البعـرســن مـنــو !!!

ذات مرة سألت احــد العارفين بشعر الحقيبة

عن ســـر جمال ما كتب من شعــر في فترة الحقيبـة

والحــق للة ان اجابتـه قد افزعتـني اول ما سمعتـهـا

ودعتـنـي لاعـادة التفكير مرات ومرات في ذلكـم الكون

المـهيب الذي تتعشـقه بفطـرة غير متكلفـة....

قال مجيبـي ان ذات السـؤال قد ســئل من قبل لاحــد نحـاة

شعــر الحقيبـة وهو من قال:

يشــرق سـناك في غيهــب الليل الحلـوك

اظــرف شمــيل زاملـوك

وهــم اكملــوك

ادبـك هبــة وفيــك موهبــة

وحــســـن الـظباء

وطــبــع المـلـوك


اســتاذنا محـمـد بشـير عتيــق قال مجيبـا على الســؤال

يا ولدى النســوان ديل في زمـنا بدقولم الشلـوفة وبشـلخوهن

وبطـهروهن كمان...اها يا ولدي جنـس البشتـنة دى, أكان ما كتبنا

فيهن كلام متل دا, البعرســن منــــو؟

وتأسيـسـا لما ورد اعــلاه

فـان (صـفـصـافات) جيـلنا الحــديث لم يتعـرضـن

لـما تعرضــت له نســاء تـلكم الفـترة (الحقيبيـة)

المترعــة بجمــال مهيــب, ولكـنهـن ما زلـن يعانين

من (بوار)يسـتدعي حقيبــة اخــري بـلون اخــــر يخرجـنا

من دائـرة ( بختي ان شاء الله راجــل اختي)

امازحــكــــــن

Quote: يا ولدى النســوان ديل في زمـنا بدقولم الشلـوفة وبشـلخوهن وبطـهروهن كمان...اها يا ولدي جنـس البشتـنة دى, أكان ما كتبنا فيهن كلام متل دا, البعرســن منــــو؟

و الله كتر خيرهم ... لانهم حاربوا/قاموا البشتنة بكتابة الشعر و بمقاييس زمن البشتنة لم يقصروا تب ... و طبعا جاء زمن ناس سيداو ... و ختوه قرض مع المبشتنانتية... لمن قالوا آمنا... عن يد وهم ينقنقون تحت تحت.

الاخ برير اسماعيل يوســف

حبابك وشرفت الدار...

وكلامــك سمــح وتب ماني مختلف معاك

لك ودي واحترامي

***********

فيهم الخير والله ... فقد قاموا بدور يحمدوا عليه .... فقد كُن ساعتها لا يُرين وكن خلف الابواب الموصدة وحتى فى الحفلة "اللعبة" كن يجلسن ووجوههن الى الجدار ...


لكن بنات الزمن ده باقى ليك دايرات ليهن إشهار وتهليل وتطبيل ؟؟؟

الاخ الحبيب قـرشــو

امهــاتنـا كتر الف خيـرهم جابولــنا الجمال

واخــواتناهـم الخلــونا نفهـــم الجمال دا

مرورك نور البيت

تســلم يا عزيزي

Quote: وتأسيـسـا لما ورد اعــلاه فـان (صـفـصـافات) جيـلنا الحــديث لم يتعـرضـن لـما تعرضــت له نســاء تـلكم الفـترة (الحقيبيـة) المترعــة بجمــال مهيــب, ولكـنهـن ما زلـن يعانين من (بوار)يسـتدعي حقيبــة اخــري بـلون اخــــر يخرجـنا من دائـرة ( بختي ان شاء الله راجــل اختي)

والحالة انو الدنيا عيد المرأة وكدي...

والله ماقصرت تبّ

لكن...






ميّاها المحرية فيكن


ست البنيـــــــــات

Quote: والحالة انو الدنيا عيد المرأة وكدي...

المراءة دي يا ميادة يا اختي هي مصدر عيدنا الدايم

وربنا يقدرنا نخلي ايامهاكلها اعياد


وحباب طـلّتك

يا جماعة بنتنا ميادة (ست البنيات لي حدهن) بتقول ليكم بالواضح الما فاضح
بدل جنس الكلام البتقولوا فوقو ده ..
دقوا صدوركم عديل كده ..
ولا أنا غلطان ..

يا جماعة بنتنا ميادة (ست البنيات لي حدهن) بتقول ليكم بالواضح الما فاضح
بدل جنس الكلام البتقولوا فوقو ده ..
دقوا صدوركم عديل كده ..
ولا أنا غلطان ..

عبد الباقي حبابك

شكرا لمرورك الجميل

ودمت

ماتشوف الكلام ده حننى كيف؟؟

عشان تشوف المبدع مبدع ولو ختوه فى حر السودان وعنفو داك..

