الجامع ما تضحكوا بس ما ح اقدر اكل لو
ما حلال ، مرة صاحبتي مسيحية مصرية عزمتنا عيد ميلاد جاتوة وتورته
سمينا ولهطنا ما تورتة كمان فيها شنو زيت ودقيق وبيض لا ضبح لا
لحم ببلع في تورتتي ويا أضاني يا ريت كان سديتك بتدي الوصفة
لي صاحبتنا اسمع لك وملعقة ونص شنو كده ما عارفة انتو براكم
اعرفوها لا قدرت ابلع لا قدرت اكوضم بعدها ، وبراحة مع السلامة
مع السلامة ، المهم اكل السريلانكا كان بالهنا والشفاء ، بس برضو
يا ربي الشئ الاحمر ال بمضغوا ناس سيريلانكا اليوم كلو بختو في الاكل
غايتو اتذكر كنت مبسوطة ، في شنو كمان ما زي الصعوط ، المهم نرجع
لسندباد وبلاده الجميلة المحيط ممتد تنظر تعاين تسرح مع الموج
ما زي نهر النيل انت تتابعه بكل حواسك والنيل في الشريان تمشي معاه
وتتابعه جواك وشاديك اما محيط سريلانكا تشعر به يبلعك وانت جزء صغير
منه ، تتمشي في شوارعها قريبة من القلب كما الخرطوم بشوارعها الضيقة
والمعمار الإنكليزي الواضح اما الأشجار ف ( خداري ال بحالي ما داري) يشهيك
الغنا ، صفق الشجر عريض ورويان يشبه شارع النيل قبل التتار .
اول مرة اشوف غزال ابيض ، جمال جمال جمال وانت تنظر تعاين ، وين
يا ربي طبيعة زي دي وجزر جميلة وناس طيبين وازدهار وماشيين لي قدام
وقفوا الحرب ومشوا لقدام هل يا تري بنزل علينا عقل ونوقف نزيف الدم
قولوا ان شاء الله الفأل تحت اللسان

يا وطن عز الشدائد يا وطن عز الشدائد يا وطن عند الشدائد

Post: #4
Title: Re: دق العيش
Author: تماضر الطاهر
Date: 03-24-2019, 09:21 AM
Parent: #3

وتواصل وهي
تتذكر ذاك العسكري غليظ القلب وهو يهوي بعصاه علي رأس الشاب
وتقول انا ماني حي
انا ماني حي وتهوي بيد الفندك بكل قوة انا ماني حي


،،

الحبيبة إخلاص

من دربي ده ماشة أسعى لي فندك خشب كبير،
مليانة غباين انا بعيد عند

،،


شكراً ..برتاح لحروفك

Post: #5
Title: Re: دق العيش
Author: خضر الطيب
Date: 03-24-2019, 10:25 AM
Parent: #4

سيناريو مكتمل الأركان لفيلم وثائقي يا دكتورة اخلاص

Post: #7
Title: Re: دق العيش
Author: اخلاص عبدالرحمن المشرف
Date: 03-24-2019, 04:09 PM
Parent: #5

شكرآ استاذ خضر الطيب

Post: #6
Title: Re: دق العيش
Author: اخلاص عبدالرحمن المشرف
Date: 03-24-2019, 02:04 PM
Parent: #4

الحبيبة تماضر
لو عارفين هم ربو عداوت قدر شنو ما اظن يقدروا يغمضو
العنف ال حصل ما بس الشباب العاني منه المعاناة شملت الاهل
وكل من شاهد والنتائج ح يحصدوها قدام ، نفسيآ الجميع تضرر

الشعب مغبون مغبون مغبون
ديل تجردوا من الحس الإنساني ، بنومو كيف