Post: #1
Title: السودانيون لايزالون فاشلون في اي حاجة
Author: منصوري
Date: 04-28-2006, 02:34 PM
لا ادب ولا سياسة ولا وظيفة.. ولا حياد دقيق.. ولا إدارة ولا إتقان للزمن وتوظيفه توظيفاً دقيقاً مفيداً. ولا ذوق رفيع ولاغناء ولا تمثيل ولا حب رفيع حتي،ولا بزنس.. ولاتجارة. بما فيهم أنا..
كل ما لديهم مضيعة للوقت.. ومضيعة للزمن... بأمانة هذه هي الحقيقة المرة.. عرفناها بعد أن إختلطنا مع أكثر من خمسين جنسية لمدة عشزين عام..ناس اليمسك فيهم حاجة يجودها كالسراط المستقيم.. يجودها حتي تقول الشغلة المجودة( الروب)..ونحن لسه ( في دي مطلقة ودي مرجوعة).. ولسه حايمين( بالعبيدية والقمبارات)ولسه( ساقية جحا تسوق وتدي البحر).. إلا أن يتغمدنا الله برحمته..بعيدين من درجة الإنسان العالمي أو الإنسان الكوكبي..
|
Post: #2
Title: Re: السودانيون لايزالون فاشلون في اي حاجة
Author: Osama Ahmed
Date: 04-29-2006, 08:31 AM
Parent: #1
| Quote: ولا ذوق رفيع ولاغناء |
بنغسل الصابونه ونديها للبعدنا زي ما قال الحاردلو
كل لحظه بتمر علي انت في خاطري ... ، مالنا لو لم يفهمها العالم
|
Post: #4
Title: Re: السودانيون لايزالون فاشلون في اي حاجة
Author: بلدى يا حبوب
Date: 04-29-2006, 10:43 AM
Parent: #1
منصورى
وما هى اسباب هذا الفشل ؟؟؟؟؟؟؟؟؟؟؟؟؟؟؟؟؟
تحياتى
|
Post: #5
Title: Re: السودانيون لايزالون فاشلون في اي حاجة
Author: بلدى يا حبوب
Date: 04-29-2006, 10:45 AM
Parent: #1
منصورى
وما هى اسباب هذا الفشل ؟؟؟؟؟؟؟؟؟؟؟؟؟؟؟؟؟
تحياتى
|
Post: #6
Title: Re: السودانيون لايزالون فاشلون في اي حاجة
Author: منصوري
Date: 04-29-2006, 11:27 AM
Parent: #1
| Quote: كل لحظه بتمر علي انت في خاطري |
يعني يا اسامة احمد يقعد يتذكر في حبيبتو الزمن كلو؟ من غير شغل من غير إنجاز...ها ها ها
.............
إنتا عارف يا أسامة البيت دا الذكرتو إنت نفسو لو وظف توظيف صحيح لكان هو المطلوب ويكون كالآتي..
كل لحظة بتمر على وأنت في خاطري...... يعني يفكر في تجويد الأداء يفكر في تطوير العمل يفكر كل واحد كيف يكون عمله إبداعاً ومدراً لعائد مادي مجزي.. كيف يزيد ويطور وينمي ويبدع ويكسب ويتقن عمله،
..........
بعدين قلتا لى يا أسامة الحردلو قال كيف...ها ها ها..
|
Post: #7
Title: Re: السودانيون لايزالون فاشلون في اي حاجة
Author: maia
Date: 04-29-2006, 11:28 AM
Parent: #1
الاخ منصوري
يمكن كتير مما ذكرته موجود ن لكن مع احترامي لرأيك المسالة ما بالسوء والقتامة دي
برضو يظل في ناس سودانين بتجود وتنتج وتعمل بصدق شديد بعيدا عن الفشل
ولك التحية
|
Post: #8
Title: Re: السودانيون لايزالون فاشلون في اي حاجة
Author: منصوري
Date: 04-29-2006, 11:56 AM
Parent: #1
لما الواحد يجد الحقيقة عند اخ يتنازل عنها..
..........
