الغصن الرطيب

اليومين ديل الكلمات شابكه معاي ( في بنانك ازده......... الزهور لين وجمال وطيب ) ليه ما عارف يمكن هروب الي حدايق الزمن الجميل

مالدنيا ربيع

Quote: زهر الروضة زهر الروضة نوّر في فصل الربيع والنسام يقسم للأرياح يبيع زي تبسيم سناك النّوره يقيد فظيع تبسيمان زهور البين النيل يبيع فرعها زي قوامك النادى يميل فريع حامل لي نهوره هل هلال ربيع من مهدك مكمل من جهلك رضيع مفتون بي هواك الرفيع والوضيع قل له عزيز في قومه لمحاسنك خديع لو ترسل محياك للبرق يضيع بي ذكرة محاسنك قد جل السميع بي ذكرة محاسنك قمري الدوح سجيع حرك زاد شجوني في الليل الهجيع ساهل وبالي وافي لا خل لا وجيع ومن بعدك حبيبي إخترت النجيع في تصوير محاسنك قد جل السميع وضع الماء والنار في خديك جميع والراح بين فاهك يالخدك لميع نوره سطع وهلّ دمعي نزل هميع أرجعي لي سلامي يا قمري الفريع قول للسادة بعدك زي السم جريع حظي سواده يشبه شعرك دا البريع غيثني ولو منا ما بي قربك سريع ________________________________________

وفي ليلة 14 ياربي بتغنو لمنو[ اوعه تقولوا القمر لانو المغني في الحاله دي قمري/B]

Quote: غنى القمري على الغصون غنى القمري على الغصون ذكرني الدر المصون فريد عصره الما متله شىء قمرنا الليك مطرف يصون يالغصن البزري الغصون ملاك محروس داخل الحصون شمس الكون تشبه مشيه فريد عصره الما متله شىء قاسي سماع لهجه الحنون عظيم كالمال حلو كا البنون بي لهجه يداوي الجنون شعاع محيه العين تختشيه فريد عصره الما متله شىء جميل متلك ما أظن يكون حيا ورقة وعفة وسكون يالبدر الليه روحي كون في حسن الكون ما خلى شيء فريد عصره الما متله شىء ليك عالي العالم يهون يالرشا يا اللدن المصون مناظرك فيك يتنزهون يالمطران مما مشيه فريد عصره الما متله شىء

الأخ وليم
سلام
ملاحظة سريعة

Quote: ملاك محروس داخل الحصون شمس الكون تشبه مشيه

الصحيح هو : شمس الكون تشبه وشي ( أي وجهه )

Quote: مناظرك فيك يتنزهون يالمطران مما مشيه

وهنا : يا البطران من ما نشي ( أي من بداية نشأته )

تحياتي

وما احلي لغة العيون

Quote: خاطبته بي لغة الهـــوي *** فاجابني بي لغة العيون في مرة كنا انا وهـــو *** في روض جميل ثمره استوي وريته مابي من شجون ومن عطفه اظهر لي شجون قال لي عزيز يهون ما دمنا نحن علي الهواء ****يا حبيبي متعاهدين سوا قلت ليه قلبي الليك غوي***في حبو ما ضل وغوي وحياة جمالك يا مصون حلي وانقسم ولي ابتسم وزاني تحت الغيم سنا وكشف عن العناب جنا قال لي ما معني القسم بي جمالي في شعرك هنا؟ قتليه يا سمح القسم كيف ما افاخر بيك انا وانت اللي اوحيت لي غناء في قلبي شخصك اترسم واعلم يقين انا في غني عن حب سواك وعلي هواك حتي المنون قال لي صحيح قلبك جريح وهواك صريح شعرك رفيع في مستوي لحنه البديع يطوي الجوي كم اطفا للظمان روي بل احيا اموات الهوي قلت ليه برضك لي ظلوم كيف ما غرامي عليك يدوم وانا فكري عندك كل يوم يستوحي من حسنك علوم قال لي خلاص يا خوي نقوم ودعني بي لغة العيون ودعتو بي قلبي الحنون ________________________________________

