Post: #1
Title: بوست فارغ
Author: حمد فتح الرحمن
Date: 02-28-2006, 00:45 AM
Parent: #0
|
Post: #2
Title: Re: بوست فارغ
Author: waleed500
Date: 02-28-2006, 00:49 AM
Parent: #1
البوست فارغ لكن مليان بوجودك
|
Post: #3
Title: Re: بوست فارغ
Author: حمد فتح الرحمن
Date: 02-28-2006, 01:02 AM
Parent: #1
أُحس بفراغ روحي و قلبي و عقلي
انا الآن صحراء يومي كيوم قيامة ارتد عقلي فطيما و قلبي كالحجارة او اشد قسوة
انه البعد يا وليد قاتل الله غربتنا
|
Post: #4
Title: Re: بوست فارغ
Author: عمر الفاروق
Date: 02-28-2006, 01:35 AM
Parent: #3
و مقدود...
|
Post: #5
Title: Re: بوست فارغ
Author: حمد فتح الرحمن
Date: 02-28-2006, 01:37 AM
Parent: #1
قديما
لم اكن املك قوت ساعة ، كان عطري برائحة عرقي لم أحب إحداهن ، و احببتهن جميعا . لم اتغزل في عينيها يوما ، و رايت حسنهن في شفتيها .
كنت اسعد مني رغم امتلاكي اليوم لقوت عام رغم استخدامي لعطر ( بودي ايف سان لوران ) ، لكني لا احس برائحة جسدي .
اهذا هو الخواء ، ام هو مجرد فقدان لحاسة الشم ؟؟
و عدم الزوق ايضا
|
Post: #6
Title: Re: بوست فارغ
Author: حمد فتح الرحمن
Date: 02-28-2006, 02:10 AM
Parent: #1
عارف يا عمر انا كدا بتسلي اكتر
اخوك بالجد الايام دي فاااااااااااااااااااارغ و مقدود
و طايرة لي
و الله يا عمر انا بداوم من الساعة 8 للساعة 5 و ما عندي في 9 ساعات دي اي شغلة ، و برجع البيت مصاقر ام بي سي تو .
عندي نت مجاني هنا و في مكتب تاني و برضو متوفر لي نت مجاني علي مدار الساعة بعد عودتي من الشغل ، و بعد دا كلو ما لاقي وقت عشان املا فراغي .
و بعدين يا عمر الفاروق و الله انا خليت الشكل مع الكيزان النبز و المشاكل و الضرب و الكسر و شيل السكاكين و العكاكيز و السجاير و الصعود و ال.. و ال.. و الله كل شي خليت اي حاجة من يوم ما جيت البلد دي و مشيت حجيت .
يا عمر الفاروق نحنا كبرنا في العمر ، و هجرنا هوي النفس و ملذاتا . يا عمر الفاروق نحنا بقينا دلوقت بنفتش لينا في قبر يلمنا ما بلدنا ابت تلمنا ، و ما لقينا لينا مرا تلم باقي عمرنا .
يا عمر الفاروق خد دي نصيحة مجانية من اخوك
انت لو زول طارح نفسك صعلوك اول حاجة ما كنت تتزوج الحاجة التانية ما كت تطلع من السودان
لانو الزول المتزوج دا عندو قوارير يتخاف عليها و الصعلقة و قلة الادب مكانا شوارع السودان و زقاقاتو يا عمر انتا غاشي نفسك الانت قاعد تسويهو علي خلق الله هنا دا ما ياهو الصعلقة
الصعلقة يا ود الفاروق ما مكانا في سودانيز اون لاين و لا السعودية الفرحان بيها دي بلد صعلقة
عشان كدا يا عمر الفاروق نحنا زمانا فات و غناينا مات خلي بالك من عيشة وليداتك و داري علي شمعتك تقيد
انت فوت فرصة الصعلقة زمان زمن ما كتا عزابي ، فوتها لما باريت الحناكيش و اتفصلت من الجامعات ما حتقدر تعوض ايام الشباب و صعلقة الشباب هنا في سودانيز اون لاين
عمر في حاجة مهمة انت ناسيها سودانيز اون لاين دا موقع بتاع راجل محترم ، و قدرنا و ادانا باسورد فحقو نحنا نتحترمو و نحترم الشباب القاعدين معانا هنا و اما نبقي رجال قدر المسؤلية و نحترم خلق الله و نقعد هنا بي ادبنا
و لا قول لي انو عندك راي تاني
و بالمناسبة انا ما بعيد منك كلها ساعتين و ربع بكون جمبك في الرياض لما اصلك اصعلق علي زي ما انت عايز
اوكي يا حبيب
|
Post: #7
Title: Re: بوست فارغ
Author: عمر الفاروق
Date: 02-28-2006, 03:05 AM
Parent: #6
لا حولااااااااااااااااااااااااا.. يا فتح الرحمن يا اخوي جيت كتبت ليك طفشطاشر سطر في واحد من بوستاتي وانا ما جيت قلت ليك أييييي شي .. طيب ياخ عشان انا جيتك في بوست حقك وكتبت ليك فرد كلمة تقوم تنفصم فيني كده ؟؟؟؟؟ يعني إنتو عايزين تخشو بوستات الناس وتكتبوا العايزنو لكن هم يقعدو يتلفتو عليكم ..
طبعاً ما عارف فهمك بتاع القوارير ده شنو بالضبط وحا أعمل فيها برضو ما فهمتو وحا أفترض حسن النية في تفكير معين وأتجاوز النقطة دي .. بعدين يا اخوي منو القال ليك انا بتصعلق عليك ؟؟؟؟؟؟؟؟؟ شايفكم الأيام دي الكلمة دي عاجباكم والواحد مشاها ليكم كتير بس عشان حاسي بي غبينتكم تجاهو .. وبعدين شابكني خلق الله .. انا خلق الله مالي بيهو يا زول !!!!!!!!!!!!!!!!!!!!!!! اسة عليك الله النسألك سؤال : زول كتب بوست فارغ وجا زول كتب ليهو بعدو مقدود ..أسة في زمتك الصعلقة هنا وين ؟؟؟ يا ناس إنتو متلقين حجج ساي .. لو عايزين معاي مشاكل كلموني عديل كده بدون المسببات المخجلة دي وشعان الواحد يلقا ليكم العزر ويسوي ليهو كفوة كبيرة لكن تشاكلوني ساي بدون سبب دي ما جايبا حقها وبتكون شينة في حقي..
Quote: و بالمناسبة انا ما بعيد منك كلها ساعتين و ربع بكون جمبك في الرياض لما اصلك اصعلق علي زي ما انت عايز |
ياخ لييي اتصعلق عليك ؟؟؟؟؟؟؟؟؟؟؟؟ تجينا ونشيلك فوق الراس بي فوق ونقوم بي واجب الضيافة معاك نحن اللمن نجيكم هناك إتصعلقوا علينا زي ما عايزين بالرغم من إنو حا تكون المسافة 4 ساعات أصلو بعيد عنك اخوك بيجي بي القطر وعربيتو ما بتسمح بقطع مسافة اكتر من 50 كيلو ..
|
Post: #8
Title: Re: بوست فارغ
Author: حمد فتح الرحمن
Date: 02-28-2006, 03:58 AM
Parent: #7
Quote: يا فتح الرحمن يا اخوي جيت كتبت ليك طفشطاشر سطر في واحد من بوستاتي وانا ما جيت قلت ليك أييييي شي .. طيب ياخ عشان انا جيتك في بوست حقك وكتبت ليك فرد كلمة تقوم تنفصم فيني كده ؟؟؟؟؟ يعني إنتو عايزين تخشو بوستات الناس وتكتبوا العايزنو لكن هم يقعدو يتلفتو عليكم .. |
عمر الفاروق يا اخوي
صراحة انا ما اتذكر اتداخلت معاك وين ( ما العقل بي فارغ ) ، لكن و حتي لو اتداخلت معاك اكيد اما حاقول خير او حاسكت ، و دا ما لي شي بس لانو بيني و بينك ما كان في شي يدعو لقول الفارغة .
Quote: طبعاً ما عارف فهمك بتاع القوارير ده شنو بالضبط وحا أعمل فيها برضو ما فهمتو وحا أفترض حسن النية في تفكير معين وأتجاوز النقطة دي .. |
بالتاكيد حسن النية متوفر .
Quote: زول كتب بوست فارغ وجا زول كتب ليهو بعدو مقدود ..أسة في زمتك الصعلقة هنا وين ؟؟؟ يا ناس إنتو متلقين حجج ساي .. |
في الحتة دي ممكن تقول دي خرمة صعلقة ساي زي ما اخوك وحاتك خرمان للسجاير و الصعوط بقا لي 3 سنوات و ما قادر ارجع ليهم .
