Post: #1
Title: ( تماضر ) في هذا العنوان .. ( تجربة الضوء )
Author: Emad Abdulla
Date: 03-15-2006, 08:46 AM
Parent: #0
هو ذاك ..
سيقول من قائل :
قالت تكتب بغصن .. وهأنت ترده لها ..
حسناً ..
أجذب مقعداً .. استقبل شاشة الكمبيوتر .. استرح
أدخل إلي سودانيزأونلاين ..
هل أشعلت سيجارتك ؟
إن كنت عضواً في هذا ( البلد الأصفر ) .. فاختر موضوعاً جديداً ..
أكتب أي طلاسم شئت في متن نص النافذة تلك ..
ثم ضع هذه الأحرف الخمس ( ت / م / ا / ض / ر ) في مكانٍ ما .. تعنون به تلك الطلاسم .
أدفع بذلك إلى الصفحة الأولى .. وانتظر .
ستفاجأ .. أو تفجع ..
ظلماً أو إنصافا .. سيتقاطر المتداخلون و القراء ..
و تتسارع وتيرة الصفحات الجديدة باضطراد مذهل .
لتماضر ذاك الألق ..السطوع .
( قيل أن الضوء ينادي الفراشات ، تساقط عليه ) ..
وذات الضوء يجذب الهوام الليلية و طفيليات الحشرات و اليعاسيب ..
و الضوء ذاته قد يوجع ( الأعين الرُّمُد ) ..
و يشفي - هو الضوء نفسه - نفوسا طالما تاقت للإنفلات من ربقة الظلال الدائمة .
وسترقب الكلمات تترى .. فيض من فيض ..
المقرظون .. المعجبون .. المساكين .. ذوو المآرب .. السابلة .. الطيبون .. الغُثاء .. الشامخون .. السَّوََقة .. طالبو القُرب .. طالبو الثأر .. الكاظمون الغيظ .. الممتلؤن حباً .. الشامتون .. ( مُتَلقو الحِجج ) .. التقدميون .. المرتدون .. المنافقون .. شذاذ الآفاق .. المريدون .. الـ .. الـ ..
وعني سأحدّث ..
( أدرجوني تحت أحد الأصناف أعلاه .. كما تشاؤن .. و سأظل أستدفيء بالضوء .. بعد ) :
أخبرت الجميع يوم أن وجدت تماضر ترد على إحدى مداخلاتي هنا ..
طويلاً كنت يومها .. و مزهواً حد ( البجاحة ) ..
كيف لا و قد إنتبهت إليّ تماضر .. و ما أدراك ما تماضر .
( وقدلت ) ما شاء لي يومذاك .. و كافأت نفسي كثيرا .
جميلٌ كان ذاك الزمان .. و هي كانت إحدى رموزه المُلهِمات .
زمان الإنقلابات الكبرى و الآفاق الجدد .. زمان السبعينات و أوائل الثمانينات .
كل شيء كان يتفتح و يزهر .. كنا نتذوق طعم كل شيء بلذة لا تُحد . و نجرب كل شيء باندفاع أحمق .. لكنه طامح للتغيير . إنقلاب على شريعة العادة و شرعية السكون .
تماضر كانت هناك .. تملأ الدنيا و تشغل الناس .
فتاة ملهمة في قفزها السريع إلى الصفوف الأولى في الفعل الدرامي السوداني ، والذي كان يفتقر إلى بصمة نسائية تعدل ميزان كفته الراجحة ( تحية زروق ) .
ملهمة لأخيلة الشباب ( كنا نكره الهادي الصديق ينتهرها في إحدى المشاهد .. و نتوعده سراً بالويل و الثبور و عظائم الأمور وهو يصر علي ترداده : يااه - البايخة - تلك .. ومازال ) ..
و نتمثلها حين نتعاطى نصوص الكتابة تجاور أخيلتنا في امرأة ممشوقة كما الرمح .. و مؤنسةٌ كما تلاوة الفجرية ..
كانت ( جان دارك ) تململنا من قيد العسكر وسلطوية العائلة .. وملامح جاراتنا المكرورة ..
كانت سودانية في كل شيء .. ورغم ذلك نجمة !!! ( حين نتبادل المطبوعات العربية فنراهن النجمات العربيات .. فنستل سيف عنصريتنا و تتلبسنا فروسية مُقنع الواليات .. فتخسر العيون الخضر والزرق و ألوان الطيف في الأوجه البيض و .. تشمخ تماضر ) .
