Post: #1
Title: تواليت موبايل
Author: بدرالدين شنا
Date: 07-05-2005, 03:44 AM
هي القصرية
والقصرية ليست فرداً من أفراد القصر الملكي وإنما هذا الإسم وحسب إعتقادي جاي من تقصير المسافة بين المرأة النفثاء والتواليت فهي تعتبر تواليت متحرك (موبايل) وفي رواية مو(بايل).. فكلما ظهر رصيد لدا النفثاء جاءوها بالموبايل
نسوان من حلتنا مشن الدكان يشترن حاجات الولادة وكان من ضمن الحاجات المطلوبة قصرية والنسوان كان فيهن واحدة طيبة وعلى نياتها سألت سيد الدكان قالت ليهو
هي القصرية دي بي كم؟؟؟
قال ليها بي خمستاشر الف
قالت ليهو الهملا آيمة بسوو بيها شنو؟؟؟
قال ليها والله البسوهو بيها أبعرفوا علا بي خمستاشر
فأنا حاولت براي كدي القى إجابة لسؤال تلك المراة
فتذكرت قصة العزابة الكان في واحد ثقيل بجيهم كل يوم وكت العشاء ... بس يختو الصينية في وشهم زولك يجي داخل فزهجوا منو زهج شديد غيروا المواعيد ما نفع ما فضل ليهم شئ إلا يرحلوا ويغيروا البيت ففي النهاية تفقتقت قريحة أحدهم وقال ليهم الزول دا خلوا علي أنا فبدل تغيير المواعيد خلونا نغير المواعين ومجرد مايجي الزول دا إنتو أعملو فيها إنكم متعشيين وأنا بظبط ليهو العشاء وبتعشى معاه ومن دربو داك على الدكان إشترى عدد واحد قصرية ودلق عليها ذلك الفول المظبط الشهي وقال للضيف اللدود تعال أتعشى وكانت النهاية
فصدقوني يا شباب القصرية (الموبايل) دا مش لو شحنتو في فول مصلح لو شحنتو بي تحلية بت الحسين ما بتلقى شبكة
أها أنا بوستي إنتهى بعد دا النستعد للتوابيت
|
Post: #2
Title: Re: تواليت موبايل
Author: بدرالدين شنا
Date: 07-05-2005, 06:12 AM
Parent: #1
43 زائر ولا واحد دخل إيدو مافي
البوست دا أنا كاتبو في قصرية؟؟؟
|
Post: #3
Title: Re: تواليت موبايل
Author: بدرالدين شنا
Date: 07-05-2005, 06:14 AM
Parent: #1
أجيب ليكم الموبايل في بيوتكم؟؟؟
|
Post: #6
Title: Re: تواليت موبايل
Author: ابو جهينة
Date: 07-05-2005, 06:23 AM
Parent: #3
شقيقي أبو البدور
ياخي أدينا فرصة بالأول نكمل الضحك و بعدين نجيك.
يقال و العهدة على الراوي أن القصرية كانت مقصورة فقط على سكان القصور أيام لم تكن هناك ( أدبخانات و لا سايفونات ) .. فكانت القصريات تقوم مقام المرحاض المتحرك .. أما بقية الرعية فكانوا يدخلون أقرب خرابة أو غابة أو يهبطون وادٍ غير ذي سكان.
تخريمة : شافع جيراننا جابو ليهو قصرية بلاستيك مرسوم عليها صورة كدة زى الديناصور.
الشافع حلف ما يقعد فيها .. و أهلو متحيرين و يدقو فيه ( إشمعنى ود الجيران أصغر منك بيقعد يا مبشتن ) و يجضمو فيهو ..
في الأخير جابو ليهو قصرية زى حقات زمان العاملة زى حلة الفخار ديك .. الشافع إتحكر و قعد .. و مرات قالو يقعد يغني و يزح بيها من بكان لي بكان إلى أن يقضي أمرا كان ( ممسوكا ) ..
