وينك ما طليتي ليالي .. وكم احلام ..!؟

ويـــنك
وينك
ما طليتي ليالي
وكم احلام
وينك ما باشرتي حضورك
ولا جاهرني ظهورك
كم ايام
وينك سبتي الزمن الواجف
واقف
شايف في عينيك
النعش الحاضن ريدو
ولابس عمرو ليالي
وكم ايام
وينك كان ماليني اقولك
عن عصفورة الريد الضايعه
في ليل زارتني
ما جافتني
ولا خانتني
بس إلفتني
ليك شالت مني حكاوي
عن الريد الشقّي دروب
وطريق جواي
دروب من ضو
منك وليك
بالحيل ساقتني
وينك كان ماليني اقولك
ساعة تبقي معاي
والازمان يا حلوه
براها تقيف
تاخد من الشوق الباقي قبالتي
اصل الشوق
ومعني الطيف
سر الكون الفي عينيك
مسجون
احلام واغاني
اشواق ونزيف
ايام واماني
ولساتو وريف
وينك كان ماليني اقولك
وكتين يقطع فيني غيابك
يقطع حد السيف
ساعه ابقي براي
ويرجع يعاود من بيناتك
وعد الزيف
كان ماليني اقولك
إلا اظنك نخله
تخاف المطره
وانا ريدي عواصف
همسو خريف

محاولات لجمع ما كتب في الزمن الغابر ..
ديوان ( قالت وداع )

جرح الامل

علي وين ..
مطارق همتك راح تنتكي
وعلي وين الليله
حيدور السؤال
ولسه الامل مجروح
والقلب داير في مداهم
شايل صداهم
فترت خطاه
وإنكفي الوجد الصبوح
...
علي وين
الليله حيدور السؤال
وضفاير الدرب القديم
غسلي المطر ..
ودر خطاويك القبيل
تتباهي كيف زمن الوضوح
...
والاغاني إتأسفن ..
راكزات علي جرح الامل
إتماسكن ..
مرقن خبايا الروح
حتي القبيل عرفوا الحنان منك
شوق وإشتها ..
حزموا الولف ..
حقيبة الخاطر أسي ..
وادوه الرياح
ما عاد يلوح
جرحوك عديل ..
خنقوك اسف ..
سرقوك غنا ..
ما عاد يفوح ..
لكن علي بالك
كل الاماني الواعده
واحده
وتمشي الخطاوي ..
تمشي لو في لحظه راعده
تمشي بارده
تمشي لو بي واحده يارده ..
ويعاود القلب الجموح

عنوان للسفر

بين المدن الكان زمان
والهسه
الوان من غنا
ما بين عيونك
وسكتي
طار الحمام
فاتت محطات الرجوع
والورده ماتت عندنا
ولسه قصه مزوره
منسيه بين
درب البحر
وطريق رجوع حرف
الغنا
ووقتين بيتغيب فرح
لو تعرفي
بلقاك انا
مرسيه من نغم
الكمنجات
والقطارات
والمطر

لوحه من ريشة صراع
ما اظن تعود
ترضي بإطارك
رغم إنك
لسه لونك
بيه مصبوغ الشراع
...
بين المدن الكان زمان
والهسه
عنوان للسفر
منو الرحيل إبتدع المشي
وانا منهم
شلت الصدق
وما اظني يوم اكذب عليك
من صدقهم

قالت وداع

قالت وداع ..
ذادت اسف وجع
الحــروف ..
مصروفي ذاد حزمه
ضيــاع
والدنيا كان عكس الرياح
تجرح .. تشاتر
في المحنات
والعذابات مطرت
دمعات وداع
الليله كيف القي الدروب
انا عديتها غنيتك زمن
عانقت فيها محنتك
ولبست من توبك اريج
وحداني ماسك سكتك
باريها لي اخر شعاع
قالت وداع ..
وانا كنت ماشي عليها
بي اخر وعد
حجاني ازمان في السفر
غسلني بي لون المطر
ياهو كان كان اخر متاع
قالت وداع
وانا كنت في وسط الطريق
فارش ما بيني بينا
الشوق رمال
قـاصد لقاها
شايل من الزكري الكلام
كل الغرام ..