أهو الأخ هشام أحمد ختا ليكم الحقايق في بوسته هذا..
|
Post: #9
Title: Re: السودانيون لايزالون فاشلون في اي حاجة
Author: منصوري
Date: 04-29-2006, 12:15 PM
Parent: #1
maia وبلدي ياحبوب شكراً على المداخلة
.................
تعرف يا بلدي ياحبوب..هي حاجة في تركيبة الشخصية السودانية من رجل أو إمرأة.. عايزة مجهود كبير وكبير جداً عشان الواحد يتخلص منها..ذابت في الوجدان وجاءت عليها تراكمات كثيرة جداً عايزة مجهود كبير عشان تطلع.. بعدين عمل جماعي موش عمل فردي..الراي العام..المسلمات.. الموروثات.عايزة هزة..عايزة صقعة كبيرة جداً..يعني حاجة تقمصت الفرد السوداني وإختلطت مع حقيقته بقي صعب التفريق بينها وبين الأصل... حاجة دقيقة
...........
الكلام القيل من maia
موجود لكن كان وقفنا معاهو لايأتي التصحيح ولا يأتي الرقي..ولا يأتي الإبداع الحقيقي..الخامة الفطرية من المعدن القابل للتغيير عندنا لكنه بطئ حتى الآن.. والظواهر السالبة موجودة في كل سياسي عندنا.. وفي كل إداري عندنا وفي كل مهندس عندنا ودكتور وتاجر وبتاع أعمال، هنالك فجوات تتقاعس بالناس عن التجويد.. غختلاط الواجب المباشر مع العمل مع الصداقة مع المكتب مع البيت. لخبطة علاقات العمل مع البيت مع الصداقة مع الطيبة مع الفراغ.إختلاط مهام الوظيفة مع السخايم مع التشفي تطويع القانون للمصلحة الشخصية..إختلاط الحياء مع عدم معرفة الواجب..معدن الشخصية السودانية نفسه غير عالمي غير كوكبي يحتاج الى سبك الي تثوير الى صقل،سبهللية في التخصص والتجويد، تأثير البيت على العمل تأثير العمل على البيت.فجوات كبيرة في الإبداع في الفنون من ثمثيل من غناء..مجاملات تضر بالإبداع.. علاقات شخصية تقتل الفكرة..القامة التي تنقطع دونها الأعناق في التجويد عندنا ما جات لسه.. التفرد الذي يلاحظه العدو قبل الصديق.لسه فينا منطقته مظلمة.ميت.. غير نام..
|
Post: #10
Title: Re: السودانيون لايزالون فاشلون في اي حاجة
Author: منصوري
Date: 04-30-2006, 03:18 PM
Parent: #1
نمسك السياسة:-
وهو الجانب المهم عند السودانيين.. السياسة والكورة والإثنين فشلنا فيهن.. بعدين نجي للإقتصاد والإجتماع وتوابعهما.. دقيقة بس
|
Post: #11
Title: Re: السودانيون لايزالون فاشلون في اي حاجة
Author: منصوري
Date: 04-30-2006, 04:02 PM
Parent: #1
من الإستقلال لغاية هسه.. شوف كم حكومة مرت على البلد.. ماحصل في اي دولة ولافي الصومال.ولا في رواندة العفينة..مجهود يضيع طاقة تضيع.. مال يضيع زي الزول البي يبني ليهو أوضة من الطوب ويقرب يصل العتب..تاني يفرتكا طوبة طوبة.. والفرتيك اصعب من البناء ألف مرة.. ومرات نصل العتب .. والعتب مكلف.زلأنو العتب الجيد موش خشب.. أسمنت. عتبة اسمنت لى خشم الباب( وزراة الخارجية) وعتب لأربعة شبابيك من الأسمنت.. وزارات مختلفة.. تاني نفرتكا ونكسر هذا العتب الصلد بالأجنة والشاكوش.. لأنو فيهو من جوة سيخ وخرصانة حبة كبيرة..( دلالة على الأيدولوجيات الكانت ناجحة في منعطف ما.. منذ الإستقلال) نتعب في تكسير هذه الخرصانة وما نشعر بفعل الغيرة بفعل الحسد بس لأنو الفكرة جات من الحزب الفلاني أو الناحية الفلانية والناحية الفلانية دي بي تتبع للزول داك..والزول داك ماجاني في عرس أختي مع إنو رسلتا ليهو كرت(بغض النظر عن المصلحة العامة)
.........................