أرقد بألف عافية
|
Post: #8
Title: Re: تواليت موبايل
Author: بدرالدين شنا
Date: 07-05-2005, 06:53 AM
Parent: #6
شقيقي البريدو جلال
Quote: و مرات قالو يقعد يغني و يزح بيها من بكان لي بكان إلى أن يقضي أمرا كان ( ممسوكا ) ..
|
مخليها في وضع نغمي وهزاز؟؟؟
لكن (ممسوكا) دي قتلتني ضحكاً
|
Post: #4
Title: Re: تواليت موبايل
Author: بدرالدين شنا
Date: 07-05-2005, 06:14 AM
Parent: #1
توابيت
|
Post: #5
Title: Re: تواليت موبايل
Author: dmoo3
Date: 07-05-2005, 06:19 AM
Parent: #4
الحقيقة انو مصاريني مقطعة بالضحك
و ما قادرة اعبر
ما بسالك يا بدر الدين
هههههههههه
ناس السلطنة كيف؟
قول ليهم جايين قريب
دموع
|
Post: #7
Title: Re: تواليت موبايل
Author: بدرالدين شنا
Date: 07-05-2005, 06:43 AM
Parent: #1
Quote: ناس السلطنة كيف؟
قول ليهم جايين قريب |
ربنا يجيبكم بالسلامة يا دموع والسلطنة عن بكرة ابيها تنتظر موكبكم وتحياتكم وصلت
تسلمي يا يمة من قطيع المصارين
|
Post: #9
Title: Re: تواليت موبايل
Author: قرشـــو
Date: 07-05-2005, 07:18 AM
Parent: #1
العزيز بدر الدين
لك التحية
يازول وين انت غاتس .....
بالمناسبة شايف القصرية دى اتلغت تماما عند النفس ..
يعنى الواحدة تلد وتمارس حياتها عادى تمشى وتجى واى حاجة ...
الحصل شنو يا ربى ؟؟؟؟
زمان النسوان كانن بتدلعن ولا نسودان هسع كسرن القيد ؟؟؟
--------
اعمل حساب التوابيت
--------
مع تحياتى
|
Post: #10
Title: Re: تواليت موبايل
Author: بلدى يا حبوب
Date: 07-05-2005, 08:19 AM
Parent: #1
بدرالدين شنا
والله ضحكتنى الله يديك الصحة بس عندى ليك مداخلة ....
ما علاقة عنبر قصار الكان زمان بمستشفى امدرمان والقصرية؟؟؟؟؟؟؟؟؟؟؟؟؟
وللذين لا يعرون عنبر قصار بمستشفى امدرمان كان مشهورا بأعلى التوريدات الى المقابر لدرجة انو اى امراة ترقد به وهى فى حالة كومة وبمجرد ان تصصح شوية وتعرف انها فى عنبر قصار تطلب تحوليها او الخروج من المستشفى واكثر الناس كان فرحة بتكسير عنبر قصار النساء .
وعلى وزن عنبر قصار عندنا حبوبة مسنة دخلت فى كومة مميته لدرجةان ابنائها اصبحوا يريدون لها الشهاده فى الاذن ومرت من الكومة بسلام واول ما فتحت خشمها قالت لاولادها والله الحمد الله عرفتكم دايرين تلحوقنى ناس عنبر قصار ..
تحياتى
|
Post: #11
Title: Re: تواليت موبايل
Author: بدرالدين شنا
Date: 07-05-2005, 10:01 PM
Parent: #1
الحبيب قرشو
سلامي وإشتياقي
| Quote: بالمناسبة شايف القصرية دى اتلغت تماما عند النفس .. |
أولاً عجبتني كلمة (النفس) بضم النون وتشديد الفاء أما قصة إلغاء وتهميش القصرية فأنا فعلاً لاحظت إنو القصرية إنسحبت إنسحاب تكتيكي هي وعيالها (كيزان وكبابي المستشفى) ولم يبقى من العائلة سوى ذلك الطشت الكبير البختو فيهو عفشة البهيمة في الأعياد وهو الأخر في طريقه للإنقراض والذي أصبح من كترة الرقع زي جلابية الدراويش
الغالي بلدي ياحبوب
سلامي وإحترامي
| Quote: ما علاقة عنبر قصار الكان زمان بمستشفى امدرمان والقصرية؟؟؟؟؟؟؟؟؟؟؟؟؟ |
أعتقد إسم قصار جاء من تقصير العمر على حسب راي حبوبتك المسنة وإن كانت هناك علاقة فهي أن أصحاب الكومة دائماً يكونون (خارج الشبكة) ويحتاجون لتفريغ الرصيد
لك معزتي
|
Post: #12
Title: Re: تواليت موبايل
Author: almulaomar
Date: 07-06-2005, 00:41 AM
Parent: #1
أخونا بدر الدين شنا أبو أواب
لك التحية والتقدير
يقصر الملح يا أخوي ، يندرج مقالكم هذا في باب الأدب الأدبخاني ، وهو فن من الفنون التي كان لها نصيب في حقب مضت ، ويقابلها في الشوارع الكتابة على الجدران وبيوت الراحة وبراميل الكوشة أيام أن كان للكوشة برميل منقوش جانبه. وبيت الراحة عندنا يماثل بيوت الأشباح في حين أن بيوت الراحة في الدول المتقدمة أكثر أناقة وجمالاً وإلهاماً من الـ Living room أو غرفة النوم حتى.