Quote: تجينا ونشيلك فوق الراس بي فوق ونقوم بي واجب الضيافة معاك |
تسلم يا حبيب ، و لحدي هنا انا بعتبر ردك دا اظهار لحسن نيتك ، و ان شاء الله لي قدام البيني و بينك و بين الناس دي كلها يعمر اكتر .
|
Post: #9
Title: Re: بوست فارغ
Author: حمد فتح الرحمن
Date: 02-28-2006, 06:13 AM
Parent: #1
كلام افرغ من البوست
ليه ؟ دايما سخلاتي شتر جِدادي كُتر حماري كُدر و كل ما اعاين القمرا الاقيها طالعة بي القلبا و من الفانية ما شفتا غير ضنبا
كل ما ادخل الحلة يصب جم بيتنا صوت مطرة بترجع تاني تتبخر و يرجع ليلنا يتعكر و يطلع لي جريوا سنونو صفر عيونو حمر قلبو اسود كلو حجر شكلو كُتر
و كل ما ادخل البيت يجيني الليل معكر و كلو سهر سهرو كتر ليلا ما فيهو صوت لي مرا ليلا شبهو ليل حمار و ضكر مربوطلو في برود غير حبال نوريقو مالو مفر
|
Post: #12
Title: Re: بوست فارغ
Author: Eng. Mohammed al sayed
Date: 02-28-2006, 08:31 AM
Parent: #9
حمد .. آآآآ خوي تحياتي وتجلاتي ومساك الخير وليل صافي
وبيتك اريتو يايابا بعد عرسك نزورو معانا درابه
بناتك تلاتة في غرفة ورابعة مع ام العيال دابه
وليداتك تماينه ملوهو عليك .. فراغك كان تقر عينيك
وناس الحلة وبليداتك يخافو عديل جريواتك عشان انت يالاحمد أسد ..ذاااتك
تعاين جوة عين الشمس ذاتا والدنيا البتتبدل اكان مقلوبة تستعدل
وماتسأل ولا هماك حماري جدادي والسخلة عرفناك بتملي الفارغة .. وتسد ثغرة.
|
Post: #19
Title: Re: بوست فارغ
Author: حمد فتح الرحمن
Date: 03-01-2006, 01:12 AM
Parent: #12
عارف يا بشمهندس
غنم حلتنا اشطر ناس يجغمو الحصة دون كراس كريت التالتة و الكوكي التانية و الزرقا ديما الاولي من مرحلة الاساس و من عتبة ديار اغنامنا ملايات كيف سراير كيف و في العصرية جبنة و كيف علم تهذيب و اول من يجوك في الحارة وقت الضيق
اما تيوس حلتنا اغرب ناس دقنون و طويلة طولة البال يومم كلو حايميين من مراح لي مراح بدون سروال و ما بفرزو دا حوض ملوخية دا حوض برسيم دا حوض ايتام دا حوض عزبا ما بعرفو انو حق الناس بكون كناس بعرفو الدقن لازم تطول و بعرفو الكرش لازم تمهل و تستوعب بلد بحالا من الساس لحدي الراس
|
Post: #10
Title: Re: بوست فارغ
Author: DKEEN
Date: 02-28-2006, 07:55 AM
Parent: #1
Quote: قديما
لم اكن املك قوت ساعة ، كان عطري برائحة عرقي لم أحب إحداهن ، و احببتهن جميعا . لم اتغزل في عينيها يوما ، و رايت حسنهن في شفتيها . |
عايز تقنمعني انو حالة الانسان الاول الانتا كنتا فيها زمان ديك احسن من هسع ؟؟ صحي ما شبه نعمة ...
يقول العارف باحوال الزمان القديم فيما يقول : (قديما .. كان يمشي عاري الصدر وبلا قميص من ديوم بحري لحدي البركس .. يمشي هكذا حافي الصدر وريحتو طاقة .. يفتعل شجارا مع صديقه في منتصف كوبري الحديد بتاع بحري .. العسكري الثابت عن نهايات كباري ذلك الزمان يساله : يازول انتا سكران؟؟ يجيب ناظرا للنيل : بتسال مالك ..انا سالتك انتا سكران قبل كده ؟؟ قديما كان مبهدلا بجامعة غير مبدهلة .. بائسا باصدقاء بائسون بعيون ٍ زائغات وستات شاي .. قديما اصدقائه بالكاد تفرزهم من حجارة الارض .. مفلسون مفلسين لولاء ان الارض لا تسف السعوط لحسبتهم حجارة وارضا.. حين رضى الله عنه ويديهو عربية كامري كرت ووظيفة سمحة وهدوم نضيفة بالحلال .. وعيون سمحة راجياهو في بلادٍ عصية .. يفرد بوستا فارغا و.يجي يقول ليك : يومي كقيامة و دنيتي كصحراء..) (انتهت) ياخ صحي انتو النعمة لا تطمر فيكم ...
دمتا رايق بيومك القامة ..
وبعدين ما تنسى تمرنا انا زول نوم ..
|
Post: #21
Title: Re: بوست فارغ
Author: حمد فتح الرحمن
Date: 03-01-2006, 02:14 AM
Parent: #10
و قديما جدا
كان يرعي غنيمايات ابيه كان يرد خور البربخ مع كلابه و اغنامه يشرب مما شربو هم ياكلون خشاش الارض و ياكل عوالق التمر وما جاد به الشرك من القمري و الكُكرج
كانو صبية كالتراب او اشد ترابة يتبخرون بدخان طور الحمير من النمنته و يسبحون في النهر و الفضاء
لم يكن احدنا قد عرف ماذا تعني كلمة ( انا زهجان ) لم تكن قد ادرجت في قاموس العربية وقتها و لا يذكر ان جدتة قد رطنت بها يوما
دكين يا عزيزي ليس تبطرا ولا جحودا بما نعم الخالق له الحمد و الثناء عندما لم املك قوت يومي وحاتك بنوم مع ختته راسي اليوم املك قوت عام و عشان ما انوم لازم احنسو ساعة بعدين يجي و لا يدلع علينا و يقول لي انتظر شويه ياخ بجيك بكرة
و قد لا ياتي
آبدول الفرق في راحة البال
دم رائق و مرتاح البال يا صديقي
|
Post: #11
Title: Re: بوست فارغ
Author: ودقاسم
Date: 02-28-2006, 08:16 AM
Parent: #1
حمد دكين مبدعون أنتم في حزنكم وفي فرحكم ... أتابعكم ، وأنا اقترب من ذكرياتي ، ثم ألوي بعيدا عنها إلى النعمة التي يفترضها دكين ... لكم التحية والتقدير ...
|
Post: #15
Title: Re: بوست فارغ
Author: حمد فتح الرحمن
Date: 03-01-2006, 00:29 AM
Parent: #11
الخال العزيز
تحياتي
يسعدنا مرورك و تذكرك معنا لاياما لا تنسي
|
Post: #13
Title: Re: بوست فارغ
Author: قرشـــو
Date: 02-28-2006, 08:41 AM
Parent: #1
الفارغ نملاه بالمليان
المصافي الإيمانية للذنوب طباعة
من منطلق قوله : (كل بني آدم خطاء وخير الخطائين التوابون)، وفي ضوء قوله : ( إن الله يبسط يده بالليل ليتوب مسيء النهار، ويبسط يده بالنهار ليتوب مسيء الليل حتى تطلع الشمس من مغربها ) تتجه العقول، وتهفو القلوب والنفوس، لمعرفة مسالك هذه التوبة ومتطلباتها، ولإدراك سبلها ووسائلها.
وكلما كانت مخاطر الانزلاق والانحراف كبيرة وكثيرة، وجب أن يكون اندفاع المؤمن قوياً في اتجاه البحث والتنقيب عن أسباب الوقاية والتحصن، وعوامل التطهر والتنظف؛ لضمان تزكية النفس وتصفيتها، ورجاء تخلصها من أوزارها وذنوبها.
ضرورة ووجوب التصفية
في هذه الحمأة من الفعل وردته، والذنب وتوبته، تتجلى لنا وتتكشف أبعاد اللطف الإلهي، والمدد الرباني، للعبد المؤمن، حيث لا يدعه يتخبط وحيداً، وقد استحب الخير واختار الهدى، وإنما يهيئ له معارج للتزكية والتصفية، تتحات من خلالها أوزاره وذنوبه كما تتحات أوراق الشجر، بل ويبدل الله سيئاته حسنات مصداقاً لقوله تعالى: {إلا من تاب وآمن وعمل عملا صالحا فأولئك يبدل الله سيئاتهم حسنات وكان الله غفورا رحيما} [ الفرقان:70 ] .
أولاً: المصافي العبادية
1- المصافي اليومية
من خلال الصلوات الخمس، فرائض وسنناً ونوافل، بما من شأنه إزالة آثار ما يمكن أن يقع فيه الإنسان من ذنوب وخطايا في اليوم والليلة، حيث جاءت اللفتة النبوية إليها واضحة جلية في قوله : ( مثل الصلوات الخمس كمثل نهر عذب بباب أحدكم، يغتسل فيه كل يوم خمس مرات، فما ترون ذلك يبقي من درنه؟ ) قالوا: لا شيء. قال : ( فإن الصلوات الخمس تذهب الذنوب كما يذهب الماء الدرن ) [ أخرجه مسلم ] .. وفي إشارة أخرى يقول رسول الله : ( إن الصلوات كفارة لما بينهن ما اجتنبت الكبائر ) ، [ أخرجه مسلم ] .
2- المصافي الأسبوعية
فإن لم تكف المصافي اليومية في محو الأوزار والذنوب، ردفتها المصافي الأسبوعية المتمثلة: بيوم الجمعة اغتسالاً وتطهراً وخطبة وصلاة، وما يكتنزه هذا اليوم المبارك من خير عميم.. وحسبنا في هذا المقام قول الرسول : ( إن لله عز وجل في كل جمعة ستمائة ألف عتيق من النار ) [ رواه ابن عدي وابن حبان ] ، وكذلك قوله : ( إذا سلمت الجمعة سلمت الأيام ) (رواه البيهقي وابن حبان وأبونعيم..)، وكذلك في فضل صيام يومي الاثنين والخميس.
3- المصافي الموسمية
وتأتي هذه المصافي لتكمل ما عجزت عنه غيرها وما تراكم من ذنوب وخطايا، كصيام شهر رمضان بدليل قوله : (من صام رمضان إيماناً واحتساباً غفر له ما تقدم من ذنبه ) ، وستة أيام من شوال وبركات العشر الأوائل من ذي الحجة التي جاء فيها قوله : ( ما من أيام، العمل الصالح فيها أحب إلى الله من هذه الأيام ) وصوم يوم عرفة الذي قال فيه رسول الله : ( يكفر السنة الماضية والباقية ).
4- مصفاة العمر
المتمثلة بفريضة الحج وما تذخر به من مناسك وأعمال خير وبر، اختصرها رسول الله بقوله: ( من حج فلم يرفث ولم يفسق رجع كيوم ولدته أمه ) [ متفق عليه ].. وقوله: ( العمرة إلى العمرة كفارة لما بينهما، والحج المبرور ليس له جزاء إلا الجنة ) [ متفق عليه ] .
