روبن هود

من زمان

لمن يحكولنا الحكايا..


كان ياما كان
و كان
في قديم العصر
وفي سالف أوان
كان ملك
و كان أمير
و كان وزير
......
......
......
......

و في النهاية
عرس المحظوظ أميرة
أحلى من كل الحسان..
و عاشوا ياما عاشوا
عاشوا
في تبات
عاشوا ف أمان.


كان بتعجبني الحكاية
إلا لاكين
ما بشوف نفسي الأمير
لا ولا اتمنيت أكون
يوم الوزير

كنت عايز لمن أكبر
أبقى روبن هود و بس!
لا بعرس ليو أميرة
لا بعيش آخر الحكاية جوة قصرو
و ينسى أصلو
و ينسى أخوانو المعاو

أمسك النشاب
و اهمبت
و آخر اليوم لمن أرجع
من غنايم اليوم أوزع
أدي جيعان
و أكسي عريان
و اسقي شافع.

و بين قلوب الفقرا أفتح
في إتجاه القلب شارع



مرت الأيام و مرت
هسي بتذكر
و أضحك

كنت غبيان
كنت قايل
طالما الكون فيهو من الخير كفاية
حق و واجب
كل زول ياخد كفاية

هسي شفت الدنيا أقرب
و في النهاية
هسي عارف
إنو لمن بكرة أحكي
لوليداتي الحكايا
بحكي إنو
كان و ياما كان
و كان
كان أمير
و في النهاية عرس المحظوظ أميرة
أحلى من كل الحسان
و عاشوا في القصر الكبير
في تبات
عاشوا ف أمان



محمد

عارف لما يغلبني الكلام
بقوقل الاسامي
ودي الجات في نصيبك


اما دي فاخونا اللبين طعلو روبن هود عربي قح من صعاليك الصحراء

خواض

كلو منك زي الورد