كنت وإلى وقت قريب أظن أن القصرية هذه من إبتداعات قيصر شأنها في ذلك شأن الولادة القيصرية لكن يبدو أن أبا جهينة ضليع في هذا المقام فقد أوضح أيده الله أن هذا الماعون كان يستخدمه سكان القصور من الطبقة الوسطى فما فوق ، أما بقية خلق الله فكان عليهم قضاء الحاجة في الخرابات أو التيه في الوديان ، بل عليهم أيضاً إفراغ القصرية بعد إستخدامها من قبل سكان القصور ، لكن إذا طبقنا هذا الوضع على حالنا في عصور سابقة نجد أن سكان قشلاق البوليس في العاصمة المثلثة وضاحيها وكذلك ناس السكة الحديد والقطاطي هم من الطبقة البرجوازية ، الآن فقط عرفت لماذا يقول بعض الغبش أنه مارق الخلا – أى لقضاء الحاجة – لكنني ما زلت لا أفهم أني للمرء أن يقول عاوز أو ماشي أتسير ، فهل سوف يتسير بأن يسير إلى البحر ويقطع جرايد النخل أم يسير وعين الله ترعاه.
|
Post: #13
Title: Re: تواليت موبايل
Author: بدرالدين شنا
Date: 07-06-2005, 04:22 AM
Parent: #1
صديقي وحبيبي وقريبي الملا عمر
سلام وإحترام وإكرام وشوووووووووووق
لك أجر الإجتهاد في معرفة العزيزة القصرية علماً بأنني سالت عنها الباحثة(قوقل) في الإنترنت فقالت يطرشني ويعميني وقالت أنها لم تعاصرها ولم تقاصرها وطلبت مني أن أسال جدتها الساحرة (قاقول) هل سمعت عنها في المراحل الدراسية تلك العجوز الشمطاء
لك محبتي وريدي
|
Post: #14
Title: Re: تواليت موبايل
Author: almulaomar
Date: 07-06-2005, 06:12 AM
Parent: #13
أستاذ حلا بدرالدين
أجد أن بحثك عن القصرية لم يؤت ثماره في قوقل وجميع محركات البحث لأن هذه الأداة التي تبحث عنها نكره في العهد الحديث فهي دائماً not found ولأن قاقول الساحرة الشمطاء إنقرضت ولحقت الصح فهي أيضاً لن تفيدك لأن الموتى لا يتكلمون حيث أن زمان ساحرتك قاقول لم يشهد التصوير بالفيديو أو صحافة التبلويد والصحفيين المعروفين بالبابراتزي Paparazzi الذين صادوا المرحومة دينا ودودي الفايد وهم صحافيين تخصصهم إصطياد المشاهير وكشف المستور ، ولأن أداتك المعروفة بالقصرية هي مكشوفة خلقه وليست في حاجة إلى كشف ولأن التصوير كما أسلفت لم يكن موجود أصلاً في عهد القصرية لذلك لم يخلد التاريخ تلك القصعة ولم يكتب لمخترعها براءة إختراع فأصبحت تصنع من الطلس والبلاتسيك والميلامين وحتى البياركس.
|
Post: #18
Title: Re: تواليت موبايل
Author: بدرالدين شنا
Date: 07-06-2005, 10:25 PM
Parent: #14
| Quote: لذلك لم يخلد التاريخ تلك القصعة ولم يكتب لمخترعها براءة إختراع فأصبحت تصنع من الطلس والبلاتسيك والميلامين وحتى البياركس. |
زي ما بقولوا أهلنا الشوام : بس هادا والله حرام .. ليش عمبعملوا هيك؟؟؟
يا ملا ياحبيبي فالقصرية ليست قاصر ولا تحتاج لوصاية من أحد وأنا بدافع مش عشانا بس عشان اللفبطنها
لك خالص حبي ووفائي
|
Post: #15
Title: Re: تواليت موبايل
Author: مصدق مصطفى حسين
Date: 07-06-2005, 06:18 AM
Parent: #1
العزيز بدر الدين شنا
( يا حليلك و يا حليل أيامكم )
أضحكتنى حد الإنفقاع .. لكن ما إنفقعت ، الحمدلله ....