ثانياً: المصافي الدعوية
ففي المصافي الدعوية قوله : ( لئن يهدي الله بك رجلاً واحداً خير لك من الدنيا وما فيها ) وفي رواية : ( خير من حمر النعم ) .
ثالثاً: المصافي الخيرية
كقضاء حاجات الناس، ورفع الظلم عنهم، وتيسير عسرهم، وتفريج كربهم والتخفيف عنهم، والمطالبة بحقوقهم، وكفالة أيتامهم، ورعاية أراملهم، وإيواء مشرديهم، بدليل قوله : ( من نفس عن مؤمن كربة من كرب الدنيا نفس الله عنه كرب يوم القيامة ) ،وقوله: ( الساعي على الأرملة والمسكين، كالمجاهد في سبيل الله، وكالقائم الليل الصائم النهار ).
رابعاً: المصافي الابتلائية
وقد تكون مصافي الذنوب وكفارات الخطايا من طريق الابتلاء، وقد ورد في ذلك العديد من الآيات القرآنية والأحاديث النبوية منها قوله : ( إن الله تعالى إذا أحب قوماً ابتلاهم، فمن رضي فله الرضا، ومن سخط فله السخط ) وقوله: ( ما يصيب المسلم من نصب ولا وصب ولا هم ولا حزن، حتى الشوكة يشاكها إلا كفر الله بها من خطاياه ) ، وقوله: ( عجباً لأمر المؤمن، إن أمره كله له خير، إن أصابته سراء شكر فكان خيراً له، وإن أصابته ضراء صبر فكان خيراً له، وليس ذلك لأحد إلا المؤمن ) .
فنسأل الله تعالى أن يوفقنا جميعاً للإفادة من هذه المصافي الإيمانية، ويجعلها كفارات لذنوبنا، وأن لا يقبضنا إليه إلا وهو راضٍ عنا، وصلى الله على سيدنا محمد وعلى آله وصحبه وسلم.
الشيخ فتحى يكن
|
Post: #14
Title: Re: بوست فارغ
Author: Tragie Mustafa
Date: 02-28-2006, 09:27 AM
Parent: #13
الاخ حمد فتح الرحمن
سلام
ورغم انه بوستات ناس السعوديه بحاول اتجنب دخولها
لكن قلت اغامر ومعلوم (انه لايضير الشاة سلخها بعد ذبحها)
فلن تسمعني اكثر مما فعل بعض المقيمين معك في تلك البلاد.
اشفقت عليك اخي من الغربه
واشفقت عليك من هذا الخواء.
وعزائي لك انه (الموت مع الجماعه عرس)
ونحن بقينه (جماعه) كبيره من السودانين كتب علينا هذا العذاب.
بعضنا في الداخل يعتقدوننا في نعيم
ولمن هو مثلي اكبر عذاب ان تبعد عن بلدك
نحن هنا كالاسماك خارج الماء لانجيد التنفس
غربتنا اكبر من غربتكم
غربة طقس
غربة لسان
غربة عادات
وغربة نظام
ليس معنى ذلك نحن الافضل او هم الاسؤ فقط معناه اننا لسنا من هنا
واسؤ غربه غربتك مع وليداتك وكل يوم وانت بتشوفهم ما بشبهوك
ولا بشبهوا اهلك!!!!!
ولما دخلت موقع ذي ده قلت خلاص لقيت اهلي وحاتكلم سوداني
واضحك سوداني واكاوي بالسوداني ويكاوني بالسوداني
ولكني قد اغادر قريبا واترك على بابكم حضرنا ولم نجدكم!!!
لانه حقيقي افضل ان نغادر طالما احساسنا بالغربه ازداد هنا
الست معي؟؟؟؟؟؟؟؟
لا تغلب نفسك باجابات هي فقط هترشه صباحيه
احببت ان اتداخل معك وربما لاول مره وربما لا ,اختك ذاكرتها صارت خربه جدا.
لاتحزن
لاتقلق
في عمر لابد من الزواج
اتمنى ان تجد شريكة حياتك بسرعه ولا تدع الزمن يمضي اكثر مما مضى.
وان شاء الله نفتح البورد ده ونشوف وليداتك في روضة تبلدينا.
لك الود.
تراجي.
|
Post: #17
Title: Re: بوست فارغ
Author: حمد فتح الرحمن
Date: 03-01-2006, 00:51 AM
Parent: #14
السيدة تراجي
كيف اسمعك ما لا تشتهين و انت اختنا في الوطن و شقيقتنا في الغربة و الهم
يا ست تراجي انت انسانة مرحب بيك في اي وقت و تدخلي و تطلعي من بوستات ناس السعودية متي ما اردت ، الناس ديل يا عزيزتي ما عندهم معاك قصد خاص
دا ما ياهو شكل الاخوان
تسلمي يا عزيزتي
|
Post: #16
Title: Re: بوست فارغ
Author: حمد فتح الرحمن
Date: 03-01-2006, 00:38 AM
Parent: #13
مولانا قرشو جزاك الله عنا و عن امة الاسلام خير الجزاء
|
Post: #18
Title: Re: بوست فارغ
Author: bayan
Date: 03-01-2006, 00:55 AM
Parent: #16
في يوم ما كات ب يحبها كثيرا.. كانت حلمه الجميل كان يظن انه خلق ليحبها
خستكت معه وتزوجت شخصا بالكاد يمكننا ان نصفه اشعث اغبر.. بكي كثيرا..
ثم حاول ان يكتب فيها قصيدة يهجوها فيها.ز بدل تلك المطولات التى كان يبثها حبه فيها ويصف موقعها من ذاته المحبة...
بدا القصيدة..
بكرة تموتي تشبعي موت وجسمك العاجبك ياكلو الدود
وداهمته موجة نخجي ومخاخيط. هيهات هيهات ان يكتب ليها ما يسيئها فان حبه لها لن يموت ويلحق أمات طه ابدا.. انتهت القصة. مع الاحتفاظ بحقي في السؤال انت امات طه ديل شنن؟
زهجان يا حمد؟
كلنا بس فايتنك بالصبر كلها سنتين وتلحق امات طه..
القصيدة دي زمان قريتها في مجلة الاذاعة والتلفزوين.. ولم يعلق في ذهني الزهايمري الا هذا البيت.. قلت نفك ليك زهجتك ونضحكك حبة.. اضحك الصورة تطلع حلوة..
|
Post: #22
Title: Re: بوست فارغ
Author: حمد فتح الرحمن
Date: 03-01-2006, 04:10 AM
Parent: #18
السيدة بيان تحياتي
زمان كان في اتفاق ضمني بين ابو عركي و الطلبة انو اخر الحفلة يغني ليهم اضحكي
مع انو مطلع الاغنية بقول ضحكك شرح قلب السما و نهاية الاغنية بتقول اضحكي بتضحك الدنيا و تفيض
شي يدعو للرومانسية و الفرح و الامل و الحب ، الا انو الطلبة لم يكن يرضون وقتها بالحب و الرمانسية و جلب ضحكات المحبوبة و الكهارب قاطعة و شوارع البلد نايمة .
كان ابو عركي يقول تضحك الدنيا و تفيض من هنا ، الطلبة يمشو يقفلو شارع الجامعة من هنا ، و يبدو الدواس و البمبان مع الاحتياطي من الساعة 11 لحدي الفجر .
يا دكتورة الضحك عايز ارض ينزرع و يقوم فيها ، و نحنا ارضا بقت ( جلباغ ) و ما اظن نقدر نزرع ورد و ضحك فيها قريب ، لسع عايزين وكت نقلع العُشر و نحرقو اول بعدين نزرع واطاتنا .
|
Post: #20
Title: Re: بوست فارغ
Author: حمزاوي
Date: 03-01-2006, 01:47 AM
Parent: #1
حليل الشرقية وحليل ناسا حلوين لذاذ معاهم دكين الفقري من اشعار دكين ايام الجامعة جيتك جيتك ومالقيتك لقيت اختك جنب الحيطة وحالن حالن حبيتها خدها احمر ذي الطوبة وانا لابس فانيلة كت شعر مسبسب ومسرحة بدهان فازلين وختيت فوقو كيس الطحين امشي واجي تاني عشان القى اخوك قالت ليه بس ودم ناس لصقه ما فهم الكلام ما رطاني ولسانه اغلف قالت سجمي سجمي دا شنو الدنقلاوي اللصقه دا قام صاحبنا فهم انه جكس وبكره من بدري ساق معاه واحد محسي الحرف الاول من اسمه بدري قال انا من دلقو وبعرف اجكس صح كنت بقيف قدام مدرسة البنات واستاذ مركز ناقش الفلم ركب العجلة قام صداري وين ماشي وين ماشي انا جاي حمد اخوي يا قريبي دكين الفقري دا ابعد منه انت ولد استاذ تربية صح حيعلمك الصعوط وشراب الموية كمان وكمان وكمان وكمان في الحلة دي انا ما بجي الشمار كتير انا ما بجي نطيط : أديتو مقدودة أداني فارغة
|
Post: #23
Title: Re: بوست فارغ
Author: حمد فتح الرحمن
Date: 03-01-2006, 04:22 AM
Parent: #1
حمزاوي التلب
في غنية بتاعة سمعتها من صديق احمد بتقول ليك
ود السيد عمي التلب يا حليلم حليل الفارقتهم المعز اوعا من الدرب يا حليلم حليل الفارقتهم و في العقاب خليك منكرب
لما اسمع الغنية دي كتا بتذكر ناس ابوي و اعمامي ، هسع بقيت لما اشوفك بتذكر الغنية دي .
