Post: #1
Title: إيدك معانا ياخينا
Author: يازولyazoalيازول
Date: 04-10-2006, 08:12 AM
Parent: #0
فعاليات إحتفال الملتقى السودانى الإجتماعى الثقافى بعيد ...6 بجده (موثق بالصور)
يخوانا والله بالجد أنا زعلان ...
وأنا كان زعلت منكم ما بجيب ليكم حاجات حلوة تانى ، 
الشى مافيكم زول غير أخونا خضر وأخونا سيف يتداخل معانا فى البوست ده
ما تتصوروا مدى التعب التعبتو عشان أنزل ليكم الفعاليات دى ، وده جهد حقيقة مشرف لى ناس قلبهم على الوطن ، ناس مغتربين زيكم كده قدروا لمونا بى بعض وأدونا جرعات سودانية قوية لينا ولى وليداتنا ولى بنوتنا ولى نسوانا ، وما تتخيلوا نحن فرحانين بيهم قدر شنو؟؟ وياريت تاخدوا مننا الفكرة وتطبقوها فى كل بلاد الدنيا ، عشان خاطر الوليدات والبنيات النحن ظلمناهم وبعدناهم عن الوطن ، وصدقونى النتيجة مذهلة ، كان معانا مخرجين من الإذاعة السودانية ومعانا فنانين حقيقيين بمختلف شرائح الفنون ومعانا أدباء ومفكرين ومهندسين ودكاترة وطلاب وكتير من الفئات ، وكل زول فيهم أدانا خلاصة ما عندو ، وجبنا الوليدات والبنيات وحفظناهم عازة وفلق الصباح وسودانى الجوة وجدانى ، وبصعوبة شديدة وجهد كبير تمكنا من نزع اللكنة السعودية من خشم الوليدات ، حتين يا دوب فهموا اللكنة السودانية الأصيلة فى كلامنا وغنانا ، وسعد الأطفال بذلك أيما سعادة ، ورغم ده كلو يجو البورداب الفئة المثقفة الفئة الواعية الفاهمة يطنشونا بالشكل ده ، معناتو فى حاجة غلط
كلمة أخيرة ، الشغل ده إجتماعى بحت وغير مسيس ولا نتبع أى جهة ولا نمثل أى منظمة ، نحن وبس
عشان كده
أكتبوا لينا رايكم حتى لو كنا نحن غلط ، عشان نستفيد
وفى النهاية ليكم حبى كلو ،
وبرضو ما بقدر أزعل منكم لأنكم حرين فيما تأتوا به من تصرفات ولسع عندى ليكم حاجات رهيبة شديد على مستوى (من جنائن الشاطىء وكده)
يلا
bye
|
Post: #2
Title: Re: إيدك معانا ياخينا
Author: يازولyazoalيازول
Date: 04-10-2006, 08:42 AM
Parent: #1
أين المرأة السودانية فى المنبر؟؟؟؟
معقول ولا واحدة ، ولا حتى تماضر
|
Post: #3
Title: Re: إيدك معانا ياخينا
Author: فيصل نوبي
Date: 04-10-2006, 08:46 AM
Parent: #1
هشام
نشيل هنا و لا هناك ؟؟؟
|
Post: #4
Title: Re: إيدك معانا ياخينا
Author: يازولyazoalيازول
Date: 04-10-2006, 08:49 AM
Parent: #3
فيصل والله (خجلتنى) عديل كده
|
Post: #5
Title: Re: إيدك معانا ياخينا
Author: nazar hussien
Date: 04-10-2006, 09:20 AM
Parent: #4
ود شيخ الدين اللذيذ
انت عارف يا هشام...ايدك معانا دي ياها الطفشت الناس من البوست الرائع دا...
مش الغربة في بعض قوانينها ونواحيها قد فرضت علي الناس ان تطبل بيوتها...من
ناس ايدكم معانا...فلان حصل ليه وحصل ليه....ايدكم معانا فلان ما عندو شغل..
ايدكم معانا فلان بفتش لي فيزا...ايدكم معانا.....لامن شوية الناس اتعودت تبعد
من المعمعة...
هسي بوستك دا لو كتبت عنوانو هاكم ايدي دي....امانه العشمانين ما كتار...
وبعيدا عن هذه الهرطقة....نحسدكم علي هذه اللمة الراقية...والجهد الواضح
للنجاح....فما شاركتنا فيه ...عمل يحق لنا ان نفخر به بالنيابة عنكم...
واضح انه شغل مدروس ومنظمة بين ناس متكاتفين ومتحابين ومتأأأأأألفين
ربنا يدوم المحبة والالفة بين الناس كلهم
|
Post: #6
Title: Re: إيدك معانا ياخينا
Author: احمد معتصم الطيب
Date: 04-10-2006, 09:45 AM
Parent: #5
الزول الكلو زوق يازول
والله يازول انت اتحفتنة بالحاجات الجميلة البتنذل فيها دي
وظاهر عليك زولآ حنين واجتماعي وبتحب الاطفال والطرب
وصبور ربنا يخضر يدك ويدين الناس كلها. خليك مواصل كدا..
|
Post: #8
Title: Re: إيدك معانا ياخينا
Author: يازولyazoalيازول
Date: 04-10-2006, 10:10 AM
Parent: #6
الأخ أحمد معتصم الطيب
ياخ والله تسلم على كلامك الجميل ده
كده الواحد بكون سعيد بالزيك يا أبوحميد
الله يديك العافية
|
Post: #7
Title: Re: إيدك معانا ياخينا
Author: يازولyazoalيازول
Date: 04-10-2006, 10:09 AM
Parent: #5
نزار:
هاكم إيدى دى
يانزار ‘ عملتها جد جد
لأنو كلامك عجبنى شديد ، وتسلم إيدك يا نزار وربنا يديك العافية
|
|