الحقيبة؟ طلعت حناسة ...يعنى دى ثورة ضد العنف صاح؟؟

والله ده شغل متقدم لشكل

لكن عارف المشكلة تبقى شنو؟؟ انهم حببوا للناس الشلوخ "شلاخو حاجز الدمعه دور" ..وافتكروا انه المشلخات احسن...يمكن فى ناس اتشلخوا مخصوص عشان غنية مش برضو وارد؟؟

غايتو احمد المصطفى عملها واضحة غناه كلو "يالسادة يا السادة" الغريبة لما كنت صغيرة قايلاهو بيغنى لى "رجال" مش بيقولو ايها السيدات والسادة؟؟ المهم ده موضوع داير ليه بوست براهو ..

عملنا واحد زى ده زمان اسمو بوست الغلط.. تلقاهو فى الارشيف لو حبيت..

المهم خلينا فى التعذيب الجسدى للمرأة السودانية ده ..والحقيبة المضادة له ..الظهرت الليلة دى ....

قلت لى البعرسن منو؟؟

والطهور ده ما غنوا ليهو ليه؟؟ يعنى كان مضمن فى "الليلة هوى يا ليلة ..ولا شنو؟؟ المهم ما علينا...

قلبت ليك البوست نكد؟؟ معليش مواضيع عذاب المرأة السودانية والجسد تحت المشارط دى ..بتقلق منامى ....

لك من المودة ...نصفها.."والباقى للعالمين"

الاخت تماضر شيخ الدين

حبابك...وكل سنــة وانت وجميع نسـاء بلادي بالف خير

فقط اتمنــي ان لا يفهم مضمــون هذا البوســت بنحــو

غير الذي قصـــدته....


لك خالص الود والاحـترام.

تخريمة خارجة عن القانون ... عفواً خارجة عن المألوف ..
ضمن احتفالات الخرطوم عاصمة للثقافة أقام الملتقى السوداني بالرياض ندوة
عن الأغنية السودانية كان المتحدث الرئيس فيها الأخ الجميل صديق الموج
ورد تعليق طريف للبروف عزالدين عمر موسى .. من أن النساء كن على أيام
الحقيبة يجلسن في الحفلات (وهن مديات الرجال قفاهن) ورغم ذلك يقولون فيهن
هذا الكلام الجميل .. خطر لي لحظتها تعليق من أنهن لو كن مقبلات بوجوههن
ما قالوا فيهن هذا الكلام الجميل .. إلا أن إحدى الحاضرات وكانت تجلس قريباً
مني علقت بهمس قائلة .. يا يابا هوي .. هو برا قفاهن ده المجننهم شنو؟
ضحكت لذكاء التعليق واندهشت للجرأة ..

الاخــت تماضـــر

لك التحــية

كان مـن الاجــدى ان تبتـدري مداخـلتك اعلاه بالقـاء التحـية

لا لشيـئ سـوى انها اول مداخـلة لك معي في هـذه الدار،ثم ان لي

سـؤال لديك اذا اتكرمت بالاجابة عليه اكــون لك من الشــاكرين وهو

ما الذي فهمتيـة من هـذا البوســت وجعلك تاتين بمـا اتيـت؟؟



لا يجمعــنا ســوى الاحترام الذي اتمنــى ان يكــون متبادلا.

الاخ عبد الباقي الجيلـي

لك التحـية ولاســتاذنا الرجــل الجميــل صديق المــوج

ودمت يا عزيزي

فلـيذهب هـذا البـوســت الى درك سفـيل لا يرى

بعده بعين مـجردة





فليـذهب غير مأســـوف علـيه

لاشيــئ يجــمعناهنا بخلق الله ســوى الحتـرام

الخير محمد العوض
(بعد التحية والاحترام)
ماذا حدث؟؟

والله لم اقصد اى سوء.

كل ما فهمته من البوست ان غنا الحقيبة او بعض منه كان المقصود به "ترضية" للنساء بعد ان امارس عليهن كل العادات الضارة..مثل الشلوخ ودق "الشلوفة" والطهور كماذكر هذا الشاعر..واعتبرتها نوع من انواع "الثورة" المضادة للعنف..بالجمال والشعر والابداع ..

وشعرت بقلبى يتمزق من اجل الطرفين: بالطبع النساء اولا وهذا التشوية يمارس تجاههن

والطرف الثانى وهم الرجال الشعراء وهم يحاولون "رأب الصدع" ..بالشعر حتى تجد النساء ..من "يعرسهن"

انا لا ادرى مالذى حملك على الاعتقاد بأننى اقول شيئا منكرا ..او مالذى جعلك تتمنى للبوست ان يسقط..

حقيقة تأخيرى جاء بسبب العمل وايام الاسبوع عادة لا اتابع الا القليل ...ولم اكن قد رأيت سؤالك الذى وجهته لى..