همزاوي بنتين جوريد اقتقر مي ار انبلدر نقل مي
|
Post: #24
Title: Re: بوست فارغ
Author: حمد فتح الرحمن
Date: 03-01-2006, 04:51 AM
Parent: #1
تعرف يا دكين لما نجي اول السنة انا دهنون ، مجيب ، ابو السيد ، ياسر بكون كل واحد في جيبو مصاريف شهر شهرين – عدا الدهنون فهو لم ياتي بداية عام دراسي و في حوزتة قرش احمر - بنقوم نجمعا في ايد واحد مننا و غالبا ابو السيد و هو دايما بكون صاحب الشير الاكبر . كنا بنصرف سوا و ننوم سوا نسف مع بعض و حبة السيجارة بخمسوها اربعة و احيانا اكثر حسب ( المتواجدون الان ) ، كنا بنجوع سوا و نغني مع بوادر الامداد من والد ابو السيد ، و نفلس بمباراة نزوات الدهنون اللانهايئية ، و الله كل ما يجي صقر يحجب الشمس ، و يحس ليهو بي اتر غيمة يقول ليك اسمع : جو معصية موش ؟؟؟ قاتله الله ، تقول ولدوهو في بيت معصية . طوال اربع سنوات يا عبد العزيز لم نفترق للحظة ، حتي اجازاتنا احيانا بنقضيها مع بعض ، و لم نختلف ابدا الا كما يختلف اشقي الاشقاء .
كنا لما نفلس نبدا نبيع في هدومنا قطعة قطعة فهي ما جل ملكت ايماننا او لما تجي مواعيد الامتحانات نكون وصلنا لاخر حبة و دي ماف طريقة تبيعا ، بعد كدا بتكون ميط مولاي كما اوجدتني اخر حاجة تتباع شنطة الهدوم زاتا عشان لما ترجع البيت تقول ليهم شنطتي سرقوها بي حالا تقول حرامي السجم و الرماد ما عندو غير شلتنا دي .
عارف يا حبيب الواحد بعد ما يبيع اخر ما يملك و يجي راجع الجامعة كان بحس انو ملك الدنيا و ما فيها مع انو ساعتا ما ملك غير تمن شنطتو الاتباعات في سوق ستة .
|
Post: #25
Title: Re: بوست فارغ
Author: Badri
Date: 03-01-2006, 10:08 AM
Parent: #1
Quote: قام صاحبنا فهم انه جكس وبكره من بدري ساق معاه واحد محسي الحرف الاول من اسمه بدري قال انا من دلقو وبعرف اجكس صح كنت بقيف قدام مدرسة البنات |
يا حمزاوي سلامات والله يا حمزاوي فكي بس أمبارح القريبة دي كان في مشروع برنامج ذي دا لكن قريبك ياحمزاوي ود بندر ومدن ومباراة دكين من المعاصي السبعة. تسلم يا غالي.
حمد يا ابن عمي
طيب بدل ما تسك الفاغة المقدودة دي ما تجي تشيل معانا العفش
بجيك راجع بعد ما أخلص من برنامج الرحول دا.
|
Post: #26
Title: Re: بوست فارغ
Author: حمد فتح الرحمن
Date: 03-01-2006, 02:52 PM
Parent: #25
Quote: طيب بدل ما تسك الفاغة المقدودة دي ما تجي تشيل معانا العفش |
و رحولكم دا يتسمي رحول ؟؟؟
اول حاجة ما عندكم جكس نجي نتفرج عليهو و نحنا بنرحلكم تاني حاجة عندكم مكيف و تلاجة و 3 سراير و طربيزتين ، ما قادر تشيلم براك يا الحنيكيش ؟
اسمع خلينا في الفارغة و المقدودة دي ، و يوم يكون عندكم قراصة تركين قول لينا عوك
بنجي نسترا ليك انا و اخوي الكاشف قبل ما يرجعوهو الرياض
|
Post: #27
Title: Re: بوست فارغ
Author: DKEEN
Date: 03-02-2006, 04:26 AM
Parent: #1
حمد اخوي
يوم الجمعة العشا عند ناس بدري ..
تركين ..فول ..بطيخ ..المهم عند ناس بدري..
(انتهى الكلام)
نجي راجعين من الجبيل باذن الله توووووووش على بيت الجماعة ديل..
ياخ (جدو) المعفن قريبك ده رمى لي كيس الصعوط قدام الشالية جاني المدير تاني يوم الشاليه زيارة رسمية ولقى الكيس قدام الباب قال لي : وش هذا ؟؟ شمة؟؟
قتا ليهو : لا ..مايهمك دي حنة ...
|
Post: #28
Title: Re: بوست فارغ
Author: Badri
Date: 03-02-2006, 05:17 AM
Parent: #1
Quote: نجي راجعين من الجبيل باذن الله توووووووش على بيت الجماعة ديل.. |
هياااااااااااا دا والله اليشوفك بتقول راجعين من الجبيل وبثقة كدا يقول الأخ رئيس جمعية القانونيين بالمنطقة الشرقية ... أسمع يا خينا بالواضح كدا أنا عائلياً أتبع للرابطة دي عشان كدا ماشي لكن شغل التلصق والفارغة بتاعتكم انتا وحمد دي ما بتنفع معاي لو جيتوا بحرجكم وأحرج زولك العازمك زاتو معاك ... هو زولك العازمك زاتو ضهب لما تجي انتا تتضهب معاهو وانتا كمان تجيب حمد يضهب معاك؟؟ يعني حمد دا لو سألوا انتا الجايبك شنو يقول انا جايي مع الضهب دا يعني العملية كلها تطلع ضهب في ضهب؟ شوفي يا جماعة نحنا أولاد مستشارين ( عوايل وعندنا فوايل ) شغل التلصق دا ما بنفع معانا ودا انذار أخير.
حمد والله صحي مستجد النعمة كافر ... جاييي تعايرني بتلاجتي الواحدة دي نسيت لما كنتا بتشرب مع الكلب في حفرة واحدة؟؟ الله يرحم ايام زمان ... لكن ما طار طائر وارتفع الا كما طار هردروب.
وبجيك راجع بعد ما أخلص الرحيل ... ان شاء الله تركينا الأكلتوا يعمل ليكم ايدز.
|
Post: #30
Title: Re: بوست فارغ
Author: DKEEN
Date: 03-02-2006, 07:18 AM
Parent: #28
بدري ود العوائل .. ياخوي انا جاي بي حقي ..انا عندي بطاقة مكتوب عليها يمسح له بدخول جميع المرافق العامة والخاصة .. يعني موش اخش قعدة بتاعة مستشاريين فقط ..انا ياحبيب اخش بيتكم ذاتو بي بطاقتي دي .. ابوك زول لوائح ونظم وعارف مضامين الدستور بشان الاساتذة المحامون الاجلاء الزينا ديل .. موش كده وبس انا اتونس مع الحاج ونسة فقهاء قانون وارسلك تجيب لي الابريق اتوضا..بموجب احكام مواد قانوينة ملزمة ..
ان جيت للجد مفترض نصاحب الوالد موش نصابحك انتا .. وحمد ياحبيب دنقلاوي ..يعني ما محتاج بطاقة عشان يمارس اي شي.. دنقلاوي يعني انتهى الكلام.. سيد بلد جوه البلد وبره البلد.. في المحافل العامة والمرافق الخاصة ..
نحنا يا رعديد نشرفك ونشرف قبيلة مكونة من 65858758498691 زيك..
بعدين الله بسالك جكس المستشارين الشديد داك ليهو منو غيرنا انا وحمد؟؟
|
Post: #36
Title: Re: بوست فارغ
Author: حمد فتح الرحمن
Date: 03-04-2006, 05:27 AM
Parent: #28
هو قالوك كدا
ود العوايل الحنكوش بدري الود الصغمبتوتي ، حلاتي يا ناس الله ، رعي البهايم و امتتطاء الحمير و مخاواة الجراء ليس عيبا يا بني العيب هو التنكر لماضيك ، و طفولتك و اعتبارها نقطة سوداء ، و محاولة الظهور بمظهر العاصمي المرتاح التفتيحة ود المدن .
بعدين يا بدوري شرب الموية مع الكلاب دا كان نوع من الذكاء الطفولي حينها لييييييييييه ؟ لاننا كنا مقتنعين انو ما دام صغار الضفادع لا تزال تمرح و تسبح داخل الخور و هي حية لم تموت ، و مادام الكلاب و الاغنام التي وردت الخور قبلنا لم حية لم تموت ايضا فذلك يعني ان ماء الخور طيب و غير اسن فهو اضمن ماء نشربه لنظل احياء .
ناس زمان يا بدري قالو بّيض النية و ارقد حداها و عشان نيتك السودا قعدتكم طلعت عزابة صر ، و انحنا قريناها قبل ما نجيكم و عرفناها ضاربة و شختنا ليكم .
|
Post: #29
Title: Re: بوست فارغ
Author: تيسير عووضة
Date: 03-02-2006, 05:56 AM
Parent: #1
يا حمد ..
حالتو دا بوست فارغ .. طيب المليان يكون كيف ؟
بنوقيدتاري
|
Post: #31
Title: Re: بوست فارغ
Author: نادية عثمان
Date: 03-02-2006, 10:13 AM
Parent: #29
الفراغ اتملأ حب ياحمد اها قصروا معاك الناس ؟!!
|
Post: #33
Title: Re: بوست فارغ
Author: حمد فتح الرحمن
Date: 03-02-2006, 03:19 PM
Parent: #31
Quote: الفراغ اتملأ حب ياحمد اها قصروا معاك الناس ؟!! |
شكرا لوجودك في فراغنا يا ستنا و يا بتنا ، عارفة يا نادية لولا وجود هؤلاء الاعزاء قريبا مني لكنت ( فقدتُ المنطق عديل )
لك تحياتنا و تقديرنا
|
Post: #32
Title: Re: بوست فارغ
Author: حمد فتح الرحمن
Date: 03-02-2006, 03:10 PM
Parent: #29
تيسير
امسونمبرو هالمندي
يا خي انتي وجودك مع المتواجدون الان بس بملي عشرة بوستات
اها لما تجيني داخلة هنا البوست دا بقوم يملي و يدفق بي غادي ، و قاعدة تعملي فيضان عندنا و في بوستات الجيران.
