لاهلنا الحلفاويين ...خلاص تاني مافي (تركين)

لأول مرة.. موائد (سكان الشمالية ) خالية من «الملوحة»
الخرطوم - فرح أمبدة

شاع الغضب والحزن في آن وسط سكان الخرطوم المنحدرين من شمال البلاد لإجبارهم على تناول إفطار الجمعة دون أن تحتوي موائدهم على طبخة "الملوحة" التي توارثوها لقرون، وكانت هيئة سكة حديد السودان منعت مُصدري "الملوحة والفسيخ" من استخدام قاطراتها التي يعتمد عليها تجار المنطقة في شحن بضائعهم إلى الخرطوم تجنبا لرائحتها المميزة .
وخلّف القرار الذي أعلن قبل عدة اشهر وبدأ تطبيقه اخيرا ارتفاعا جنونيا في أسعار الملوحة والفسيخ، حتى وصل سعر الصفيحة التي كانت في السابق لا تتعدى الـ40 ألف جنيه إلى 120 ألفا، ما جعل سكان الشمال الذين ينتشرون في العاصمة الخرطوم ومدن أخرى في "أزمة حقيقية" لعدم مقدرتهم على الحصول على الملوحة التي تعودوا عليها وظلت تتوسد مائدة إفطارهم خاصة في يوم الجمعة .

في المقابل عبر تجار الملوحة وهي طبخة مميزة كان يستخدمها سكان السودان منذ ما قبل الممالك النوبية القديمة وتستخرج من عجائن السمك المملوح قبل تخميره ويطلق عليها أحيانا التركين، عن سخطهم من القرار خاصة سكان وادي حلفا، وطالبوا بالتراجع عنه فورا .
واستند قرار هيئة السكة حديد إلى حجة أن رائحة الملوحة تتسبب في إزعاج ركاب القطار وبينهم السوّاح الذين تتضاعف أعدادهم في المنطقة التي تعد من مناطق السودان الغنية بالآثار .. ولأن الرائحة القريبة من رائحة الغديد عند سكان الشرق والكول والمرس عند قاطني الغرب والكجيك عند الجنوبيين، تؤثر على بقية البضائع وتكسبها رائحة غير مقبولة.
وطالب تجار الملوحة المتضررين هيئة السكة حديد بتخصيص عربات لنقل بضاعتهم كحل وسط للإشكال القائم خاصة وان قرار الهيئة تزامن مع دخول الصيف حيث يكثر الإقبال على الملوحة، ويصادف عودة المغتربين "وهم أكثر رغبة في تناول الملوحة" في اجازاتهم السنوية.
* جريدة الصحافة -

Quote: في المقابل عبر تجار الملوحة وهي طبخة مميزة كان يستخدمها سكان السودان منذ ما قبل الممالك النوبية القديمة وتستخرج من عجائن السمك المملوح قبل تخميره ويطلق عليها أحيانا التركين،

عجبتني (العبارات الأنيقة) المستخدمة لوصف الملوحة
الخبر سيء بالنسبة لي شخصياً لأني من محباتها

Quote: ويطلق عليها أحيانا التركين،

مش أحياناً ( على طول)

وتاني في تركين وتالت ، ومهما كانت الأسعار ، وقرارات SR ستظل أيتها الملوحة في القلب

http://http://napata.org/poetry/ali/images/ali___jn_aov.jpg

ليه؟
دي ملوحة واللا يورانيوم؟!
انا امبارح اكلت ملوحة خمسة نجوم دون ان تتدخل قوات السكة حديد الدولية

حتي التركين يا حكومة

أخونا أبو اللول ...
أكيد بتكون شفت الشبيه بتاع الملوحة والفسيخ عند الاسكندنافيين و بالتحديد ناسك السويديين
بس بالضبط ما عارف اسمه شنو .....
وتسلم يا لذيذ

لؤى
سلام كبير

سيتخذ التركين دروباً أخرى .. و يتم تهريبه .. و بالتالي سيزداد سعره .. و رغما عن هذا .. لن يفقد مذاقه الذي قال عنه أحد الفلاتة بعد أن أكل وجبة تركين كاربة و هو يمصمص أصابعه : هلو .. لاكين أفن ( يعني حلو لكن عفن ) ..

و هذه الأضداد هي التي يكمن فيها سر خلود التركين خلود النيل ..
فالعفونة يرقد خلفها مباشرة طعم حلو .. يزيد من إثارته الشطة و البصل ..