كلما انغمست في حدائق الماضي وتلك الدرر اتذكر المسالمه والناس الحلوه

Quote: جوهر صدر المحافل : ياجوهر صدر المحافل روحي معاك اتلطفيله مالدور الفي حليه رافل في حكمك لقلوبنا قافل كالظبي الفي مقيله غافل تارة يميل والتانية جافل وجه ينور والبدر آفل فوق للبدر يزيد نفيله ليك جوز عين نعسان وكاحل زي وجدي اللي جسمي ناحل بحر الشوق ماليه ساحل بنسب نوحي علي البلابل وانتي القمره بتنسبيله الغصن البتنى مايل طيره ينوح بي غصنه مايل أهوى نسيم لي فكري شاتل الأسد الفي القيد يناتل يتأكد ماليه كاتل غير مكحول ظبي النتيله المرنوع بي كنفه هادل درعه يميل بي خصره جادل أنا نايم والليل سادل شرط الحاكم يبقى عادل مايمنع طيفك يغازل أنا في الحب لي روحي بازل داخل قلبي ليك منازل يا لايم لاتبقى هازل هل عاشق يسمع لعادل خلي نصيحتك عني زيله يوقد شوقي ودمعي هامل جمر الحب لي جسمي شاعل كيف لا تشعل في مشاعل لو الدهر بي حالي جاهل في الأنجم أسأل سهيلة أنا في الريد مالقيت وسائل غير بث النسمات وسايل أغرب شي وعجبنا سايل حلم الصاحي ودمعه سايل لو شكيت في أمري سائل البدري كونك مثيله يوقد شوقي ودمعي هامل جمر الحب لي جسمي شاعل ضاق بي الكون مع إنه ماهل دمي يخضب للأنامل هل يرضيك كدا ياجميله هل يرضيك كدا ياجميله ________________________________________

هي دعوه والتفاته الي الغصن الرطيب....... وياريت يلتفت لها ملحني البورد خاصتا استاذنا الموصلي .... لكي لا تظل اسيرة لحن رتيب

ما بين صدر المحافل والغصن الرطيب

مكانك يا بوست في صدر المحافل

Quote: سألته عن فؤادي سألته عن فؤادى وعن سبب هيامه أجابني ما هو عارف عشقته وجماله نظمته فى فنونى جفانى صدى عنى تركنى لشجونى اذا تلاشى صبر وترعرت جنونى واذا أنبرى فؤادى لعهدى ما بخالف حبيبى يا مدلل بحق صفا كمالك حرمتنى وصالك وملت عنى مالك أنا صريع محاسنك وانا أٍير جمالك تعال شوف تعال زفيرى والعواطف يا فرحة الحزانى ويا زينة المواكب يا ربرب الخميلة ويا زهرة الكواكب زمانى جار معاك وهاهو لى ناكب بعدك الصلانى يادرة المعارف جمالك المكمل لهانى عن سواك وتيهك او دلالك رمونى فى هواك حبيبي أنت ومين يكون دواك أظن عفوك عنى ورضاك لى يوالف أهوى الذى ضنانى وغزانى بى نباله ولا سأل فى حالى ولا خطر بباله يرانى أو أراه وأقيف ذليل قباله واقوله أنت سيدى وفيم عنى صارف

.. تلك الكلمات جد ممتعه وسوف تظل علي مرور الايام نضار وطيب والا رايكم شنو

الاستاذ الوجيه عماد... شكرا علي المداخله والتصحيح.... تعرف انا قلته البوست ده باير لانو من الزمن القديم داك... بالرغم من ما يحتويه من معاني انيقه جميله ..... الله يطمنك ومره تانيه شكرا للتصحيح مع احترامي وتقديري