طيب .... موقع المس كول من القصريه شنوو ؟؟
شوفو هنا مــــس كــــول ،، كاراكاتير
|
Post: #19
Title: Re: تواليت موبايل
Author: بدرالدين شنا
Date: 07-06-2005, 10:26 PM
Parent: #15
الرائع مصدق مصطفى سلامي وفرحتي بطلتك وبحروفك
| Quote: طيب .... موقع المس كول من القصريه شنوو ؟؟ |
إخراج ريح
|
Post: #16
Title: Re: تواليت موبايل
Author: almulaomar
Date: 07-06-2005, 06:36 AM
Parent: #1
بالطبع أخي بدر الدين أنا لم أسمع بالساحرة قاقول ولا king Solomon mines ولا طه القرشي حيث أنني لم أعده وهو مريض ولم أرافقه في ذهابه إلى مستشفى بحري ولا قعدات أمرؤ القيس عن طريق المراحل الدراسية لأسباب يأتي في مقدمتها أنني الصغيرون الما كبير ، لكن المهم في الأمر أنني سمعت بيها كثقافة عامة زيها وزي الحرب العالمية الثانية وفوز بيرو بكأس العالم وولادة المناضل العظيم نيسلون مانديلا وإكتشاف منابع النيل والحملة الفرنسية على مصر وبارتي الملك نمر لي كتشنر باشا.
بس يا بدر الدين يا أخوي ما هي العلاقة بين القصرية وبين عبارة سوف نبذل قصاري جهدنا التي كثيراً ما يرددها الساسة في بلادنا ، وهل هناك ما يمنع إنسياب جهودهم بالرغم من كل هذا البذل في أن تتمخض.
|
Post: #20
Title: Re: تواليت موبايل
Author: بدرالدين شنا
Date: 07-06-2005, 10:27 PM
Parent: #16
| Quote: بس يا بدر الدين يا أخوي ما هي العلاقة بين القصرية وبين عبارة سوف نبذل قصاري جهدنا التي كثيراً ما يرددها الساسة في بلادنا |
طبعاً لو ما بذلوا قصارى جهدهم فقطعاً الجنيه بتاعنا بصل للقصرية
أرقد عافية حبيبي ملا عمر
|
Post: #17
Title: Re: تواليت موبايل
Author: صديق الموج
Date: 07-06-2005, 06:54 AM
Parent: #1
بدر السمح سلام طويل وليس قصير ودخولى هنا كان قسريا او قصريا
لا ادرى ..يمكن عشان بريدك وبخاف عليك..ما يهمنى فى الموضوع
نحن اولاد امدرمان احم احم طبعا كان عندنا قصريات ..لكن انت
ومصدق بتاع جزيرةالفيل ده كانوا بختوكم على الارجل وبقولو ليكم
انح اح..فعشان كده خلونا نحدثكم نحن عن القصريات وسوف يكون
حديثنا على مستوى القاعدة (ما بتاعت بن لادن) القاعدة التانية
الاصل قسرية اى ان الجلوس عليها يكون له احكام كمثل حالة النفس
القال عليها الزول السمح بتاع التصاريف الفوق ده ويقعد عليها
قسريااى اصحاب الاحتياجات الخاصة لمثلها والاطفال للتعلم..واضغمت
السين فى الراء المخففة اضغاما بغنة فصارت قصرية والله اعلم.
اما استعمالها فتستعمل مع الكراهة حتى عند النفس لان الروائح
التى تتركها لا يمحاها الديتول.
الله يقرفك يا بدر شايف البوست ده طلعت ليه ريحة.