و التركين بلونه الرمادي ( الفيراني ) ... أدمنه أهلنا و أدمنه معهم شريحة كبيرة من السودانيين من غير الناطقين بالنوبية .. فبذلك صرنا إخوة في ( التركين ) بعد أن كنا إخوة في الدم و هي علاقة لعمري لا تنفصم عراها لأنها مرتبطة بالأوكسيجين المهدرج المنسرب في الدم المؤكسد و يرقد في أم التلافيف ناحية القولون غير العصبي.

و التركين يمكن تهريبه بعد تكويره كما الدلكة المدردمة و لفها في أكياس غامقة ..
لأن تهريبه بشكله شبه السائل يجعل رائحته تخرج للعلن كما مخلفات مفاعل تشيرنوبيل ..

في بوست سابق قلت أنني تم توقيفي في مطار جنيف بعد أن أخذت برطمان كير مليء بالتركين المعتق نزولا عند طلب أختنا فتحية دهب زوجة سفيرنا السابق عبدالمجيد علي حسن بجنيف .. ففي المطار لبس ناس الجمارك القفازات و الكمامات و حجزوني في غرفة زجاجية و أخذوا عينة بملقاط و كأنني قادم من إحدى المجرات الفضائية .. و لم ينقذ الموقف إلا حضور سعادة السفير و ( ضاق من البرطمان لحسة ماكنة ) وسط دهشة السويسريين ..

عذرا للإطالة

أقول قولي هذا و لسان حلي يقول : أيا تركين .. قل لا عاش من يفصلنا

أرقد عافية

شكرا لاخوانا واخواتنا (المركنين )
الاخ ساري الليل اظنك تقصد لؤي (بالعربي )شمت المقيم باوربا
حاسب يارجل انا لؤي (بالاحرف الانجليزية)..وحبابك الف مع التركين ..

ابو جهينة والله اليوم اضحكتني ضحك شديد
بعد ان كنت مهموما ومتعبا وانا جاري بين البنك واحدى الشركات

Quote: رائحته تخرج للعلن كما مخلفات مفاعل تشيرنوبيل

بعدين ياابوجهينة انت متاكد الكان معاك في مطار جنيف دا تركين وبس ..
والله لو ماسفيرنا ضاق منه لحسة ماكنة انا كنت بشك انك شايل ليك
حاجة من مخلفات الاتحاد السوفيتي سابقا
لكن يا ابوجهينة اها القطر ووقف التعامل مع التركين ...
اوع كمان بعد شويه يطلع لينا في السوق الاسود ...
ولا كمان تخرج لينا مجموعة تحمل السلاح ...تدعو لحفظ التراث