تشبهنا كانت في أدوارها الدرامية .. ( تحية زروق كانت تشبهنا أيضاً .. تشبه حبيباتنا الغيبيات .. في انطلاقها و ضحكاتها العذبة و .. خفة دمها) .
تماضر كانت تشبهنا أكثر .. تشبه أخواتنا أكثر .. و تشبه حبيباتنا الخجولات .. وسمرتنا و طيبتنا و حماقتنا و.. جنوننا .
تماضر تشبه أن .. تكون حاضرة يوم تخرجك ..
تشبه أن ( تبشر ) فوقها فتديك الشبال .. فتثملك العزة حتي تشق قميصك للبطان ..
تشبه أن تخاصمها حين تسقط ( الطرحة ) عن رأسها في الطريق لصباح مدرسي .
تشبه إن ( تستلف ) منها كتاب الرياضيات ..
تشبه أن تعزمها سندويتش طعمية في كافتيريا الجامعة ..
تشبه أن توصلها بيتها بعد إنتهاء حفلة بأبوعركي ..
تشبه إيمان أختي في ( حمبكتها ) الطفولية ..
تشبه فاطمة أحمد ابراهيم حزناً شامخاً يوم أعدم الشفيع ..
تشبه ماريا الغجرية ..
تشبه كل ذلك .. لأنها تتقمص كل ذلك .. وتعبقر التقمص في زمنٍ كانت الدراما فيه تحبو و تلثغ ..
تجيء تماضر مع أغنيات الحقيبة .. وتشهيات الحبيبة و أحلام الرحيل إلى مدن الضوء البعيد..
تجيء مع اختيارنا للون الشارلستون ( وهو ضربٌ من السراويل غريب ) .. و قصة الشعر .. ونوع الفيلم الذي نرتاده اليوم في ( سينما غرب ) .
كانت تطل على الشاشة فنصمت .. و نظل نرقب طريقة لبسها ( لتوبها ) .. وطريقتها في عقد ذراعيها أماماً ( زعل تماضر ) معطية ظهرها لتلك الـ .. ( ياااه ) ..
و نسخر كنا من أخواتنا تتضاءل سماحتهن حين نقول : تماضر .
كانت ( سعاد حسننا ) .. ( جين فوندانا ) .. و ( إنقريد بريجمانا ) .. و .. و ..
ذلك إندفاع في التاريخ رهناه لرفع أصواتنا عاليات فوق كل المسَلّمات .. بداية من تُرهاتنا المراهقة في الحب .. و هوسنا بالفنون و الآداب .. و لؤمنا في مواجهة تقليدية المجتمع و قيوده .. وأحلامنا المستبدة بتحقيق فتوحات تطال السماء وليس انتهاءً بالتهام كل ما يمكن قراءته .. وكل ما يمكن تعاطيه .. وعشقنا الأخرق الجميل للحرية .
قاسمتنا تماضر كل ذلك ..
فصارت تأخذ رائحة الزمن .. وتتخذ أشكال الأمكنة .. وتتلون في أغنيات الإذاعة و هتافات المظاهرات و زغاريد الأعراس .. و أماني الأمهات .
كان زمن الغليان الذي ينذر بقفزة ما ..
إما إلى قمة .. أو في فراغ عدمي ..
كانت مدرسة الغابة و الصحراء في الأدب .. مدرسة الخرطوم التشكيلية .. التلفزيون وسحره .. جعفر نميري .. معهد الموسيقى .. محطة التلفزيون الأهلية .. البلابل .. الإشتراكية .. حرب أكتوبر .. قاعة الصداقة .. و .. و .. و
كل ذاك ( الفوران ) حدث في بضع سنوات ..
جرعة سم .. أو دسامة ( بُكره ) ..
وكانت هناك تماضر ..
أضاءت طويلاً .. طويلا
وسطعت حين أحوج ما كنا لمشاعل .. و منارات ..
لكنا تشاغلنا ..
فانسرب منا كل ذاك الضي ..
ومضى ..
( ربما .. لو لم يكن هذا الجدار ..
ما عرفنا قيمة الضؤ الطليق ) ..