ياخى انت تعال بقصرية بى عصرية المهم نسمع حروفك يا سمح،،
|
Post: #21
Title: Re: تواليت موبايل
Author: بدرالدين شنا
Date: 07-06-2005, 10:28 PM
Parent: #17
حميمي صديق الموج
سلام وسؤال عن الحال وعتاب عن الغياب
Quote: بدر السمح سلام طويل وليس قصير ودخولى هنا كان قسريا او قصريا
لا ادرى ..يمكن عشان بريدك وبخاف عليك.. |
أنا البريدك وبريد بريدك وعايز بريدك
لكني زعلان منك عشان عيرتني بعدم القصرية ووضعتني بين أرجل أمي ومششتني بالسفنجة المربوطة بي سلكة
لك حبي يا ود أم درمان
|
Post: #22
Title: Re: تواليت موبايل
Author: Tabaldina
Date: 07-07-2005, 00:04 AM
Parent: #1
..
.
| Quote: أها أنا بوستي إنتهى بعد دا النستعد للتوابيت |
سلام يا أستاذ شنا ..
صدق بالله كل ما أجي اتصفح المنبر ومن أنت
كتبت البوست بقراهو ( توابيت موبايل ) ..وبعد ما قريتو
الموضوع لسه فى رأسي أها دحين قلت النعلق ليك..
بس الظاهر تابوتك بره الشبكة لسه ..
دمت يا استاذ بقدر ما امتعتنا ..
|
Post: #23
Title: Re: تواليت موبايل
Author: newbie
Date: 07-07-2005, 00:44 AM
Parent: #22
بدر الدين
طريتو مشوار القصاري ولا شنو؟
غايتو نحنا ما عاشرناها ,, لكن كنا بين القصرين
|
Post: #25
Title: Re: تواليت موبايل
Author: بدرالدين شنا
Date: 07-07-2005, 03:12 AM
Parent: #23
الصديق نيوبي
سلام طويل عريض
| Quote: غايتو نحنا ما عاشرناها ,, لكن كنا بين القصرين |
معناها إنت قاصر
أخبار المطر شنو؟؟؟
|
Post: #24
Title: Re: تواليت موبايل
Author: بدرالدين شنا
Date: 07-07-2005, 03:12 AM
Parent: #22
الغالي النفيس تبلدينا
سلام يحمل كلام مضمونو حبي وإحترامي
| Quote: بس الظاهر تابوتك بره الشبكة لسه .. |
الحمد لله التابوتي بره الشبكة عشان ما يجي زول (يتبتب) لي في كتف بوستي
تسلم يالحبيب
|
Post: #26
Title: Re: تواليت موبايل
Author: Munir
Date: 07-08-2005, 03:32 PM
Parent: #24
بعاعيت
|
Post: #27
Title: Re: تواليت موبايل
Author: عبدالماجد فرح يوسف
Date: 07-08-2005, 04:13 PM
Parent: #1
يا بدر السمح
سلام ومشتاقين كتير
قلتلي القصرية made in wain?
لانو الوكت داك في السودان ما كان في مصنع بتاعات البتاع ده
وهل ليها علاقة بي صحن الطلس والكوز الأبيض أبرقعة
حاول شوف لينا المصدر
تعرف يابدر أخوي الإنقليز هنا لسا عندهم السحاره أتاريهم هم الجابوها لينا
مودتي وإحترامي
|
Post: #28
Title: Re: تواليت موبايل
Author: المعتمد
Date: 07-08-2005, 11:22 PM
Parent: #1
الاخ بدر الدين
سلام.
والله انت باقى لى يا البدر فى اجازة الجماعة معاك حسيت انه فى حاجة جديدة فى الطريق وقعدت كل يوم تفكر فى مصاريف السماية والشافع الجديد وهلمجرا وما عارف تسد الابواب الاتفتحت عليك دى كيف. اخيرا قمت مسكت فى اصغر حاجة ممكن تحتاج ليها المرة وما بتكلفك الا خمستاشر الف وقلت تشوف رائي الناس فيها شنو.
عليك الله العزابة بتاعنك ديل العملوهو فى الدنيا شوية؟. ما بركة البقت على القصرية.