بحلم بالحلم البيحلم
بي صداها
إلاها قالت بس وداع
ذادت اسف وجع
الحروف
مصروفي ذاد حزمة ضياع

ده احلا كلام.............
يعطيك العافيه سيدى

Quote: ده احلا كلام.............

إنت ..

عشــانك إنت

عـشانـك إنــت
عشانك .. انتِ
غصبا عني
ياني مفارق
ارحل عنِك
واستني سواقي ظروفي
الجايه ..
تشيل من فيض احزاني
تودي
عشانِك .. انتِ
بفضل حزني جناح
مهاجر ديمه .. وشايل
صبري .. جناحو التاني
يحت في ريح الخوف ..
والوحده
الحزن البلفح جوه مداركي
الواعيه ِبريدك
عشانك ببدا اطفي بدمي الوالع
نار الغيره ..
واقفل الف دروب جواي
للحيره ..
واتحدي ظروف .. ياما شالت
مني الالفه .. وعدت
عشانكِ .. انتِ
ياما كنت نسيم
في نص السكه بلطف
جِـّوك ..
وياما كنت حنين
في مأساتك وساعه غٌلبِك
كنت مداين شوق

عمرانه تهاتي بإسمِك ..
بانه قامتِك .. ولونِك
ونَفَسِك ..
والليله عشانِك
بخزل كل مساحة ريد
جواي
وعشانك ببدا اخون عينيك
في الزمن الجاي
وانسي علي كتفيك
ضفيره عمري اتمدت
عشانِك ..انتِ
غصباً عني ..
ياني مفارق
ارحل عنك
استني سواقي ظروفي
الجايه ..
تشيل من فيض احزاني
تودي

Quote: إنت ..

رد ذو حدين......قد يكون انت الاحلا
وقد يكون انت الدخلك هنا شنو...
انا بميل للاول طالما انك بتكتب
كلام جميل اكيد دواخلك اجمل
واصل ياخى وخلينا نستنشق هذا الجمال
اكيد متابعتى

برضو إنت يا وليد..

مشـــــتاق

مشتاق لهواك مستني
لساتي بصارع ... حِني
لو كان بطلع من جلدي
بس كنت بكونك فيني
ما كنت بسيبك تمشي
من غير ما تكون جاييني
ما كنت بغالط .... دمي
شرياني هواك من حني
ما كان القلب إتأسي
ما كان الريد بعزقني
...
ويا قلبي عيونك وين ؟؟
كاتلني الشوق كاتلني
نديان الهم ماليني
محزون لكني بغني
شقيش الريد سايقني
في دربي النار تحرقني
ولي وين الدرب بودي
غرقني الزول هالكني
...
لو كان بقفاي سافرت
ظالمني علي متجني
لساتي بصارع حني
مشتاق لهواك مستني
لساتي بعاين دربك
شالاه عيوني تمني
راجيك لمتين ما تعود
والفرحه براها تغني

حنتواعد

حنتـــواعد
علي إنو بس تزكري
من وين إنحن حنبتدي
وتبدا الجراحات تندمل
ويبقي قولك
ما حقيقه مغيبه
علي إنو كيف
زمن المخاوف والمحن
إيدك علي راحتي
وعلي خاطر الاسي
الممدود شقي
نفرش فرح نتوسدوا
ونغني
نغني قصتنا القبيل
نغني اشواقنا .. ومرحنا
تتراقص الغيمات هناك
نغني ويتقالد فرحنا
نغني أنحن برانا
من جوانا
سمح الكلام
اجمل غنا
نغني وإتبادر خواطرنا
الدعاش
حلو القصائد
عينيك وانا
....
حنتواعد
نبدا نعيد ترتيب
الريد الاول
نقلع من بيناتو
الشتل النور حنضل
وكل اراضي الصي والريح
تتحول
فرع بيطرح فينا
ثمار الخطو الباقي
وفضل
ورده وبس
بيها معاني الود تتجمل
والورده اكيد
ما بين عينيك
وبين جواي
اكيد
الورده تقيف تتأمل
...
حنتواعد
ساعة الجرح الغاير فينا
يغازل عصب الجوف
بالوعد النور
نوصل ضل العتمه
وقلب الشوف
نفتح صفحة ريدي
وحلمك
نبدأ نغير نحن ملامح
الزمن الزيف
ويبقي يغني معانا
الليل
النسمه
الطيف
حتي زمان الدرب القاسي
ساعة يبدا يهامس فينا
الشجن
الوحده
الخوف
بنبقي أنحن نشيل
الامل الذاد لي بكره
وبكره عشان الوعد النور
بتلاقي الفرحه
وتلقي القيف
بتلاقي الريد
قدامك دربو
مد عينيك الحانو
وبلقاك الريد
ماليك خريف