نيزكها المذنب ما زال يضيء ..
غير أنها ارتضت أن تكون نخلة ..
نخلة ..
( شكل آخر تتقمصه تماضر .. وأيضاً يشبهها ..
.. دور آخر أكبر من كل أدوارها السابقات )
بعيدا عن السماء .. تتجذر عميقاً في الأرض التي تعشق ..
نخلتنا النجمة ..
وما تزال تضيء ..
و ماتزال يحصبها الحاصبون ..فتساقط عليهم تمرها الرطب ..
وماتزال يتحلق ضؤها السمار .. يرسمون خارطة حدادي مدادي
و يهشون هوام الليل و ناموسه ..
ويعدون الفراشات بـ :
عوديها غداً ..
تسطع أكثر .. و تثمر أكبر
|
Post: #2
Title: Re: ( تماضر ) في هذا العنوان .. ( تجربة الضوء )
Author: Muna Khugali
Date: 03-15-2006, 09:02 AM
Parent: #1
وما تزال تضيء ..
و ماتزال يحصبها الحاصبون ..فتساقط عليهم تمرها الرطب ..
وماتزال يتحلق ضؤها السمار .. يرسمون خارطة حدادي مدادي
و يهشون هوام الليل و ناموسه ..
ويعدون الفراشات بـ :
عوديها غداً ..
تسطع أكثر .. و تثمر أكبر
معك حـق في كـل ماقلته عـن طـمطم..فهي كـل هـذا وأكـثر...
رأيتها العام السابق تـؤدي مشـهد ممتلئ بالمعاني وانفعال الشـخصية ذات الأبعاد المـركبـة..
ومـين غـير الفنان المبـدع بيقـدر يـؤدي عـن 'عمـد' مايأتي اليك في تلقائية وطـبيعية تجـد نفسـك أمامها في تسـاؤل برئ..
ياربي الزول ده بيتكـلم جـد ولا بيمثل?
لها ولك كـل الـحب
|
Post: #3
Title: Re: ( تماضر ) في هذا العنوان .. ( تجربة الضوء )
Author: esam gabralla
Date: 03-15-2006, 09:14 AM
Parent: #1
تملك غصن دعاش يا عماد
حرف طاعم , مغسول بحبر حكمة و "حرفنة" حياة و بصيرة محب مغامر....
البت تماضر والنساء مثلها
ليسن امراة واحدة, هن نساء فى امراة
لا املك الا تذكر وصف درويش لبيروت
اتذكر:
تفاحة للبحر.نرجسة الرخام
فراشة غجرية.
شكل الروح فى المراة,و رائحة الغمام
فضة.زبد. وصايا الارض فى ريش الحمام.
تفاحة فى البحر. امراة الدم المعجون بالاقواس.
شطرنج الكلام.
بقية الروح. استغاثات الندى.
|
Post: #4
Title: Re: ( تماضر ) في هذا العنوان .. ( تجربة الضوء )
Author: tmbis
Date: 03-15-2006, 09:49 AM
Parent: #3
|
Post: #5
Title: Re: ( تماضر ) في هذا العنوان .. ( تجربة الضوء )
Author: خدر
Date: 03-15-2006, 10:00 AM
Parent: #4
تمبس
(المُطرب) ده منو !!
برجع ليكم ياعماد وتمادر و عصام
|
Post: #6
Title: Re: ( تماضر ) في هذا العنوان .. ( تجربة الضوء )
Author: tmbis
Date: 03-15-2006, 10:19 AM
Parent: #5
| Quote: (المُطرب) ده منو !! |
خدر ..
المطرب دا زول ( عادي ) .. صاحبي يعني
العين بالعين والسن بالسن والبادي اظلم
 
انا زاتي برجع ليكم بعدين بالليل خالص
|
Post: #7
Title: Re: ( تماضر ) في هذا العنوان .. ( تجربة الضوء )
Author: esam gabralla
Date: 03-15-2006, 10:22 AM
Parent: #1
بي صورتك دى احسن ما تجى راجع
غيرا حتى تتفضل
|
Post: #8
Title: Re: ( تماضر ) في هذا العنوان .. ( تجربة الضوء )
Author: tmbis
Date: 03-15-2006, 10:35 AM
Parent: #7
Quote: بي صورتك دى احسن ما تجى راجع
غيرا حتى تتفضل |
..
