وداعا والي لقاء.

مرة اخري، نعلن نهاية دوام دواسنا الحالي، وسنلتقي كان حييينا في الوردية القادمة.

طبعا كل مرة نعلن فيها غيابنا المؤقت عن المنبر، كما اعتدنا، احتراما لقرائنا، الناس للاسف بتفهم الخطوة دي خطأ والعيب فينا، ولانعيب قراءنا لي سوء الفهم، لانو توصيل المعلومة في تقاليد فهمنا، مسؤلية صاحب الرسالة، وليس المتلقي كما شاع الفهم!

علي كده مرة اخري، ده غياب دوري مؤقت، روتيني، اومامرتبط باي شئ، وبالذات موضوع الاخت العزيزة جدا تراجي.

في الحتة دي واذا لابد، نعيد ماذكرناهو لصاحب الموقع في رسالتنا الاتجدعت في التراش:

اسلوبك ده يابكري ابوبكر في التعامل مع العضوية، صراحة مخجل جدا جدا، وقد رفضناه من الاخرين، اصحاب المنابر الصفوية.

هذا الموقع في خاتمة المطاف Business، ذيو او ذي اي دكان او كنتين، والمشاركين في المنبر ده، في النهاية زباين، ذي ماقلت من سنين او سنين خلت للسيد معاذ عطا السيد، صاحب Sudan.net.

فالموقع ده، عبارة عن Shopping Center، او مركز تسوق، يستمد قيمتو الاساسية، من الTraffic المسؤليين اولا واخيرا من توليدو، هم امثال تراجي تحديدا وليس امين او صاحب الموقع!

عليه، امثال تراجي وكل العضوية ينبغي ان تعامل بحد ادني من الاحترام من قبل اصحاب هذه المواقع، بدلا عن هذا الاسلوب البلدي والمتخلف جدا، والمعروف عننا كسودانيا، في دنيا الاعمال الحرة.

لم نعترض اونتدخل في قرارات الاخ بكري الادارية، ولكننا طالبنا فقط بمعاملة العضوية بحد ادني من الاحترام، ومن ذلك تبليغ العضوية بالقرارت الادارية!

غريبة حاجة بديهية بسيطة ذي دي تكون موضوع مطالبة ياصديقي بكري ابوبكر!

اذا انا عضو اوماقدرت ادخل المنبر، واتصلت بيك، اقلاهو يابكري رد علي، او قول لي اتلما، انت موقوف مثلا، بدل التجاهل التام، وعلي هذا النحو المستفز او مهين، كماحدث للاخت تراجي، ليستقل خصومها السذج الموقف، للتندر والتقريق والضحك او كانو قرارت من هم في موقع السلطة، تلقائيا، تنتقص من قدر المعنيين بهذه القرارات!

ده غلط يابكري، اوتذكر علي المستوي الشخصي، انت كصاحب منبر المحتاج لي امثال تراجي، وليس العكس، لانو امثال تراجي هم قاطرة الديزل الجارة عربات قطر بضاعة هذا المنبر!

ماعندي ادني غرض او اي دافع اخر، بخلاف التعبير عن وجهة نظر، بذات اسلوبنا المباشر اودغري، او لولاقيتك اوجات السيرة فلن اتردد ان اقول نفس الكلام ده، دغري اوفي وشك كده، لانو في الاخر، دي نصيحة، تصب في مصلحة منبرك.

في الختام اتمني مخلصا ان لااكون قد خالفت اي من قوانين ونظم المنبر، بل نعتقد مخاطبتنا ليك بصورة مباشرة، منتقدين لي اسلوب تعاملك، وليس قرارتك الادارية، مع العضوية، حق مكفول تحت بند حرية التعبير وفق هذه القوانين ذاتها، واللتي قدنختلف معك في تفسيرها علي مستوي الممارسة.

لمن نقول كده، احنا مامدفوعين بالخشية او الخوف من اي شئ، ونما هو الحرص علي النظام واحترام القوانين.

عضوية المنبر لاتضيف لنا شئ، وفقدانها بنفس القدر، لا تفقدنا شئ،.



والنظام سكة حياتنا، مهما درب السكة طول..

فالعفو والعافية..ياخلق... وسنعود لوفي عمر..

سلام يا بشاشا ونتمنى ليك حظا سعيدا اثناء غيابك

تمشي و تجي بالسلامة يا بشاشا.

يا بش بش :
زمااااااااااااان الحاجة بت الأحفاد لمن تجي تسوي جنس كلامكم ده إنت ودينق ما بتريحوها دحين يا اللخو بقت لك حارة ؟؟؟؟؟
تخريمة :
في إنتظارك يا حبيبي ..

Quote: والنظام سكة حياتنا، مهما درب السكة طول.. فالعفو والعافية..ياخلق... وسنعود لوفي عمر

الاخ بشاشا مشتاقين ياخ
تحياتنا للجميع اندكم

عد سريعا يا كيمو المنبر بعدكم مسييييييخ (همهمة استحسان)

سلام يا عزيزي بشاشا واحترام،

لقد قلت:

Quote: طبعا كل مرة نعلن فيها غيابنا المؤقت عن المنبر، كما اعتدنا، احتراما لقرائنا،

ونقول: أصدق أمنياتنا لك بالتوفيق.

تحياتي

صدقني يا بشاشا
انت في النهااااية زول كويس .. جربتك ، وعموما

Quote: تمشي وتراجي بالسلامة

_____________
رب اشرح لي صدري

أوعـي تتأخـر أخـوي بشـاشـا..

مـني

شنو يا بشاشا كراعنا حارة ولا شنو؟
تمشي وتجي بالسلامة