الاخ وليم
شكرا جميلا...
باين عليك زوق...
بالله لو عندك كلمات
(يلوحن لي حمامتن)...بسمعها لكن في كلام كتير شكلو بفتوني..
اكون شاكر

الاخ احمد شكرا علي المرور ... الكلمات ما عندي لكن حا افتشه في قوقل يمكن القاءها زي ما لقيت الكلمات الفوق وفعلا الكلمات التايه مني هي كلمات الغصن الرطيب شفته كيف وياريت يشارك الجميع في ايجاد تلك الدرد ولك مني جزيل من التحيه والاحترام

ياريت لو اي واحد من الاخوان ينزل لينا كلمات الغصن الرطيب ياريت

وليام صاحبي
سلامات


شُكراً على البوست الجّميل ، وأعذرني ما شفت البوست قبل الآن .. دي الأغنية الجّميلة كلمات ولحن ..

في بنانك إزدهت الزّهور
زادت جمال ونضار وطيب
يا مداعب الغـُصن الرّطيب

يا المنظرك للعين يطيب
تبدل الظلمات بنور
وتبدّل الأحزان سرور
إن شافك المرضان يطيب

تعجبني والشيء العجيب
هادئ وأليف ماك النفور
بعفـّتك صُنت السّفور
والحسن والأصل النّجيب

أنا وأنت في الرّوض يا حبيب
راق النسيم وحلى للمرور
بقى أحلى من ساعة السّرور
وأدقّ من فهم اللبيب

والرّوضة في موقع خصيب
حضنوها وإتلافوا النّهور
ترى فيها أنواع الزّهور
من كلّ لون أخدت نصيب

يانع ثمارها ونصف طيب
أشبه بربّات الخدور
والبلبل الغرّيد يقول
على منبر الأغصان يطير

في الرّوض غنّى العندليب
وردّد غُناهو الطيور
ترتيل أناشيد الحبور
وفتيانها يوم عيد الصّليب

دنت الثريا بقت قريب
بين السّلوك في تاني دور
في ثانية كم سطعت بدور

وأهلـّة كان نوعن غريب
شي ينعش الرّوح في الأديب
و يحيي روح ميت الشّعور
للقاك تنشرح الصّدور
ويفرح القلب الكئيب


الغُصن الرّطيب

ـــــــــــــــ

انا في البعيـد مشتـاق لهمسة من الوطن يـا نسمة
[email protected]

تلك الكلمات جد ممتعه وسوف تظل علي مرور الايام نضار وطيب



الاخوه الاعزاء وليم ولؤى شكرا على هذه المساحه الجميله كلمة ونغم فى هذا الصباح

ياوليام الليله عيد ميلادى

نجمة
تحيّة طيّبة

Quote: الاخوه الاعزاء وليم ولؤى شكرا على هذه المساحه الجميله كلمة ونغم فى هذا الصباح

لويليام صاحب البوست والفكرة ولكِ أنتِ كذلك الشُكر والتّقدير ..

Quote: ياوليام الليله عيد ميلادى

وعُذراً فرغم توجيه الحديث لويليام إلاّ أنّي قصدت التهنئة .. كلّ سنة وإنتي طيبة ، وعُقبال ميّة شمعة ..

ـــــــــــــــ

انا في البعيـد مشتـاق لهمسة من الوطن يـا نسمة
[email protected]

الاخ العزيز لؤى

يااخى جد اسفه ماقصدته بس والله لونته لى الليله يوم عيد ميلادى بكميات من الفرح شكراعلى الزهور والجاتوهات الحاتحرم منها السنه دى بسبب انفلونزا الطيور


ياوليام شكراعلى البوست بس كان نفسى فى كرت زى ده جدجد

..
.
يا مداعبي الغصن الرطيب
فى بنانكم ازدهت الزهور
زادت جمال ونضار وطيب
والله الاغانى مواقف..
التحايا يا وليم ولؤى ..