يعني انت اصلو ما كنت صغير زمان ؟؟
|
Post: #9
Title: Re: ( تماضر ) في هذا العنوان .. ( تجربة الضوء )
Author: هشام آدم
Date: 03-15-2006, 11:30 AM
Parent: #8
Tumadir's a wonderful woman, thanks Emad, you're too
|
Post: #10
Title: Re: ( تماضر ) في هذا العنوان .. ( تجربة الضوء )
Author: خدر
Date: 03-15-2006, 11:57 AM
Parent: #8
| Quote: يعني انت اصلو ما كنت صغير زمان ؟؟ |
عصام ,,
في ذمتكـ .. دي صورة طفل
|
Post: #11
Title: Re: ( تماضر ) في هذا العنوان .. ( تجربة الضوء )
Author: ابو جهينة
Date: 03-15-2006, 12:19 PM
Parent: #10
عماد
سلام كبير
Quote: تماضر تشبه أن .. تكون حاضرة يوم تخرجك ..
تشبه أن ( تبشر ) فوقها فتديك الشبال .. فتثملك العزة حتي تشق قميصك للبطان ..
تشبه أن تخاصمها حين تسقط ( الطرحة ) عن رأسها في الطريق لصباح مدرسي .
تشبه إن ( تستلف ) منها كتاب الرياضيات ..
تشبه أن تعزمها سندويتش طعمية في كافتيريا الجامعة ..
تشبه أن توصلها بيتها بعد إنتهاء حفلة بأبوعركي ..
تشبه إيمان أختي في ( حمبكتها ) الطفولية ..
تشبه فاطمة أحمد ابراهيم حزناً شامخاً يوم أعدم الشفيع .. |
الآن .. و الآن فقط .. عرفت الشجرة التي قصدتْ تماضر أنك تنزع غصنها .. و عرفت لون الحبر الذي تغمس فيه ريشة غصنك .. فهاهي الوثيقة ..
و ها أنا أشق العراقي ... و البطان بمزاج ... و حرم زول يزحزحني من هني مافي ..
أرقد عافية يا جميل
تماضر .. التحية لك و لأسرتك
|
Post: #12
Title: Re: ( تماضر ) في هذا العنوان .. ( تجربة الضوء )
Author: ثابت محمد
Date: 03-15-2006, 12:23 PM
Parent: #1
ســلام بلا حدود
تمبس وخدر وعصام
وكّحكن عِمــاد بكلامو البكلِّب شَـعرة الجلد دا خلاكن تتونسو ؟؟
عاملين فيها رايحين مش ؟؟
غلبكم البتقولوه ؟؟ قولوا ماشاء الله بس
أنا زاتي غالبنى البسويهو
بس لو في النساء رسول .. كانت تماضر
وكان النسوان في الدنيا دي كلهن زي تماضر
أريتو عودي في الدنيا عود مرا
أما عمـاد عبدالله
أخير ما نتكلم معاهو
يقوم يقول لينا ده زخُ وشــيك
غايتو الزول ده يوم مطرتو تنزل لملمو نعلاتكم وأدخلو الجنّـة
قبيــلة المبدعين بالمنبـر .. حضـرنا ولم نجـدكم
عماد الله يخدر ضراعك
|
Post: #13
Title: Re: ( تماضر ) في هذا العنوان .. ( تجربة الضوء )
Author: خدر
Date: 03-15-2006, 12:34 PM
Parent: #12
| Quote: كانت ( سعاد حسننا ) .. ( جين فوندانا ) .. و ( إنقريد بريجمانا ) |
عماد
لاحولاااا
لا فُض فوكـ .. تكتب كما يتونس الاخرون في (اخر محطة_ اللستكـ _ بعد الكورة )
لكن
بلغة عالية
قلدتكـ أن أنت مزاجيً الكتابي
|
Post: #14
Title: Re: ( تماضر ) في هذا العنوان .. ( تجربة الضوء )
Author: خدر
Date: 03-15-2006, 02:27 PM
Parent: #13
علي سبيل شحن البطاريات .. وكده 
؛
|
Post: #17
Title: Re: ( تماضر ) في هذا العنوان .. ( تجربة الضوء )
Author: tmbis
Date: 03-15-2006, 04:43 PM
Parent: #12
Quote: تمبس وخدر وعصام
وكّحكن عِمــاد بكلامو البكلِّب شَـعرة الجلد دا خلاكن تتونسو ؟؟
عاملين فيها رايحين مش ؟؟
غلبكم البتقولوه ؟؟ قولوا ماشاء الله بس
أنا زاتي غالبنى البسويهو |
يا ثابت ..