نورتي بيتنا و شارع بيتنا
|
Post: #34
Title: Re: بوست فارغ
Author: خالد عويس
Date: 03-03-2006, 03:06 PM
Parent: #32
عزيزي حمد أفكر كثيرا هذه الأيام في تلك الأيام التي تسربت بين أيدينا، حين كنا "هناك". القولد بـ"رحابتها" المغرية. في الصباح، حين نتسكع في "السوق" بين "دكان الرشيد" و"سفاهة" كرزون وابنته الحسناء التي يروق للكثيرين أن يجروا اتصالات هاتفية من عندها بلا سبب،إلا الجمال "القبطي" الذي يرقد على وجنتيها. المساءات التي تنشر غلالة من الغموض، خصوصا حين الغسق بحمرته وسحاباته الخفيفة أحيانا، قبل أن تهب نسمات شمالية باردة، تخفف من وطأة النهارات القائظة. تلك الأيام التي يشتهيها المرء الآن. بساطة المكان والناس. والفضاءات اللامحدودة. كم كان رائعا هدير ماكينات البصات وهي قادمة من الخرطوم أول الليل، وذهابها في الفجر. أصوات ماكينات الزراعة الضخمة "وابورات المشروع". هل حضرت اجتماعا للمشروع يوما ما ؟ كرة القدم المحلية، والجدالات التي ينفق فيها الشباب ساعات النهار بطولها، لا يقطعها إلا ذهابهم جميعا لتناول الفول الساخن لدى فلانة وعلانة. الفول ذاته يضحي متعة إذا ما أعدته فلانة تلك، الصبية "أصبحت سيدة لكنها ما تزال بنظر الغالبية صبية" الفاتنة التي سرقت قلوب العشرات، بسحرها وجمالها. تعرفها دون شك. "الدلوكة" حين تفرغ فيها "كلتوم" أو "خادم الله" أو "خضم الله" كما ينطقونها هناك، حشاشتها، ويحمحم فلان وعلان على وقعها. فلان ذاك "أمانة ما عرّاض"، وعلان هذا في صباه "ما كان في واحد بيقيف لي سوطو". هل نحن جيل محظوظ يا حمد، أم جيل سيء الحظ ؟ ارتعاشات القلوب الغضة لفلانة وعلانة، أجمل الفتيات في المنطقة. مسكينة فلانة، تزوجت، وصارت سيدة مترهلة تجر خلفها ثلاثة أو أربعة أطفال، مملوءة مناخيرهم بـ"المخاخيط". أزمان قبلها، كان بابكر كنة مثلنا الأعلى ربما، بأناقته، ورقيه في التعامل، واجادته المواد التي يدرسها. مات خضر عبدالفراج يا حمد. رحمه الله، كم كنت أحب فوله في الابتدائي. حين أطلق مجرمون النار على محمود عبدالرحمن ورفاقه. محمود في ذلك الزمن، كان "جنرالا" في عرفنا. وكانت الحادثة بحد ذاتها "في صدارة أخبار القولد" ربما لعام أو عامين. إنه "الحنين" يا حمد. أتمنى أن تبقى القولد.. القولد خاصتي أنا، دون كهرباء. أتمنى الخير لأهلها/أهلي، فيما يتعلق بالزراعة، لكني أتمنى أن تظل مظلمة، منيرة بقمرها الفاتن. ما من قمر أجمل من قمر القولد. أراه خاصا بها فحسب. يعرفها، ويعرف أسرارها الليلة، ومغامراتها ومسامراتها. حتى الظلام هناك أجمل فهو يحتضن القولد، كما قال السياب في "عراقه" الجميل. القولد آمنة، وتشعرنا بأمان وسلام روحي لا مثيل له. إنه مثل سلام الطفولة، طفولتنا التي قضيناها هناك. إنه حنين مجنون لكل ما هناك يا حمد !! هل سنعود يوما ؟ كبرنا، أم صغرنا في الحقيقة حين غادرناها ؟ الطفيليون الذين تحكموا في مصيرها وقلبوا موازينها منذ أن جاءت "الإنقاذ". أتذكر يوم دمر طلاب المدرسة "بار نون" !! كم أحب أن أكتب عن التعايش الجميل بين مسلميها وأقباطها. حين "يرفعون الفاتحة" في أمواتنا، ونذهب معهم لمقبرة "فهيم" لدفن موتاهم. شدني الحنين للكتابة يا حمد، ربما فهمت "فراغك" هنا، على أساس أنه فراغ روحي، وتوق لـ"هناك"، تلك الـ"هناك" الجميلة. دم بخير
|
Post: #35
Title: Re: بوست فارغ
Author: حمد فتح الرحمن
Date: 03-04-2006, 04:59 AM
Parent: #34
الله يا خالد ذكريات لا تبرح الذاكرة ، ترفض تماما ان تترك احداثا اخري تحل مكانها تذكر اول يوم لينا في المدرسة يا خالد طردنا من الفصل انا و انت و حسن مصطفي و عبد الحميد علي لصغر سننا ، و رجعونا اليوم التاني قبل ما نستمتع بترك المدرسة و العمل ( ترابلة ) كما كنا نحلم ، و لا انسي يا خالد استاذ احمد كنه فهو اول من علمنا حرفا ، استاذ بابكر كنه و محمد موسي و حسن دياب ، تذكر يا خالد لما حسن دياب قال ليك انتا حتطلع صحفي تمام بعد ما طلعنا الجريدة الحائطية بتاعة سنة رابعة ؟
Quote: أتذكر يوم دمر طلاب المدرسة "بار نون" !! كم أحب أن أكتب عن التعايش الجميل بين مسلميها وأقباطها. حين "يرفعون الفاتحة" في أمواتنا، ونذهب معهم لمقبرة "فهيم" لدفن موتاهم. |
عارف لما جاء راعي الكنيسة الارثوزكسية لاقباط مصر و السودان في زيارة للمسيحيين الشرقيين المنتشرين في صعيد مصر و شمال السودان ، الجماعة اولاد عنتر عزمونا لحضور الاحتفال في بيت نون ابادير ، تعرف الاحتفال بالاستقبال دا كان فيه كمية المسلمين اكتر من الاقباط ، و كلمة الاستقبال القاها مولانا قاسم محي الدين إمام جامع حلة الفقرا عليه الرحمة ، و الله يا خالد ما انسي الكلمة الرد بيها الاب في الاحتفال علي مولانا قاسم ، الراجل اتاثر تاثر شديد بوجود الحشد الكبير من المسلمين في استقبالو و كمان كلمة الاستقبال يقولا امام المسجد ! ، الوقت داك الاسلاميين كانو مدورين في اقباط جنوب مصر ، الراجل دا قال في بداية حديثو عمري ما شفت لا في مصر و لا في زيارتي لمناطق وجود الاقباط من الخرطوم و لغاية ما وصلتكم حجم التسامح الديني المجودة هنا . الذ حاجة يا خالد لما يكون في مبايعة بين نصراني و مسلم المسلم يقول ليهو بي عفوية ، صلي علي النبي و يرد عليهو الخواجة بعفوية اكتر اللهم صلي علي النبي ( ص ) و تبدا المساومة في السعر . و الالذ في رمضان ناس ازهري و كرزون يجو يفرشو بروش الفطور في الشارع قبل ما نحن نجي و ينتظرو معانا الاذان و يسمو بالله و يشاركونا فطور رمضان ، و الشاي و القهوة بعد الفطور و الونسة لغاية صلاة التراويح ، وقت الصلاة بكونو قاعدين يدخنو منتظرين ننتهي و تدور الونسة من جديد . بار نون دا كان واقع في نص الطريق بين بيتنا و السوق لما يرسلونا الدكان كنا بنمر و نشوف منو المركلس في البار من الصباح ، و منو الجا خاشي المغرب ، و الذ ايام البار لما يكون في نفير نظافة و نحن صغار كنا بنخش في المخزن الوراني و نجمع علب البيرة الفاضية عشان نعمل منها عربات الحديد و نطلع بيها كوشة الخلا و خور فتحي عطية في كنفوي صغير لجمع مزيد من الكراكيب و الحديد و العمدان البتنفع لصنع المزيد من العربات ، بعض الاشقياء كانو بجمعوا البواقي من علب البيرة في علبة واحدة و يشربوها . لما نزلت السودان في مرة من المرات مشيت بيت النصاري كالعادة ، لقيتم متجمعين بربطة المعلم ، بعد السلام سالني مجودة : يا حيوان قالو لي مشيت حجيت و بطلتا العرقي ! قت ليهو ايوا تبت و الحمد لله رد علي فيصل و طيب يا حيوان نار جهنم دي البخشها معانا منو ؟؟ قت ليهو ما تدخلا انتا براك يا خواجة يا حطب النار نحنا الرسول بجي يشفع لينا ، انتو البدخلكم الجنة منو ؟ رد علي بي سرعة : ياخي لو نبينا ما دخلنا بي حق جيرتكم دي بس الله بدخلنا معاكم . الله يشهد يا خالد نصاري بلدنا ديل كانو نعم الجيران و الاصحاب ، لم نسمع منهم ما يسوءنا يوما ، و لم نختلف مع احدهم يشاركوننا اعيادنا و افراحنا ، و نشاركهم اعيادهم و مناسباتهم ، ندفن موتاهم و يترحمون علي موتانا ، كنا نسألم قاعدين تقروا شنو لما تشيلو الفاتحة ، يقولو لينا قاعدين ندعو ليهم و خلاص ، و انتو بتسو شنو ؟ بنقول ليهم نحنا بنقرا الحمد . لم نفكر يوما لماذا لا يسلمون وهم لم يفكرو لماذا لا نتنصر كل له دينه و دنياه . يا الله يا خالد ايام لا تنسي في الاجازات القعدة قدام دكان نصر ابراهيم بالليل و المساسقة بين ضل الهم و دكان الرشيد نهارا ، العساكر المتواطئين مع نسوان الشوبلي بتسريب اخبار الكشات ، صعود كاشاد ، مجوك الدينكاوي كان عندو اعتقاد انو أي انسان اغترب و جاب فلوس بكون جابا بطريقة غير شرعية ، و كلمات الغزل التي يحفظها يرددها علي مسامع احدي بنات الفلاتة ( البرسيم الاخضر ، الطماطم الرملي ) و شريط الطنبور الذي لا يبارح جهاز تسجيله ، اولاد النوبة ناس فريق الاشانتي سانتينو و كجام . زحمة سوق الاتنين و الالفاظ النابية لحلب دنقلا بُرعي و صلاح الحميدي ، مساومات العربي ود خير الله التي لا تنتهي ، تخيل قالو مرة مشي يساوم ناس سوداتل في فاتورة التلفون ، بصات المحس و هي تدخل الشوبلي للتموين باجود انواع عرقي البلح ، عبد الرازق القرياتي ، و الضي الهواري ، و حلة الكبابيش ، و الزين الفوراوي ، كل هؤلاء جاء عابرا و استقر في القولد ، لم يقل لهم احدا ان هذه ليست اوطانكم فحلو عنها ، اشتري من تحسنت احواله المادية قطعة ارض و بني عليها داره ، تزوج من كان اعزب ، و استقدم عياله المتزوج . تخيل يا خالد آخر مرة مشيت سوق القولد ، واحدة بتاعة مركز خدمات قات لي انت غريب انتا ما من القولد .