وانا كذلك احترم هذا المكان وأحترم كل من فيه..واود ان يعاملنى الناس بالاحترام..فماذا هناك..؟؟

ارجو الا أكون قد سببت لك كدرا من حيث لا ادرى ...فلم اقصد الا الخير..وقد عبرت عن شعورى ..بحرية وقد كان شعورا نبيلا...ارجو الا يفهم غيره.

شكرا كثيرا ولك ودى والاحترام.

الاخــت تماضـــر

لك التـحـية

عـفـوا اخـتي، ولكنه هذا العـفـار الاسـفيري المغـيت

والذي اخشـى ان يكـون قـد اصـابني بلوثـته فاصـابني

بغـشاوة اصـعبت علي فهم ما رميت له،لك العتبـى حتـى ترضـين

Quote: فلم اقصد الا الخير

وخيـرا جانا وجـاكم

اخـوك الخـير

عفار اسفـير تسـتـصـعب معـه فـرز كـيمـان الجـمـال

مجـوبك لـيلـك المعطـون

بلـون ريحـة دعـاش خـاطـرك

مـخـندق في قوافــي البهـجـة

سـحـنة قـمرا للشـفـع

تتاوق كـلما امـكـن

تـطـارح في وشـيك قـسـمـات

نعـاسـك فيني تـوّر للمغـارب ضــو

اريدك مـنذ ان كنتي غراما

في عيـون والـديـك

مراهـن بـيـك قـوس وكمنجــة متكـية

عـلى سـاحل ضـفـاف حـزني

تـنـقـرش فـيني زي غـنـيـة

تـخربش في فـصـول الضـو بلون شـعـرك

كـلون مــســـــدار

تكلكل في الغباش جــلـدي

تشـرك للغناء المـكتوم

بحـلق الريـح

قصــدتك ما قـصــدت الـضـــو

ندهـتك امرقي مني كان تـرضـي

عـشــان ابهـل قوافيك للشـمـس

بوبـار

واتـاوق فـيـني ما الـقاك

مـخـســمك الشــعـر

بيت بيت

تحـندقي فينـي ضـو شـمعـة

تخـندقـي فيك بلـوني الشـهــد

تـمـرقـي علي من تالاك

عشــان اصـلك

متـكل في دمــوع فرحــي

ومباشــــر بيك







الخير محمد عوض

مارس 1993

المحترم الخير محمد عوض

شكرا لكل هذا الجمال الدافق

ورغم الشلوخ ودق الشفاه فقد صدق شعراء الحقيبة لان نساء بلادى جميلات بحق ..شكلا ومضمونا





يوم خلقوا الجمال ادوهو لى حواتنا

الوجه الصبوح اتميزنبو بناتنا

وكت يكفوا القدور نطلع شبه اماتنا

سمحات بالوراثة الاصل حبوباتنا !!


هكذا اجبت احد الاخوات المصريات التى سألتنى (عندكو فى السودان بنات حلوين )؟!!!

الاخـت نادية عثمـان

حبابك وحبـاب طلتك..

Quote: شكرا لكل هذا الجمال الدافق

كما واشـكر لك طيب هـذه الكـلمات

Quote: يوم خلقوا الجمال ادوهو لى حواتنا الوجه الصبوح اتميزنبو بناتنا وكت يكفوا القدور نطلع شبه اماتنا سمحات بالوراثة الاصل حبوباتنا !!

سـماحـة فايتة الحـد، خلقـة + اخلاق

يحفظك ربي فـي القبل الاربعـة

ومـودتـي

Quote: سـماحـة فايتة الحـد، خلقـة + اخلاق يحفظك ربي فـي القبل الاربعـة ومـودتـي

شكرا على الاطراء الظريف وده من زوقك يازول ياخير ..

كن بالف خير وعافية دوام

Quote: والذي اخشـى ان يكـون قـد اصـابني بلوثـته فاصـابني بغـشاوة اصـعبت علي فهم ما رميت له،لك العتبـى حتـى ترضـين

..
ههههههه..
يا الخير .. ( اب ) بالا طويل .. بلاي تفك اخرك بالسرعة دي ؟؟
دقيقه بس اديني معاك فرصة ..
..
تعرفوا يا الخير وتماضر والاتنين اعزاء علي شغل ( الكمدة بالرمدة ) دا كويس يعني اي سوء فهم إذا اتعالج في مكانوا بشكل واعي بيودي لي حتات كويسه

الخير محمد عوض .. يا تماضر شاب طموح وذكي .. وأخوي ، إبن حارتي ، وزميل دراسة وشاب مثالي يكاد لا يتكلم كتير .. ويجيد فن الاحترام لي نفسو ولي كل الناس الفي الدنيا وجدير هو بالاحترام ..
تماضر يا الخير .. مشروحة في مكانات كتيرة بشكل افضل من الح أقولو
ولذلك
انا ما عارف السبب الخلاني أقول ليكم الكلام دا حسع شنو .. مش مرات الواحد بيقول كلام والسلام ..