ياخي انت شفتني عيانا بيان .. زي راسنا دا بيطلع منو كلام زي دا ؟؟
وياتو يوم شفتني .. رصيت لي كلمتين مع بعض .. وكتبت ( بالتفعيلة ) ..
غايتو انا بجازف لي مساحة بتاعت ( كم وتلتين كيلو بايت ) بموت بيها مع خدر وعصام وديل كمان إلا الواحد يجيهم ( بالليل خالص ) ..
عماد دا يحل موضوعو مع تماضر بي طريقتهم .. ( انا جني وجن حصة الكيمياء )
ممكن امشي اجيب الكورة من وراء القون بس وازازي خدر وعصام
|
Post: #18
Title: Re: ( تماضر ) في هذا العنوان .. ( تجربة الضوء )
Author: ثابت محمد
Date: 03-15-2006, 05:00 PM
Parent: #17
تمبس .. قول بسم الله
إنت بقيت البتسمعو بتكتبو ؟؟
عيان بيان دي مش في الأغنية الشغالة في البوست ده ؟؟
غايتو الحمد لله الماكانت من ( ساحات الفداء ) 
تمبس إنت وجودك والإحساس بوجودك يكفي
الكلام المُدهش خليناهو لي عماد براهو بخيت وسعيد عليهو
الأخبار؟؟؟
|
Post: #15
Title: Re: ( تماضر ) في هذا العنوان .. ( تجربة الضوء )
Author: معتصم الطاهر
Date: 03-15-2006, 02:30 PM
Parent: #1
عماد
تمام الدر
جئت أعلن .. أننى أتقاصر
و( أتباقص) أمام فلمك ووصفها ..
وبس ..
|
Post: #16
Title: Re: ( تماضر ) في هذا العنوان .. ( تجربة الضوء )
Author: بدر الدين الأمير
Date: 03-15-2006, 03:47 PM
Parent: #15
عماد من اين اتيت بالقدرة على تعميدنا لا يهم المهم عندى
ليتك كنت تماضر
وليت تماضر كانت العميرى
وليت سلمى الشيخ كانت شاعرة فى حضرة من اهوى 0000
وليت محمد السنى كان ابو سليم
وليتنى كنت عبدالله الطيب
وليت 0000 كان مصطفى سيد احمد و تغنى بكيت ولا همانى شىء وضحكت ولا همانى شىء عندك
وقفت من المشى وغرقت فى ضو النهار
|
Post: #19
Title: Re: ( تماضر ) في هذا العنوان .. ( تجربة الضوء )
Author: محمد بهنس
Date: 03-15-2006, 05:19 PM
Parent: #16
"في حضرة عماد
يطيب الجلوس
تماضر امامك يكون ده الكلام
لانك..."
محجوب شريف(بتصرف)
|
Post: #20
Title: Re: ( تماضر ) في هذا العنوان .. ( تجربة الضوء )
Author: Arbab
Date: 03-15-2006, 05:54 PM
Parent: #16
وليت لنا كل يوم جرعة منها ومن تدويلها لملامحنا ...
المعتمدة كلما بحثنا عن من يعتمدنا ..... كفيلتنا في المنافي .
شكرا جميلا يا عماد
ليت يوما ما ..سلسا و ورديا .. نسمي دولتنا
او حزبا ما او جماعة للضغط ... او قل مطار .... باسمها
لنقول : طرنا في امان .... ونعود في الوقت المناسب في امان
|
Post: #21
Title: Re: ( تماضر ) في هذا العنوان .. ( تجربة الضوء )
Author: فيصل عباس
Date: 03-16-2006, 02:36 AM
Parent: #1
آسف يبدو انني دخلت معبدا او محرابا
او قل مسجدا (عن طريق الخطاء)
وان الوقت فيه وقت صلاة
والصلاة تستوجب الوضوء قبلا
ولكني!! لم اتمكن من الماء
ساحاول التيمم
ولكني لا اعلم فروض التيمم!!