++++
في بنانك إزدهت الزّهور
زادت جمال ونضار وطيب
يا مداعب الغـُصن الرّطيب

يا المنظرك للعين يطيب
تبدل الظلمات بنور
وتبدّل الأحزان سرور
إن شافك المرضان يطيب

تعجبني والشيء العجيب
هادئ وأليف ماك النفور
بعفـّتك صُنت السّفور
والحسن والأصل النّجيب

أنا وأنت في الرّوض يا حبيب
راق النسيم وحلى للمرور
بقى أحلى من ساعة السّرور
وأدقّ من فهم اللبيب

والرّوضة في موقع خصيب
حضنوها وإتلافوا النّهور
ترى فيها أنواع الزّهور
من كلّ لون أخدت نصيب

يانع ثمارها ونصف طيب
أشبه بربّات الخدور
والبلبل الغرّيد يقول
على منبر الأغصان يطير

في الرّوض غنّى العندليب
وردّد غُناهو الطيور
ترتيل أناشيد الحبور
وفتيانها يوم عيد الصّليب

دنت الثريا بقت قريب
بين السّلوك في تاني دور
في ثانية كم سطعت بدور

وأهلـّة كان نوعن غريب
شي ينعش الرّوح في الأديب
و يحيي روح ميت الشّعور
للقاك تنشرح الصّدور
ويفرح القلب الكئيب

___________

صراحة الواحد لمن يقرا الكلمات كدا
بحس بالرجفة من راسو لكرعينو .. السبب شنو!!؟
كلام عجيب ..
يا لؤى ..
بالله لو عندك كلمات أغنية
حاول يخفي نفسو
وهل يخفى القمر فى سماهو
ابدأ .. وطبعاً لا..لا ..
شفناهو شفناهو
تجيبها هنا.. حسي بدون تأخير

لكم الشكر والود؛

الأخ تبلدينا
تحاياي

Quote: يا لؤى .. بالله لو عندك كلمات أغنية حاول يخفي نفسو وهل يخفى القمر فى سماهو ابدأ .. وطبعاً لا..لا .. شفناهو شفناهو تجيبها هنا.. حسي بدون تأخير

هذه هي كلمات الأغنية :

حاول يخفي نفسه
هل يُخفى القمر في سماهُ
أبداً وطبعاً لا
شُفناهُ شُفناهُ


حاول يخفي نفسُه وغيّر إتـّجاهُ
سطع النـّور في أفُقُه وكل إنسان رآهُ
خِلّي البدر أشرق كامل في عُلاهُ
خِلّي الزهر فتّح من أنفاس شذاهُ
جذّاب حُسنُه رائع لادن خِلقة مايع
رقص البان مشيهُ تحب تنظر وشيهُ
عيونك تختشيهُ من قوّة ضياهُ
ومن شدّة حياهُ


مرّة إذا نظرتُه ونظروا إليك رناهُ
قلبك ينشرح لُه وترتاح لي لقاهُ
دون تشعر تحبُّه وتلهج في ثناهُ
مرّة تقول كبدرِ ومرّة تقول كزهرِ
مرّة تسمّي شعري ومرة تسمّي سحري
تغلب فيه أسما وبرضُه تشوفُه أسمى
كل وصف تراهُ أقل من مستواهُ


مترفـّع عظيم عالي بعيد مداهُ
ملأ العين جمالُه الزّاهي رشح نداهُ
يلألئ والكواكب تتناثر حداهُ
فيهِ الحُسن أودع ماملكت يداهُ
مُفرح وشوفتُه تفرح
يتلقّاك باسم
كالزّهر المنسّق في زمن المواسم
تشوف في مقلتيهُ حياهُ دلالُه تيهُ
واللحظ البيجرّح زاد وجدي المبرّح
أنا من دون أصرّح
لي قلب إصطفاه وهسّه هناك معاهُ

وهذه هي الأغنية ، وضعتها صامتة حتّى لا تتعارض مع الأغنية الأولى ، وتعمل هذه بالضّغط على زرّ التشغيل ..