نهايتنا بقينا اغراب في المنفي و في ديارنا يا صديقي ،،
|
Post: #37
Title: Re: بوست فارغ
Author: خالد عويس
Date: 03-04-2006, 07:36 AM
Parent: #35
سأعود يا حمد لهذه الذكريات المنعشة. الله.. ما أجمل أيام القولد، وألطفها. سأعود حتما لإرواء عطشي لها، بمزيد من الذكريات
|
Post: #38
Title: Re: بوست فارغ
Author: حمد فتح الرحمن
Date: 03-06-2006, 04:32 AM
في واحد ذكرني بالخوف من المقابر يا خالد
تتذكر مقابر ساتي علي ؟؟؟
بيوتنا القديمة قبل فيضان 88 كان مجاورة للمقابر تماما ، تخيل في الليل و النهار الموتى و القبور قدام عينك ، تطلع من البيت علي المقابر اي مشوار ليك لازم تشق المقابر ، المقابر القديمة المهجورة كانت ورا بيتنا طوالي ، لما نعلب ورا البيوت و فجأة نلاقي حفرة اتفتحت قدامنا و نقوم نزيد فتحة الحفرة شوية شوية بايدينا و ارجلنا حتى تبين بقايا اكفان و عظام الميت ، كنا عايزين نعرف الحصل للميت دا شنو بعد السنين دي كلها ، و بعد ما نتفرج شوية علي محتويات الحفرة نرجع نردما بالحجار و التراب مرة تانية و نرفع القبر و نعمل ليهو شواهد جديدة .
او مقابر حسن اوبة الكانت ورا مدرستنا الابتدائية، كان فيها غرف مظلمة و مهجورة ، الغرف دي كانت مستغلة من قبل المجانين كسكن ، و من قبل الكلاب كغرفة ولادة ، و كنا ننتظر بفارغ الصبر طلوع المجانين من الغرفة و ذهاب الكلاب للبحث عما يعينها علي تربية الصغار . اول ما نشوف الغرفة فضت من امهات الكلاب و المجانين نقوم ندخل بسرعة و نسرق الجراء الذكور و نقوم بتربيتها ( اعادة تدوير ككلاب صالحة ) .
زمان يا خالد ما كنا بنخاف من المقابر و القبور نهائي ، الخوف دخلنا من الموت و القبور بعد ما كبرنا ، الظاهر كلما الواحد يكبر و تسوء اعمالو خوفو من القبور و المقابر يزيد .
|
Post: #39
Title: Re: بوست فارغ
Author: ابو جهينة
Date: 03-06-2006, 04:37 AM
Parent: #38
حمد قريبي
و تقول لى فارغ ؟؟
بجيك راجع ..
و قالت المرأة : الله لا سوانا ...............
لا زالت حكاويك ترن في أذني
أرقد عافية و سلام لود ضحوية في بياته الشتوي
|
Post: #40
Title: Re: بوست فارغ
Author: حمد فتح الرحمن
Date: 03-06-2006, 07:33 AM
Parent: #39
ابو جهينة العزيز
تحياتي
Quote: و قالت المرأة : الله لا سوانا |
عارف حبوبتي دي الله يرحما عندها حكاوي لي بكرة ما تنتهي
دي كانت ساوا لي اولادا جنس محن
مرة يا زول كانت صايمة و رمضان السنة ديك كان حر و سخن بيها شديد قامت ختت ليها سفة بي الجنبة و تكلت
جات بتها سالتا : هيتي ارمدان اكيننون مني بو
عاينت ليها كدا و ردت
تن كونج قلقل ير سكي داقرو
الترجمة : يا هيتي رمضان عامل معاكي كيف قات ليها صايماهو زي وشو
|
Post: #41
Title: Re: بوست فارغ
Author: خالد عويس
Date: 03-06-2006, 03:11 PM
Parent: #40
أذكر يا حمد حين "طردنا" من المدرسة لصغر السن. كان للعم الأستاذ والمربي الفاضل أحمد موسى، فضل كبير بعد الله في اعادتي للدراسة. قال لهم "ما عندو زول يلعب معاهو في البيت، خلوهو يلعب مع الشفع، ويعيد لحد ما يبلغ السن القانونية"!!. وبالفعل، ذهبت لألعب فحسب. وأحرزت فيما أذكر المركز السادس أو الخامس، فأسقط في يد المدرسين. بعيدا عن الدرس، كنا "شفع شياطين". أذكر، كنا نأتي إلى المدرسة في شتاء قارس جدا، ونضع "بستلات" الفطور على مسرح المدرسة، تحت الشمس. وبعد الحصص الدراسية، نفتتح "مهرجانات الشكل". فلان "دافن عصاية"، وعلان "دافن سوط"، عموما حقول النخل ليست بعيدة، فمن لم يملك عصا، بمقدوره أن يتجه لأقرب نخلة، ليتسلح من هناك. كان المشكلات صغيرة، وقائمة على مناكفات في داخل الفصول. مرة، "شاكلني" أحدهم، وكنت قريبا من البيت: بيت الوكيل - وكيل البوستة - وكان والدي عليه الرحمة يستمع لـ"الشكلة" من داخل البيت. قلت لذلك الصبي الذي كان يكبرني عمرا: والله أدخلك في متاهات. إلى وفاته، كان والدي عليه الرحمة يسألني: متاهات شنو الكنت عايز تدخلو فيها. كان عمال الصحة يمرون ليلا لتفريغ "جرادل" حمامات البيوت الحكومية. كنا نطاردهم عن بعد: "عفونة شطة بي ليمونة". وكان قد وقر في صدورنا، أن من يقع في أيديهم، يغطسونه في الجرادل. وكم كان الأمر مخيفا. هل تذكر مايكل ؟ جاء معنا من (واو) في بحر الغزال، ودرس سنينا في القولد قبل أن يسافر إلى الخرطوم. ما زلت أبحث عنه، قيل لي إنه أنضم للحركة الشعبية قبل سنوات، وقيل إنه ما يزال في الخرطوم. كنت وما زلت أشعر بأنه شقيقي دون رياء. وأشعر أحيانا بالغضب، كوني لم أعثر له على أثر. دوناتو مايكل !! كنا نمر أحيانا على دكان (محمد طه). في الظهر، يكون مضجعا على "عنقريبه". هو و(ميرغني مجيد) عليهما الرحمة، ما كانا يحبذان البيع في ساعة (الترخيم). ولو باعانا بعض الحلوى، فيلزم أن ندخل إلى الدكان بأنفسنا لجلبها. كان ذلك زمن القرش والتعريفة والمليم. سوق القولد كان نكهة خاصة. أنا وحسن مصطفى، كنا نساعد أباه رحمه الله في ترتيب طاولات البيع. ما زلت أذكر الحبات الحمراء بين (البخور). كنا نأكل بخور اللبان، ونلتقط أعقاب السجائر التي يدخنها لننفثها. بعد رحيل الباعة والمشترين آخر النهار، كنا - حسن وأنا - نقلب السوق رأسا على عقب بحثا عن قرش مغروس في التراب. كونا ثروات صغيرة جراء ذلك. عمدنا أنا وحسن وطلال وياسر لجمع "قروش" من تجار السوق الكبار عليهم الرحمة، عبدالرحمن "مورود" وعلي سيدأحمد وغيرهما، لشراء قمصان رياضية وتكوين فريق. كنت أستغرب جدا، كيف يدرس ياسر وطلال في "مدرسة فوق" مع البنات. كانت شتيمة آنذاك، ولسذاجتنا، لم نعرف المزايا التي تنطوي عليها !! هل تذكر مجانين القولد، كان حسن البرير أقربهم إلى نفسي، لأنه لم يكن عنيفا، لا تتوقع منه أن يضربك أو "يفقلك بحجر" مثل حسن شبتوت مثلا. "ما الحكمة في أن مجانيننا كلهم كانوا يحلون اسم حسن !!". حسن البرير، كان يحمل دائما حقيبة حديدية كبيرة لا تفارقه أبدا. رأيت ما بداخلها كثيرا، حين كان يفتحها في البوستة. طماطم وملابس و"عيش ريف" وبرتقال وبصل. مرة، جلس قرب عمي "عووضة عويس" في مناسبة، ولم يكن عمي يعرف جنونه، وبدأ البرير يحكي له عن أيام حرب فلسطين، أو 67 لا أعرف. وانقطع الحديث بقدوم ضيف عند "قاموا فتحوا نار فينا". بعد أن أنهى عمي سلام الضيف، عاد إليه ""أها يا حسن حصل شنو ؟" فرد عليه بجملته الشهيرة "دخلنا في ضرع البقرة". ذلك الرجل لم يكن مجنونا أبدا، كان فيلسوفا على نحو ما. حسن شبتوت كان مجنونا شيطانا. يخرج جهازه التناسلي ليتبول عندما يرى نسوة في الشارع. مرة أمام دكان "عبيد النصراني"، خرجت فتيات من مستشفى القولد، فسألهن "هي يا بنات ما بـ...." داعيا إياهن للفعل الجنسي !! (العرقي) و(الشري) و(الويسكي) كان