شوف كم حكومات قامت وحكومات نامت.. كم حضارات سادت وحضارات بادت.. كم وزراء شالوهم وكم وزراء عينوهم عينوهم ترضية وعينوهم مجاملة وعينوهم ولاء وهنالك من هو أكفأ منهم مليون مرة تخصصاً.. خلقاً. أخلاقاً.. ورعاً.. محبة في المصلحة العليا..
...........
ما عندنا دولة موسسات.. ولا بنعرفا.. ولا بنؤمن بيها.. ونخاف منها..
..........
شوف مصر الجارة. يروح الراس.. تبقى الموسسات زي ماهي.. شوف امريكا.. شوف المملكة المتحدة.. شوف استراليا.. شوف نيوزيلندة.. شوف اي دولة تحترم نفسها..
...........
بقى عندنا جيش من الوزراء من العهود البائدة.. عبء على الخزينة العامة.. كل واحد يقعد سنتين تلاتة يفكوهو عكس الريح. وهو زاتو كوزير شاعر مدتو محدودة وفترتو محدودة.. زي فترة الإغتراب.. لذلك يفكر كيف يطلع بي حاجة مفيدة في هذه الفترة القصيرة..البيت والسيارة وراس مال كدة كدة يتحرك بيهو في السوق.. كوميشان.. فوائد. ارباح متراكمة. قروض بدون فوائد. ربا.. سحت.. سرقة حسب اخلاق الواحد...( إنتو عارفين ياجماعة إنو في فتوى فقهية إنو السارق من المال العام لايحد)؟ ليه.. الفقهاء قالوا( لوجود شبهة أن له حق فيه) والحاجات الزي دي تدي الناس فرصة في التلاعب.. وهذا يعرفوهو.. ناس القانون.. الذين درسوا القانون الشرعي والمدني والفقه المقارن..
|
Post: #12
Title: Re: السودانيون لايزالون فاشلون في اي حاجة
Author: منصوري
Date: 05-01-2006, 03:24 PM
Parent: #1
طيب.. لو كان من الإستقلال..خليناها لى واحد كدة من الذين يتعاطون السياسة من احزابنا مهما إختلفنا حولها.. يكون من أحزاب الوسط لاكدة ولا كدة.. لو إخترنا واحد من الوسط.ز لأنو خير الأمور أوسطها.. لو خليناهو من الإستقلال.ز أكل وشبع.. وسرق ونهب.. وكضب وإحتال.. كأسوأ إفتراض..
لو خليناهو كمل الحاجات دي كلها أها عايز يمشي وين بعد كدة..كمل الحاجات دي الى أن تاب وإتعدل.. ما كانت الفرصة دي كافية عشان تخليهو يتعدل؟ وينفعنا بعد ما تنفع؟
...........
من الوسط قلنا عشان ما يلفح يمين شمال. يتلفت شمال يقرض ديل.. ويتلفت يمين يقرض ديل. وبين هذه القرضة وتلك ذهبوا ضحايا من خيرة شبابنا الساسيين من المدنيين والقوات المسلحة..وكانت مآسي حفرت في ذاكرة الزمن والتأريخ كأحداث غائرة الجرح..
..........
لو كان خلينها لواحد زي دا.. موش كان رفعنا طوبات الى أعلى.. بدل الغزل والنفض..(ولا تكونوا كالتي نقضت غزلها من بعض قوة أنكاثا )صدق الله العظيم
|
Post: #13
Title: Re: السودانيون لايزالون فاشلون في اي حاجة
Author: محمد الأمين موسى
Date: 05-02-2006, 02:40 AM
Parent: #12
أخي منصوري لك التحية والتقدير..