هل لي ان احاول تجربة الوضؤ بالضوء؟؟
او قل تجربة الضوء
انا هنا اذن في انتظار من يفتي بصحتة الوضؤ وفي ذات الوقت ارغب في ان الحق بالصلاة
اذن ساراقبكم في صلاتكم من خلف تلك النافذه او ذاك الباب
لاصاب برهبتها واجتهد لتعلمها
ولاحقا ساعظم حرمتها
وانشر تجربة الوضؤ بالضوء التماضري
ويا سلام عليك يا عماد
يا زول يا كتاب
وشكرا لتماضر المدرسه التي نرى فيها كل يوم
جمال وابداع ما ومعرفة كثيفه
وليت كل النساء تماضر
وكل الحروف حرفك الذي تكتب به ياعماد
*حاشيه:
تمبس مالك زعلان اكيد عصام ما بيكون قاصدك انت بالصوره بيكون قاصد صاحبك
خدر افهما يا لورد
تسلموا
|
Post: #22
Title: Re: ( تماضر ) في هذا العنوان .. ( تجربة الضوء )
Author: عصام عبد الحفيظ
Date: 03-16-2006, 02:11 PM
Parent: #21
ايييييييييييييييييييييييك
طيب ان كنت وين لامن الكلام ده كلو حصل!!!!!
|
Post: #23
Title: Re: ( تماضر ) في هذا العنوان .. ( تجربة الضوء )
Author: عصام عبد الحفيظ
Date: 03-16-2006, 02:33 PM
Parent: #22
اظنى كنت عامل كده !!!!
|
Post: #24
Title: Re: ( تماضر ) في هذا العنوان .. ( تجربة الضوء )
Author: ودرملية
Date: 03-16-2006, 06:30 PM
Parent: #23
تماضر .. ياااااااااااااااااااه ياعماد بالله زد ولاتقف ..
هذه السمراء النبيلة ...
بكفك (الجهبوز) روائع فانثرها علي حبيبتنا الجميلة تماضر .. امراة تمشي علي حزن وهموم..اكتب ياعماد واجعلها تتذكر اننا مازلنا نحبها .. هذه الابنوسية الفريدة ... جميلة في كل شيء ..
لك المحبة ياتماضر وليت عماد (يعيرني) بعض من فصاحته فالبسك ثوب بهيا من ضياء الحروف ..
لك سيدتي الفاضلة تمام المقال والمودة ..
صبرا عماد .. علني ارتوي من هذا الفيض الغزير .. يارجل باي غصن تكتب؟؟؟؟
محبتي كحنين الامهات ...
|
Post: #25
Title: Re: ( تماضر ) في هذا العنوان .. ( تجربة الضوء )
Author: Omar Bob
Date: 03-16-2006, 08:34 PM
Parent: #1
عماد
لقد وضعتنا في محك
هل نتاوه علي نصك البديع
اكثر
ام علي تماضر الجميله
اكثر
لك ولتماضر كل الود
|
Post: #26
Title: Re: ( تماضر ) في هذا العنوان .. ( تجربة الضوء )
Author: محمد سنى دفع الله
Date: 03-17-2006, 00:39 AM
Parent: #25
عماد ياعمده
برقك شلع زهلل جني
صحى عقلي المطومس أعصابي
علق شهقة دهشتي
بين الحلق واللهاتي
مدخل للشكر
ياعمادمأأجمل اختيارك تماضر عسل السودان
ابداع متدفق وخفة دم شربات ،لكن هم كلهم كده اقصد العايلة منو ما بخليك تضحك ؟؟
وتماضر درست المعهد زمن الفنانين المجانين والجن هنا مقصود بيه الابداع الخالص الحرفنة والدربة
والتجاوز قرت في المعهد الذي كان يمورمنتديات وعروض مسرحية وحفلات موسيقية وابشركم العميد ابن المعهد د.سعد يوسف أعاد أوركسترا الساعة 12..تماضر حضرت زمن تألق قرني في التمثيل وظهور الفرق الجادة السديم والاصدقاء وفرق الشباب والنادي الجاد الذي أسسه الفنان الشامل العميري الراحل المقيم ..والكوريين والبات الحلوات من سلمى الشيخ لي اسيا التلب كانو مجانين في معهد مجنون اليوم كلو نغني مع ابوعركس وخليل والفاتح كسلاوي وعمر الشاعر وناس هادية وحياة بتشوف السينما ووبتمثل في التلفزيون وبتحب الشعر ..شنو المابخليها كده ؟؟
وبعد كلو شاطرة عوارة عيني بارده وما شاءالله تجي بعد يومين ماتكتب في الموقع ده تقولو سحرة السنى أها الشطارة دي ادتها بعد تاني منظراتية للطيش وجات الغربه وفنحت فيهاكل ابواب الحنين الفي الدنيا وخلت تكتب من جواها كلام عميق جاب ليها الشكر على استحققاق
بالمناسبة ياعماد جاني (((قرضة مصاص العرديب )وقال لي صاحبك ..عرفة من متين ؟؟اكتب فيها الكلام ده كلو ؟؟؟؟لم ارد عليه الحاسد الحاقد ....ونتابع مع تماضر الضوء ......