لهم صولات وجولات. الويسكي للمغتربين والشري لكبار الموظفين. والعرقي لـ"الترابلة". من لم يكن يشرب في ذلك الزمن، كان يشك في رجولته !! مرة شربت "دكاي" في بيت ناس "ذياب" بحلة بابكر. كان يقام عرس ما هناك. و"شدوا" الدكاي بالكتير. شربت جغمتين واتخيلت أنني سكرت تماما. كانت فلانة آنذاك - عمري كان حوالي 9 أعوام - هي أنثاي الأثيرة. ونويت آنذاك الزواج بها، ضاربا عرض الحائط بالفارق الكبير في العمر. كنا نحب ثمار "الجميز"، وحين تنبه صاحب شجرة الجميز قرب المدرسة لولعنا بثمارها، صار يبيع الجميز. كانت الثمار دائما مليئة بالحشرات، لكن من يكترث ؟! "جناح جبريل" كان أكثر واحد مسخوط في تلك الشلة المجنونة. ودائما ما كان يجلد، ولا يهمه ذلك. في كل "لستة مهرجلين" هو الأول. لكنه كان طيب القلب جدا. حين تنتهي الدروس، تنطلق جحافل "رعاة البقر" على حميرهم. لم نكن نمتلك واحدا. كان "موسى الجاه" ربنا يمتعه بالعافية، يمر عليّ لـ"يردفني" على حماره الأسود، بعد انتهاء عمله في البوستة. كنت أعاني من صعوبة ركوب الحمار. ولابد من اقتراب الحمار من دكة ما ليسهل عليّ القفز. كانت حادثة هبوط طائرة صغيرة في القولد، استقلها "الفرنساوي" من الخرطوم للقولد، أمرا جللا، ربما رحل الناس من عشرات الكيلومترات ليلحقوا بالطائرة. الفرنساوي، واحد من ناس القولد، كان يعيش في فرنسا. يوم السوق، هو يوم القيامة. لا يمكن ليوم الاثنين أن يمر دون "غبار" عالق في سماء القولد. كنا نفطر في السوق يوم الاثنين، مطعم "دكوم" هو الأثير إلى نفوسنا. فول مصلح، نلتهمه في لحظات مع كثير من البصل و"طماطم السليم". الجبن في ذلك الوقت كان ترفا !! ليل القولد الحالك الظلمة، بنسائمه العليلة، هو ربما أروع ما في تلك القرية/المدينة النيلية تماما. هل فكرت يا حمد يوما في علاقتنا بهذا الجد الجليل : النيل ؟ إنه في عرفنا ليس مجرد نهر. نحن "نحج" إليه مع عرساننا، ولابد أن يغتسل العروسان بمائه. "سيرة البحر" كانت طقسا ثابتا في كل عرس. سأعود
|
Post: #42
Title: Re: بوست فارغ
Author: khaleel
Date: 03-06-2006, 03:45 PM
Parent: #41
حمد البرلوم
بكرة تحقق اماني
والفواد يرتاح ويتبسم زماني
|
Post: #43
Title: Re: بوست فارغ
Author: حمد فتح الرحمن
Date: 03-07-2006, 08:48 AM
Parent: #42
خليل سينيرنا مرحب بيك يا حبيب
اقصي اماني الفؤاد ان يعود لداره
عارف لو الناس ديل الهم الخلايجة قالو ما دايرين معانا تاني يلا ارجعو كلكم لي بلدكم اخوك بكون متكيف كيف
عايز ارجع يا خليل لانو هناك بس حالاقي نعيم دنياتي و سعودا
|
Post: #44
Title: Re: بوست فارغ
Author: حمد فتح الرحمن
Date: 03-07-2006, 05:43 PM
Parent: #1
اجمل المراحل الدراسية هي مرحلتي الابتدائي و الجامعة ، اول اربعة سنوات و اخر اربعة سنوات هي بتكون عالقة في الذاكرة اكتر . اتذكر يا خالد لما كنا في تالتة ابتدائي ، استاذ حسن دياب ادانا حصة عن النحل و العسل ، و كيف النحلة تصنع العسل ، كنا مستمتعين جدا بالحصة و في اخر الحصة طبيعي يكون في سؤال ، و سؤال الاستاذ كان الاكل عسل النحل فيكم منو ؟ انت رفعت ايدك و قلت انك اكلت عسل النحل لما كنت في واو . الاستاذ قال ليك ممتاز و قال لينا صفقو ليهو و كانت صفقة كاربة الظاهر عجبت عبد الرحمن تلول ود عمي قام رفع ايدو هو كمان ، و قال ايوه انا اكلت عسل النحل امس ، الاستاذ قال ليهو من وين ؟ لانو عارف امكانياتو و عارفو ود جزر ساكت و ما بكون شاف عسل النحل بي عينو ، قال للاستاذ امي سوتو لينا في البيت حسن دياب استغفر ربه و طلع من الفصل لما شك في امكانيات التدريس عندو .
الموقف التاني في سنة تالتة كان من واحد من التلاميذ العايدين السنة في حصة المطالعة كانت الدرس هاشم في العيد ، الاستاذ بقوم الطلاب بالدور كل واحد يقرا فقرة ، الدور جا علي التلميذ العايد و للاسف ما كان بعرف يقرا اي شي الاستاذ بقول الكلمة و هو يقولا وراهو بدون ما يعاين للمكتوب ، لغاية ما وصل لكلمة المزركشة هنا الاستاذ قال : وقف حمار الشيخ في العقبة ردد التلميذ وراهو ( وقف حمار الشيخ في العقبة )
ذكريات لا تفارق الذاكرة يا خالد ، زمان كنا نتحاوم جم ساتي علي قانصين للنسوان البجيبو الكرامة و غالبا يا بتكون ذرة مسلوقة و لا شاي حليب باللقيمات و السق ، اللي هو قراصة التمر ، الواحد فينا من كتر التراب الفي جسمو بكون عامل زي حبة فول الحجات المنجضة بالرماد ، و لما يضرب الشاي مع اللقيمات خشمو بكون عمل ليو دائرة دهنية و شكلو بكون قبيح خلاص . تذكر الدستور او حفلات الزار ، دي برضو كانت من الاشياء الجميلة الما بتتفات برغم انو مرات بكون فيها رعب شديد من الفقرة بتاعة نمر الخلا .
ازيار الدكاي في الطهورات و الاعراس اقل شي في المناسبة بكون في خمسة ولا ستة ازيار ، و الشراب بالقرعة ، بكون في واحد من الاولاد الكبار شايل الجردل و واحد اصغر منو يغرف بالقرعة و يوزع للرجال ، حتي الاطفال بشربوهم الدكاي اليوم داك .
|
Post: #45
Title: Re: بوست فارغ
Author: عمران حسن صالح
Date: 03-08-2006, 05:22 AM
Parent: #44
سلام لكل الناس رغم بعدي عن المشاركات الكتابية لفترة طالت إلا أنني أقرأ دون تحديد سيطرت ذكرياتنا على كل أشيائنا نعمة ..... هي زادنا إن أحسنا الفرح بها حتى وسط كل الفراغ (الهنا)
كتب الطيب صالح يوما : ( شربنا لبن البقر غريضاً ، وأكلنا التمر (البركاوي) فظل المذاق عالقاً بأرواحنا يفسد علينا طعم الحياة بعد ذلك في بلاد الله على اتساعها )
ولك أخي دكين سطور الطيب صالح أعلاه هدية
|
Post: #49
Title: Re: بوست فارغ
Author: حمد فتح الرحمن
Date: 03-08-2006, 08:30 AM
Parent: #45
Quote: سيطرت ذكرياتنا على كل أشيائنا نعمة ..... |
تحياتي عمران
هي كل ما بقي لنا في غربة لا تلوح نهايتها
اصبح الانسان مجرد ذكريات طفولة و شباب يجترها من وقت لاخر
|
Post: #46
Title: Re: بوست فارغ
Author: DKEEN
Date: 03-08-2006, 07:01 AM
Parent: #1
شرف والاسد.. حمد والدكاي ..
|
Post: #50
Title: Re: بوست فارغ
Author: حمد فتح الرحمن
Date: 03-08-2006, 08:44 AM
Parent: #46
Quote: Quote: قانصين للنسوان |
يا حبيب انتا ما اعجبت الا بي الحتة دي ؟ ، الايام ديك يا حبة عمرنا بتراوح بين 5 لي 10 سنوات ، يعني مسموح لينا القنيص .
|
Post: #47
Title: Re: بوست فارغ
Author: DKEEN
Date: 03-08-2006, 07:07 AM
Parent: #1
العزيز عمران
سلامات يا حبة .. تعرف يا شليق من يوم نزلتا لي صورتي في البورد ده والجكس والحريم خلوشغلتم وقدو اضاني بي الجوالات.. اضطريت مؤخرا اقفل الجوال نهائي خوفا من فتنة وشيكة ..
عطلتا مصالح العباد يا عمران.. غفر الله لك..