حول يخفي نفسُه

ـــــــــــــــ

انا في البعيـد مشتـاق لهمسة من الوطن يـا نسمة
[email protected]

الحبيب وليم اندرية
والاحباب البكايين

تحية واحترام

ماذا تفعل سيدى حينما تجد نفسك قسراً أمام ذلك الجمال الآخاذ سوى ان تزداد نبضات قلبك وينشف ريقك وتتحسر على كل حاجة ثانية واكان فيك شىء من تبلدينا ستكتب ابيات تخلد الغصن الرطيب ومداعبه وشايل الجردل زاتو والا ستبقى مندهشاً محتارا حتى تفوت عليك الفرصة ويغنوا ليك "وين وين تلقى زى ده" وبعض الجمال يجعلك اسيره رغما عنك ولا ترى نظيرا له رغم تكرار الجمال ..

الجمال بصراحة انهزامية للرجل ....

..
.
طبعاً مستحيل الواحد يجي
فى واحة زى دلى ويعبر عبور الكرام
يلا يا و.اندريا.. قول (1)
++++

في الطيـــــف

في الطيف أو في الصحيان زورني
يا حبيبي أنا عيان
مالو لـو فـي بعـض الاحيـان
تسمح لـي صحـوا أراك عيـان
تاخذ يا حبيبي عـن حالـي بيـان
عسى تبقي قلوبنا في الغرام سيـان

يا الفريد في حسنك و بهجة أمدرمان
لي من شوفتك يا حبيبـي زمـان
أنا ساهر و نـوم عينـي حرمـان
و إنت بين أترابك في نعيم و أمـان

النحول علي جسمي يا حبيبي بيان
و إنت جسمك نامي و بالنعيم طربان
لو رأك الناسك المـن الله جبـان
بيك يفتن و يصبح بالغـرام تعبـان

قبل حسنك قط ما رأيـت انسـان
فاق العسجد لمعة و الحريـر لمسـان
كيف يحصر وصفك يا حبيبي لسان
و البان إتعلم من قامتـك الميسـان

ما الـدرر لثنـاك ما بنـت ألحـان
للمـاك و آيـة نفحـة الريـحـان
إنت حسنك كامل لكـن لمحـان
خدك قاسـي و قلبـك ما حـان


وحتى
اعود؛
تأملوا فى كلمات البنا
وتزوقوا حلاوتها وخلوا قلبكم تدق
زى ما قلبي
بدق ..
رحم الله سيد خليفة؛

..
.

Quote: واكان فيك شىء من تبلدينا ستكتب ابيات تخلد الغصن الرطيب ومداعبه وشايل الجردل زاتو

سلام يا قرشو
لينا زمن نفتش ليك .. وللأبداع
عارف نزار قال الصمت فى حرم الجمال جمال
لكن بصراحة انا الجمال بوترنى بخلينى
اتكبكب واحس بالرجفة .. برضو من راسي لكرعي
اتاوق ليهو وامشي وتانى اجى واتاوق ليهو عشان كدا

Quote: النحول علي جسمي يا حبيبي بيان وإنت جسمك نامي و بالنعيم طربان لو رأك الناسك المـن الله جبـان بيك يفتن و يصبح بالغـرام تعبـان

وعشان الجمال إنهزامية للرجل
والاغاني مواقفـ ..
شوف جناين الشاطئ مع خليل فرح
عارف الاغنية بتذكرني ايام الثانوي
وبت مدير بنكـ السودان .. يآآآها زمن
عشرومية سنه كدا .. مواقف
ْْْْ++++++