ضل الغيـــاب

انا لسه متعطش
لعينيك .. اعاين
جوه في جواك افتش
عن ليالي قضيتها شاكي
باكي فرحان بالهزيمه
عن ورده سقيتها هم
سكران بريحتك
وإشتياقي
عن أغاني كتير بتحكي
عنك إنت
عني عنك
عني .. إنت
عن غيابك
وإرتحالك
وإشتياقك
وإنتصارك والهزيمه
وانا كلما بنسي الحقيقه
تلقاني بتنفس غيابك
واتزكر خطاك
وقت ترحل تفوت
مع الشمس المسافره
وخوفي بكره
شروق بلاك
ويقبل المدي إشتياقي
قبل خطاك
ويضلل الكون إحتياجي
ونار هواك
وانا لسه فيك
كل التفاصيل البنفسج
ماخده لونك
وضي بهاك
وانا ؟؟؟
انا كلما غافلت خاطري
المشتهيك
بلقاه لسه متعطش
لعينيك
يعاين
سابقني برضو !!؟
جوه في جواك
إفتش
عن ليالي قضيتها
شاكي
باكي فرحان بالهزيمه

يا وليد ..
جيتني وقلت لي

Quote: ده احلا كلام

قلت ليك ..

Quote: انت ..

وانت الاحلي ..
جيت قلت لي ..

Quote: رد ذو حدين

تاني قلت ليك ..

Quote: برضو إنت

وتاني كان جيتني بقول ليك
إنت الاحلي ..
انا في رأيي الخاص إنو الكلام
الحلو لا يعرف طريقه جيداً إلا
تحت وطئه المكان الاحلي وعبر
الزوق الاحلي .. وابقي قريب كما
وعدت
الف تحيه
وارقد عافيه

بيلي يا مبدع ومدهش

بشم فيك ريحت الاهلية

واصل واحنا معاك
بندهش
مدثر تيف تيف

Quote: بيلي يا مبدع ومدهش بشم فيك ريحت الاهلية

الشاعر مدثر
عرفنا الإدهاش معكم وبكلماتكم..
وبالاهليه كانت افرازات الاشياء الجميله
بصحبة الجميلين امثالكم واخرون يخفق القلب
لزكرهم ..
كن علي مقربه

صمت تام





متابعه حسيسه



مودتي

Quote: انا لسه متعطش لعينيك .. اعاين جوه في جواك افتش عن ليالي قضيتها شاكي باكي فرحان بالهزيمه عن ورده سقيتها هم سكران بريحتك وإشتياقي عن أغاني كتير بتحكي عنك إنت عني عنك عني .. إنت عن غيابك وإرتحالك وإشتياقك وإنتصارك والهزيمه وانا كلما بنسي الحقيقه تلقاني بتنفس غيابك

اجدد اقامتى هنا
الى وقت غير معلوم
لا ادرى...بس بيشتاق قلبى لحديثك
وحديثك بيشفى العليل

فليكن مقامك كما تريد هنا
وإلي وقت غير معلوم
بحيث لا ادري ولا تدري

احد العربي
لك من الود اكمله
ومن التحايا اخلصهابحق (الغول )
و ( انا مسكون ) وتلك التلاوين التي سكنت
بها طويلاً .

بــحـبــك

عارفه كيف نورك
مبعزق..
في المسامات
والرؤي..؟
ما شفتي كيف
انت وهواجسك
واحتمالات اللقا ..
فاتحين علي
ريده وسهاد ...
غربه وبعاد ...
شارع علي بابهم .. انا
ولا ما عارفه وين
تلقي الدروب ...
الفيها كم خليت
اتر !!
غنيت علي طول الطريق
شديت وتر ..
اسألي الخطوات
كانن معاي ...
شاهدات علي ..
غنوا المطر ..
اسألي النجمات
عارفات هواي...
شافن عيونك
جوه عيني ساعه ..
سهر ..
ولو فاكره عيونك انت
تبارح مني مكانه ..؟
ولا زمانا الفات
روح بي زكرانا !!؟
امانه عليك امانه ..
تسألي كل الكان
في السكه معانا ..
اسألي دربك.. ودقه قلبك ..
عن معنانا.
في كل مكان باين عنوانه
ايوه بحبك ....
وحياه الجرح النازف مني
بحبك ....
وكل ما تذيدي علي قساك
بحبك ....
وكيف من حبك تلقاني
افوت ......
واتمشي براي
كيفن تبدا الخطوه دريبه
معاي ..؟
ايوه وحاتك لسه بحبك ...
مهما الغربه تذيدو شقاي
ولا تحاول تسرق مني هواي ..