ودمتا انتا وناس مودي طيبين
|
Post: #48
Title: Re: بوست فارغ
Author: عمران حسن صالح
Date: 03-08-2006, 07:32 AM
Parent: #47
Quote: تعرف يا شليق من يوم نزلتا لي صورتي في البورد |
باقي يا دكين صورة الشبشب إياه ( عشان تكتمل الصورة ) !!!!!!
Quote: والجكس والحريم خلوشغلتم وقدو اضاني بي الجوالات |
محول إلى العزيزة عزاز شامي صورة إلى / أحمد حنين (الوجيه)
|
Post: #51
Title: Re: بوست فارغ
Author: DKEEN
Date: 03-08-2006, 05:36 PM
Parent: #48
![](http://www.sudanhosting.com/cgi-bin/bandwidth.pl?type=pic&name=214.JPG)
عمران 185 ريال حرم..
من ناحية تانية عايز تشهد علينا عزاز شامي .. كان ليك يا منقة عزاز معانا وليست مع الخيانة..يعني حتى ولو جات فهي حتاكد مسالة انو الصورة اقل وجاهة من الواقع..
همزاوي في محادثة جانبية قال لي : حقو يادكين تطلق لحيتك في قادمات الايام درءا للفتنة وحفاظا على امن المجتمع..
|
Post: #52
Title: Re: بوست فارغ
Author: محسن خالد
Date: 03-09-2006, 02:40 AM
Parent: #51
..
Quote: عارف لما جاء راعي الكنيسة الأرثوذكسية لأقباط مصر والسودان في زيارة للمسيحيين الشرقيين المنتشرين في صعيد مصر وشمال السودان، الجماعة أولاد عنتر عزمونا لحضور الاحتفال في بيت نون أبادير، تعرف الاحتفال بالاستقبال دا كان فيه كمية المسلمين أكتر من الأقباط، و كلمة الاستقبال ألقاها مولانا قاسم محي الدين إمام جامع حلة الفقرا عليه الرحمة، و الله يا خالد ما أنسى الكلمة الرد بيها الأب في الاحتفال علي مولانا قاسم، الراجل اتأثَّر تأثّر شديد بوجود الحشد الكبير من المسلمين في استقبالو وكمان كلمة الاستقبال يقولها إمام المسجد! الوقت داك الإسلاميين كانوا مدوّرين في أقباط جنوب مصر، الراجل دا قال في بداية حديثو عمري ما شفت لا في مصر ولا في زيارتي لمناطق أخرى وجود الأقباط من الخرطوم ولغاية ما وصلتكم حجم التسامح الديني الموجود هنا. ألذ حاجة يا خالد لما يكون في مبايعة بين نصراني ومسلم، المسلم يقول ليهو بي عفوية، صلي علي النبي.. ويرد عليهو الخواجة بعفوية أكتر اللهم صلي علي النبي (ص) وتبدأ المساومة في السعر. والألذ في رمضان ناس أزهري وكرزون يجو يفرشو بروش الفطور في الشارع قبل ما نحن نجي وينتظرو معانا الأذان ويسموا بالله يشاركونا فطور رمضان، والشاي والقهوة بعد الفطور والونسة لغاية صلاة التراويح، وقت الصلاة بكونوا قاعدين يدخنوا منتظرين ننتهي وتدور الونسة من جديد
|
صدقت يا حمد والله، دا ياهو السودان في أي محل،..
دا ياهو السودان الخربوهو الكيزان بفتن المِلَل والنِّحَل،.. وديل ياهم السودانيين الخربوهم الكيزان بالجهات ومباول الدم والأعراق،.. المبولة لدى من يعي هي فاتحة المدارس الحديثة، وبلاد الإنسان والزمن الحديث، الحداثة في التشكيل والتلوين بدأت عندما قام دو شامب بإنجاز مبولته الفنية،
بتذكّر لسع لامن يموت زول من حلتنا، وأقباط شندي عندهم شراكات زراعية في المسيكتاب ومشروع البطاطس تلقاهم كلهم جوا بشفّعن ونسوانن متبلّمات مجاملة لنسوانا، شبابن يخاتفو طواري الحفر مع الناس عمك جورج وحنّا أصحاب المرحوم ود الطيب، تلقاهم واقفين في صف أهل المتوفى والناس يجوا يواجبوهم بالفاتحة، عمك حنّا القس، صوتو جهوري، الفاتحة الفاتحة، تشق السدر والسيّال، والشارب الحنطي يرجف من بكاهو كنا نمشي أنا وصاحبي نبيل بالعجلات للمحطة في شندي، لأنو هناك الكنيسة، ونصلي سوا، أنا بتوضأ وهو بصلي بدون وضوء، وفي مرة تانية بجلفق ليهو موية بس، دا يوم يكون الدور علي ونمشي نصلي العصر في الجامع عشان نلحق الكورة، يا سلالالام، لكم هذا الكون جميل، عندما نلاحظ أنّ الله بتاع موسى والمسيح ياهو ذاتو الله بتاع محمد.. بس يا أخوانا الكيزان ديل حشّوا رأسنا، و-الله- بتاعم دا نفرو براهو،..
...
|
Post: #53
Title: Re: بوست فارغ
Author: حمد فتح الرحمن
Date: 03-09-2006, 04:28 AM
Parent: #52
الاديب محسن خالد
اسعدنا مرورك
ياخي الناس ديل من شدة ما دخلو في ناس البلد زوجة النصراني متو بقت ترطن عديل ، و موش نسوان النصاري بس البرطنن حتي نسوان العرب و الحلب اكان ما برطنن بفهمن البتقال شنو .
مرة يا محسن بتكلم مع واحدة قريبتنا زولة غير عادية ، لفت بلاد الله الواسعة دي من شرقا لي غربا زولة كتابة و راقية . قت ليها السودان مشكلتو انو بلد فيهو مليون اثنية و عرق ردت علي يا حمد انا سالت واحد امريكاني سر التقدم الهائل الحصل في امريكا رغم التعدد العرقي و الثقافي شنو ؟ رد عليها الامريكي ( السر في التعدد العرقي و الثقافي )
خلينا نقعد في واطة واحدة نوبا و زنوج و بجا و حلب رطانة عربان مسلمين مسيحيين لا دينيين يهود و نشوف لينا حاجة واحدة تلمنا بدل ما نجر ورا البشتتنا .
|
Post: #54
Title: Re: بوست فارغ
Author: عمران حسن صالح
Date: 03-09-2006, 05:41 AM
Parent: #53
دكيييييييييييين سلام يا مان
![](https://images.google.com.sa/images?q=tbn:PDZ_mX8V4ATfvM:www.clear-shoe-boxes.com/Clear-shoe-boxes-images/Clear-shoe-boxes-image9.jpg)
Quote: عمران 185 ريال حرم..
|
إيش جاب لجاب ( يعني الفوق ده يكون بعشرة ريال ؟؟؟؟؟؟؟؟
![](http://www.sudanhosting.com/cgi-bin/bandwidth.pl?type=pic&name=214.JPG)
Quote: همزاوي في محادثة جانبية قال لي : حقو يادكين تطلق لحيتك في قادمات الايام درءا للفتنة وحفاظا على امن المجتمع |
|
Post: #55
Title: Re: بوست فارغ
Author: عزاز شامي
Date: 03-12-2006, 03:00 AM
Parent: #51
دكين، أخوك من بكاك ولا ضحك الناس عليك عدي سؤال ملح، علاقتك مع الشباشب ابتدت متين؟ ماأراه من بين الشقوق هو ان علاقتك بها حديثة جدا جدا، وكأنها لم تبدأ بعد!
|
Post: #56
Title: Re: بوست فارغ
Author: DKEEN
Date: 03-12-2006, 08:22 AM
Parent: #55
Azaz علاقتي مع الشباشب لاتشوبها شائبة.. والشبشب اعلاه وحاتك بي مية وخسمة وسبعين ريال..
انتي سؤالك مفترض يكون علاقتك بالرجلين بدت متين؟؟
|
Post: #57
Title: Re: بوست فارغ
Author: DKEEN
Date: 03-12-2006, 08:44 AM
Parent: #1
احبتي :
الشبشب ده يا اخوان بي عشرة حريم زي التي تضمنها النموذج المشروح ..
لاتبدو جماليات الشبشب اعلاه لانو كرعين اخوك غبشاويات وتبين كاقدام الهاربين من حتوف..
هامش: انا من يوم شفتا كرعين مدام (رينيه) مسخت الكرعين في نظري وحسيت بانو علاقتي بالكرعين ضعيفة جدا جدا حتى اني احسها ما قد بدأت بعد..
|
Post: #58
Title: Re: بوست فارغ
Author: حمد فتح الرحمن
Date: 03-13-2006, 03:48 AM
Parent: #57
دكين شايفك بقيت خيراني كبير
و قليل ادب
Quote: انا من يوم شفتا كرعين مدام (رينيه) مسخت الكرعين في نظري وحسيت بانو علاقتي بالكرعين ضعيفة جدا جدا حتى اني احسها ما قد بدأت بعد.. |
ما هو نوع كلامك دا البوديك الخيران و المواسير ، و الذي منو .
اسع لو كتا مؤدب و ما بتتكلم في سيقان الحريم و غيرو كان في ( سيدة ) جات قات ليك انتا قليل ادب و يلا نوديك الخور ؟
و في يوم عيد المرأة كمان يوم العيد تمشي الخيران يا دكين ما بتخجل النسوان يودوك الخيران ، و ناس تنقو يودوك الهاف مون ؟
و تجي متنكر و تكتب ليك بوست شكر و عرفان ؟
يا ناس الرياض البني ادم جا وقعد عندنا تلاتة شهور مؤدب و ما بعرف درب الخيران . يوم ما جاكم الرياض رجع عنقالي و قاباض ، بلاهي رجعو لينا تاني نعيد صياغتو من جديد .
عارفكم زهجانين منو
|
|