|
Post: #28
Title: Re: ( تماضر ) في هذا العنوان .. ( تجربة الضوء )
Author: Emad Abdulla
Date: 04-05-2006, 05:24 AM
Parent: #26
Quote: أما أنتم فعليكم تقع مسئوليات جسام ، أهمها الحفاظ على هويتنا السودانية .. ويا موصلي مكان السني ليس الدوحة ولا أمريكا ، بل السودان ، هو وأنت ، وتماضر ، وبدرالدين شنا ، وفضيلي جماع ، ويحي فضل الله ، وخطاب حسن أحمد , وسلمى الشيخ ، والصلحي ، والطيب صالح ، النور عثمان أبكر ، حمزة سليمان ، ميرغني الزين ، علي السقيد , كل التشكيليين ، العازفين والموسيقيين والدراميين والكتاب والأدباء والشعراء ، وكل الشخصيات العامة (المنشرة) في بلاد الله الواسعة.
عودوا حتى نستبدل الزفة المستوردة بـ(الليل ليل العديل والزين .. الليلة العديلة تقدمو وتبرا) ، ونواجه الثقافة الوافدة التي شوّهت (سودانيتنا) ..
|
أنا سكت يا سني ..
وبعرف تماضر من زمن : ياااااااه .. البايخة ديك بتاعت الهادي الصديق .
وقرضه مصاص العرديب ح يمص ده و البِهِل ..
رد انت على صلاح عبدالله
و ما تبقي عليك حكاية ( حقيرتي في ود بقيرتي ) ..
و سلام يا مغني يا جميل ..
|
Post: #27
Title: Re: ( تماضر ) في هذا العنوان .. ( تجربة الضوء )
Author: Emad Abdulla
Date: 03-17-2006, 09:56 AM
Parent: #1
الذين طرزوا هذا الوشي لـ ( تماضر ) ..
الذين تتزيا لهم تماضر بتمام ضيها .. و كمال إنسانيتها ..
الذين قالوا لتماضر .. وعنها :
منى خوجلي .. البنت البلور
عصام .. الجميل الجميل
تمبس .. من يهبش ( جوانا ) في حرفنة
خدر .. صاحبي الأندى .. الفنان العادي
هشام آدم .. الأديب
أبوجهينة .. الأقرب للقلب .. السوداني
ثابت .. يا صديقي .. يا زول يا أكبر من الكلام
معتصم الطاهر .. أنيق الحس .. البشبهنا
بدر الدين .. صاحبي في النار
بهنس .. يا أنا
أرباب .. المبدع
فيصل عباس .. يا رقيق حد التبخر
عصام عبدالحفيظ .. يا ذاكرتي
ودرملية .. سيد الكلام و مجنونه
عمر بوب ..أعرفك أكثر .. كل يوم
السني .. يا عالم من الإبداع .. يا صاحبي
الله يجبر خاطركم ..
وسعيدٌ بكلماتكم الطوال .. تُقزمني أكثر و أكثر ..
حد العجز عن أيجاد ما أرد به ..
فقط أرد :
.. أحبكم
لكننا نقول ما نقول في تبيان مناقب هذه الثروة القومية ( تماضر ) ..
و نظل بعد قاصرين مقصرين ..
وهو قدر المبدعين في بلادي ..