لك الود
والف باقة ورد
|
Post: #29
Title: Re: تواليت موبايل
Author: بدرالدين شنا
Date: 07-09-2005, 04:24 AM
Parent: #1
الظريف منير
سلاااام
كان ما زحيت مني بعاعيت بي نزلتي دي
حبيب قلبي عبدالماجد فرح يا سيد الفرح
سلام كتييييييييييييييييير
| Quote: تعرف يابدر أخوي الإنقليز هنا لسا عندهم السحاره أتاريهم هم الجابوها لينا |
إذا كان السحارة إنجليزية معناها القصرية أسترالية
تحياتي لي أنتما
|
Post: #30
Title: Re: تواليت موبايل
Author: ابو مهند
Date: 07-09-2005, 05:06 AM
Parent: #1
بدور حبيب قساي والله العظيم ليك وحشه, وسالت منك سؤال الضهبان,وفتشت عليك جوه عنوانين البوستات,لدرجة اعيتني,,وين كنت? معقوله كل ده في الصحراء,جاي كداري ولا شنو?
انا دخلت اسلم عليك و اطمئن...
وتحي كل نفسات السودان,,وعاش المو..بايل مقرب المسافات...
دوما..فاتح 
|
Post: #31
Title: Re: تواليت موبايل
Author: بدرالدين شنا
Date: 07-09-2005, 10:14 PM
Parent: #1
حبيبنا وعريسنا ومعتمدنا
سلام وشوق جبال
| Quote: وقعدت كل يوم تفكر فى مصاريف السماية والشافع الجديد وهلمجرا |
والله حاجاتك القلتهن ديل ما فضل لي فيهن إلاَّ هلمجرا
قال شافع جديد قال
ياربي تلمنا مع المعتمد وود العمدة وكل الجميلين
صديقي الغالي أبومهند
شوقي ليك طال
| Quote: انا دخلت اسلم عليك و اطمئن... |
تسلم ياود أمي من كل بلاء وربنا يحفظ ليك أسرتك يا حبيب قلبي
|
Post: #32
Title: Re: تواليت موبايل
Author: almulaomar
Date: 07-13-2005, 00:33 AM
Parent: #1
أخي أبو أواب
يقول اللورد كتشنر باشا سليسل الملكة فكتوريا واللورد كارنغتون والسير أليكس فيرجسون أن عنوان مقالكم هذا جميل لكن الأجمل أن يكون موبايل تواليت على وزن موبايل فون
تحياتي بطول شبكة الهواتف الجوالة في العالم
|
Post: #33
Title: Re: تواليت موبايل
Author: بدرالدين شنا
Date: 07-13-2005, 01:26 AM
Parent: #1
| Quote: عنوان مقالكم هذا جميل لكن الأجمل أن يكون موبايل تواليت على وزن موبايل فون |
كنت سأتفق معك وآخد بيدك (ولا أطلبها) واشدد أزرك وأكون لك عضدا لو كان الموضوع عن الموبايل ولكن يا ملاي الموضوع عن التواليت فهو تواليت ممبول وليس موبايل متولت مع خالص تقديري لمجموعة الجهاز الفني الذي إستقدمته من أجل إقناعي
لك تحياتي ولام العيال وأحمد (لاعب الدافوري) وإخوته الكرام
|
Post: #34
Title: Re: تواليت موبايل
Author: Ali Alhalawi
Date: 07-13-2005, 08:03 AM
Parent: #33
عييييك يا بدر الدين .. الظاهر غيبتك الطويلة دى كانت غيبة "قسـرية"
قبل يومين دخلت محل راقى جدا مختص بالأدوات الصحية و رأيت قصريتك الما بتغبانى تتوسط كرسى وسير و مكتوبا عليها بالخط الكوفى المنمق بتاع الأنقليز "Mobile Toile" .. قصرية لو تعرفنا عليها أيام كنّا عذّابة فى الديم لأستمتعنا فيها بأكل البوش و فتة الكوارع .. سيب البحث فى القوقل و أبحث عنها فى كتاب "قون الشريف قاقل"
|
Post: #36
Title: Re: تواليت موبايل
Author: almulaomar
Date: 07-13-2005, 11:54 PM
Parent: #1
مقدمة البرامج الأمريكية الشهيرة أوبرا وينفري مرت بطور الموبايل تواليت فقد ذكرت أنها شاركت في برنامج يصور الحياة في العام 1762م على ما أظن فكان لابد لها أن تسخدم القصرية ولما لم تستطع كان لابد لها أن تقضي أمراً كان مقضيا في الخلاء ولا الرفيق الفسل أو القصعة الضيقة
|
Post: #37
Title: Re: تواليت موبايل
Author: بدرالدين شنا
Date: 07-14-2005, 01:05 AM
Parent: #1
| Quote: سيب البحث فى القوقل و أبحث عنها فى كتاب "قون الشريف قاقل" |
حلاتك يا الحلاوي وحلاة سربعتك وأنا فخور بك بين البورداب وحلوة شديييييييييييييييييد قون الشريف قاقل
توا ليت شعري هل ابيتنا لليلة.....