زي عيونك

لاقيت كتير
انا زي ملامحك
في الاماكن والفجج
زييك كتير
قابلت كم واحدين هناك
بيغالطوا الريد
والحجج
كم وكم من ناس كتير
انا شفتهم
واقفين بلا ساقين
علي طرف السحاب
انا كنت سامع صمتهم
لاقيت كتير
انا زي عيونك
في الشوارع
في البيوتات
في المدن
في الزقاقات

في الرواكيب
في الحزن
انا شفتهم
كمين عيون شايله
اختشي
داخلات علي الشوق
من وري
مارقات علي الخوف القبيل
سواها فيهن
وإنتشي
من غير قصد
قاصدات عيونو
وكل فعايلو الموحشه
فاكرنه ما عرف الحصل
اول زقاق لاقاه كان
سافر مشي
لاقيت كتير .. انا زيهم
بين الوجوه قابلتهم
بين المقاصد والصدف
وقت الدغيش البدري
بينات الغرف

جوه غنوات لابسه كم لون
من وطن
ناقشت فيهم
فكرة إبداع المسي
معني الجراحات والاسي
وسامحتهم
لاقيت كتير انا زيهم
إلا بس
ساعة وليد عينيك
يقاصد فيني دنياك
والحشي
ولمن يقص القلب
درب الريده فيني ..
ويهبشه
برجع بقالد عصبي نارك
من جديد
وعن خطاوي قديمه
مدفونه بخجل
جواي كلي افتشه
لاقيت كتير انا زيهم
لكني بس ما عرفتهم
زي عيونك
كم عيون انا شفتهم
لكني بس ما إلفتهم

Quote: ويا قلبي عيونك وين ؟؟ كاتلني الشوق كاتلني نديان الهم ماليني محزون لكني بغني شقيش الريد سايقني في دربي النار تحرقني ولي وين الدرب بودي غرقني الزول هالكني

أطالب بمنحي (إقامة دائمة هنا)
من زول بي أريحية هذا البيلي
يحمل هم الكلمة
ويطوّعها كيف ما شاء
....
إستزدناك فزد

Quote: أطالب بمنحي (إقامة دائمة هنا) من زول بي أريحية هذا البيلي ....

اخي / كمال

ممنوح .. وكده
وعشان اريحيتك

Quote: يحمل هم الكلمة ويطوّعها كيف ما شاء

نصوص كتبت في الزمن الغابر فخفت عليها..

ضفة وكـــلام

من خيالك ... مويه
وحبه من ..
كل الدعاش
ومني بس ..
كل السواحل ... والمني
وحبه من ..
عطر التراب .. والطين
قاعدين سوا
وعلي حافه حجر ...
تكينا النغمه
تنجمه
تساهر فينا تهتم
مدهوشه بيك
كلك ..
تفاصيلك ..
وانا ..

الــــــــدرب القــديم



خايف ....
علي داك .. الدرب

ترجع عيونك من نهارن ..

عن عمد ...

وعلي اتر الدواخل ..

ياهن خطي الريد

الزمان ...

كان مشرق ..

ومنكرب ..

زمن كان الخيال ..

تريان ولف ..

عشق الصباحات ..

والندي ..

وطعم البشاشات ...

عطر عصب كل الغنيوات

من طرف ...

...

ياهو خطوك ..

وكان زمانك ..

الاك خايف ....

علي داك الدرب

تنسي الحروف ..

البيها كم خطيت

خلاصك ...

والحكايات القديمه

شاهد معاناة

انتكاسك ..

وقت همك عليك ..

شرّّّك رقد ..

شتّّّر نعاسك

رغم انك ...

كنت في اول

صباحك