بين جناين الشاطىء وبين قصور الروم
حي زهرة روما وأبكي يا مغروم
+++
دره سالبه عقولنا لبسوها طقوم
ملكة باسطة قلوبنا تبيت عليها تقوم
في الطريق ان مرت بالخلوق مزحوم
كالهلال الهل الناس عليها تحوم
+++
شوف عناقد ديسها تقول عنب في كروم
شوف وريدا الماثل زي زجاجة روم
القوام اللادن والحشا المبروم
والصدير الطامح زي خليج الروم
+++
خلي جات متبوعة الصافية كالدينار
في القوام مربوعة شوفا عالية منار
موضة آخر موضة هيفا غير زنار
روضة داخل روضة غني فيها كنار
+++
شوف جبينا الهل ضو فوقه فنار
منه هل الشارع منه بق ونار
طالعة ما بتقابل زي لهيب النار
تحرق البتهابل والبعيد في نار
++++

Quote: شوف عناقد ديسها تقول عنب في كروم شوف وريدا الماثل زي زجاجة روم القوام اللادن والحشا المبروم والصدير الطامح زي خليج الروم

الشطرة دى بالذات يا قرشو بتعديدنى
لمنتصف التسيعينات وايام فى جدة .. ايام
الواحد كان اقامتو دبلوماسي ..
ياخى الغامديات ديل والله لو قذف بكـ الزمان
لاحداهن بتشوف العرق اخضضضررر والدم احمررر
جارى فى العروق .. واكمل بقية البيتين
والله امرؤ القيس لمن قال
عراقية الأطراف نجدية الحشا
ولها مقلة لو انها نظرت بها لراهب
قد صام لله وابتهل ..
لاصبح كفتوناً معنى بحبها
ما قال الكلام دا من فراغ ..

ياخى انا ماشي ..
طلعتو ميتينا زاتو ..

________________
عذراً ان كانت هناكـ
بعض الأخطاء فى الكلمات
الكبر والذاكرة الخربة

فيك رايح بالي تفداك الروح

أظهر لا تبالي يا غزال الروض

في دجاك يا ليل الطيب هبالي

ده الجنن قيس وكثير قبالي

هل نومي يعود والطيف يصبالي

ده يرد الروح في الجسم البالي

يا الفاطرك نور وفاهك عسالي

جننت ألوف عشاق قبالي

في حبك أذوب ولهواك ما سالي

بس أخشى عليك يا جميل تنساني

طيفك في النوم لو كان يصفالي

أتغزل فيهو وينظر لحالي

متي منو يفيق عقلي ويصفالي

ما احلاكم يا احباب بجيكم راجع جد كلكم حلوين

الوجيه لؤي الشفيف كما عهدناك دايما رائع فعلا خليت البوست كروعة الغصن الرطيب وما عدمناك وتسلم يا صاحبي وياربي كيف انزل الغنيه علشان اعلمه رنة موبايل لكل رائع

الاخت نجمه شكرا علي المرور والمشاركه ..... وكل سنه وانتي طيبه وعقبال الشمعه الميه.... والبوست هديه ليك بمناسبة عيد الميلاد بعد موافق الاخوان الكرام المشاركين ودمتي اخت عزيزه

استاذنا الحبيب تبلدينا ... شكرا علي المشاركه الرائعه.... قلته كيف بتشعر برجفه... نفس الشعور... فعلا الكلمات جد رهيبه... ودمتا ظليل يالحبيب

الزعيم قرشو... شكرا علي المرور والمشاركه... وياريت المزيد والمزيد من الدرر والمساحات الخضراء الامل ودمته عزيزا

الاخوان وليم ولؤئ وقرشو وتبلدينا
شكرا جميلا...
بالله لو عندكم كلمات
(يلوحن لي حمامتن)...بسمعها لكن في كلام كتير شكلو بفتوني..
اكون شاكر

الحبيب احمد...غايتو ننتظر لما الشفيف اخونا لؤي يجيب الكلمات وفي الانتظار

..