لله في خلقه شئون.. ربنا خلق السودانيين على هذه الشاكلة عبرة لمن يعتبر..
|
Post: #14
Title: Re: السودانيون لايزالون فاشلون في اي حاجة
Author: منصوري
Date: 05-02-2006, 02:55 AM
Parent: #1
ها ها ها.أخونا محمد الأمين موسى والله ماقصرت يارائع قلت ما قل ودل فعلاً..تشكر.يديك العافية
|
Post: #15
Title: Re: السودانيون لايزالون فاشلون في اي حاجة
Author: محمد الأمين موسى
Date: 05-02-2006, 03:04 AM
Parent: #14
عينك على النيل وأنت عطشان.. أليس هذا هو العبث واللامعقول الحقيقي؟! هل يستطيع يوجين أونسكو وأمثاله تخيل مشهد درامي مثل هذا؟ لا أظن.. نحن غير.. على قول الخليجيين!
|
Post: #16
Title: Re: السودانيون لايزالون فاشلون في اي حاجة
Author: Osama Ahmed
Date: 05-02-2006, 03:51 AM
Parent: #1
الأخ/ منصوري
كيف أحوالك،
أنا يا اخوي من حاجاتك الكتيره الفشلنا فيها دي
ما بتفق معاك في حاجتين، الذوق والغناء، والكلام بتاع الذوق الكتبته ليك فوق ده كان من مقال جميل جداً
للشاعر الدبلوماسي الحاردلو في رده على الفضائيه الكويتيه حينما عرضت الشخصيه السودانيه بصوره مهينه في احدى المشاهد الكوميديه- أظنها احدى حلقات داوود حسين الكوميديه- والذي أثاره حينها أن قدمت لذاك المتسودن ورده كهديه فأكلها، لذا كتب الحاردلو مقالة بعنوان الفضائيه الكويتيه تفرش لنا الملاءه-الملايه- ، وكان من ضمن المقال أن السوداني من نظافته يغسل الصابونه بعد أن يستعملها
ثم يقدمها لمن يريد استعمالها وأرى في ذلك ذوق رفيع وللا شنو ، طبعاً ذوقنا ده ما في الصابونه بس.
أما بالنسبه للغناء اديتك مثال لأغنيه واحده وهي رائعه جداً من ناحية كلمات ولحن وأداء
ويا أخوي ما تردده اليوم كلو وتضيع زمنك بس أعرف انو عندنا غنا جميل، وعندنا كلمات يعجز كل جيراننا
عن الاتيان بمثلها، وليس أدل على ذلك من قول ذاك الأديب المصري قبل زيارته للسودان: ذاهب الى حيث يغنى شذى زهر ولا زهر - خت التشكيل في بالك-.
بعدين انت غنا الحقيبه ده كلو ما عجبك فيهو شي ،
انا معاك انو ما عندنا أي غنا اذا كنت تسمع فقط عيسى بروي ، وتسمع له فقط:
عز عز ديارنا منصوري موقد نارنا. 
لك التحايا
|
Post: #17
Title: Re: السودانيون لايزالون فاشلون في اي حاجة
Author: Mohamed Abdelgaleel
Date: 05-02-2006, 04:09 AM
Parent: #16
| Quote: عينك على النيل وأنت عطشان.. أليس هذا هو العبث واللامعقول الحقيقي؟! |
كان عمي محمد الأمين الحسن - يرحمه الله - (مزارع) مجتهداً ولكن ظروف ضيق الأرض وشح الماء حيث تشرب أرضه من فرع من النيل يجف ثمانية أشهر في العام .. سمعنا نقول أن كسلا غرقت !! فأندهش قائلاً: بالله كسلا غرقت وقلعة شنقل دي لهسع الموية ما جاته ؟!!!
ذهب عم محمد الأمين والآف غيره .. بعد أن هدهم التعب وهم يفلحون أرضاً بلا ماء .. كان يمكن توفير الماء بحفر قناة لسقاية أرض على مسافة قصيرة من النيل .. عينن في النيل ويعطشوا في ضلوا !!!
|
Post: #18
Title: Re: السودانيون لايزالون فاشلون في اي حاجة
Author: Al-Sadig Yahya Abdall
Date: 05-02-2006, 06:22 AM
Parent: #1
)..ونحن لسه ( في دي مطلقة ودي مرجوعة).. ولسه حايمين( بالعبيدية والقمبارات)ولسه( ساقية جحا تسوق وتدي البحر).. إلا أن يتغمدنا الله برحمته..بعيدين من درجة الإنسان العالمي أو الإنسان الكوكبي..
You are 100% right
|
|