أن لا ترقى كلماتنا الإحتفائية بهم إلى مستوى الفعل ..
فنظل ( نحبهم ) سلباً .. فقط بالكلمات ..
و اليد مغلولة من ضيق ذاتها .. و عجزنا أن نرفعهم إلى مصاف يليق .
فالمبدعون هم حملة مشاعل التنوير .. وهم المبشرون بشمس الأمم تشرق ..
لكنها الآلة الظلامية التي تدير شأننا ..
تلك الآلة التي أصدأها الدم والدموع التى أراقت ..
ومازالت تمارس السحل و الدعس و الدهس ..
ومازالت الفنون لديها و الإبداع ضربٌ من ( الفنكهة والكماليات ) ..
إن لجأت إليها ففقط لتزيين صورتها الغول .. و بفعل ( فقه الضرورة ) .
تماضر واحدة من مشاعلنا .. تجاوزت أدوارها خطوط الإبداع الدرامي ، إلى رسالات الهم الإنساني كافة .. فهي تقاتل في معتركات الدفاع عن حقوق المرأة و الطفل .. و تدلف إلى قضايا الوطن رافعة راية فكرها المعافى في وجه جبروت الداء الإنقاذي .. و صدحت بـ ( أنا ) سودانية حيثما كان محفل للإبداع .. و سعت إلى التعريف بالوطن و قضاياه وهمومه ما تأتت لها السانحة ..
وحتى هنا ... في هذا الوطن الإسفيري الأصفر ، حتى هنا تمارس فعلها الإيجاب فينا حين يفلت منا الزمام فنجأر بالسباب و الخصومة الفجة .. تتدخل ( تماضر ) مطبطبة علينا .. مسترضية هذا .. و زاجرة ذاك ، تفعل ذلك في حب و حكمة لا تفارقها حتى حينما تستهدفها تلك السموم في شخصها ..
يا نخلة ..
كل الذين كتبوا أعلاه يجمعون أنك ( وطن ) ..
|
Post: #29
Title: Re: ( تماضر ) في هذا العنوان .. ( تجربة الضوء )
Author: صديق الموج
Date: 04-05-2006, 08:59 AM
Parent: #1
عماد العزيز............. كنت عايز اقول ليك الكلمة الكنت بقولها ليك وكت تعجبنى شديد ولكن قاتل الله قوانين المنبر اذ حالت بينى وبينها ..عموما اول حرف منها كاف...
ولك التحية حتى الاقيك واطلقها فى وشك السنيح داك،،،،،
|
Post: #30
Title: Re: ( تماضر ) في هذا العنوان .. ( تجربة الضوء )
Author: ALGARADABI
Date: 04-05-2006, 11:42 AM
Parent: #1
عفوا للتكرار
|
Post: #31
Title: Re: ( تماضر ) في هذا العنوان .. ( تجربة الضوء )
Author: ALGARADABI
Date: 04-05-2006, 12:06 PM
Parent: #30
الأخ عماد
هاك بى تذكارا شيلا
وشيل معاها الفى عينينا
|
Post: #32
Title: Re: ( تماضر ) في هذا العنوان .. ( تجربة الضوء )
Author: ALGARADABI
Date: 04-05-2006, 12:06 PM
Parent: #30
الأخ عماد
هاك بى تذكارا شيلا
وشيل معاها الفى عينينا
|
Post: #33
Title: Re: ( تماضر ) في هذا العنوان .. ( تجربة الضوء )
Author: Tumadir
Date: 04-05-2006, 01:40 PM
يا ساتر
تماضر تاااااانى؟
ومن منو المرة دى ...
من من تسكرنى حروفه
ياربى انا حاموت بالعظمة ولا بالشكر ده ولا شنو؟؟
"انا زول عادى"
انتو الجميلين
وهذه الكلمات كلها لا تنفع الا لشربات ظللتم تخرجونه من فسيخ شخصى المتواضع
خلونى اتواضع ليكم ..
انتو الجميلين ..انا فقط احاول
لكم محبتى الكبيرة ...وكل قلبى..
"خجلت والله..خجلت"
هذا كثير هذا كثير
"وانا ما ظهرت فى السبعينات لعلمك....هههههههه"
ما عارفة اقول شنو
فشكرا لا تكفى
ولا املك الا شكرا
|
|