Post: #1
Title: رسالة المهندس سيف الدين محمد يونس - الرياض الشعرية احقاقا للحق ودفاعا عن الشايقية
Author: ghariba
Date: 03-26-2006, 04:58 AM
الاخ المحترم غريبة
السلام عليكم ورحمة الله وبركاته
برسل ليك سلام أهلى الحنان طيبين...
سلام المنقا والدفيق.... سلام اللوبيا والعشميق... سلام جرفا مخدر وجارية جنبو موية النيل... سلام بلدى الحنان أهلا... سلام من نورى والبركل وراجل الزومة لى تصل وعليك يا الله نتوكل... سلام حلفا ... سلام نمولى ... سلام كورتى وسلام سنكات .. سلام دنقلا وسلام بركات ... سلام كسلا وسلام فاشر ... سلام قوة وسلام وحدة .. سلام أهلى الحنان طيبين... سلام شايق وأرض قريرا عز الطين... سلام أهلن حنان طيبين .. يعزو الجار ويكرمو الضيف .. ووكت الحارة يختو الايد فوق الايد .. ويقولوا بلدنا بنحميها وبنبنيها .. نحنا ولاد مهيرة بت عبود.
كلامى كتير يا ود غريبة .. ود تنقاسى وتلات السوق .. ما بننسا السوق... كوم كمونية وقرعة بقنية تحت ظل حرازة السوق... والله البنسى بلدوا وتراث بلدوا ما وطنى ولا بد يجى اليوم البيلقا نفسوا تب معزول
سودان اون لاين تب رافعه دمنا من ناسا عاملين كتاب وعولما وبيعرفو التاريخ.. كل يوم يشنوا هجوم على ولاد شايق وديار شايق ... والمصيبة بيحنوا ويسمعوا الطنبور .. وياكلوا القراصة بالويكة فى قدحا من الدبكر...
لبه يا ناس هجومكم دا على ديار شايق وولاد شايق .. نحنا حضارة ..نحنا ثقافة.. نحنا تراث.. نحنا مثل.. نحنا كرم.. نحنا أعطينا للسودان كثير وكثير.. وما زلنا نمد يدينا للمحتاج .. ما ملينا ..ما كلينا ... ليه يا ناس تهجموا علينا .. اتغربنا واتفرقنا.. عشان نشيل خبرتنا وتعليمنا ..ونعطيهوا لغيرنا.. عشان يتعلم ويترقى.. ويفيد بلدو ويفيد أهلوا .. رحنا كتم .. رحنا نيالا.. رحنا جوبا ..رحنا واو ورحنا ملكال.. رحنا هيا ...ورحنا جبيت .. وعشنا فى الصحرا والغابات .. حملنا كتاب حملنا سلاح .. ندافعبيهو عن وطن.. وطنا بنعزو وما بنهادن فيهو.. .. شلنا سلاح صدينا عدو.. حملنا كتاب محينا جهل... شقينا طرق .. بنينا جسور... مسكنا حكم .. طورنا بلد... بنينا حضارة معلومة.. يشهد بيها شعوب العالم... ليه يا ناس بتهاجمونا... معليش رغم هجومكم اللازع نقول معليش .. مصيرنا كده علشان بنبنى بلد .. ونسعد أهل
أخى غريبة البطن غريقة والصاراهو ما بيكمل .. ولينا لقاء .. لقاء ولقاء.. وقول للشايلين على شايق وديار شايق .. جاكم زولا جدو ترهاقا وامو مهيرة بت عبود ..
والى اللقاء
مخلصكم مهندس سيف الدين محمد يونس(أبو حسين)ز
e.mail: [email protected]
|
|