يا الخير .. واصل في بوست الحقيبة دا .. وانا بجيب ليك صديق الموج والفورة الف

علاء اخــوي مقنـع الكاشـفات

وفي رواية اخـرى (سـيد شـباب الخـور)

اليك من الود قدر صـعداء ما تنفسـته في ذلك الكورنيـش

بالمناسـبة الصـورة مبروكـة(بس ما تجيب ليها كفوة تاااانى)

(وجه عامل فيها بريئ)...كع كع كع كع كع كع

والله ياتمبس كنت داير اشاغلك بهناك لكن لقيت الحالة صأأأبة فانصرفت

الى شأن اتقرب به لوجـه الله ...ا نفقت اليوم قرابة الساعتين في مكتبتكم

العامرة..فسعدت ايما سعــادة.

تماضـر زولة حـديقة يا تمبـس، انا اسـي زعلان من نفسـي

لكن شهـادة براءتكم الكريمه تنزلت علي نزولا حســنا لا ضيق بعدة

الا ان اري تماضــــر مبتســـمة

اخونا الخير تحياتي ،،،

كونوا يكون عددهن أكثر من الرجال ده دليل على مدى فعاليتهن وكونوا الرجال يكونوا مفلسين ماقادرين على عرسهن ده برضوا دليل على انهن قيمات ، قول اخونا عبدالباقي دقو صدوركم وبعدين المرأة دائماً تحب تتجمل وما يناسب الرجل إذا كان رجل هذا الزمان يحب استايل معين وهي بصفاتها المعطاءه وتجملها البلا حدود لا تجد من يقدر فالمشكلة ليست مشكلتها هي مشكلت جيل اليوم من الجنس الآخر .
وكل عام وانت بالف خير ،،،

دعوتك يا اخونا الخير دعوه جميله وتنويه في غاية الزكاء لك تحياتي ،،،

اختنـا خالــدة البدوي

Quote: اخونا الخير تحياتي ،،، كونوا يكون عددهن أكثر من الرجال ده دليل على مدى فعاليتهن وكونوا الرجال يكونوا مفلسين ماقادرين على عرسهن ده برضوا دليل على انهن قيمات ، قول اخونا عبدالباقي دقو صدوركم وبعدين المرأة دائماً تحب تتجمل وما يناسب الرجل إذا كان رجل هذا الزمان يحب استايل معين وهي بصفاتها المعطاءه وتجملها البلا حدود لا تجد من يقدر فالمشكلة ليست مشكلتها هي مشكلت جيل اليوم من الجنس الآخر . وكل عام وانت بالف خير ،،،

طلت بتسعــد...زمـان ياخالدة ونحن طلبة في الجامعة كان لي صاحبا كدي زول دين

ساااي زولا ذاكر وعابد وبحب الجمال الرسمو اللة في نساء الكون ديل، اها صاحبي

دا مرة ساقو الجمال دا لي بنية كدي سميحة سماح براسها وعدلها قام سألها من اسمها

اها البنية بكل قرضمة (قرضمة البنات السمحات)قالت ليهو داير باسمي شنو؟؟اها صاحبى

اترحمن كدا وحمد الله وقال ليها(سااااااي بس عاجبني).


اها ياخالده انا اسي كلامك دا سااااااي عجبني

اريتك نايرة محل ماتقبلي

وتسلمي

اخـوك الخير

الأخ الخير

لك التحية

تعشمت أن يكون هذا البوست نافذة نرى من خلالها جميل ما كتب من شعر الحقيبة ما سمعنا منه ملحنا وما لم نسمع ولست ادرى غلبت شقوة البورد عليه فاخذ غير منحاه ولكنى ما زلت متعشما ان يعود لمساره الطبيعى ودعنى اقرب الامانى بالعمل وأعمل على ذلك واورد جزئية صغيرة من فلق الصباح والتى تغنى بها الكثيرون :


صبغ الخدين حمره

وبعد ساعه بشوف صفره

الإصفرار ده كتير

أخجلوك يا أمير

وللا نمت نهار

صبح البستان مايل

شجر الرمان شايل

السلاف في الونان

والكنار في حنان

والهَزار في هِزار



طبعا الروعة هنا اجل من ان توصف ولكنها تلقى الضوء على ملكة اولئك الرائعين وكيف كانوا يكتبون على السجية أبدع ما يمكن ان يكتب ...


هنا انادى الرائع ود الباشا عله يأتى ويثرى لنا البوست ويتحفنا بزخيرته التى لا تفنى من ذلك الجمال ..