مودتي وتحياتي ،،،

أهلنا الكبار قالولنا من زمان (إذا جاورت بنو دنقل في الفردوس فعجل بالرحيل إلى لظى ....). والكلام مو معناتو هم ناساً كعبين ولو معناتو تخليهم في الفردوس يبرطعوا ويتجدعوا فيها براهم (ياكلوا قراصة الجنة ديك ) وتقوم إنت تتشالق تمش جهنم تتشوشو وتفور وتنجلق براك و (تاكل إنت في خاطرك) ده كدي يبقى جن وغباء منك .. الكلام ده مقصودبو ) إنك تسوقم وتمش بيهم لي لظى الحجل بالرجل .. لأنو أخوانا الدناقلة ديل يريدو نار لظي دي ريده شديده وفيها ليهم فايدة كبيرة .. في شان (القراصة الحارة) الليلتم يعني زي الجعلي الشاف الشايقي دخل جهنم .. قال ودوني معاهو .. لامن سعلوهو لي شنو .. قال : الشايقي ده ما بمشيلو مكاناً ما فوقو فايدة ... و( باقي هم يحبوا يعوسوها في نار جهنم..) أنا الكلام ده ما إتوكدت منو وما خبرتو صاح علا لامن واحداً من رفقاي دنقلاوي .. هسي بقيت عدو من أعدائي .. قام عزمني وأصر علي إنو أجي أتغدأ عندهم قراصة .. وأنا لي الزمن والتاريخ قلت أشوف القراصة البياكلوها بي الملاح واللحم دي كيفن .. باقي نحن عندنـا القراصة دي (تحلية) بنأكله بي السكر بس .. وفي قمة الرفاهية بنأكله بالسمن والسكر ده لامن يكون عندنا ضيوف.
أهان وكان معزوم معاي صاحبنا إسمو (لؤي) وطبعاً من اللسم ممكن تعرفوا الزول ده زول قراصة وله لا .. أنا غايتو متوكد إنو ماسمع بي القراصة دي إلا في (معرض تراث سوداني) أو في برنامج (صور شعبية...) ده من النوع البستحم يومياً .. وشاقي شعرو كمان .. أقول ليكم شنو ما ببالغ إن قلت ليكم (قاعد يلبس كرفته ) قمنا إندرجا ومشينا علي الناس ديل أنا وأخوي (المكندش ده..) طايبونه وسالمونه سمح .. وهم ناساً طيبانين خلاس .. وأخدنا قعدتنا وجابوا الشربات إتشربتنا سمح وإتونسنا زين .. أهان بعد داك صاحبي قام جاب صينية الغدا .. عليك أمان الله الصينيه (بوخه) يجيب المطافي .. فيها قراصة تكفي (معسكر دفاع شعبي كامل) ختوها في الواطه .. وقالوا أتفضلوا صاحبي لامن شاف (البوخ البلوي داك) قرب يتفضل يمشي أهلو ... أنا في خاتري شلت هم تب وقلت دي أكان خلوها تبرد لي العشاء ماهي بارده .. القراصة زاته مقاس 11 (ماهي سفنجة) ... مقاس (مخدة) عدييل .. تبارك الله لو بردت (تصلي) فوقه عدييل .. وتاني قالوا أتفضلوا .. أها صاحبنا (sud) سيد البيت قام مد يده دخله في القراصة أشوف ليك (وشو) حمر وطير عيونو (حرقتو لكن أكله في خاترو...) قلت تبارك الله ( قراصة بالريموت كنترول) من (اليد للوشي مباشرة..) أهان ده صاحب البيت ومتعود عليها أنا وأخوي (الكاشف) ده يحصل لينا شنو .. غايتو إتوكلت علي الله ودخلت يدي في الصحن (وودعت أصابعيني لي وداعة الله..) غايتو (ختت أصبعي حسيت بي راسي ينتح وطاقتي وقعت من راسي ودموعي يجرن...) إستغربت قلت (قراصة الدناقلة) دي الظاهر ما بتمشي المعدة بتمشي (المخ) طوالي .. غايتو (إتجوعلت) وعملت فيها (سجيمان) ولقمة في الخشم ونبرد يدنا في صحن الشطة سبحان الله الشطة بقت لينا (تحلية) عدييل. وإتمنيت في الوكت داك لو خشمي العريض ده سويت ليهو (مروحة سقف..) لحدي ما كلمت القراصة.. أنا حمدت الله إنها كملت لكن .. الراجل حلف ومشى يجيب زيادة .. وتبارك الله التقول (الكانون) بتاعهم ( Pentium4 غايتو الله يدي أمو العافية) وفي أقل من دقيقة وجاب القراصة الحارة زاته .. والمصيبة إنهم قاموا وقعدوا يحلفوا علينا نكمل القراصة .. صاحبي (لؤي) بعد ما شعرو كان مسبسب وشاقيهو (كل شعره قامت علي حيله) و (أزرق عيونو راح) وبقى ( يقح و خنق..) أنا قلت الزول ده لو جابو زيادة تاني ح نجيب ليهو الإسعاف عدييل ... قعدنا بعد داك وجابو التحلية (بتيخة) قلت لي صاحبي .. ليه ما (سلقتو) البتيخة دي وجيبتوها لينا (شوربه) نشربه .. وعرفت إنو (إذا جاورت بنو دنقل في الفردوس فعجل بالرحيل إلى لظى ..) لأنو لو عزموك قراصتم الحارة دي في الجنة .. ح تبقى ليك الجنة (لظى) عديييييييييل ..

اهن يا لؤي صحيت ولى ابدا ليك القصة التانية ؟؟؟؟

سلام لي لؤي و لكل محبي عسل الشمال (التركين)

بالله يا جماعة في أحلى من لمه في صحن تركين واااسع جواهوو تركين مظبط بالدكوه والبصل والزيت والشطه وعليهم من فوق كده قراصة خمسه بوصة دخاخينها تلخم؟ ...سبحان الله بس تقول قلبي حاسي انو الشيئ ده حيغلى ويبقى بالسوق الأسود في الفتره الفاتت دي عملت لي طلبيتين كويسات وناس السودان ما قصروا آخر حاجة وصلتني جركانة روزانا من يويمين مستفه مظبوط غايتوو بعد السمعتو ده قررت اتاجر فيها المعلقة بي 100 ريال بعد الخصم وعلينا جاااااااااااي.