الشريف ياسر الشريف
مني ليك سلام يا...
أعتقد دي أول ليك زيارة لبيتي فمرحبا
وأشكرك كثيراً على هذه الهدية
 بس المشكلة موبايلك دا عايز ليهو رصيد بتاع فيل عديل كدا؟؟؟
لك حبي الضخم
|
Post: #38
Title: Re: تواليت موبايل
Author: بدرالدين شنا
Date: 07-14-2005, 01:38 AM
Parent: #1
| Quote: مقدمة البرامج الأمريكية الشهيرة أوبرا وينفري مرت بطور الموبايل تواليت فقد ذكرت أنها شاركت في برنامج يصور الحياة في العام 1762م على ما أظن فكان لابد لها أن تسخدم القصرية |
الشهيرة؟؟؟ يمين بالله إنت مسغَّف عديل كدا
أما أنا أوبرا واستوبرا من معرفتها
|
Post: #39
Title: Re: تواليت موبايل
Author: almulaomar
Date: 07-14-2005, 02:34 AM
Parent: #38
http://www2.oprah.com/index_du.jhtml
أها يا ابو أواب أدخل وشوف ده الموقع الرسمي لأوبرا بنت وينفري يمكن تكون قابلتها قبل كده في حافله أو ركشه أو كشه
لك ودي
|
Post: #40
Title: Re: تواليت موبايل
Author: بدرالدين شنا
Date: 07-14-2005, 03:25 AM
Parent: #1
هي واااااااااااااااي دي؟؟؟ وا فضيحتي وا فضيحتي وحات الله بعرفها
الكبر حصل والعيال بعاد والمسلسلات السورية وإيش أسوي
|
Post: #41
Title: Re: تواليت موبايل
Author: بدرالدين شنا
Date: 07-19-2005, 09:58 PM
Parent: #1
|
Post: #42
Title: Re: تواليت موبايل
Author: almulaomar
Date: 12-29-2005, 03:38 AM
Parent: #1
أخي بدر الدين
نعود للموبايل تواليت بمناسبة السنة الجديدة وبمناسبة نشاط المسئولين السودانيين في مجال الإستيراد من اليونان. والله يا البدري يا أخوي الحكاية دي حارقاني وقاصه قلبي ، فيحكي أن فلان ود علي وهو مزارع ضليع وقديم وجد أحد صبية المزارعين يقضي حاجته في مزرعته فأخذ طوريته ووقف بالقرب من الفاعل ودار الحوار التالي:
قوم
والله ما ….. ما أقوم
يا زول قلت ليك قوم
والله ما ….. ما أقوم
وبعد أن …… قال له فلان ود علي خمو ، فخماهو في ورشالة موز من الحجم العائلي – والورشالة هي ورقة شجر الموز أو لحاء الساق والمعني بين والله أعلم.
|
Post: #43
Title: Re: تواليت موبايل
Author: keiga2000
Date: 12-29-2005, 03:45 AM
Parent: #42
يديييييييييييييييك العافية اخونا بدرالدين سماحة
وشكرا لمواضيعك الشيقة
ابومصطفى
|
Post: #45
Title: Re: تواليت موبايل
Author: بدرالدين شنا
Date: 01-02-2006, 01:47 AM
Parent: #43
العزيز ابو مصطفى المريخابي
سلاااااااااااااام أحمر قاني
| Quote: وشكرا لمواضيعك الشيقة |
وشكراً لك يا صديقي على كلماتك الرقيقة
|
Post: #44
Title: Re: تواليت موبايل
Author: بدرالدين شنا
Date: 01-02-2006, 01:47 AM
Parent: #42
| Quote: وبمناسبة نشاط المسئولين السودانيين في مجال الإستيراد من اليونان. والله يا البدري يا أخوي الحكاية دي حارقاني وقاصه قلبي |
هو عليك الله يعني خلاص نحن المعانا كمل حتى نستعين بي اليونان
بعد شوية يسووا وزارة لإستخراج البراز والهجرة
الله يصلح الحال
|
|